بء و اني محملتها منيته !!

صرخت :- طلعي براا

دنيا :- اريد احضر نفسي مبقى شي و يجون

احس گلبي صار يوجعني ..

لهناك و سمعتها دخلت ، علياء ام المصايب

طلعتلها اركض ، بهتت و فتحت حلكها و الاكياس طاحت من
ايديها

ضحت و چتفت ايديني : شنو شفتي عفريت !

مبروك ست علياء ، دسترتيها و رتبتيها زين

غمضت عيونها و زفرت انفاسها ردت شالت الاكياس
دخلتهم بالمطبخ
و اني فتت وراها ..

صاحت :- لا دسترت و لا رتبت الولد شافها و حبها
و اجه من الباب و اختج مو صغيره وافقت من مزاجها

روحي اسأليها اذا تحبين !

دين :- طفلة و ما تعرف مصلحتها

علياء :- اني اصغر منها و خذت ابوج ..

قلصت عيوني عليها و هي افتهمت قصدي

هي ما خذت ابويه حباً بي جانت مجبوره ....

درات وجهها تفرغ الغراض .. همزين اجيتي تعاي عاونيني راح
يجون

ضربت باب المطبخ حيل من حركتي

يوم راح تخبليني ... شوكت تحسين بينا ؟؟؟

تخصرت و تباوعلي بحيرة ..

اخذت جف ايدها و جريتها لغرفتها دخلت و دخلت وراها
وقفلت الباب ..

علياء :- شبيج ولج اشو فدنوب استهترتي من تزوجتي لهسه

بهمس احجي :-يوم فركشي السالفه ، دنيا راح تتأذى !!

-شنو هي لعبة و افركشها الناس راح يجون و الولد بلغ اهله

صفكت ايد بأيد بأسف :- يوم مستوعبة وين حتذبين بنتج
ياسين هذا شاهد على كل شي صار
وانت بعينهم البنت الي نهبت و تزوجت بغير رادة اهلها

باجر عكبة على اقل مشكلة راح يعيرونها بيج

شبكت ايديها لصدرها و جن جتها لحظة ادراك

همست :- ياسين ما يدري بذاك الموضوع

دين :- يعني شنو ؟!

-يعني عباله اني حابه ابوج و متزوجته و مسافرة
مايدري بذاك الموضوع !

ابتسمت بمرارة :- مسكين بَشّار شال الشيله كلها
انعل ابو الحب الي سوا بينا هيج

كعدت مرهقه على حافـه السرير لطمت على وجهها الما ملت
كااافي موتيني
منين اتلكاها ...
حسبالج اني مرتاحة سنين حسرة عليه انام اذا مو دمعتي على
خدي
كافي ارحميني ..
ادري اني حقيرة
بنت عاق و زوجة مو وفية و ام مو كفو

بس هاي اني حاولت اتغير
حاولت انطيكم الشي التردونه
حاولت انطي لابوج ..
بس الفارغ من كل شي شلون ينطي
اني فارغة .. جسد بليه روح
حتى گلبي ميت ...

تعبت من المحاولة
تعبت من نفسي .. جان المفروض اكتل نفسي و ارتاح
ياريت ابوج ما اجه بهذاك اليوم و ساعدني

ضلت تناشغ و تبچي
و اني أبجي على بچيتها
و ما اعرف الومها لو الوم نفسي
و كالعادة اخسّر امام عاطفتي الهـا
و تضعفني دموعها رغم كل وَجعاتي منها
صعب عليه احضنها لكني ربتت على كتوفها و همست : كافي
لا تبچين ..

همست من بين دموعها :- ياسين خوش زلمة راح يحافظ
عليها
اني لو جايني ياسر اخوه مجان نطيتها
بس ياسين هذا معدّل ماخذ خصال ابوه كلها
و اني قاولته ليكدام اذا نزلت دمعة من عدها
لو خشن خاطرها بكلمة ما ابقيها على ذمته ..

دين :- بس بعدها صغيرة و سادس علياء !

- بس خطوبه من عين الناس يخش و يطلع علينا
اكيد تكمل سادس و تفوت كليه يله اخليها تتزوج

تنهدت بحيرة ..

- واهله ؟ و ناسكم الي تعرف بقصتكم
دنيا شلون راح تواجه كل هذا و هي طفلة

-ياسين ماعنده غير اخ و اخت
هو جبير البيت و راح يسكنها يمنا
و ما اظن احد يكدر يفك حلكه وياها كدامه
امه فقيره و جانت صديقتي ...

-واخوج اللاخ ؟

-رافض يصالحني ..

دين :- حقه ما اكدر الومه

-انتِ بنتي لو عدوتي

-اني جثة لفضتيها من جسمج من زمان و هسه جاية تدورين
مني حق امومتج !
قرفصت گدامها و بـجيت بحركـه :- ما اكدر اصير بنتج بعد
علياء
بس انتِ وصية المرحوم ما اكدر اعوفج .

علياء :- الحجي بعد ما يفيد بس يفتح جروحنا اكثر
كل شي ما اريد منج غير تساندين اختج بهيج يوم

-مادري شگلج انتن متفقات على كل شي
و اني مثل الضيفه هنا!

-انتِ ابتعدتي دين .. و ما لومج احنا تعبناج

ابتعدت عنج ... اني و دنيا على تواصل
افهميني علياء ، اني گاعد اتشافى عالبطيء
و شوفتج ترجعني الف خطوة ليوره .

علياء :- مااشي يا بنت بطني .. لابد تفهمين غمج جرحي بيوم
من الايام
هسه راح تضلين شايله بگلبج لو تساندين اختج و تفرحينها

همست بضعف :- الله يقدم الي بيه الخير
بس كولي لابن اخوج يا ويله و سواد ليله اذا نزللها دمعة
راح يلگاني كدامه ..

لمحت ابتسامة على طرف شفايفها
همست :- رغم كل شي سويناه بيج
بعدج تحاميلنه گلب سمچة شايلة بنت بشّار

اطلقت تنهيدة طويلة و صحت :- الكلام الي بگلبي
يهد جبال و يذبح خواطر
خليها سكته عليـاء .

عفتها و طلعت اشوف سند
ملتهي يلعب و يعضّ شكو شي يلزمـه بأيده

نصيت و قرفصت يمه ..
العب بشعره الاسود الحلو
ابن المسموطة ممخلي بيه شي ما ماخذه مني

يباوعلي بعيون جرو و يخمط گلبي من يضحك
جريته عضه على بوسه ..

و شفت نفسي ناسية ممتصلة بآدم لهسه

اخذت الجوال لكيته محترك اتصالات و مسجات
وينج ما وينج ...

كتبتله مسج :- ويني يعني ترى بعدني يم اهلي و
صدق او لا تصدق اليوم خطوبة دنيا

رد بمسج :- و انتِ اخر من يعلم ، رجل كرسي

-الظاهر هيج و سمايل ضحكة فشلانه

- انتِ الخير و البركة لا تزعلين عليهم

-ما ازعل ذوله اهلي ...

-و اني ..

-انتَ عيني ...

-اشتعلووو

-منو ...

ادم -لا اليوم اهلج خطية عدهم ختوبه ، اشتعلت تسواهن

-ههههه
كتب :- لا طلعين اذا اكو زلم !
-شي اكيد اكو الولد و اخوه و امه جايين تعارف و قراية فاتحة
وبس
نظامهم العقد بعدين ، تعال انت ..

-دين لا تشعلين جدي ، لا طلعين منا لمن اجي
بعدين هم هيج هيج محاسبين حسابج
عليش طالعة ...

شفته معصب ماشيته كتبتله :- خلص انتظرك ياريت تكون
موجود
بدل بابا ...

شفته يكتب و يمسح الظاهر تأثر ..

اخر شيء رد :- يشرفني ...

بست المحادثه و ضميتها لگلبي و جاني صوتها وراي

-حبيتيه دين ؟

التفتت و عاينت الها :- طالعة هندية ، دمعت عيونه
و ادركت فعلاً دنيا كبرت ...

نصيت و جاوبت بخفوت :- زعلانه منج !
كلامج ضرب گلبي
نسفتي كل تعبي .. بس ما اكدر ما اكلج مبروك

جذبتني و باست راسي ..
دنيا :- اعتذر و الله اعتذر ..
انطيني ايدج ابوسها جرت ايدي و سحبتها حيل

وخري لج ، كل مرة تقشمريني

دنيا :- و انتِ ما تسمعيني ..

باوعتلها بعتب :- شوكت ما سمعتج ..

دنيا :- انت عصبية و مرات اخاف احجيلج الي احسّ بي

باوعتلها بأستغراب :- هذاك اليوم ، ردت اشرحلج
ردت احجيلج الي احسّ بي تجاه الموضوع كله

قلّصت عيوني عليها :- فدوة بس لا دكليلي حبيتي مصارلكم
شهرين

دنيا :- اجذب لو اكول حَبيته بس ارتاحيتله كلشش
بالكم مرة حجى وياي حسيته بابا
وعدني يخليني احبه ..
و يخليني سعيدة و ممعتازة شيء

سكتت تلعب بأصابيعها نوب اردفت :- دين احنا تعبنا
من حقنا نعيش عيشه مرتاحة خصوصاً انتِ
چم دوب شايله همنا اني و ماما ..

دمعّت عيوني و عرفت دنيا شافت بي الاب اكثر من الزوج
و عرفت لو كل الدلال و الاهتمام ميعوض قيمة الاب

باوعتلها بنص عين و همست :- خوش ماكل بعقلج حلاوة

غمزتلي و صاحت :- مثل ما ابو صخر ماكل بعقلج حلاوة و
بقلاوة
لدرجة تبوسين برسالته مثل المشايفه

ضربتها على چتفها و صحت :- انچبي زعطوطة شمفهمج انتِ

ضحكت و صاحت :- عيونج كالت كل شي ، الظاهر العيونهم
ملّونه
ماعدهم خاصية الاخفاء كل شي ينشاف بيهن هههه

همست و هي تتلفت :- طمنيني شلونها علاقتكم ال.....

انحرجت و دسيت خصلة ورا اذني :- على حطة ايدج
الفرق هسه اني احبه ...

اتسعت عيونها !

دين :- لاتباوعين هيج .. اي احبه و اموت عليه
ادم طلع غييير عن باقي الزلم

اجت ضربت چتفي و تحجي بمكر :- يول لعد داريه
كون ادخلج محاضرة عندي و اراويج شلون سودنت ياسين

ضربت حلكي بخفة :- عزة بعينج مفتحة باللبن !

دنيا :- و بالعصير بيبي ...

دين :- لعد سويتي نفسج ما راضيه من اتصلت بيج
احجيلي شنو الصار بينكم حاسه غبت سنتين مو شهرين

كعدت على طرف السرير و تخط بالزولية برجليها
همست :- من اول شهر صارحني بمشاعره
و كال ما طولها عليج اني رايدج بالحلال ..

رفعت حاجبي و همست :- اي بله كملي !

اي بالبداية رفضته و رزلته و طيحت حظه ..
و هو هم مقصر اجه ثاني يوم رزلني و فين حظي
و حجه لامي على طولة لساني ..

و مكفاه بس هشكل ، تحداني اصير اله و ماصير لغيره ..

دين :- اهاا حمش ابن جابر .

دنيا :- شعبالج لعد ... اي ضل يحاول وياي
مرة يشّد و مرة يلين و مرة وصلني للمعهد
و مرة تعارك علمودي و بهاي وكعت ...
انعجبت بشخصيته و بمكانته و فلوسه ..

دين :- فلوسة !!

دنيا :- لاتفهميني غلط .. بس وحده مثلي شستفادت من
الحب
عائلة و ضعنا كلنا الا شوية
خل اتزوج واحد متمكن و مرتاح راح ارتاح وياه ..

دين :- بيج رسّ من علياء تدرين ..

دنيا :- و شبيها علياء امي و تاج راسي

دين :- مكلت شي ، خليني بصدمتي عايفتج تدرسين و ما
اخابرج هواي
طلعتي تتمعشكين وراي ..

دنيا :- لا احنا بطور التعارف بعدنا مواصلين لمرحلة العشك

غميتها و هزيت ايدي :- شلون جيل معقوله هاي اختي
تفكيرها سابق عمرها بسنين ضوئية ..
لو لان اني معقده افكر هيج !؟
و الجيل تطّور و كل شيء تغير ..

صار العصر و حضرنا كل شيء
دنيا طلعت لعّابه لبست فستان ساكي اسود ثلاث ارباع ردن
ثمن جسمها و طولها بشكل جميل

و امي لبست قميص و تنورة و سرحتلها شعرها و حطت
فوكاه شال
مفتوح ..

محسيت الا على صوت دنيا و هي تحثني ابدل و البس شي
مال مناسبة
رغم ملابسي مرتبه لكنها اصرت و ماردت اكسّر خاطرها
و بالگوه دبرتلي فستان يرهم للحجاب..
وشكله حلو ..
سمائي عدل و بي حزام فضي من يم الخصر و لفيت حجاب
ابيض وياه
و طبعاً ما ارتاح گلبها الا خلتلي مكياج خفيف وياه

..

اخيراً اجه ياسين و اهله وياه ..
امه واخته الصغيرة اسمها نوال و متزوجة
و اخوه ياسر ...

سلموا علينا اني و ماما و و ياسين ماصد على وجهي ابد
و النسوان باوسنه و اخذنا بالاحضان بكل اريحية
دخل اخوهم سلم و باس راس امي و صد على دنيا صافحها
و ندار عليه راد يصافحني ..
غلّست و هو رجع ايده متفشل خزرني و ما عاجبـه .

بين سؤال و جواب و مجاملة
حسيت روحي تضايقت ناس لا اعرفهم ولا يعرفوني
و لا نشبهم و لا يشبهون

ا ..
صح مابدر شي مو حلو منهم بس حسيتهم اغراب كلش

لهناك و صاحت اختهم نوال :- عفيه دين منيلج هالعيون
فدوة عبالك بحر ..

ام ياسين :- صلوات ع محمد اشو ما تشبه جماعتنا
عليمن طالعه ملّونه

ابتسمت امي ..

و صحت اني :- اني اشبه بيبي المرحومة ام بابا فوزية

حسيتهم بهتو و فلت وجههم

همسوا بخفوت :- الله يرحمها

و بسري اعرف لحد الان مناسيين شلون امي اخذت ابن
الفلاحة
التشتغل عدهم

همست :- من رخصتكم اروح اشوف دنيا..

رحت لكيتها محتارة و مستحية ، شجعتها تشيل صينية
القهوة
و اني اخذ الضيافة و ندخل سوه لان على هاي حسبتها للصبح
متدخل ..

دخلت و الكل عيونـه عليها
و بسري اقرأ المعوذات اريد احصنها ..

ياسين ما كدر يرمش او يشيل عيونه عنها
و المفلوكـه كل شويه تبتسم اله و تضيع علومه
و بسري اكول مطورين و اني مثل اطرش بالزفة

بالصدفة وكعت عيني على اخوه و الي لكيته يرمقني بنظرات
غريبة
ما ارتاحيت الها ..

اعاين بساعة التلفون كل شوية و اتسائل ليش ما اجه
انشغلت بتفكيري عنهم
يسولفون و يضحكون و يستذكرون مواقف قديمة
و اخذهم الحنين للديرة و اهلها و ناسهم
و لفتتني البريق بـ عيون امي
لمعة حزينة مليانه نَدم و شوق للماضي
اعرف هسه هي تفكر و دكول ياليت يرجع بيه الوكت و اخسر
حبي
و لا اخسر اهلي و حضن امي و لمة الاحباب ...

وجهتلي مرت خالي السؤال عن دراستي

جاوبتها بأقتضاب :- خريجة هندسة .. معماري

ياسر :- اهاا طلعنا صنف

باوعتله و همست :- معماري ؟

-لا اني مدني طرق و جسور ..

-بالتوفيق ..

-اجمعين وردة ..

علياء :- اي عمة ياسر و انت شوكت نفرح بيك ؟

ام ياسين :- يوووو هذا عكرة يبس گلبي
والله ردت اخذله بنت ساهر الصغيرة شلونها
عبالك جماره بس هذا شايف روحه و ما يعجبه العجب
يريد مواصفات عيني ..

علياء :- مواصفاتيش النوب هي سيارة لو مره!

عوجت حلكها ام ياسين و بسخرية صاحت :- اندري
يريدله وحدة شكره و عيونها خضر و هو اسود مصدي ..

ضحكوا كل الكاعدين الا هو جواب بغرور :- اسود و مصدي
و كاتلات روحهن عليه..

باوعت بعفويه لكيت نظراته مدري شلونها
غشمت روحي و گلت يمكن هو طبعه هيج
ما اريد اسيء الظنون و احنا بالبدايـه

بعدني ماخذه وضعية المتفرج و عيوني على ياسين و دنيا
الي سارحين بغير عالم و ما يدرون شدا نحجي و نكول

هنا حسيت بالغيرة شدعواه هلكد يعاين عليها
مشايف نسوان لو شنو
راح اكوم ابزز عيونه ..
التفتت الي دنيا خزرتها
باوعت بعيونها لياسين انطته ايعاز
باوعلي بخزرة و رفعتله حاجبي بمعنى شكوو؟؟؟

باوع لامه و نطاها اشارة ..

حجت امه مقدمات و سوالف ماقبل التقدم لخطبتها
و هو هم طلبها رسمياً من ماما بأسلوب حلو
و تمت الموافقه بين الطرفين و قرئنا فاتحتهم على بركة الله ..
جايبين حلقات وياهم لبسوها و اتفقوا على يوم قريب يتم فيه
عقد القران
وحفلة المهر سوه ..

اشتغلت المباركات بيناتهم و الصالة الصغيرة امتلئت بطاقة
ايجابية حتى سند مكيف بنصهم و يباوع بعيونه يريد يفهم
شصاير ...

اشرتلي ماما اجيب الضيافة ..
رحت للمطبخ ارتب الكيك بصحون ..
و العصائر بصينية ..

و سمعت صوت ورايه :- عيني بزونه منين الحمام !

شلت راسي متفاجئة هذا ياسر ..

جاوبته بأقتضاب :- ام سَند ..

ياسر :- هااه ؟

دين :- صيحلي ام سند و الحمام نهاية الممر يم غرفة امي

و رجعت اشتغل بلي بأيديه هو حس على نفسه
فشل و راح ..
اجت نوال تعاوني خوش بنية و حبابه ..
كل شوية ماده ايدها تكرص خدي

طلعنا اني وياها بيدنه الضيافة و رن جرس الباب ..
حسيت بالغبطة هذا اكيد ادم
مدري ليش انفرجت ملامحي و رجعتلي الابتسامة

حطيت الضيافة على السريع
ورحت فتحته و بالفعل طلع هو واكف على الباب ..

شافني بهت ابتسم و عيونه لمعن ..
و بلحظة اختفت ابتسامته و عيونـه اظلّمت من شاف
الولد الورايه يصيح ...

#يتبع

#الفصل التاسع و العشرون - هل سأفقدهُ؟

*انت بس تلمسني اموت ابين اديك
ثلج وتلوحه الشمس
وتدري اماره النفس
اتقربت خليك واكف في مكانك
وابتعد والله احس اني بحنانك
لا لتجبرني اجرحك بالكلام
وابتدي وياك صفحه من الخصام
مو سهل انت عليه
جرح عايش لسه بيه
وما تطيب ..
واني ماريدك تطيب
ابقه بين ضلوعي خنجر
وان جان ماترتاح افتر
كطع شمتريد كطع
واخذ كلشي ولا ترجع
وبعثر بروحي
واني خليني اجمع
لكن اترجاك تسمع كلمتي
العمر مثل القطار
ولا تظن ارجع فتي
والمحطات انتهت مابيها راحه
وخلي احاجيك وبوضوح وكل صراحه
الناس كلمن ملتهي وحاضن جراحه
وانت جاي تكطع بعاكول صدري
راحت سنين من عمري

لـ خضير هادي

.

.

.

ديــن //

اباوع عينه على الي يصيح وراي ...

ياسر شايل سند :- عيني دين هذا ابنج طگ من البچي ..

بلعت ريگي و اني اعاين لنظرات آدم و الشرارات الجاي
ترسلها بـاتجاه ياسر

عبرني و راح تناوش الولد منه و عيونه لو الها سنون جان اكلته
اكل ...

ابتسمت و رحت اخفف شحنات التوتر الي ملئت الجو
عرفتهم على بعض و بصعوبـة تصافحوا بيناتهم ..

رجع ياسر للصالة و اشرلي افوت گدامه ..
دخل ادم و سلم و السلام بينه و بين ياسين هم جان بأقتضاب
و لا چنهم قبل فترة تمالخوا بالشارع .
باركلهم و نصى بمستواي حط سند بحضني

شاورني بخفوت يم وجهي :-اكعدي و حطي بحضنج و ممنوع
تتحركين !

كعدنا نسولف و اني احس تصنمت بمكاني
معقولـه ضاج علمود سند

اعاين اله باله مو يمي عيونه تتنقل بالوجوه
بالاخص بين ياسين و ياسر
و كأنه كاعد يدرسهم او يراقبهم عجزت افسّر ماهية نظراته

و من تصد عينه بعيني احسه يتوعدلي او يمكن يتهيألي هيج

ترخصوا هم بعد ما اتفقوا على كل شي ويه ماما
سلموا على دنيا و ماما و اجو ناحيتنا اني و ادم هم سلموا
و ادم بوده يخليني وره ظهره عنهم ..

طلعوا هم و اني رحت وره دنيا الي حسيتها انزعجت
دخلت لغرفتها لكيتها مبوزة و الوجه مكلوب ..

دين :- خير شبيح ؟

دنيا :- اسألي رجلج الفات علينه مثل الطنطل سلامه ثكيل و
عيونه تاكل بيهم شدعواه هيج حقنه وتر الناس و شردها ...

ضحكت و اضرب على حلكي :- حسج ولج ..
ترى هو شكله هيج شدعواهم انخلسوا منه

دنيا :- خو انتِ تركصيلها بچفيه ، قطع الاعناق و لا قطع الارزاق
مخليتوني افتهم شي من خطيبي !

دين :- ديله عيني ام ختيبي خل يعرس عليج و شبعي تفاهم
وياه
بعدين اكص لسانج اذا بعد كلتي على ادم طنطل

صاح عليه ادم حتى نروح ..

دنيا :- شنو متباتين اليوم ترى ميصير هيج اشتراج خما اشتراج

دين :- اني مرة تزوجت و انت راح تتزوجين و تفهمين الحياة
الزوجية تختلف عن بيوت اهلنا
بعدين خل يولن الكاج هسه تنتظريني على نار اطلع
حتى تاخذين راحتج ويا دارسين تسولفين وياه

دنيا :- اسمـه ياسين
دين :- و اني اصيحله دارسين بكيفي ..

غمتني و ضحكت عليها ..

تقدمت حضنتها و بوستها و وصيتها تكون حريصة على
نفسها
و ما تنطي اي شي بسهولة..
تفهمت و تقبلّت نصيحتي ..

رحت لعلياء الي لكيتها دافنه نفسها بالمطبخ
سلمت عليها من بعيد ..
و گلبي ينخمش من اباوع بوجهها و اتذكر سوالفها

باوعتلي بنظره حزينة بعدين كالت :- الله وياج سلمينه ع
الحجية و اهلكم ..

دين :- يوصل ..

صعد غراضي ادم و صعدت سند الي غافي بحضني ..

و سي السيـد ساكت و بس يجر حسرات ..

ايده لازمة ستيرن السيارة الي عبالك راح يشرد منه و عيونه
دم
حواجبه معكوده و عروق كصته مبينه

مدري شلون وصلنه بسلامـه لبيتنا ..
يسوق سريع و يتراجف و من اسأله يكول ماكو شي !

مشيت بأتجاه غرفة الحجية عود افوت اسلم عليهاا
جر ذراعي حيل و همس :- صعدي ابنج لغرفته
و انتظريني فوك ..

دين :- بس اسلم عالحجية !

ادم :- دييين اصعدي ..

ما عاندته اخذت الولد لفراشه و توجهت لغرفتنا انتظره

كعدت ذبيت حجابي اكل اصابيعي و افكر شبدر مني
و خليته يتعصب !؟

دخل و قفل الباب وراه ، نزع سترته كورها بأيده و لطشها
بالكاع

جفلت و تصنمت ..

يفتح ازرار قميصة من فوك مثل الي يريد يتنفس ..

فات للحمام فتح المي و وره شويه طلع وجهه و مقدمة شعره
يقطر مي !

يجر حسرات و يستغفر..

تشجعت و كلت اسأله شصاير ؟

صرخ بوجهي :- اسكتييي

اتسعت عيوني من شفت دم نازل من خشمه

صحت :- ادم .. خشمك ينزف !

نزلت كم قطره لوثت قميصه الابيض

آكل بشفتي و اتراجف و بسري اكول دخيلك ربي شصاير ؟

راح غسل و اجه كعد گبالي

گمت كتله خليني اجيبلك مي..

صاح :- رجعي كعدي .. ما اريد زقوم !

كعدت :- اااي ست دين ، شلونج ؟ ان شاء الله تونستي

باوعتله و مفاهمة حاجه :- ااي الحمدلله .. تونست

كام و دفر الكرسي برجلـه حيل
و اجه وكف على راسي يرعد :- انتِ فاهية لو تريدين تموتيني
؟!

باوعتله وعيوني دَمعت :- شبيك ادم غير افهم ؟

لزم ثوبي من صفحة كتفي و همس من تحت سنونه

هذااا منيين ؟

لزمت چف ايده ار

يد يهدني :- من يم دنيا شبيكك

رفعني و يخض بيه و كفت و منصي يحجي يم اذاني

-طالعه بهيج ثوب مقسم تفاصيل جسمج
و لاعبه بوجهج لعب و الكحل مجرور يا سلام
شنو بويه معرسة و اني ما عندي علم

عاينت الـه بتوسل و همست :- كول يا الله ادم
كل هذا لخاطر فستان و جرة كحل !
دنيا كالت بدلي لخاطري و مردت ازعلها والله

فتح عيونه حيل خلسني و يصيح :- و اني شنو
كو..... ، طرطو..... عندج تخافين على دنيا تزعل و رجلج ال...
حاصرة صد..... ج و...... و كاعدة بنص زلم ثنين

انملخت صفحة من فستاني بأيده ..
اختنكت و الدمع تجمع بعيني صحت :- شبيك !!
شجاك شفتني مصلخة !
ترى ثوب مستور ولابسة حجاب
و الزلم الاثنين ذول ولد خوالي و احد منهم رجل اختي حيصير

مد ايده و اخذ وجهي عصره حيل
و احس بسنوني واحد يطك باللاخ
يحجي و عيونه نار ...

متلبسين هيج بعد ...
ولد خوالج ولد عمج اخوج محد يلمحج هيج بعد
اجرم بيهم و ادفنج بأرضج مرة لخ افتهمتي لولا !

باوعتله بأسف و دمعتي نزلت على چف ايده المحاصر وجهي .
...

صاح :- افتهمتي !!!

مكدرت احجي بس هزيت راسي بـ اي !

تركني ابچي سنطة ..
صاح :- روحي بدليه !!

تصنمت بمكاني احاول افتهم الي صار
اجه و بحركة سريعة لزم الفستان و سلته شلون ينزعون الطفل
حتى ترجيتي طفرت من شحمة اذني !

و صاح :- بدليييه !

فتحت عيوني و شهكت الملم بروحي ..

دفعته و عطت :- هاااي شبيييك
لزم زندي حيل و يأشر بسبابته على حلكه :-حسج ما يعلى بعد ،
اكتمج و علي ..

اومأت براسي و اعتذرت بخفوت ..

مشيت لصفحة كنتوري اخذتلي دشداشه و فتت للحمام ..
لبست دشداشتي و عيوني مبطلت تبجي ، اسلوبه فض
وياي و طلع الروحة من خشمي .. بعد فلا اروح لمكان !

اول مرة اشوفه هشكل ..
هو اني شوكت كاشخة لو حاطة مكياج
خرب حظي اي والله ..

طلعت لكيته ممد عالسرير بطرك البنطرون مغطي عيونه
بذراعـه و يجر حسرات ..
راحت عيوني على قميصه المشمور ع الارض عيوني راحت ع
الدم الي بي و قلبي نكمش ..

هو ليش نزف خشمه معقوله مريض لو بي شي !؟
و اعاتب روحي بسري :- شوف گلبي الرچيچ شايله
همه و هو صار ساعة يرزل بيـة ..

رحت شلت ملابسة و جهزت روحي للنوم و عيوني ما بطلت
تهلّ ..
الموضوع مايسوى شجاه و شجاني جاي ابجي
مثل الي تريدلها حجة تفرغ طاقتها السلبية

رحت مددت بصفـه و لفيت روحي بالبطانيـة
ضلّيت ابچي سنطة ..
و هو يجر حسرات .. و يستغفر

حسيته گعد و صاح :- استغفر الله .. هسه عليمن تبچين ..؟

مد ايده طبطب خفيف على كتفي و همس :- كافي اسكتي ..

و بدل ما اسكت الدموع تحولت لشهكات ..
مد ذراعـه و جذبني لصدره ..
باس هامـة راسي و اعتذر ..

ادم :- اموت على ربج ، و اغار عليج من الهوا
جنت اتمنى من الله لا يراويج غيرتي
اتحول و أصير غير انسـان
بس انتِ اليوم جبرتيني ..

انداريت و صار وجهه مقابيل وجهي ..
همست من بين دموعي :- هو اني شسويت ؟!

خزرني و كال :- لا يابوي امي الجانت لابسة ثوب كصيف و
بلون عيونها
و جارة الكحل موصلته لابو موزة ..

رفعت تك حاجب و همست :- ليش تبالغ ؟!
سويتني لابسه حصر و سويتني جارة الكحل لاذاني..
ظلمتني والله ..

ادم :- ما ارتاحيت لابن خالج ابو بنطرون خارط
شويه و يطلع طي.....ة
مرة لخ اذا يصيح بأسمج هيج الا اكص لسانه و احطه ...

ضحكت بخضم ضوجتي .. و اردفت : لسانك يمعووود

باس ارنبة انفي و همس :- بعد لا تعيديها ..

بمكر همست :- خلص بعد ما البس غير الاسود

ادم :- حتى اشرمج شرم

اتسعت عيوني ...
و هو برقت عيونـه
و ثنينه غرگنا بنظرات بعضنا البعض ..

يمشي ايديـه على خصري بهدوء و نظراته مرتخية

همست و احاول اخفي ارتباكي :- شبيك مريض ؟

اومأ براسـه بـأي ...

بعبوس و خوف تسائلت .. :- يا ساتر من شنو تشكي ؟!

-منج ،

ابتسمت و اردفت :- لا عليك الله ليش خشمك طك دم

هز راسه بخفة و همس :- مادري يمكن ضغطي !

اتسعت عيوني و بسري تساءلت معقولة هلكد تأذى ؟

ادم :- وين صافنـة ؟!

-بيك ..

خزرني و بطرف شفايفة ابتسامة ..

دين :- اووف يهالعكده بنص حاجبك شوكت تروح !

بحركه سريعة خطفني و صرت فوكاه ..

ارتبكت و انكمشت على نفسي
بتلعثم همست :- شدسووي ادم ؟

وخريهاا ..

دين :- شنو ؟

-العگده ، و خريها ..

ارتبگت منه .. و اكاد اسمع ضربات قلبه و كأنها تدك جوه
ظلوعي اني ..

گلبني .. و حاصرني بين ايديـه

انفاسه حارة تلفح بوجهي البارد
و انفاسي باردة تفسّر مدى خوفي من هيج لحظة

همس :- اني حتى عروگ روحي تعكدت من وراج !
جيت يمج .. فكيهن عگدة عگدة !

همست بنبرة ضعيفة :- عفيـة ادم وخر

-ما اوخر .. طگ گلبي منج .. دفن وجهه بنحري يشم بيه و ينثر
بوساته بخفـه على وَجهي ..
يهمس و عيونـه تاكل بيـه :-و خريها للعكدة يله
سلميني نفسج و كوليلي احبك خلي ترد روحي
باس طرف أنفي و همس :- كوليلي اريدك مثل ما اريدج هسه
..
مجروح اني دين و بيج اداوي جروحي ...

عيوني تتلاكط داير مدايري تدورلي مهرب ..
لكن هيهات و انا مُحاصرة داخل قُضبانـه !

احبـ .. ك

همستها بتلعثم و غَمضت جفوني حيل

ادم :- اذا غَمضتي اموتج

عايني بعيوني .. شوفيني شگد احبج شوفي الشوگ و اللهفـة ،
حسي بناري و لو مرة !

ادري بنفسي راح اغرك .. راضي اموت بيهن !

فتحت عيوني .. و عاينت بنص عيونـه ..
اهدابة نعسّن .. و قزحيته اتسعت ماشفت شي غير
روحي تعوم بيهن ..

ابتسمت و همست :- ياحظي بيك ..

مرر اصابيعـه على حواجبي باس عيوني و همس يم أذني :-
ابد لا تغمضين .. باوعي بعيوني لا تروحين بفكرج لغير
مكان ..
اني يمج .. احبج و ما راح أأذي شعرة منج
باوعيلي كم آيـة شوگ راح ارتل بيج !

دين / اخذ شفايفي و مدري شلون اخذني مني ..
و سحبني وياه لدنيا بس اني و هو بيها
عامل الخوف بداخلي بكل حرص ماخلاني لحظة اغادر عالمه ..
حدما اندمجنا روح بروح و احسني صرت جزء من كلـه ..
يعزف على اوتاري بشغف ..
مرة يقسي و مرة يحن و مرة يضيع اللحن ..
و اني ضعت بي مدري اني سافرت للمحطة
مدري هي اجت عندي ..

حبيبي الي انتظرتـه من سنين ..
حَمد ..
و القطار جان قصة حبنا ..
الي مرت بكل المحطات بحلوها و مرها
بالصبر و التضحيات ..
الليلة جانت حنونـه دافيـة ابد ما تشبه برودة ذيج الليالي و لا
قسوة كل شتا يمر عليه ..
و رحت اسأل نفسي ..
هل تصالحت اخيراً ويه فصل الشتا ..
و البرد و المطر ؟!
::

في مكانٍ آخر ...............

ايفان :- يوم خاف حرام .. بلا كلشي الله مموفقني
لا حظيت برجال بي حظ و لا حتى بطني شالت جاهل

تسواهن :- جا مو حرام السوته بينه هالمكطمة ام گصة الفكر ،
حطت وليدي جوه التراب و حرمتني من ريحة ضناه ..

ايفان :- و ليش اكتفت ؟!
تزوجت غريمنا و غوت رجلي و سودنته ...

تسواهن :- الشهادة لله ، رجلج هو كوا....
و عينه طايرة عالطگه و اللگه ..
لو صخله مرت من جدامه طارت عيونه عليها
اسمها عدها .............

ايفان :- يمـه عيب شهالكلام ..
هسه كوليلي ..
هاي المرة شغلها مضبوط ، راح تكسحها من عدنا و تخلصنا ..

ابتسمت تسواهن بخبث :- راح تكسحها من الحياة بكبرها بس
كون هاي الي جدامج تصير سنعة و تنفذ
الشغل بالمضبوط

عاينت بعيون تلمع للشابـة الكاعدة تفرك بأيديها
من الرعب ،تفكر لو شافوها هسه ويه تسواهن شراح تكون
جزاتها من اخوتها ...

ايفان :- سمعتي الكلام زين ؟ و خليها ابالج ابن اخونه ما
يجيسه اي شي
من الي راح يصير كوني حذرة !

هزت الشابة راسها بالموافقـة و بداخلها نار االخوف تسعر من
الجاي و الي راح تقدم عليه ..

::

دين :- فتحت عيوني بهدآي ..
و ما لگيت غير وَجهه گدامي ... مستند على كوعـه و يعاين الي
بَـ هَيام ..

استوعبت .. الي صار بيناتنا ، سخن وجهي
و تواريت عنـه جوه الغطا..

جر الغطا من وَجهي ..
ابتسم و همس :- رحمة لربج شگد حلوة انتِ
گد ما حلوة تنوكلين ..

احتاريت بيش اجاوبـه كتله :- تسلم انت الاحلى ..

اطلق ضحكـة عاليـة و أردف :- الجذاب الله يذبـه بالنار ..
انگلبت على بطني رافعـة راسي بأتجاهه صحت :- والله انت
حلو و غمازتك تاخذ العقل ..

مد ايده يمسّد على ظهري خفيف ..
-تروحلج فدوة الغمازة و اهلها ..

انتبهت لنبرة صوتـه تغيرت ، كمزت الملم روحي و احجي :-
عفيه خل اروح اشوف سند

جر ايدي و كعت على صدره ..
-نايم قبل شويـه رحت شفته !

انتبهت ملامحـه اليوم احلى و اهدأ و النونـة البنص حاجبة
مختفيه ..
بمكر صحت و احاول اغير الموضوع الجاي يفكر بي هسه
-هاي وين راحت عگدة الحواجب ؟!

ضحك بصوت عالي و اردف :- خلف الله على ذيج البنية
كضينا الليل اني وياها نفگ عگد و نسجل اهداف و يغمز ..

ضربت حلگي بخفه : عزاا اددم ..

-عيونـه .. حيله و بعد حيله
—احبگ ..

-يبوو اشتعلوا اهلج تعاليييي ......

...........

في مكانٍ آخر ............

ناديـه -لك يوم عوف درب خالك .. هذا عماه الطمع و الجشع
عاين حبيبي حكك رجعلك بعد سنين ..
و صرت بالمكان الصحيح ليش تمد ايدك للحرام
و تخرب حياتك بالاجرام ...
يوم ادم اذا عرف الك ايد بالسالفـه يحرك البيت على روسنه !

رافـد :- اني مالي ايد بالسالفه اني سمعت و اجيت گتلج ، بس
خالي ما اكدر اعوفـه
الرجال الي تكفلني و ساعدني اخش بنصهم و اجيب حكي من
عيونهم ، انه مو ناكر المعروف يوم

ناديـة :-
لا تنسى فضل ابوك الرباك و الي للموت ما خشن خاطرج
بكلمة !
شويكر مو حباً بأمنه و لا بدافع غيرته على اخته يريد الانتقام
بس حلّت بعيونه فليسات الورث ..
تعلمني بي و انه وياه حكلتنا نفس البطن ؟

رافد :- ما ناسي حتى تذكريني .. انتِ ليش كارهه خالي شاكر !

ناديـة :-ما اكرهه بس خفت من جبروته ، الرجال الي ما لطف
بحال طفل ابطن امـه شلون اسلم وليدي اله ، مثل ما سولتله
نفسه قتل نفس بريئة بسبب الفلوس
يجي يوم و يكتلك خاطر مصلحته ..
رافد يوم ، اعرف انت مو هيج لا تخليني اغضب عليك

رافـد:- اطلعي من السالفه ، هذا شغل زلم ، خالي ما اعوفـه و
راح اخلي يدير شغلي و يوسعه و امشي على نهج الوالد
انتِ الج الصافي يوم

ناديـة :- و روح امي يا رافد الما تراجعت و عفت شويكر المجرم
بنفسي اروح

لابو صخر و احجيله كل شي و عليه و على اعدائي
.....

::

فطيم :- ولك جووووز مني چم نوبـه اكلك لا تحبني هيج ...
تعاي لَيه وج يمه دين هذا رجلج شبلااه معوز حنان ..

دين :- اعاين لمنظرهم و ابتسم ..
آدم حاضنها يبوس و يعصّر بخدودها ..
وهي منزعجـة ما تحبه من يلج وياها يبزعها ..

حطيت سند على كرسيـه يتريك و رحت كعدت يمهم
يدغدغ بيها و هي ما تحمل ..
لزمت ايده عضتها يله فلتها ..

ادم :- هينه افاطم ، تعضيني مووو

فطيم :- ولك بزعتني .. نزلت عليه بوس و تعصّر ذيج مرتك و
العب وياها انه شكووو

باوعلي بمكر و همس :- شفتي جده دكول العب ويه مرتك ..
امشي خل نلعب فوك !

خزرتـه و هو يضحك بخبث ..
باس جديته من راسها و همس :- الله لا يحرمني منج أمي ..
جرت وجهه و باسته بجبينه و راحت تدعيله ذاك الدعاء الحلو
بالتوفيق و راحـة البال ..

اقترب و نصى بمستوايـه :- هسه يله حسيت نفسي عريس ..
احبج ام عيون ...
بلكي يخلص شغلي و اطلع من وقت ..

باوعتله بمكر :- و شعندك طالع من وقت ؟

-عندي وياح حسابات قديمة اريد اصفيهن .

دفعته و كتله :- رووح يازي عاد

التاف و صاح :- مو صوجج صوجي ردت اخذج انت و سند و
نطلع

باوعتله بعيون تلمع ، و الفرحة الاحس بيها لو الها لسان جان
نطقت .. اخيراً صار يهتم بسند و يهمه امره ..

توكل لدوامـه و بقلبي ادعيله ..
لفيت ع الحجية لگيتها تمسح دموعها بفوطتها الململ
البيضـه ..
و خدودها صايرة طماطة من التعصر مال ادم

استغربت من دموعها ، قبل شويـة جانت تضحك و تتشاقى
رحت كعدت يمها بوست راسها و حاوطتها بذراعي ..

-ليش تبچين يا بعد عيني ؟
منو زعلك منو بچاك ..

ابتسمت و نشفت دموعها
-انه ما زعلانه .. بالعكس والله
بس اول مرة اشوف ابو صخر هيج فرحان ..
شهكت و فكت ثوبها و ضلت تدعيلي و تدعيله ..

همست :- يمكن على بالج اول مرة دتشوفينه شلون فرحان و
ينكت للهوا
هذا من كاعـه هيج مت عيني من راح وليده تبدل حاله
و صرنا ما نشوف ضحكته بس بالمناسبات
اوف يادين اريد الله يرزقج الوليد الصالح منه و يتمم فرحة
وليدي على خير ..

دَمعت عيوني و بگلبي احس زفـة عرس من السعادة
ما ابالغ لو گلت هاي اسعد لحظاتي ..
من اشوف عندي زوج يحبني و انسانه مثل الملاك الله حطها
بطريقي عوضتني عن حنان امي الي فگدته ..

همست :- عفيه حجية ضُميني بحضنج شويه
ضحكت و تناوشت نص جسمي بحضنها
تمسد و ترقيني مثل كل مرة و الدموع توكع بحضنها
المعنى الحقيقي لو گلت اذب حمولي ..
هاي الانسانـة الطاهرة النظيفة و الي حتى بحجيها تلمس
العفة ..
عدها قُدرة عجيبة تمحي همك و تاخذ همومك و تنطيك جرعة
راحة نفسية

::

مرت ايام قليلـة احلى من العسل على گلبي
عشت ما بين دلال آدم و ما بين حنية الحجيـة عليه
و من هلگد ما نفسيتي مرتاحـة گلبت البيت كلاب بالندارة
عند امي ما كربت هيج ، و هاي بشيرة الخبيثة
ذبت حتى التركيب براسي ..
و شالت ايدها هي و بنتها فرد نوبة مكضياتها تخامة و
تسيورات و نشوفهن بس وكت الوجبـة..
الى ان لاحظ ادم اني جاي اتعب و مدا اكدر اوفق بين البيت و
الطفل و هو ..
اتفق ويه عاملة تجيني بالاسبوع مرة تعاوني بالشغلات الثكيلة
..

اخابر دُنيا الوضع مستتب و فرحانـة بخطوبتها و ديفكرون
يسوون عقد سيد بس منتظرين خالي ساهر يحن و يرضى
يصالح امي و هو راكب راسه لا هو و لا ولده راضيين
يصالحونها و محملينها ذنب هجرتهم من ديرتهم و ناسهم ..

انكمش گلبي و خايفة لا تنعكس هاي الامور على دَنيا مستقبلاً
و ماكدرت اصارحها بمخاوفي ..
لكنها تمدح بياسين الي يغدق عليها بالمشاعر و الهدايا و
منسيها كل الفوارق العمرية و الاجتماعية و الفكرية ..
اني خايفة من هذا الانبهار السريع بهاي العلاقة
خايفة لا يجي يوم و تنطفأ شُعلة علاقتهم قبل لا تبدأ
و دنيا تعيش صدمـة نفسية !

علياء ...
بالرغم شگد تحاول وياية ، تراسلني احياناً
او تدك عليه اتجاهل مكالماتها و ايدي تروح عالرسائل و تعجز
عن الرد ، تجيني لحظات و احن لكلمة يوم
و من اتذكر اني شنو بالنسبة الها و شلون جابتني لهاي الدنيا
اكرهها و اكره نفسي و اضل ابچي الى ان افحط ..

مهما اتناسيت او أگول تخطيت يلاحقني الماضي ..
و الذكريات تعصف بقلبي تمرده مرد ..

بهاي الفترة لاحظت تصرفات غَريبة لنور ، تحاول تحتك بيه
و تقوي العلاقـة بيناتنا مرة تجيب حلويات و تشاركني بيهن
مرة تجيبلي نفنوف و دكول اشتهيته الج مرة اشوفها تلاعب
سند و تهتم بي و اني بنية صافية
گلت يمكن الله هداها اخيراً و فهمت اني مو عدوة هذا البيت
اني ضحية تعرضت للمساومة و الجبر و ابني طفل بريء ماله
اي ذنب
بالمشاكل و الثأرات الي بينهم ..

صار عمر سند 11 شهر يمشي و يتعثر شلع گلبي و اذا تأذى
يبجي
و الفحطة تحطمه لاحظت زرقِة اصابيعة زايدة
اخذناه اني و ادم لدكتور الاطفال و بعد فحص سريري وجه النه
سؤال
فيما اذا كان عدنا تاريخ مرضي ويا مرض القلب اني هزيت
راسي بـ لا
لكن ادم غمض عيونه و تنهد بحزن كال انه جدهم عنده و اخوه
نبيل ..
الدكتور طمنا بس حجايته

ركيكة و الي زيد قلقي اكثر من رشح
النه دكتور قلبية

من سمعت هيج احس الكرة الارضية توقفت عن الدوران و
كل شي بهذا العالم
صار ساكن ..
ادم لاحظ خوفي و رجفت اطرافي طمني و كال مو شرط اكو
شي موزين ..

الحجية من سمعت انخطف لونها و ضلت تدعيلة بصلاة الليل
و اني الليل كله ما نمته و عيوني ما وكفوا دمعهم ناجيت ربي
ما يلوع گلبي بخبر مفجع

ادم ضل مُصر على موقفة ماكو شي و يواسيني و يشجعني

مدري شلون مرت ساعات الانتظار لحد ثاني يوم ..
اخذنا سند و توجهنا لدكتور القلبية و الي جان اسم معروف
طول الطريق لساني يلهج بالاستغفار و الدعـاء ..

وصلنا السرة و ادم جان مو احسن من حالتي بس يتظاهر
بالقوة گدامي
و بعد عدة فحوصات و ايكو زف الي الدكتور الاخبار و الي
نزلت مثل الصاعقة
على راسي ...

طلع عنده مشاكل جَمة بالقلب صمامات مشوهه و واحد
معكوس و فتحة و فقدان البطين الايسر

انصدمت صدمة عُمري .. و احس ظهري حرفياً انقسم
لنصفين
تراجعت خطوة للوراء و حسيت الارض تسحبني لولا ان يد ادم
سندت ظهري

للوهلة الاولى عشت حالة من الانكار و ضليت احث الطبيب
يعيد فحوصاته
و يتأكد خاف اكو فد غلط غفل عنـة و ضليت احلفله الولد
طول ذيج الاشهر
ابد ما عانى صح عنده فحطة بس جنت اسكتة و يرجع طبيعي .
.
لهناك و حسيت نفسي ام مهملة سيئة شلون ما لاحظت
هالشي من البداية

الدكتور بلغني انه للاسف حتى لو عارفه من البداية مجان
يطلع بأيدي شي
اسويه هذا تشوه من الولادة ... و ما بين عدنا بالاشهر الاولى
بسبب قلة المجهود و ايضاً يُعتبر من الحالات النادرة ..

ابـچي و احس بالضياع و عيوني تتنقل مابين ادم الي على
لحظة و ينفجر
و لسند الي جالس يلعب بحضني يجهل مصيرة و مابين
الدكتور الي ملامحه جامده
و ما نطاني امل ملموس ..

ضميت وَجهي و انفجرت بدموعي و انهياري و ضعفي ..
احس روحي بداخل فقاعة من الكوابيس الي مالها نهاية

باوعلي ادم و بعيونـة كومة حزن و دمع ، توجه للدكتور و كاله
شنو الي نسويه اني مستعد اسفره و اعالجـه ..

عاين الدكتور النه بنظرة أسف و همس :- هو شيء اكيد وراه
رحلة من العلاجات
و العمليات الي لاحصر لها ..
بس تبقى الاعمار بيد الله ..

نسيت نفسي و ايماني لبرهـة و رحت اصرخ بوجه الدكتور
رافضة لكل كلامـة

صحت :- شنو قصدك الاعمار بيد الله ، يعني اكعدو و اسكتو
اول و تالي ابنكم يموت

الدكتور : معاذ الله ما كلت هيج بس لازم تكونون بالصورة
رحلة فتح الصمامات المسدودة و سد الفتحات و زراعة و
تبديل الصمام
رحلة طويلة و مجرد تمدد بعداد عمره ..
لكن لو نرجع للحقيقة ابنكم محتاج زراعـة قلب و هذه العملية
بس بالخارج
و حتى بالخارج فهي كلش صعبة لان الزراعـة تحتاج متبرع و
يكون بنفس عمر ابنكم

ادم :- يعني شنو؟

الدكتور :- يعني طفل بعمره يكون ميت موت دماغي و اهله
مستعدين يتبرعون باعضائه ...

اجه ادم تناوش سند مني و اني دفنت راسي بين چفوف ايدية
احاول استوعب الكلام الي ديحجيه الدكتور ..

جان كلش صعب ينزل على مسامع اي أم
انهد حيلي و غشاوة غطت على عيوني

الدكتور :- خلونا نراقب وضعه و نعرضه على لجان تابعة لوزارة
الصحة
و خليني اكون صريح وياكم الفترة الي فاتت محسيتوا على
ابنكم مريض
بسبب قلة المجهود الي يأديه و هو طفل ..

منا و رايح الطفل راح يبدي يمشي و يلعب و يركض و يتعثر
يتعصب و يتعارك و هاي كلها مجهود عليه فراح تظهر عليه
علامات
شفايفه تزرق و اصابيعه تنتفخ و تصير باللون الازرك ..

حاولي تراقبيه .. ممنوع اللعب المجهد ويه الاطفال
ممنوع الركض و ممنوع البايسكل ..

حافظوا على صحته خصوصاً بالشتا
الفايروسات تدمر جهازة المناعي و تخليه عرضة للخطورة

هذا من غير بعض الاطعمة راح اكتبهم الكم ممنوع يتناولهن ..

بعد نقاش طويل .. و تعليمات من الدكتور ..
حملت ابني و هم الدُنيا كله على اكتافي ..

ظهري محني و قلبي مكسّور ..

كعدنا ادم بالسيارة و راح جابلي عَصير ..

-اشربي سكرج هبط و وجهج اصفر !

ابتسمت بمرارة و همست من بين دموعي :- لا تخاف ما
موت
الموت مو الي ... الموت بس للي احبهم
شكد ما اتمسك بيهم ينسابون من بين ادية مثل المي..

مكتوبلي انفجع بگلبي ادم ..

عيونه غوركن بالدموع و همس :- اسم الله لا تفاولين عالولد
و عيونج ما اعوفـه اشتري حياته لخاطرج لو الثمن عمري

بس لا تسوين بروحج هيج
عايني لنفسج وجهج اصفر و شفايفج بيض
امشي خلي اسويلج فحوصات ..

استندت براسي على الكشن و غمضت عيوني

-اخذني للبيت ادم ..

ما عاندني اخذني و رجعنا و لگيت الحجية تنتظرنا و بعيونها كل
علامات الخوف و القلق

ركضت لحضنها ابـچي ...

خايفه عليه خاله مووو
گلبج علمج وليدي راح يموت

انهاريت ابچي و على حسي تجمهروا اخوانه و امه بالهول ..
الكل يعاين بصدمة الي و بشفقة للطفل
نبيل بچي و ماكدر يضم دمعته عبنه يشكي من نفس العلّة ..

ضمتني الحجية و تبچي على بچيتي ..

-ذكري الله حبوبة ، و لا تيأسين من رحمة ربج
على ساعة يرزقج بمعجزة شفائه ..
غلط تفاولين ...

شلت راسي و

اعاين لسند الي بحضن ادم مو حاس بلي داير
مدايرة

صرخت :- ليييش طفل بريء من يومه ورث بس القهر
و هسه جملها المرض !!

سوده عليه يووووم انولدت و نحكم عليك بالنبذ و المرض
ليش ياربي لييش!

فطيم :- استغفر الله بنيتي ، كلشي مقدّر و مكتوب
الله يشافي وليدج و يقر عيونج بي يابعد بيتي

نصى ادم بمستواية و اخذ وجهي يحجي :- باوعيلي دين
الطب هسه تطّور ، مازال بعده جاهل اكو امل نتلاحك اله ..
مستعد اسفره لاخر العالم و اصرف العندي و الماعندي..
و اطيبه الج ..

ابتسمت بمرارة و همست :- لازم ما سمعت الدكتور شگال
رحلة العمليات مُدمرة و بالنهاية الحل الوحيد الزراعة

كولي يا أم مستعدة تنطي گلب ابنها لولد لاخ ...

رفع جسمـه كامش خاصرته و يتحسر..

بشرى :- ذكري الله .. انتِ مسلمة و تصلين و تعرفين لا
اعتراض على حكم الله

باوعتلها و ماحسيت كلامها لامسني

رحت شلت ابني و تركتهم و صعدت لغرفته ..
حللت اله و غيرت اله ملابسه ..

فرشت بساطه الي بي مثل الطوق و متدليه منه العاب
هو يحب هاي اللعبة ..

قرفصت اعاين اله مثل نعمة على اي لحظة تطير و افقدها

همست اعاتبه :- حتى انت تريد تروح و تعوفني ..
منو بعد يلعب بشعري ..
يعض خدي ..
منو يعاين الي بهاي النظرة الصافية مثل مي البحر..

عصرت ركبي و نهضت على حيلي ..
مسحت دموعي و دحضت اي فكرة سلبية بشأن سند

اي .. اني راح احارب للنفس الاخير
حتى لو كلفني الامر اشيل گلبي و انطيه ..

حاوطته بين احضاني ..
ما اريد افلته من بين اديـه ..
هذهِ اليدين المُصابة باللعنـة !

احبگ وليدي ، اهمس بأذنه و هو يبتسم مو داري شلون قلبي
تقطعت اوصاله ..

نام و نمت و الدمعـة معلّكة بطرف رمشي ..

بعد مدري شگد من الوقت حسيته انسحب من بين ايديـة ..

شهكت بكتمة علبالي كابوس ..

شفت ادم شايله و يأشرلي بأصبعـه هششش
خلاه بسريره و اجه نصى بمستواي

همس :- لكيتج غافيه فوكاه .. كومي نامي بفراشج

دمعّت عيوني و همست بخفوت :- احسّ رجليه ما عادت
تعيني ادم
كل جسمي باد و اطرافي نملّت ..
ظهري ما عاد يحمل اوجاع ..

بلع ريگه و شرع ايديه خلاهن جوه ظهري و شالني ..

همس :- و اني وين رحت ..
خلاني على فراشي و احس فد نوع من المرض استفحل عليه
يمكن حزن .. او يأس ..

اجه قرفص ناحيتي و راح يلعب بشعري ..

ادم :- حاسّ بيج والله ..و صدكيني ما راح اعوفـه
راح اعرضه عاللجان الطبية و اسفره على حسابي
لابد اكو طريقة للعلاج ..

باوعتلـه بحزن :- حالته نفس نبيل ؟

هز راسه و اردف :- نبيل عنده التهاب بغشاء القلب
بس مو حاد و مشين اموره بالعلاج

احنا عدنا وراثـة دين ، بعوائلنا ...
اجداد و عمام جانت علّتهم بگلوبهم

بـچيت ...

ادم :- لا تبچين كوني قوية ابنج محتاجج ..
دين :- و اني محتاجتك و ابني ...

سكتت ابلع ريكي بصعوبة ..

استرسلت :- ابني ترى ماله ذنب بلي....

ادم :- ششش ابد لا تجيبين طاري هذا الموضوع
مستحيل اعوفكم ..
مستحيل ..

يمكن جانت اصعب ليلة اعيشها بحياتي ..
بعد معاناة و جهد گبير من ادم ماعرف شلون غمضت جفوني
و دخلت بسبات عميق .....

فتحت عيوني الصبح مرعوبـة من كمية الكوابيس الي ما اكدر
اتذكرها
جلست لحظات احاول استوعب و احاول اخذ انفاسي و كأني
كنت امشي بطريق طويل
ماله معالم و لا نهاية ..

غسلت وجهي و رحت على غرفة سند لگيته بعده نايم ..

شلت عيني لكيت ممية بيها بقايا حليب
ابتسمت و عرفت هذا آدم مسويله و راجع منومـه ..

نزلت و اسمع حسّ اصوات عالية جايـة من صالة الخطار ..
الهول فارغ حتى الحجية الي متفارك مكانها يم الصوبة
مموجودة

اقتربت الباب مفتوح ، الحجية كاعدة عالقنفة و منصية راسها
ونبيل ماخذ زاوية صافن
و نور و بشرى يبچون و ادم واكف و ايده بجيوبه يعاين بجمود
لـ بنية اول مرة اشوفها
طويلة شكرة لبسها حلوة و ملامحها ناعمة ..

تأشر عليه بسبابتها و مبين معصبة من عروق عنقها

تعاتبة بنبرة باكيـة :- اخر شي جنت اتوقعـه تنسى دم ابنا
و تعيش حياتك و يا ارملة المطلوب النه ثار
لك شلون سويتها شلووون واريت وجه ابنك بالتراب
وحطيت ابن اركان بحضنك !!

يتبع

#الفصل الثلاثـون -

# يا طعم ... يا ليلة من ليل البنفسج
يا عذر ...
يمامش بمامش و أحبك
طبع بگلبي من اطباعك ذهب
ترخص ... أغلّيك و أحبّك
أنه متعلّم عليك هواي
يا سولة سكتّي
يا طواريّك ... من الظلمه تجيني
چانن ثيابي عليَ غربه گبل جيتك
و مستاحش من عيوني
و علىٰ المامش حنيني
چلمة الهجران زارتني
گبل حبك يغالي و ألّمتني
علىٰ المامش علّمتني
علىٰ المامش علّمتني

لـ مظفر النواب ..
قصيدة ( ليـل البنفسج )

.

.

.

عـذراء :- اخر شي جنت اتوقعـه تنسى دم ابنا
و تعيش حياتك و يا ارملة المطلوب النه ثار
لك شلون سويتها شلووون واريت وجه ابنك بالتراب
وحطيت ابن اركان بحضنك !!

فهمنييي لا تضل ساكت شلووون سَويتها ؟؟
والله .. لو ماخذ اربع نسوان و لا احجي و لا اخطي عتبة بيتك ..

بس .. مال الكاك ماخذ ارملة الي گتل ابنا
و ملفي ابنـه بالبيت لا هاي ما تنجرع !

احجيييي لا تباوعلي هيييج !

ديـن //

اعاين الها تبجي و تضرب صدره بحركة ..
و على دموعها بچوا كل الي كاعدين بالصالة
و اني هم نزلت دَمعتي ، الله يعينها موقف صعب
ما اكدر الومها و اذا لِمتها فعلى شي واحد
و هو تركها لـ ادم بوسط هيج ظرف ، اكيد جان محتاجها و هي
فضلت الهروب على مواجهة حزن رجلها ..

كمش ايدها آدم و استفاق من صفنته و راح يصرخ بوجهها
بليه شفقة ..

ادم :- انتِ آخر وحدة تلومني عذراء ..
انتِ وين عن مراثي ابنج كل هالسنين اشو ما شفتج كابدتي
ربع الي عشته ، تركتيني مذبوح من الحزن و فضلتي دراستج و
تخامتج بتركيا ..

نسيتي كلامج اليـة لو اذكرج ..
نسيتي شلون عفتيني بنص الدرب ..
و كل تبريراتج اسخف منج !

جنتي تشوفيني اتلظى من الحزن على وليدي
وهمج الوحيد ارجع مثل گبل وياج اغازلج وادللج و كأن المات
عدنا بزونة ..
حتى البزون يحزنون اهله عليه و يتشعوط گلبهم على فراگـه

لِمتيني و أكلتي گلبي أكل و وصلت بيج المواصيل تشكين
لامج الشفية و دكليله يمكن الحادث أثر عليه و فقد رجولته ..
لان ما يوصلني و لا يباوع بخلقتي !!

نسيتي ...
من ابوج الگو.... جاي يرشحلي اسماء اطباء خاف بيه خلل !

احجيييي ...
انتِ هم أُم انتِ ... وينج وين الامومـة !
كل همج غرورج و ارضي انوثتج على حساب حزني و خسارتي
!!

عذراء :- مو وكت هذا الحجي و لا تخلط الامور ببعضها !

دفر الطبلة حيل و صرخ :- الااا وگتة .. انهزمتي و ما صحتلي
فرصة احاسبج !
خليهم يعرفون اي نوع من الامهات انتِ !!
و دموعج هاااي فات وكتها كلششش

عذراء :- ما اسمحلك تشكك بأمومتي ، اني تدّمرت و خسارتي
مو اقل من خسارتك الفرق حزني كظمته بگلبي ما دمرت
الحواليه..
ومن ردت ترجع علاقتنا .. لان ماردت اخسرك فوك ما خسرت
ابني ردت نرجع مثل الاول و نحافظ على انفسنا
و نخلف ولد لاخ ...

انت افتهمتني غلط و طول عمرك فاهمني غلطط
و ما تحاول تلكى المبرر لتصرفاتي تعرف لييش ؟

لان .. لان بعمرك ما حبيتني مثل ما اني حبيتك
انت فضلت الكل عليه حتى ابني !
اني جنت اخر اهتماماتك لذلك .. انسحبت من حياتك

تلومني لان عفتك بأسوأ ظروفك
اني جان باقيلي شعرة و انجن مثلك
نسيت روحك الظاهر شلون عيشتنا اسوأ فترة حرمتنا حتى
النوم ...
عجزنا شلون نعالجك و نطلعك من بؤسك !

اي اني انسحبت .. لان هاي مقدرتي و لا يكلف الله نفساً الا
وسعها ..

و انت .. انت و لا بادرت بالصلح و من ضغطت عليك
بخصوص الطلاق ردت اخبك و اضغط عليك حتى ترجعني و
تصالحني
بس الظاهر ركصتلها بـچفية ، و رأساً رميت عليه اليمين !

بـچت و دموعها تهلّ ..

استرسلت :- و اني مكلت شي و لا عارضت و لا زعجتك
بس مال اشوفك ماخذ ارملة اركان و ملفي ابنها بغرفة ابني ..
لا هنا مستحيل اسكت !

اني جايه اريد حكي منك !
حك ابني و حياتي و زواجي الي نهدم !

ادم :- هيييه الصمي عاااد !
اي حك مالج يمي زواجج انتِ هدمتيه ، حياتج ما شاء الله
تزهو بالسفر و الونسة اما حك ابني للموت اضل ادور چتاله
و بأيدي اطلع روحـه مثل ما سلب روح وليدي البريئة ..
ساعتها نتصافى و كلمن يلزم حده و مكانه

ديـن // جانت لحظات صعبة و جدال يوجع الگلب
متعرف المن تنطي الحق بس الي متأكده منه هو شعوري
بالخزي و الخجل و الذنب ..
اسأل نفسي شعندي هنا و بيا عين واكفة !!
و اني ارملة واحد قاتل و ام لطفل مطلوب ثار !

استداريت و ردت انهزم قبل لا يشوفوني و ارتطمت بحافة
الباب و عم السكوت ..
اكاد احس بالعيون الي اخترقت عمودي الفقري مثل السهام .
.
لَفيت و شفت نظراتها الناريـة و المليانه كراهية
اليه و بشرى و نور مو اقل منها.
عبالك صحت بيهم ثار قديم
و العلاقة بيني و بين نور و بشرى الي توها تحسنت رجعت
انهجمت ..

تلّبكت و معرفت شحجي ..

همست :- السلام عليكم ..

بس الحجية و نبيل رَدوا السلام
تقدم ادم و جذبني م

ن ايدي و بأبتسامة مُزيفة قدمني الها ..

ادم :- هذهِ دين مرتي

عذراء بنت خالي ..

مدري شلون طلعت مني :- هلا بيج

صرخت و عيونها تريد تنط من مكانها ...

-الله لا يهنيج ، امشي طلعي ابنج من غرفة ابني لا تشوفين
شي ما يسّر مني ..

ردت عاينت لادم بعيونها المشتعلة نار و تتبسم بسخرية :- و
آني أكول شنساك ثارك
حلوة و صغيرونه و عيونها سطرتك مووو !

ترك ايدي و جذب ايدها كاز على سنونه :- احترمي نفسج لج !
ترا هواي سكتت الج و عَديت ، حجاية لخ اكص لسانج
والله لوما بت خالي و دايسه بيتي جان عرفت شلون اتصرف
وياج

اتسعت عيونها بـصدمة تحاول تستوعب !

و اني من يمي بچيت همست و اني اجره و اتوسله يتركها ..

نفض ايدها حيل !
وهي تفرك بزندها متوجعة !

اخذ چف ايدي و طلع من الصالة ..

صاحت وراه :- ونبي اندمك ادم بسيطة !

اخذني لغرفتنا ..
دخلني و دخل وراي سد الباب يفرك بوجهه !
و يباوع الي بعيون حَزينة :- همس اني آسف
ولا ادري بيها تجي ..
انتِ بيا حال و تسمعين هالكلام الي يسّم البدن.

اقترب منه و قيدت جسمه بين ذراعي حطيت راسي على
صدره و شهكت و الكلمات تحشرجت ببلعومي !

احجي و اغص بالكلام :- اني الي اسفة ادم خليتك بهيج موقف
و اني ..
اني مزعلانه من حجيها تريد الصراحة هي حقها ، أُم و محترك
گلبها !

اني جملّت همومـك ، احس ما ارتاحيت من يوم الي خطت
رجلي بيتك !

ابعدني من حضنه و راح يعاين الي بنظرة سخرية !

همس :- اي بالله .. اشرحيلي شلون ما ارتاحيت اول ما خطت
رجلج ابيتي ؟

تهربت بعيوني و دَسيت شعري ورا اذني
خجلانه من مصايبي الي ما ينعدّن ..

دين :- يَعني .. مشاكلي و نفسيتي المهجومة
شهور و انتَ صابر عليه و اني مانعتك مني
خليتك بموقف صعب ما بيني و بين اختك !
مرض ابني الي ابتلشت بي
واخرها طليقتك ...

اخذ وجهي بين ايديـه و بحركة ابهامة مسح دمعة معلّكة
بطارف عيوني ..

همس :- ما اريد اسمع هذا الكلام منج بعد ..
أشر على گلبه و اردف :- هذا الي اول ما شافج تلعثم
حبج بكل صفاتج بكل مشاكلج بكل قسوتج عليه
حتى من تركتيني و مشيتي ويا اركان ، جربت احقد عليج و
اكرهج و اتوعدلج بالانتقام و ارسم بخيالي قصة شلون راح
اعذبج و اخذ ثاري منج و بنهاية قصة انتقامي الكاني مهووس
بيج ، اشتهيج بكل معانيج بكل ظلمج و ظلامج
و حتى من حرمتيني منج و من جفيتي و من صارحتيني
بجروحج لگيتني احبج ،بكل ذنوبج بكل ندوبج احبج

ما سامعه مظفر شنو يكول :-

ابتسمت بخضم دموعي و همست :- شنو يكول بله

ادم :- يا عذر ...
يمامش بمامش و أحبك

جتفت ايديني و صحت :- طلعت مامش بمامش انوب

حضني و همس يم اذني :- بَخيلة وياي والله ..
يمسّد على حواجبي بحنية جر حسرة و همس :- ااه يا ليل
البنفسج

ابتسمت و الدمعة نزلت على شفايفي :- قصدك يا حزن
البنفسج

ابتسم بمكر و همس بغزل جريء

ضربت صدره و ابتعدت :- كلاوجي و دايماً تنحرف عن مسار
نقاشنا و تدور غير شغلات ..

جر جف ايده و باسه ..
ادم :- نشاقى يابه ...

دين :- شراح تسوي بخصوص عذراء ؟

ادم :- شسووي يعني ؟!
هي اختارت طريقها و مشت بعييد قررت و اني ساندتها بس
گلتلها هالقرار ما منه رجعه
عليش جاية هسه و شتريد ؟!

دين :- ميخالف الي بينكم عشرة و صلة دم انزل راضيها و لا
تخشن خاطرها و احجيلها زواجنه شلون صار و شلون انت
نجبرت تاخذني بسبب تسواهن الله لاينطيها !

حك لحيته و ابتسم بمكر :- هاااه ، يعني اني اخذتج مجبور ؟!

دين :- خلينا نكول محروج من الحجية و ....

خطف خصري و لزكني بصدره يهمس بخفوت :- مو آدم الي
ينجبر !
زواجي منج الفرصة الثانية الماردت اضيعها !
باسني حيل و هدني مصدوومة !

ابتعدت التقط انفاسي و حجيت
:- بس انت جنت كئيب و ما راضي !

راح وكف على المراية يسرح شعره و يحجي ببرود :- لعد شلون
يابـه لزوم نبيع ثگل ع الحلوين ..

ابتسمت و بين ظلوعي صارت زَفـة ..
لكن سرعان ما اختفت ابتسامتي و غوركن عيوني من تذكرت
حالة سند ..

باوعلي و قرأ افكاري و عيوني ..

ادم :- ليش عيونج حزينة و غلاتج ما اعوفـه
باس راسي و اني سكتت ما اعرف بيش اجازيـه على وكفته و
دعمـه الي ..

لكن احس كومة من اليأس سطت على روحي ..
و مدري شلون حجيتها :- خاف يمووت و انفجرت بچي مغطية
وجهي ..

ضم راسي و همس بأصرار :- ما يموت انتِ بس تفائلي
اومأت راسي بأي ...
باس جبيني و وعدني ما يعوفه

رنَّ تلفونه قاطع حجينا ..

باوع بالشاشة و جاوب بلهفـة :- ها ابو الندامة ..
اي ؟!
يا الله لكفتوه ، و ربي انتو اسباع
لا ما اتعصب ، كول منو ؟
يااابه شيصيرني منا لمن اوصللكم !
كول اسمـه و فضها !
يعني متحجي نعلعلا شيب الخلفوك
جاااي مسافـة الطريق !
بأيدي اخذه لحد يجيسه .

توجه للكنتور اخذ سلاحه و تناوش قمصلته و غراضه و باسني
و مشى بسرعـة !
كمشت ذراعـة و صحت :- شصاير ؟!

-كمشناه ، الكو.... الي حرك المخازن !
راد يمشي جلبت بي !

دين :- بروح ابوك لا تودي نفسك للتهلكة خلي القانون ياخذ
مجراه !

ابتسم بسخرية :- و لا مرة نصفني القانون ، لا تخ

افين
اني بس اريد اعرف ليش سوه هيج و بكد خسارتي راح اخذ
حكي منه !

عافني و صحت وراه :- شنو راح تكتله ؟؟

مجاوب تركني بخضم ناري و مشى ...

معقولة يكتله ، لا ادم صح عصبي بس مو قاتل ...

سمعت بجي سند ركضت لغرفته حبيبي توه كاعد من النوم
اخذته بحضني العبه شويـة سكت و يعاين بوجهي ..
و اني شكد ما احاول اطرد فكرة مرضه و اقوي نفسي و اتفائل
الكه روحي رجعت للصفر و اليأس متملّكني
حضنته حيل و بلا شعور بجيت و اني احاجيه ..

وين اضمك من الموت ماما ؟
يصير ارجعك لرحمي ..
هذا العالم تغير و الناس مو خوش ..

لفتني صوتها ...

-بعدج ممجربة شعور الفقد و هيج تبچين !

التفتت و عيوني تجدح لـ الواكفـة و مرتچية على الباب
و على ملامحها ابتسامة مستفزة !

دين :- شعندج هنا ؟!

اقتربت مني و جتفت ايدينها
عذراء :- شعندي ؟!
هممم اي والله حقج تسألين وكت جايف الخلاج تتربعين
ببيتي ..

صفنت عليها كمحاولة ادرس شخصيتها ..
طويلة رشيقة بيضة بصفار شگره و عيونها جوزية صغار

ابتسمت بشفايفها الرفيعات و صاحت :- لازم مضيعة شي
بوجهي ست دين !

صفنت على سند و صاحت :- الله يشافيه !

عبست و بسري كلت شبسرعة عرفت !؟

عذراء :- عمتي بشرى گالتلي على مرضه .. طلع على نبيل
المكرود

ضميته لحضني اكثر و صحت :- الحمدلله على كل حال !

عذراء :- ايييه صدگ لو كالو الله ما يضرب بعود و كما تدين
تدان !

صعد الدم براسي و تعصّبت منها
زمجرت بوجهها :- شنوو قصدج ولج ، جاية تشمتين بجاهل لا
صوج و لا ذنب !
اني وله هو شنو سوينالج !!

ترى احنا هم ضحايا لـ اركان خاف متدرين !!

عذراء :- عههه خوش كلاو هذا مال ضحايا..
و اني هم ما دري شلوني واكفة احجي وياج
و انتِ مدري شلون الج نفس تاخذين ابن اخو رجلج !!

دارت جسمها دتطلع ...
صحت وراها :- نصيحة لا تحكمين على شي ما شفتيه او
عشتيه او جربتي شعوره ..

اطلعي من طور الضحية ... محد جبرج تتخلين عن حياتج ،
شمتوقعة ادم يضل يبچي على فراكج دهر !!

وكفت صامتـة لبرهـة بعدين لفت بأتجاهي
و بعيونها مكر و كيد عَظيم ..

همست :- زعطوطة شفهمج بالبيني و بين ادم
ولج لو اريد استرده عشرة منج ما يوكفون بوجهي
اكعدي عاقلة و لا تختبرين صبري والله اذا خليت عقلي وياج
ابچيج دم ، بس مستخطيتج لخاطر هالجاهل المريض ...

احجيلج الصراحة جنت مقهورة منج بس من سمعت بعدالة
ربي تحققت بيج استخطيتج
جري عدل و حطي رجليج بالكاع حبابة !

كالت كلامها الي مثل السم و طلعت ..
واني بسبب سند الي مزعوج و يحوص بحضني
ما نطيتها الجواب مناسب ..

اخذت ابني و نزلت جوه ، و لكيت الحبايب مسويات حزب و
يتهامسن و يتلامزن بالصالة عفتهن لان الهم الي بيه مو مال
اهتم لهيج سوالف دخلت عند الحجية
و احس بضياع عجيب ..

شرعت بأيديها و صاحت تعالي ..
ارتميت بحضنها و بديت ابچي و اشكي ضعفي
و خوفي من المجهول لكن سبحان الله بكم كلمة منها و آيات
قرآنية عن الصبر و عن المؤمن و ما يتعرض له من ابتلاءات
خلّت الامل يرجع يدبّ بيه ..

للمغرب و بعد ما يأست عذراء من جيـة ادم ، ترخصت و
رجعت لبيتها .. و گلبي حاس راح تكثر جياتها ..
لاسيما و عمتي و نور مسانداتها و وياها ..

لكن اني مهتميت لوجودها اعرف ادم يعشقني
و الي بينها و بينه انتهى..

واكفه اعزل بالمطبخ و فكري شارد يم ادم الي طلع و مدري
شجاي يسوي
و من اتذكر شكل السلاح بأيده يصيبني الرعب

اجـه صوتها من وراية ..

-كتلج و ارجع اعيدها معروفة نهاية هالزواج انسحبي قبل لا
ينكسر خاطرج !

باوعتلها بنص التفاته :- لا تشيلين هم خاطري و اكول لو
تفكرين
بخاطر ابنج من ينكسر و هويسمع امـه شلون تفكر تهجم بيته
!

اعتلت وجهها ابتسامة واثقة و مستفزة :- اهجم بيته !!
هو وينه بيته ؟؟
من جابج علينا انهجم بيته احترك حلاله و تشعوط و هسه
مشلول حاله ويه ابنج خاف عايز هو ..

ادم الي جان مال و النخل حَمّال صفى بليلة ويوم بخساره
هالكدها
شغل و تعب سنين راح بغمضة عين من وراج يم كصة الفكر !

اقتربت مني و عيونها تجدح لزمت ذراعي حيل و هددت :-
اسمعي لج
وخري عند دربه ، عذراء رجعت و بعدها تحبه عذراء زو.....

فطيم :- هدي ايد البت يبشيره لا اجي اكسّر العكازة على راسج
!

عاينت للحجية اعصابها ترجف وحلكها ناشف الظاهر سمعت
الحجي كله !

اجت وكفت گبالها و عيونها انترست شعيرات حُمر من
العصبية !

شالت سبابتها بوجه بشرى و حذرت :- اسمعيني بشيره ،
عوفي البنية بحالها هالنوبة راح افوتها الج خاطر ذاك الرجال
الي يتلاكح من الصبح لليل خاطر حلوكجن الجايفة انت و بنتج
المسيميمة !
نوبة الثانية اخليجن بحلكه و ياويلجن منه كل دروبچن عندي
و اعرف وين تخمن من صبح لليل و ساكته الچن بمزاجي ..

اتقي شري بنت مهيدي ابو الزفر !

بشرى :- تهينيني عمة گبال چنتي !

فطيم :- وانعل سلفة سلفاج لو فكرتي تهجمين بيت ابنج
يله ولي من خلقتي لا بارك الله بيج ...

حملت نفسها بشرى و شردت من المطبخ
و اني بسرعة دخلت بحضن الحجية بوستها براسها و ايديها
و دعيت الله يحفظها ا

ليه ..

فطيم :- بسّج لا تبچين و سمعيني عدل !
خلي بالج من رجلج و ابعدي عن ذني الحيايا شكد ما تكدرين

دين :- احس نور صارت احسن وياي
بس اليوم من شافت عذراء حسيت وجهها انگلب !

ابتسمت الحجية بمرارة و صاحت :- و عيونج مابيهن شريفة و
لو ما اني صاكرتهن يلعبن على ستة و ستين حبل !

روحي يمه لغرفتج و عينج من نفسج و ابنح ..

دين :- صار حبيبتي ، تصبحين على خير .

رحت و ابالي الف حسبه وره كلام الحجية هي ليش هيج
حذرتني
اكيد سامعة لو شايفة شي و سالفة تجر سالفة اسولفها
بعقلي محسيت الا حل منتصف الليل و الكل نام بقيت اني
مساهرة ومنتظره جيته هاي اول مرة يتأخر لهيج وقت
ابد ممسويها و شكد حاولت اتصل بي يرفض مكالماتي و
يجيني الرد الآلي :— اسف لا استطيع الاجابة الان و من
ضوجتي ارسلتله :-لعد شوكت تستطيع !

هم ماكو رد منـه !

ويا ما بدأت اغفي شفته اجه ..
لكن مجانت حالته تسّر ، ملابسة و وَجهه عبالك غاط بنص
التراب ..
مفاصل ايديـه مجرحة و وجهه تعبان !

سلّم بتعب و راح متوجه للحمام ..

تساءلت :- وين جنت حبيبي و شنو هاي حالتك ؟!

يحجي نكضان من التعب :- بعدين دين مو هسه نسولف
حضريلي الحمام فدوة ..

مشيت بلا ما اجادل و افكر معقولة رجع يلعب لعبته !
زين ليش هيج ايديـه مدّماية معقولة متعارك !؟

ضلّيت انتظر و آكل بأصابيعي حسبـة تجيبني و حسبة توديني
اول مرة اشوفه هيج احسة مكسّور تعبان ضايع ..
لهناك و طلع من الحمام و عيونه بالفراغ سارح يفكر ..
اجـه مدد بصفي و يجر حسرات و تنهيدات ..

كعدت بجانبه و همست :- ما راح تحجيلي شبيك ؟

-تعبان دِين .. تعبان من هالدنيا الغدارة ..
-شنو الصاير احجيلي .. كلتلي الصبح لكيتو الي حرك المخازن

-هممم لگيناه ..

-اي و شسويت ... ادم ليش ساكت عفية لاتخوفني !

-شسويت يعني ، طلعت ضيم گلبي بي هالنغل !

-و تالي ؟ وين راح هسة ؟

-بعده محجوز عندي .. لازم اراجع حساباتي من البداية .. احسّ
صرت قريب من ثاري دين
بس لازم اتأكد من شغلة ساعتها بس الله العالم
شلون راح اتفنن بكتلته !

ضربت صدري و همست :- شدتفكر رحمة لموتاك !
ترى گلبي ورم من النوايب انتَ ليش ما تسلمة للقضاء
يشوف شغله وياه ترى احنا مو بغابة ادم و انت وراك ناس
يحبوك و محتاجيك ...

باوعلي بعيون تلمع :- تحبيني دِين !؟

حطيت راسي على صَدره و دموعي جاوبت گبل لساني ..

-مو بس احبك .. اموت بيك
لو تدري من شوكت ادور عليك ..
چم قطار و چم محطه دورت بيها

و هسه من لگيتك تريد تعوفني و ترمي نفسك بوسط النار ..

باس جبيني و ضمني حييل همس بتعب :- كل عقلج اعوفج
قدآحـة حياتي .

حضني و ليلتها ثنينا نمنا نكضانين من التعب و صكعات هذهِ
الدنيا المجاي ترفق بحال گلوبنا ..

مرت الايام و بلشت رحلة علاج سند و بكل روحة للدكتور
يصيبني اليأس و الاحباط عرضنا اوراقـه على لجنة طبيه و من
رحت و شفت الطوابير و الحالات المسجلة من سنين و ماكو
جواب انتهيت ..

هذا من غير المرض الي أصابني .. مرض اجهل ماهيته
ضعف بجسمي و شهيتي انقطعت و كآبة فضيعة استحوذت
عليه ..
حتى ابني كطعت الامل من علاجـة و صرت اتقاعس من
مراجعات الدكتور و ابتلش بينا ادم
الي حاير ما بيني و بينه ..
صرت ما اطيق احد و لا احب اسولف ويه احد حتى الحجية
ماحب اكعد يمها و من اشوفها تسبح لو تقرأ قرآن اختنك ..
صلاتي قطعتها و الامل قطعته و حسيت خلص هذهِ نهاية
العالم ..

شكد حاولت الحجية تطلعني من حالتي
و حاول نبيل يزرع الابتسامة بوجهي
و حاول ادم يحتوي حزني و كآبتي لكن الجميع فشل
و انتصر عليه المرض و الوحدة و اليأس ..

هذا من غير الحرب النفسية الباردة الي اقامتها علية بشرى
بمساعدة نور و عذراء الي كثرت جياتها بآخر فترة بمناسبة و
بغير مناسبة ..
و من اشوف قيافتها و اناقتها و كأن جاية عرس اموت من
الغيرة
حتى حجابها الي تلبسه بس كدام نبيل من تشوف ادم تنزعـة
خلت دماغي يفتر و گلبي يتوجس منها .

حاجيت آدم اكثر من مرة يشوفلها صرفة لان وجودها صار
يأذيني و يضغط على راحتي ..
لكنه جان محرج يطردها لاسيما و هي باقيلها ايام وترجع للبلد
الاجت منه ..

علياء و دُنيا سمعوا بمرض سند و انهاروا من حزنهم بوقتها
لكنهم تقبلوا الوضع بعدين و فوضوا امرهم الى الله و الاطباء و
العلاج بعد رب العالمين
الا اني عجزت اتقبّل جنت منهارة و يائسة و اكثر من مرة اعاين
للمراية
و احاول ابحث عن دين القديمة عن روحها المقاتلة عن مرحها
و تقبلها بأسؤا الظروف
جنت مُقيدة باليأس و الحزن مخيم على گلبي ..

و بعيد ميلاده ر ميلادي الي صادفن نفس الشهر
ادم توسل بيه يسويلنا حفله او ياخذنا لمكان رفضت
وبدل ما افرح بميلاد ابني لازمت الفراش و الوحدة و الحزن

تسواهن و ايفان رادوا يجون يشوفون سند لكن ادم محرم
عليهم دوسة البيت اكتفوا باتصالاتهم و جيهان اكثر من مرة
عرضت عليه مبلغ مالي
و رفضت اما اخر اتصال من تسواهن جان كلش مؤذي بحقي
نعتتني بالفكر و الملعونـة و اي احد يخش حياتي يخسر عافيته
..

حملتني عبء مرض ابني و دعت عليه

بالموت و توعدتلي
بالجحيم
لو سند صار عليه شيء .

حياتي تدهورت كلش ، فقدت الامان فقدت الضحكة على
طول خايفة و مكتئبة و ممرتاحة ..

حتى علاقتي بـ آدم تدهورت و ما عدت اطيقه و لا اطيق
لطفـه صرت افسّر حبه و خوفه عليه مجرد شفقه و صرت
اتخيل هو بداخله فرحان لان ابني مريض و بهيج اخذ ثاره من
اركان ..

وبمرة جان مشتاكلي و حاول هواي يستميلني
و مثل كل مرة اقابله بالنهر و امنعه مني ..
تخبل و شال نفسه و دكها بالارض
و عزم يوكع على علّتي ..

ادم :- شبييج فهميني ، شرجعج لنقطة الصفر تونا كلنا يا الله
شبيج كلما اطخج تتخبلين

دين :- شنو الما بيه ادم ، ابني مر....

ادم:- لا تتحججين بأبنج ، ابنج المو داريه عنه
لج عايني لنفسج راح تنكطمين من الضعف
انت الي راح تموتين مو ابنج !!
شبيييج فهميني وين دين القوية وين دين الي اعرفها تقاتل
لحد النفس الاخير

لج انتِ مريتي بأسؤا الظروف مصار بيج الي جاي يصير هسه

لزمت راسي بثنين ايدية صامة اذني ماريد اسمع كلامه
و الحقائق الي جاي يواجهني بيها
اني نفسي ما اعرف وين نفسي و ليش هيج جاي يصير
حيلي كله راح و طاقتي استنزفت و حتى ابني مالي خلگه
مجاي اكدر اقدمله اي دعم غير دموعي و حسرتي ...

مستمر يحجي و اني انهاريت :- ياااازي لا تحجي راسي حينفجر
لزمت الدشداشة و طريتها وصلتين

صرخت :- هاك تفضل اخذ التريده اذا كل همك هاي الشغلة
بس لا تحجي بعددددد

اتسعت عيونه مصدوم مني و من حركة گلبه شال ايده و
ضربني كف !
خلا دمعتي تطفر من عيني.

لزمت صفحة وجهي مصدووومة و لا مرة سواها

صرخت :- تضربني ادم !

-واكسر راسج بعد ، لزم ذراعي و يخض بيها

كاز سنونه و عيونـة دم :- اني مو حيوووان و لا همني هاي
السالفة
لجج اني احبج و من حبي الج اشتاكلج

وين رحتي وين ؟؟؟
ارجعيلي بروح ابوج !
اني و ابنج محتاجيج

نفضت ايدي حييل :- كااافي تمثيل !
و لا تسوي روحك مهتم بأبني اكثر مني
يمكن بداخلك هسه زفة لان ابني راح يموت !

فتح عيونه بصدمة و ضربني كف لاخ حسيت بمرورة الدم
عرفت انشگت شفتي !

مسحت شفتي بظاهر ايدي و عفته و طلعت ..
مخذولة مصدومة ما اعرف شبيه و شنو اريد

رحت فرشت فراش بغرفـة سند و شلته من فراشه
اصابيعة زرك و شفايفة زرك ..

ضميته حيل و اشم بي و أبجي ..
و افكر بكلام ادم ..
كل كلمة كالها و اوجعتني صحيحة ..
اني ضايعه و ماعرف شريد
مقيدة و ما اكدر اسند نفسي
ولا جاي اخلي احد يسندني ..

تعبانه و بس اريد انام و اهرب من واقعي ...
نمت و الدموع مبلله مخدتي ..

ثاني يوم صبحت لگيت نفسي يمه هاي العادة ابد ميبطلها
ميخليني انام بره فراشه حتى لو كنا متمالخين يجيني و اني
نايمة يشيلني و ياخذني يمه يطوق خصري و يدفن راسه
بشعري يله ينام
انسحبت بهدوء و صرت اعاين اله نايم و عاكد النونـة ..

معصب ابن بشرى ، لزمت وجهي وارم من البچي و من صفعة
ادم ..
كمت عاينت لروحي بالمرآيـة مقهورة على نفسي و على ادم و
على ابني
ثلاثتنا مشفنا يوم حلو ..
بيومها ما نزلت ، خجلت انزل و يشوفوني بهذه الحالة ..
رحت كعدته من النوم و طلبت يوديني لاهلي ..
و هاي اول مرة بعد كل هالمدة يكون سبب روحتي لاهلي هو
زعل ما بيني و بينه ..

بالبداية رفض و اني أصريت ..
اعتذر مني و تهجمت عليه ..
احتد الجدال بيناتنا و على حسّنا صعدت الحجية ..
رادت تدخل بيناتنا و تكون محضر خير ، لكن لكيتني
اصيح و استفزهم ثنينهم ، بداخلي مقهورة من تصرفي بس
ماعندي ادنى سلطة على تصرفاتي

اتعصب و احسه راد ينفجر و يهجم الغرفة على راسي لان
داحجي ويه جديته هيج
بس هي حلفته بغلاتها عنده يتركنا لوحدنا و يروح ..

طلع و اني كاعدة على جمرة و ما اگدر اشيل عيني و اخليها
بعيونها
اهز برجلية بتوتر و هي صافنة عليه و كأن تدرس تصرفاتي و
تحلل شخصيتي الحاليـة .

باوعتلي بحزن و صاحت :- شبيج بنيتي شنو الغَيرج على نفسج
و علينا
جنتي مثل البلسم حتى من تتعصبين حسج ما يطلع
شجاج وين بنيتي الجانت مثل النسمة ...

ابتسمت و شلت عيني حطيتها بعينها و هي اتسعت عيونها و
جفلت چن شافت عفريت حسيت شفايفها تحجي بكلام مو
مفهوم ..

تهربت بعيوني عنها ابد ما اكدر اواجهها
اشتاقلها و اريد ادخل حضنها بس اكو شي يمنعني
هالشعور جاي ياكلني من الداخل و ينهش اوصالي ..

ضميت وجهي و بچيت اتوسلها
تخليني اروح لاهلي بس هاي الفترة

حولقت و استغفرت يائسة مني و طلعت مدري شحجت ويه
الواكف بره

دخل هو صاير بركان و صاح :- لمي غراضج اوديج
بس يا ويلج و سواد ليلج لو سمعت او لمحت احد شايفج
لو طالعه لمكان بغير علمي ...
ما اريد مخلوق يلمح خيالج بغيابي ..

اعرف قصده على بيت خالي الي طلعوا بحياتنا مدري منين ما
منين
اني بيا حال و هو يوصيني صدگ لو كالوا : الناس بالناس و
الكرعة تهلس بالراس

زمجر بوجهي :- شجاااي تدردمين !

دين :- ماكو شي !

اعاين الـه و قلبي يضرب ادري بروحي احبـه بس ليش ممتنعة
عنه
رغم عصبيته و غضبه مني عيونه هايمة بيه ..

خلي ابتعد .. لازم ابتعد و اكعد ويه نفسي و اشوف العلّة وين

يمكن مضغوطة يمكن تصرفات امه و اخته جاي تأثر عليه
و لان بطبعي كتومة و ما احب المشاكل و طول عمري اواجه
المواقف بوحدي
تأزمت حالتي ..
شكد صارت بيني و بين امه و اخته مواقف اني تصديت الها
ابد ما شكيتله او شكيت لاحد يوم ..
الشخص الي شاهد على سمهن وياية و حربهن النفسية هو
نبيل
الي لزمني اكثر من مرة و طلب مني ما اسكت الهن
او على القليلة ابلغ ادم بتصرفاتهن و شلون جاي يحاربني
و يسمعني كلام و يجيبن عذراء و يحطنها كبالي ..
لكني رفضت ادخل ادم بمعمعة نسوان
الي بي مكفي اساساً.

لميت اغراضي و الاشياء الي احتاجها و اخذني متوجهين لبيت
اهلي ..

طول الطريق ثنينا ساكتين بس حسراتنا تحجي ..
اعاين اله و الوم نفسي بسري شجاي يصير ويايه
مااكدر بدونه و لا اكدر وياه ...

و افكر هسه راح يعوفني و يحلالها الجو ست عذراء الي رجلها
اخذت علينا

نزل غراضي و نزلني و ما راح الا شافني دخلت للبيت ..
ارتميت بحضن دنيا الي نصدمت بحالتي
الضعف و الهالات السود المأطره عيوني ..

صرخت :- هاااي شبيج !

احجي و أغص بدموعي :- ما بيه .. لو اعرف البيه جان حجيت
هدتني و اخذت الولد مني و اني رحت اطلع ملابسنا و اصفط
ادويته على الكومدي

اعاين الها كبرانه و محلّوه رغم ضيم السادس
تسائلت عن علياء ، كالت يم امها الطبيب كايللهم هذه مواته

تصوري تريد تاخذنا وياها تشوفنا ..
بيبي و كأن جتها صحوة موت عرفت امي و تريد تشوفنا ..

زميت شفايفي و ما رديت ..

لزمت ايدي بترجي و كالت لخاطري خلي نروح نشوفها و ما
نكسر بماما

كلتلها افكر و اشور ادم بالاول ،

دنيا :- مصار هالادم حتى عالنفس تاخذين منه المشوره !!

دين :- مو لهدرجـه ادم ممقيدني و لا خانگني مثل ما انتِ
متصورة
بس هو غيور و بيت خالج طلعوا اول بارحه شتريدين اثرد
وياهم للعكس

طبيعي يغار و يستغرب منهم !
و ترى هاا ياسر عندج ابد مو راحة

عبست دنيا مستغربه ..

دين :- اي بصفته شنو يكولي بزونه هو رجلي ما يصحلي بزونه

دنيا :- شدعوة والله ظلمتوه ترى هو طبعه هيج يشاقى و
فرفوش خما مثل الناس عاكد النونه
ورافع حاجبه و محد عاجبـه عشتووو

بعدين تعاي سولفيلي شبيج شنو هاي حالتج كاشة بالغسل
شنو ما ينطونج اكل

لزمت راسي الصداع و الشقيقة و سوالف دنيا الماصخة

دين :- ولج والله ما اعرف شبية تدمرت من يوم الي سمعت
بمرض سند
كل الدنيا طلعت من عيني ..

بس الشي المو طايقته نفوري منهم
لا اكدر اتقبل ادم و لا اكدر اتقبل مرض سند و اداريه
كأنما اكو قوى منيعة ، حايط شكبره بيني و بينهم

هذيج المرة اتصلت ايفان و عرضت عليه تاخذ سند و تسفره
يتعالج بما انه ماعدها شي و حتى زياد طلكته .
لبرهة جيت اوافق على عرضها لولا ان ادم نبهني و رزلني ..

استوعبت بعدين اني شجاي اسوي
حتى لو ابني مريض اني اعالجه مو انطي لعمته الي تكرهني
و بيبته الي تتمنى تشرب من دمي ...

اما ادم ... ادم لوعة قلبي
من يبعد شوكي اله يموتني و من يقترب الفضه و انهره
يمكن اني تخبلّت و راح اخبل الزلمة وياي ...

صفنت دَنيا و ايدها على خدها تحاول تلكى فد تفسير لحالتي
..
و ثنينا عجزنا نلكى و كعدنا نعلق حزنا على شماعة الظروف ..

لهناك و رنّ تلفوني برقم غريب ..

استغربت و قلقت و شلته بثاني رنَّة ...

-الو شلونج ام سند

-الحمدلله منو ويايه ؟!

-انه ام رافد ناديـة ...

-اهااا هلاا ام رافد شلونج شلون الصحة ..

-شلوني بالضيم فدوة اغديلج جايتج بطلب مسألة حياة او
موت

دين :- يا ساتر كولي ام رافد خيرج ؟'
-لازم اشوفج خَية .. الحجي مو مال تلفون !

-ممم وين تشوفيني ،، اني ....

-وين مجان ابوس ايديج لازم اشوفج

-تمام اني يم اهلي هسه بمنطقة الـ......
ضلت تدعي و تتشكر مني ، سديته منها و اني مستغربه
شنو الي مسألة حياة او موت ؟

ساعة و سمعت دكة الباب و كل ظني هاي علياء رجعت

لكن تفاجئت بالواكفه بالباب نادية و بسري اكول شبسرعة
اجت

دعيتها تفوت و صحت ع دنيا تجيبلنه مي و جاي و تخلي بالها
من سند

اباوعلها ترجف مثل السعفة و تفرك ايد بأيد و بعيونها كومة
حجي

باوعتلها و حثيتها تحجي ...
و هي بدون لف و دوران دخلت بصلب الموضوع رأساً

نادية :- اني اليوم واكعة دخيله عندج ابخت الله و بختج رايده
وليدي منج

بعبوس رديت :- شنو وليدج ام رافد ، ممكن توضحين

بـچت و انتحبت ملچومة :- وليدي محجوز عند رجلج صارله
كومة
يعذب بي و يريده يعترف بشي ممسوي !؟

رجفت شفايفي و عصرت راسي اريد استوعب رافـد شوداه
على ادم

:- رجلج خطف ابني من فراشه .. على اساس هو الي حرك
حلاله
و ما انكر وليدي يجوز عماه الحقد على ابن عمه جيف ميخلي
يتصرف بحلاله
راح حرك المخازن بس وليدي مو قاتل اني ربيته على اديه
دجاجة ما ذابح
مو نوب جهالكم ...

من كالت هيج نهضت بسرعة من مكاني جن نار وَجت جواية .
.

اقتربت منها هي تبچي و تناشغ و اني اتذكرت مصيبتي و
دمعتي هلّت ..

حجيت و اني كازززة سنوني :- احجي بليه الغاااز
شنو كاتل جهالكم !!!

باوعتلي و عيونها منتهية من البچي ...
رجلج حاج

ز ابني و يعذب بي يريده يعترف
على ساس هو الي كتل صخر ابنه
و ضربج بالدراجة و موت ابنج .......

يتبع

#الفصل الواحد و الثلاثـون - سوف تظهر
الحقائق

ابكثر ما شرعت صدري .. اتنفسك ليلي ونهاري
مره انگطع ... مرة جاري ..
وآنه يا طولة خلك روحي شكثر .. صبر الصواري
جنت اشم جفي .. ابتفاطين الفجر .. من تنكطع
عالكاع وردة ...
وجان خيط الود .. كتر عندي .. وكتر عندك حبيبي
ومن ردت كربك ... لكيت الخيط سايب
ليش ..؟؟؟
يا تالي الحبايب ....
ليش ؟؟؟؟
ماكتلي اعله غفله .....
وضيعتني

لـ عريان السيد خلف

باوعتلي بعيونها الـ منتهية من البچي ...
رجلج حاجز ابني و يعذب بي يريده يعترف
على ساس هو الي كتل صخر ابنه
و ضربج بالدراجة و موت ابنج .......

احس كل خَلية بجسمي انتفضت و عيوني جُمرنّ من ذكرت
اسم ابني المات ...
ابني الي ما مات بالغلط و الي صار بي مو مجرد حادث !
ابني الي حرموني من شوفته و حرموا اخوه منه ...

جريت ايدها و زمجرت بعصبية :- اهدئي و فهميني السالفـة
من البدايـة !

شلّي علاقـة برافد ابنج
شنو على اساس هو الي ضربج بالدراجة !؟

لا تعاينين الي هيج انطقييييي !!

تباوعلي بنظرات مفزوعـة مثل الي جتها لحظة ادراك و عرفت
بروحها چفصت بالحقيقة و صعب بعد تتراجع عن السالفة ..

نادية :- مممادري ، مادري ، اسألي رجلج
رجلج حاجز ابني و موريه الويلاات ..

ابني جائر حرك مخازنه بس مو قاتل مووو قاتل !

دين:- و انتِ منين عرفتي برجلي حاجزة ؟!
منين عرفتي بهاي التفاصيل
شلون عرفتي الحادث مالتي مُدبر و عمداً لچ احجي !!!

باوعت لعيوني بنظرات حائرة ..
وهمست غاصّة بدموعها :- دين انتِ يجوز متدرين
بس انتِ عايشة بفقاعة چبيرة مليانه ريحة دم !

صدگيني ماكو شي يصير وياج صدفة
كله مُدبر و مخطط اله و فهمج كفاية !

اما شلون عرفت ..
ابو المثل يگول (( احنه گرية و كلمن يعرف أَخَيّة))
مثل ما اكو واحد قليل شرف باع ابني و فتن عليه يم رجلّج اكو
فاعل خير اجاني و كالي الحكي ابنج راح يموته ادم ..

نزلت يم رجلّي تتوسل :- ابخت الله و بختج واكعة دخيلة يمج
اني و الي رفع السماء بغير عمد ابني ما كاتله نملة
ابني شلته تسع شهور جوه بطني اعرف شبي و مابي
يشرب و يكبسل و يبوك بس ما يكتل ياناس والله ما يكتل

ضلّت تدك على راسها و تبچي ..
واني مصدومـة ضايعة اريد افسر الكلام اريد استوعب
فقرة انو خسرت جنيني بسبب حادث متعمد
يعني جان الهدف اموت و يموتون جهالي ابطني ...

لكن ربي نجاني لخاطر اعيش و اشوف هذا اليوم و اعرف ابني
ما مات هيج ، مات مقتول على يد وحوش بشرية

قرفصت بمستواها و رفعتها حتى توكف ..
اباوع لحالتها متحطمة .. عيونها طابة بنص وجهها من القهر و
الي يشوفها ينطيها اكبر من عمرها
شفايفها ترجف و اطرافها ترعش ..

اووف اركان چم ضحية تركتها وراك ..

حاوطت كتوفها و وعدتها احجي ويا ادم ..

نادية :- اروحلج فدوة دين ، انت مبينة خوش انسانة و انت هم
أُم و تحسين بلوعتي ..
هو بس هالشعرة عندي رَبيته بدموع العين
اذا خسّرته المن اعيش .. الموت اهون عندي من أذيتة

احجي ويه ابو صخر ان ثبت على رافد هو حارك حلاله فاني
مستعدة اعوض اي خسارة لو جان الثمن عمري
بس لا يلچمني بوليدي ...

طبطبت على كتفها و وعدتها راح احجي وياه و افتهم منه
راحت بعد ما فتت گلبي بتوسلاتها و بعد ما صحت بيه جرح
كوه خَيطته ..

و شلون خَيطته بعين عَمية و بخيط بطول الليالي الساهرتها ..
كل غرزة لضمت بيها دموع و حركة گلب
و وَدعت بسمات و مرح ما يرجعن بعد ..

و ما رجعن .. بس جرحي انفتك ..

راحت هي و تركتلي التساؤلات و حسبة تجيبني و حسبة
توديني ..
اني لشوكت امشي و اتعثر بعاكول الشكوك و گلبي يتملخ
بالعواسج !

خلي اعرف الحقيقة حتى اقيم الحد و اعيش حزني بما يليق ..

دخلت و قفلت بابي عليه صرت استحي حتى من نفسي
شكد بيه مصايب و طاقات سلبية

طلعت رقمـة و اسمه الاحب لقلبي
و راح فكري يعيدلي الليلة المُضت
و شلون شال ايده و ضربني و خلاه عيوني تبچي ..

ما اكدر الومـه و لا اكدر اعفو عنه !
رنّ و ما طول اجاني صوته ..

قداحتي ..

تلعثم گلبي لكن عقلي رافض ..

-القداح بده يجف بروحي !

ادم :- آني اسف والله .. و ادري المفروض اعتذر اول ما شلت
ايدي عليج بس خجلان من نفسي و محرج اخلي عيني بعينج
دين ..

جريت حسرة طويلة ..

اردفت :- هذا مو موضوعنا ، اريد اشوفك ادم

-شبساع اشتاكيتيلي يولي مصار كم ساعة من عفتج !

ضحكت بسخرية و قلدت صوته و كلامـة !

ادم :- اهاا هيج صارت !

-تعال اخذني ، الموضوع ضروري ..

-شصاير دين ؟

-مو مال تلفون هسه شگلت تمر عليه لو اجي بتكسي !؟

-حتى أأأ....... سكت و اردف بعدين :- بليل امرلج !

كعدت انتظر على نار ما بقى شي لليل ..
اكل بأصابيعي و أفكر شلون و منين ابدي الموضوع وياه

لهناك و اجت دنيا شايلة صينية الغدا

ابتسمت و صحت :- صايرة مرة يولي و تعرفين تركبين !

عوجت حلكها و صاحت :- غير راح اتزوج يا بعدي و المسعد

يريد كله اكل بيت ما يحب الاكل الجاهز
عود فرحت اخذتلي واحد مريش و كلت نخلصها كلها
بالمطاعم ثاري انضربت خوش بوري ...

ضحكت على سوالفها و الله دارسين مبين راح يمشيج
العجين و ما تلخبطينه ...

عبست و صاحت :- اسكتي اسكتي ع اساس الغثيث مالتج
شلونه عوزة بس يحطج بجامة و يكتب عليها للشوف فقط !

تنهدت بحزن و همست :- هو ما مانعني من الجية ، اني ماريد
اتصادم ويه علياء

لزمت چف ايدي بحركة سريعة و همست :- الله عليج شكو
بينج و بين امي ، دا احس ضامه شي چبير علية

هزيت راسي بـلا و بأرتباك همست :- ماكو شي !

دنيا :- لعد ليش مجافيتها يولي كبل جانت تكومج بكتلة و
تكعدج بكتله و ترجعين تحاجينها ...

فهميني بروح بابا شصاير ؟

دين :- ماكو شي لا تلحين خليني اتغده راح يأذن المغرب و
محاطة لكمه بحلكي ...

قلصت عيونها عليه مراضية و همست :- تغدي عيني مطرح
ما يسري يمري !!

بديت اكسر خبز و آكل من اول لگمتين اصابني غثيان ..
دفعت الصينية بخفة و همست شبعت !

صاحت بأمتعاض :- لج شنو سالفتج ، دتباعين لروحج لولا !
غادية هيكل عظمي بس عيونج تتلاكط
ادري سبع البرمبة مجاي يشوفج شلون متآكلة هيج !؟؟؟

احسّ من تجيب طاري هواي تهيج الشقيقة عليّة !
حجزت راسي بچفوف ايديـة و صرخت :- متألمة كااافي !
اسكتي !

اعاين الها برطمت و عيونها غوركن ..

اعتذرت :- آسفة حبيبتي مو قصدي اصيح عليج
والله مادري شبيه !!

اجهشت بالبچي و جن ردتها حجة اتقيأ كل احزاني ...
مخاوفي و مرضي ..

اجت حاوطتني بأيدتها و ضلت تواسيني ..
و احتارت بأمري أكثر مني ..

گمت غسلت و رحت ليم سند الي حالته كل مجالها تدهور
صاير ازرك و اطرافـة منتفخة و دايماً نايم بسبب العلاج و اذا
يكعد متنحس ..

احس روحي أم عاجزة حتى ادم احسن مني يداري و يعرف
شلون يحتوي مرضه ..

اندار قفل الباب و شرفت علياء اخيراً
و ثنينا انصدمنه بمنظر بعضنا
هي خلصانة و وجهها كبران و رايحة نكضانه من التعب
احس انقهرت عليها و تمنيت لو ظرفنا غير ظرف
لو حياتنا غير حياة لو ما سمعت و عرفت عن ماضيها يمكن
قصتنا جان اختلفت كأم و بنتها ..

تركت الي بين ايديها و ركضت جرتني دخلتني لحضنها
تشّم بيه بلهفة و تبوسني ..
ايدي مهدودة للاسفل و عجزت ابادلها الحضن ..

بـجت و صاحت :- مشتاقتلج يولي ولج شنو من گلب شايلي
هلكد مجافيتنا و لج گلبي طگ على شوفتج و شوفة ابنج ليش
مَخليتنا نجي نشوفه ليييش

شلت ايدي بتردد و مسحت على ظهرها بخفة ..
افترقنا و تلاكت عيونا امي الي بيوم من الايام جانت حسناء
بسمارها و عيونها الوسيعة و الرمش الطويل ..
امي بشعرها ابني السرح الي يدغدغ كتوفها ...
وينها ....

العيون متخبيات بنص الجلد المُجعد و الزمن علّم على
خدودها و رسم يم الشفايف شوارع من حزن .. فقد و وحده !

و الشعر ما ضل منه سوى كمشة من الخراب الابيض بلون
السحاب الحزين ...

امي ... اخذت نصيبها من الحياة و انزل بيها الزمن عقابـه حتى
انه وضع ختمه عليها ..

احس تباطئت نبضات قلبي و رَجلية ضعفن من شفت حالتها
...

هي صفنت بوجهي لبرهة و صاحت :- هاااي شصاير بيج يوم ؟
ليش هشكل حالج شنو ما تاكلين ؟؟

تهربت بعيوني و كفيت شعري مرتبكة :- مو مسألة اكل
مرض سند هدّني هد !

اخذت بأيدي و جَرتني كعدتني بسدها ..
صاحت على دُنيا تناوشها كلاص ماي ..
التفتت الي و همست :- احسّ بيج شي يفوق المرض
وجهج عبالك مرشوش عليه تراب ميت ...
خلي يجي رجلج و عندي حجي وياه !

زفرت انفاسي و صحت :- شدخل المكرود بحالتي
فوك ما مبتلي بيه و بأبني !

تناوشت الكلاص من دَنيا و جرته جرة وحدة مسحت بقايا
المي من زوايا شفايفها و اردفت :- مبتلي بيج !؟

ترى هذا واجبه .. مو منية منه
بس معقولة ما عاين لحالتج هاي يوم انتِ شايفة شكلج
شايفه ضعفج لو يسولفولج ...

دين :- اتركينا من هذا الكلام كوليلي شلونها امج

دَمعت عيونها بثانية و بلعت ريكها مستصعبة دكولها ..
علياء :- امي مواته ..
اوووف مستعدة انطيها عُمري بس ترجعلي ..
اوف يمـة عسا يومي قبل يومج

كالتها و انفجرت بچي .. غطت وجها بجفوف ايديها
جريت صفحتها لحضني خلت راسها على چتفي الضئيل و
بقت تناشغ لحد ما ذبت حزنها كله على چتفي...

عدلت نفسها و كفكفت دموعها ..

كالت :- اروح اشوف سند طاك گلبي على شوفته ..

راحت لغرفة دنيا و تبعتها ..
ارتچيت ع الباب و اعاين الها شالته لچتفها و تبوس بي
فتح عيونه مزعوج مشبعان نوم

ضلت تشمشم بي :- اروح فدوة و نذر للخريزات الزرك !

شهكت و بچيت :- هذهِ جملة بابا جان يكولها الي ..

اروح فدوة و نذر للخريزات الزرك ..

غصيت بدموعي و انهزمت للحمام و هناك اطلقت العنان
لدموعي ..

كملت و غسلت وجهي صفنت بالمراية و لاول مرة الاحظ
اني مو اني ..
شغيرني هيج شحطم عزيمتي ..

رجعت للصالة و خذتنا السوالف و احس رغم شرود ذهني
تونست و غيرت جو بسوالف دنيا و مداهرتها لامي

امي ترجتني نروح اني و دنيا وياها نشوف امها
و اني ما عارضت بس كلت اشور ادم ..

و حجينا على موعد حفلة المهر مال دنيا و

التحضيرات
و هي كالت تأجل الموضوع هسه لبعد الامتحانات

تعجبني عقليتها تفكر بمستقبلها قبل كل شي
و عازمة تجيب معدل عالي و تفرحني ..

لهناك و وصل ادم ..
سلم على امي و دَنيا و لزمنه ثنينهن يعاتبنه
شلون حالتي هيج و ضعفي هيج
و امي دكله نطيتها الك مثل التفاحة اعتب عليك تجيبها بهذهِ
الحالة ..
و اني خلصتها اغمز و اعض شفة ..
ميفيد وحدة ترفع و الثانية تكبس ..

الي حَبيته بـادم تقبل كلامهن و عتبهن بكل روح رياضية
و وعدهن راح يوديني لدكتور و يسويلي فحوصات شاملة
ابتسمت و ما استغربت لطفة واخلاقـة حتى من يتعصب ما
يبين عليه ..

اخذنا و طلعنا و الطريق كله حاول يفتح موضوع وياي
و حاول يعرف اني ليش دزيت عليه
اكتفيت بالصمت و هو هم سكت ..

وصلنا لبيتهم و أَحس ثگل جثم على صدري و انفاسي
تسارعت كأنما فايته لمنصة اعدامي ...

تنهدت و فتت متهربة و متوجهة لغرفتي ..
خايفة لا اشوف احد و انجبر اسلم عليه
حتى الحجية الي جنت ما اكدر بدون ما اجالسها و اسمع
سوالفها صرت اتجنب شوفتها و كلامها ..
صعدت لغرفتنا الي اصبحت جحيم لا يُطاق بالنسبة اليه ..

وكف امامي و اعاين اله و اعجز عن تفسير شعوري اريده و ما
اكدر اتدنى منه

جتف ايدينه و صاح بنفاذ صبر:- احجي دين شنو الموضوع الي
تريدين تحجين بي

بلا مقدمات گتله :- رافد وين ادم ؟

فلت وجهه و نزل ايديه متفاجئ بسؤالي ..

اقترب و عيونه تتجادح :- ليش تسألين ؟

همست :- يعني يمك !؟

-اااي يمي

-شعنده يمك ادم ؟ ليش حاجزة و تعذب بي شنو شغل
العصابات هذا

اتسعت عيونه و صرخ :- شششش لا تدخلين !

-شلووون ما ادخل اني مرتك لو خراعة خضرة !

حجـه كاز على اسنانه :- مرررتي المفروض تعرفني مو اني الي
ينكاله عصابجي ست دين

عافني و ندار يبدل ملابسة !!
يتحرك و افتر وراه ..
-شتفسر خطفك اله .. ايام و هو يمك تعذب بي و ما تطلق
صراحة
ويين عايششن احنه لخاطر الله !
رجع الولد لامـه

اندار عليه و حاوط اكتافي بقوووة و يصرخ :- عايشن بغابة احنا
ست دين
خاف متعرفين و هذا الكو.... مجرم و ما ارجعه لامه الا و هو
زايع كل الحقيقة

عبس بوجهي برهة و صاح :- انتِ شدراج ؟

-امه اجت تتوسلني ! امانة ادم مو هيج تنحل الامور ..

كعد على طرف السرير ينافخ و يفرك بصدره :- هذا النغل حرك
گلبي بمالي
و مو بعيد هو الضربج من جنتي حامل !

قرفصت يم رجليه و همست :- اترجاك ادم لا تزرع بعقلي ابني
مات مغدور
و رافد ترا جاهل ..

دفعني و كام يراوح بالغرفة من حركة گلبه :- موو جاهل موو
جاهل
اكبر نغل هذا راضع ويه ابليس يشرب و يكبسل و يبوك كلشي
اتوقع منه

اني ما اهده الا يوصلني للي اريده و مباقي شي و يعترف !

اجه اقترب مني و لزم وَجهي يحجي وياي و محاجره مغوركة :-
صدكيني
احساسي يكلي يعرف شي هسه كمت اربط الامور بعضها
ليش رافد جان يراقبني و ليش دخل بلعبتنا و كعد يلعب وياي
و عينه بعيني
ما يكولي اني ابن عمك !!

ابتعد و انفاسه تسارعت .. و الله و جلالة الله اذا طلع اله ايد
بضربتج
لو اله ايد بكتلة ابني لا ادفنه عدل و ما يرفلي جفن !!

انتهى النقاش بيناتنا بدون ما نتوصل لنتيجة ..
حملت اغراضي و ناوية انام يم ابني

لكن ايديه الي خطفتني الها رأي اخر
يهمس و انفاسه تضرب شحمة اذني

-وييين رايحة

تقلصت داخل ايده كمحاولة احرر نفسي ..

صحت :- اتركني ما اكدر ابات وياك بنفس المكان
بعدني ممسامحتك على مدت ايدك عليه ..

فرني بأتجاهه و باس راسي

ادم :- اسف اسف حبيبتي والله مو قصدي
بس انتِ تعبتيني اباوع عليج تتضائلين مثل الشمعة و مجاي
اعرف العلّة
تعرفين اني جاي اسوي المستحيل حتى اسعدج لكن داشوف
العكس
استفحل عليج اليأس و انزويتي بنفسج بعيد عني ..

ليش .. ليشش ياحياتي ..

ضعفت امام كلامـه و لكيتني بلا شعور ادخل بحضنه

ابجي و اغص بكلامي :- ادددم اني ما دري شبيه
احس راح اموت مسطورة و عقلي شارد و اي طاقة ماعندي

لزم وجهي و صفن عليه بعبوس يحاول يحلل الي داعيشه

ادم :- شبييج ياروحي ! اخلي جده ترقيج

جفلت و اندفعت بنفسي بعييد عنه ..

صحت :- لاااا جثيت على ركبي و هاجت الشقيقة عليه

صرخت حابسه راسي بين جفوف ايديه :- راااسي راااسي راح
اموت ....

اجه قرفص مقابيلي حاير بيه ميدري شنو يسويلي ..

احس مثل المطرقه تدك براسي ..
انعدمت الرؤية و غشاوة طفت عيني ..

لحظات و احس اصوات داير مدايري
اصوات اعرفها بس مجاي اكدر افرزنها ..

اسمع صوت مرأة دكول :- مرتك مسحورة ..

بعدها نمت .....

في مكانٍ قريب ...

ادم :- جدة الله سايم الله عليج شلون انسحرت و اني بس
عوزي اسجنها
مرتي لا طالعة و لا طابة و لا شايفة بشر شلون انسحرررت
لا اني باجر اوديها للدكتور و اريد اوكع على علّتها

فطيم :- اسمع كلامي مرتك ما تشكي من علّة ضربوها بروحها
و مرضوا عقلها ..
الا اكلك اني شفت ..

ادم :- اشفتي جدة سولفيلي بروح ابوج !

فطيم:- من صدّت عينها بعيني ذاك اليوم ما شفت دِين

ادم :- ما فهمت جده ؟!

-شفت ظلام و ظلم و شر ارتسم على وجهها ، لذلك كتلك
وديها

يمكن لو ضالّة شويه بعد جان صارت كارثة
وهسه انت جبتها و شوفة عينك وكعت بين ايديك و تصيح
من راسها !

لزم راسه يحاول يستوعب كلام جديته
صرخ :- منو ساحرها ... منو شايفها اصلاا

باوعتلة جديته بأسف و بداخلها تعرف الاجوبة لكن تريد تتأكد
بالاول قبل لا تظلم حظها و بختها

صاحت بعزم :- مرتك نظيفة ؟!

ادم :- هااه ؟

-وصلتها جدة ؟

دنك راسه محرج -لا منين ما شفتي حالتها من مدة هي هيج و
احنا كل واحد بوادي ..

فطيم :- شيلها و نومها بأتجاه القبله ..
و انزل جيبلي كاسة الخلاص و ماي زمزم من البوفيـة مالتي ..

صفن و هو يتذكر شكل كاسة الخلاص المصنوعة من الفضة
و المنقوش عليها آيات قرآنية بضمنها آية الكرسي والي يامه
جدته اطعمته منها لمن جان روحة ملچومة و گلبه محترك .

شمر سواعده و شالها و نومها بـاتجاه القبله و نزل يجيب الي
طلبته جديته ..

شالت راسها و خلّته بحضنه و ضلّت تردد آيات من القرآن
الكريم
حتى سمعت أنين يخرج من حلكها ..

عقدت حواجبها و كأنها تتألم ، انكمش جسدها الضئيل جوه
ايدين الحجية
دخل ادم و ساعد جديته .. ثبتها حتى لا تفالت من بين ايدهم
و بدأت تنطيها الرقية و تشربها من الماء المقري عليه بكاسة
الخلاص ..

تسارعت انفاسها و كأنها تركض بداخل حلبة سباق و
انكمشت ملامح وجهها
مصبوغه باللون الاحمر ..
ضلت تصارع و تفالت بين ايديهم حتى استكانت و ارتخت
عضلاتها و نامت أخيراً

تنهدت الحجية بأسف و گلبها يضرب بقوة ، فهي تعرف تماماً
علامات السحر
سبق و ان عانت من نفس البلاء ..

جلس ادم يعاين الها بحيرة و الدموع تلالي بعيونـه ..

همس بتعب :- شوكت نخلصص ، وين اخليها و احميها من
شرهم !

باوع لجديته و استنجد بمعرفتها :- فهميني جده ، شلون
سحروهااا

ااخ تسواهن خل الزمج الا اشلخج وصلتين ...

فطيم :- استغفر الله وليدي ، اذكر الله و كوم شيلها حطها
بفراشها
هسه هي ارتاحت بس ما طابت ، لازم نضل نرقيها و نزورها
ونشوف شلون سحرنها الما يخافن من الله ...

شالها مثل الجاهل بين ايديه طاير نص وزنها ما بيها 40 كيلو
نايمة و الحواجب معقودة ، يعاينون الها بأسف
وين راحت ذيج الجنها تفاحة من حلاتها ...

تحسبت الحجية و عزمت تراقب وضعها و ما تخليها تصير
ضحية جديدة
لتسواهن !
ضربت الارض بعكازها و اقسمت ما تنطي بنية لخ لبراثنها

ديــن//

فتحت عيوني بالگوه احس جفوني وارمة و رموشي ملزگه
بدمعها ..
استندت بكوعي احاول اكوم لكيتني مثبته بين ذراعيه ..
لفيت جسمي ناحيته نايم و مبين نومته ممرتاحـة ..

بقيت اعاين اله فترة و افكر هالرجال تمرمر حاله من يوم
دخلت لحياته ..
غوركن عيوني و تمنيت لو بساعتها ما شايفه الحجية و لا
حابتني و لا مقهورة عليه
لولا مساعدتها و واسطتها الي يم ادم جان ما دور عليه و لا
شغلني عنده و لا صار الي صار
شذنبه هالرجال يبتلش بمرة مسطورة بالنوايب و ولد عليل !

حرك وجهه بأنزعاج و بعد شاد قبضته على خصري !

ابتسمت يمكن عباله راح اطير ..

حسيت بشوك فضيع اله رغم السد المنيع الي اجهله بيني
وبينه ..

اخذتني نفسي لعند خَده و رحت اطبع بوسه خَفيفه على
غمازته !

فتح عينـه حيل و كمشني يمكن فَز !

همست :- اسم الله ها آني ...

ابتسمت شفايفة و برقت عيونه رغم النعاس المحاوط اهدابـه
!

-مشتاكلج يا عذابي !

زميت شفايفي مرتبكة من القرب مابيني و بينه !

عذابك !!! هممم دوخر ايدك اريد اكوم
و على فكرة بعدني زعلانه عليك !
و ما ناسية مدّت ايدك عليـة

ردت اوخر ثبتني فوگ صدره و باس جبيني

-اسف للمرة المليووون ، عسا ايدي بالكسر قبل لا تجيسج !

حطيت ايدي على حلكه و همست :- اششش اسم الله عليك

-لا مو اسم الله دامني أذيتج و خليتج تزعلين عليه

-كااافي لا تحجي على نفسك ما اقبل !

-يعني رضيتي عليه هسه !

-هممم تؤ!

-لعد و البوسه قبل شوية و شفايفج طمسن بنص وجهي !

-ضربت حلكي و همست :- شكد شلايتي ! تسوي روحك نايم

قهقه بضحكة خشنه و اردف :- و عيونج جنت نايم بس بوستج
تفزز الميت و ترجع بي الشعور

باوعتلـه بنظرة طويلة ..

همس بصوت شجي :- جفنك جنح فراشة غض !
و حجارة جفني و ما غُمض ...
يل تمشي بيه ويه النبض

همست اني و كملتها :- روحي على روحك تنسحن !

و تلاكت ارواحنا و اندمجت مشاعرنا سويه بعد ليالي عجاف
جنت بيها مُغيبة
عن عالمي و يمكن مازلت مغيبة و متحطمة لكن الشوق ما
بيناتنا كان أكبر من كل شيء

::

مرت الايـام و آدم بقى مصر على موقفه من ناحية رافد رافض
رفض قطعي
يطلق سراحه و نادية متكدر تشتكي يم الشرطة لان ثبت انو
فعلاً ابنها حارك المخازن
و هالشي يوديه بتهمه سودة و ضالّة مثل الوحدة بالعتلها
موس ..

اما حالتي الصحية انهارت و النفسية كذلك و ابني ..
ابني الشوكة الي نغرست بلبة قلبي لا بيه اداريه لا بيه انطيه
لعمته الي حاولت وياي اكثر من مرة
تاخذه هي تداريه و تتكفل بعلاجـه !

لكن ادم يرفض رفض قطعي و الشاهد الله مقصر من عنده
يهتم بي و يراجع بي
و لا يفوتله موعد و كذلك صار يراجع بيه عند اطباء الباطنية ما
لكو عند