"Майли-да, у сенинг амакинг, амманг... Катталарга ҳурматда бўл, улар нима деса ҳам сен бошингни қуйи солиб ўтир" деган гаплар билан катта бўлдик. Камига "Сенга тош отганга гул от, болам. Яхшилар ҳар доим ютади" жумлалари билан "дух"имизни синдириб келишди. Шу тариқа давом этдик ва эндиликда ҳеч кимга "йўқ" деёлмайдиган, ўзининг чегараларини чизолмайдиган одамлар бўлдик.
Кошки бизга шундай десалар эди:
"Ҳақ бўлсанг, сен биланман, бошингни тик тут болам. Сенга тош отганга гул отма! Лекин тош ҳам отма, чегарангни қўйиб, ҳимоя қил! Чегараларини ҳимоя қилган, ўзини эздирмаган ЯХШИ инсонлар ҳар доим ғолиб бўлади." Ва ҳаммасидан ҳам муҳими "Қариндошлик ёки ёши сендан катталиги кишининг атрофидагилар ва ўзидан кичикларга беҳурматлик қилиш ҳуқуқини бермайди." дея олсалар эди. Эҳтимол ана шунда чегараларини қўя оладиган, ўзини эздириб қўймайдиган, ўзи ва атрофидагиларни ҳурмат қиладиган шахслар бўлиб етишармидик...

Бу твитни роса яхши кўрдим.
Айни кўнглимдаги гаплар бўлди.

✍️@umidaaziz

Сиз ҳам эдингиз биздек, биз ҳам бўлурмиз сиздек...

✍@umidaaziz

#ўзимга_эслатма

Ўзингни кўп қийнама, жон. Табиатда тўрт фасл, ўн икки ой, 365 кун очилиб турадиган гул йўқ...

✍️@umidaaziz

Суҳбати шифо бўладиган одамлардан узоқлашиш экан кишининг асл имтиҳони...
Ичган ҳар қултум чойингда исмларини бир-бир эслаш экан синови.
Айрилиқларнинг охири дийдор бўлсин фақат. Учрашуви кўп, соғинчи енгил айрилиқлар бўлсин. Соғинганини ёнгинасида кўра олишдан комил ишонч хотиржамлиги ошно бўлсин қалбига. Чойининг қултумлари бўғзига қадалмаган, сўрашдан тортинмаган дуолари мудом тилида бўлсин.
Дийдор имкони бўлса, бор, югур ва бағрингга бос ҳамон. Фурсатинг борида суй ҳозир, суйганига қўли етмаслигини билиб яхши кўриш одамзоднинг энг улкан юкидир эҳтимол...

✍️@umidaaziz

Сиз билан бирга чиққан йўлда, сизни кемтик қўймай, камингизни бутун қила оладиган кишини учратганингизда бутун машаққату ғамларга бепарво қўл силтайсиз.
Чунки инсонни қийинчиликлар эмас, бу қийинчиликларни бир ўзи, якка бошига ортмоқлаши ҳолдан тойдиради...

✍️@umidaaziz

Аллоҳдан уй сўраб дуо қилаётганда, икки-уч хонали квартира эмас, камида мана шундай денгиз ёқасидаги вилла, кўшклардан сўраш керак. Дуода детал ва тафсилот муҳим, ўргилай. "Аллоҳим менга шинам уй насиб қил" деганда бир хонали уй ҳам шинам бўла оладида. Ашинга, қўрқмай, тортинмай, АНИҚ ИШОНЧ билан "Аллоҳим, менга ойналари соҳилга очилган, айвонининг девор ва томи ойнаванд қаср вилла насиб эт. Деразамдан Сен яратган мўъжизаларни томоша қилиб, Сени улуғлаб, ҳамд айтайин" денг.

Пулини, қаердан келиши ва қандай қилиб денгизи бор юртлардан мулк олишни ўйламанг. Буёғи Аллоҳнинг иши ❤️😊

✍️@umidaaziz

Бизани маҳаллани баққолида бунча маҳсулот йўқ 😁

Энди бир тавақ макарон пишириш учун бу хотин подвалдаги омборига тушиб чиқадими?

✍@umidaaziz

Одатда, закий кишиларнинг бирдан ортиқ дўсти бўлмайди. Ақл-заковат ривожлангани сари одам танлашда инжиқ бўлиб қолади киши...

✍@umidaaziz

... хуллас, узуууууууун пост ёздиму...
Эй, кимга нима фойда деб ўчириб ташладим...

"Кимга нима фойда" деб ёзмаган мақолаларим, ҳикояларим, китобларим мени кечиринг... 😔

Тузатиш*

РОСТДАН КИМГА НИМА ФОЙДА!?

Келин ўғлини тортиб олмаслиги учун сўнги нафасигача курашаётган (ДУШМАНГА РАВО) қайнона....

Қайноналарга юборгулик пост. 😁

✍️@umidaaziz

Ҳеч қачон сен тараф бўлмайман.
Қудаларимга айб қўймайман.
Эрингни айбдор қилмайман.
Аразлаб келмагин жон қизим.

Дугонам шу шиғирни жўнатди. Бир брошюрага сиғадиган катта шиғир ўзи. Ҳаммасини ўқиёлмадим, шу бандига кўзим тушди.

Шу шиғирдақа фикрлайдиган аёллар, илоҳим сизларга қиз фарзанд бермасин Аллоҳ. Қиз фарзанд увол бунақа аёлларга.

✍️@umidaaziz

Айрим одамлар сизни ҳеч қачон яхши кўролмайди. Чунки сизнинг руҳ (маънавият)ингиз уларнинг шайтонини безовта қилади.

✍️@umidaaziz

#ўзимга_насиҳат

Ўчирилиши керак жумлаларни ўчиришда ўчирғичга аччиқ қилма, жон...

✍️@umidaaziz

Тан олиш, ҳолатни қабул қилиш — ҳамма дардимизнинг давоси, аслида. Ўз ҳолича қабул қилган ҳамма нарса юрагимизга юкланишдан соқит бўлади. Айрилиқ оғирлик қиляптими? Айрилганингиз, йўқотганингизни қабул қилинг, бўлди. Сиз учун неъмат туюлган нарса сизга насиб қилмаяптими? Насиб қилмаганининг хайрига ишонинг. Кўзлаган манзилингизга етиб бормасликни Аллоҳнинг муҳофазаси ўлароқ қаранг.
Бўлгани, бўлмаганига розилик кишини залворли ва машаққатли юклар остида эзилишдан асрайди.

✍️@umidaaziz