Izoh: qabul Chirchiq shahridagi Oʻzbekiston davlat jismoniy tarbiya va sport universitetining madaniyat saroyida (Metallurg koʻchasi, 15-uy) boʻlib oʻtadi.

Tarixiy manbalarda qadimda Chirchiq va Ohangaron daryolari oralig‘ida Iloq davlati bo‘lganligi keltiriladi. Iloqda eramizdan oldingi davrlarda ham hayot bo‘lgan va eramizning dastlabki yuzyilliklari, xususan, IV-V asrlarda u Iloq davlati timsolida gullab-yashnagan. Shu davrlarda bevosita O‘rta Chirchiq tumani hududida ham sivilizatsiya rivojlangan.

Tumanning tashkil etilishi Sho‘rolar davrining dastlabki yillarida amalga oshirilgan iqtisodiy-hududiy islohotlar bilan bog‘liq. Jumladan, 1926 yil 29 sentyabr kuni O‘zbekiston SSR Markaziy ijroiya qo‘mitasining V sessiyasi bo‘lib o‘tadi va unda «Rayonlashtirish to‘g‘risida»gi qaror qabul qilinadi. Qarorga muvofiq, bunga qadar o‘lka Turkiston harbiy general-gubernatorligi tasarrufida bo‘lgan 7 ta oblast, 23 ta uyezd va 241 ta volost o‘rniga O‘zbekistonning yangi ma’muriy-hududiy bo‘linmalari tasdiqlanadi. Mazkur qarorda Toshkent oblasti hududida mavjud bo‘lgan 2 ta uyezd va 28 ta volost o‘rnida oblast (viloyat), uning tarkibida 11 ta rayon (tuman) tashkil etildi.

Yangi tashkil etilgan O‘rta Chirchiq tumani tarkibiga o‘sha vaqtdagi To‘ytepa volosti to‘laligicha, shuningdek, «Galabotir», Usmon ota, «Xurdin», «Kenjag‘al» qishloqlari va Telov volosti tarkibidagi 100 ta aholi punkti bilan jami 24 ta qishloq kengashi – selsovet kiritiladi.

Rayon hududida 23 ming 830 kishi istiqomat qilgan. 1926 yilning dekabrida O‘rta Chirchiq tumanining birinchi tashkiliy sessiyasi bo‘lib o‘tadi va unda 19 nafar ijroqo‘m a’zosi va 6 kishidan iborat ijroiya qo‘mitasi tarkibi tasdiqlanadi. Unda 37 yoshli Saksonboy Nurmuhammedov rayon ijroiya qo‘mitasi raisi etib saylanadi.