Святлана Ціханоўская — на 80-й Генеральнай Асамблеі ААН

Святлана Ціханоўская знаходзіцца з візітам у ЗША, галоўнай часткай якога з’яўляецца 80-я Генеральная Асамблея ААН у Нью-Ёрку.

Лідарка цягам гэтага часу ўжо сустрэлася з:
➖Прэзідэнтам Чэхіі Пятром Паўлам;
➖Прэзідэнтам Фінляндыі Аляксандрам Стубам; 
➖Прэзідэнтам Партугаліі Марселу Рэбелу ды Соза;
➖Спецпасланнікам ЗША па пытаннях Украіны і Расіі Кітам Келагам.
➖Вярхоўнай прадстаўніцай ЕС па знешняй палітыцы і бяспецы Каяй Калас;
➖Міністрам замежных справаў Украіны Андрэем Сябігай;
➖Міністаркай замежных справаў Ісландыі Торгердур Катрын Гунарсдотцір;
➖Прэм’ер-міністрам Бельгіі Бартам дэ Вевером;
➖Прэзідэнтам Аўстрыі Аляксандрам Ван дэр Беленам; 
➖Міністаркай замежных справаў Аўстрыі Бэатай Майнл-Райзінгер; 
➖Міністрам замежных справаў Польшчы Радаславам Сікорскім; 
➖Міністрам замежных справаў Харватыі Горданам Грлічам Радманам;
➖Старшынёй Еўрапейскай Рады Антоніу Коштам;
➖Міністрам замежных справаў Германіі Йоханам Вадефулем;
➖Амбасадарам Літвы ў ЗША Гедымінасам Варвалісам;
➖Кангрэсменам ЗША ад Рэспубліканскай партыі Джо Уілсанам.

Удзел у Генасамблеі — гэта магчымасць нагадаць: пакуль у Беларусі за кратамі застаюцца тысячы чалавек, а рэжым працягвае рэпрэсіі і падтрымлівае вайну супраць Украіны, міжнародная супольнасць павінна трымаць нашую краіну на парадку дня. Свет павінен ведаць: беларусы працягваюць барацьбу за свабоду і незалежнасць.

«Трэба памятаць: свабодныя медыя таксама з’яўляюцца формай абароны. Яны абараняюць грамадствы ад аўтарытарнага ўплыву і прапаганды»

Святлана Ціханоўская ўзяла ўдзел у дыскусіі «На мяжы? Ці ў небяспецы свабода СМІ? Глабальны погляд на свабоду прэсы» ў межах Штогадовага саміту Concordia 2025 у Нью-Ёрку.

Гэта юбілейны, 15-ы саміт Concordia, які традыцыйна збірае сусветных лідараў, прадстаўнікоў бізнесу і НДА.

Размова была прысвечаная выклікам для незалежных медыя ў час ціску ў сацыяльных сетках, штучнага інтэлекту і недахопу фінансавання. Асаблівая ўвага надавалася ўразліваму становішчу малых рэгіянальных і незалежных выданняў.

Галоўныя тэзы, што агучыла Ціханоўская:

⭕️Глабальныя выклікі і значэнне свабоды прэсы

«Мы сапраўды ў кропцы пералому: або дэмакратыі прызнаюць, што свабода прэсы — гэта частка бяспекі, або мы рызыкуем яе страціць. Калі ўрады перанакіроўваюць бюджэты толькі на абарону, трэба памятаць: свабодныя медыя таксама з’яўляюцца формай абароны. Яны абараняюць грамадствы ад аўтарытарнага ўплыву і прапаганды. Выжыванне свабодных медыя — гэта выжыванне дэмакратыі».

⭕️Роля беларускіх медыя ў змаганні за свабоду

«Незалежныя беларускія журналісты жывуць у выгнанні, іх пераследуюць і забараняюць — але яны працягваюць змагацца: словамі, а не зброяй. Яны расследуюць карупцыю, раскрываюць ваенныя злачынствы і ўзмацняюць галасы незалежных экспертаў. Але многія гэтыя рэдакцыі працуюць літаральна на апошнім дыханні. Міжнародная супольнасць павінна забяспечыць не толькі аднаразовыя гранты, але і стабільную, доўгатэрміновую падтрымку».