Festival doirasida Ellikqal’a tumanidagi 61-sonli informatika va axborot texnologiyalarini chuqurlashtirib o‘qitishga ixtisoslashtirilgan maktabda mamlakatimizda turizmni barqaror rivojlantirishga qaratilgan seminar-treninglar, ochiq muloqotlar va taqdimotlar tashkil etildi.

Shuningdek, tumandagi Abu Ali ibn Sino nomidagi Jamoat salomatligi texnikumida “Zakovat” intellektual o‘yinlari o‘tkazilib, unda texnikum o‘quvchilari faol ishtirok etdi.

Festivalning asosiy tadbirlaridan biri Ellikqal’a tumanidagi Aqchako‘l turistik majmuasida o‘tkazilgani alohida ahamiyat kasb etdi. Xorijiy mehmonlar, jurnalistlar va sayyohlar ishtirokida o‘tayotgan bayramona dasturlar — milliy kuy-qo‘shiqlar, folklor chiqishlari, an’anaviy hunarmandchilik ko‘rgazmalari — mintaqaning madaniy boyligini namoyon etmoqda.

Festival doirasida Aqchako‘l sohillarida talaba-yoshlar o‘rtasida bir qator sport musobaqalari ham o‘tkazildi. Bundan tashqari, ishtirokchilar Tuproqqal’a yodgorliklarini bevosita borib tomosha qilish imkoniyatiga ega bo‘ldilar.

Ellikqal’a tumani markazida joylashgan amfiteatrda o‘tkazilgan konsert-shou dasturi hamda badiiy-musiqiy chiqishlar tomoshabinlarda katta hayajon va unutilmas taassurotlar uyg‘otdi.

TDIU tashabbusi bilan o‘tkazilayotgan “Sahro sadosi” xalqaro festivali Qoraqalpog‘iston Respublikasining turistik brendini shakllantirishda, hududning iqtisodiy va madaniy imkoniyatlarini xalqaro miqyosda tanitishda muhim ahamiyat kasb etmoqda.

Bizni kuzating