عيونهم حلوة ميصير يلعبوها ، و اذا لعبوها يعتبر
غش !

بعبوس همست :- هاي شنو ، شلون يعني !

ابتسم ابتسامة ظهرت غمازته الي ضَيعتني و أخذ يلعب براحة
جفي و يرسم دوائر بخفة ..
يدغدغ بيها احساسي على كيف ..

بخفوت گال :- يعني مثلاً ، بعمري ما خسّرت گدام واحد
الا مرة او مرتين گنت بيهن مشدوه البال .

بس ..

اذا لعبتي وياي هسّه راح تخسّريني !!

بفهاوة رَديت :- هاي شنو ، ليش ؟

ادم :-هاللعبة يحتاجلها قوة عَقلية تركزين و بَدنية حتى
تسيطرين !

بمزح گلتله :- و آني ثنينهن ما عندي !

جذبني بقوه و ارتطمت بي !
و احسّ ارسل حرارة استقرت بخلايا جسمي
و استفردت على كل بقعة احساس بروحي

همس و أنفـه يكاد يلامس وجهي ..

-هذني عيونج!
رَجفني .. ذَوبني .. طيرنَّ ميزان عقلي

انا ما مستعد ادخل بنزال وياج ، ايً كان
لان متأكد راح تاخذيني أسير الهن !
و اسلم روحي بيدج و اموت بلا دفاع عن النفس !

سخنن خدودي و أَحس دق ناقوس الخطر
شفته ذايب ، انتزعت روحي منه و شردت ..

ضحك بصوت عالي و أردف :- لچ حني عاد من اشتعلو اهلج !!

ضحكت و صحت بمكر :- حن و آنه احن

واكفه يم ميز المراية و هو يتقرب بهدوء ...

وكف لحظة و عيونه تدرسني ..

همس :- شلون احن اكثر من هيج
ميت عليج ام عيون ...

دين :- هممم و شنو الفايدة و انتَ رافض اهم جزء بيه

ادم :- يابويـة هو وينه اهم جزء شايفـه !

ضربت حلكي :- عزة بعينك !

ثولّتها و همست :- اني اقصد على سند ..

عقد حواجبة و اختفت ابتسامته ....

-شبي سند نوب ؟

شفتها فرصـة استغلّة و هو محتاجني ..

اقتربت و نعمت صوتي :- انتَ ليش ما تحبه ؟

دار وجهة و باشر ينزع قميصة :- ما اكرهه اني

دين :- ادري متكرهه بس اني اطمع بالاكثر ...

التفت و عيوني ابحرت بتفاصيله ...
انحرجت و تماسكت لو اني لو هو الليلة ..

اتحلّيت بالجرأة امامـه ، اخذت ذراعه و ضليت العب براحت
ايده

احجي و منصية عيني استحي اباوعله هيج :- اذا تحبني حبـه
اذا تريدني زوجـة كون اله اب
اذا تريد تمتلك جوارحي لا تبخل بحنيتك عليه
طفل ..

و انت تدري ماله ذَنب ...

شلت عيوني حَطيتها بعينه الهايمة بيه

اني احبك ادم ...
ماعرف ليش و شلون صارت ..

بس احبگ ..

فتح عيني و انفاسـه تصاعدت ..

و اني انفجرت بأحاسيسي المكبوته گدامه !

اي لا تعاين الي هيج ..
گلبي يوجعني عليك لو تأذيت
و كلي يرجف بين ايديك
يمك احس بالامان و من تبعد اتبعثر و ما اعرف المني
اشتاقلك و لو اجيت اعبر ..
الكى حروفي ضاعت ..
بس يمكن عيوني تحجي ..
انت مرة گلت هيج : عيونج تگلي احبك

هو هذا الحُب لو اني غلطانه ...

سكتت .. و هو ساكت و متفاجئ ...

لبرهـة حسيت بالفشلـه لولا انه خطفني بحركة سريعـة
و ضمني حيل لصدره ..
عيونـه بعيوني و همس :- لچ اااي

اااي والله هو هذا ..

الحب الي دولبني و ضيعني بيج

اخيراً .. نطقتيها و رحمتي حالي

كوليها بعد ...

خجلت و اتدهورت حالتي ...

ادم :- بروح ابوج ...

ضحكت نطقتها و عيوني تلالي بدمعها : والله احبك ..

و هو بلا مقدمات خطف شفايفي ببوسه طَويله..

و بلا شعور مني رحت اقيد وَجهة بين اديه و ابادله بنفس
الشغف ...

ما طالبني بشي بعدها ..
و لاضغط عليه يرد حقه من جسدي

جان مكتفي بكلمة احبك و طاير بيها
سعيد ، منتصر و محقق انجازه
كل شويه يزرعلي بوسـه بمكان
و يورد بكاعها شتل قداح ..
عطر الحُب فاح
و القلب استراح ...

واني من اشوفه هيج يكبر بعيني اكثر
و احبه اكثر و اذوب بيه ..

انتهت ليلتنا بمصارحه دافيه و قُبلات شغوفه ...
و ادري هو يريدني بس ما يريد يرغمني

منطيني كل الوقت و دا يداوي جروحي على كيف

اطمئنيت اله ...
و سلمته قَلبي

..

مرت الايام هيج بيناتنا و ادم سعادته لا توصف و اني مو اقل
منه سعادة
اخذني بموعد. .. شعور لايوصف
اول مرة نطلع سوا لوحدنا و امام مرأى هذا العالم

شابك ايده بأيديـه و وعدني اليوم يكون ملكي شنو تريده
نفسي يحققـه
كتله ما اريد سيارة ، اريد نمشي سوه الما نتعب ..

ضحك و صاح :- تردين اوديج للالعاب ..
بداخلي اتمنى بس استثكلتها على روحي
كتله لا حديقة و نتمشى و تمشينا و اشترالي غزل البنات و
تلوصّت ايدي
و حار بيه يغسل ايديناتي مثل الجهال ...

تغدينا و افترينا حدما هلكنا ...
وداني للسوك و جبت شغلات لسند
و للحجية و اليه ..

و راحت عيني على لعابة تجنن و نطقتها بعفوية :- بعمري ما
اشتريت لّعابة

و من كل عقله اشتراها اليه ، و اني شايلتها و خجلانه ...

ادم :- ليش مستحية ترى انتِ بعدج طفلة

دين :- يمعود مو هلثخون ... طفلة عمرها 27

ادم :- والله طفلة لعد شنو ...
و ما اخفيه سر اني فعلاً اكون طفلة وياه اتدلل عليه
و احجي الي افكر بي بدون تصنع ...
و ما انام الا بسده لان احس بالامان

رجعت و الدنيا ما سايعتني ...
و الحياة بدأت تتلّون ...

و الحجية فرحانة على فرحتي ......
بدأت الكوابيس تتلاشى و المخاوف تتضائل و نما بداخلي
شعور احتياج غريب
تجاه هذا الرجل ...
اريد قُربه لكني متخوفـه ..

و احتاج وجوده لكني خجوله

اخر ايام انشغل عني ...
يطلع الصبح و يرجع تالي الليل
اتصالاته ما بطلت ...

و قريباً راح يكتشفون الي سَبب الحريق و الي اتضح هو بفعل
فاعل من خلال الكاميرات الحرارية على بعد مسافة من
المخازن الخاصة بيهم ..

الحياة بدأت تستقر تدريجياً و عداوة بشرى و نور صارت
بالسكته
من يطلع ادم يحيرن شحيجن و يسون و يخططن و يدبرن
و من يكون بالببت كل وحدة تخنس بغرفتها ...

و بيوم جانت دنيا عَصرية و جنت اكوي ملابسة و ادندن
ويـه روحي ...

وصلني مقطع فيديو من آدم على الواتساب ...

فتحتـه و انصدمت بالشخص المربطة ايديه ويه رجليه
و ينزف دم من كل مكان بجسمـه ..
واكع يم رجلين شباب ثنين مُلثمين بالسواد

لا اراديـاً من شفته وكعت و احس رجلّية نشلّت و انعدم
الاحساس
انفجرن المدامع و توقف الزمن لبرهـه ، و دماغي انسحب
سنين للوراء ..

و آني

#يتبع

#الفصل الثامن و العشرون

ادم ............

أحــِس كًًُــَلبي الفـِضـِي..متعوب حد الويل
وأدعيـله الصَبُر.. عن لا يفشلني
جَسٌيت الليالي ابمرود الحلوات
وسنين العمر بالشيب جسنـٌــيٌ
اضحك للبجوا.. حد شرهة المنكـَود
وابجي ابكل مزنتي.. الطور المغني
لاغرني المدح... بشفاف المحبين
ولاهـمني الشماته اشما حجوا عني
يلتمٌن علــٌيه... امشتتات البال
وانفضهن نفض
وانهض ولا جنــٌي
وليت.. وعف ضميري .. وماكسرت العود
ولـِسـِن.. شبه الزلم .. بالعلن سبــٌني
كـفاني امرح.. ورع.. والتذ بحب الناس
وعملات الكـَبح .. ما يوم خاوني
لا ِزحتْ الحيا... ولاضيٌعت معروف
ولاخنت الوفه.. وربعي اجفلوا مني
أضحك بالوجوه.. ابغير راحة بال
واصبر لو .. ليالي العسر ضكني
واكابر عالشدايد ... حد مصب العين
واسكت.. لو دثو من الناس لاسـٌــني
واسامح .. ما أبحــٌـر.. وين حد الغيض
وأزلف ..لو حوافي الزعل وازني
وينشدني صديجي ..المانشد عني
كـَـبل طبعك الونــٌـه ..وصاير اتغني؟
كـَبل عينك محطه .. وخاطرك مكسور
هسه اعله الثجاله.. اتفوت متحني؟
واجيبه ابكل برود .. وعودِتي ابسـنـُي
استراحت مستحاتي .. وعاكستني الريح
لاني من الهموم . ولاالهم مني
أنا ابن العاصيات .. من الليالي السود
لاريد الكـَـماري .. ولهن يردنـّي
ارضعتني امي ابدمعها .. من عرفت الصوت
وغطـّــتني بحزنها ... من مشت عني
خذت روحي اعله ضيمي ..وماشكيت الحال
او يمنــّـوني: اشتبي؟
وما كــَـلت: متمني
علـّمت البعض .. نكـَــل الجدم عالكـَــاع
وأول ما مشن.. بالزلكَ لبــّــني
اكــَول : اتغـّيرَت... والناس ماهي الناس
رضـّـاعة قواطي.. وخـّيبوا ظني ......

عريان السيد خلف ..

دِين //

امسح دموعي بظهر ايدي و بالايد الثانيـة لازمة التلفون
و اريد اتأكد الي دتشوفة عيوني صحيح لو ضرب من الخيال ،
وكعت و رجلية ما عادت تحمل ثقل جسمي ..
نملّت اطرافي و راح دماغي يسبح ببحر الذكريات الاليمة ...

اخر مرة من جان عمري تقريباً تسع سنوات ..
عصريـة و الجو كئيب و ريحة المكان تسبب الغثيان
كامش زندي بأصابيعـة حيل و يهمس و انفاسة الكريهـة
تضرب بنحري ..

لا تخافين .. بس هلمرة !
اذا عيطتي اكول لامج توكحت ...
ايده تتلمسني بشراهـة
و عيونه اظلّمت بداخلها رغبة محضورة

بعقل طفلة ما جنت اعرف شناوي
بس حسّيت اكو خطر
ليش حاط فراش يم قفص الطيور
و ليش اشوفه مرتبك ..
و لمساته اجرأ و اخطر من كل مرة ؟

رجفت و بچيت و توسلت ...

عمو سعدون عوفني لا تشاقى وياي هيج
.. بداعت امك

سعدون :- عمى العماج بت الكلب شمسويلج

لفيت شاردة منه ركض وراي ، صرخت
غطا حلكي و صار يسحبني عليه
مدري منين جَتني القوة عضيت چف ايديـه
و من شوغـة روحي حسيت شلعت وصلة !

صرخ :- بت الزمال مچلوبة انتِ
اليوم انعل والد والديج

ركضت و ما التفتت ورايه ..
لاكتني امه شايله دُنيا بتك ايد و بالايد الثانية تجر دخان من
جگارتها
حلكها ازرك و گذلتها و سنونها نفس اللون !


باوعتلها مرعوبـة و ركضت

صاحت وراية :- وين رايحة يمعثرة
محد بالبيت ..
امج تتأخر اليوم ...

مهتميت مسحت دموعي بظهر اديـة و استمريت اركض و
اتعثر ما بين الدمعة و الخطوة
و أَحس بخيباتي تسحبني للخلف و تبطأ مشيتي
البيت قريب بس صار شبعده ..

وصلت و جريت المفتاح امي تخلي جوه الدوسة فتحت الباب
و اتلفت و كل ظني راح يلحكني
توجهت لغرفتي و ضميت روحي بالكنتور
ضميت رجليه لصدري و اناشغ و لهناك و تراوالي وجه دنيا ...

شلون عفتها يمهم
خاف يأذيها
لزمت گلبي يرجف و احس بروحي راح اموت ..

ظلمة ، كهرباء ماكو و اول مرة اكون بوحدي بالبيت
قبل جانت بيبي فوزية ، صح مقعدة و ما تحجي
بس نفسها كافي يطمني ...

راحت و عافتني ..

تمنيت بلحظتها لو اني چبيرة
و اكتل سعدون و ما اخلي يسوي بيه هيج
لليل حَسيت اندار مفتاح الباب ..

عرفتها اجت ..

فتحت باب الكنتور ، مرهقة و تعبانه و جوعانه
باوعت عليها شايله دُنيا و عيونها بگصتها

ذبتها بالارض و اجت فايرة بأتجاهي
محسيت الا بصوت ايدها و هي تلطشني كف
وكعت للارض و أحس بدوخـة خذتني

لزمت زندي تخض بيه حيل و ترزل

علياء :- ادبسز و طايحة حظ
تضلين وكحة و عرمة و مينكدرلج ؟

لج وين اوديجن بعد ...
احير بالعيشة لو بلسانج الزفر
شلون تشردين من البيت و تخلين المرة تعيط وراج

هي تحجي و اني احس عيوني غَوشن
اريد احرك لساني و اجاوبها ما اكدر
وكأنما انشلّيت و بعد مكدر انطق

باوعتلها بترجي تترك ايدي ..
اباوع وجهها صار ثنين و ملامحها اختفن
صوتها صار بعيد كلش ...
اتسرسحت من بين ايديها و طحت مغشي عليه ..

رجعت من ذاكرتي ..
امسح بعيوني و اني اشوف الي باكني بيوم من الايام
ممدد بالارض و يتوسلهم يعوفونه ...
مثل ما جنت اتوسل بيه يتركني ..

و كلما يشيل راسه و يريد يسولف يل

طونه بدفرة على حلكه ...
و اشكال الفشار و الغلط يغلطون عليه
و الاصوات بدت مألوفة بالنسبة اليه ..
انتبهت على واحد من الواكفين كضى بيه التوبـة
چن كاتل اهلـه ...
و يصرخ و صرخته طالعه من گلبه ...
كوا....
ناقص
ابن الكـ...
دموه تدمي و هو بس يصيح ليش مو فاهم شغلة

و اني ما انقهرت عليه بس انقهرت على نفسي و ذكرياتي الي
لَوثها ..
و على ادم الي محروگ گلبه بسببي !

عرفت ...

هذا ادم ..
الي حافظة صوته اكثر من راحـة ايدي
نهايـة الفيديو تقدم و تناوش التلفون من الي واكف يصّور ...
رأساً طفى التصوير ..
مجان مبين منه شي غير عيـونه ..
و طرف رمشة المحمر الي اميزة من بين مليون رمش ..

شمرت التلفون و اجتني رغبـة قوية اصرخ
و اطلع كل الكبت الي بداخلي ...
دفنت و جهي بالمخدة و ضليت اعيط ...
بچيت حدما جفوني ثگلن و المدامع صارن يحرگني ..
و النار بداخلي تطلع ... و لو بيها شرارة جان حركت هالعالم كله
...

مشاعر عدة خالجتني ..
مدري افرح لان هذا النذل اكله خوش كتله
لو احزن لان ادم نحط بهيج موقف و اضطر يواجه ماضي
زوجته وجهاً لوجه ..
شعوري ما يتفسّر مقهورة و ابچي لان احس مثل الوحدة الي
نزعوها هدومها كدام العالم
و بنفس الوقت جزء مني ارتاح ..
اروح و اجي و ما اعرف شنو اسوي و افرك بصدري اريد
اتنفسس

من التعب نمت و حسيت على اصابع تضرب بچتفي
فتحت عيوني لكيت نور شايله ابني بطريقة مدري شلونها و
الولد وجهـة ازرك فاحط بچي !

طفرت اتناوشته منها و صحت :- شسويتيله ؟!

عقدت حواجبها ممتعضة :- شسويتله ؟
صار ساعة نصيح عليج تنزلين تاخذينه
يبچي و منعرف شلون نسكته !؟
و بيبي ماكدرت تشيله و تصعده الج ، اضطريت اجيبه
فلا تبلينه بي

عين عليها و عين علي امشي بي و احاول اخليه يهدأ

عفتها و مشيت لغرفته اسويله ممة ..
شويه هدأ بس حسيته ممرتاح فكرت لا تكون مأذيته ..
نزعته هدومه فتشت جسمه كل شي ما بي
بس اظافر رجليه ثنينهم لونهم ازرك
تعجبت ؟ معقوله واكع ؟؟
لو هاي الخبلة مسويتله شي ؟
رضع و نام و اني قلبي اشتعل نار ..

مدري شلون مر الوكت و دخل عليه ..
وكف مقلّص عيونـه عليه ..

اول ما عاينت اله تجمع الدمع بعيني و ماعرفت اعبر بشي غير
اني ركضت بسرعة دخلت لحضنه ..
بـچيت و ما اعرف شنو اكوله احساسي ضاع ما بين شعور
الاحراج و شعور الامتنان ..

يمسح على شعري بحنيـة و يهمس :- لا تبچين ..
اني ما عندي قدره امسح ذاكرتج
و لا اغير اهلج
و لا ابدل ماضيج ..

بس صدكيني بَچيت الي أذاج دَم !
و الاصابع الي تمررت على جسمج كَصيتها

و اجزم بعد ما يگدر يسوي الي سواه وي غيرج

عفته يتنفس .. بس مو عايش
و النفس راح يخلصـه بين اربع حيطان
هذا الخايس مأذي نص المنطقة ..
امج الشريفة شلون جانت تخليج ابيتهم و هو حاوي كح... و
كواو.....

اخذ وجهي بين ايديـه ، يعاين بعيوني
امج حسابها يمي ...

نزلت عيوني خجلانه منه ..

ادم :- باوعي بعيوني ...
لا تخجلين مني و لا من شيء انفرض عليج
احنا منختار اهلنا ...
و لا نختار قدّرنا ..
انتِ و بالرغم من كل الي عشتيه
و البيئة الي نحطيتي بيها ضليتي لبوة محافظة على نفسج
و من اتذكر نفسي شكد حاولت وياج و منطيتي روحج
اكره نفسي و تكبرين انتِ بعيني ..

صح ، اني غيرتي عمتني من سولفتيلي عن ماضيج ...
و تمنيت لو بيدي ارجع وياج سنين ليوره
و اموت هالكوا... بأيدي قبل لا يلمسج

بس الي اخذني اله مو بس غيرتي ...
بيش احلفلج اني سويت هيج لخاطر عيونج
و لخاطر تواجهين اسوأ كوابيسج شلون و هي تموت جوه
رجليج ...

اي دين .. حتى تخلصين من عقدة الماضي واجهيها
و راقبيها و هي تتضائل گدام عينج و تختفي ...

گلتيلي .. تكدر تغير اهلي ..

اني ما اكدر اغيرهم .. بس اصيرلج اهل
اصيرلج ام و اب و اهل و عزوة
الي يرشج بماي ارشـه بدم !

كلتيلي تگدر تغير ماضيي و ترجعني سنين ليوره و اكدر ادافع
عني ،
رحت بنفسي ادور بماضيج و انتقم بأيدي من الي شَوهه ..

و گلتيلي ...

قاطعته !

دين :- گتلك تگدر ترجعلي طفولتي ..

ابتسم و لاحت غمازته خطفت گلبي ...

اردفت :- و اني وياك احس روحي طفلة و انت تدللني و تخاف
عليه هيج ..

حضنتـه حيل و بادلني الحضن ..
شم شعري و نزل على نحري ...

صاح :- اوووف يا قدَّاح

باس خَدي و اخذ شفتي و ما گدرت غير اني اتجاوب وياه ...
ماشيت ايقاعـه مثل مقطوعـة موسيقية
يغازلني بـ لحن

يتفنن و يقسي و يرجع يحن !

و آني احن ..

و ما رَجعني لوعيي غير رَنـة تلفوني ..

افترقنا ناخذ انفاسنة و مازحني بمكر :- اشتعلوا اهلج حتى
تلفونج شادّ ويايـة ...

مديت ايدي جانت دُنيا ، ابتسمت

و صاح هو :- هاي اختج مو ؟
اومأت راسي بـ اي

صفگ بايده و صاح شفتي و من اشعل اهلج تضوجين ...

اخذ ملابسه و فات للحمام
و اني فتحت خط و همست بخفوت :- الووو

صاحت هي :- الووو هلو دين

همست و اني بعدني مبتسمة و منسمّـة و العب بشعري :-
هلاا

دنيا :- شبيج يولي جنتي نايمة ؟

دين :- لااا

دنيا :- لعد شبي صوتج راخي ، عزا بس لا دكيت بوكت غلط ..

دين:- ه

ممم

دنيا :- صخام قطعت عليكم المي و الكهرباء ..

صدك ضحكتني صحت :- لااا بس المي هههه

دنيا :- مو داكول ، انتِ كل حظ ما بيج ماعرف ادم شلون صابر
عليج ..

دكيت الخشب و همست من تحت سنونه :- عوذة من عيونج
اني عايزة تطكيني بليزرية هسه ؟!

احجي شعندج مخابرة بليل ؟!

دنيا :- هااه ، لا هيج بس ردت احجي وياج

عدلت كعدتي و عرفت سالفتها مو خالية ...

همست :- احجي يولي شبيج ؟! صاير وياج شي

دنيا :- لا والله بس مشتاقتلج هواية صار اكثر من شهرين
مجايتنا
شوكت تحنين عاد
ماما هم مشتاقتلج ، هو شصاير بينكم
اكو شي ما اعرفه اني ؟!

-ماكو شي ؟ ... هي شلونها ؟

دنيا :- تعبانه والله احسها كبرت قبل وكتها
و منا امها مواته .. يجي ياخذها ياسين كل جمعة
تنظفله و تطبخلها ، مشايفه هيج ناس كطعية

ابنها مريض ، بنات ابنها و جناينهم شبيهن !؟

حسيت تعاطفت ويه كلام دنيا و انقهرت على وضع ماما ...

دين :- اوووف ، هو ياسين ما عنده بس هاي اخته المتزوجة ؟

دنيا :- لا عنده اخ اصغر بكم سنة ياسر بس مخلصها دياحة و
سفر ..

دين :- اندري كل زلمه شكده ما عرفوا يتزوجون هم جان هسه
نسوانهم عاونن امي ...

بعدين هذا ياسين شعجب ما متزوج لهسه و هو بكد ادم ...

دنيا :- منتظرني غير ...

دين :- شنووو ؟! دخل يطير احسن اله
شنو خلصن النسوان ياخذ وحده من جيل بناته ..

دنيا :- على كيفج ترى حيصير عمري 18 سنة ..

دين :- تعاي ولج ، ليكون راضية و جاي تمهدين الطريق

دنيا :- طلبني من ماما و ترى مراضيـة ماكو داعي تتعصبين
مني

-اهاا هيج الحجي و هاي من شوكت التطورات يمه !

دنيا :- لاتفهميني غلط ترى هو الي بادر و اني ..

دين :- لا انتِ و لا اني ، اسمعيني عدل
نجوم السما اكربلج ، تردين تتزوجين ازوجي بس مو قبل ما
تلزمين شهادتج بأيدج و يوم تزوجين اختاري واحد مناسب
لعمرج ...
بعدين شعرفتي على ذوله الناس و جايه تشمرين نفسج
بنصهم !

دنيا :- هذوله الناس اقاربنا دين شجاج
و مشامرة نفسي بنصهم !

احسّ فار دمي من كالتلي هيج ، صحت و نسيت وجود ادم
كدامي

-اني ماعندي اقارب ، مكطوعين من شجرة احنا
روحي اسألي امج اذا متصدكين ..

كلتها و سديت الخط تعصبت و بدأت ارجف ..
اقترب منه و عيونه بفضول تسألني ..
و لسانه ما نطقها ما يريد يحرجني ..

اروح و اجي اكل اصابيعي ، اريد اسيطر على نفسي
منو هذا ؟ و بيا حق جاي يريد ياخذ اختي
وين جانوا ذيج السنين ..

اعاين لادم كاعد على طرف السرير و يعاين الي ..
باوعتله بقلّة حيلة ..

ضرب السرير بكف ايده و أشرلي بمعنى اجي اكعد يمـه ..
جلست و بلا شعور حطيت راسي على صَدره ..
همست :- شلون احافظ على اختي ادم
بلّية ما اجرحها ..
علمني احميها مثل ما انتَ حميت اخوانك

ادم :- شكو حبيبتي شنو شصاير ؟

-ابن خالي متقدملها و اني استلمتها حاصل فاصل
دا احسّ بالذنب لان حاجيتها هيج !

مسح على شعري و همس :- هي موافقة ؟!
حالياً لا بس احس بيها مجال و الا ليش جاية دكلي

-اول و تالي القرار الها

-القرار مو الها اني الي ربيت و سهرت وتعبت بعدها جاهل
شمفهمها بالزواج ..
خلي تلزم شهادتها و عود الله كريم ..
بعدين ممنوع تاخذ هذا الولد !

ادم :- ابن خالج ؟

دين :- ماعندي خوال ..

ادم :- حقج تنقهرين ، يعني ابوج و امج حتى لو غلطوا بزواجهم
بدون اذنهم بس من بعد هالسنين و ما كلفوا نفسهم يسألون
عن لحمهم و نوب يتيمات ..
بس الغيرة سز يسويها ..

اباوعله و حاسة بذنب لان بعمره ما راح يعرف الحقيقة و ليش
امي و ابوي انهزموا منهم ....

كرص خدي و صاح /- فدوة للاخت الحريصة ..
ابتسمت محرجة ..

باوعتله و ابالي اسئلة سؤال بس مستحية

صاح رافع حاجبه :- احجي كولي العندج ؟

مطيت شفايفي و بالكوه نطقتها :- شلون سويت هيج ؟
يعني منين اجه ببالك تدوره و تلكاه ..
ابد متخيلتك تطلع....... ؟!

تهرب بعيونـه :- ابقي متخيلتني مثل ما جنتي راسمتني ابالج
اني مجنت موجود وياهم !
هذوله جماعتي اني دزيتهم يربونه ..

رفعت حاجبي بمكر :- يعني ما جنت وياهم

نصى وجهه يلعب بچف ايدي و همس :- انه بس نبشت وراه
من نطيتيني اسم المنطقة
هاي المناطق تعتبر مشبوهه و الساكنيها هم هم ، ما تعبت
بس سألت
دلوني عليه بلاش
سعدون الحرامي و الي متحرش بكل جهال المنطقة
و اخته التركص بالملاهي ..
وامه الكح... متطوره تاركة شغلة الحفافة
صايرة گوا.....ة
بيت و كله خرط ...

نزلت وجهي محرجة و دا اتخيل شنو شعوره و اني امي جانت
تحطمي بنص بيتهم
و تتركني لساعات ..

لزم حنچي و همس :- لا تخجلين و لا تنزلين راسج
و عيونج كعدته للابد لا يهش و لا ينش يروح فدوة لنعالج
ما قصروا وياه برهان و نديم .
هذا الي شفتي شي قليل ..
صدكيني عاش مثل الي عشتي و اكثر !

دين :-،مممم كلتلي برهان و نَديم !

ادم :- اي

ابتسمت و حطيت عيني بعينه :- صح اني ما عرف جماعتك
بس هاي العيون و الرمش اميزهم من بين مليون
انت الي خذت حقي بأيدك و اني مزعلانه بالعكس
اذا جنت راسمتك ابالي سند فهسه صرت فارس ..
البطل الي

رجعلي حقي الضاع من سنين ..

همس :- صدك هيج حافظة عيوني

دين :- مطبوعات بگلبي ،
مديت ايدي تلّمست رمشـه لزم چف ايدي عصرة حيل ..

همس بنبرة مرتخيـة :- ولچ ليش تتحارشين

-شدعواك ، شسويتلك هي لمسـة!

-انه بارود صاير و لمستج مثل نار هسة !

تعرفين النار من تتلاكى ويه البارود شيصير ..؟

اعرف بشنوو يفكر
هزيت راسي و ضحكت بسته بخده ع السريع و انهزمت !

فرق شفايفة راد يحجي ..

قاطعته قبل لا يحجي :- ديربالك تشعل اهلي ...

ضحك رافع ايديه و دفن وجهه بالفراش مثل الي اعلن
استسلامة

قوست شفايفي و رفعت اكتافي بغنج ..

::

ثاني يوم جان ريوگ جماعي ...
الكل كاعد على سُفرة وحده لكن المشاعر منشطرة لنصفين

قسم سعيد و فرحان مثلي اني و ادم و نبيل و الحجية الي
يباعون النه بعيون تبرك
و قسم حزين و متضايق لشوفتنه هيج ..
مثل بشرى و نور ..

ادم كل شوية يرميني بنظرة لو ابتسامة لو يتعمد يطلب مني
شي
و من اناوشه يتعمد ياخذه و يطخ ايدي عبالك مخطوبين مو
متزوجين

و نبيل كل شوية ذابله نكته لو سالفه يفطسنا ضحك ..
لهناك و فجرّها بوجهنا خلانا لا ناخذ و لا ننطي

نبيل :- اي يااابه ما خلص شهر العسل و البصل نريد جاهل
نلعب عليه
هذا الطحش كبر و صاير نحس اذا تحاجيه هلكد يفحط بچي

انلبگ وجهي و ما عرفت ابيش اجاوب
باوعت لـ آدم لگيت عيونه تلمع و كأنه استساغ الفكرة
رجع كسرله خبزه و همس :- كل شي بوكته حلوو

اكتفيت بأبتسامة و بأذاني وَشه نار تطلع

الحجية :- هم يالّة ابو صخر العمر يمشي ركض و السنين جاي
تكضي
مدري شلون و اني بنفسي اشوف بزرتك تارسين حضني

دين:- بسري اكول الحجية جاي تحجي بالجمع
يعني تريد درزن جهال ...

قلّص عيونـه عليه بمكر و همس :- والله فكرة حلوة ، حلوين
الجهال مو كونتيسة ؟

غمزلي و خلاني اتلعثم ..
ما جاوبت غير الله كريم

هنـا نور لمعت عينها بطريقـه غريبه ابتسمت بخبث و غيرت
ملامحها بجزء من الثانية

صاحت :- ترى ام صخر بالعراق ،،

الكل سكت ..
بشرى ابتسمت و اضافت :- اي والله بارحة دريت جاية خطية
خابرتني و كالت راح تزورنا هاليومين

اباوع لآدم وجهه انعفس !

و نبيل يخزر نور و الحجية تستغفر

و اني بداخلي اتسائل ليش هلكد موضوع عذراء يوترهم ..
هم مو انفصلوا و خلص ؟

قاطع شرودي صوتـه و الي اعرفه منزعج

ادم :- الحمدلله شبعت ..

همست :- اروح اجيبلك غراضك ..

كملي ريوكج اني صاعد اجيبهن .... و عاين الهن بغضب و
همس : و اولي !

نبيل وجه كلامه لاخته :- تضلين خبيثة و مسمومـه

نور :- اني شگلت و هو ضاج ، ترى مهما صار قانوناً تبقى

الحجية :- يااازي عاد سدي حلگج عابت هالجهرة
سممتي الولد و لا تجوزين حسبالج الناس غشمه و ما تعرف
نواياج

اشرتلي الحجية :- كومي صعدي شوفي رجلج خاف معتاز شي

برطمت نور و بشرى ضلت ترادد بس بخوف لان متكدر
تتنفس كدام الحجية

صعدت و اجاني صوته من الغرفـه يتصل
يحجي بأنفعال و صوته واضح

ادم :- يعني مثل ما توقعنا الي ضربها جان متعمد ..
اي ،، اي صح كل شي يصير
يجوز واحد متقصدني
احتركت لشته لا تذكرني بي

راقبلي راف.....

دخلت و من شافني انبهت و رأساً انهى الاتصال

اخذني الفضول اسأله منو الي نضربت
و منو الي يراقبونه

سيطر على ارتباكه و جاوبني بثباات :- داحجي على اليه عدنا
السايق ضربها و تضررت و جنت شاك يكون متعمد
كلتلهم يراقبونه اريد اوكع على علّته ليش هيج سوه

دين :- هممم

اخذ وَجهي بين ايديه :- شنو امممم

دين :- لا هيج ، عندك جانب غامض بحياتك و احس اريد
اعرفه

باس جبيني و همس :- لا غامض و لا حلو اني مثل ما
تشوفيني

اريد اروح تأخرت و ذول اذا ما يشوفون واحد على راسهم
يكومون يزعبلون بالشغل

دين :- اريد اروح لاهلي و مناك اودي سند لدكتور الاطفال ؟

ادم :- شبي مريض ؟

دين :- حالياً قالقتني سالفة الفحطة على اقل شي
يفحط و يزرك ..

الحجية دكول ابوك جان هيج ، يبجي الما يفحط

ادم :- لا لازم نوديه ..
نطمئن اكثر ، بعدين تعالي شنو سالفه اهلج
شوكت تصالحتي ويه امج

نصيت وجهي العب بياقة قميصة ..

متصالحت .. بس ما اريد اعوفلها دنيا تلعب براسها
امي مستعدة كل شي تسوي لخاطر مصلحتها.

ادم :- امشي بدلي اني اخذج ..

-انت روح لدوامك اني اخذ تكسي او نبيل يوصلّني

لزم زندي حيل و همس :- بحياتج لا تفكرين تصعدين وحدج
بتكسي
و نبيل عنده شغل امشي بدلي فضيني ...

قلصت عيوني عليه و همست : - تغار عليه

جرني و باسني حيل و اردف :- لا يبوي .. اني بس احترك و جد
جدي ينسمط


دفعته و ضحكت :- و لا تجوز .. شلايتي !

باوعتله و براسي سؤال بس ما ردت افسد هاي اللحظة الحلوة
ضميت سؤالي لغير وقت ماريد الافكار السلبية تنهش
سعادتي
و تعصف بثقتي بيه و هي توها بدت ..

::

دين

وَصلني للبيت و اوصاني بنفسي و وعدني يمر بأقرب فرصة
يشوفلي دكتور اطفال و يحجزلي يمه و حرص عليه ابد ما
اطلع ..

دين :- يابه والله حديربالي على نفسي
ترى انت بليل راح تاخذني ماراح اطير

دم :- والله افكر ارجعج ، خاف ال

بربوك امج تغثج بحجاية
زين ليش ما تخليني اكتلها و اخلصكم منها

دين :- ااادم و تالي وياك

-زين ازوجها لواحد گرايبي عمره 95 سنة بعده بعز شبابه !

غصيت بضحكتي و سويتله علامة بأيدي بمعني :اشتعلو

ادم :- ماشي راح اسكت ، بس بروح ابوج لا تتعاركين
اي شي يصير اتصلي بيه ..

تمام

باوعلي و همس :- اريد ابوسج و عيب منا عالم
دبريني ...

-هههه ولك خليني انزل ، مديت ايدي افتح الباب

صاح انتظري القفل عطلان ..

مد نفسه فوكاي بحركة خاطفة عود يفتحلي الباب
و مدري شلون باس طرف شفتي ع السريع ..

ضليت مصدومـه لبرهـة عاينتله بنصف عين و صحت :-
الجذاب الله يذبه بالنار والباب مبي شي

جرله حسرة و عيونه تاكل بيه :- اكثر من هالنار مو شعلتي ابو
ابويه ..

ودعته بأبتسامه و نزلت و ما راح الا شافني دخلت لبيتنا
هالرجال يوم عن يوم ياخذني من نفسي و ينسبني اله
احبـه؟
مو بس احبـه ..
اني دا اموت بي ..

تلگتني دُنيا بس بوجـه مبهوت ،حضنتها حيل مشتاقتلها
بس لكيت حضنها بارد ، مرتبكة و تضحك جذب
گلبي خمشني و حسيت صاير شي

امج وين ؟

دنيا :- هاا بالسوك هسه تجي ..

اخذت سند من حضني تبوس بي و تلاعبـه ..

صحت :- ديربالج علي حبابه .. لا تخلينه يعور نفسه

فتت عالمطبخ دا اشرب مي لفتني اكو كلاصات جانت امي
محتفظة بيهم
بس للخطار و العمر عده و ضلّن مضمومات لان ماعدنا خطار

اعاين مغسولات و مصفطات بعناية ..

رفعت حاجبي مستغربة حاجيت دُنيا من باب المطبخ

-يولي ذني الكلاصات شوكت امج طلعتهن ..

دنيا :- هااه .. مادري من تجي سأليها !

قوست شفتي و حركت كتوفي بلامبالاة ..

ضليت صافنه بالمكان .. و رحت اسأل نفسي

علياء ... شلون راح اباوع بوجهه بعد الي سمعته
منها و شلون راح اشيل هيج سر باقي عمري

اباوع بعيون دُنيا و احس بالذنب عبنها كل شي متدري عن
حياة امنا
و تريد تاخذ ابنهم على عمى عيونها
ما تدري العار يضل الف سنة و ما ينسي
امي راح تبقى بعين اهلها و الچناين المرأة الي خذت رجال مو
من مستواها
و شردت لغير ديرة ..

شلون ينطيها كلبها تذب بتها هالذبة
ما تخاف لو بيوم من الايام احد عيرها لو شَيلها ذنب امها ..

حملت نفسي و دخلت لكيت دُنيا مطلعة العاب لسند و
تلّعب وياه
اعاين عليها و احجي بسري :- يا ربي والله طفلة ..

كعدت على سريرها و صحتلها تجي تكعد گبالي ..

اجت و حسيتها مرتبكة و تفرك چف بچف ..

اجت كعدت گبالي متهربه بعيونها

همست :- شلونج بالسادس زينة ..

هزت راسها بأي ..

دتروحين محاضراتج .. تحسين نفسج مسيطرة

دنيا :- اي و الحمدلله الامور تحت السيطرة

باوعتلي بنظرة عاطفية و همست :- كله بفضلج و بخيرج
لوما انتِ منين اجيب مال مدرسين ..

لزمت حنجها و همست :- انتِ روحي و فلذة الكبد

نزلت دمعتها ..

عبست :- لزمت ايدها و همست :-ليش البچي يا عوينتي ..

دنيا :- سامحيني دين ، مدري شلون جاريت امي و ما بلغتج

هزيت راسي بأستفهام :- شنو الما بلغتيني بي

طفرت من السرير و وكفت على جهة منصية راسها

-اليوم العصر يجون الجماعة هم شوفه و هم يقرون فاتحتي ...

ضحكت مستهزئة و ممصدكه :- دمشي ولي لج !
بلا شقا ماصخ يولي

-مو شقاا والله اليوم يقرون فاتحتي
راح يجي ياسين و باجي فريدة و اخوه و اخته

-باجي ! من شوكت صارلج باجي يولي !

سكتت ..

صرخت و جفل سند من صرختي :- اااحجي لا تسكتين

كمت همشتها من شعرها :- لج حيوااانه
تريدين تعرسين بلا ما تشوريني
لج اختج اني اختج !
قشمرتج علياء بكلمتين و دفعتج لابن اخوها

شموازيييج !!

فكت شعرها و صرخت :- لا تضربيني مفهوووم
اني حُرة .. اريد استقر ملّيت منا
اريد اعيش بمملكتي

مليييت و اني اشوف نفسي عبأ ثقيل عليج

ملييت من اهمال امي .. و من قيودكم الفارضينه عليه

خلصص اريد اصير بذمة رجال هو يحير بيه بدراستي و
عيشتي
و محد راح يعيشني العيشة الاريدها غير ياسين

شاب مكون نفسه تفكيره ناضج بيته و سيارته و شغله
الخاص
ليش معترضة ؟!

علمود دراستي ؟ وعدني يخليني اكمل دراسة
و اذا على فارق العمر مو مهم ما اظن العشريني راح يكون
كامل مكمل
مثل ياسين

و انت ..
انت هم خذتي المرحوم بكد ابوج لو نسيتي ..

مكدرت اسيطر على دموعي كدامها
و لكيتني ابتسم و المرورة تارسه حلكي

اي حقج حبيت المرحوم و اخذته !

دنيا : اسفه والله مو قصدي و اعرف اني حيوانه و اني السبب
خليني اخلصج من حملّي انت اختي مو امي

همست :- شوكت شفتيني شكيت من عبئج عليه
و شوكت فرضت قيودي عليج
ان جان قصدج على ذاك الرجال فبسببه اني خسرت حياتي
و انتِ خسرتي مرحلة دراسية
و لو ضاله وياه جان انداس على سمعتج بالرجلين

انت ...

انت وحدة جاحدة دنيا !

دنيا /- و انتِ انانية دين ..

لشوكت تريديني تحت رحمتج ..و تتحكمين بيه كأنما اني بنتج
مو اختج ، شوكت تستوعبين اني كبرت !!

دين //

اريد اجاوبها انلجم لساني ..
بلحظة نكرت كل شي و فسرت حرصي و حبي الها انانية و
تحكم بيها
خوفي عليها و تضحيتي شافتها قيود
اهتمامي و تدليلي الها ظنته ع

بء و اني محملتها منيته !!

صرخت :- طلعي براا

دنيا :- اريد احضر نفسي مبقى شي و يجون

احس گلبي صار يوجعني ..

لهناك و سمعتها دخلت ، علياء ام المصايب

طلعتلها اركض ، بهتت و فتحت حلكها و الاكياس طاحت من
ايديها

ضحت و چتفت ايديني : شنو شفتي عفريت !

مبروك ست علياء ، دسترتيها و رتبتيها زين

غمضت عيونها و زفرت انفاسها ردت شالت الاكياس
دخلتهم بالمطبخ
و اني فتت وراها ..

صاحت :- لا دسترت و لا رتبت الولد شافها و حبها
و اجه من الباب و اختج مو صغيره وافقت من مزاجها

روحي اسأليها اذا تحبين !

دين :- طفلة و ما تعرف مصلحتها

علياء :- اني اصغر منها و خذت ابوج ..

قلصت عيوني عليها و هي افتهمت قصدي

هي ما خذت ابويه حباً بي جانت مجبوره ....

درات وجهها تفرغ الغراض .. همزين اجيتي تعاي عاونيني راح
يجون

ضربت باب المطبخ حيل من حركتي

يوم راح تخبليني ... شوكت تحسين بينا ؟؟؟

تخصرت و تباوعلي بحيرة ..

اخذت جف ايدها و جريتها لغرفتها دخلت و دخلت وراها
وقفلت الباب ..

علياء :- شبيج ولج اشو فدنوب استهترتي من تزوجتي لهسه

بهمس احجي :-يوم فركشي السالفه ، دنيا راح تتأذى !!

-شنو هي لعبة و افركشها الناس راح يجون و الولد بلغ اهله

صفكت ايد بأيد بأسف :- يوم مستوعبة وين حتذبين بنتج
ياسين هذا شاهد على كل شي صار
وانت بعينهم البنت الي نهبت و تزوجت بغير رادة اهلها

باجر عكبة على اقل مشكلة راح يعيرونها بيج

شبكت ايديها لصدرها و جن جتها لحظة ادراك

همست :- ياسين ما يدري بذاك الموضوع

دين :- يعني شنو ؟!

-يعني عباله اني حابه ابوج و متزوجته و مسافرة
مايدري بذاك الموضوع !

ابتسمت بمرارة :- مسكين بَشّار شال الشيله كلها
انعل ابو الحب الي سوا بينا هيج

كعدت مرهقه على حافـه السرير لطمت على وجهها الما ملت
كااافي موتيني
منين اتلكاها ...
حسبالج اني مرتاحة سنين حسرة عليه انام اذا مو دمعتي على
خدي
كافي ارحميني ..
ادري اني حقيرة
بنت عاق و زوجة مو وفية و ام مو كفو

بس هاي اني حاولت اتغير
حاولت انطيكم الشي التردونه
حاولت انطي لابوج ..
بس الفارغ من كل شي شلون ينطي
اني فارغة .. جسد بليه روح
حتى گلبي ميت ...

تعبت من المحاولة
تعبت من نفسي .. جان المفروض اكتل نفسي و ارتاح
ياريت ابوج ما اجه بهذاك اليوم و ساعدني

ضلت تناشغ و تبچي
و اني أبجي على بچيتها
و ما اعرف الومها لو الوم نفسي
و كالعادة اخسّر امام عاطفتي الهـا
و تضعفني دموعها رغم كل وَجعاتي منها
صعب عليه احضنها لكني ربتت على كتوفها و همست : كافي
لا تبچين ..

همست من بين دموعها :- ياسين خوش زلمة راح يحافظ
عليها
اني لو جايني ياسر اخوه مجان نطيتها
بس ياسين هذا معدّل ماخذ خصال ابوه كلها
و اني قاولته ليكدام اذا نزلت دمعة من عدها
لو خشن خاطرها بكلمة ما ابقيها على ذمته ..

دين :- بس بعدها صغيرة و سادس علياء !

- بس خطوبه من عين الناس يخش و يطلع علينا
اكيد تكمل سادس و تفوت كليه يله اخليها تتزوج

تنهدت بحيرة ..

- واهله ؟ و ناسكم الي تعرف بقصتكم
دنيا شلون راح تواجه كل هذا و هي طفلة

-ياسين ماعنده غير اخ و اخت
هو جبير البيت و راح يسكنها يمنا
و ما اظن احد يكدر يفك حلكه وياها كدامه
امه فقيره و جانت صديقتي ...

-واخوج اللاخ ؟

-رافض يصالحني ..

دين :- حقه ما اكدر الومه

-انتِ بنتي لو عدوتي

-اني جثة لفضتيها من جسمج من زمان و هسه جاية تدورين
مني حق امومتج !
قرفصت گدامها و بـجيت بحركـه :- ما اكدر اصير بنتج بعد
علياء
بس انتِ وصية المرحوم ما اكدر اعوفج .

علياء :- الحجي بعد ما يفيد بس يفتح جروحنا اكثر
كل شي ما اريد منج غير تساندين اختج بهيج يوم

-مادري شگلج انتن متفقات على كل شي
و اني مثل الضيفه هنا!

-انتِ ابتعدتي دين .. و ما لومج احنا تعبناج

ابتعدت عنج ... اني و دنيا على تواصل
افهميني علياء ، اني گاعد اتشافى عالبطيء
و شوفتج ترجعني الف خطوة ليوره .

علياء :- مااشي يا بنت بطني .. لابد تفهمين غمج جرحي بيوم
من الايام
هسه راح تضلين شايله بگلبج لو تساندين اختج و تفرحينها

همست بضعف :- الله يقدم الي بيه الخير
بس كولي لابن اخوج يا ويله و سواد ليله اذا نزللها دمعة
راح يلگاني كدامه ..

لمحت ابتسامة على طرف شفايفها
همست :- رغم كل شي سويناه بيج
بعدج تحاميلنه گلب سمچة شايلة بنت بشّار

اطلقت تنهيدة طويلة و صحت :- الكلام الي بگلبي
يهد جبال و يذبح خواطر
خليها سكته عليـاء .

عفتها و طلعت اشوف سند
ملتهي يلعب و يعضّ شكو شي يلزمـه بأيده

نصيت و قرفصت يمه ..
العب بشعره الاسود الحلو
ابن المسموطة ممخلي بيه شي ما ماخذه مني

يباوعلي بعيون جرو و يخمط گلبي من يضحك
جريته عضه على بوسه ..

و شفت نفسي ناسية ممتصلة بآدم لهسه

اخذت الجوال لكيته محترك اتصالات و مسجات
وينج ما وينج ...

كتبتله مسج :- ويني يعني ترى بعدني يم اهلي و
صدق او لا تصدق اليوم خطوبة دنيا

رد بمسج :- و انتِ اخر من يعلم ، رجل كرسي

-الظاهر هيج و سمايل ضحكة فشلانه

- انتِ الخير و البركة لا تزعلين عليهم

-ما ازعل ذوله اهلي ...

-و اني ..

-انتَ عيني ...

-اشتعلووو

-منو ...

ادم -لا اليوم اهلج خطية عدهم ختوبه ، اشتعلت تسواهن

-ههههه
كتب :- لا طلعين اذا اكو زلم !
-شي اكيد اكو الولد و اخوه و امه جايين تعارف و قراية فاتحة
وبس
نظامهم العقد بعدين ، تعال انت ..

-دين لا تشعلين جدي ، لا طلعين منا لمن اجي
بعدين هم هيج هيج محاسبين حسابج
عليش طالعة ...

شفته معصب ماشيته كتبتله :- خلص انتظرك ياريت تكون
موجود
بدل بابا ...

شفته يكتب و يمسح الظاهر تأثر ..

اخر شيء رد :- يشرفني ...

بست المحادثه و ضميتها لگلبي و جاني صوتها وراي

-حبيتيه دين ؟

التفتت و عاينت الها :- طالعة هندية ، دمعت عيونه
و ادركت فعلاً دنيا كبرت ...

نصيت و جاوبت بخفوت :- زعلانه منج !
كلامج ضرب گلبي
نسفتي كل تعبي .. بس ما اكدر ما اكلج مبروك

جذبتني و باست راسي ..
دنيا :- اعتذر و الله اعتذر ..
انطيني ايدج ابوسها جرت ايدي و سحبتها حيل

وخري لج ، كل مرة تقشمريني

دنيا :- و انتِ ما تسمعيني ..

باوعتلها بعتب :- شوكت ما سمعتج ..

دنيا :- انت عصبية و مرات اخاف احجيلج الي احسّ بي

باوعتلها بأستغراب :- هذاك اليوم ، ردت اشرحلج
ردت احجيلج الي احسّ بي تجاه الموضوع كله

قلّصت عيوني عليها :- فدوة بس لا دكليلي حبيتي مصارلكم
شهرين

دنيا :- اجذب لو اكول حَبيته بس ارتاحيتله كلشش
بالكم مرة حجى وياي حسيته بابا
وعدني يخليني احبه ..
و يخليني سعيدة و ممعتازة شيء

سكتت تلعب بأصابيعها نوب اردفت :- دين احنا تعبنا
من حقنا نعيش عيشه مرتاحة خصوصاً انتِ
چم دوب شايله همنا اني و ماما ..

دمعّت عيوني و عرفت دنيا شافت بي الاب اكثر من الزوج
و عرفت لو كل الدلال و الاهتمام ميعوض قيمة الاب

باوعتلها بنص عين و همست :- خوش ماكل بعقلج حلاوة

غمزتلي و صاحت :- مثل ما ابو صخر ماكل بعقلج حلاوة و
بقلاوة
لدرجة تبوسين برسالته مثل المشايفه

ضربتها على چتفها و صحت :- انچبي زعطوطة شمفهمج انتِ

ضحكت و صاحت :- عيونج كالت كل شي ، الظاهر العيونهم
ملّونه
ماعدهم خاصية الاخفاء كل شي ينشاف بيهن هههه

همست و هي تتلفت :- طمنيني شلونها علاقتكم ال.....

انحرجت و دسيت خصلة ورا اذني :- على حطة ايدج
الفرق هسه اني احبه ...

اتسعت عيونها !

دين :- لاتباوعين هيج .. اي احبه و اموت عليه
ادم طلع غييير عن باقي الزلم

اجت ضربت چتفي و تحجي بمكر :- يول لعد داريه
كون ادخلج محاضرة عندي و اراويج شلون سودنت ياسين

ضربت حلكي بخفة :- عزة بعينج مفتحة باللبن !

دنيا :- و بالعصير بيبي ...

دين :- لعد سويتي نفسج ما راضيه من اتصلت بيج
احجيلي شنو الصار بينكم حاسه غبت سنتين مو شهرين

كعدت على طرف السرير و تخط بالزولية برجليها
همست :- من اول شهر صارحني بمشاعره
و كال ما طولها عليج اني رايدج بالحلال ..

رفعت حاجبي و همست :- اي بله كملي !

اي بالبداية رفضته و رزلته و طيحت حظه ..
و هو هم مقصر اجه ثاني يوم رزلني و فين حظي
و حجه لامي على طولة لساني ..

و مكفاه بس هشكل ، تحداني اصير اله و ماصير لغيره ..

دين :- اهاا حمش ابن جابر .

دنيا :- شعبالج لعد ... اي ضل يحاول وياي
مرة يشّد و مرة يلين و مرة وصلني للمعهد
و مرة تعارك علمودي و بهاي وكعت ...
انعجبت بشخصيته و بمكانته و فلوسه ..

دين :- فلوسة !!

دنيا :- لاتفهميني غلط .. بس وحده مثلي شستفادت من
الحب
عائلة و ضعنا كلنا الا شوية
خل اتزوج واحد متمكن و مرتاح راح ارتاح وياه ..

دين :- بيج رسّ من علياء تدرين ..

دنيا :- و شبيها علياء امي و تاج راسي

دين :- مكلت شي ، خليني بصدمتي عايفتج تدرسين و ما
اخابرج هواي
طلعتي تتمعشكين وراي ..

دنيا :- لا احنا بطور التعارف بعدنا مواصلين لمرحلة العشك

غميتها و هزيت ايدي :- شلون جيل معقوله هاي اختي
تفكيرها سابق عمرها بسنين ضوئية ..
لو لان اني معقده افكر هيج !؟
و الجيل تطّور و كل شيء تغير ..

صار العصر و حضرنا كل شيء
دنيا طلعت لعّابه لبست فستان ساكي اسود ثلاث ارباع ردن
ثمن جسمها و طولها بشكل جميل

و امي لبست قميص و تنورة و سرحتلها شعرها و حطت
فوكاه شال
مفتوح ..

محسيت الا على صوت دنيا و هي تحثني ابدل و البس شي
مال مناسبة
رغم ملابسي مرتبه لكنها اصرت و ماردت اكسّر خاطرها
و بالگوه دبرتلي فستان يرهم للحجاب..
وشكله حلو ..
سمائي عدل و بي حزام فضي من يم الخصر و لفيت حجاب
ابيض وياه
و طبعاً ما ارتاح گلبها الا خلتلي مكياج خفيف وياه

..

اخيراً اجه ياسين و اهله وياه ..
امه واخته الصغيرة اسمها نوال و متزوجة
و اخوه ياسر ...

سلموا علينا اني و ماما و و ياسين ماصد على وجهي ابد
و النسوان باوسنه و اخذنا بالاحضان بكل اريحية
دخل اخوهم سلم و باس راس امي و صد على دنيا صافحها
و ندار عليه راد يصافحني ..
غلّست و هو رجع ايده متفشل خزرني و ما عاجبـه .

بين سؤال و جواب و مجاملة
حسيت روحي تضايقت ناس لا اعرفهم ولا يعرفوني
و لا نشبهم و لا يشبهون

ا ..
صح مابدر شي مو حلو منهم بس حسيتهم اغراب كلش

لهناك و صاحت اختهم نوال :- عفيه دين منيلج هالعيون
فدوة عبالك بحر ..

ام ياسين :- صلوات ع محمد اشو ما تشبه جماعتنا
عليمن طالعه ملّونه

ابتسمت امي ..

و صحت اني :- اني اشبه بيبي المرحومة ام بابا فوزية

حسيتهم بهتو و فلت وجههم

همسوا بخفوت :- الله يرحمها

و بسري اعرف لحد الان مناسيين شلون امي اخذت ابن
الفلاحة
التشتغل عدهم

همست :- من رخصتكم اروح اشوف دنيا..

رحت لكيتها محتارة و مستحية ، شجعتها تشيل صينية
القهوة
و اني اخذ الضيافة و ندخل سوه لان على هاي حسبتها للصبح
متدخل ..

دخلت و الكل عيونـه عليها
و بسري اقرأ المعوذات اريد احصنها ..

ياسين ما كدر يرمش او يشيل عيونه عنها
و المفلوكـه كل شويه تبتسم اله و تضيع علومه
و بسري اكول مطورين و اني مثل اطرش بالزفة

بالصدفة وكعت عيني على اخوه و الي لكيته يرمقني بنظرات
غريبة
ما ارتاحيت الها ..

اعاين بساعة التلفون كل شوية و اتسائل ليش ما اجه
انشغلت بتفكيري عنهم
يسولفون و يضحكون و يستذكرون مواقف قديمة
و اخذهم الحنين للديرة و اهلها و ناسهم
و لفتتني البريق بـ عيون امي
لمعة حزينة مليانه نَدم و شوق للماضي
اعرف هسه هي تفكر و دكول ياليت يرجع بيه الوكت و اخسر
حبي
و لا اخسر اهلي و حضن امي و لمة الاحباب ...

وجهتلي مرت خالي السؤال عن دراستي

جاوبتها بأقتضاب :- خريجة هندسة .. معماري

ياسر :- اهاا طلعنا صنف

باوعتله و همست :- معماري ؟

-لا اني مدني طرق و جسور ..

-بالتوفيق ..

-اجمعين وردة ..

علياء :- اي عمة ياسر و انت شوكت نفرح بيك ؟

ام ياسين :- يوووو هذا عكرة يبس گلبي
والله ردت اخذله بنت ساهر الصغيرة شلونها
عبالك جماره بس هذا شايف روحه و ما يعجبه العجب
يريد مواصفات عيني ..

علياء :- مواصفاتيش النوب هي سيارة لو مره!

عوجت حلكها ام ياسين و بسخرية صاحت :- اندري
يريدله وحدة شكره و عيونها خضر و هو اسود مصدي ..

ضحكوا كل الكاعدين الا هو جواب بغرور :- اسود و مصدي
و كاتلات روحهن عليه..

باوعت بعفويه لكيت نظراته مدري شلونها
غشمت روحي و گلت يمكن هو طبعه هيج
ما اريد اسيء الظنون و احنا بالبدايـه

بعدني ماخذه وضعية المتفرج و عيوني على ياسين و دنيا
الي سارحين بغير عالم و ما يدرون شدا نحجي و نكول

هنا حسيت بالغيرة شدعواه هلكد يعاين عليها
مشايف نسوان لو شنو
راح اكوم ابزز عيونه ..
التفتت الي دنيا خزرتها
باوعت بعيونها لياسين انطته ايعاز
باوعلي بخزرة و رفعتله حاجبي بمعنى شكوو؟؟؟

باوع لامه و نطاها اشارة ..

حجت امه مقدمات و سوالف ماقبل التقدم لخطبتها
و هو هم طلبها رسمياً من ماما بأسلوب حلو
و تمت الموافقه بين الطرفين و قرئنا فاتحتهم على بركة الله ..
جايبين حلقات وياهم لبسوها و اتفقوا على يوم قريب يتم فيه
عقد القران
وحفلة المهر سوه ..

اشتغلت المباركات بيناتهم و الصالة الصغيرة امتلئت بطاقة
ايجابية حتى سند مكيف بنصهم و يباوع بعيونه يريد يفهم
شصاير ...

اشرتلي ماما اجيب الضيافة ..
رحت للمطبخ ارتب الكيك بصحون ..
و العصائر بصينية ..

و سمعت صوت ورايه :- عيني بزونه منين الحمام !

شلت راسي متفاجئة هذا ياسر ..

جاوبته بأقتضاب :- ام سَند ..

ياسر :- هااه ؟

دين :- صيحلي ام سند و الحمام نهاية الممر يم غرفة امي

و رجعت اشتغل بلي بأيديه هو حس على نفسه
فشل و راح ..
اجت نوال تعاوني خوش بنية و حبابه ..
كل شوية ماده ايدها تكرص خدي

طلعنا اني وياها بيدنه الضيافة و رن جرس الباب ..
حسيت بالغبطة هذا اكيد ادم
مدري ليش انفرجت ملامحي و رجعتلي الابتسامة

حطيت الضيافة على السريع
ورحت فتحته و بالفعل طلع هو واكف على الباب ..

شافني بهت ابتسم و عيونه لمعن ..
و بلحظة اختفت ابتسامته و عيونـه اظلّمت من شاف
الولد الورايه يصيح ...

#يتبع

#الفصل التاسع و العشرون - هل سأفقدهُ؟

*انت بس تلمسني اموت ابين اديك
ثلج وتلوحه الشمس
وتدري اماره النفس
اتقربت خليك واكف في مكانك
وابتعد والله احس اني بحنانك
لا لتجبرني اجرحك بالكلام
وابتدي وياك صفحه من الخصام
مو سهل انت عليه
جرح عايش لسه بيه
وما تطيب ..
واني ماريدك تطيب
ابقه بين ضلوعي خنجر
وان جان ماترتاح افتر
كطع شمتريد كطع
واخذ كلشي ولا ترجع
وبعثر بروحي
واني خليني اجمع
لكن اترجاك تسمع كلمتي
العمر مثل القطار
ولا تظن ارجع فتي
والمحطات انتهت مابيها راحه
وخلي احاجيك وبوضوح وكل صراحه
الناس كلمن ملتهي وحاضن جراحه
وانت جاي تكطع بعاكول صدري
راحت سنين من عمري

لـ خضير هادي

.

.

.

ديــن //

اباوع عينه على الي يصيح وراي ...

ياسر شايل سند :- عيني دين هذا ابنج طگ من البچي ..

بلعت ريگي و اني اعاين لنظرات آدم و الشرارات الجاي
ترسلها بـاتجاه ياسر

عبرني و راح تناوش الولد منه و عيونه لو الها سنون جان اكلته
اكل ...

ابتسمت و رحت اخفف شحنات التوتر الي ملئت الجو
عرفتهم على بعض و بصعوبـة تصافحوا بيناتهم ..

رجع ياسر للصالة و اشرلي افوت گدامه ..
دخل ادم و سلم و السلام بينه و بين ياسين هم جان بأقتضاب
و لا چنهم قبل فترة تمالخوا بالشارع .
باركلهم و نصى بمستواي حط سند بحضني

شاورني بخفوت يم وجهي :-اكعدي و حطي بحضنج و ممنوع
تتحركين !

كعدنا نسولف و اني احس تصنمت بمكاني
معقولـه ضاج علمود سند

اعاين اله باله مو يمي عيونه تتنقل بالوجوه
بالاخص بين ياسين و ياسر
و كأنه كاعد يدرسهم او يراقبهم عجزت افسّر ماهية نظراته

و من تصد عينه بعيني احسه يتوعدلي او يمكن يتهيألي هيج

ترخصوا هم بعد ما اتفقوا على كل شي ويه ماما
سلموا على دنيا و ماما و اجو ناحيتنا اني و ادم هم سلموا
و ادم بوده يخليني وره ظهره عنهم ..

طلعوا هم و اني رحت وره دنيا الي حسيتها انزعجت
دخلت لغرفتها لكيتها مبوزة و الوجه مكلوب ..

دين :- خير شبيح ؟

دنيا :- اسألي رجلج الفات علينه مثل الطنطل سلامه ثكيل و
عيونه تاكل بيهم شدعواه هيج حقنه وتر الناس و شردها ...

ضحكت و اضرب على حلكي :- حسج ولج ..
ترى هو شكله هيج شدعواهم انخلسوا منه

دنيا :- خو انتِ تركصيلها بچفيه ، قطع الاعناق و لا قطع الارزاق
مخليتوني افتهم شي من خطيبي !

دين :- ديله عيني ام ختيبي خل يعرس عليج و شبعي تفاهم
وياه
بعدين اكص لسانج اذا بعد كلتي على ادم طنطل

صاح عليه ادم حتى نروح ..

دنيا :- شنو متباتين اليوم ترى ميصير هيج اشتراج خما اشتراج

دين :- اني مرة تزوجت و انت راح تتزوجين و تفهمين الحياة
الزوجية تختلف عن بيوت اهلنا
بعدين خل يولن الكاج هسه تنتظريني على نار اطلع
حتى تاخذين راحتج ويا دارسين تسولفين وياه

دنيا :- اسمـه ياسين
دين :- و اني اصيحله دارسين بكيفي ..

غمتني و ضحكت عليها ..

تقدمت حضنتها و بوستها و وصيتها تكون حريصة على
نفسها
و ما تنطي اي شي بسهولة..
تفهمت و تقبلّت نصيحتي ..

رحت لعلياء الي لكيتها دافنه نفسها بالمطبخ
سلمت عليها من بعيد ..
و گلبي ينخمش من اباوع بوجهها و اتذكر سوالفها

باوعتلي بنظره حزينة بعدين كالت :- الله وياج سلمينه ع
الحجية و اهلكم ..

دين :- يوصل ..

صعد غراضي ادم و صعدت سند الي غافي بحضني ..

و سي السيـد ساكت و بس يجر حسرات ..

ايده لازمة ستيرن السيارة الي عبالك راح يشرد منه و عيونه
دم
حواجبه معكوده و عروق كصته مبينه

مدري شلون وصلنه بسلامـه لبيتنا ..
يسوق سريع و يتراجف و من اسأله يكول ماكو شي !

مشيت بأتجاه غرفة الحجية عود افوت اسلم عليهاا
جر ذراعي حيل و همس :- صعدي ابنج لغرفته
و انتظريني فوك ..

دين :- بس اسلم عالحجية !

ادم :- دييين اصعدي ..

ما عاندته اخذت الولد لفراشه و توجهت لغرفتنا انتظره

كعدت ذبيت حجابي اكل اصابيعي و افكر شبدر مني
و خليته يتعصب !؟

دخل و قفل الباب وراه ، نزع سترته كورها بأيده و لطشها
بالكاع

جفلت و تصنمت ..

يفتح ازرار قميصة من فوك مثل الي يريد يتنفس ..

فات للحمام فتح المي و وره شويه طلع وجهه و مقدمة شعره
يقطر مي !

يجر حسرات و يستغفر..

تشجعت و كلت اسأله شصاير ؟

صرخ بوجهي :- اسكتييي

اتسعت عيوني من شفت دم نازل من خشمه

صحت :- ادم .. خشمك ينزف !

نزلت كم قطره لوثت قميصه الابيض

آكل بشفتي و اتراجف و بسري اكول دخيلك ربي شصاير ؟

راح غسل و اجه كعد گبالي

گمت كتله خليني اجيبلك مي..

صاح :- رجعي كعدي .. ما اريد زقوم !

كعدت :- اااي ست دين ، شلونج ؟ ان شاء الله تونستي

باوعتله و مفاهمة حاجه :- ااي الحمدلله .. تونست

كام و دفر الكرسي برجلـه حيل
و اجه وكف على راسي يرعد :- انتِ فاهية لو تريدين تموتيني
؟!

باوعتله وعيوني دَمعت :- شبيك ادم غير افهم ؟

لزم ثوبي من صفحة كتفي و همس من تحت سنونه

هذااا منيين ؟

لزمت چف ايده ار

يد يهدني :- من يم دنيا شبيكك

رفعني و يخض بيه و كفت و منصي يحجي يم اذاني

-طالعه بهيج ثوب مقسم تفاصيل جسمج
و لاعبه بوجهج لعب و الكحل مجرور يا سلام
شنو بويه معرسة و اني ما عندي علم

عاينت الـه بتوسل و همست :- كول يا الله ادم
كل هذا لخاطر فستان و جرة كحل !
دنيا كالت بدلي لخاطري و مردت ازعلها والله

فتح عيونه حيل خلسني و يصيح :- و اني شنو
كو..... ، طرطو..... عندج تخافين على دنيا تزعل و رجلج ال...
حاصرة صد..... ج و...... و كاعدة بنص زلم ثنين

انملخت صفحة من فستاني بأيده ..
اختنكت و الدمع تجمع بعيني صحت :- شبيك !!
شجاك شفتني مصلخة !
ترى ثوب مستور ولابسة حجاب
و الزلم الاثنين ذول ولد خوالي و احد منهم رجل اختي حيصير

مد ايده و اخذ وجهي عصره حيل
و احس بسنوني واحد يطك باللاخ
يحجي و عيونه نار ...

متلبسين هيج بعد ...
ولد خوالج ولد عمج اخوج محد يلمحج هيج بعد
اجرم بيهم و ادفنج بأرضج مرة لخ افتهمتي لولا !

باوعتله بأسف و دمعتي نزلت على چف ايده المحاصر وجهي .
...

صاح :- افتهمتي !!!

مكدرت احجي بس هزيت راسي بـ اي !

تركني ابچي سنطة ..
صاح :- روحي بدليه !!

تصنمت بمكاني احاول افتهم الي صار
اجه و بحركة سريعة لزم الفستان و سلته شلون ينزعون الطفل
حتى ترجيتي طفرت من شحمة اذني !

و صاح :- بدليييه !

فتحت عيوني و شهكت الملم بروحي ..

دفعته و عطت :- هاااي شبيييك
لزم زندي حيل و يأشر بسبابته على حلكه :-حسج ما يعلى بعد ،
اكتمج و علي ..

اومأت براسي و اعتذرت بخفوت ..

مشيت لصفحة كنتوري اخذتلي دشداشه و فتت للحمام ..
لبست دشداشتي و عيوني مبطلت تبجي ، اسلوبه فض
وياي و طلع الروحة من خشمي .. بعد فلا اروح لمكان !

اول مرة اشوفه هشكل ..
هو اني شوكت كاشخة لو حاطة مكياج
خرب حظي اي والله ..

طلعت لكيته ممد عالسرير بطرك البنطرون مغطي عيونه
بذراعـه و يجر حسرات ..
راحت عيوني على قميصه المشمور ع الارض عيوني راحت ع
الدم الي بي و قلبي نكمش ..

هو ليش نزف خشمه معقوله مريض لو بي شي !؟
و اعاتب روحي بسري :- شوف گلبي الرچيچ شايله
همه و هو صار ساعة يرزل بيـة ..

رحت شلت ملابسة و جهزت روحي للنوم و عيوني ما بطلت
تهلّ ..
الموضوع مايسوى شجاه و شجاني جاي ابجي
مثل الي تريدلها حجة تفرغ طاقتها السلبية

رحت مددت بصفـه و لفيت روحي بالبطانيـة
ضلّيت ابچي سنطة ..
و هو يجر حسرات .. و يستغفر

حسيته گعد و صاح :- استغفر الله .. هسه عليمن تبچين ..؟

مد ايده طبطب خفيف على كتفي و همس :- كافي اسكتي ..

و بدل ما اسكت الدموع تحولت لشهكات ..
مد ذراعـه و جذبني لصدره ..
باس هامـة راسي و اعتذر ..

ادم :- اموت على ربج ، و اغار عليج من الهوا
جنت اتمنى من الله لا يراويج غيرتي
اتحول و أصير غير انسـان
بس انتِ اليوم جبرتيني ..

انداريت و صار وجهه مقابيل وجهي ..
همست من بين دموعي :- هو اني شسويت ؟!

خزرني و كال :- لا يابوي امي الجانت لابسة ثوب كصيف و
بلون عيونها
و جارة الكحل موصلته لابو موزة ..

رفعت تك حاجب و همست :- ليش تبالغ ؟!
سويتني لابسه حصر و سويتني جارة الكحل لاذاني..
ظلمتني والله ..

ادم :- ما ارتاحيت لابن خالج ابو بنطرون خارط
شويه و يطلع طي.....ة
مرة لخ اذا يصيح بأسمج هيج الا اكص لسانه و احطه ...

ضحكت بخضم ضوجتي .. و اردفت : لسانك يمعووود

باس ارنبة انفي و همس :- بعد لا تعيديها ..

بمكر همست :- خلص بعد ما البس غير الاسود

ادم :- حتى اشرمج شرم

اتسعت عيوني ...
و هو برقت عيونـه
و ثنينه غرگنا بنظرات بعضنا البعض ..

يمشي ايديـه على خصري بهدوء و نظراته مرتخية

همست و احاول اخفي ارتباكي :- شبيك مريض ؟

اومأ براسـه بـأي ...

بعبوس و خوف تسائلت .. :- يا ساتر من شنو تشكي ؟!

-منج ،

ابتسمت و اردفت :- لا عليك الله ليش خشمك طك دم

هز راسه بخفة و همس :- مادري يمكن ضغطي !

اتسعت عيوني و بسري تساءلت معقولة هلكد تأذى ؟

ادم :- وين صافنـة ؟!

-بيك ..

خزرني و بطرف شفايفة ابتسامة ..

دين :- اووف يهالعكده بنص حاجبك شوكت تروح !

بحركه سريعة خطفني و صرت فوكاه ..

ارتبكت و انكمشت على نفسي
بتلعثم همست :- شدسووي ادم ؟

وخريهاا ..

دين :- شنو ؟

-العگده ، و خريها ..

ارتبگت منه .. و اكاد اسمع ضربات قلبه و كأنها تدك جوه
ظلوعي اني ..

گلبني .. و حاصرني بين ايديـه

انفاسه حارة تلفح بوجهي البارد
و انفاسي باردة تفسّر مدى خوفي من هيج لحظة

همس :- اني حتى عروگ روحي تعكدت من وراج !
جيت يمج .. فكيهن عگدة عگدة !

همست بنبرة ضعيفة :- عفيـة ادم وخر

-ما اوخر .. طگ گلبي منج .. دفن وجهه بنحري يشم بيه و ينثر
بوساته بخفـه على وَجهي ..
يهمس و عيونـه تاكل بيـه :-و خريها للعكدة يله
سلميني نفسج و كوليلي احبك خلي ترد روحي
باس طرف أنفي و همس :- كوليلي اريدك مثل ما اريدج هسه
..
مجروح اني دين و بيج اداوي جروحي ...

عيوني تتلاكط داير مدايري تدورلي مهرب ..
لكن هيهات و انا مُحاصرة داخل قُضبانـه !

احبـ .. ك

همستها بتلعثم و غَمضت جفوني حيل

ادم :- اذا غَمضتي اموتج

عايني بعيوني .. شوفيني شگد احبج شوفي الشوگ و اللهفـة ،
حسي بناري و لو مرة !

ادري بنفسي راح اغرك .. راضي اموت بيهن !

فتحت عيوني .. و عاينت بنص عيونـه ..
اهدابة نعسّن .. و قزحيته اتسعت ماشفت شي غير
روحي تعوم بيهن ..

ابتسمت و همست :- ياحظي بيك ..

مرر اصابيعـه على حواجبي باس عيوني و همس يم أذني :-
ابد لا تغمضين .. باوعي بعيوني لا تروحين بفكرج لغير
مكان ..
اني يمج .. احبج و ما راح أأذي شعرة منج
باوعيلي كم آيـة شوگ راح ارتل بيج !

دين / اخذ شفايفي و مدري شلون اخذني مني ..
و سحبني وياه لدنيا بس اني و هو بيها
عامل الخوف بداخلي بكل حرص ماخلاني لحظة اغادر عالمه ..
حدما اندمجنا روح بروح و احسني صرت جزء من كلـه ..
يعزف على اوتاري بشغف ..
مرة يقسي و مرة يحن و مرة يضيع اللحن ..
و اني ضعت بي مدري اني سافرت للمحطة
مدري هي اجت عندي ..

حبيبي الي انتظرتـه من سنين ..
حَمد ..
و القطار جان قصة حبنا ..
الي مرت بكل المحطات بحلوها و مرها
بالصبر و التضحيات ..
الليلة جانت حنونـه دافيـة ابد ما تشبه برودة ذيج الليالي و لا
قسوة كل شتا يمر عليه ..
و رحت اسأل نفسي ..
هل تصالحت اخيراً ويه فصل الشتا ..
و البرد و المطر ؟!
::

في مكانٍ آخر ...............

ايفان :- يوم خاف حرام .. بلا كلشي الله مموفقني
لا حظيت برجال بي حظ و لا حتى بطني شالت جاهل

تسواهن :- جا مو حرام السوته بينه هالمكطمة ام گصة الفكر ،
حطت وليدي جوه التراب و حرمتني من ريحة ضناه ..

ايفان :- و ليش اكتفت ؟!
تزوجت غريمنا و غوت رجلي و سودنته ...

تسواهن :- الشهادة لله ، رجلج هو كوا....
و عينه طايرة عالطگه و اللگه ..
لو صخله مرت من جدامه طارت عيونه عليها
اسمها عدها .............

ايفان :- يمـه عيب شهالكلام ..
هسه كوليلي ..
هاي المرة شغلها مضبوط ، راح تكسحها من عدنا و تخلصنا ..

ابتسمت تسواهن بخبث :- راح تكسحها من الحياة بكبرها بس
كون هاي الي جدامج تصير سنعة و تنفذ
الشغل بالمضبوط

عاينت بعيون تلمع للشابـة الكاعدة تفرك بأيديها
من الرعب ،تفكر لو شافوها هسه ويه تسواهن شراح تكون
جزاتها من اخوتها ...

ايفان :- سمعتي الكلام زين ؟ و خليها ابالج ابن اخونه ما
يجيسه اي شي
من الي راح يصير كوني حذرة !

هزت الشابة راسها بالموافقـة و بداخلها نار االخوف تسعر من
الجاي و الي راح تقدم عليه ..

::

دين :- فتحت عيوني بهدآي ..
و ما لگيت غير وَجهه گدامي ... مستند على كوعـه و يعاين الي
بَـ هَيام ..

استوعبت .. الي صار بيناتنا ، سخن وجهي
و تواريت عنـه جوه الغطا..

جر الغطا من وَجهي ..
ابتسم و همس :- رحمة لربج شگد حلوة انتِ
گد ما حلوة تنوكلين ..

احتاريت بيش اجاوبـه كتله :- تسلم انت الاحلى ..

اطلق ضحكـة عاليـة و أردف :- الجذاب الله يذبـه بالنار ..
انگلبت على بطني رافعـة راسي بأتجاهه صحت :- والله انت
حلو و غمازتك تاخذ العقل ..

مد ايده يمسّد على ظهري خفيف ..
-تروحلج فدوة الغمازة و اهلها ..

انتبهت لنبرة صوتـه تغيرت ، كمزت الملم روحي و احجي :-
عفيه خل اروح اشوف سند

جر ايدي و كعت على صدره ..
-نايم قبل شويـه رحت شفته !

انتبهت ملامحـه اليوم احلى و اهدأ و النونـة البنص حاجبة
مختفيه ..
بمكر صحت و احاول اغير الموضوع الجاي يفكر بي هسه
-هاي وين راحت عگدة الحواجب ؟!

ضحك بصوت عالي و اردف :- خلف الله على ذيج البنية
كضينا الليل اني وياها نفگ عگد و نسجل اهداف و يغمز ..

ضربت حلگي بخفه : عزاا اددم ..

-عيونـه .. حيله و بعد حيله
—احبگ ..

-يبوو اشتعلوا اهلج تعاليييي ......

...........

في مكانٍ آخر ............

ناديـه -لك يوم عوف درب خالك .. هذا عماه الطمع و الجشع
عاين حبيبي حكك رجعلك بعد سنين ..
و صرت بالمكان الصحيح ليش تمد ايدك للحرام
و تخرب حياتك بالاجرام ...
يوم ادم اذا عرف الك ايد بالسالفـه يحرك البيت على روسنه !

رافـد :- اني مالي ايد بالسالفه اني سمعت و اجيت گتلج ، بس
خالي ما اكدر اعوفـه
الرجال الي تكفلني و ساعدني اخش بنصهم و اجيب حكي من
عيونهم ، انه مو ناكر المعروف يوم

ناديـة :-
لا تنسى فضل ابوك الرباك و الي للموت ما خشن خاطرج
بكلمة !
شويكر مو حباً بأمنه و لا بدافع غيرته على اخته يريد الانتقام
بس حلّت بعيونه فليسات الورث ..
تعلمني بي و انه وياه حكلتنا نفس البطن ؟

رافد :- ما ناسي حتى تذكريني .. انتِ ليش كارهه خالي شاكر !

ناديـة :-ما اكرهه بس خفت من جبروته ، الرجال الي ما لطف
بحال طفل ابطن امـه شلون اسلم وليدي اله ، مثل ما سولتله
نفسه قتل نفس بريئة بسبب الفلوس
يجي يوم و يكتلك خاطر مصلحته ..
رافد يوم ، اعرف انت مو هيج لا تخليني اغضب عليك

رافـد:- اطلعي من السالفه ، هذا شغل زلم ، خالي ما اعوفـه و
راح اخلي يدير شغلي و يوسعه و امشي على نهج الوالد
انتِ الج الصافي يوم

ناديـة :- و روح امي يا رافد الما تراجعت و عفت شويكر المجرم
بنفسي اروح

لابو صخر و احجيله كل شي و عليه و على اعدائي
.....

::

فطيم :- ولك جووووز مني چم نوبـه اكلك لا تحبني هيج ...
تعاي لَيه وج يمه دين هذا رجلج شبلااه معوز حنان ..

دين :- اعاين لمنظرهم و ابتسم ..
آدم حاضنها يبوس و يعصّر بخدودها ..
وهي منزعجـة ما تحبه من يلج وياها يبزعها ..

حطيت سند على كرسيـه يتريك و رحت كعدت يمهم
يدغدغ بيها و هي ما تحمل ..
لزمت ايده عضتها يله فلتها ..

ادم :- هينه افاطم ، تعضيني مووو

فطيم :- ولك بزعتني .. نزلت عليه بوس و تعصّر ذيج مرتك و
العب وياها انه شكووو

باوعلي بمكر و همس :- شفتي جده دكول العب ويه مرتك ..
امشي خل نلعب فوك !

خزرتـه و هو يضحك بخبث ..
باس جديته من راسها و همس :- الله لا يحرمني منج أمي ..
جرت وجهه و باسته بجبينه و راحت تدعيله ذاك الدعاء الحلو
بالتوفيق و راحـة البال ..

اقترب و نصى بمستوايـه :- هسه يله حسيت نفسي عريس ..
احبج ام عيون ...
بلكي يخلص شغلي و اطلع من وقت ..

باوعتله بمكر :- و شعندك طالع من وقت ؟

-عندي وياح حسابات قديمة اريد اصفيهن .

دفعته و كتله :- رووح يازي عاد

التاف و صاح :- مو صوجج صوجي ردت اخذج انت و سند و
نطلع

باوعتله بعيون تلمع ، و الفرحة الاحس بيها لو الها لسان جان
نطقت .. اخيراً صار يهتم بسند و يهمه امره ..

توكل لدوامـه و بقلبي ادعيله ..
لفيت ع الحجية لگيتها تمسح دموعها بفوطتها الململ
البيضـه ..
و خدودها صايرة طماطة من التعصر مال ادم

استغربت من دموعها ، قبل شويـة جانت تضحك و تتشاقى
رحت كعدت يمها بوست راسها و حاوطتها بذراعي ..

-ليش تبچين يا بعد عيني ؟
منو زعلك منو بچاك ..

ابتسمت و نشفت دموعها
-انه ما زعلانه .. بالعكس والله
بس اول مرة اشوف ابو صخر هيج فرحان ..
شهكت و فكت ثوبها و ضلت تدعيلي و تدعيله ..

همست :- يمكن على بالج اول مرة دتشوفينه شلون فرحان و
ينكت للهوا
هذا من كاعـه هيج مت عيني من راح وليده تبدل حاله
و صرنا ما نشوف ضحكته بس بالمناسبات
اوف يادين اريد الله يرزقج الوليد الصالح منه و يتمم فرحة
وليدي على خير ..

دَمعت عيوني و بگلبي احس زفـة عرس من السعادة
ما ابالغ لو گلت هاي اسعد لحظاتي ..
من اشوف عندي زوج يحبني و انسانه مثل الملاك الله حطها
بطريقي عوضتني عن حنان امي الي فگدته ..

همست :- عفيه حجية ضُميني بحضنج شويه
ضحكت و تناوشت نص جسمي بحضنها
تمسد و ترقيني مثل كل مرة و الدموع توكع بحضنها
المعنى الحقيقي لو گلت اذب حمولي ..
هاي الانسانـة الطاهرة النظيفة و الي حتى بحجيها تلمس
العفة ..
عدها قُدرة عجيبة تمحي همك و تاخذ همومك و تنطيك جرعة
راحة نفسية

::

مرت ايام قليلـة احلى من العسل على گلبي
عشت ما بين دلال آدم و ما بين حنية الحجيـة عليه
و من هلگد ما نفسيتي مرتاحـة گلبت البيت كلاب بالندارة
عند امي ما كربت هيج ، و هاي بشيرة الخبيثة
ذبت حتى التركيب براسي ..
و شالت ايدها هي و بنتها فرد نوبة مكضياتها تخامة و
تسيورات و نشوفهن بس وكت الوجبـة..
الى ان لاحظ ادم اني جاي اتعب و مدا اكدر اوفق بين البيت و
الطفل و هو ..
اتفق ويه عاملة تجيني بالاسبوع مرة تعاوني بالشغلات الثكيلة
..

اخابر دُنيا الوضع مستتب و فرحانـة بخطوبتها و ديفكرون
يسوون عقد سيد بس منتظرين خالي ساهر يحن و يرضى
يصالح امي و هو راكب راسه لا هو و لا ولده راضيين
يصالحونها و محملينها ذنب هجرتهم من ديرتهم و ناسهم ..

انكمش گلبي و خايفة لا تنعكس هاي الامور على دَنيا مستقبلاً
و ماكدرت اصارحها بمخاوفي ..
لكنها تمدح بياسين الي يغدق عليها بالمشاعر و الهدايا و
منسيها كل الفوارق العمرية و الاجتماعية و الفكرية ..
اني خايفة من هذا الانبهار السريع بهاي العلاقة
خايفة لا يجي يوم و تنطفأ شُعلة علاقتهم قبل لا تبدأ
و دنيا تعيش صدمـة نفسية !

علياء ...
بالرغم شگد تحاول وياية ، تراسلني احياناً
او تدك عليه اتجاهل مكالماتها و ايدي تروح عالرسائل و تعجز
عن الرد ، تجيني لحظات و احن لكلمة يوم
و من اتذكر اني شنو بالنسبة الها و شلون جابتني لهاي الدنيا
اكرهها و اكره نفسي و اضل ابچي الى ان افحط ..

مهما اتناسيت او أگول تخطيت يلاحقني الماضي ..
و الذكريات تعصف بقلبي تمرده مرد ..

بهاي الفترة لاحظت تصرفات غَريبة لنور ، تحاول تحتك بيه
و تقوي العلاقـة بيناتنا مرة تجيب حلويات و تشاركني بيهن
مرة تجيبلي نفنوف و دكول اشتهيته الج مرة اشوفها تلاعب
سند و تهتم بي و اني بنية صافية
گلت يمكن الله هداها اخيراً و فهمت اني مو عدوة هذا البيت
اني ضحية تعرضت للمساومة و الجبر و ابني طفل بريء ماله
اي ذنب
بالمشاكل و الثأرات الي بينهم ..

صار عمر سند 11 شهر يمشي و يتعثر شلع گلبي و اذا تأذى
يبجي
و الفحطة تحطمه لاحظت زرقِة اصابيعة زايدة
اخذناه اني و ادم لدكتور الاطفال و بعد فحص سريري وجه النه
سؤال
فيما اذا كان عدنا تاريخ مرضي ويا مرض القلب اني هزيت
راسي بـ لا
لكن ادم غمض عيونه و تنهد بحزن كال انه جدهم عنده و اخوه
نبيل ..
الدكتور طمنا بس حجايته

ركيكة و الي زيد قلقي اكثر من رشح
النه دكتور قلبية

من سمعت هيج احس الكرة الارضية توقفت عن الدوران و
كل شي بهذا العالم
صار ساكن ..
ادم لاحظ خوفي و رجفت اطرافي طمني و كال مو شرط اكو
شي موزين ..

الحجية من سمعت انخطف لونها و ضلت تدعيلة بصلاة الليل
و اني الليل كله ما نمته و عيوني ما وكفوا دمعهم ناجيت ربي
ما يلوع گلبي بخبر مفجع

ادم ضل مُصر على موقفة ماكو شي و يواسيني و يشجعني

مدري شلون مرت ساعات الانتظار لحد ثاني يوم ..
اخذنا سند و توجهنا لدكتور القلبية و الي جان اسم معروف
طول الطريق لساني يلهج بالاستغفار و الدعـاء ..

وصلنا السرة و ادم جان مو احسن من حالتي بس يتظاهر
بالقوة گدامي
و بعد عدة فحوصات و ايكو زف الي الدكتور الاخبار و الي
نزلت مثل الصاعقة
على راسي ...

طلع عنده مشاكل جَمة بالقلب صمامات مشوهه و واحد
معكوس و فتحة و فقدان البطين الايسر

انصدمت صدمة عُمري .. و احس ظهري حرفياً انقسم
لنصفين
تراجعت خطوة للوراء و حسيت الارض تسحبني لولا ان يد ادم
سندت ظهري

للوهلة الاولى عشت حالة من الانكار و ضليت احث الطبيب
يعيد فحوصاته
و يتأكد خاف اكو فد غلط غفل عنـة و ضليت احلفله الولد
طول ذيج الاشهر
ابد ما عانى صح عنده فحطة بس جنت اسكتة و يرجع طبيعي .
.
لهناك و حسيت نفسي ام مهملة سيئة شلون ما لاحظت
هالشي من البداية

الدكتور بلغني انه للاسف حتى لو عارفه من البداية مجان
يطلع بأيدي شي
اسويه هذا تشوه من الولادة ... و ما بين عدنا بالاشهر الاولى
بسبب قلة المجهود و ايضاً يُعتبر من الحالات النادرة ..

ابـچي و احس بالضياع و عيوني تتنقل مابين ادم الي على
لحظة و ينفجر
و لسند الي جالس يلعب بحضني يجهل مصيرة و مابين
الدكتور الي ملامحه جامده
و ما نطاني امل ملموس ..

ضميت وَجهي و انفجرت بدموعي و انهياري و ضعفي ..
احس روحي بداخل فقاعة من الكوابيس الي مالها نهاية

باوعلي ادم و بعيونـة كومة حزن و دمع ، توجه للدكتور و كاله
شنو الي نسويه اني مستعد اسفره و اعالجـه ..

عاين الدكتور النه بنظرة أسف و همس :- هو شيء اكيد وراه
رحلة من العلاجات
و العمليات الي لاحصر لها ..
بس تبقى الاعمار بيد الله ..

نسيت نفسي و ايماني لبرهـة و رحت اصرخ بوجه الدكتور
رافضة لكل كلامـة

صحت :- شنو قصدك الاعمار بيد الله ، يعني اكعدو و اسكتو
اول و تالي ابنكم يموت

الدكتور : معاذ الله ما كلت هيج بس لازم تكونون بالصورة
رحلة فتح الصمامات المسدودة و سد الفتحات و زراعة و
تبديل الصمام
رحلة طويلة و مجرد تمدد بعداد عمره ..
لكن لو نرجع للحقيقة ابنكم محتاج زراعـة قلب و هذه العملية
بس بالخارج
و حتى بالخارج فهي كلش صعبة لان الزراعـة تحتاج متبرع و
يكون بنفس عمر ابنكم

ادم :- يعني شنو؟

الدكتور :- يعني طفل بعمره يكون ميت موت دماغي و اهله
مستعدين يتبرعون باعضائه ...

اجه ادم تناوش سند مني و اني دفنت راسي بين چفوف ايدية
احاول استوعب الكلام الي ديحجيه الدكتور ..

جان كلش صعب ينزل على مسامع اي أم
انهد حيلي و غشاوة غطت على عيوني

الدكتور :- خلونا نراقب وضعه و نعرضه على لجان تابعة لوزارة
الصحة
و خليني اكون صريح وياكم الفترة الي فاتت محسيتوا على
ابنكم مريض
بسبب قلة المجهود الي يأديه و هو طفل ..

منا و رايح الطفل راح يبدي يمشي و يلعب و يركض و يتعثر
يتعصب و يتعارك و هاي كلها مجهود عليه فراح تظهر عليه
علامات
شفايفه تزرق و اصابيعه تنتفخ و تصير باللون الازرك ..

حاولي تراقبيه .. ممنوع اللعب المجهد ويه الاطفال
ممنوع الركض و ممنوع البايسكل ..

حافظوا على صحته خصوصاً بالشتا
الفايروسات تدمر جهازة المناعي و تخليه عرضة للخطورة

هذا من غير بعض الاطعمة راح اكتبهم الكم ممنوع يتناولهن ..

بعد نقاش طويل .. و تعليمات من الدكتور ..
حملت ابني و هم الدُنيا كله على اكتافي ..

ظهري محني و قلبي مكسّور ..

كعدنا ادم بالسيارة و راح جابلي عَصير ..

-اشربي سكرج هبط و وجهج اصفر !

ابتسمت بمرارة و همست من بين دموعي :- لا تخاف ما
موت
الموت مو الي ... الموت بس للي احبهم
شكد ما اتمسك بيهم ينسابون من بين ادية مثل المي..

مكتوبلي انفجع بگلبي ادم ..

عيونه غوركن بالدموع و همس :- اسم الله لا تفاولين عالولد
و عيونج ما اعوفـه اشتري حياته لخاطرج لو الثمن عمري

بس لا تسوين بروحج هيج
عايني لنفسج وجهج اصفر و شفايفج بيض
امشي خلي اسويلج فحوصات ..

استندت براسي على الكشن و غمضت عيوني

-اخذني للبيت ادم ..

ما عاندني اخذني و رجعنا و لگيت الحجية تنتظرنا و بعيونها كل
علامات الخوف و القلق

ركضت لحضنها ابـچي ...

خايفه عليه خاله مووو
گلبج علمج وليدي راح يموت

انهاريت ابچي و على حسي تجمهروا اخوانه و امه بالهول ..
الكل يعاين بصدمة الي و بشفقة للطفل
نبيل بچي و ماكدر يضم دمعته عبنه يشكي من نفس العلّة ..

ضمتني الحجية و تبچي على بچيتي ..

-ذكري الله حبوبة ، و لا تيأسين من رحمة ربج
على ساعة يرزقج بمعجزة شفائه ..
غلط تفاولين ...

شلت راسي و

اعاين لسند الي بحضن ادم مو حاس بلي داير
مدايرة

صرخت :- ليييش طفل بريء من يومه ورث بس القهر
و هسه جملها المرض !!

سوده عليه يووووم انولدت و نحكم عليك بالنبذ و المرض
ليش ياربي لييش!

فطيم :- استغفر الله بنيتي ، كلشي مقدّر و مكتوب
الله يشافي وليدج و يقر عيونج بي يابعد بيتي

نصى ادم بمستواية و اخذ وجهي يحجي :- باوعيلي دين
الطب هسه تطّور ، مازال بعده جاهل اكو امل نتلاحك اله ..
مستعد اسفره لاخر العالم و اصرف العندي و الماعندي..
و اطيبه الج ..

ابتسمت بمرارة و همست :- لازم ما سمعت الدكتور شگال
رحلة العمليات مُدمرة و بالنهاية الحل الوحيد الزراعة

كولي يا أم مستعدة تنطي گلب ابنها لولد لاخ ...

رفع جسمـه كامش خاصرته و يتحسر..

بشرى :- ذكري الله .. انتِ مسلمة و تصلين و تعرفين لا
اعتراض على حكم الله

باوعتلها و ماحسيت كلامها لامسني

رحت شلت ابني و تركتهم و صعدت لغرفته ..
حللت اله و غيرت اله ملابسه ..

فرشت بساطه الي بي مثل الطوق و متدليه منه العاب
هو يحب هاي اللعبة ..

قرفصت اعاين اله مثل نعمة على اي لحظة تطير و افقدها

همست اعاتبه :- حتى انت تريد تروح و تعوفني ..
منو بعد يلعب بشعري ..
يعض خدي ..
منو يعاين الي بهاي النظرة الصافية مثل مي البحر..

عصرت ركبي و نهضت على حيلي ..
مسحت دموعي و دحضت اي فكرة سلبية بشأن سند

اي .. اني راح احارب للنفس الاخير
حتى لو كلفني الامر اشيل گلبي و انطيه ..

حاوطته بين احضاني ..
ما اريد افلته من بين اديـه ..
هذهِ اليدين المُصابة باللعنـة !

احبگ وليدي ، اهمس بأذنه و هو يبتسم مو داري شلون قلبي
تقطعت اوصاله ..

نام و نمت و الدمعـة معلّكة بطرف رمشي ..

بعد مدري شگد من الوقت حسيته انسحب من بين ايديـة ..

شهكت بكتمة علبالي كابوس ..

شفت ادم شايله و يأشرلي بأصبعـه هششش
خلاه بسريره و اجه نصى بمستواي

همس :- لكيتج غافيه فوكاه .. كومي نامي بفراشج

دمعّت عيوني و همست بخفوت :- احسّ رجليه ما عادت
تعيني ادم
كل جسمي باد و اطرافي نملّت ..
ظهري ما عاد يحمل اوجاع ..

بلع ريگه و شرع ايديه خلاهن جوه ظهري و شالني ..

همس :- و اني وين رحت ..
خلاني على فراشي و احس فد نوع من المرض استفحل عليه
يمكن حزن .. او يأس ..

اجه قرفص ناحيتي و راح يلعب بشعري ..

ادم :- حاسّ بيج والله ..و صدكيني ما راح اعوفـه
راح اعرضه عاللجان الطبية و اسفره على حسابي
لابد اكو طريقة للعلاج ..

باوعتلـه بحزن :- حالته نفس نبيل ؟

هز راسه و اردف :- نبيل عنده التهاب بغشاء القلب
بس مو حاد و مشين اموره بالعلاج

احنا عدنا وراثـة دين ، بعوائلنا ...
اجداد و عمام جانت علّتهم بگلوبهم

بـچيت ...

ادم :- لا تبچين كوني قوية ابنج محتاجج ..
دين :- و اني محتاجتك و ابني ...

سكتت ابلع ريكي بصعوبة ..

استرسلت :- ابني ترى ماله ذنب بلي....

ادم :- ششش ابد لا تجيبين طاري هذا الموضوع
مستحيل اعوفكم ..
مستحيل ..

يمكن جانت اصعب ليلة اعيشها بحياتي ..
بعد معاناة و جهد گبير من ادم ماعرف شلون غمضت جفوني
و دخلت بسبات عميق .....

فتحت عيوني الصبح مرعوبـة من كمية الكوابيس الي ما اكدر
اتذكرها
جلست لحظات احاول استوعب و احاول اخذ انفاسي و كأني
كنت امشي بطريق طويل
ماله معالم و لا نهاية ..

غسلت وجهي و رحت على غرفة سند لگيته بعده نايم ..

شلت عيني لكيت ممية بيها بقايا حليب
ابتسمت و عرفت هذا آدم مسويله و راجع منومـه ..

نزلت و اسمع حسّ اصوات عالية جايـة من صالة الخطار ..
الهول فارغ حتى الحجية الي متفارك مكانها يم الصوبة
مموجودة

اقتربت الباب مفتوح ، الحجية كاعدة عالقنفة و منصية راسها
ونبيل ماخذ زاوية صافن
و نور و بشرى يبچون و ادم واكف و ايده بجيوبه يعاين بجمود
لـ بنية اول مرة اشوفها
طويلة شكرة لبسها حلوة و ملامحها ناعمة ..

تأشر عليه بسبابتها و مبين معصبة من عروق عنقها

تعاتبة بنبرة باكيـة :- اخر شي جنت اتوقعـه تنسى دم ابنا
و تعيش حياتك و يا ارملة المطلوب النه ثار
لك شلون سويتها شلووون واريت وجه ابنك بالتراب
وحطيت ابن اركان بحضنك !!

يتبع

#الفصل الثلاثـون -

# يا طعم ... يا ليلة من ليل البنفسج
يا عذر ...
يمامش بمامش و أحبك
طبع بگلبي من اطباعك ذهب
ترخص ... أغلّيك و أحبّك
أنه متعلّم عليك هواي
يا سولة سكتّي
يا طواريّك ... من الظلمه تجيني
چانن ثيابي عليَ غربه گبل جيتك
و مستاحش من عيوني
و علىٰ المامش حنيني
چلمة الهجران زارتني
گبل حبك يغالي و ألّمتني
علىٰ المامش علّمتني
علىٰ المامش علّمتني

لـ مظفر النواب ..
قصيدة ( ليـل البنفسج )

.

.

.

عـذراء :- اخر شي جنت اتوقعـه تنسى دم ابنا
و تعيش حياتك و يا ارملة المطلوب النه ثار
لك شلون سويتها شلووون واريت وجه ابنك بالتراب
وحطيت ابن اركان بحضنك !!

فهمنييي لا تضل ساكت شلووون سَويتها ؟؟
والله .. لو ماخذ اربع نسوان و لا احجي و لا اخطي عتبة بيتك ..

بس .. مال الكاك ماخذ ارملة الي گتل ابنا
و ملفي ابنـه بالبيت لا هاي ما تنجرع !

احجيييي لا تباوعلي هيييج !

ديـن //

اعاين الها تبجي و تضرب صدره بحركة ..
و على دموعها بچوا كل الي كاعدين بالصالة
و اني هم نزلت دَمعتي ، الله يعينها موقف صعب
ما اكدر الومها و اذا لِمتها فعلى شي واحد
و هو تركها لـ ادم بوسط هيج ظرف ، اكيد جان محتاجها و هي
فضلت الهروب على مواجهة حزن رجلها ..

كمش ايدها آدم و استفاق من صفنته و راح يصرخ بوجهها
بليه شفقة ..

ادم :- انتِ آخر وحدة تلومني عذراء ..
انتِ وين عن مراثي ابنج كل هالسنين اشو ما شفتج كابدتي
ربع الي عشته ، تركتيني مذبوح من الحزن و فضلتي دراستج و
تخامتج بتركيا ..

نسيتي كلامج اليـة لو اذكرج ..
نسيتي شلون عفتيني بنص الدرب ..
و كل تبريراتج اسخف منج !

جنتي تشوفيني اتلظى من الحزن على وليدي
وهمج الوحيد ارجع مثل گبل وياج اغازلج وادللج و كأن المات
عدنا بزونة ..
حتى البزون يحزنون اهله عليه و يتشعوط گلبهم على فراگـه

لِمتيني و أكلتي گلبي أكل و وصلت بيج المواصيل تشكين
لامج الشفية و دكليله يمكن الحادث أثر عليه و فقد رجولته ..
لان ما يوصلني و لا يباوع بخلقتي !!

نسيتي ...
من ابوج الگو.... جاي يرشحلي اسماء اطباء خاف بيه خلل !

احجيييي ...
انتِ هم أُم انتِ ... وينج وين الامومـة !
كل همج غرورج و ارضي انوثتج على حساب حزني و خسارتي
!!

عذراء :- مو وكت هذا الحجي و لا تخلط الامور ببعضها !

دفر الطبلة حيل و صرخ :- الااا وگتة .. انهزمتي و ما صحتلي
فرصة احاسبج !
خليهم يعرفون اي نوع من الامهات انتِ !!
و دموعج هاااي فات وكتها كلششش

عذراء :- ما اسمحلك تشكك بأمومتي ، اني تدّمرت و خسارتي
مو اقل من خسارتك الفرق حزني كظمته بگلبي ما دمرت
الحواليه..
ومن ردت ترجع علاقتنا .. لان ماردت اخسرك فوك ما خسرت
ابني ردت نرجع مثل الاول و نحافظ على انفسنا
و نخلف ولد لاخ ...

انت افتهمتني غلط و طول عمرك فاهمني غلطط
و ما تحاول تلكى المبرر لتصرفاتي تعرف لييش ؟

لان .. لان بعمرك ما حبيتني مثل ما اني حبيتك
انت فضلت الكل عليه حتى ابني !
اني جنت اخر اهتماماتك لذلك .. انسحبت من حياتك

تلومني لان عفتك بأسوأ ظروفك
اني جان باقيلي شعرة و انجن مثلك
نسيت روحك الظاهر شلون عيشتنا اسوأ فترة حرمتنا حتى
النوم ...
عجزنا شلون نعالجك و نطلعك من بؤسك !

اي اني انسحبت .. لان هاي مقدرتي و لا يكلف الله نفساً الا
وسعها ..

و انت .. انت و لا بادرت بالصلح و من ضغطت عليك
بخصوص الطلاق ردت اخبك و اضغط عليك حتى ترجعني و
تصالحني
بس الظاهر ركصتلها بـچفية ، و رأساً رميت عليه اليمين !

بـچت و دموعها تهلّ ..

استرسلت :- و اني مكلت شي و لا عارضت و لا زعجتك
بس مال اشوفك ماخذ ارملة اركان و ملفي ابنها بغرفة ابني ..
لا هنا مستحيل اسكت !

اني جايه اريد حكي منك !
حك ابني و حياتي و زواجي الي نهدم !

ادم :- هيييه الصمي عاااد !
اي حك مالج يمي زواجج انتِ هدمتيه ، حياتج ما شاء الله
تزهو بالسفر و الونسة اما حك ابني للموت اضل ادور چتاله
و بأيدي اطلع روحـه مثل ما سلب روح وليدي البريئة ..
ساعتها نتصافى و كلمن يلزم حده و مكانه

ديـن // جانت لحظات صعبة و جدال يوجع الگلب
متعرف المن تنطي الحق بس الي متأكده منه هو شعوري
بالخزي و الخجل و الذنب ..
اسأل نفسي شعندي هنا و بيا عين واكفة !!
و اني ارملة واحد قاتل و ام لطفل مطلوب ثار !

استداريت و ردت انهزم قبل لا يشوفوني و ارتطمت بحافة
الباب و عم السكوت ..
اكاد احس بالعيون الي اخترقت عمودي الفقري مثل السهام .
.
لَفيت و شفت نظراتها الناريـة و المليانه كراهية
اليه و بشرى و نور مو اقل منها.
عبالك صحت بيهم ثار قديم
و العلاقة بيني و بين نور و بشرى الي توها تحسنت رجعت
انهجمت ..

تلّبكت و معرفت شحجي ..

همست :- السلام عليكم ..

بس الحجية و نبيل رَدوا السلام
تقدم ادم و جذبني م

ن ايدي و بأبتسامة مُزيفة قدمني الها ..

ادم :- هذهِ دين مرتي

عذراء بنت خالي ..

مدري شلون طلعت مني :- هلا بيج

صرخت و عيونها تريد تنط من مكانها ...

-الله لا يهنيج ، امشي طلعي ابنج من غرفة ابني لا تشوفين
شي ما يسّر مني ..

ردت عاينت لادم بعيونها المشتعلة نار و تتبسم بسخرية :- و
آني أكول شنساك ثارك
حلوة و صغيرونه و عيونها سطرتك مووو !

ترك ايدي و جذب ايدها كاز على سنونه :- احترمي نفسج لج !
ترا هواي سكتت الج و عَديت ، حجاية لخ اكص لسانج
والله لوما بت خالي و دايسه بيتي جان عرفت شلون اتصرف
وياج

اتسعت عيونها بـصدمة تحاول تستوعب !

و اني من يمي بچيت همست و اني اجره و اتوسله يتركها ..

نفض ايدها حيل !
وهي تفرك بزندها متوجعة !

اخذ چف ايدي و طلع من الصالة ..

صاحت وراه :- ونبي اندمك ادم بسيطة !

اخذني لغرفتنا ..
دخلني و دخل وراي سد الباب يفرك بوجهه !
و يباوع الي بعيون حَزينة :- همس اني آسف
ولا ادري بيها تجي ..
انتِ بيا حال و تسمعين هالكلام الي يسّم البدن.

اقترب منه و قيدت جسمه بين ذراعي حطيت راسي على
صدره و شهكت و الكلمات تحشرجت ببلعومي !

احجي و اغص بالكلام :- اني الي اسفة ادم خليتك بهيج موقف
و اني ..
اني مزعلانه من حجيها تريد الصراحة هي حقها ، أُم و محترك
گلبها !

اني جملّت همومـك ، احس ما ارتاحيت من يوم الي خطت
رجلي بيتك !

ابعدني من حضنه و راح يعاين الي بنظرة سخرية !

همس :- اي بالله .. اشرحيلي شلون ما ارتاحيت اول ما خطت
رجلج ابيتي ؟

تهربت بعيوني و دَسيت شعري ورا اذني
خجلانه من مصايبي الي ما ينعدّن ..

دين :- يَعني .. مشاكلي و نفسيتي المهجومة
شهور و انتَ صابر عليه و اني مانعتك مني
خليتك بموقف صعب ما بيني و بين اختك !
مرض ابني الي ابتلشت بي
واخرها طليقتك ...

اخذ وجهي بين ايديـه و بحركة ابهامة مسح دمعة معلّكة
بطارف عيوني ..

همس :- ما اريد اسمع هذا الكلام منج بعد ..
أشر على گلبه و اردف :- هذا الي اول ما شافج تلعثم
حبج بكل صفاتج بكل مشاكلج بكل قسوتج عليه
حتى من تركتيني و مشيتي ويا اركان ، جربت احقد عليج و
اكرهج و اتوعدلج بالانتقام و ارسم بخيالي قصة شلون راح
اعذبج و اخذ ثاري منج و بنهاية قصة انتقامي الكاني مهووس
بيج ، اشتهيج بكل معانيج بكل ظلمج و ظلامج
و حتى من حرمتيني منج و من جفيتي و من صارحتيني
بجروحج لگيتني احبج ،بكل ذنوبج بكل ندوبج احبج

ما سامعه مظفر شنو يكول :-

ابتسمت بخضم دموعي و همست :- شنو يكول بله

ادم :- يا عذر ...
يمامش بمامش و أحبك

جتفت ايديني و صحت :- طلعت مامش بمامش انوب

حضني و همس يم اذني :- بَخيلة وياي والله ..
يمسّد على حواجبي بحنية جر حسرة و همس :- ااه يا ليل
البنفسج

ابتسمت و الدمعة نزلت على شفايفي :- قصدك يا حزن
البنفسج

ابتسم بمكر و همس بغزل جريء

ضربت صدره و ابتعدت :- كلاوجي و دايماً تنحرف عن مسار
نقاشنا و تدور غير شغلات ..

جر جف ايده و باسه ..
ادم :- نشاقى يابه ...

دين :- شراح تسوي بخصوص عذراء ؟

ادم :- شسووي يعني ؟!
هي اختارت طريقها و مشت بعييد قررت و اني ساندتها بس
گلتلها هالقرار ما منه رجعه
عليش جاية هسه و شتريد ؟!

دين :- ميخالف الي بينكم عشرة و صلة دم انزل راضيها و لا
تخشن خاطرها و احجيلها زواجنه شلون صار و شلون انت
نجبرت تاخذني بسبب تسواهن الله لاينطيها !

حك لحيته و ابتسم بمكر :- هاااه ، يعني اني اخذتج مجبور ؟!

دين :- خلينا نكول محروج من الحجية و ....

خطف خصري و لزكني بصدره يهمس بخفوت :- مو آدم الي
ينجبر !
زواجي منج الفرصة الثانية الماردت اضيعها !
باسني حيل و هدني مصدوومة !

ابتعدت التقط انفاسي و حجيت
:- بس انت جنت كئيب و ما راضي !

راح وكف على المراية يسرح شعره و يحجي ببرود :- لعد شلون
يابـه لزوم نبيع ثگل ع الحلوين ..

ابتسمت و بين ظلوعي صارت زَفـة ..
لكن سرعان ما اختفت ابتسامتي و غوركن عيوني من تذكرت
حالة سند ..

باوعلي و قرأ افكاري و عيوني ..

ادم :- ليش عيونج حزينة و غلاتج ما اعوفـه
باس راسي و اني سكتت ما اعرف بيش اجازيـه على وكفته و
دعمـه الي ..

لكن احس كومة من اليأس سطت على روحي ..
و مدري شلون حجيتها :- خاف يمووت و انفجرت بچي مغطية
وجهي ..

ضم راسي و همس بأصرار :- ما يموت انتِ بس تفائلي
اومأت راسي بأي ...
باس جبيني و وعدني ما يعوفه

رنَّ تلفونه قاطع حجينا ..

باوع بالشاشة و جاوب بلهفـة :- ها ابو الندامة ..
اي ؟!
يا الله لكفتوه ، و ربي انتو اسباع
لا ما اتعصب ، كول منو ؟
يااابه شيصيرني منا لمن اوصللكم !
كول اسمـه و فضها !
يعني متحجي نعلعلا شيب الخلفوك
جاااي مسافـة الطريق !
بأيدي اخذه لحد يجيسه .

توجه للكنتور اخذ سلاحه و تناوش قمصلته و غراضه و باسني
و مشى بسرعـة !
كمشت ذراعـة و صحت :- شصاير ؟!

-كمشناه ، الكو.... الي حرك المخازن !
راد يمشي جلبت بي !

دين :- بروح ابوك لا تودي نفسك للتهلكة خلي القانون ياخذ
مجراه !

ابتسم بسخرية :- و لا مرة نصفني القانون ، لا تخ

افين
اني بس اريد اعرف ليش سوه هيج و بكد خسارتي راح اخذ
حكي منه !

عافني و صحت وراه :- شنو راح تكتله ؟؟

مجاوب تركني بخضم ناري و مشى ...

معقولة يكتله ، لا ادم صح عصبي بس مو قاتل ...

سمعت بجي سند ركضت لغرفته حبيبي توه كاعد من النوم
اخذته بحضني العبه شويـة سكت و يعاين بوجهي ..
و اني شكد ما احاول اطرد فكرة مرضه و اقوي نفسي و اتفائل
الكه روحي رجعت للصفر و اليأس متملّكني
حضنته حيل و بلا شعور بجيت و اني احاجيه ..

وين اضمك من الموت ماما ؟
يصير ارجعك لرحمي ..
هذا العالم تغير و الناس مو خوش ..

لفتني صوتها ...

-بعدج ممجربة شعور الفقد و هيج تبچين !

التفتت و عيوني تجدح لـ الواكفـة و مرتچية على الباب
و على ملامحها ابتسامة مستفزة !

دين :- شعندج هنا ؟!

اقتربت مني و جتفت ايدينها
عذراء :- شعندي ؟!
هممم اي والله حقج تسألين وكت جايف الخلاج تتربعين
ببيتي ..

صفنت عليها كمحاولة ادرس شخصيتها ..
طويلة رشيقة بيضة بصفار شگره و عيونها جوزية صغار

ابتسمت بشفايفها الرفيعات و صاحت :- لازم مضيعة شي
بوجهي ست دين !

صفنت على سند و صاحت :- الله يشافيه !

عبست و بسري كلت شبسرعة عرفت !؟

عذراء :- عمتي بشرى گالتلي على مرضه .. طلع على نبيل
المكرود

ضميته لحضني اكثر و صحت :- الحمدلله على كل حال !

عذراء :- ايييه صدگ لو كالو الله ما يضرب بعود و كما تدين
تدان !

صعد الدم براسي و تعصّبت منها
زمجرت بوجهها :- شنوو قصدج ولج ، جاية تشمتين بجاهل لا
صوج و لا ذنب !
اني وله هو شنو سوينالج !!

ترى احنا هم ضحايا لـ اركان خاف متدرين !!

عذراء :- عههه خوش كلاو هذا مال ضحايا..
و اني هم ما دري شلوني واكفة احجي وياج
و انتِ مدري شلون الج نفس تاخذين ابن اخو رجلج !!

دارت جسمها دتطلع ...
صحت وراها :- نصيحة لا تحكمين على شي ما شفتيه او
عشتيه او جربتي شعوره ..

اطلعي من طور الضحية ... محد جبرج تتخلين عن حياتج ،
شمتوقعة ادم يضل يبچي على فراكج دهر !!

وكفت صامتـة لبرهـة بعدين لفت بأتجاهي
و بعيونها مكر و كيد عَظيم ..

همست :- زعطوطة شفهمج بالبيني و بين ادم
ولج لو اريد استرده عشرة منج ما يوكفون بوجهي
اكعدي عاقلة و لا تختبرين صبري والله اذا خليت عقلي وياج
ابچيج دم ، بس مستخطيتج لخاطر هالجاهل المريض ...

احجيلج الصراحة جنت مقهورة منج بس من سمعت بعدالة
ربي تحققت بيج استخطيتج
جري عدل و حطي رجليج بالكاع حبابة !

كالت كلامها الي مثل السم و طلعت ..
واني بسبب سند الي مزعوج و يحوص بحضني
ما نطيتها الجواب مناسب ..

اخذت ابني و نزلت جوه ، و لكيت الحبايب مسويات حزب و
يتهامسن و يتلامزن بالصالة عفتهن لان الهم الي بيه مو مال
اهتم لهيج سوالف دخلت عند الحجية
و احس بضياع عجيب ..

شرعت بأيديها و صاحت تعالي ..
ارتميت بحضنها و بديت ابچي و اشكي ضعفي
و خوفي من المجهول لكن سبحان الله بكم كلمة منها و آيات
قرآنية عن الصبر و عن المؤمن و ما يتعرض له من ابتلاءات
خلّت الامل يرجع يدبّ بيه ..

للمغرب و بعد ما يأست عذراء من جيـة ادم ، ترخصت و
رجعت لبيتها .. و گلبي حاس راح تكثر جياتها ..
لاسيما و عمتي و نور مسانداتها و وياها ..

لكن اني مهتميت لوجودها اعرف ادم يعشقني
و الي بينها و بينه انتهى..

واكفه اعزل بالمطبخ و فكري شارد يم ادم الي طلع و مدري
شجاي يسوي
و من اتذكر شكل السلاح بأيده يصيبني الرعب

اجـه صوتها من وراية ..

-كتلج و ارجع اعيدها معروفة نهاية هالزواج انسحبي قبل لا
ينكسر خاطرج !

باوعتلها بنص التفاته :- لا تشيلين هم خاطري و اكول لو
تفكرين
بخاطر ابنج من ينكسر و هويسمع امـه شلون تفكر تهجم بيته
!

اعتلت وجهها ابتسامة واثقة و مستفزة :- اهجم بيته !!
هو وينه بيته ؟؟
من جابج علينا انهجم بيته احترك حلاله و تشعوط و هسه
مشلول حاله ويه ابنج خاف عايز هو ..

ادم الي جان مال و النخل حَمّال صفى بليلة ويوم بخساره
هالكدها
شغل و تعب سنين راح بغمضة عين من وراج يم كصة الفكر !

اقتربت مني و عيونها تجدح لزمت ذراعي حيل و هددت :-
اسمعي لج
وخري عند دربه ، عذراء رجعت و بعدها تحبه عذراء زو.....

فطيم :- هدي ايد البت يبشيره لا اجي اكسّر العكازة على راسج
!

عاينت للحجية اعصابها ترجف وحلكها ناشف الظاهر سمعت
الحجي كله !

اجت وكفت گبالها و عيونها انترست شعيرات حُمر من
العصبية !

شالت سبابتها بوجه بشرى و حذرت :- اسمعيني بشيره ،
عوفي البنية بحالها هالنوبة راح افوتها الج خاطر ذاك الرجال
الي يتلاكح من الصبح لليل خاطر حلوكجن الجايفة انت و بنتج
المسيميمة !
نوبة الثانية اخليجن بحلكه و ياويلجن منه كل دروبچن عندي
و اعرف وين تخمن من صبح لليل و ساكته الچن بمزاجي ..

اتقي شري بنت مهيدي ابو الزفر !

بشرى :- تهينيني عمة گبال چنتي !

فطيم :- وانعل سلفة سلفاج لو فكرتي تهجمين بيت ابنج
يله ولي من خلقتي لا بارك الله بيج ...

حملت نفسها بشرى و شردت من المطبخ
و اني بسرعة دخلت بحضن الحجية بوستها براسها و ايديها
و دعيت الله يحفظها ا

ليه ..

فطيم :- بسّج لا تبچين و سمعيني عدل !
خلي بالج من رجلج و ابعدي عن ذني الحيايا شكد ما تكدرين

دين :- احس نور صارت احسن وياي
بس اليوم من شافت عذراء حسيت وجهها انگلب !

ابتسمت الحجية بمرارة و صاحت :- و عيونج مابيهن شريفة و
لو ما اني صاكرتهن يلعبن على ستة و ستين حبل !

روحي يمه لغرفتج و عينج من نفسج و ابنح ..

دين :- صار حبيبتي ، تصبحين على خير .

رحت و ابالي الف حسبه وره كلام الحجية هي ليش هيج
حذرتني
اكيد سامعة لو شايفة شي و سالفة تجر سالفة اسولفها
بعقلي محسيت الا حل منتصف الليل و الكل نام بقيت اني
مساهرة ومنتظره جيته هاي اول مرة يتأخر لهيج وقت
ابد ممسويها و شكد حاولت اتصل بي يرفض مكالماتي و
يجيني الرد الآلي :— اسف لا استطيع الاجابة الان و من
ضوجتي ارسلتله :-لعد شوكت تستطيع !

هم ماكو رد منـه !

ويا ما بدأت اغفي شفته اجه ..
لكن مجانت حالته تسّر ، ملابسة و وَجهه عبالك غاط بنص
التراب ..
مفاصل ايديـه مجرحة و وجهه تعبان !

سلّم بتعب و راح متوجه للحمام ..

تساءلت :- وين جنت حبيبي و شنو هاي حالتك ؟!

يحجي نكضان من التعب :- بعدين دين مو هسه نسولف
حضريلي الحمام فدوة ..

مشيت بلا ما اجادل و افكر معقولة رجع يلعب لعبته !
زين ليش هيج ايديـه مدّماية معقولة متعارك !؟

ضلّيت انتظر و آكل بأصابيعي حسبـة تجيبني و حسبة توديني
اول مرة اشوفه هيج احسة مكسّور تعبان ضايع ..
لهناك و طلع من الحمام و عيونه بالفراغ سارح يفكر ..
اجـه مدد بصفي و يجر حسرات و تنهيدات ..

كعدت بجانبه و همست :- ما راح تحجيلي شبيك ؟

-تعبان دِين .. تعبان من هالدنيا الغدارة ..
-شنو الصاير احجيلي .. كلتلي الصبح لكيتو الي حرك المخازن

-هممم لگيناه ..

-اي و شسويت ... ادم ليش ساكت عفية لاتخوفني !

-شسويت يعني ، طلعت ضيم گلبي بي هالنغل !

-و تالي ؟ وين راح هسة ؟

-بعده محجوز عندي .. لازم اراجع حساباتي من البداية .. احسّ
صرت قريب من ثاري دين
بس لازم اتأكد من شغلة ساعتها بس الله العالم
شلون راح اتفنن بكتلته !

ضربت صدري و همست :- شدتفكر رحمة لموتاك !
ترى گلبي ورم من النوايب انتَ ليش ما تسلمة للقضاء
يشوف شغله وياه ترى احنا مو بغابة ادم و انت وراك ناس
يحبوك و محتاجيك ...

باوعلي بعيون تلمع :- تحبيني دِين !؟

حطيت راسي على صَدره و دموعي جاوبت گبل لساني ..

-مو بس احبك .. اموت بيك
لو تدري من شوكت ادور عليك ..
چم قطار و چم محطه دورت بيها

و هسه من لگيتك تريد تعوفني و ترمي نفسك بوسط النار ..

باس جبيني و ضمني حييل همس بتعب :- كل عقلج اعوفج
قدآحـة حياتي .

حضني و ليلتها ثنينا نمنا نكضانين من التعب و صكعات هذهِ
الدنيا المجاي ترفق بحال گلوبنا ..

مرت الايام و بلشت رحلة علاج سند و بكل روحة للدكتور
يصيبني اليأس و الاحباط عرضنا اوراقـه على لجنة طبيه و من
رحت و شفت الطوابير و الحالات المسجلة من سنين و ماكو
جواب انتهيت ..

هذا من غير المرض الي أصابني .. مرض اجهل ماهيته
ضعف بجسمي و شهيتي انقطعت و كآبة فضيعة استحوذت
عليه ..
حتى ابني كطعت الامل من علاجـة و صرت اتقاعس من
مراجعات الدكتور و ابتلش بينا ادم
الي حاير ما بيني و بينه ..
صرت ما اطيق احد و لا احب اسولف ويه احد حتى الحجية
ماحب اكعد يمها و من اشوفها تسبح لو تقرأ قرآن اختنك ..
صلاتي قطعتها و الامل قطعته و حسيت خلص هذهِ نهاية
العالم ..

شكد حاولت الحجية تطلعني من حالتي
و حاول نبيل يزرع الابتسامة بوجهي
و حاول ادم يحتوي حزني و كآبتي لكن الجميع فشل
و انتصر عليه المرض و الوحدة و اليأس ..

هذا من غير الحرب النفسية الباردة الي اقامتها علية بشرى
بمساعدة نور و عذراء الي كثرت جياتها بآخر فترة بمناسبة و
بغير مناسبة ..
و من اشوف قيافتها و اناقتها و كأن جاية عرس اموت من
الغيرة
حتى حجابها الي تلبسه بس كدام نبيل من تشوف ادم تنزعـة
خلت دماغي يفتر و گلبي يتوجس منها .

حاجيت آدم اكثر من مرة يشوفلها صرفة لان وجودها صار
يأذيني و يضغط على راحتي ..
لكنه جان محرج يطردها لاسيما و هي باقيلها ايام وترجع للبلد
الاجت منه ..

علياء و دُنيا سمعوا بمرض سند و انهاروا من حزنهم بوقتها
لكنهم تقبلوا الوضع بعدين و فوضوا امرهم الى الله و الاطباء و
العلاج بعد رب العالمين
الا اني عجزت اتقبّل جنت منهارة و يائسة و اكثر من مرة اعاين
للمراية
و احاول ابحث عن دين القديمة عن روحها المقاتلة عن مرحها
و تقبلها بأسؤا الظروف
جنت مُقيدة باليأس و الحزن مخيم على گلبي ..

و بعيد ميلاده ر ميلادي الي صادفن نفس الشهر
ادم توسل بيه يسويلنا حفله او ياخذنا لمكان رفضت
وبدل ما افرح بميلاد ابني لازمت الفراش و الوحدة و الحزن

تسواهن و ايفان رادوا يجون يشوفون سند لكن ادم محرم
عليهم دوسة البيت اكتفوا باتصالاتهم و جيهان اكثر من مرة
عرضت عليه مبلغ مالي
و رفضت اما اخر اتصال من تسواهن جان كلش مؤذي بحقي
نعتتني بالفكر و الملعونـة و اي احد يخش حياتي يخسر عافيته
..

حملتني عبء مرض ابني و دعت عليه