Святлана Ціханоўская звярнулася да жанчын з нагоды Ружовага кастрычніка — месяца, калі ва ўсім свеце гавораць пра прафілактыку і лячэнне раку малочнай залозы

У сваім відэа беларуская лідарка ўзгадала пра важнасць своечасовых абследаванняў і падсвяціла праблему сістэмы аховы здароўя ў краіне: 

«Такіх неабходных краіне лекараў-анколагаў звальняюць цэлымі сем’ямі за так званы «экстрэмізм». А ў дыспансерах — чэргі з маладых жанчын. У выніку людзі губляюць магчымасць давяраць сістэме аховы здароўя, а жанчыны — шанец атрымаць своечасовую дапамогу.

Калі ўлада пераследуе тых, хто лечыць, і маўчыць пра маштабы хваробы, яна страчвае маральнае права называць сябе сацыяльнай дзяржавай».

Святлана Ціханоўская да Дня маці:

«Дзякуй за ўсё, Мама!

Сёння найлепшы дзень для таго, каб падзякаваць тым, хто дараваў нам жыццё. Нашым матулям.

Я хачу падзякаваць кожнай матулі. Кожнай, хто гадуе дзяцей у гэтыя цяжкія часы, вучыць іх адрозніваць дабро і зло, верыць у сябе і не баяцца быць сумленнымі. Кожнай, хто любіць і чакае сваіх сыноў і дачок з турмы ці з выгнання, не перастаючы спадзявацца на хуткую сустрэчу. Кожнай, хто ахвяраваў свабодай дзеля таго, каб яе дзеці жылі ў вольнай краіне. Кожнай, хто працуе, клапоціцца, вучыць, абараняе — і пры гэтым знаходзіць сілы ўсміхацца.

Вы — наш гонар, нашая пяшчота, нашая апора. Вы нагадваеце, што Беларусь — гэта людзі, здольныя любіць, дараваць і ствараць жыццё нават там, дзе здаецца, што ўсё разбурана. Хай дзеці і ўнукі скажуць вам тое, што часта забываюць сказаць: дзякуй за бяссонныя ночы, за веру, за сілу, за вашую бясконцую і беспярэчную любоў, якая не залежыць ад знешніх абставінаў.

На жаль, сёння не ўсе могуць асабіста павіншаваць сваіх матуль — рэжым зрабіў усё магчымае, каб стварыць перашкоды, адарваць нас ад родных, пазбавіць гэтай важнай сувязі. Але ні адлегласць, ні сцены турмаў, ні выгнанне не могуць разбурыць тое, што маці адчувае сэрцам.

Я ад усёй душы зычу кожнай маме ў Беларусі і за яе межамі як мага хутчэй абняць сваіх дзяцей. Каб гэтыя абдымкі былі доўгімі, як чаканне, і цёплымі, як мацярынская любоў. Каб у кожным доме зноў гучаў смех, а Беларусь адчула сябе адной вялікай сям’ёй, у якой пануе любоў».

Фота з асабістага архіва Святланы Ціханоўскай.

«Кожны дзень жывеш у вялікім хваляванні за свой народ»

У новым сумесным інтэрв’ю Washington Post Святлана і Сяргей Ціханоўскія распавялі пра сямейны побыт пасля доўгай разлукі, змены сярод беларусаў і дэмакратычных сілаў за апошнія пяць гадоў, а таксама пра дапушчаныя памылкі і спосабы іх выправіць.

Святлана Ціханоўская:

«Цяпер, калі Сяргей зноў побач са мной, я адчуваю адначасова хаос і спакой. Але потым думаеш пра тое, колькі людзей усё яшчэ знаходзіцца ў турмах. Кожны дзень жывеш у вялікім хваляванні за свой народ. Мы не можам спыніцца, мы павінны працягваць працаваць».

Прававое становішча беларусаў у Польшчы, пераслед па лініі Інтэрпола і праблемы беларусаў Грузіі

Цягам апошніх дзён у Варшаве прайшлі сустрэчы дэлегацыі беларускіх дэмакратычных сілаў з прадстаўнікамі міністэрстваў і інстытуцый Польшчы:
– пасяджэнне пры МЗС прайшло пад старшынствам упаўнаважанага прадстаўніка міністра замежных справаў па супрацоўніцтве з беларускімі дэмакратычнымі сіламі Адама Халацінскага і намесніка кіраўніцы Аб’яднанага Пераходнага Кабінета Паўла Латушкі;
– сустрэча з кіраўніком Упраўлення па справах замежнікаў Томашам Цытрыновічам.

Якія ключавыя пытанні абмеркавалі падчас сустрэчаў?
— магчымасць кароткатэрміновага выезду з Польшчы для асобаў, якія чакаюць рашэння па міжнароднай абароне;
— прымяненне Дублінскага рэгламенту ў выпадках дэпартацыі палітвязняў у Літву;
— дакументы і прававое становішча беларусаў;
— атрыманне і прызнанне дакументаў, якія немагчыма атрымаць у Беларусі;
— узаемадзеянне з польскімі ведамствамі па пытаннях вадзіцельскіх пасведчанняў і даведак аб несудзімасці;
— выпадкі пераследу беларусаў праз Інтэрпол;
— праблемы, з якімі сутыкаюцца беларусы ў Грузіі.

Леанід Марозаў адзначыў:

«Для нас вельмі важна, што Польшча не толькі захоўвае адкрытасць у прыёме заяваў на міжнародную абарону, але і гатовая шукаць рашэнні па практычных пытаннях легалізацыі. Мы бачым сапраўднае разуменне праблемаў беларусаў і крокі да іх сістэмнага вырашэння».

Падрабязнасці і вынікі сустрэчаў — па спасылцы.

«Я працягваю рабіць тое, што павінна»

Святлана Ціханоўская дала інтэрв’ю «DW Беларусь», дзе распавяла пра фінансаванне з Еўрасаюза, адносіны з мужам у палітычнай сферы і дома, а таксама паразважала пра сваю будучыню:

«Я хачу вярнуцца дадому і жыць у Беларусі. У якой менавіта ролі — гэта ўжо другасна. Я ўсведамляю набытак вопыту, узровень кантактаў у свеце і сваю вагу. Калі спатрэбіцца далей служыць Беларусі ў любой форме — вядома, я буду. Бо я гіперадказны чалавек. Вельмі. І пакуль мы за мяжой, я раблю тое, што павінна. Пакуль хапае сілаў: фізічных і маральных».

Павел Церашковіч — пра скарачэнне колькасці навучальных установаў у Беларусі 

За апошнія 25 гадоў у Беларусі было закрыта амаль дзве тысячы ўстановаў сярэдняй адукацыі. Колькасць вучняў скарацілася амаль на паўмільёна.

Дарадца Святланы Ціханоўскай па навуцы і адукацыі Павел Церашковіч пракаментаваў сітуацыю:

«Скарачэнне колькасці школ, безумоўна, абумоўлена найперш дэмаграфічнымі прычынамі: зніжаецца колькасць дзяцей, асабліва ў сельскай мясцовасці. Гэтыя працэсы ўласцівыя многім краінам, што апынуліся ў дэмаграфічным крызісе.

Аднак афіцыйная прапаганда падае гэта як «аптымізацыю сістэмы адукацыі»: маўляў, школ становіцца менш, але на змену старым і «неэфектыўным» прыходзяць новыя, сучасныя, добра абсталяваныя.

Пад выглядам аптымізацыі адбываецца фактычны дэмантаж сацыяльных праграм. Скарачэнне колькасці школ вельмі нагадвае скарачэнне сеткі медыцынскіх устаноў. У абодвух выпадках фізічны доступ да гэтых паслуг ускладняецца.

Пры гэтым тая ж прапаганда даводзіць, што выдаткі на навучанне аднаго вучня ў сельскай мясцовасці (7058,31 рубля ў год) больш чым у два разы вышэйшыя, чым у гарадах (3109,52 рубля ў год). Але калі перавесці гэтыя сумы, то гэта ўсяго каля 2000 і 900 долараў адпаведна. Ці гэта шмат? У Польшчы, Латвіі і Літве сярэднія выдаткі складаюць ад 7500 да 8500 даляраў на вучня. Па гэтых паказчыках Беларусь адстае нават ад Калумбіі, Турцыі і Мексікі, якія займаюць апошнія радкі табліц Арганізацыі эканамічнага супрацоўніцтва і развіцця.

Дык ці можна на гэтыя сярэднія 1–2 тысячы долараў у год стварыць сапраўды «сучасныя і добра аснашчаныя» школы? Ці можна забяспечыць настаўнікам годны ўзровень жыцця? Пытанні, хутчэй, рытарычныя. Але яны добра паказваюць сапраўдныя прычыны так званай «аптымізацыі».

Святлана Ціханоўская з візітам у Нідэрландах

Сёння беларуская лідарка знаходзіцца ў Нідэрландах з працоўным візітам — запланаваныя сустрэчы з прадстаўнікамі ўраду, а таксама выступленні на дыскусійных панэлях Кангрэса Партыі еўрапейскіх сацыялістаў. 

Цягам візіту беларуская лідарка сустрэнецца:
– з амбасадарамі краінаў ЕС і дэлегацыяй Еўрапейскай камісіі;
– з прэм’ер-міністрам Дзікам Схофам; 
– з міністрам замежных справаў Ван Вілам;
– беларускай дыяспарай;

Да таго, Ціханоўская возьме ўдзел у дыскусійных панэлях Кангрэса Партыі еўрапейскіх сацыялістаў — “Daring More Democracy” і “Voices of Resistance”; – выступіць з прамовай на штогадовай October Lecture у інстытуце RAAM.
Галоўныя пытанні, якія будзе ўздымаць Святлана Ціханоўская падчас візіту датычныя падтрымкі Беларусі на еўрапейскім узроўні, бягучай сітуацыі з палітвязнямі і ролі Беларусі ў пытаннях рэгіянальнай бяспецы.

Сачыце за абнаўленнямі!

Святлана Ціханоўская сустрэлася з новым міністрам замежных справаў Нідэрландаў Дэвідам ван Вілам

«Мела кароткую размову з міністрам замежных справаў Нідэрландаў Дэвідам ван Вілам. Нідэрланды застаюцца надзейным саюзнікам беларусаў у змаганні за свабоду. Дзякуй за падтрымку і салідарнасць».