"የአጥር ወፍ አትስማሽ!"

በአገራችን ኢትዮጵያ ካሉን ባህሎች አንዱ ነፍሰ ጡር ሴትን መጠየቅና መጎብኘት አንዱ ነው። ለነፍሰ ጡር ሴት ከእናቶች ምክር ይሰጣታል። "ይኼን ብዪ ይኼን ጠጪ... ኧረ ብርድ እንዳይመታሽ፣ ተንቀሳቀሺበት ወዘተ.."

መውለጃዋ በቀረበ ጊዜ ወዳጆቿ፣ ጓደኞቿ ብሎም ጎረቤቶቿ የገንፎ እና የአጥሚት እህሎችን ያዘጋጁላታል። እየተዘፈነ እህል በየ አይነቱ ይፈተጋል። በጥቅሉ ወደ ምድር ውድ የሆነ የሰው ልጅን ልታመጣ ነውና ከእናት ከአባቷ በተጨማሪ ወዳጅ ዘመዶቿ በደስታ ይመላሉ። እግዚአብሔር ባርኮ ልጅ ሊወለድ ነውና ነፍሰጡሯን ሴት ሁሉም ይንከባከባታል። አቅም በፈቀደ ሁሉ አምሮቷ ይፈጸማል። አንዷ ቅቤውን፣ አንዷ ወተቱን ሌላኛዋ ምግቡን እያረጉ ሁሉም ይጠቋታል። በመንገድ ሳይቀር ለነፍሰ ጡሮች ቅድሚያ ይሰጣል።

ነፍሰ ጡሯ ሴት መውለጃዋ በዳረሰ ጊዜ የገንፎ እህል ተፈጭቶ ወደ ቤት ሲገባ ሴት ጎረቤቶች፣ ጓደኞቿና ዘመድ አዝማድ ሁሉ ተጠርቶ ገንፎ ይበሉና "የአጥር ወፍ አትስማሽ" ብለው ይመርቋታል። ይኼም አጥር ላይ ያለች ወፍ ከጎረቤትም በጣም የቀረበች ስለሆነች ድምፅን ቶሎ ስለምትሰማ ነው። ምጥ በመጣ ግዜ ነፍሰ ጡሯ ህመሙ ሳይጠናባት ጩኸቷን ሌላ ሰው ይቅርና የቅርቧ የአጥር ወፍ እንኳን ሳትሰማት በሰላም ትውለድ ማለት ነው። ምጧን ቀላል እንዲያደርግላት መመኘት ማለት ነው።

ከወለደችም በኋላ በአራስ ቤት ሆና እጅግ ይንከባከቧታል። የልጇን ገላ ማጠብ የእናቷ እና የሌሎች የአዋቂዎች ስራ ይሆናል። በአራስ ቤት ሆና ሁሉ እየመጣ "እንኳን ማርያም ማረችሽ" ይላል። ኋላም የክርስትና ዕለት ድግስ ተደርጎ ነድያንን እና ወዳጅ ዘመድን ጠርቶ እየተበላ ይኼንን ድንቅ ነገር ላደረገ ለልዑል እግዚአብሔር ምስጋና ይቀርባል።

✎✍#ታታ_አፍሮ /ነፃ ብዕር/

ሴት ልጅ /ነፍሰ ጡር/ ከመውለዷ በፊት ጓደኞቿ፣ ሙዜዎቿ፣ ጎረቤቶቿ እና ዘመዶቿ ተሰብስበው ገንፎ ይበላሉ። /የገንፎ ፕሮግራም ይደረጋል/ ያም በትግሪኛ ገዓት ተብሎ ይጠራል። ሴቶቹም ምጥሽ ይቅለል ብለው ሲመርቁ "ማርያም ተገላግልኪ" ብለው ይመርቋታል። ይኼም ማርያም ምጥሽን ታቅልለው ማለት ነው። የአጥር ወፍ አትስማሽ እንዲሉ!

https://www.tg-me.com/aradacasting