@

ላንተ የሚሰሰት ነገር የለኝም። በፍጹም አይኖረኝምም። ዛሬም ልክ የዛሬ 20 አመት የነበረው ፍቅሬ አሁንም አለ። ሳያረጅም ይቀጥላል...!

መቼም ወደ ልጅነቱ በኃሳብ ነጉዶ ያን ብሩህ ዘመን አስታውሶ የማይደሰት የለም። እኔም ወደ ልጅነቴ ስነጉድ የሚቀድመው ትዝታዬ፤ ሔዋን እንደ ዋዛ፣ አቦጊዳ፣ እንደ ቢራቢሮ እና ለማን ልማሽ የተሰኘው ሙዚቃክ እና ልብን የሚያባባው ድምጽህ ነው።

የሰው ልጅ ህይወቱ ከሆነ ነገር ጋ ይቆራኛል የኔም ህይወት ከሙዚቃዎችህ ጋ ትልቅ ትስስር አላቸው። በየእድሜ ደረጃቸው የኔን እድሜ ያስታውሱኛል። ሁሉንም ሳደምጣቸው ትክክለኛ ስሜት ውስጥ እኔን ከመንከር ልቀው በተለቀቁበት ዘመን የነበረውን እያንዳዱን የህይወቴን ጉዞ ያስታውሱኛል። ዛሬ እስኪመስለኝ ድረስ በኃሳብ ሰረገላ ካለፈው ዘመን ወስደው በሐሴት ያናውዙኛል። ደስታን በሚሰጥ ስሜት ያቆዩኛል። የወጣትነት እድሜ በከፍተኛ ድብርት ለመጠቃት የተጋለጠ ነው። ይኼ ስሜት ሲጀማምረኝ ማስወገጃው ጸሎትና ያንተ ሙዚቃዎች ናቸው። ...ሊገለጽ በማይቻል መልኩ የሆነ ነገር ከላዬ ተገፎ ደግሞ የሆነ ኃይል ስጎናጸፍ ይታወቀኛል። የቱንም ያህል እየጮኸ ቢደመጥ የማይሰለቸኝ ያንተ ሙዚቃ ብቻ ነው።

የሌላ ሰው ስራ ሆኖ የሶስት ደቂቃ ሙዚቃ ለመስማትና ከማልወደው ሰው ጋ አንድ ሲኒ ቡና ጠጥቶ ለመጨረስ የሚጨንቀኝ ሰውዬ አምስቱንም አልበሞችህን አድምጬ የመድረክ ስራዎችህን አጣጥሜ ነጠላ ዜማዎችህን እያደመጥኩ በተለቀቁበት ዘመን እየተንሸራሸርኩ ደስታዬን ሳጣጥም ጊዜውም ሰዓቱም እንደምን ነጎደ ቢሉኝ አላውቅም።

ከሰባት አመቴ ጀምሮ ከማውቃቸው እስከ አሁንም ለ20 አመታት አብረውኝ ከዘለቁ በጣት ከሚቆጠሩ ግለሰቦች መኃል አንዱ እና ዋነኛው አንተ ነህ! ስለምወድህ፣ ስለማከብርህ፣ ስለምሳሳልህም ጭምር ደስተኛ ነኝ።

✎✍#ታታ_አፍሮ /ነፃ ብዕር/

ነፍስዎ በሰላም ትረፍ...

#አፄ_ዮሐንስ_4ኛ...

"ጎንደር ሃይማኖት ቆማ ስታለቅስ
አንገቱን ሰጠላት ዳግማይ ዮሐንስ"

ለአገር ዳር ድንበር መጽናት በምጽዋ ተዋድቀው አንገታቸውን ለአገራቸው በክብር የሰጡ፤ ታላቁ ንጉሠ ነገሥት አፄ ዮሐንስ ዛሬ ሐምሌ 5 ቀን ልደታቸው ነው።

አፄ ዮሐንስ አራተኛ ከሹም ተንቤን ምርጫ እና ከእናታቸው ወይዘሮ ሥላስ ድምፁ ሐምሌ 5 ቀን 1825 ዓ.ም በትግራይ ተምቤን ልዩ ስሙ ማይ በሀ ተብሎ በሚታወቀው ሥፍራ ተወለዱ።

አጼ ዮሐንስ በአጼ ቴዎድሮስ የተጀመረውን የአንድነት ሥራ አስቀጥለዋል። የሀገራችንን ዳር ድንብር ከውጪ ወራሪ ኃይል ጠብቀዋል። በተለይ በጉንደትና በጉራዕ አሁንም ቢሆን እየዳነፋችብን የምትገኘውን የግብጽን ጦር ድል አድርገው የሀገሬን አፈር በጫማቸው እንኳን ይዘው እንዳይወጡ በሚል እግራቸውን አሳጥበው ከኢትዮጵያ ድንበር አባረዋል።

አጼ ዮሐንስ ለኢትዮጵያ ልዩ ክብር እና ፍቅር ነበራቸው። ይህም አሁን ድረስ በሚጠቀስ ዘመን አይሽሬ አባባላቸው እንዲህ ተገልጾ በጉልህ ይታያል፥ "የኢትዮጵያ ልጅ ሆይ ፥ ልብ አድርገህ ተመልከት። ኢትዮጵያ የተባለችው አንደኛ እናትህ ናት። ሁለተኛ ክብርህ ናት። ሦስተኛም ሚስትህ ናት። አራተኛ ልጅህ ናት። አምስተኛ መቃብርህ ናት። እንግዲህ የእናት ፍቅር ፥ የዘውድ ክብር፥ የሚስት ደግነት፥ የልጅ ደስታ፥ የመቃብር ከባቲነት እንደዚህ መሆኑን አውቀህ ተነስ።"

ጃኑሆይ እንኳንም በታላቂቷ ኢትዮጵያ ላይ ንጉሥ ሆነው አለፉ።

@

በመወለድህ ከሚደሰቱት በላይ እደሰታለሁ። ልደትህን በማክበር ደስ ከሚሰኙም በላይ ደስ እሰኛለሁ። በአንድ ከተማ ብቻ ሳይሆን በድፍን ኢትዮጵያ እና አድናቂዎችህ ባሉበት የዓለም ጥግ ሁሉ ልደትህ በድምቀት እንዲከበር እመኛለሁ።

ቴዲዬ አድርግ ብለኸኝ እምቢ ብዬ አላውቅም። አዘኸኝ እምቢ ያልኩህ ትዕዛዝህ የለም። አይኖርምም። ልከኸኝ የዘገየውበት ቀን የለም። የኔ ጉዳይ ይቆይ ይዋል እንጂ ያንተን ፈጽሚያለሁ። ወደፊትም በደስታ እፈጽማለሁ። ሁሌም ደስ እያለኝ እታዘዝኃለሁ።

አንበሳዬ ቅን ነህና ሀሳቤን ትረዳለኽ! ድካሜንም ዋጋ ትሰጠዋለኽ! ሀሳብህ ከማንም በላይ ይገባኛል። ለዘመናት አንተን በብዕሬ ሳመሰግንህ እና የማውቀውን እውነት በተረዳሁት ልክ ያለ ስስት ስከትብ እና ለወዳጆችህ ሳደርስ ኖሪያለሁ። ይኼም የሚቀጥል ተግባሬ ነው።

በዚህች ቀን እኔ የመልካም ምኞት መግለጫዬን ቀድሜ ማድረስ ሲገባኝ ስልክህ ሲቀድመኝ ድንጋጤው አይጣል ነው። ለአንዲት ደቂቃም ቢያወሩህ ቁም ነገር አዘል ቀልድህ የማያስቀው ብርቱ የለም።

እወድኃለሁ! አከብርኃለሁ! መልካም ልደት አንበሳዬ!

ከፍጹም አክባሪ ወንድምህ!

✎✍#ታታ_አፍሮ /ነፃ ብዕር/

Graphics by፦ (#ጉዱ_ካሳ)

ሁሌም በማይሰሰት ፍቅር እወድኃለሁ። ለሰው ልጆች ሁሉ ያለኽ አክብሮት እና ምስጋናክ አቅም ይነሳኛል። ጤናህን አብዝቶ ይስጥህ!

ግን ይኼን ልበልኽ... እንደሚወዱህ ከነገሩክ በላይ አብልጬ እወድኃለሁ። እንደሚያከብሩህ ከነገሩክ በላይም አከብርኃለሁ። መውደዴን በአንደበቴ ብቻ ሳይሆን በተግባር እየገለጽኩ በአደባባይም እየመሰከርኩ ለዘመናት ኖሪያለሁ። ይኼ የሚቀጥል ተግባሬ ነው። ለአጼ ቴዎድሮስ ገብርዬ፣ ለአጤ ምኒልክ ፊት አውራሪ ሀብተ ጊዮርጊስ ዲነግዴ ላንተ ደግሞ እኔ አለሁልህ!

እወድኃለሁ!

✎✍#ታታ_አፍሮ /ነፃ ብዕር/

ለአፍሪካ የ44 አመታት የብርሃን ጮራ! ግርማዊ ቀዳማዊ አጤ ኃይለ ስላሴ ንጉሰ ነገሥት ዘኢትዮጵያ

በ1884 ዓ.ም በወርሃ ሐምሌ 16 /ኪዳነ ምህረት/ ዕለት ልጅ ተፈሪ ሐረር ውስጥ በምትገኝ ኤጀርሳ ጎሮ በተሰኘች አከባቢ /ሰፈር/ ተወለዱ። ልጅ ተፈሪ እናት እና አባታቸውን በልጅነት እድሜያቸው ያጡ ሲሆን አባታቸው የምኒልክን ዙፋን ይወርሳሉ ተብሎ ይጠበቅ ነበር። ራስ ተፈሪ መኮንን ሐረርጌን ለ6 አመታት አስተዳድረዋል። አባታቸው ልዑል ራስ መኮንን ልጃቸው ትምህርት ገና ሲጀምሩ ፈረንሳይኛ ቋንቋን እንዲያጠኑ ስላደረጓቸው ራስ ተፈሪ ፈረንሳይኛን አቀላጥፈው ይናገራሉ። የልጅ እያሱ መንግስት ወድቆ በምትኩ ንግስተ ነገስት ዘውዲቱ ዙፋን ሲይዙ ራስ ተፈሪ መኮንን በ25 አመታቸው ገደማ አልጋ ወራሽ ሆኑ።

ተፈሪ መኮንን በአልጋ ወራሽነት ሥልጣን ላይ በነበሩበት የ13 ዓመት ተኩል ጊዜ ውስጥ በውጭ ፖሊሲ በኩል አገሪቱን ወደ ዘመናዊ አስተዳደር ለማምጣት፣ በአውሮፓ ለመጀመርያ ጊዜ በከፍተኛ ባለሥልጣን ደረጃ ጉብኝት በማድረግና በአገር ውስጥ ከነበሩ ኤምባሲዎች ጋርም ዲፕሎማሲያዊ ግንኙነት በማጠናከር ከፍተኛ ስኬት ያስመዘገቡ ታላላቅ ተግባራትን አከናውነዋል፡፡ በተጨማሪም ኢትዮጵያን በዓለም አቀፉ የመንግሥታቱ ማኅበር ቀደምት አፍሪካዊት ሀገር በማድረግ በአባልነት አስመዝግበዋታል፡፡ በአገር ውስጥም አንፃራዊ ዘመናዊነት እንዲፈጠር ለማድረግ ያደረጉት ጥረት በቀላሉ የሚገመት አልነበረም፡፡

በቁመት አጭር ከሚባሉት ተርታ የሚሠለፉት ቀዳማዊ አፄ ኃይለ ሥላሴ እጅግ መልከ መልካም ሲሆኑ በእነዚያ በጣም እረጃጅም በሆኑት ክብር ዘበኞቻቸው መካከል ሆነው ሲታዩ የእሳቸው ግርማ ሞገስ ነበር ጎልቶ የሚታየው፡፡

የ44 ዓመታት ረጅም ዘመን የንጉሠ ነገሥትነት አመራራቸው በአብዛኛው የተረጋጋና ሰላም የሰፈነበት ሲሆን፣ በግላቸውም የሚከተሉት ፍልስፍና እንዲሁ የሰከነ ነበር፡፡ ማለዳ ቤተ ክርስቲያንን ከመሳለም የሚጀምረው የየዕለቱ ተግባራቸው የውጭ አገር ከፍተኛ ባለሥልጣኖችን በመቀበል የልማት መሠረት ለመጣል፣ በሕዝባቸው መሀል በመገኘት የተመራቂዎችን ልብስ ለብሰው ወጣቶችን በመመረቅ፣ የታመሙትን በሆስፒታሎች ላይ እየዞሩ በመጎብኘት፣ እርዳታቸውን ለሚሹ በመድረስ፣ በዓለም አቀፍም ሆነ በአገር አቀፍ ስብሰባዎች ላይ በመገኘት ጋዜጣዊ መግለጫ የመስጠት ተግባሮቻቸው ጎልተው የሚታዩ ነበሩ፡፡ ቀዳማዊ ኃይለ ሥላሴን ለየት የሚያደርጋቸው ታድያ ይኼ ሁሉ ሲከናወን የባህርይ መለዋወጥ አለመታየቱ እና ፍፁም ትዕግስተኛ በመሆናቸው ነበር፡፡ በፖለቲካዊ አለመግባባቶች እና በጭቅጭቆች መኃልም እንኳን ከስሜታዊነት የጸዱ በተረጋጋ ስሜት በጥዑም አንደበታቸው የሚሰማቸውን በመመለስ የተካኑ ፍፁም ትሁትም ነበሩ።

ቀዳማዊ አፄ ኃይለ ስላሴ በስሜት የማይነዱ ከአፋቸው ክፉ ቃል እንዳይወጣ እጅግ የሚጠነቀቁ እያንዳዱ ተግባራቸው በማስተዋል የሆነ ታላቅ የፖለቲካ ሰው ስለመሆናቸው ሀገር የመሰከረላቸው ጨዋ ንጉሥ ነበሩ። ከወረራው በኋላ የሁለቱን ኃያላን አገራት በኃሪ በማቻቻል ለሀገራቸው ሉዓላዊነት የከፈሉት መስዋዕትነት፣ ለሀገራቸው በሚበጀው መንገድ መሄዳቸው ብሎም ባደጉት አገራት የሚገኙ ፖለቲከኞች ካቀዱት እና ከገመቱት በተለየ መልኩ የኢትዮጵያን እጣ ፈንታ በማሻሻላቸው የአዕምሯቸው ልህቀት እጅጉን የበሰለ እና ተግባራቸውም የሚደነቅ ነበር።

ንጉሡ እንደ ሰው ልጆቻቸውን በቀበሩ ጊዜ ወላድ ይፍረደኝ ብለው በአደባባይ አንብተዋል። አልቅሰውም አስለቅሰዋል። ለሌሎች ደስታን በመስጠት ቤትና ኑሮን በመመስረት የሚታወቁት እኚሁ ንጉሥ በህይወት ዘመናቸው ከባድ ሀዘን አስተናግደዋል። እርግጥም ጃኑሆይ ከልጅነት ዘመናቸው ጀምሮ እናታቸውን በማጣት ካደጉም በኋላም አባታቸው በማረፋቸው ሀዘናቸው የበዛ ነበር። ጃኑሆይ በሁለት ዘመን ሰዎች መኃል ተሰቃይተዋል። /በፊት በነበረው መኳንንት እና እሳቸው በፈጠሩት የተማረ ኃይል።/ የሆነው ሆኖ ንጉሡ ነገሮችን ማመጣጠን የሚችሉ ናቸውና ለ44 አመታት የድካም ጉዞ ተጉዘው ከኢትዮጵያም አልፈው ለአፍሪካ የለውጥ ፋና ሆነዋል። ጠያቂ ትውልድ አፍርተዋል። ዘመናዊት አፍሪካን አንፀው ሉዓለዊነቱን ለሚጠብቅ ህዝብ አባት ሆነዋል። በመላው አፍሪካ የአባትነት ምክራቸው ተቀባይነትን አግኝቷል። በመላው ዓለም ላይ በቆሙበት መድረክ ሁሉ ቃላቸው ከመሬት ጠብ ሳይል በተግባር ተፈፅሟል። የሀያላኑን ሀገር መንግስታት በሚፈትኑት ንግግሮቻቸው በዓለም ህዝብ ተደንቀዋል። ታላላቅ ጋዜጦች አክብረው አወድሰዋቸዋል።

ግርማዊ ቀዳማዊ አጤ ኃይለ ሥላሴ ትጠፋለች ትወድማለች የተባለችን አፍሪካን ወደ መኖር ቀይረዋል። ጥቁሮችን ከሰቆቃ ህይወት ደግፈው በማውጣት አፍሪካ ችግሯን በራሷ የምትፈታ አህጉር እንድትሆን የአውሮፓ እና የተቀሩ ዓለም መንግስታትን ተጋፍጠዋል። ጥቁሮች እንደ ኢትዮጵያ የራሳቸው ንጉሥ እንዲኖራቸው ያደረጉት ትግል ፍሬ አፍርቶ መላው የአፍሪካ ተወላጅ እንደ ወንድማማች እጅ ለእጅ ተያይዞ እንዲደጋገፍ በማድረጋቸው በዘመናቸው ታላቅ የአህጉር አባት ለመሆን በቅተዋል። ዛሬም ድረስ በዓለም ያለ የጥቁር ህዝብ በአባትነታቸው ይኮራል። አፍሪካም የነፃነት አባቷን ዘውትር ታወድሳለች።

የእኚህን ታላቅ ንጉሠ ነገሥት 129ኛ የልደት በዓል ለማክበር እንኳን አደረሰን ለማለት እወዳለሁ። 🎂🎂🎂 #አባብዬ እንኳን ተወለዱልን!!

✎✍#ታታ_አፍሮ /ነፃ ብዕር/

@

መልካም ዕለተ ሰንበት..❤️