@

ቤተሰብ...😍

https://youtube.com/channel/UCTVE0XNyzD4p-nq6dtE0LIw

ቤዛ ኩሉ ዓለም : ዮም ተወልደ::

እንኳን ለጌታችን፣ ለመድሀኒታችን እየሱስ ክርስቶስ የልደት በዓል አደረሳችሁ።

@

💚💛❤️ #የጥምቀት_በዓል 💚💛❤️
#ኑ_የጥምቀት_በዓልን_በሸዋ_ምንጃር_ኢራንቡቲ_እናክብር...?

👉 ከ14ኛው ክፍለ ዘመን ጀምሮ /ከ600 ዓመታት በላይ/ ከተለያዪ ደብራት የተውጣጡ ቁጥራቸው ከ44 ታቦታት በላይ የሆኑ በአንድ የጥምቀት ባህር ላይ እየወረዱ መከበር እንደጀመረ የሚነገርለት ብቸኛው የሐገራችን ስፍራ..፤
👉 በ1540 ዓ.ም በተመሰረተው የባልጪ ደብረ ሰላም ቅ/አማኑኤል ቤተ ክርስቲያን ውስጥ ታሪካዊ እና ለምርምር ጥናት የሚጠቅሙ ሥዕሎች በተለይም በአፄ ቴዎድሮስ ዘመን እምዬ ምኒልክ ሲማረኩ በ1857 ዓ.ም ከመቅደላ ከእስር ሲያመልጡ በኋላም ሸዋ በልቼ ከተማ ከ1861-1864 ዓ.ም ከአፄ ዮሐንስ ጋር ስምምነት ሲያደርጉ እና የመሳሰሉ በጠቢባን በዕጅ ተስለው እስከ ዛሬ ድረስ ሳይለቁ በወቅቱ የነበረውን ታሪካዊ መረጃ የሚያሳዩ ስነ-ስዕላት ያሉበት...፤
👉 በ16ኛው ክፍለ ዘመን በመንዝ ደብረ ኤጎራ እንደነበረ የሚነገርለት ታሪካዊው የሸንኮራ መጥምቀ ቅዱስ ዮሐንስ ታቦት፤ ለአባቶች በራዕይ ታይቶ ወዳዛ እንደሄደ እና ድንቅ ታሪክ ያለበት...
👉 አካባቢው እጅግ በጣም ውብ ገፅታ ያለው ማራኪ የህዝብ ባህል እና መስተንግዶ የሚታይበት ነው።
👉 አብረውን ተጉዘው በጥምቀተ ባህሩ ሜዳ ባህልና ቱሪዝሙ በሚያዘጋጅልን ድንኳን አርፈን ካልሆነም በግላችን አልጋ ይዘን እንዲሁም በተመጣጣኝ ዋጋ በራሳችን እየተመገብን ከአዲስ አበባ 146 ኪ.ሜ እርቀት ላይ ከተራን እና የጥምቀት በዓልን በባህል ልብሳችን ደምቀን እናክብር...!
👉 ትራንስፖርት እና በዕለቱ ቁርስን ጨምሮ 450 ብር ብቻ ሲሆን መነሻ ጥር 10 ሰኞ ከንጋቱ 11 : 00 ሰዓት መመለሻ ጥር 11 ማክሰኞ አመሻሽ ላይ ነው።

#ለበለጠ_መረጃ በ 0910101572 በመደወል ፈጥነው ይመዝገቡ

#ጓሳ_መገራ ወይስ #ዋሳ_መገራ...?

#ጓሳ_መገራ ወይስ #ዋሳ_መገራ...?

አገሯ ጓሳ መገራ አገሯ ጓሳ መገራ
ምነው አልሰማ አለች ብጣራ ብጣራ
አገሯ ጓሳ መገራ...

መንዝ አራባ ሃራ መድኃኔዓለም አከባቢ ጓሳ መገራ የሚባል ፓርክ ከአዲስ አበበ 288 ኪሎሜትር ርቀት ላይ መንዝ የጌራ ወረዳ ውስጥ የሚገኝ ሲሆን ተራራማ ሥነ ምሕዳር ያለው ቦታ ነው። ጓሳ ማለት የሳር አይነት ሲሆን ይኽ ሳር በጠባዩ ዝናምን ወደ ውስጥ በማስገር በውስጡ የመያዝ ችሎታ ስላለው አከባቢው ሁሌም እርጥብ ሆኖ እንዲቆይ ያስችለዋል። ከዛም ባለፈ በስፍራው ላሉ ዝቅተኛ ቦታዎች አመቱን ሙሉ የማያቋርጥ የወንዞች እና የምንጮች ፍሰት እንዲኖር ያስችላል። ይኼ ተፈጥሯዊ ተግባር በተመሳሳይ ለጣና ከጉና ተራራ የሚለገስ ሲሆን አከባቢውንም ለም ሆኖ እንዲኖር ከማድረጉም በላይ ያለ ጣና አባይ ያለ ጉና ጣና እንዳይኖሩ ምሁራኖች ያትታሉ።

ታዲያ ይኼ ጓሳ የተሰኘው ተራራማ ስፍራ ሸዋ ሮቢትን ይፋትን እንደ ስፖንጅ መጦ ከያዘው ውሃ ይቀልባቸዋል። /ይለግሳል/ አከባቢውንም እርጥብ አድርጎ ያኖራል። ፓርኩ በአካባቢው ሰዎች ከጥን ጀምሮ ሲጠበቀ የቆየ ሲሆን በውስጡም በኢትዮጵያ ብቻ የሚገኙት ቀይ ቀበሮዎች እና ጭላዳ ዝንጀሮዎችም ይገኙበታል። መንዞች ጥበበኛ ናቸውና ጓሳን ተንከባክበው ጠብቀው ለዚህ አድርሰውታል። ሀሳቤ ግጥሙ ቢሆንም ለማስረዳት እና በመጠኑም ስለጓሳ መገና እና ጓሳ ስለተሰኘው የሳር ዘር ማተቴን በጀ ብትሉኝ እንጂ እንዳትቃወሙኝ አምናለሁ።

ወደ ሀሳቤ ልምጣ ግን ግጥሙን ከእውነተኛው ታሪክ ጋ እያዋዛሁ ትንሽ አብሪያችሁ ልቆይ መልካም ፍቃዴ ነውና እናንተም መልካም ፍቃዳችሁ ቢሆን አብራችሁኝ ተሸዋ መንዝ እንዝለቅ..? በጀ እንግዲህ.. እንደሚታወቀው መንዞች እጅጉን ኩሩዎች ናቸው። ከዛ በላይ ግን ፍቅራቸው አይጣል ነው። ሲወዱ የፍቅር ወሰን የላቸውም። እህል ችግር በሆነበት ወቅት እንኳ እንግዳ ከቤታቸው እንዲጠፋ አይወዱም። የሰው ልጅ ከመብል ከመጠጡ ሳይሆን ለመንዜው ከአብሮነቱ ነው ጉዳዩ። በቃ አብሮህ ቢስቅ ቢጫወት ደስታው ወደር የለውም። ወዶህ ሲጠራክ አንቺ ነው የሚል። አቤት ፍቅር.... ታዲያ ያቺን ኩሩ መንዜ

"አገሯ ጓሳ መገራ አገሯ ጓሳ መገራ
ምነው አልሰማ አለች ብጣራ ብጣራ
አገሯ ጓሳ መገራ..." እያለ አፍቃሪው ሲጮህ ከተሜው ያልገባው አንዳች ሚስጥር አለ።

ኩራቷ ፍቅር አዋቂነቷን አይፈታተነውም። በክብሯ ግን ቀልድ የለም። ሙያን አዋቂዋ ያቺ የመንዝ ጉብል በጥሪ አትመጣም ኩሩ ነችና። ደጇ ጠንተህ፣ ተመላልሰ ካልሆነ በጀ አትልህም። ወዳጄ ምን አለፋክ አገሯ ጓሳ መገና እኮ ነው። በውስጧ እንደ ሳሩ ፍቅር ትፀንስ እንጂ በጥሪ አትሰማህም። ጓሳስ ቢሆን የአከባቢውን ወንዞች ይመግባል እንጂ መች እራሱን አዋርዶ መግቡኝ ይላል። ሴቲቱም እንዲያው ነች..! ፍቅር ቢኖርባትም ያለ ደጅ ጥናት ያለ ድካም በጀ አትልህም። በቃ መንዜ ነቻ ሊያው ጓሳ መገራ...

ጀማሪው አንጓው እንዲህ ይላል...

አለ ጠፋ ጠፋ የልቤ ላይ እሳት
አንቺም እንደ-መቅረት እኔም እንደመርሳት
ከእንግዲህስ ወዲያ እኔ ሰው አልወድም
በበረደው ልቤ እሳት አላነድም
አገርሽ ጓሳ መገራ ያለሽው ጓሳ መገራ
ምነው አልሰማ አልሽኝ ብጣራ ብጣራ
አገርሽ ጓሳ መገራ...

በጀማሪው ስንኝ "አለ ጠፋ ጠፋ.." በፍቅሯ የነደደው ልቡ በመንዝ ቅዝቃዜ ብቻ መኝታ ተዳብሎበት እንደ መርሳት ቢጤ ሽው ሲልበት ይታየውና ደሞ ማልዶ ልመና ይገባል። ልብ በልልኝ የግጥሙን አወራረድ.. እንደ መርሳት አለ እንጂ እረሳሁሽ አላለም። መርሳትማ መንዜዋ ወዶ አይቻልም። ቢቻልማ ደጅ ጥናት ያባከነው ሰው...፤ የምትጠላ ሴት ወዶ "ጠላሁሽ ኡ ጠላሁሽ.." እንዳለው ዘፋኝ ተመሳሳይ ቃል ባወጣ ነበር። መንዜን ከወደዱ መንዜም ከወደደ መጥላት የሚሉት ነገር ስለመኖሩም የሚታወስ አይደለም። ስለዚህ ነው እኔም እንደ መርሳት ብሎ መዛቱ ያልኩህ። ግና ቅሉ እዚሁ ተጓሳ መገራ ሆነሽ ምነው ብጠራሽ አልሰማ አልሽኝ ይላታል። አይ ፍዳው...! ደሞ በሀሳብ ይዋጥና ከእንግዲህስ ወዲያ እኔ ሰው አልወድም በበረደው ልቤ እሳት አላነድም ሲል ከራሱ ይማከራል። እንዴት ተብሎ ከመንዜ ሴት ውጪ ሌላ ይወደዳል? ፍቅር አንድዶ ውበቷ አጋግሎ ደጉ የመንዝ አየር ያሰከነው ሰው ምን ቆረጠኝ ብሎ ሌላ ጉብል ይሻል..? እንደ-ፈረደበት እሷኑ ይማጸናል እንጂ...!

በጓሳ መገራ ተራራማ ስፍራዎች ውስጥ፤ ማልዶ የገሰገሰው ደጇ የጠናው አፍቃሪ አሁን ፍቅርና ድካም ናፍቆትና ደጅ ጥናት ተባብረው አደከሙት መሰል እንዲህ ይላታል...

"..ሄድኩኝ ሄድኩኝ'ና ቀረሁ ከዳገቱ
እሬሳሽን አንሺው በሏት ያቺን ከንቱ.."

ከተራራው ሲወጣ ሲወርድ ለመንዟ ጉብል ሲባክን የነበረው ወጣት ሄድኩኝ ሄድኩኝ እና ቀረሁ ከዳገቱ አለ። ጉልበቱ ዛለ ፍፁም አቃተው። ኩሩዋ መንዜ ደጅ ጥናቱን ይብቃ ባትለው ከተራራው ደርሶ ተዘረረላታ። ዛዲያሳ አሁን ትመጣ የለ...? ብልሃተኛው አፍቃሪ ሂዱና በፍቅርሽ ዝሎ በተራራው የወደቀውን እሬሳሽን አንሺው በሏት ብሎ መልዕክተኛ ላከ። አይዞህ #ከንቱ የምትለዋን ቃል አልረሳኋትም። በሏት ያቺን ከንቱ.. ሞቶ ቢሆን እሱን ለመቅበር መንከራተቷ ማንባቷ ከንቱ አሰኛት። ባይሞት ካለችበት ደጅ ሲመላለስ የቆየ አፍቃሪ ከሜዳው ተጎድቶ ወድቋል በሏት። አሁን ትምጣልኝ ያን ሁሉ ደጅ ብጠና ብጣራ አልሰማ ያለች አንዳች ሆነ ቢሏት ታለሁበት ስትከንፍ ትመጣ የለ ወይ ሲል ድካም በራሷ መጨመሯን ሲያወራ ከንቱ አላት... ከንቱ ማለት ላልተጨበጠ ነገር መባከን ሲሆን ቀድሞ መያዝ እየተቻለ በቸልታ ዝም ብሎ ኋላ አባሮ ለመያዝ መሯሯጥም በከንቱ ድካምን እንደ-መጨመር ነው።

ደግሞ አፍቃሪው ሰው፤ ተዓምር በሆነ አንደበቱ ስለ ምድራዊ ሰው እያወራ ስለመሆኑ ለአድማጭ ሁሉ ግራ እስኪያጋባ እንዲህ እያለ ይቀጥላል...

"የማላውቃትን ልጅ ማን አስገቡ አላችሁ
እሷም ታይታ ጠፋች እኔም ሞትኩላችሁ"

ወዳጄ /አንባቢ ሰው/ ይኼን ስንኝ አጤንከው..? ካጤንከው አበጀህ! ባታጤነው በኔ ሀሳብ ንጎድ..

"የማላውቃትን ልጅ ማን አስገቡ አላችሁ
እሷም ታይታ ጠፋች እኔም ሞትኩላችሁ"

አቤት የፍቅር ገለፃ...? እንዴት ያለ የተፈጥሮ ውበት ቢኖራት ነው ጃል..? እንደምንስ ያለ አገላለጥ...? አንዴ ቢያያት ቀልቡን የሰወረች ዳግም በምድር በፍፁም የማትታይ የመሰለች ምንኛ ብትዋብ ነው..? መንዝ አከባቢ እመጓ ቆላ ከሚባለው ስፍራ የእመጓ ቆላ ቅዱስ ዑራኤል ቤተ ክርስቲያን አለ። ብዙ ቃልኪዳኖች ያሉበት የተቀደሰ ስፍራ ነው። እንደሚነገረው ከሆነ ከነግሸን ከነ ቅዱስ ላሊበላ የሚስተካከል ቃልኪዳንን ይዟል። አፍቃሪው ቢሻው ከቅዱስ ዑራኤል ይማጸናል! ቢሻው ደሞ ውቢት ካለችበት አቅራቢያ ካለው መንዝ አራባ ሃራ መድኃኔዓለም ሄዶ ታቦታቱን ይለምናል... የወደደ በተለይ ደግሞ የመንዝ ሴትን ያፈቀረ ከደጀ ሰላሙ መቅረት መች ይሆንለታል..? እሷ ብትጨክን አራራልኝ ብትሰማኝ ልቧም ቢቀበለኝ ሲል ከአምላኩ ጋ ቃልኪዳን ይገባል..!

ሙዚቃውን ከዚህ አድምጡት...👇

https://youtu.be/2a27kK0ikts

✎✍#ታታ_አፍሮ /ነፃ ብዕር/

የአምላካችሁን የእግዚአብሔርን ቃል ኪዳን ታቦት ሌዋውያን ካህናት ተሸክመውት ባያችሁ ጊዜ፥ ከሰፈራችሁ ተነስታችሁ ተከተሉት።"
(መጽሐፈ ኢያሱ ወልደ ነዌ 3:3)

ከተራ ምንድን ነው?

ከተራ ''ከበበ'' ከሚለው የግዕዝ ግስ የወጣ ነው። ፍቺውም ውኃ መከተር /መገደብ/ ማለት ነው። የጥምቀት ዋዜማ ታቦተ ሕጉ ከቤተ መቅደስ ወጥቶ ውኃ ባለበት አከባቢ ስለሚያድር የየአጥቢያው ሕዝብ እየተሰበሰበ በወንዝ ዳር ወይም በምንጭ አካባቢ ድንኳን ይተከላል። ድንኳንም ከሌለ ዳስ ሲጥል ይውላል። የምንጮች ውኃ ደካማ በመሆኑ እንዲጠራቀም ይከተራል። ጉድጓድ እየተቆፈረ ውኃው እንዳይሄድ ይገደባል።

በበዓለ ጥምቀት የታቦታቱ ወደ ወንዝ መውረድ መድኃኔዓለም ክርስቶስ በእደ ዮሐንስ ለመጠመቅ ከገሊላ ወደ ዮርዳኖስ በዋዜማው የመሄዱ ምሳሌ ነው። ታቦቱ የጌታችን የመድኃኔዓለም ምሳሌ ሲሆን ካህናቱም የመጥምቁ ዮሐንስ ምሳሌ፤ መዘምራኑ'ና ሕዝቡ ደግሞ መጥምቁ ዮሐንስ ያጠመቃቸው ሕዝቦች ምሳሌዎች ናቸው። በባሕረ ጥምቀቱ ላይ በሚንሳፈፍ ነገር መብራት መደረጉ በርግብ አምሳል ለወረደው መንፈስ ቅዱስ ምሳሌ ነው።

ለመላው የክርስትና እምነት ተከታዮች በሙሉ እንኳን ለብርሃነ ጥምቀቱ በሰላም አደረሳችሁ። በዓሉን በሰላም ያሳልፍልን ዘንድ በዓለ በረከቱም ለዓገራችን ይተርፍልን ዘንድ ከልብ እንመኛለን።

@

የወልደ እግዚአብሔር ጥምቀት

ለምን ተጠመቀ?

መድኃኒታችን ኢየሱስ ክርስቶስ በሠላሳ ዘመኑ በእደ ዮሐንስ በፈለገ ዮርዳኖስ ተጠምቋል። ለምን ተጠመቀ? የሚል ጥያቄ መነሳቱ አይቀርም። የተጠመቀው እንደ አይሁድ ሥርዓት ለመንጻት፣ እንደ ዮሐንስ ጥምቀት ለሥርየተ ኃጢአት አልነበረም። ነገር ግን ስለሚከተሉት ምክንያቶች ተጠምቋል።

፩. ፩ ትሕትናን ለማስተማር

መምህረ ትሕትና የሆነው መድኃኒታችን ኢየሱስ ክርስቶስ ለተከታዮቹ አርአያ ይሆን ዘንድ የእጁ ፍጥረት በሆነው በአገልጋዩ በዮሐንስ እጅ ተጠምቋል። መጥምቀ መለኮት ዮሐንስ እኔ በአንተ ልጠመቅ ይገባኛል እንጂ አንተ በእኔ እንዴት ትጠመቃለህ? ብሎ ለማጥመቅ ፍቃደኛ አለመሆኑን ቢናገር ጌታ “አሁንስ ፍቀድልኝ እንዲህ ጽድቅን ሁሉ መፈጸም ይገባናል” በማለት እንዲያጠምቀው ያዘዘው መጠመቁን ለተከታዮቹ ትሕትናን ለማስተማር እንደሆነ አስረድቷል። ማቴ ፫ ፥ ፲፭።

፩.፪ አርአያ ለመሆን

ጥምቀት ዳግመኛ ከእግዚአብሔር የምንወለድበት ማለትም የልጅነት ጸጋን የምንጎናጸፍበት ምሥጢር ነው። ያለጥምቀት የዘላለም ሕይወት አናገኝም ስለዚህ ሰው ሁሉ መጠመቅ ግድ ስለሆነ እርሱ ራሱ በመጠመቅ ለእኛ አርአያ ሆኖናል።

፩.፫ የዕዳ ደብዳቤያችንን ለመደምሰስ

ጥንተ ጠላት ዲያብሎስ አዳምና ሔዋንን ካሳተ በኋላ በጨለማ መጋረጃ ጋርዶ አገዛዙን አጸናባቸው። ኋላም በሥቃይ ላይ ላሉት አዳም እና ሔዋን የእርሱ ባሪያዎች መሆናቸውን አምነው የባርነት ማረጋገጫ ደብዳቤያቸውን በዕብነ ሩካብ ጽፈው ቢያመጡለት አገዛዙን እንደሚያቀልላቸው ነገራቸው። እነርሱም እውነት መስሏቸው “አዳም የዲያብሎስ ወንድ አገልጋዩ ፣ ሔዋን የዲያብሎስ ሴት አገልጋዩ” ብለው በሁለት ዕብነ ሩካም ጽፈው ሰጥተውታል። ዲያብሎስም አንዱን በዮርዳኖስ አንዱን በሲኦል አስቀምጦት ነበር። ጌታም በተጠመቀ ጊዜ ዮርዳኖስ ያለውን የዕዳ ደብዳቤ እንደሰውነቱ ተረግጦ እንደ አምላክነቱ አቅልጦ አጥፍቶታል። በሲኦል የተጣለውን በዕለተ ዓርብ በአካለ ነፍስ ወርዶ ነፍሳትን ሲያወጣ አጥፍቶታል። ቆላ. ፪ ፥ ፲፫ – ፲፭

፩. ፬ አንድነቱን እና ሦስትነቱን ለመግለጥ

እግዚአብሔር አንድ ሲሆን ሦስት፣ ሦስት ሲሆን አንድ መሆኑ በዘመነ ብሉይ በሁሉም ዘንድ እንደ አዲስ ጎልቶ የማይታወቅ ምሥጢር ነበር። በአጭር ቁመት በጠባብ ደረት ተወስኖ ከሦስቱ አካል አንዱ አካል እግዚአብሔር ወልድ በሥጋ በተገለጠ ጊዜ አንድነቱና ሦስትነቱን ገልጦ አስተምሯል። ሦስትነቱን በትምህርት ከመግለጡ በፊት በጥምቀቱ ወቅት በገሃድ እንዲገለጥ አድርጓል። ሦስቱ አካላት በአንድ ቅጽበት በአንድ ቦታ ማንነታቸውን ገልጠዋል ሜቴ ፫ ፥ ፲፮ ይኸውም አብ በደመና ሆኖ በእርሱ ደስ የሚለኝ የምወደው ልጄ ይህ ነው ብሎ ሲመሰክር፣ መንፈስ ቅዱስ በርግብ አምሣል ወርዶ በራሱ ላይ አርፎ፣ አካላዊ ቃል ክርስቶስ በፈለገ ዮርዳኖስ ቆሞ በመታየት ኅቡዕ የነበረው የሥላሴ ምሥጢር ገሀድ ሆነ።

፪ በዮርዳኖስ ወንዝ የተጠቀበት ምክንያት

ጌታችንና መድኃኒታችን ኢየሱስ ክርስቶስ በዮርዳኖስ ወንዝ መጠመቁ የአጋጣሚ ጉዳይ አይደለም። ወይም በኢየሩሳሌም ውስጥ ሌሎች አፍላጋት ባለመኖራቸው እንደዚሁም ዮርዳኖስ የጠለቀ ወንዝ በመሆኑ አልነበረም። የዮርዳኖስ ወንዝን መርጦ የተጠመቀበት መሠረታዊ ምክንያት አለው። ምክንያቶቹም ፦

፪.፩ ትንቢቱን ለመፈፀም

ትንቢት ድርጊትን ቀድሞ የሚነግር ነው። አማናዊ ትንቢት ጊዜውንና ወቅቱን ጠብቆ መፈጸሙ አይቀሬ ነው። ጌታ በዮርዳኖስ ወንዝ እንዲጠመቅ ድርጊቱ ከመፈጸሙ ከሺህ ዘመን ቀደም ብሎ በቅዱስ ዳዊት አማካኝነት ትንቢት ተነገሮ ነበር። «ባሕር አየች ሸሸችም፤ ዮርዳኖስም ወደ ኋላ ተመለሰ ተራሮች እንደኮርማዎች ኮረብቶችም እንደጠቦቶች ዘለሉ። አንቺ ባሕር የሸሸሽ፣ አንቺም ዮርዳኖስ ወደ ኋላሽ የተመለስሽ ምን ሆናችኋል። እናንተም ተራሮች እንደ ኮርማዎች ኮረብቶችስ እንደ ጠቦቶች ለምን ዘለላችሁ? ከያዕቆብ አምላክ ፊት» መዝ ፻፲፫ ፥ ፫ -፮

የያዕቆብ አምላክ ጌታችንና መድኃኒታችን ኢየሱስ ክርስቶስ በዮርዳኖስ ወንዝ ሲጠመቅ ከላይ የተገለጠው ትንቢት ተፈጻሚነትን አግኝቷል።

፪.፪ ምሳሌውን አማናዊ ለማድረግ

ፈለገ ዮርዳኖስ ታሪካዊና የእምነት ምልክት ነው። ከእምነት ጋር የተያያዙ አያሌ ድርጊቶች ተፈጽመውበታል።

✔ ኢዮብ ከበሽታው የተፈወሰው በዮርዳኖስ ወንዝ ተጠምቆ ነው።

✔ኢዮብ የአዳም፣ ደዌ የመርገመ ሥጋ የመርገ ነፍስ፣ ዮርዳኖስ የጥምቀት ምሳሌዎች ናቸው።

✔ እስራኤል ወደ ምድረ ርስት የገቡት ዮርዳኖስን ተሻግረው ነው። ምእመናንም ወደ ርስት ሀገራቸው መንግስተ ሰማያት የሚገቡት በጥምቀት ነው።

✔ አብርሃም ከመልከ ጼዴቅ ጋር የተገናኘው የዮርዳኖስን ወንዝ ተሻግሮ ነው። መልከ ጼዴቅም ዮርዳኖስን ተሻግሮ ለመጣው ለአብርሃም ኅብስተ አኰቴት ጽዋዓ በረከት አዘጋጅቶ ጠብቆታል። መልከ ጼዴቅ የካህናት፣ አብርሃም የምእመናን፣ ዮርዳኖስ የጥምቀት፣ ኅብስተ አኮተቴት ጽዋዓ በረከት የሥጋ ወደሙ ምሳሌ ናቸው። ፈለገ ዮርዳኖስ መነሻው አንድ ወንዝ ሲሆን ዝቅ ብሎ በዮርዳኖስ እና በዳሮስ ይለያል። ዮር በእስራኤል በኩል ያለው ሲሆን ዳኖስ በአሕዛብ በኩል ያለው ነው። ወረድ ብሎ ደግሞ ሁለቱም አንድ ይገናኛሉ። በሚገናኙበት ቦታ ላይ ነው ጌታ የተጠመቀው ይህ ምሳሌነቱ

☞ ዮርዳኖስ ምንጩ ከላይ አንድ እንደሆነ ሁሉ የሰው ዘር ሁሉ ግንድ አንድ አዳም መሆኑን ሲያሳይ፣ ዝቅ ብሎ መከፈሉም እስራኤል በኦሪት አሕዛብ በጣኦት ወይም እስራኤል በግዝረት አሕዛብ በቁልፈት መለያየታቸውን ያሳያል። ዝቅ ብሎ መገናኘቱ ደግሞ በጌታችንና በመድኃኒታችን በኢየሱስ ክርስቶስ ትምህርት አምነው በመጠመቃቸው ወደ አንድነት መምጣታቸውን። ጌታ የተጠመቀውም በመገናኛው ነውና ሁሉንም አንድ ሊያደርግ መምጣቱ ያስገነዝባል።

፪.፫ የዕዳ ደብዳቤያችንን ይደመስስ ዘንድ

፫ ጥምቀት ለምን በውኃ ሆነ?

ጌታችንና መድኃኒታችን ኢየሱስ ክርስቶስ የተጠመቀው በውኃ ነው እኛም እንድንጠመቅ የታዘዝነው በውኃ ነው። ለምን በውኃ ሆነ ጌታችን ጌትነቱን ለመግለጽ ለምን በወተት ፣ በማር አልተጠመቀም? እኛስ ለምን በውኃ እንጠመቃለን፣ በማር በወተት ለምን አለደረገውም ቢሉ

✔ በኖኅ ዘመን ፍጥረት ሁሉ በውኃ ጠፍቶ ነበር ከዚህም የተነሣ ውኃ ለመዓት እንደተፈጠረ ይታሰብ ነበር። ዳሩ ግን ውኃ ለምሕረትና ለድኅነት የተፈጠረ መሆኑን ለማሳየት ጌታም ጥምቀቱን በውኃ አድርጓል።

✔ ማርና ወተት በማንኛውም ሰው ቤት አይገኙም ውኃ ግን በሁሉም ቤት ይገኛል። ጥምቀት በማር ወይንም በወተት አንዲሆን ቢደረግ ኖሮ ድኅነት ለሀብታሞች ብቻ በሆነ ነበር። በሁሉም ቤት በሚገኘው ውኃ በማድረጉ ጥምቀት ለሀብታም ለድሀ ሳይባል ለሁሉም እኩሉ እንዲደርስ መደረጉን እንረዳለን።

✔ ሌሎች ፈሳሾች አትክልት ላይ ቢያፈሱአቸው አትክልቱን ያደርቃሉ እንጂ አያለመልሙም። ውኃ ግን ያለመልማል! እናንተም በውኃ ብትጠመቁ ልምላሜ ሥጋ ልምላሜ ነፍስ ታገኛላችሁ ሲል ነው።

✔ ማርና ወተት ልብስ ቢያጥቡባቸው እድፍ አያጠሩም ውኃ ግን ያጠራል። ከኃጢያት እድፍ በውኃ ተጠምቃችሁ ትጠራላችሁ ለማለት።

✔ ውኃ መልክን ያሳያል እናንተም በውኃ ብትጠመቁ የሥላሴን መልክ በመንፈስ ታያላችሁ ሲል ነው።

✔ ውኃ እሳትን ያጠፋል እናንተም በውኃ ተጠምቃችሁ የልጅነት ጸጋ ካገኛችሁ ከገሃነም እሳት ትድናላችሁ ሲል ነው።

✔ ውኃ ከጽንፍ እስከ ጽንፍ ይደርሳል ጥምቀትም ከጽንፍ እስከ ጽንፍ ተዳርሷል።

በአጠቃላይ የጌታችን የመድኃኒታችን ጥምቀተ በዓል ከዘጠኙ ዓበይት የጌታችን በዓላት አንዱ ነው። በጥምቀት ልጅነት አግኝተናል። በልጅነታችንም አባታችን ብለን አምላካችንን እንጠራለን። አንዳንዶች በየዓመቱ የምናከብረው ጥምቀት እና በካህናት የተባረከ ውሃ መረጨታችንን እያዩ በየዓመቱ የምንጠመቅ የሚመስላቸው አሉ። ሆኖም የልጅነት ጥምቀት አንዴ የምትፈፀም ነች። ጥምቀት ከማይደገሙ ምስጢራት ውስጥ ነው። ስለሆነም ወንድ በአርባ፣ ሴት በሰማንያ ቀኖች ወደ ቤተ ክርስቲያን መጥተው ከአብራከ መንፈስ ቅዱስ አንዴ ልጅነት ያገኛሉ ወይንም እኛ ሁላችን አግኝተናል። በየዓመቱ የምናከብረው የጥምቀት በዓል ጌታችን የሰራልንን አምላካዊ ሥራ የምናደንቅበት እና የምናከብርበት፣ በማክበራችንም የምንባረክበት ቀን ነው።

እንኳን ለብርሃነ ጥምቀቱ በሰላም አደረሰን!
ልዑል እግዚአብሔር ለአገራችን ኢትዮጵያ እና ለዜጎቿ ከበዓሉ በረከት ይክፈለን!

ወስብሐት ለእግዚአብሔር ወለወላዲቱ ድንግል።

@

እንኳን ለቃና ዘገሊላ/ለቅዱስ ሚካዔል በዓል አደረሳችሁ!

‹‹ቃና ዘገሊላ›› ምንድነው?

ቃና ዘገሊላ በቀጥታ ትርጉም የገሊላዋ ቃና ማለት ነው። እንደ ኢትዮጵያ ኦርቶዶክስ ተዋሕዶ ቤተክርስትያን አስተምህሮ በጥምቀት በዓል ማግስት (ጥር 12) ቀን የቃና ዘገሊላ በዓል ይከበራል። ይህ በዓል ከጌታ ጥምቀት በዓል ጋር ተያይዞ በድምቀት የሚከበር መጽሐፍ ቅዱሳዊ ዳራ ያለው በዓል ነው። በዓሉ ቃና ዘገሊላ የሚል ስያሜ ያገኘው ጌታችን መድኃኒታችን ኢየሱስ ክርስቶስ የገሊላ ሀገር ክፍል በምትሆን ቃና በተባለችው ቦታ በፈፀመው ተአምር መነሻነት ነው። የቃና ዘገሊላ ጥንተ ነገሩ ወይም ታሪኩ የተፈፀመው የካቲት 23 ቀን ነው። ነገር ግን አባቶቻችን የውኃን በዓል ከውኃ በዓል ጋር ለማክበር ብለው የየካቲቱን በዓል ወደ ጥር 12 አምጥተውታል። ይህም ውኃ ወደ ወይን የተለወጠበትን በዓል ከጌታ ጥምቀት በዓል ጋር ለማስተሣሠር ለማስኬድ ነው። በመሆኑም የቃና ዘገሊላ በዓል ጥር 12 ቀን ይከበራል።

በቃና ዘገሊላ ምን ተፈፀመ? ጌታችን መድኃኒታችን ኢየሱስ ክርስቶስ የገሊላ ክፍል በምትሆን በቃና በተደረገ ሠርግ ላይ ከእናቱ ከድንግል ማርያም ጋር ተገኝቶ ነበር። ‹‹ወሀለወት ህየ እሙ ለእግዚእ ኢየሱስ›› ‹‹የጌታ የኢየሱስ እናትም በዚያ ነበረች›› እንዳለ ቅዱስ ዮሐንስ በወንጌሉ (ዮሐ 2÷1) እመቤታችን ለሠርገኞቹ ዘመድ ነበረችና ከልጇ ከወዳጇ ከኢየሱስ ክርስቶስ ጋ በሰርጉ ላይ ታድማ ነበር። እናትን ጠርቶ ልጅን መተው ሥርዓት ስላልሆነ፤ በተጨማሪ ደቀ መዛሙርቱ ከጌታ ጋር በሰርጉ ታድመዋል። ይህም መምህርን ጠርቶ ደቀ መዛሙርቱን መተው ሥርዓት ስላልሆነ (ተገቢ ስላልሆነ) ነው። የሠርጉ ሥነ-ሥርዓት በሠመረ ባማረ ሁኔታ እየተከናወነ ሳለ ድንገት የወይን ጠጅ አለቀ። አስተናባሪዎቹ በጭንቀት ባሕር ሰጥመው ምን እንደሚያደርጉ ግራ በገባቸው በጠበባቸው ሰዓት የችግር ጊዜ ደራሽ የኃዘን ጊዜ አፅናኝ የሆነችው የአምላክ እናት ድንግል ማርያም ቅዱስ ገብርኤል እንደተናገረ በፀጋ የተሞላች ናትና (ሉቃ 1÷28) ማንም ሳይነግራት የልቦናቸውን ጭንቀት አይታ፣ ጎዶሏቸውን ተመልክታ ወደ ልጇ ወደ ወዳጇ ኢየሱስ ክርስቶስ ዘወር ብላ ‹‹ወይንኬ አልቦሙ›› ‹‹ወይን ጠጅ እኮ አልቆባቸዋል›› አለችው። እርሱም መልሶ ‹‹አንቺ ሴት ከአንቺ ጋር ምን አለኝ?›› ‹‹ጊዜዬ ገና አልደረሰም›› አላት። እመቤታችንም ለአገልጋዮቹ ‹‹የሚላችሁን ሁሉ አድርጉ›› አለቻቸው። ጌታም በቦታው የነበሩ ስድስት ጋኖች ውኃ ሞልተው እንዲያመጡ አዘዛቸው። ውኃውንም ወደ ወይን ለውጦ ለሊቀ ምርፋቅ (ለአሳዳሪው) እንዲሠጡት አዘዘ። አሳዳሪውም ወደ ወይን የተለወጠውን ውኃ በቀመሰ ጊዜ አደነቀ። ከወዴት እንደመጣ ስላላወቀ ሙሽራውን ‹‹ሰው ሁሉ አስቀድሞ መልካሙን የወይን ጠጅ ያቀርባል ከሰከሩም በኋላ መናኛውን ያቀርባል አንተ ግን መልካሙን እስከ አሁን አቆይተሃል›› አለው። ወይኑም በሰው እጅ ያይደለ በሠማያዊው አባት የተዘጋጀ ስለነበር ጣፋጭ እና ልብን የሚያስደስት ነበር።

‹‹አንቺ ሴት ከአንቺ ጋር ምን አለኝ?›› ይህንን የጌታችንን ንግግር ብዙዎች በዘመናችን ሲሣሣቱበት ይታያል። ለስም አጠራሩ ክብር ይግባውና አምላካችን ይህንን የተናገረው እናቱን ሊያቃልል ሽቶ አይደለም። ስለሆነም ከመጽሐፍ ቅዱስ አንፃር ይህን አረፍተ ነገር መመልከቱ በጣም ጠቃሚ ነው። በተናጠል ስንመለከት ‹‹አንቺ ሴት›› ሴት የሚል ቃል የፆታ መጠሪያ ነውና በፆታዋ አክብሮ ሲጠራት ነው። በሌላ በኩል ደግሞ ሔዋን ከአዳም በተፈጠረች ጊዜ አዳም እንዲህ ሲል ተናግሮ ነበር ‹‹ይህች አጥንት ከአጥንቴ ናት ሥጋም ከሥጋዬ ናት እርስዋ ከወንድ ተገኝታለችና ሴት ትባል›› (ዘፍ 2÷23) በመሆኑም ጌታ አንቺ ሴት ማለቱ ከሥጋዋ ሥጋ ከነፍስዋ ነፍስ መንሣቱን ለማጠየቅ ነው። ‹‹ከአንቺ ጋር ምን አለኝ?›› የሚለውን ዐረፍተ ነገር በእኛ እሳቤ የንቀት ስለመሰለን ብቻ ‘ የዳቦ መልክ የያዘ ድንጋይ፤ ዳቦ ነው እንደማይባል ሁሉ’ የንቀት ንግግር ነው ልንል አይገባም። ጌታም እንዲህ ሲል ውኃውን ወይን አድርግላቸው ብትይኝ አላደርግም እልሽ ዘንድ ከአንቺ ጋር ምን ፀብ አለኝ ማለቱ ነው። ይህ ንግግር በመጽሐፍ ቅዱስ በብዙ ቦታ ተጽፎ እንደሚገኘው በዕብራውያን ዘንድ የተለመደ የአነጋገር ዘይቤ ነው። ለአብነት ይሆን ዘንድ ጥቂት ጥቅሶችን ከመጽሐፍ ቅዱስ እንመልከት፦

የሰራፕታዋ ሴት በ1ነገ 17÷18 ላይ እንደምናገኘው ልጇ በሞተባት ጊዜ ኤልያስን በሐዘን በለቅሶ እንዲህ ብላ ነበር ‹‹የእግዚአብሔር ሰው ሆይ ከአንተ ጋር ምን አለኝ?›› ትወልጃለሽ ብለክ የወለድኩት ልጅ ምን በድዬህ ምንስ አስከፍቼህ ሞተብኝ? ስትል ነው እንጂ አባባሏ የንቀት ወይም የማቃለል አይደለም። በጌርጌሴኖን አንድ አጋንንት ያደረበት ሰው ወደ ጌታችን ቀርቦ ‹‹የልዑል እግዚአብሔር ልጅ ኢየሱስ ክርስቶስ ሆይ ከአንተ ጋር ምን አለኝ?›› አለው። እውነት ይህ ቃል የንቀት ይመስላልን? የልዑል እግዚአብሔር ልጅ ብሎ አምላክነቱን እየመሰከረ ሊያቃልለው ይችላልን? ደግሞስ ላለመጥፋት ፍፁም የሚፈልግ ሰው ሊያድነው ሥልጣን ያለውን ሊንቅ ይችላልን? አይችልም። ይህ ቃል የሚያመለክተው ምን አጠፋሁ ስለምን ልታጠፋኝ ወደድክ በማለት መፍራት መራዱን ነው። (ሉቃ 8÷28-29) ስለሆነም ‹‹አንቺ ሴት ከአንቺ ጋር ምን አለኝ?›› የሚለው የንቀት አለመሆኑን ከሁለቱ ጥቅሶች መረዳት እንችላለን።

እመቤታችን እና ጌታ በንግግር አልተቃረኑም ንግግራቸው የፍቅር ነበር። ንግግራቸው የመግባባት ስለነበር ነው ‹‹አንቺ ሴት ከአንቺ ጋር ምን አለኝ?›› ካላት በኋላ ዘወር ብላ አገልጋዮቹን የሚላችሁን ሁሉ አድርጉ ያለችው። ‹‹ጊዜዬ አልደረሰም›› ጌታ ይህን ቃል የተናገረው ስለ ብዙ ምክንያቶች ነው። ጊዜዬ አልደረሰም ማለቱ፦ እግዚአብሔር ነገሮችን የሚያከናውንበት የራሱ ጊዜ አለው። በመሆኑም ይህን ተአምር የምፈፅምበት ጊዜዬ አልደረሰም ሲል ነው። ጋኖቹ ውስጥ የቀረ ወይን ስለነበረ ባለው ላይ አበርክቶ እንጂ ውኃውን ወደ ወይን አልለወጠውም እንዳይሉ ወይኑ ከጋኑ ተንጠፍጥፎ እስኪያልቅ ድረስ ጊዜዬ አልደረሰም አለ። ይሁዳ ከሠርግ ቤት ወጣ ብሎ ነበርና ወደ ሠርግ ቤቱ እሰኪመለስ ጊዜዬ አልደረሰም አለ። ይሁዳ በቃና የገለጠውን ምስጢር ለእኔ ስላላሣየኝ ተከፍቼበት ከተአምራቱ ቢያጎድለኝ በሞቱ ገባሁበት፤ ሸጥኩት እንዳይል ምክንያት ለማሳጣት እንዲህ አድርጓል። እውነተኛ የሕይወት ወይን የሆነውን ደሜን የምሠጥበት ጊዜ ገና ነው ሲል። የድንግል ማርያም አማላጅነት በገሊላ ቃና ጌታችን መድኃኒታችን እየሱስ ክርስቶስ በሠርግ ቤት ሣለ የወይኑን ማለቅ የማይመለከት ሆኖ አይደለም። ነገር ግን የእናቱን የድንግል ማርያምን አማላጅነት ሊገልጥ ስለወይኑ ማለቅ እስክትነግረው ድረስ አንዳች ነገር አላደረገም። ኋላ ግን የጭንቀት አማላጅ ድንግል ማርያም ስለ ወይኑ አሰበች ልጇ ወዳጇን ለመነች። እርሱም የእናቱን ልመና ተቀብሎ ተአምራቱን ፈፀመ። በእናቱ ልመና ጣፋጩን የወይን ጠጅ በእናቱ ዘመዶች ስርግ ለተሳተፉ አበረከተ። እናታችን ቅድስት ድንግል ማርያም ሣይነግሯት በልብ ያለውን የምታውቅ የምትመረምር እናት ናትና የሠርጉ አስተናባሪዎች ይሄ ጎደለ ሣይሏት የልቦናቸውን ሐዘን ተመልክታ ከልጇ ከወዳጇ አማልዳ የጎደላቸውን ሞልታለች። ያስጨነቃቸውንም አርቃለች። በችግራቸው ደርሳላቸዋለች። ታዲያ ሳይነግሯት የልቡናን አይታ ከማለደች ስሟን ጠርተው ለሚለምኗትም እንዴት አብልጣ አታማልድ?

ከእናታችን ከቅድስት ድንግል ማርያም ረድኤቷን በረከቷን ያሳድርብን አሜን!!

የቃና ዘገሊላ በዓል አስመልክቶ የበዓሉን ገጽታ ብፁዕ ወቅዱስ አባታችን አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተ/ሃይማኖት የሚከተለውን ተናግረው ነበር...

"...ይህንን በዓል በመልከኡ ስም የምናከብረው መልአኩ ቅዱስ ሚካኤል በተራዳኢነቱ፣ በጠባቂነቱ፣ በሊቀ መላእክትነቱ፣ ለእግዚአብሔር ቅዱስ በመሆኑ በእግዚአብሔር ጋር ያስታረቀናል፣ የማልደናል፣ ብለን ነው የምናከብረው። የሌሎች ቅዱሳን መላእክትን የሰማዕታትን የጻድቃንን በዓል የምናከብረው በማላጅነታቸው በተራዳኢነታቸው ያማልዱናል ብለን ነው።"

ምንጭ፦ በአፍሪካ ኅብረት ደብረ ምሕረት ቅዱስ ሚካኤል ካቴድራል ሰንበት ት/ቤት መማማሪያ ገጽ እና ተጨማሪ ፅሑፍና የፊደል እርማት #ታታ_አፍሮ

ልዑል እግዚአብሔር ከበዓሉ በረከት ይክፈለን!

ወስብሐት ለእግዚአብሔር ወለወላዲቱ ድንግል።

@