اب ..

عموماً آني تأخرت و لازم اروح ..

صاحت وراي :- روحي بس معليه بأي شي يصير وياج
بعد !

عفتها و كملت بطريقي ، داومت و الامور ماشيـة طبيعي و دا
احاول اكسب رضاهم و الشاهد الله هم
كلش خلوقين و متعاونين و فرحني المدير اذا بقيت على هذا
المنوال اترقى لمكانـة افضل و يضموني بالمشروع الجاي ..

مشى وقت الدوام ما بين الشغل و السوالف و الصفنات الي
تودي و تجيب وياي ..
و اعراض الحمل الي بدت تظهر علية الغثيان و الدوخـة و
التحسس من اي عطر و اشتياقي لادم !

الي اعرفـه المرأة بنساوتها تصير ما تطيق رجلها
اني شبيـه متدوهنة عليه و اريد بس كون اشوفـه !

رحت كالعادة ادور بصفحتة الشخصية الي شبه مهجوره وين
وين ينشر بيها لو يشارك ..
و صدمني من لگيته ناشر مقطع شعري لمظفر النواب

بسّنچ .. بسچ يا روحي
وهمانه وما مش من رده
تظلين حبيبه عل السده
تظلّين تـگلبين عيونچ
بالعبّاره وباليتعده
وقداحچ يتناثر منچ
والليله طويله ومطّاره
هونچ .. هونچ
كلش هونچ
للشامت يضحك مشواره
وللمامش يضحك مشواره...

دمعت عيوني لا اراديـاً و همست :- ما عاش الي يشمَت بيك
ابو صخر !

انكسر واهسي بالزايد و تفاقمت حالة الكآبة عندي
لملمت غراضي و طلعت ..
عيني على الطريق و افكر بمصيرنا ..
آني احبـه ليش اجذب و ليش اكابر
حبي الـه اكبر من كل المسميات و اكبر من كل العوارض..
و ادري من اول يوم اخذته هو سند اهلـه الوحيد
من بعد ما مات ابوه ، اكيد هسه نويرتها و بشيرتها و وياهم
عذيرة الصفرة مشمتات بي جيف عفته !

شسوي ياربي والله صعبـة ارجع اكابلهن و اكعد !
نوب الى متى اضل خافيـة حملي عليه
لازم يعرف هذا اقل شي ممكن اقدمـه بعد كل التعب الي
تعبه بحياته و بعد خسارته ذيج النوبـة
خلص قررت احجيلة .. بالنهاية هو ابوه و لازم يعرف
بغض النظر عن الصراعات الي بيني و بينـه !

وصلت لبيتنا و دفعت الكروة للرجال و توكل ..
نزلت اخوط برجلي خوط و الدنيا طالعـة من عيني

قبل لا افوت اجاني حسـة

هلو دين ...

باوعت و سقط فچي من الصدمـة صحت :- شجابك هنا ؟

(((في مكانٍ آخر )))

فطيم :- لشوكت يا جده تضل متعلعل هيج
وديني الها خل اسولف وياها و اطيب خاطرها من جديد ..

آدم :- عوفيها جَده ، مالومها لو احترك گلبها من امي و نور ..
بس لحد هاي اللحظة ممستوعب شلون كدرت تفاركني هيج
!
كل يوم اكول اليوم تتصل و دكلي مشتاقتلك
تعال و خلي ننهي الزعل .. بس لااا شلون تكسر كبريائها ام
عيـون !

ابتسمت الجده على حالة حفيدها و شلون الشوك لاعب بي
فلك !

فطيم :- عوينت ابوي ، شصاير بيك ولك وديني الها خل
اخبزها بالعكازة بلچن عقلها يرجع براسها

ضحك و صاح :- تضربيها جده ، هي هاي تنضرب
و نوب لو تشوفينها شصايره .. اوووف
لشوكت اضل كاظم بگلبي تطب و تطلع على اعصابي
على ساعـة انجلط من وراها و علي

فطيم :- انت هم مادري شلونك ، مرتك هاي
عايفها كل هالمدة و واهمها بالطلاك هي شمدريها
تشتم كفه ايديها كل ظنها هسه هي مو على ذمتك
يا خوفي ...

عقد حواجبـه و همس بخيفه :- ياخوفج شنوو جده ؟!

-لا هيج ، بس الناس تدري بيها مطلـكة و نوبه تفوت و تطلع
براحتها .. وهي حديثـة و حلوة اخافن ....

وكف على حيلة تتراجف اوصالـه :- شجاي تحجين جده ، غير
ابزز عيونهم و علي ..
انه تركتها ترتاح و لخاطر كبريائها كتلها وهمتها بالطلاق و انتِ
تدرين و امها تدري !

فطيم :- و هاي الخوثه شلون عبرت عليها انت ممطلكها شرعاً
و لا رميت عليها اليمين .

ادم :- هسه شنو جده لا تسودنيني ..
يعني مرتي تطب و تطلع
و على يا ساعة تجيها قسمة ...

لوت شفايفها و همست بخبث :- چا مادكول لروحك
روح جيب مرتك و تعال و بطل سوالف اللعب
تره الي تغيب مخدته تروح معزته يا جده !

باوعلها بعيون مصدومة صار قبضة ايديـه ..
طلع بلا ما ينبس بكلمـة ..

و ضحكت الجده عليـه و عالطريقة الي خلت گلبه يطرد من
الخوف على مرته و يروح يرجعها و هو الممنون.

دين //

اتلفت يمنى و يسرى و اخاف احد من الجيران يشوفنا

احجي كازه على سنوني ولگ شجابك هناية انت تريد تخزيني
!؟

زيـاد :- كتلج عندي موضوع مهم وياج
حضرتيني و كلما ادك عليج من رقم تحضري
فهميني شلون اوصلّج ؟!

ديـن:- و اني گتلك مفارغـة لسوالفك ، بعدين انتَ ما تخجل
بعد كل الصار مجلبلي و تدور كلام وياي بالخفاء

زيـاد :- و ليش اخجل ؟
ممسوي شي غلط اني و لا تنسين بيناتنا قرابـة
و انتِ هسه سنگل يعني وين المشكلة لو حاجيتج

ديـن :- سنكل !
سنكلو روحك ان شاء الله ، يا قرابـه هاي ايفان و طگتلك
سفن و اني قطعت علاقتي بذولـة الناس

اشرتله بأصبع تحذير :- رووح منا لا و روح ابوية اسويها وياك
عشاير ..

ضحك بسخريـة و صاح :- ياعشيره هاي دين ، اني و انتِ
نعرف مالج احد !

حتى ادم الي فضلتي عالكل باعج و فضل اهلـه عليج

دين :- مو صحيح هذا الكلام اني الي تركت ادم و اهلـه
و هالشي علمود مصلحته قبل كل المسميات ..

ضحك بسخرية و همس :- بس بعدج تحبي
و خايفة من وكفتج هسه وياي مو علمود شي
علمود ل

ا يدري و ينجرح احساسـه !!

چتفت ايديـه و حجيت بتفاخر :- والله عاد الي تعرف ادم
ما تتخطاه بسهولة ..

يلا توكل منا .. و لا تراويني وجهك بعد !

زيـاد :- تعرفين ادم گلتيلي ...
على كيفج ترى مو ملاك لهذهِ الدرجـة !
اساس خراب حياتي و حياتج ادم

باوعتلـه مصدومه !

-شنوو قصدك ؟

زياد :- دين افهميني .. اني حياتي تدهورت و السبب حوبتج ما
تهنيت بلي وصلت اله لان اكو نقص فضيع
سعادتي مبتورة دائماً و ضحكتي جذب !

صدگيني اني مو ناقص اني شخص انغلب على امره
تقشمرت او نغشيت او ما ادري شسميها الحالة
عبالك تنومت مغناطيسياً

باوع يمنى و يسرى و همس :- اني راح اروح هسه
بس راح اتصل بيج اول ما اوصل
اكو حجي لازم تسمعيه احس مدين الج بتوضيح بعد كل الي
صار ..

دين :- ممحتاجة توضيح منك زياد
انت اختاريت طريقك و بوقتها كتلك الله يوفقك
و اني اختاريت طريقي .. الحجي هذا فات اوانه

زيـاد :- يمكن لو بعدج على ذمة ادم جان ما جيت و لا قدمت
تبرير ..

ضحكت بمرارة :- و شمعنى ؟

زياد :- لان بعدني احمل تجاهه مشاعر صداقه حقيقية
بالرغم كل الي سواه ويايه و الي خلاني بلا وعي اسويه

و هم ..

اكو شغلة لخ مأرقتني و متعبتني ..
لازم تعرفينها دين ..

دين :- شنو ؟!

زيـاد :- موهسه !

رايح اني و مثل ما گتلج ضروري تجاوبين على تلفوني !

راح و هو يتلفت مثل البايك الـه بوگه هالرجال راح يجنني
يختفي فترة طويلة و فجأة يطلع يزعزع اماني ..
هسه حرام اذا افتهمت من الغازه شي ..

دخلت لگيت دُنيا كاعدة على ميز المطبخ و ايدها على خدها ..
منظرها الحزين كفيل يشرح تذبذب العلاقـة بينها و بين
ياسين و حاسة بشعور مو حلو نهاية هذه العلاقة راح تكون
حزينة ..

شالت راسها و همست بتعب :- الله يساعدج !

دين :- ويساعدج ، شبيج مبوزة و كاعدة لوحدج ، عليـاء وين ؟!

-راحت تتسوك غراض مال كُبة ، تعرفين رمضان على الابواب
..

-اي صدك السنـة حيجينا من وقت ..

جفتت كلاص مي جرة وحدة و بداخلي اسب بزياد الي نشف
ريكي ..

دنيا :-روحي بدلي و تعاي نتغدة ما اكلت اني لهسة !

قلّصت عيوني عليها و همست :- قبل لا ابدل ..
اريد اعرف شبيج

دنيا :-روحي بدلي و تعاي نسولف اول و تالي احجيلج ماضم
عليج آني ..

ابتسمت و كرصتها من خدها ..
دخلت اغسل و ابدل ملابسي اتفاجئت بمنطقة البطن عندي
شويـة منتفخة من بعد ما جانت ملطوشة لطش
على ظهري ..
ابتسمت و رحت امرر ايدي بحنو ، متجاهلة كل فكرة سلبية
بخصوص هذا الجنين ..

فزيت من احلامي الجميلة على صراخ دنيا و هي تستعجلني
حتى اطلع ..
لبست دشداشتي على السريع و طلعت ..

ضيقت عيونها عليـه و ابتسمت ..

دنيا :- تدرين محلوة و الحمل لايگ عليج ، يمكن بيج بنية !

جريت گرسي و كعدت مقابيلها ، كسرت خبزة الوج و احجي
سويه :- شمعنى

دنيا :- مدري يكولون التحبل ببنية تصير حلوة

دِين :- همم كل شي يجي من الله انعم الله ..

دنيا :- و نعم بالله ، ما فكرتي شوكت دكولين لآدم ..؟

ذبيت الخاشوكه من ايدي و باوعتلها بحيرة ..

-هو لازم اكلـه بس شوكت ؟

-خابري و زفيلـه الخبر خلي يگمز !

-خبيثـه ، لا هيج خبر مو مال موبايل بنفسي اراقب عيونـه و
ردة فعله من يسمع !

دنيا :- تموتين عليـه و تكابرين ، ليش متصالحون
و كافي لعب جهال واحدكم بكد الثور و....

دين :- هوب .. هوب جنج طلعتي عالترابي
احترمي نفسج ولج

دنيا :- هففف ديلا عيني شكلنا سَبينه العنب الاسود !

باوعتلها بـحزن :- شبيج لخاطر الله من يوم فاتحة بيبي و لليوم
انتِ مو طبيعية حياتج هوسه و كئيبة.

دنيا :- وزيدي عليها مزفته بالدراسه و لعبانه نفسييي
من كل شيء

جرت حسرة طويلة و حاوطت راسها بثنين ايديها

-اريددد اموووت !

دين :- يمعودة كولي يا الله هاي كله لان دارسين زعلان عليج
انتظري يومين يجيبه الشوك يصالحج و هو الممنون .

شالت راسها و باوعتلي بنظره حزينة :- ياسين هذا وردة
يمكن ظلمته ويايـه دين !

بعبوس جاوبتها :- شلون يعني ؟

-ما احس تجاهه بشعور مثل الي يحسّة تجاهيي يعني
شلون اوضحلج صارلنه شكد مخطوبين بس ماحس بيناتنا
كيمياء ، احس بفجوه كبيرة ما بيني و بينـه
وجنت احاول اعبيها بدلاله و البذخ الي يبذخـه عليه
معنوياً و مادياً ..

بس من نكون بوضع حميمي و يريد يكون تقارب بيناتنا
تلكيني انفر حتى من لمسته لو حسيت بيها رغبة ..
اتهرب من نظرات الهايمـه احياناً
و ابد ما اكدر اتجاوب وياه لمن يريد ...

فتحت عيوني بصدمة :- شيريد يا مفلوگه ؟!

بس لا تخلينه يبوسج يولي ...

تهربت بنظراتها مُحرجـه :-بصراحه سواها مرتين و بالمرتين
لعبت نفسي مكدرت اكمل !
بعدين ليش محسستني مسويـة جريمة !؟
ترى عاقد عليه شرعاً ..

اطلقت حسرة و اردفت :- موو بيدي لهسه اشوفج ذيج الطفلة
الصغيرة و احس من واجبي احميج
عموماً اشوف لو تكعدين وياه و تصارحيه بمشاعرج ليش
تخلين الولد يتعلق بيج اكثر ، و انتِ هم الله يسلمج وين جنتي
شكد نصحت و حجيت و گلت يابه ما ترهمون
فارق بالعمر و التفكير و كل شي !

دنيا :- اخذتني العز

ة بالاثم و ردت اعدل واقعي البائس
و كلت بمرور الوقت احبه و اتعلق بي مثل ما حبيتي ادم

دين :- قصتي اني و ادم تختلف ..

دنيا :- مجنتي تحبي و خلاج تحبي !
ما ادري احس كل الظروف تضافرت حتى توسع الفجوة بيناتنا
و الي صار ذاك اليوم بفاتحة المرحومة خلاني اعيد حساباتي
كلها ...

لحد الان مناسين سالفة امي و ابوي !
ادري احنا شذنبنا نتعيّر بماضي مالنه اي علاقـه بي
الله يسامحك بابا اخر شي جنت اتوقعه يطلع ناهب امي !

مطيت شفايفي بأبتسامة زائفـه ، بلعت ريكي و فوراً غيرت
الموضوع ..

دين :- حبيبتي ارتاحي و لا تفكرين كل شي و اله حل مدامكم
عالبر ، المهم هسه تركزين بدراستج زين

ابتسمت و كالت :- شكراً دين لانج دايماً موجودة و تسمعيني

كامت و اجت حضنتني ...

بهالاثناء رن جرس بيتنا ، استغربنا ثنينا لان عليـاء
عدها مفتاح !
منو يجينا ؟!
دنيا :- اكيد امي ناسية المفتاح كالعادة !

طلعت افتح الباب و نسيت اخلي شي ع راسي ..
و اذا بي اتفاجئ بي عالباب ..

ادم ....

تواريت خلف الباب و همست بارتباك :- شتريد ؟!
دفع الباب و دخل و سده وراه

يباوعلي بغضب :- شنو مستحية ست لو تستحرمين مني

دين :- شكو شبيك اكلتني و شربتني

ادم :- ليش محاطة شي على راسج يامصيبة يا كارثة كونية
نزلت عليه !

ديـن :- اهووو بعد انفتكت ، فهمني شرايد

طلعت دنيا و صاحت :- هلااا بأبو صخر ، ليش حاصر اختي يم
الباب ؟!

باوعتلها بعيون مفتوحة عاضة على شفايفي

صاح :- امجن وين ؟

دنيا :- طالعة تسوك و اني بمكانها كول تفضل أَمرنا

باوعلي و همس :- خرب عرضج ربيتيها على نهجج لسان مال
عَتاگه ..

باوعلها مدعي اللطف :- امشي فوتي عمو سويلي استكان
جاي عندي حجي ويه مرتي..

تباوعله بخبث :- صاررر جدووو

تساءلت بعبوس:- مرتك ؟!
شجاي تهذي ؟!

صفن بعيوني بُرهـه و همس بخدر :- اااخ اشتعلو اهلج راح
اموت ناقص عمر من وراهن

كرص خصري بخفـه و شاورني :- الليلة تنامين بحضني مابيها
مجال

دفعتـه و احس ركبة تضرب بركبة من الارتباك ..

دنيا :- هوب عيني هوووب نحن هنا !!

بهالاثناء و صلت امي شايله كومة اكياس مسواك

ادم :- الله يساعدج ام فاروق ، شنو حتصير حرب و مندري

عليـاء بعدم دراية :- و يساعدك خالة ، ليش ياساتر

تناوش العلاليك منها و صاح بمرح :- لا بس ممخلية على حال
السوك ...

هو يسولف و اني عيوني تراقب انحناءة جسمـه و هو ياخذ
الاكياس من امي

لابس قميص ابيض ضيق على جسمـه و بنطلون اسود

كاف الردان لعكسـه و ساعته الفضية تداعب سمار جلده ..

ضميت شفايفي .. و كأن اول مرة اشوفـه اشو صاير حلو
ابو غمازة !

رجعني صوته و هو يناظرني بمكر :- وين صفنتي كونتيسة
تعاي جوه عندي حجي وياج من رخصة ام فاروق

علياء :- فوت يوم البيت بيتك ..

فاتوا هم گدامي و اني تصنمت اراقبهم عبالك ناصبين عليه ..

مشتاقتله ميته بي و ما اكدر اكوله و هو گدامي
ياربي شهالاختبار ...

دخلت للمطبخ و هو ماكو فايت للصالـة

علياء :- شبيج مصنكرة واكفه فوتي شوفي الرجال شيريد منج !

ردت احجي قاطعتني :- بلا طيش دين اسمعي للاخير و فكري
بالجانب الايجابي
لا تخليني ادخل و ابعثر كل شي اني ساكته لخاطر انتِ
تستردين نفسج بس اذا اشوفج تضيعين كل الفرص المتاحة
صدكيني ما راح اوكف متفرجة !

بلعت ريگي و معرفت ابيش ارد ..
رحت دا افوت يمـه و مدري ليش طلّيت عالمراية اتأكد من
شكلي و لا كأن قبل شوية جنت واكفه امامه
و لا كأن اني ميته شوك اله ، هي كوه اني مستخفة و اموت
عليه ...

ذبيت شال على شعري .. و ابتسمت لروحي بالمراية مدري
ليش

فتت سلّمت جان كاعد ..

صاح برفعة حاجب ماكرة :- هلاا بست دين

كعدت كدامـه و هو عدل كعدته ضام جفوف ايديـه جوه حنجه
..

باوعتلـه بتأثر راصـة قبضة ايديـة احاول اخفي ارتباكي امامه ..

-ليش كاعدة بعيد ، تعالي اكو مكان يحجي و هو يأشر بعيونه ..

دين -ممكن تسولف شنو تريد ؟!

-اريد ترجعيلي كافي زعل ؟

-مزعلانه منك ، بس ..

-مشكلتج نور ، يا ستي نور تغيرت و حست بغلطها و مستعدة
تجي تعذرلج

دين :- انت اجبرتها على هذا الشيء

ادم :- لا والله هي ندمت ، و اكثر من مرة طلبت تجي تزورج و
اني منعتها ..
باوعيلي زين .. ارجعيلي ..
لج متوقعت هلكد قاسية عبالي البعد يعلمج معزتي بس
طلعتي ما تحبيني ..

جتفت اديـة كمحاولة يائسة الزم صدري الي يعلى و يهبط من
ضرباته ..

دين :- و انتَ شلون طاوعك گلبك تطلگني

لا تباوعلي هيج ادم و لا تبتسم و عبالك اتأثر
اني طلبت حل منك و ما لَبيته و من كتلك طلقني ردت
تشوف معزتي عندك بس طلع كله فاشوشي ...

طفر من مكانه و اجه قرفص مقابيلي ..
حاوطني منا و منا و يهمس :- منو الفاشوشي بت بشّار

رفعت حاجبي و همست :- حبك الي خابصني و مانّ عليه بي ..

باوع بعيونـي حسيته تاه و ما عاد يندل ارضـه وين

-احبهن .. اعشقهن .. اروح فدوة من الحاجب الفحمي للهدب
الاسود
لج هذا ... هذا دكولين عنه فاشوشي

يإشر على قلبه و يحجي بتأثر خلاني اتوه و استسلم لولا اني
تملصت من

ذراعاته و كمت ..

و رحت اوكف على جَنب انفعل و احجي بعصبية

عيوني ابيش كيلو. ؟!
العزيزات الماكو اعز منهم مووو؟!
خطفني و ضمني لصدره ..
مثبت راسي حيل بجهة قلبـه

يهمس بصوته الرخيم :- ما عفتج و لا راح اعوفج
بس ردتج ترتاحين .. انت مالتي و الهوا اليصعد و ينزل ويه
النفس و لج اني تفرهدت بغيابج
كل ليلـه احضن ثوبج و ريحة القداح تصبرني
و اكول اليوم تحن ، باجر ترجع لحدما بديت افقد
و صرت ادور ريحتج بالباقي عندي من هدومج ..
من كدما شميتهن .. خلصت ريحتهن و خلص صبري !

لزم وجهي و باس جبيني ..

ارتبكت و تراجعت ليوره احاول اغطي شعري ..
و الملم شتات نفسي

همست :- ما يصير الي جاي تسويه

ادم :- بعدج بالعدة .. عادي ارجعج

فكرت العب بعداداته شويـة ..

دين :- هممم بس اني مموافقة عالرجعـة خما تجبرني ؟

اظلمت عيونـه عليه و ملامحه تغيّرت و عرفت هسه هو بحالة
رغبـة مجنونـه و بأي لحظة ينفجر !

ادم :- اجبرج !

ضحكت بسخرية :- شلون بالله .. تخطفني

ضحك بمكر و مدري شلون غافلني و خطفني و خطف شفتي
بقبلة جنونية !

دفعته و صحت :- اتخبلت !
حرااام

يحجي بأنفاس مرتبكة :- اذا تخافين من الحرام ارجعيلي
لان اذا ضليتي معنده راح اوكعج يوميا بالحرام

ضربت حلكي و همست :- عزا العزاك هاي انت العاقل

-هو انتِ تخلين عقل بالواحد ؟
يـله كونتيسة امشي جيبي غراضج

باوعتله بحيرة ...

جر كفوف ايديه و باسهم ثنينهم ...

همس و بياض عيونـه صاير احمر ..

تتوقعين ادم يعوف دينـه !

رجفن شفايفي مثل الطفل لمن يبرطم

همست :- مادري ؟ لحد الان ممستوعبـة الي سويته
نزلت دمعة مني و استقرت على طرف شفتي

ابتسم و راح يمسحها بطرف ابهامـة
عيونه تننقل بوجهي همس :- اني ممطلكج

فتحت عيوني على وسعها :- شلووون !

ضحك بصوت عالي و صاح :- على كيفج عيني دين دعدوش

شنو .. شنو ما مطلكني ؟!

و رحت افكر بلي كالته علياء ذيج المرة
خنزرت عليه و دفعته !

مستمر يضحك و لا كأنه ..
ردت اطلع لزمني و كعدني بصفة ..

باوعتله :- يازي عاد تضحك و فهمني لان دماغي افتر

شنو ما مطلكني و التبليغ و العقد ...

شسويلج اذا عقلج الهندسي اتقشمر بتبليغ و عقد مزور !!

ورد يضحك ...

ادممم بلااا سخافات الله يخليك !

عيوني دمعت ..

حجه هو :- التبليغ حقيقي .. بس الدعوة ما كملتها
ولج ام عيون وين اكو طلاق محكمة اذا ممطلكين يم الحاكم
الشرعي !؟

بس اني عندي عقد طلاقنا و كلتلي نصدقة بعدين

ادم :- نكعيه و شربي ميته هههه

دين :- يعني شنوو ؟!

-يعني لا سامح الله اذا ردت اطلقج لازم ارمي عليج اليمين و
الطلاق يكون عند الحاكم الشرعي السيد او الشيخ و الا
القاضي ما يطلقنا لو تطلع نخلة براسج الحلو

باوعتله بعدم فهمم

ادم لعد هو شنو شغل القاضي اذا ما يطلق

المحكمة وجدت لتثبيت الحقوق اما الزواج و الطلاق يم السيد
.

دين :- و اذا اتفق الطرفين و راحوا للقاضي

ادم :- فتحيلي مخج زين داكلج حتى لو ، رحنا هسه
القاضي يحول المعاملة للحاكم الشرعي بكل الاحوال انتِ
بعدج على ذمتي يا كميل ...

ضربت رجلي و صحت :- تزوير ادم !! گُمت اخاف منك

ادم :- سويت هالشي لان شفت راحتج بي
و شفت فعلاً انتِ محتاجة وقت تنزوين بي بنفسج بعيد عني و
لو ما جان هذا احسن حل ..

تمرمرت بغيابج ...

باوعتله بخزرة ..
ادم :- لجج راح اكلهن والله ...

دين :- تصرفك غلططط ، فرضاً عرست

ضربني ع راسي بخفه :- افرك حلكج اذا حجيتيها بعد
بعدين اني مطمن و جان عندي الوقت و الثقة بأنج الي
ومصيرج بكل الاحوال ترجعيلي ..

كعدت اعصابي فالته منه و من الي سمعته ..

يعني اني مضحوك عليه طول هاي المدة ؟!

باوعتله و بعيوني دمعة و شعور الاستغفال ضوجني

امي .. تدري !

دين :- علياااء شوكت توبين

اجـه جاورني و يحجي بهمس :- والله ادري بيج كيفتي

دغيته بكتفه و صحت ادحض كلامه :- لا والله

ادم :- اي والله و اذا لسانج الصلف يجذب لمعة عيونج ما
تجذب
يلا حبابه اطفري جيبي ملابسج و غراضج

وكفت ..

اني بعدني زعلانـة !!

غمز و صاح :- اراضيج

ديـن :- تفكيرك فاسد و انت صاير تخوف !

ادم :- لا والله كلشش بريء اني

دين :- من دبششش

ادم :- احبج

رفرفن جناحات گلبي و اعترف غلبني ابن اللذين ..

شفتها فرصـة استغلّه و احجي وياه بخصوص الشغل

ادم ..

-عيونـه ؟

وشغلي ...

ادم :- تعوفينـه اكيد !

دين :- لشوكت تضل حاجر عليه و قامعني هيج

اخذ وجهي بين ايديه و باس طرف انفي

ادم :- لحد ما تبطلّين تحلّوين ...

دين :- لا تقشمرني بسوالفك ، اني حبيت الشغل
واريد اكمل !

ادم :- سهلة اشغلج عندي بالراتب الي تطلبينه ...؟

دين :- ششتغل عندك ؟

ادم :- تلبين رغبات زوجك العزيز !!

دين :- يوووو ادم شكد تداهرني

ادم :- من اول يوم شفتج صحتلج كونتيسة تدرين ليش ؟

جتفت اديـه و صحت :- ليششش بلااا

لان المثلج مومال تتبهذل بالشغل و تصير تحت انظار
اليسوى و المايسوى
لج لو بيدي احاوطج من كل جهة و اضمج عن عيون الناس
عيونج حواجبج شفايفج طولج الحلو شل

ون يغمضلي جفن و
الناس تطالعه
كولي متخلف كوليلي رجعي راضي هذا انه ما اكدر اتغير.


دين :- مو كل الشغل بي تعب و اذلال للمرأة

ادم :- وياااج بس مو كل رجال تتعاملين وياه نظيف و ابن
حموله

و اني يا بنت الناس ما اتحمل قدري وضعي و طبعي

دين :- بس والله عيب من استاذ فاضل قدرني و شغلني يمه

ادم :- فاضل خريطة خليه عليه اني احجي وياه ...

انفجرت ضاحكة ... شنو فاضل خريطة لحظة
شلون عرفت اسمه فاضل

ادم :- افااا تسألين رجلج هذا السؤال ..
فاضل اعرفـه من مدة طويلة كم مرة اشترينا مناقصة من يمه
وبفترة من فترات حياته اشتغل ويه والدي يسمونه فاضل
خريطة
لان ولا خريطة تعجبه ، ياخذها و يضيف عليها رتوش شويه
و ينسبها لروحـه !!
من هنا انطلق هذا اللقب عليه

دين :- هممم شعجب ما سولفلي عن شغله ويه المرحوم ابوك

رفع حاجبـه و صاح :- لازم تريدين تثردين وياه بنفس الماعون

دين :- لااا عينييي موهيييج

ادم :- عينج ... تعالي ولج مشتاكلج

هزيت راسي بدلال ...

احتقن وجهه و همس بلهجـة امر :- روحييي لمي غراضج
راح اخطفج و علييي

مطيت شفايفي بقلق :- و اهلك نور و بشرى و الحجية احسها
زعلانه

ادم :- امي و نور ندمانات ..
و الحجية رادت تجي بنفسها تكسرج بالعكازة و ترجعج الي
هههه

دين :- شكد مشتاقـه الها ياربي

ادم :-و اني مشتاكلج .. ميت على ريحتج تدرين

دين :- خلصصص قداحك و اجيت !

ادم :- شمتانـه بيه ؟!

دين :- هممم ، شويـه !

گمت دا اروح لزمني :- ويين ؟!

-اروح اكوللهم .

-انتظرج هنااا

ديـن //

طلعت لامي و دَنيا و بلغتهم بآخر المستجدات بيناتنا ..
انفرجت ملامح امي و ضلت تحمد ربي و تتشكره و تثني على
قراري
بينما غادرتنا دنيا بزعل متوجهه لغرفتنا ..

عاتبت امي لان كذبت عليـه هيج كذبة

علياء :- شسويلج !؟ شفتج داكة رجل للطلاق
بعدين المثل ادم ما يطلگج لو تلگين السما
شفنا هذا انسب حل و هالمرة صح تصرفت عوضا عنج بس لا
تنكرين انه جان تصرف بمصلحتج

اومأت براسي و همست :- بس جان لازم دكوليلي خصوصا
بالايام الي جنت اجاهد حتى اتعود
على فراكـه ..

لمعت عيونها و صاحت :- اول مرة اشوفج واكعة بالحب هيج
الله يسعدج ويهنيج

دين :- هسه عرفت ليش جنتي توكفين حائل بيني و بين قرار
الشغل
و ليش صرفتي ابن اخوج عني هههه

عليـاء :- اسكتي يمعودة لا يسمع رجلج و الله لا يروح يعلگه
ابابهم
مالنه خلك و بلا شي حالة اختج ويه خطيبها معاجبتني

دين :- شكتلج اني مو كتلج راح تتورط و علاقتهم ما تنجح

عليـاء :- بعدنا عالبر حاجيها و شوفيها شتقرر احنا وياها .

دين :- خل اروح اشوفها و الله كريم ..

صفنت عليه علياء بعيون مدمعة ...

همست :- شبييج اكو بعيونج حجي ؟!

عليـاء ؛- تعودت عليج ، بلعت ريكها و همست :- ماراح
تكطعين مثل اول موو

اخذتها لحضني و بست راسها :- لا اطمئني ما راح اكطع
ولا تخلصون من تدخلاتي بحياتكم

عليـاء :- الله يسعدج بنيتي و يرزقج بالولد الصالح

رجف گلبي على دعائها و لزمت بطني لا ارادياً ..
بس ما گلتلها مو قبل لا اسولف لادم و افاجئه ...

::

تمشيت لغرفـه دنيا لكيتها دافنـه روحها بالفراش
مسوية روحها نايمه بس جسمها يهتز تحت اللحاف
عرفتها جاي تبجي!

جريت حسرة ورحت كعدت يمها ..

ربتت على ظهرها و همست :- كومي زعطوطة اعرفج كاعدة

دنيا:- معليج بيه خليني انام !

ابتسمت :- هسه غير اعرف لويشش زعلانه

دنيا :- مزعلانه يلا روحي لحضن رجلج و اتركيني ..

قهقهت بصوت عالي و اردفت :- طلعتي طفلة و تغارين
يلا خلصص بطلت راح اعوف ادم و ابقى يمج

طفرت من فراشها و طلعت بوجهها المورم و خشمه الاحمر
من البواجي

دنيا :- مو قصدي هيجج والله
الله يسعدج دين بس اني تعودت عليج و ماعرف شسوي
بلياج
واني بوسط هاي الازمة !؟

اخذت راسها لحضني و همست :- ششش اطمئني
ابد ما راح اتركج راح اضل وياج الا ان تلاكين النور بنهاية
الطريق

بجت و حضنتني حيل

اعترف نزلت دمعتي مسحتها بالعجل و صحت :- يلااا كومي
كااافي دلال ، كومي ساعديني الم غراضي

شالت راسها و هتفت :- اييي عيني ليلى رجعت لعيالها
و طير السعد يبرالها ..

دين :- والله ليلى طلع مضحوك عليها لا مطلكه و لا شي

دنيا :- كوووولي والله ..

دين :- والله بالله امج و ادم مقلبيني بس اني الهم

دنيا :- افتر دماغي و ورقة الطلاق لعددد

دين :- يكول مزورة و وين اكو قاضي يطلق بلا مااكون مطلقة
عند الحاكم الشرعي ..

دنيا :- كلتيله حامل

-لابعدني ،، اريد الاجواء تكون مناسبه لهيج خبر

غمزتلي و صاحت :- اااي عيني اليوم الله يستر من اجوائكم
بس لا تحركون الوادم الي وياكم !

كفختها و صحت :- انجبيي ادبسز منيلج هالسوالف

ضحكت و فلتت تعيبلي بلسانها ...
و اني احس خدودي شوي و ينفجرن من الاحراج ...

بعد ما لميت غراضي و سلمت على امي و دنيا و وعدهم ادم
يجيبني الهم كلما سنحت اله الفرصة
انطلقت وياه برحلـة و صفحة جديدة من الحياة
نويت بداخلي على حياة حلوة خالية من كل حزن
رميت ورا ظهري ماضي مشوه و تجارب مؤذية
رك

زت على الحاضر و الي بين ايديـه متأملة بمستقبل خير
الي و الـه و لكل انسان يهمني امره ..

اخطف نظرات من هذا الرجل الي جالس بجواري
عيوني تتنقل بتفاصيلة ..
سماره ، طرف رمشـه الي يتغازل بلون الشمس وقت الغروب
بأبتسامتـه و ذيج الحفرة المتوسده خده و الي ما طلعت منها
لليوم

يحجي و عينـه على الطريق ..

ادم :- ادري والله مشتاقتلييي

دين :- هههه منين !
ادم :- اه يالكبرياء ... اني اعلمك اليوووم !

دار المُسجل على اغنيتـي المُفضله ..

انـه ارد الوگ لحمد .. مالوگ انه لغيرة
يجفلني برد الصبح .. و تلجلج الليرة ..

و راحن عيوني يسولفن ..
نزلن دموعهن فضمير العين ما يگذب !
و يشرحن .. شكد اشتاقيت ..
لحسّة و همسة و مداهرته اليـه ...

مد ايده و خطف خدي بگرصة لطيفة و باس ايده ...
اخذلنا عشا من مكان قريب ..

استغربت لان مو من عوايده ياكل من براا

وصلنا أخيراً ...

لبيتنا ..
لحجيـه فطيم ، ملاكي الحارس
امي الثانيـة ، المرأة الي لمت شتات بنت ضائعة
عرفتها صدفـه !

دخلت قبلـه ملهوفـه ..
ادور بعيوني على مكانها بالكرويته االخشب بـ المطبخ
ماكو ..

اكيد بغرفتها ..

دخلت جانت متسطحة .. و بأيدها تسبح على كييف
بدشداشتها النيلية الموَردة و الشيلة الململ البيضة
و جهها يشع نور رغم عتمتة الجو ..

نشغت بصوت ملهوف :- خالـه !

دارت عينها عليـه و قبل لا تشيل نفسها من الفراش
تكومت فوكاها اشم بريحـة العنبر و ابوسها و دموعي تنزل

تمسح على راسي بحنية و تهمس :- هلا بقداحتي
بنية گلبي شلووونج

-مشتاقتلج والله والله

رفعت نفسي و سندتها تكعد ، حاوطتها مرة لخ بأيدي
و ابوسها براسها ..
و بعدما قطعنا شوط لا بأس بي عن التعبير عن اشواقنا
لبعضنا البعض باوعتلي الحجية بنظرة عتب ..
لزمت جف ايدي بأيديها المُجعدة المَتعبة ..

فطيم :- شلون گلبج نطاج تجافينا كل هاي المُدة ، ماظنيت
يبنيتي
تنسينا ...

دين :- انساج ؟!!
هذا شلون كلام حجية ، اكو واحد ينسى روحـه
اني بس ..

بلعت ريكي و همست :- احتاجيت وقت اكون بي لوحدي
ارتب اوراقي ، الملم گلبي الي تبعثر

تدرين انتِ الي صار وياي مو شويـه
جنت على لحظة انجن و افقد عقلي
و ما ردت .. تلوحكم ناري ..

نور صدمتني .. هي مو صغيرة جنت اظنها
تخبث و ترجع تتندم ما توقعت هلكد رح توجعلي گلبي .

فطيم :- ميخالف بنيتي .. نرجع و نگول الصار مقدر
و مكتوب و نور هسه مو مثل نور قبل ..
تغيرت و تندمت هواي و انتِ با بنتي رويحة حلال و گلبج جبير

ادم خوش ادم ما يستحق هلكد تجافينه ..
اول هيل من عفتي اجه يتسودن !
يروح لذاك المجان المكروه و يعارك ذبان وجهه
و ما يخش للبيت الا ويه طرت الفجر
جم نوبة اسمعه يبجي لو افوت عليه و الكاه حاضن نفنوفج و
نايم عليه

مت عيني هم يالّة يرتاح ..

مسحت دموعي بظهر كفي و ابتسمت الها

دين :- اطمني حجية ، رجعت و ضالّة على كلوبكم و هالمرة
مو بس اني ..

عقدت حواجبها البيض مستغربه ؟

لزمت بطني و همست مبتسمة :- راح يجيج حفيد
اني حامل حجية !

نشغت و ضربت حلكها :- صدك والله ..
يمااا فدواتك ربي ما قصرت ويانا
يعني ادم راح يصير اب يايمههه

ضحكت و هتفت :- هسه ليشش الدموع يا حجية
افرحي و ادعيلي ربي يتمم الي على خير
و مايجي مثل اخ....

قاطعتني :- ان شاء الله يتمم على خير و يترس حظنج بوليد
سليم معافى ..

مسحت دموعها و عجزت تداري رعشة شفايفها
الفرحة مو سايعتها ..

سمعت خطواته اقتربن ..

شاورتها :- لا دكوليله حجيه اريد اسويها مفاجأة ..
اومأت براسها و ابتسمت ..

ادم :- هلا والله التمن الحلوات ..

هاي شنو حجية ، احس ردت بيج الروح من شفتيها

و انتِ عيني كونتيسة صعدت غراضج كلهن خوش غلستي

رفعت حاجبي و همست :- ما غلست بس جنت مشتاقه
لشوفة الحجية

فطيم :- من فدوة لهالشوفـه ، اسمع ولك ديربالك على بنيتي
و لا تعبها و لا تزعلها منا و غاد ..

قلص عيونـه بمكر :- ما ازعلها اكيد بس مال ما اتعبها ما اكدر
اوعدج بيها ..

صاحت الحجية و تناوشت عكازتها رادت تضربه بيها

امشييي تربية سز باوعتلي تلهث ..
هذا الزلمة راح يتسودن تلاحكيله ..

انفجرت ضحك و ضميت وجهي بين ايديه ..

يأشرلي كل شويه اكوم و اني مغلسه عليه اخر شي طنكر و راح
جاب العشا و تعشينا سوا
و كل شوية يرميني بحجاية شكبرها
لو غمزة لو تلميح و الحجية ترزلـه
من هلگد ما فرحان حسيته رجع جاهل
و الحجية عيونها تلمع مليانه راحة و سعادة
كملنا عشه و شربنا الچاي هو صعد ..

لميت الباقي من الاكل و رحت طليت ع الحجية

كعدت يمها امسدلها رجليها ..
اباوعلها بهيام مثل الطفل الغايب على امه هي جنت شكد ما
اسولف وياها ما اشبع .

فطيم :- كومي يمه صعدي ورا رجلج
و ديري بالج على نفسج منا و غاد انتِ حبله

دين :- تطرديني حجية ؟؟

فطيم :- انه ودي انيمج بحضيني ، بس ذاك المسودن شلون
يله يمه صعدي يمه

اومأت براسي و همست :- الله يخليج النه
بس معرفت شوكت يجون الجماعـه ..

نبيل طالع يسهر يم صاحبه و بشيره و بتها اليوم يباتن عند
اخوها زحلكه

ن ادم

عبست بملامحي :- هممم

فطيم :- لا تهميين ، يمووت عليج وذيج صارت ماضي

بستها و طلعت ..

صعدت لغرفتنا .. و مدري ليش استوقفتني غرفـة سند
و لا ارادياً سرت بأتجاهها و طليت عالباب ..
مقفول بعده ..
مديت ايدي تلمسته .. نقرت نقرات خفيفة و حطيت اذاني
اتسمع
و كأن هسه راح يجاوبني و يكول ماما ..
نزلت دمعـة حارة ..
و حسيت ايد طوقتني من الخلف ..
باس كتفي و همس :- شجابج هنا ؟!

لفيت بأتجاهه و همست :- الشوك ..

باس جبيني..
همس يواسيني :- الله يرحمـه ، طير بالجنة يشفعلج ان شاء
الله

اومأت براسي ..

اخذ بأيديـه مشاني وياه دخلنا لغرفتنا ..
و اني گلبي دكاته تقرأ الف ....
مرتبكة ،. متطشرة.. محرجة و كأن اول مرة ينقفل علينا باب

حضني من ورا و صار يرويلي شسوا بيه الشوك بذيج الايام
و شعصف بي غيابي ..

مشاني للكنتور .. جان اكو كم قطعـة باقية من ملابسي

ادم :- ما سعف الليالي الباردة غير دفو ريحتج دين ..
دمعت عيوني ، دارني عليه ..
يهمس بصوت ذوبني :- مرخوص بس كت الدمع
شرط الدمع حدّ الجفن ..
طبع بوساته على عيوني منا و منا ..

طوقت رقبته .. و همست :- (( عندي الك مفاجأة ))

يحجي بصوت مرتخي :- ممكن نأجل المفاجآت شوووية !

ضحكت و هزيت راسي بـ لا!

ابتعد باوعلي مستغرب !
اخذت كف ايده و مررتـه على بطني ..

عيني بعينـه و هو بدأ يكشف المضمون !
تكَونت دمعـة فرح بعينـه

همس بتلعثم :- لا دكولين انتِ ....

اومأت براسي بـ اي و دموعي صارن يلالن بالعين

صرخ :- حاملللل

دين :- ايييي

كولي والله ... لججج دين حامل
راح يصير عندي طفللل منج !
لزم وجهي يبوس بيه بأنفعال ...

يمرر اصابيعه على شعر حاجبي
اريده مثلجج ..
يشبهج .. و شايل نفس العيون ....

دين :- چؤ ...
وين الله و يطلع يشبهك نسخة منك حتى احبك مرتين ..

شالني من خصري طاير بيـة فرحان ..

و ما ابالغ لو گلت جانت اسعد ليلـة بحياتي ..
شكد سولفنا بيها عن الشوك لبعضنا
عن حبنا الي يكبر ما يصغر ..
وعدني كل الايام السودة راح تنتهي و راح يتخطى اشباح
الماضي
و عدته اكون اله حاضر و مستقبل و نكبر و نشيب سويه و
نصنع ماضينا بأنفسنا ...

بعد ساعات قليلـة استيقظت بعد حلم طويل تعبني
عاينت الصبح بعده مطالع تململت من ألم فضيع استقر
بجسمي عجزت احرك اوصالي
ندهته .. رايح بسابع نومـه ..

حركت روحي شويـة حسيت برطوبة !
تجمد الدم بداخل عروقي ..

خفت امد ايدي و اشغل التيبلام الي بصفي
لكن قررت اتشجع و اشغل الضوء ..

شلت الغطا و انفجعت .. بالبقعة الدموية الي صايرة جواية

صرخت بصوت مرعوب :- ااادمممم !!!

على صرختي فزّ مفزوع و عيونـة تباوعلي برعب و اني مدري
شبيه ساحت روحي و انچفيت فاقدة ..

وعيت عليه يشيلني و يلبسني صايتي ..

يتوسلني اتماسك و اعينـه و اني غصب عني ساحت روحي
من منظر الدم ..

بدأت استرد وعيي اباوع لنفسي اني بالسيارة
راسي بحضن الحجية من شفتها نزلت دمعتي

همست بخوف :- مااات مووو

فطيم :- ششش لا تفاولين شفت الدم ترا مو هواية نازفة
كولي يا الله بنيتي ...

وصلنا للمستشفى و بعد سين و جيم و انتظار الدكتورة تطل
عليه
اجت اخيراً كشفت عليه و سوتلي سونار و اني ضربات قلبي
متلعثمة .. و احس گوه جاي اتنفس لولا شفت ابتسامتها
المطمئنة

همست :- هذا من هسه ديلعبكم ..
ماكو شي يخوف عيني بس الجارة متقدمة ..
يرادلج راحـة و نكتبلج مثبتات و يستحسن تابعين ويه دكتورة
خاصة تشوف حالتج و المناسب الج ..

بس اهم شي حركة زايدة ماكو ، جهد ماكو ، رجااال ماكو

اومأت براسي و ايدي بأيد الحجية تطمن بيه و تتشكر من
الطبيبة

همست برجفـه :- الحمدلله .. الحمدلله

طلعنا من يم الدكتورة اجه سندني ..
وجهه خايف و عيونـه تباوعلي بقلق ..

فطيم :- ماكو شي جده ، الجارة متقدمـه و يرادلهه راحة و تفك
منها ياخة ..

فلت وجهه و اني ضحكت الحجية ما تفوت فرصة اذا ما
تقصف بي !

بفشله همس /- حمال الحطب انييي

فطيم :- هذا الموجود ديربالك عليها منا و غاد لا تخليني انزلها
تنام يمي !

ادم :- شلون تهديد هذا !

كل شوية يهمسلي :- انتِ زينة ، متوجعة ..
و اني اطمنه و احاول اخلي يرتاح ..

بيومها كلنا تعبنـه من الهبطة رجعنا لبيتنا نمنا چفي ...

ما كعدت الا العصر ادم جان ماكو ، كمت غسلت و غيرت
الفرشة
و هويت الغرفـة ..
حسيت بنقرات خفيفة على الباب صحت ادخل ..

دخلت نور تفرك بأيديها وتتجنب تباوعلي ..

شلونج دين ..؟

-هلا نور ، الحمدلله كولي عيني محتاجة شي

شالت راسها عيونها مليانه قهر و دمع و ندم واضح ..

-فرحت لان رجعتو و فرحت لان انتِ حامل و ربي عوضج

لزمت بطني و كأني خفت لان عرفت .. ابتسمت الها بزيف و
تشكرت مباركتها ..

نور :- ادري بيج ماخذه موقف مني ، و ادري الي سويته ما
ينغفر
بس ..
راح اضل اسعى حتى تتغير نظرتج عني و حتى تسامحيني

اني والله كنت مو بوعيي و الي زرعته جنيته ..و استاهل

ضمت وجهها بچفوف ايديها و ضلّت تبجي ..

باوعتلها بأسف و اعترف قهرتني ..

همست :- خلص لا تبجين ..

ان شاء الله الايام تصلح الي
بيناتنا

باوعتلي و همست :- يعني راح تسامحيني

ابتسمت :- الفات مات يا نور و احنا ولد اليوم اني راح انطيج
فرصة حتى انتِ تخليني اغير نظرتي عنج و اسامحج
احنا عشنا ايام صعبة و شحصلنه بس الخسارات ، خلينا نفكر
بالجاي من عمرنا و نزرع مواقف حلوة عسا ولعل يبتسم النا
القدر

ضحكت و صاحت :- اول مرة انتبه شكد حلو تسولفين
انتِ انسانة طيبة دين و اني الي جنت مغطية عيوني و ماريد
اعرفج ..

اومأت براسي :- ان شاء الله الايام الجاية الحلوة هواي ..

نور :- اصعدلج اكل لو ناكل سوا جوه ..

دين :- لا اريد وياكم ..

نور :- تمام نازلة و منتظريج جوه ..

دين //

بعد هذا الحديث الصغير بيني و بينها لمست بيها تغيير
مادري
الخبث الي جان بعيونها اختفى و نبرتها المتعالية تحولت لاگثر
لطف بس بقى جزء صغير بداخلي متخوف و متحذر منها ..

نزلت و شفتهم كلهم كاعدين على سفرة وحدة منظرهم حلو و
يبعث شعور بالدفو سلمت و الكل سلم عليه بحفاوة و بشرى
كامت بوستني و باركتلي و اني بداخلي ممصدكه و اكول
معقولة تغيرت ، اي ليش ما معقولـة رب العالمين يهدي من
يشاء الانسان من يشهد امامة كوارث كبيرة و خسارات
عظيمة ينظر بأزدراء للمعارك الصغيرة .. لازم يتوقف عن
القتال و يقرر يعيش بسلام

اما نبيل .. ما اعرف شوصفـه و شأطلق علي اعمق من
مسمى الاخ الفرحة الي ارتسمت على محياه من شافني لو
كمية اللطافة و النكات و لا عبالك انسان مريض ..
اتوقع روحـه المرحة و لطافته هم السبب الرئيسي الي مخلينه
يصمد امام كل الصعاب الي ديواجهها ..

اباوع الهم متآصرين ، محبين لبعض نظراتهم تتحاضن بحب
واحد يناوش الثاني من الطبق الي يحبه و ادم صاير الهم مثل
الاب ينبه نبيل ما ياكل دهين و يحث نور تاكل لان ضعفانه ...
و يثني على امـه و يمدحها لان طبخت و يفلس النه اني
وجديته
و اخر شي يهتم بنفسه ...

عرفت ساعتها شنو هم بالنسبة لادم
و شنو آدم بالنسبة الهم ..
واعترف ندمت جداً لان حطيته بخيار ما بيني و بينهم ..
ادم هو الخيمة الي تلّم شتات هذهِ العائلة و حرفيا بلياه
يضيعون

مشت الايام هادئة و حلوة ما بيني و بينهم
اما ادم فأعجز ان اصف حبه و اهتمامه و حرصة عليه
و شلون يجاهد نفسه حتى ما يتدنالي و يأذيني ...

و بيوم كاعدين جنا نتسامر و اجـه الاتصال الي غير حالته جذرياً
..

من خلال الحديث عرفت الموضوع يخص شاكر و رافد لان هو
صارله فترة يدور وراهم ..

اجه الصوت من الطرف الاخر .. و كأن يكوله تدري منوو
هزمهم؟

ادم :- منو هذا الي هزمهم و شلون اندل مكانه اساساً ..

الطرف الاخر كال اسم ، اني ما سمعته بوقتها بس ملامح ادم
كفيلة تشرح انكساره و خيبته و خذلانـه ..

سد الخط و ضل برهـة صافن ، اوصالة ترجف و شفايفـه
بيضّت
و الدمع الحار بدأ يتكون داخل مقلة عيونه ..

بقلق .. لزمت كف ايده الي يرجف :- خير حبيبي شبي حالك
انقلب هيج ؟

باوعلي و بصوت متحشرج همس :- زيااااد ..

يتبع

قداح......#الفصل_السابع_والثلاثـون_و_الاخيرررر -
((هي و الريـل و حَمد))
لـ الكاتبة هاله آل هاشم


*المُتابعة + التصويت و التعليق على فقرات القصة لطفاً

وصفولي عَنَك
وردة الـ قداح ..
ريش جناح،
زاهي بالسحر.
وصفولي عَنَّك
شال مِنك غيظ
بستان الوَرد
و النَرجِس الرايج سِكر.
حَنّي بفواريز ولَحن ..
حنّة حمامات السجن
حَنه إلي ..
وحنّه إلك ..
واللي يعجبَه خَلِ ايحنّ ..
حِن .. بويه حن.
***

مظفر النواب .

(( بعد مرور اشهر))


ديـن //

فتحت عيوني بصعوبة و صحت بلسان ثگيل :- انييي وييين ؟!

الصورة ضَبابيـة و جفوني ثگيلـه افتحهن بالگوة ..

ركزت ، ممرضات ثنين بوجوه مستبشرة و معالم غير واضحـة

-صحيتي ؟!

الثانيـة دكول :- شدعوة هيج مستعجلة يوليييي

الدنيا تفتر بيـه بعدني مواعيـة واحس جسمي مرفوع
و طايف بالهوا ..

اريد احجي بس لساني ثكيل و اكو كتلة ببلعومي خانگتني

همست بصعوبة :- ادم ... الحكولـه عف يـة
راح يقتله ، حيسوي مصيبة !

- ادم منووو؟

((قبل مرور اشهر ..))

دين //

بعدما انهى آدم اتصالـه اعاين لـچثته ترجف
عيونـة يلالي بيها الدمع الحار و شفايفـه بيضت ..

لزمت جف ايدى كمحاولـة اخلي يهدأ
همست و القلق عصف بقلبي عصف ..

-خير حبيبي ، ليش حالك انگلب هالشكل ..؟

ادم :- زيـاد!

همس اسمـه و صار يصرخ و يسب و يغلطط
و يلعن الساعة الي تعرف بيها على زيـاد و دخلـه لحياته

اني اراقبـة و احاول اخلي يهدأ ..
يروح و يجي و اني افتر و راه و هو يأشر بأيده
عود لا تتقربين ..

ادم من يتعصب يصير يكسر شكو شي يجي بأيده
و مراد يأذيني بشرارات الغضب اي كانت .

الاسئلة تعصف بدماغي ، زياد شجابه على رافد و شاكر
و شنو الي خلا ادم ينهار بهالشكل !

اخر شي كعد حاصر راسـه بين ايديـه منزل عيونه بالارض
ويحجي بكسرة :- هذا النذل غدر بيـه
شلون ما فكرت بيها ، زيـاد هم يندل هالمكان !

رحت جلست بجواره و صرت افرك بظهره ..
و رحت اسئلـه :- اي مكان تقصد ؟

-يا مكان يعني ، المكان الي حجزت بي رافـد !
بمره من المرات اخذتـه ويايـه
و ما اجـه على بالي يطلع قليل أصل و يغدرني

التفت الي يعاين بكسرة :-زياد هو الي مهزم
رافد لاسباب ما اعرفها ، و مو بعيد هو الي ضامه هو وخاله !

راسي راح ينفجر زيـاد شغيره هيج
شلون الانسان يخون الزاد و الملح

اخذت راسـه بحضني ..
همست :- لا تضغط على نفسك بالاسئلة ، منو يگول هو تغير
؟!
منو يگول ماهو هيج من البداية ، معدنه هيج و الصحبة الي
اوهمك بيها محض خيال !
مصلحة او تقضية وقت ..

ادم :- جنت اعتبره اخويـه الماجابته امي
وكفتله وكفـة اخ و امه من تمرضت اني الي احتاريت بمرضها
و من توفت اجاني يبجي شلون الجاهل
مايعرف شنو يسووي اني الي احتويته و احتويت حزنه

حتى بعدما اخذ ايفان و اختلفنه ، ما فديوم حسيت عنده سوء
نية ، جان يجيبلي اخبار اركان اول بأول
حتى لو ارزله و اطرده يكولي هاي معليها بهاي اني وياك لحدما
تاخذ انتقامك !

اخر شي اتوقعـه زياد يتستر على الي شاك بيهم
هم مأذينج و يغدر بيه و يروح لمكاني و الي بيوم
من الايام گتله لا تكسر ظهري و تدلي احد بي !

اباوعلـه و اعجز شلون احتوي صدمته وخذلانه و بهذه اللحظة
ادركت انه بعد اكو مكانة لزياد بقلب ادم و الا ما ينكسر
هالكسرة هاي !

خطرلي اسولفلـه اتصالاته و حاولاته بالتحدث وياي بس
شفت اللحظة مو مناسبة بس جد تمنيت لو هسه هو گدامي
و اغسلة غسل على سوايته هاي .

طبطبت على كتفـه و ترجيته يترك هذا الموضوع برمتة لرب
العباد ماكو اعدل من محكمته و لابد كل انسان ظلمنا ياخذ
جزاءه بيوم من الايـام ..

مرت الايام هادئة و مابيها شيء يَذكر عدا اني اجتازيت فترة
وحامي و دخلت بمرحلة الحمل الثانية
خفت الاعراض المَزعجة و رجعت امارس حياتي طبيعي بس
دائماً ما الاحظ حزن بعيون ادم اعرف هو انسان صعب عليه
يسكت عن حقه او عن شخص اذاه .. و دكة زياد تاكل و
تشرب وياه ..

بشرى صارت احسن ويايـه لاسيما بعد ما سمعت
اخو نديم الاوسط تقدم لخطبة نور و جانت قسمة مرتبة الولد
خريج و حالته المادية ممتازة واهله ناس معروفين و الاهم من
ذلك اخوه صديق ادم الروح بالروح ..
انفرجت اسارير الأُم و دبّ الامل من جديد بحياة نور
بعد خذلان قائد الها و تجربتها المريرة بالحب خلوها تفكر
بعقلها و تختار صح ...

اتفقوا على يوم للخطوبة و بدأو فعلياً بالتحضيرات
لولا ان صحة نبيل تدهورت و جان محتاج يسوي قسطرة ..
اخذه ادم لـ اربيل و وداني يم امي ..
و هذا غياب ابد مجنت محسبتله حساب
بيومها ما نمت للفجر ابجي بحضنه و مجلبة اريد اروح وياه ..

و هو يضحك و يداهرني و يتقشمر على حزني ..
ودعتـهم و قلبي يلهج بالدعاء لادم الي صار بالنسبة اليه كل
شي و لـ نبيل الاخ الي ما جابته امي..

ببيت امي جانت الامور متوترة بسبب تداعيات علاقة
دنيا و ياسين ..
مشاكل للضالين و ابد مجاي يتوصلون لصورة حل !
ياسين يحبها و ما ير

يد يعترف بحقيقة الفوارق الاجتماعية و
العمرية بيناتهم يريد ياخذها لحياته بأي ثمن و هي ادركت
مؤخراً بأن ياسين مو الرجل الي ناويـة تكمل حياتها وياه
لاسيما بعد ما دخلت جامعة و بدأ عقلها ينضج ..

و بآخر مرة ياسين اجـه لبيتنا يشوفها تعالت اصواتهم
بالاستقبال و صار صوت ضربـه الامر الي خلاني ادخل عليهم
مفزوعة لكيته لاكح النفاضة بالحايط بس شافني خجل و دنك
و راح و هي عافتني و ركضت لغرفتها قفلت على نفسها
الباب و اني و علياء مثل اطرش بالزفة نريد نفتهم ماكو ..

هنا امي ضلت تصرخ عليها تفتحلها الباب و تهددها
بأن تعقل و ما تسوي الي براسها ..

جريت امي لغرفتها و احس اعصابي تغلي ..

دين :- شفتييي هذهِ نتائج عنادج ، كم مرة كتلج هاي القسمة
مسيرها تتفلش و بنتج راح تتدمر نفسيتها

عليـاء :- يااازي عاد دين ، شنو اني جبرتها توافق عليه
ترى اخذتها برضاتها محد جبرها

ديـن :- اخذته بعد ما جَملتيه انت بعيونها يوميا طاب طالع و
يبذخ عليكم بذخ !
و هي طفلة عدها احلام و تطلعات و عبالها اذا سلكت هذا
الطريق راح توصل بسرعـة !

كتلج يوم هالقسمة راح تأذيها ، دنيا صح عنودية بس تخاف
منج و حجايتج عليها مثل السيف عالركبة !

كتلج يوم راح تتأذى و تتعير بماضيج !
و بالفاتحة شفتي مرت اخوج شسووت و هذا و هم ما يعرفون
القصـة الحقيقيـة و سالفة ابو فاروق !

تخيلي اذا عرفوا شنو راح تكون ردة فعلهم و شنو نظرتهم لدنيا
!!!؟

جنت منهارة ، منفعلة و احجي واباوع لامي فلت وجهها ،
متجاوب تبلعم و عينها تحدق ورايـة !

تصنّمت بمكاني و عرفت اني لصت أم السالفة
لَفيت بتباطؤ و اشوف دَنيا واكفـه ورايـة بملامح متجهمة و
نظرات مليانـة اسئلة !

بقلـة حيلة همست :- صارلج شگد هنا !؟

اعاين الها ترجف مثل السعفـة و لسانها يتعثر

دُنيـا :- شنو الي تعرفينـه و اني ما اعرفـه دين ؟

-ماكو شيء ، لا تشغلين بالج !

ابتسمت بمرارة و الدموع تلالي على خَدها

-لشوكت تضلين تعامليني كطفلة دين ؟
عايني عليـه اطول منج صرت !
احجي شبي فاروق ...؟
شنو الي ممكن يغير نظره عيالي عني بعد ؟

باوعت لامي :- احجي انتِ يوم ؟
لا تعوفوني مثل الاطرشش بالزفـه !

ردت باوعتلي و عيونها تتجادح بقهر !

اشرت بأصبع تهديد :- والله و روح ابويـة اذا ما تحجولي
شضامين عليـه اعوف البيت و اشرد ..

عليـاء تباوعلي بخيبة و تصرخ :- ارتاحيتي ... دگيتي رجل الا
تهجمين بيتي !

رجفن شفايفي و احسّ رجلي ما عاد يحملنّي ..

كعدت على الارض و باوعت لامي ..

احجيلها ... لازم تعرف
هالشي ما ينضم عمر يوم !

عليـاء :- لا دكولين يوووم ، من يومج و انتِ مجردتني من هذا
اللقب و تزعلين من اكولج تربيـة فوزية !
غرست بيج كل الكراهيـة الي تحملها الي !
بعد هاليوم اعتبريني متتت

البنت الي ما تحمل سر امها و تصونـه هاااي مو بنت

صحت منهارة :- سرج ثگيييل عليـاء !
دمرني و هدم كل خلايا استقراري..
كل ما ادفنـه و ارجع اعاين بوجهج اتذكر !

عليـاء :- عدوووة !

دين :- غلطااانه .. لا تسوين نفسج ضحية و لا تحمليني وزر
خطاياج !

بين شد و عت بيني و بينها مَحسينا شلون دُنيا
راحت جابت نفط و صبته على روحهااا
و شايلـة الجداحـة بايد مرتعشة

دنيااا:- تحجووون لو لااااا

بهتنا اني و امي ثنيناتنا ...

امي ساحت روحها و كعدت و اني مدري منين اجتني
الشجاعـة طفرت على دنيا قيدتها و اخذت الجداحة منها بعد
ما طلعت روحي !

ذبتها و لطشتها كف !

لزمت صفحة وجهها تعاتبني بعيونها و تهمس :- ضربتيني !!

-واكسّر راسج بعد ، منفلته و زعطوطـة

طفرت ختلت بحضني و تناشغ منهارررة..

علياء صاحت منهارة هي اللخ :- اني خااطية يوووم
باوعتلها دَنيا و ملامحها يعتليها الذهول

علياء:- اااي غلطت ، جنت مراهقة و نطيت نفسي و اكلت خ..
..ا
دفعت ثمن غلطة مراهقـه عمر بحالة
تهجولت و تشردت و عفت اهلي و عزوتي و تعايشت ويا
رجال ما احبـه و لا اواطن امه .
جان عقابي اغتصب كل ليلـه من رجال من اطيقـه !
رغم هو خوش انسان
و خاف الله بيـه و بأبني
بس گلبي ما طاوعني ابادله المودة !
من يوم العفت اهلي ، عفت گلبي هناك
دفنته و دفنت الذكريات القديمة وياه

ابتعدت دنيا من حضني ..

راحت وكفت امامها ...
و بملامح يعتليها الفزع حجت :-

لحظة .. لحظة !
شنو ما تبادلين ابوي المودة
شنوو عفتي گلبج و الذكرياات
ليش الي عشكتيه و نهبج ! مو ابوووي ؟!

طأطأت راسها علياء و نشغت !

صرخت دنيا بصوت حاد :- احجيييي لا دنكين !؟

صفنت عليها شويـة و مثل الي جتها لحظة ادراك
نشغت و ضربت صدرها

دنيا :- عزااا العزانييي
ليكون .....

باوعتلي و كأن عيونها تسألني ..

دنكت راسي بخيبـه ...

لطمت على وجهها و ضلت تروح و تجي مفرفحة ..

ردت وكفت گدامها :- فارووق ؟!

فارووق ابن ابويـه لو لا !

باوعتلها علياء و عيونها ما تنشاف من البچي و القهر
هزت راسها بنفي و كأنها تريد ترمي بكل ما يثقل قلبها
بغض النظر عن فداحة النتيجـة !

صاحت دنيا محاوطة راسها بين ايديها

-ولكم راااسي راح ينفجر

امنا طلعت كح......

تقدمت صوبها و بلا شعور ضربتها كف !

باوعتلي بعيون مفتوحـة على وسعها ....

دين :- احترمي و لا تنعثليين !

ضحكت بسخرية و باوعت لامي بأشمئزاز :- احترمهااا

دين :- دنيااااا الصميييي وكافي عاد

دنيا :- ما اكدر الصممم بعد الي سمعته
باوعت لامي الي منزله راسها و تنحب !

انتِ ام انتِ ؟!

و فوك كل عمايلج السوده تقنعيني اتزوج بأبن اخوج
تخيلي بس تخيلي شكلي لو عرفوا بفواينج

جنتِ تبيعين قيم و اخلاق كل هالسنين
و تحاسبين دين بالفوته و الطلعة
و تفتشين جسمها و تشمشمين هدومها بكل مرة ترجع من
شغلها

و انتِ ماضيج اسووود !

هزيت براسي و رحت جريتها اريد اطلعها برا الغرفـه
و هي صخرة و لا تتحرك !

صاحت علياء :— اييي جنت احاسبكم و احرص عليكم
مو لان ابيع شرفيات براسج بس لان ماردتكم تغلطون غلطتي
!

دين :- خلصصصص لهنا و كافي
خلونا نسد الباب على هذا الماضي
الحجي بي بعد ميفيد و انتِ دنيا حقج تعصبين و تنهارين
بس ممنوع تجاوزين على امج لا تخلينا نندم حجينالج
خلص الصار صار و امي دفعت ثمن غلطتها

دنيا :- اعتذر دين ، اني ما املك قدرة التسامح الي عندج
اني ما اكدر اسامحها !!

اقتربت منها صرت بمواجهتها :- خلصص
الج حرية الاختيار تسامحيها او لا
بس احترامج الها امر غير قابل للتفاوض !

و تذكري يا دنيا :- ماكو واحد بينا بلا خطيئة !

دنيا :- هاي مو خطيئة ، هاي جريمة و اجحاف بحقنااا

باوعت لامي بنظرة اخيرة و همست :- جنتي شي جبير بعيني

عافتنا و راحت لغرفتها و قفلت الباب على نفسها

باوعت لامي ردت اكومها سوت حركة بأيدها بمعنى لا
تقتربين

همست :- عوفيني لوحدي شويـه ..

رفعت اكتافي و تنهدت بقلة حيلة ..
طلعت و عفت المرأتين يرتاحن ..

كعدت بالمطبخ اخذتلي شوط بچي و كأن الطفل الي بداخل
احشائي
يحس ..

صارت عندي تقلصات .. اخذت حباية و دخلت للحمام
غسلت روحي من ريحة
النفط ..

و ما هون عليـه الي صار غير اتصاله ..
فتحت خط و صار وجهه گدامي ..
مدري ليش نزلوا دموعي

ادم :- هاااي شنوووو شبي البحر هايج !

ابتسمت مدري منين يجيب تشبيهاته :-

ادم :- ايييي هسه ردت بيا الروح ..
احجيلي ، ليش عيونج حزينة
منو وياج ؟

دين :- محد ويايـه بس مشتاقتلك شوكت ترجع عاد !

ادم :- الله .. افديها المشتاقتلي .. وانه مشتاكلج مووت

ضيقت عيوني عليـه :- ارسى على بر مشتاق لو مشتاك

يهمس بصوت ناصي :- لااا اني مشتاااك ، للعيون و الشفـه و
ال...

دين :- يباااووو حسرة احجيلي كلمة تنفلت انفلاته مو طبيعية

ادم :- احبج و الحسين من الحواجب الفحمية لچعب رجليج

دين :- و اني هم اموت عليك ، محتاجتك هوااي

ادم :- مباقي شي يروحي .. كلها چم يوم يتحسن هذا البطل
و ارجعلج ...

صاح صوت نبيل من بعيد :- سلمنه على عليها !

ضحكت :- سلملي عليه ..

انهى المكالمة و احس ما طفى شوكي و لا احتياجي اله بهذه
اللحظة
قاومت و سندت روحي بالصبر ..

اجـه الليل و سويت العشا ..
رحت دكيت الباب على امي ماردت ، فتت لكيتها نايمة
توسلت بيها تكعد
ما قبلت و كذلك هو الحال بالنسبة لدنيا الي ما فتحت الباب
الا طلعت روحي
و لوما تدري مالي مكان انام بي جان بقه مقفول للصبح ..
خشيت للغرفـه ريحتها متنطاق من النفط الغبية نايمه
بهدومها عالسرير

جريتها بالغصب فوتتها للحمام سبحتها بأيدي مثل الجاهل
جانت تبچي جوه الدوش بصمت و لا نبست بكلمة
و ادري بيها مقهورة من ماما و عليها لان قست وياها ..

نشفتها و كعدتها بالصالـه و اجيت امشطلها بأيدي
مثل من جانت طفلـة و بليـه ما تطلب مني سويتلها ضفائر
ثنين

ناوشتها المرايـة ، ابتسمت ..
همست بصوت متحشرج:- تدرين عندج متلازمة حب
طفولتي!

حاوطتها من الخلف بايديناتي ..
بست راسها و همست :- صح لاني و ياج عشت امومة مبكرة .
.

ضحكت و دمعتها مستقرة على طرف شفتها

دنيا :- و ارجع اعيد نفس السؤال بكل مرة يغلبني حنانج

-ليش مو انتِ امي ، ليش ما انخلقت بغير ظروف ؟!

دين :- الحمدلله على كل حال ، محد بينا يختار قدره و لا
يستنكي اهلـه
ما بيدينا نغير المكتوب لكن نكدر نصنع المستقبل ..

باوعتلي و بياض عيونها صاير احمر مدري من القهر
مدري من ريحة النفط ..

-الي سمعته اليوم هدمني ، ما اتصور راح اتخطى
الماضي بسهولة و اصنع مستقبل نظيف !

دين :- تگدرين !

و اريد اكولج شي ..

دنيا :- همم

-ياسين اذا ما....

قاطعتني بصرامـه :- انتهى موضوعـه !

باوعتلها بحزن و ما اعرف شنو اكوللها ..

همست بقهر :- ياسين صفحة حلوة بحياتي انسان نظيف و
يستاهل الاحسن مني

هسه راح الملم كل هداياه و المهر الي جابـه لحد اخر فتفوته و
ارجعهم اله !

لزمت جف ايدها و طمئنتها بأبتسامه :- كل شي راح يصير
احسن
بعدج صغيرة و العمر كدامج و ياسين الله يعوضه ببنت الحلال
الي تفهمه و تسعده ..

تهربت دمعة من عيونها ، ابتسمت بزيف و صاحت :- امين !

غيرنا فرشات الغرفـه و رجعنا نسولف طبيعي بس بگلبي و
گلبها نار الله الي يعلم بيها
و امنا على بعد مسـافـه صغيرة منكدر نروح

و نلجأ لحضنا
تلمنا و تطمنا بأن الغد افضل ...

امنا سبب جروحنا ...
الله يسامحها و يسامحنا ...

باليوم التالي ..

كعدت امي ناصبـه العدة و لا كأن حدث شيء بالامس
او يمكن هاي طريقتها بالتنفيس عن حزنها تلجأ لممارسة اكثر
هوايـه تحبها
وهي الطبخ ..

لافـه عصابتها و محضره مواد الكليجة ..

باوعتلها و صبحت عليها ، ردت عليه التحية عادي و رجعت
تهرس بالتمر

و العجينـه مكملتها و مرتاحـه !

عليـاء :- تريكي و خفي ايدج و تعاي ساعديني
مبقى شي للعيد و اريد اخلص الكليجة ..

ابتسمت و همست :- صار عيوني ..

اكلت نص لفـه على السريع و شربت كوب حليب رغم ما
اطيقه بس لخاطر النونو

شَديت شعري بربطة و تربعت گدامها ..
اعاين الها من الاعصاب تشتغل مثل المهفايـه ..

و اني بفهاوة ملتهيـه اراقب ملامحها و شوكت تنطق و تلوم و
تعاتب !

احط بالقالب و اضرب بالصينية ..
و هي منصية راسها متهربـة من نظراتي

اخر شي استسلمت و صاحت :- مضيعة شي بوجهي !

دين :- ما راح تحجين ؟!

تركت من ايديها و صفنت عليه :- شحجي يعني !؟

خلص سديها سيرة حجيتي و ارتاحيتي و اختج عرفت !

دين :- لا تظلميني ، جنت معصبة و هي تتسمع علينا

علياء :- اذن تعلمي تتحكمين بأعصابج و لا تكتين الاول و
التاليي
خليج امينة على الحجاية الي تنكال الج

دين :- طول عمري امينة و انتِ تعرفين !

عليـاء :- هسه شتريدين ؟!

دين :- اريد نطوي هاي الصفحة و نتصافى و نعوض الراح

علياء :- صعب

دين :- ليش صعب

لكحت العجينه بخفة بالصينية و باوعتلي بعيون مليانه ندم :-
بعد الي سمعتونياه
و الي سمعتكم اياه بعد ما جرحنا بعضنا كل هالسنين بعد الي
حجته اختج وياي
اشوف صعب ، عوفني و عيشن حياة نظيفة ويه زلمجن و الما
كدرت انطي الجن
انطنه لجهالجن عود !

-مو بكيفج تطردينا من حياتج هيج !
احنا لو صار عمر الوحدة بينا مليون سنة نبقى بعازة كلمة اليُمه

مو من حقج تحرمينا !

-اني ما اريد احرمجن بس اني ما استحق كلمة ما...
اختنكت و ضمت وجهها بين جفوف ايديها ،...
ضلت تبجي لفترة من الوقت ...

كمت ضميتها لصدري ...
و همست :- خلصص لا تبجين اني مسامحتج
و اذا على دنيا ماكو افطر من گلبها
لا تخلين بخاطرج من كلامها الي حجته من ورا گلبها صدكيني .
..

اومأت براسها !
باوعتلها و صحت :- هاااي شصاررر بوجهج عليه
طالعه جنج مخبازة !

خزرتني و صاحت :- امشي ادبسز شوكت تحترمين عاد !

-من تغسلين وجهج !

باوعتلي لبرهـه بعدين انفجرت ضحك
و ضحكت وياها و دخلنه بنوبة عميقة لحدما ادمعت عيوننا ،
ساعتها تساءلت :-
هالضحكة نابعة عن فرح لو ألم .. سعادة لو ندم ؟

تركت الاجابة للزمن ...

للظهر و بعدما كملنا الكليجة و شويناها ..
بلشنا بالغدا و دنيا بعدها حاجره على روحها ما ترضى تطلع ..

لكن فوجئنا بصوت بابنا يندك بصورة متتالية و بقوة لبرهة
حسيتها راح يتكوم بالطرمة

امي ركضت حطت شال على راسها و فتحت الباب و اني
لحكتها بعدما لبست حجابي
و اذا بياسين واكف يتراجف و عيونـه صايره بكصته

فات و يصرخ وينها هاي الزعطوطة ..

امي تتعثر وراه و تسأل :- شكو يوم ياسين شصاير ؟

لاكني گدامـه حتى ما سلم ، عذرته لان اعرف الي بي !

وكف بالصالـه يصرخ : صيحوهااا

همست امي بتلعثم :- ممم منيةةة ...!

ياسين :- منووو يعني بنتج الي ربتلي علّة بگلبي !
دمرتني ... داست على مشاعري بالقندرة

علياء :- حشاك يمـه بس اهدأ ، امشي دين روحي جيبي
كلاص مي لرجل اختج

ياسين :- ماريد زقوم !!

جرته امي كعدته عنوه ، ضل يستغفر و يمسح وجهه بجزع

ماكو دقائق ، طلعت دُنيا شايله بوكس چبير و اكياس !

اجت وكفت گدامه و بجمود حطتهن گبالـه !

همست بلا متباوعلـه :- قسمة و مصارت ، هذهِ اشيائك
و الله يرزقك بوحده احسن مني اني ما استاهلك !

عافتـه و مشت !

وجهه بهت لبرهـه بعدين طفر بخطوة سريعه شدها من ذراعها
!
يخض بيها مثل الريشه !
و يتعثر ما بين الكلام و الانفاس ...

-لج اسمعيني بلا مزعطة !
الظاهر دللتج هوايـه بس منا وهيج حتشوفين غير وجه !
حررت ايدها منـه بقوة و عيونها يكتن دمع !

-ما احبـك افهمها عاااد ، ما اكدر اكون الك الزوجة الي تريدها
ترى هي مو كوه !

اغرورقت عيونـه و همس بملامح تعتليها الخيبة :- اذا
ماتحبيني ليش وافقتي عليه
ليش خليتني احبج و اتعلق بيج يا بنت الناس

-مطييية جنت مو واعية و انغريت بدلالك
و زيد عليها جنت بفترة صعبة و ما لكيت الي يحتويني
وهسه صحيت !

خلصصص بعدنا عالبر احفظ ماي وجهك و طلكني لا تبزعني !

باوعلها مصدوم راص جفوف ايديـه : و صدت عينه بعيونـنا
شفت بيهن كسرة و جرح

اومأ براسـه بلا ما ينبس بشفـه طلع و ركع الباب وراه !
هي كرصت بغرفتها و اني و امي احتارينا على يا حال نبجي
عليها لو على ياسين لو على انفسنا ما شفنا يوم راحـه ..

من وعيت عالدنيا لهذا يومنا و اخرها شهدت قصة حب من
طرف واحد انوأدت و اندفنت قبل لا تعيش اصلاً.

من بعد هذه الجيـه بعدما مر ياسين و بعد فترة وجيزة تم
الانفصال بيناتهم
بيومها دنيا انهارت

لسبب مجهول و بوقتها خفت ، اي خفت
لا تكون تحبه و فرطت بي
بساعة عصبية لكن اتضح فيما بعد هي حبت العشرة وياه ..

طبعاً الموضوع أثر سلباً على مستواها الدراسي و لولا اني
وياها
و اقدملها الدعم و المسانده جان استسلمت لحالة الكآبة
لكن هي هاي الحياة تستمر و ما تتوقف عند احد ما ...

اما علاقتها هي و امي رجعت تدريجياً و بمرة من المرات
دخلت عليهن
فجأة بلحظة خاصة جانن متحاضنات و يبچن عرفت ساعتها
تم الصلح بعد ذرف كثير من الدموع و المشاعر و الاعترافات ..

استندت مجتفـه ايدي على حافة الباب اعاين للمشهد المؤثر
امامي
والحمدلله المياه رجعت لمجاريها و اقتربت منهم لميتهم
بحضني
و تعاهدنا من هذهِ اللحظة نحرق الصفحات القديمة من حياتنا
بكل مآسيها و ننظر للحاضر و نتأمل خير بالمستقبل
امي غلطت بس دفعت الثمن و تابت و طلبت من عدنا
السماح
دنيا غلطت و تسرعت بقراراتها و فكرت ببتر كل شي اجه
بعجلة لحياتها
صح ياسين تألم بس احسن ما يكمل عمره ويه انسان ما تحبه

و تشوف بي الاب اكثر من الزوج ..
و اني .. احس نفسي نضجت مليوون مرة
تغيرت مو نفسها الفتاة الشعواء و العجولة ...

شيء واحد بقى بيـه الحنين لطفولة ما عشتها
و آدم اجه حتى يعوضني عن الامان الي انسرق مني بوقتها ..

::

صافنـه و ادون ذكرياتي بالملاحظات ..
و خطرلي بيوم اكتب قصتي و اسأل روحي هل القصة تستحق
ان اكتبها ...
و قاطع صفنتي رنة تلفوني برقم غريب ..
احساسي يگولي لا تفتحي بس بعقلي الف سؤال

فتحتـه و اجـه صوته الي صرت انقرف منـه !

زيـاد :- شلونج دين ؟

تنهدت و بأنفعال رَديت :- انتَ واحد ناقص تدري ؟

زياد :- هه ، لا ما ادري بله ما تفهميني شلون ناقص اني ؟!

-لك صاحب عمرك أستأمنك على سره بيوم من الايام
و فضلك على كل المقربين و خَصك بهاي المعلومه هيج
تغدره و تبيع سره !

سكت لبرهـه مثل الي يسحب شي نفس من جگارة او شي

بعدها گال :- يعني عرف !

دين :- ااااي عرف دكتك الناقصة ، شوف زياد هذا آخر تحذير
الك
بعد لا تتصل بيا لان لو اتصلت راح احجي كل شي لادم
و هو يتصرف وياك !؟
و انتَ تدري بيـه لرجال تلث ارباعـه غيرة
لو جوه الكاع ينبشك و يلگاك ..

ضحك ضحكة طويلة و مستفزة !
بعدها اردف :- على گيفج عينييي ، خليني ساكت و خلي ادم
بعيونج ملاك
لان اذا حجيت كلشي يخرب
انه ساكت مو لشيء و انما لخاطر عيونج !

دين :- ششش ماريد اسمع نبرتك المستفزة
انتَ شنو ، طلعت مصيبة
چم گلب تكسر بعد زياد!
قشمرتني و خدعت صديقك و كسّرت بإيفان !

زيـاد :- هييييه كااافي ، انه الي تقشمرت و نغشيت بآدم
ادم الي حسبته خويي و ضلعي الماجابته امي
ادم غسل عقلي بسالفـة انتقامه و خلاني اداة يلعب بيها
شلون ما جان

اصحي دين ، ترى ادم مو ملاك مثل ما انتِ متصورة !

اعترف ، هنـا عصف بقلبي الشك و صرت امتمت بالحجي
سألته
وادعي الثبات و ما اريد افكارة الشيطانية تتربع براسي

دين :- ااانت شجاي تحجي !

زيـاد :- الي سمعتي ، لا تنكرين بالفترة الي جنة سوه جنت
احجيلج
على صاحبي المهووس بي و بشخصيته !
صاحبي الي جنت أئمنه حتى سرج و علاقتنا
و جان ينصحني بحكم عمري الصغير و قلة خبرتي شلون
اتعامل وياج
حتى اسعدج و احافظ عليج

صاحبي الي جنتي تلوميني چيف احجيله كلشي
اثاري جان عندج حق هيج امور ما تنحجي و جنت لازم اغار
على
علاقتنا مثل ما انتِ جنتي تگولين !

دين :- مو وكت هذا الكلام !
كل شي نصيب بعدين انت مو صغير ، محد ضربك على ايدك
تدگ الناقصة بيه
و بي و بأيفان !

زيـاد :- بالواقع يا عزيزتي رجلّج هو الي خلاني ادگ الناقصـة بيج
و بأيفان

رجفت شفايفي و ضحكت بسخرية :- هه انت شجاي تمسلت
، الظاهر
انطيتك اكبر من حجمك لما فكرت اجاوبك !

زيـاد :- آدم هو الي دخلني حياة ايفان و جانت غايته ينتقم من
اركان لان يعرف شكد يعزها ..
انتِ يمكن متصدكيني .. بس سأليـهِ شلون عرفت ايفان اني !

خذلتني دمعتي .. و فكري سرح بأًول يوم شفت زياد بشركة
ادم
و عصبية آدم و كلامـه وياه ، شلون باعـه لخاطر مرة و فلوس

معقولـه ... ادم هيج !
مستعد يكسر ببنيـة بس حتى يحظى بأنتقامه مهما كان الثمن
!!

زيـاد:- الووو دين وين رحتي ؟!

لزمت گلبي الي يريد يشگ صدري و يطلع

-هنا زياد !
للاسف كلامك هذا ما يشفعلك ، حتى لوكان ادم حرضك على
ايفان
بس شيء اكيد ما جبرك تغدرني و تضحك عليها ..

ضحك و صاح :- بعدج تدافعيله ، اتمنى اعرف شلون غسل
عقلج هيج !
و لو اجزم هسه انتِ جاي تحتركين بنار الحقيقة

اسمعيني دين ...
اني ظلمتج .. و ادري كلش زين صعب تسامحيني
بس هذا الي صار من حبي لادم و تقديري لصداقتنا اخذتني
العزة بالاثم
و ماشيت افكاره الشيطانية و ظلمتج و ظلمت ايفان هي هم
مالها ذنب
و شكد حاولت احبها و انساج بيها ماكدرت
و ادري لو شما اسوي مالي مكان بحياتج لذلك ..

قررت اسويلج شي اخير شي ممكن يشفعلي عندج و تذكريني
بخير ..

بلعت ريگي و مسحت دموعي بظهر ايدي..
حجيت و اني احاول اخفي العبرة الي استوطنت زردومي ...

-شنو هذا الشيء؟!

زيـاد

:- شاكر و رافـد ؟!

دين :- هـه الي هزمتهم !؟
شبيهم ..

زيـاد :- شاكر هو الي ضربج بالدراجه دين و تسبب بمقتل ...

رجفن اوصالي ، تقدمت كعدت بعد ما استحمل الكلام ...

صرخت ... عفيه لا دكولهااا ....

زيـاد :- اني اسف بس هاي الحقيقـه ..

دين :- انتتت شنووو من بشرر؟!
لا انت اكيد مو بشر
لك تدري بي هو الي ضربني و كتل ابني و متستر عليه !

هزمتتته وتسترت عليه !
شنووو فرقك عنه !!!؟

زيـاد :- اسف والله ما تسترت بس ..

دين :- لابس و لا غيره روح الله ينتقم منك و منه !
ما اسامحك طووول عمري !!
زيـاد :- بس اسمعيني.. اني ...

دين // سديتـه و حضرته رأساً
دخلت بحالة انهيار و كأني توني فقدت ابني

صرخت بعلو صوتي :- حسبي الله و نعم الوكيل بيك شاااكرر
الله لاينطيـك ....
ولك حقييير

على حسّ صراخي دخلن امي و دنيا ، يباوعن الي بأستغراب
و يتسائلن شنو سبب حالتي ..

باوعت لامي بحزن :- يوووم طلع شاكر ...
شاكر هو الي كتل ابنييي

تباوعلي امي بقلق عاجزة عن فهم الي بيـه ..

علياء :- ذكري الله يوم انتِ حبلة !
يا شاكر !!

لزمتها من صدر دشداشتها حيل
عيني بعيونها و اصرخ :- شاكر السايق مال اركان هو الي
دعمني
هو الي موت ابني ابطني ...

نشغت امي و ايدها على حلكها و دنيا انصدمت ..
و ثلاثتنا تذكرنا وجعتنا ضلينه نبجي ..

علياء:- حسبي الله و نعم الوكيل هو انت بيش اذيتي هالعالم
تعاونوا عليج من جبيرهم لصغيرهم حتى السايق مالتهم ما
سلمتي منه ،بعدين هذا الجلب زياد ليش هزمهم و ليش
هسه اعترف عليهم ..

دنيا:- برأيي ارفعي دعوة بالمركز على شاكر و حتى على زياد
لان متستر عليه

خزرتها امي و صاحت :- عدها رجل يجي و يتصرف ..

اباوع الهن و دماغي بعده يفتر ما بين قهرتي على الي صار بيه
و بين الي حجالياه على ادم ، اخر شي اتوقع هالطلعة من ادم
و اني اكول ليش ما ارتاحيت بحياتي وياه يمكن هاي حوبة
ايفان !

بعد الي سمعتـه تجاهلت اتصالات ادم تحججت بالنوم و
الحمام
و التعب لحدما حجه ويه امي و حاول يعرف الحقيقة و الي بيه
و اني حلفتها ما تحجي ..
ردت فسحة اختلي بيها ويا نفسي و اعرف افكر شحجي وياه
ادم الرجل المثالي بالنسبة اليـه الاخ الحنون و الابن البار
الحريص على عرضـه و غيور على اي انسانه تخصه
شلون انطاه گلبه ياخذ ايفان بذنب اخوها و قبل كل شيء
شلون سمح لنفسـه يخرب حياة صديقه هالشكل
حتى لو صديقـه وافق !

فكرة انو اخلي زياد و ادم بنفس الخانة فكرة مرعبـة
هزيت راسي و اكول لنفسي مستحيل شيء اكيد زياد يجذب
شي اكيد ادم عنده قصة ثانيـة يرويها اليـه و على اقل تقدير
هي الحقيقية .

مرت الايام و نفسيتي من سيء الى اسوأ حتى ان دنيا تخطت
مشكلتها
مع ياسين و احتارت بيـه ..
و اكثر شيء قاهرني هو اذية شاكر و عدم تحقيق العدالـه بيه ..

و بيوم من الايـام و بدون سابق انذار ما حسيت الا ادم ببيتنا
حتى ما عرفت شوكت اجـه من السفر !
احس لويات صارت ببطني و قلبي يطارد بنبضاته ..
عجزت افسّر حالتي و هيجان المشاعر عندي ..
هل هي شوق اله؟
ام غضب من عنده ؟
او احتياج لانسان عزيز اشاطره الم الحقيقة !

كل الي دا احس بي هو مشاعر متناقضة ، رغبة كبيره بالعتاب

و الارتماء بحضنه بنفس الوقت !

غسلت وجهي و طلعتلـه للصـاله ..
جان كاعد و اول ما شافني نهض ..
سار بأتجاهي و لَمني بحضنـه يبوس و يشم بيه
و من حروره انفاسـه عرفت شكد بي شوك الي
واني والله ما اقل عَنـه رفعت ايديناتي ردت ابادلـه الحضن
و بلحظة برد كل شي بيـة من تذكرت سالفـه ايفان !

باوعلي بقلق :- بيج شي حبيبتي ؟!
صاير شي اني ما اعرف بي !

هزيت راسي بلا !

ادم :- لعد ليش هلگد بارده و عيونج بيها لوم و عتب
بدر شي مني دون قصد خلاج تاخذين موقف !

همهمت :- مادري شكولك آدم !

ادم :- احجي ، تعرفين بيـه ما احب الالغاز و التهرب بعيونج
عني
شصاير دين ؟!
جنا نتخابر شحلاتنا و جنت من خلف الشاشه المس لهفة
عيونج
شبيج منطفية هيج !

دسيت خصلة خلف اذني و عيوني بالارض
همست :- ماكو ، يمكن تعب الحمل !

ابتسم بسخرية !

و هو تعب الحمل ما يخلص ؟
لو انه هذا حظي و مامكتوب الي الراحـة وياج
و سعادتي وياج دايماً محسوبـه

باوعتلـه بـعتب :- برأيك ليش ؟

باوعلي بحزن :- ليش يعني ، هو حظ و بخت
مسامعـه ابو المثل شيگول :-
عيش ابخت ... وأحجي ابخت ... وبوك ابخت
مكرود يالمالك بخت ....
تركض وتتعب عالولف ...
تاليها تكعد عالتخت ...

ابتسمت بمرارة :- لا مسامعته !
بس سامعة بالكارما !
و الحوبـة الي تسحگ و تلحگ ..

باوعلي يأستغراب مجتف ايديناته :- كارما !

ليش بويـه كاتلي احد لو ماكل مال اليتيم !

دين : دمعة متخاذلة غدرتني و استقرت على خدي !

دين :- ممكن خاش بخطية احد !

ادم :- شبيج انتِ فهميني مو جد جدي سلكتيه
تحجين بصراحة لو اكلب الدنيا هسه

صار ساعة تلمحين و اخرها تبچين !

احجييي (( صرخ ))

سديت ايديناتي حتى اتجاوز صراخـه !

اقترب مني و لزم وجهيي

ادم :- لتخافيين ، باوعيلي و سولفيلي. شصاير ؟
احجييي ..

دخلت امي مفز

وعـه وتصيح :- شكو يوم ليش صوتكم واصل
ليبره

باوعتلي بحزن و مكدرت تنطق !
التفتت لادم و كالت :- اعذرها يوم ، نفسيتها تعبانه و الحمل
مأثر عليها

مسح وجهه و رجع شعره للخلف ، يجر حسرات يليها استغفار
متتالي ..

باوعلي و صاح :- امشي جيبي غراضج
كلشش تعبان و علي

صحت :- اني م...

قاطعتني علياء بصرامـة :- ايي يوم امشي لمي ملابسج و
غراضج
و مو ردتي تسوين دوبلر للطفل !

دين :- لزمت بطني لا ارادياً مع شعور طفيف بالقلق
فعلاً اني ردت اسوي دوبلر ..اتأكد من سلامة الجنين و اعضاءه

مشيت لغرفتنا و بديت الملم غراضي
اجت دنيا تساعدني و تهون عليه ..

باوعتلها بحزن :- المفروض اني احتويج هسه !

دنيا :- مابيه شي جني العيد ، بعدين خلصتي عمرج تحتوين
حزني
خلي هالمرة اساندج !

دين حبيبتي، الصمت ما يجاوب على تساؤلاتج
بس يزيد المج صارحي زوجج و اتفاهمي وياه
لابد عنده رد لكل شي گاله زياد
بعدين مو مال تضمين علي سالفة شاكر

و انتِ تدرين بي شسوه حتى يحصل هالمعلومة من زمان !

اومأت براسي و كل حيل ما بيـه للصراعات الجاية
احس نفسيتي مهشمة و اريد انام و اصحى كل مشاكلنا
محلوله ..

ودعت دَنيا و علياء و صعدت وياه بسيارته !
جان يسوق و عينـه بالطريق ابد ما فتح وياي موضوع

وصلنا و تلكتنا الحجية كالعادة ارتميت بحضنها
مثل الطفل لمن يبعد و يشتاك لامـه ..

شفت نبيل و وضعه الصحي احسن بهواي تحمدتله بالسلامة

و سلمت على بشرى و نور الي صايره تجنن و الظاهر
مرتاحة ويـه خطيبها ...

صاحني ادم صعدت وراه ..
لكيته كاعد منتظرني وملامح وجهه مليانه تساؤلات ..

ذبيت صايتي و شالي ..
غسلت وجهي و طلعت .. تمددت على جنبي متهربـة عنه

دخل وياي للسرير و استند على كوعة و يباوعلي بعيون
مبتسمة

همس :- شراح يصبرني على هرموناتج منا لمن تولدين

غمضت عيوني :- اريد ارتاح هسه ، و هرموناتي مالها دخل
بلي اني بي

محسيت الا طبع بوسـه خفيفـة على شفايفي

فتحت عيوني مستغربـه !

ادم :- خييير ليش هيج تباعين
مشتاكلج يوللل
تنهدت ..

مشه اصابيعـه بخفه على زندي ..
و نظراته تلتهمني برغبـة عرفت نواياه ..

خلص فاض بيـه و مكدرت اسكت بعد ما حسيت الا واني
افجرها
بوجهه !

-ادم انت صحيح سلّطت زياد على ايفان بدافع انتقامك !؟

و كأن سؤالي انزل بي صاعقة كهربائية طفر من مكانـه و
وكف مقابيلي يأشر بأصبعه و ملامحه تجهمت :-

-انتِ منيلج هالحجييي ؟!

كعدت بنص كعده و صحت :- لا تجاوب سؤالي بسؤال ؟

ادم :- اسمعيني دين لا تسودنيني بلا كلشي اني ما مطمن
لسالفتج سولفيلي هالتمسلت منين جايبته !

نزلت من السرير و صرت بمواجهته ..

صحت :- جاوبني اييي لو لااا و لا تحاول تقلب الطاولات

اقترب مني و عيونـه تتجادح ، يحجي من بين اسنانـه
و عروق جبينـه تگاد تنفجر !

ادم :- عندج تواصل ويا هذا الكـ***اد

لا ارادياً بچيت اومأت براسي و بحسرة همست :- يعني صدك
!

عفته و لَفيت امشي مخذولـه بأتجاه الكنتور ..

سحبني من ذراعي بقوة و صرخ بوجهي

ادم :- تعالي هنااا وين رايحـة
شوداج عليـه فهميني و لج صار اشهررر ادور عليه
فص ملح و ذاب و انت وياه تتواصلون !

صرخت :- ممتواصلـه وياه ، هو الي يلحگ ورايه
و كل مرة اصده و احضر ارقامـه و ميبطل يحاول

باوعلي بأستقراف و همس :- الى ان لنتي و جاوبتي عليه
مووو؟

تكتل الدمع بعيني مثل حبات مطر كبيرة حتى اني ماعدت
اشوف
گدامي .

دين :- جاوبته لان محروك گلبي من دكته بيك
لان ردت افش غلي بالسواه و انت صاحبه

صرخ بنبرة مزقت قلبي طبلة اذاني

-يا كو****د شاكيلج هااا
شكيتلج اني يا بنت الناس
كتلج روحي رزليه لان اني جاهل ما اعرف اتصرف ويه الاذاني
بعدين ليش محجيتيلي هااه ، ليش مكلتيلي يتصل بيج ؟

دين :- جنت بغير وادي حالتك حالة و ماردت اچمل همومك
صدگني حاولت اسولفلك ما لكيت الفرصة بس اني تصرفت

ادم :- هـه اي واضح !؟
غاسل دماغج و جايتني !

دين :- انتَ شجاي تسولف ؟!
شنو دتلمح ادم لان اذا الي دافكر بي صحيح
بعد مالي ضلّه هنااا

ادم :- ليش حاسبة نفسج موجودة ؟!
عبالك جبتج للاعدام مو طايقه تباعين بوجهي ..

دين :- ردت اجوبه منك حتى ارتاح
احجيلي الحقيقة ؟!

ادم :- مو دائماً الحقيقة تريحنا دين، حافظي على بيتج
و بلا ما تنبشين بدفاتر عتيكه !

هزيت راسي راصـة على قبضتيَّ ايديه

-بعدني مصرة اعرف ، انت شلون سمحتلك غيرتك تسوي
بعمتك هيج ؟!

-لا دكوليييين عمتك ، هاي الصعلوكة موووو عمتي !

وبعدين خليني اكولج سالفه ، اااي سويتها
و حثيت زياد يدخل لحياتها و جان الهدف اركان

بس زياد ملطلط و هي بربوك تدهدر الجدر و لگه قبغه
و بدل ما اشتغل اركان هم اشتغلووني عبنهم ابالسه !

صرخت :- بس هي مالها ذنب بالسواه اخوها
و لا تزر وازرة و زر اخرى !

-هههه شايفتها ملاك ياعيني و لاجنها الي رادت تاخذ ابنج منج
ولاجنها سلطت عليج السحر
ولا جنها اكلت حقج و عايشه و متمتعة بي

دين :- حقي اني عفته الهم ، فلوس حرام ما اريدها

بعدين مو بس هي .. زياد عندك علم انت دفعته ل

اذية نفسه
و اذيتها .. انهجم بيتهم بالاخير لان زواجهم انبنى على باطل !

باوعلي بحزن و همس :- اذية نفسه
زياد يأذي ما ينأذي
و اذا قصدج على علاقتكم فآني منعته و كتله حرام تظلم وحدة
حبتك ،جنت مستعد اشغله وره ميتخرج و تأسسون حياتكم ...
..

سكت و ضرب الكنتور بوكس فلشه و ضل يصيح :- شوووفي
شخليتني اسولف ؟!
لججج راح انجن كمت اسولف بعرضي ويه رجال غريب !

دين :- اهدأ خلينه نسولف بعقل ، الله يخليك مو هيجج
نطيني ايدك اشوفها

ادم :- خ.... ا بأيدي و انت خليتي براسي عقللل
من انعل ...... هيج عيشه
دمرتيني منين ما اجيج تطلعيلي بسالفه
انه گو*****د و عفتج هنا دايره تتصرفين ع حل شعرج

اسمعيني ... من اليوم تلفون ماكو
و طلعٰه ماكوو و زياد النذل اني اعرف شلون اطلعـه من زاغوره


راح لموبايلي اخذه حطه بجيبـه ، باوعلي بخيبه و طلع و لكح
الباب وراه ..

كعدت اضرب على رجليـه و ابچي ، اني ليششش هيج سويت
و ارجع ابرر لنفسي هذا الي لازم يصير
ليش يا ادم سويت هيج
الله لا ينطيك زيادددد دمرتنيي

لهناك و تذكرت سالفـة شاكر ، و من بعد ما شفت ردة فعل
ادم
يستحيل احجيله شي بعد !
خسرت ولد ثنين و بعد شنطي ادم !
ممكن يرتكب جريمه بلحظة غضب ...

حسبي الله و نعم الوكيل ، راح اضل ارددها الى ان يظهر حقي
و حق ابني
بشاكر و كلمن عاونـه ...

اني ما اكدر اخوض حرب ثانية ممكن اخسر بيها لكن ثقتي
بربي كبيرة يظهر حقي بيهم بيوم من الايام ..

و على طاري الايام ، مشت ايامنا اني وياه بتباطؤ عجيب
صار حسرة عليه ابتسم دام هو يتوارى عني هيج
اعرف بي مجروح و متأذي و اني هم مجروحـه منه ما جنت
اتوقع الانسان يظلمن عيونه بالانتقام ..
اني بس هذهِ التفصيلة الي هدمت اماني وياه
غير شي هذا ما صدگت بلي گاله زياد

بيوم من الايام صاحتني الحجية و طلبت مني تروح وياي حتى
اسوي سونار ، نزلت دمعتي لان جان المفروض اروح وياه ..
و من حركة قلبي رفضت و تعصبت و حلفت ما اروح و لا
اكشف منا ليوم الولادة
لان اعرف هو الي دازها و غروره يمنعه من الاقتراب مني !
هو اني شسويت و يعاقبني هيج و منو الي بينا المفروض
يزعل ؟

بيومها ما نمت للفجر و هو سهران ، و كل ظني رايح يلعب
المكاسرة ويه نديم
و برهان ..

لكن بدخلته عليه من بعد ايااام طويلة هاجرني لوحدي بالغرفـة
استغربت !

باوعتلـه وجهه اسود و حاجبـه مضروب و قميصـه مشكوك و
مفاصل ايده صايرة دم ..

نشغت و ايدي على صدري :- هاااي شصاير بيك
ذب روحـه بتعب جلس ع الارض مستند بظهره على الحائط
يباوع بجموود للفراغ !

رحت قرفصت گدامـه و احجي بقلق :- سولفلي ادم شبيك
شنو متعارك ؟
هجم بيت هاي اللعبـة و نديم و برهان وياها
تعاركت بيها موووو؟!

حاجيني دا اشوووف!

همس بصوت مخنوگ :- لگيت زياد !

بعبوس رَديت :- زياد !

باوعلي و بعيونـه دَمع :- اي زياد ..
مكدرت ما ادور عليه و اربي لان اندك بيج ..

دين :- تضاربتوو ! ليش هيج سويت ؟!

ادم :- حجالي كل شي دين ؟!

انتِ ليش ما گلتيلي شاكر الي دعمج دين ؟

انصدمت ...

و هو اختنگ بغصته و انتحب نزلن دموعـه ..

دنكت راسي و دموعي نزلن ويـاه !

مد ايديه اخذ حنچي رفع وجهي و باوع بعيوني

همس و دمعته العزيزة ما بطلت تنزل :- سولفيلي شلون
جرعتي مرارتها وحدج

ليش يا بنت الناس ما حجيتيلي ..

نشغت .. و حجيت بخضم البچي :- جنت خايفـه عليك
ادري راح تسوي بيهم مصيبه لو عرفت ..

ادم :- و راح اسوي ..و حك عيونج الا اخذ ثارنا مربع !

باوعتلـه بأستغراب و عيوني تحركني :- ثارنا !

رجع راسه يضرب بي بالحايط الوراه و صرخ و ايده تضرب على
صدره

-ولججج دين چتال ابني گدام عيوني و ما شفته كل هالسنين .
.

رجفن شفايفي و اطرافي ماعاد احسّ بيهن مثل الي صار
عنده شلل رباعي

تسائلت و بنفس الوقت ماريد يكون جوابه نفس الي افكر بي
...

-شاكر هو الي...؟

صرخ يبجي بصوت عالي :- ولججج ايييي ولج هو الي ضربني و
كتل ابني
هوو مو غيره دين !!!

نشغت و ايدي على صدري و دموعي يهلّن مثل المطر على
حاله و حالي ..

ضل يضرب براسـه حيل
جيتت عليـه لزمت ايديه ثنيناتهن

اباوع بعيونه صاير حطام ، منتهي و چن توه دافن ابنـه

همست :- بداعتي لا تأذي روحك كافي ..
بداعت هذا الي ببطني كااافي لا تسوي هيج

بچى و كال :- انكسر ظهري انييي

لميته لحضني مثل الجاهل لمن يبچي
بس راسه و اهدي بي و بداخلي نار مستعرة

دين :- خلي عينك بعين الله ادم ، ربك ما يضيع دم مسلم

هز راسـه رافض كلامي و مواساتي و عازم على اخذ ثأرة من
شاكر بنفسه

اثاري زياد حاجيله كل شي و الظاهر راح يدليه بمكانه
ماعرف شنو الي حس بي زياد من حجالة يمكن صحوة ضمير
متأخره
او دين قديم قرر يرجعـه ..

ليلتها گوه هَود و نام بحضني و اني عيوني مساهرة للصبح
خايفة يتصرف بعجالة و يضيع حقه بيده !

مدري شلون غفيت ..
ومريت بأكثر من كابوس يلاحقني وجه شاكر بي

فَزيت مذعورة .. لكيت حضني فارغ
عاينت الوقت مبكر ، رجف گلبي و نشف حلگي ..

طفرت ادور عليـه مثل المجنونـه الى ان طلع من

الحمام

ادم :- شبيج حبيبتي ليش وجهج هيج ؟

بجيت و ركضت حضنته ...

دين :- خفت عبالي رحت ،، عليك الله لا تروح !

اخذ بأيديناتي و بعدني عنه شويه يباوعلي بحزن
ادم :- خايفـة عليه دين ؟!

دين :- شلون ما اخاف ، انت اماني الوحيد اذا رحت شلون
اعيش
يمكن اموت و اصير بخبر كان ...

حط اصبعـه على حلكي و همس :- شششش اسم الله لا
دكوليها

مد ايده مررها على بطني

ادم :- هذا البطل شلووونـه ، لو يمكن بطلـة ؟

هزيت اكتافي بحَيرة :- ما ادري انت شتگووول ؟

-اكول لو نروح نشوفـه و نروي فضولنا !

لمعت عيوني بسعادة و هتفت :- و انتَ ويايـة

ادم :- و شحدي ما اروووح !

للعصر تجهزنا و اصريت اخذ الحجية ويايه رغم تعبانه و ما بيها
تتحرك
بس ادم مخلاها تتعب وياها وياها و اذا الخطوة صعبة عليها
يشيلها ..

وصلنـه لدكتورة قريبة عليهم
قطعنا و بعد الانتظار دخلنا سوه ثلاثتنا ...

طمئنتني الدكتورة بابتسامة و وجه بشوش ..
خلت الجل على بطني و مررت بالجهاز
و اني احس گلبي راح يطلع من بين ظلوعي و بداخلي اندعي
يارب كل شي منك خييير اهم شي تمام الخلقة و الصحة !

انفرجت ملامح الدكتورة و صاحت :- خييير من الله ، اعضائة
تمام
و صحته عال العال و الوزن اكثر من المطلوب ..

صاح ادم :- الف الحمدلله

الحجية بچت و شالت ايديها تندعي و تحمد رب العالمين
على تمام الخلقة

اما اني ما گدرت اعبر عن فرحتي غير بالدموع ، و احنا بعدنا
حايرين بـ فرحتنا

صاحت مرة ثانية :- شنو ما عدكم فضول تعرفون النونو ولد لو
بنت

فطيم :- كل شي يجي من الله انعم الله

اومأت براسي أيدت كلام الحجية و لساني انخرس من تضارب
المشاعر

الدكتورة :- مبرووك عيني ولي العهد..

فطيم :- وليد يعني ، محمود ربي مشكور

ادم :- الف الحمدلله

دين :- الحمدلله ياربي ..

طلعنا من يم الدكتورة و اشتغلت الاتصالات خابرت امي و
اختي فرحتهم
وادم اتصل بنبيل و حجاله ..

استقبلونا بحفاوة بالتبريكات و التهاني و لاحظت الفرحة على
وجوه الجميع
و كأن هذا المنزل بحاجة لروح صغيرة تبعث فيه الامل من
جديد .

بيومها جنا اسعد ما يكون التمينا على سفرة العشا و بدت
اقتراحاتهم بالاسماء

و اتفقنا نسمي الاسم الي تختاره الحجيه

قوس نبيل شفايفه بزعل و صاح :- استلموا راح تسميه
ريسان
لو رزوقي على اسم ابوها

فطيم :- يا فلك فلكك هسه انه حجيت گلت ؟!
سمي انت يمصكوع !

نبيل :- اسمي ليش ما اسمي ، عمـه و من حقييي
و اني اكول لو تسمونه يحيى!

باوعنه اله بأستغراب :- شمعنى

نور :- صارلك ساعة تتعارك بالاخير تسمي يحيى

خزرها نبيل :- و شبي يحيى يالمسيميمة لو خاف تريدينه نهوه
على اسم خطيبج المصون

خزرته :- لا تقلد عليه اسمه نهاوند يا متخلف !

باوعلنا نبيل و صاح :- بسم الله الرحمن الرحيم

((يَا زَكَرِيَّا إِنَّا نُبَشِّرُكَ بِغُلَامٍ اسْمُهُ يَحْيَىٰ لَمْ نَجْعَل لَّهُ مِن قَبْلُ
سَمِيًّا))

هالاية الكريمة ما تذكركم بشي ؟

صفنا كلنه على كلامـه فعلاً هالطفل بمثابة بشرى النه بعد كم
الخسارات الي عشناها و يمكن حيكون المرهم الي يرمم
جروحنا !

تبادلنا النظرات اني و ادم و تشاطرنا نفس الفكرة !
صحنا بصوت واحد :- خلصصص راح نسمي يحيى

نبيل :- لك عاشوووا

فطيم :- اول مرة تكول شي بي حظ انطيني وجهك الحلو احبه !

مدلها بوزه ... و الحجية تبوس بي و هو مكيف و يعيب لنور

و هيج مشت الايام و ادم معافني ابد و كأن رجع ويايه
للبدايات من الغزل و الاهتمام و الحب الي يغدق بي عليه بلا
كلل .
بس دائماً المح بعيونـه كسّرة ما او حزن يجاهد حتى يخفيـهِ
عني
ادم ادمي و اعرف سالفة شاكر تاكل و تشرب وياه ..
اواخر الصيف و كنت بنهاية شهري الثامن اجاه اتصـال غير و
قلب حالـه !

وعرفت شنو المقصود من لهفتـه و هو يكوللهم ((وين
لگيتوه))

و من سد الاتصال و ركض للكنتور جر سلاحـه و خلاه بحزامـه !

لحظات تمر سريعـة و لازم اتصرف وياه ..

وكفت گدامـه وصحت :- خير ادم ؟!

ادم :- انتِ تعرفين شكو لذلك حبيبتي وخري عن طريقي و لا
تعيقيني

ضليت متصنمـة بمكاني ايديه ممدودة على الباب كمحاولة
امنعة من الخروج

بچيت و بنبرة توسّل :- بداعتي عندك عاين لحالي بطني
واصلـة لخشمي
محتاجينك احنا ، اترك السلاح من ايدك و بلا تهور ابوس
ايدك

يبلعم و عيونـه بيها قهر و ثبات على الي ناوي يسويه ..

همس بصوت منكسر :- اذا ما اسويها بأيدي اموت ،
انتِ ماتعرفين شجاي يصير بيه دين
اترجاج اتركيني خلي اخذ بثاري و ثارج منـه !

صرخت :- والله ما اوخر و اذا وخرتني غصب اكول للحجية
عنك و احتمال تروح بيها ..
انت ما تفكر بيها اذا سمعت شحيكون موقفها
ما فكرت بنبيل الي توه بدأ يتحسن
امك و اختك و اني و ابنك الي ببطني ..

احس صبره نفذ و يجاهد حتى يصمّ اذانـه عني ..
صرخ :- لج لا تخبليني وخري عنييي

-ما اوخررر ، الي ناوي تسويه مو شغلك
اكو قانون يحاسب ، سلمه للشرطة يشوفون شغلهم وياه

احسّ رجليـه خدرن وكعت عند الباب اتوسل بي
قرفص بمستوايـه باس راسي و ساعدني انهض
حاوط جسمي

بين ايديـه و وداني للسرير ..

ابجي و اباوعلـه بضياع ..

و هو أمر من حالي ...

يباوعلي و عيونه صايرات دم !

همس :- اذا ما تصرفت هسه راح ابقى طول عمري بنظر
نفسي جبان

صرخت فاقدة شعوري :- روووح اهم شي ترضي نفسك
و احنا طبنا مرض !
نضيع نتهجول مو مشكلة المهم انتَ ترضي غرورك !

ادم :- غروري ؟، اللوعـة الي بروحي شايفتها غرور؟!

باوعتلـه بعتب و درت وجهي نمت على جنبي الثاني
و جسمي يهتز اغص و اتعثر بنشغاتي و دموعي

همس :- خلف الله عليج !

بقى برهـة ساكت بعدها محسيت على عالباب وهو ينسد !

يعني شنوو ؟!

راح ... حيسوي البراسـه و يسلم نفسه !؟

طفرت من مكاني على أمل الحك عليـه
سويت الدرج شبختين متناسية وضعي و بطني الكبيرة
شافني نبيل و ملامحـه يعتليها القلق ..

شبيج دين ؟!

عفته و توجهت للطرمـة ، فتحت الباب و ماشفت بس التراب
الي ورا سيارتـه ..

رجعت مخذولـة عيوني تبجي دم مو دموع !

لاكاني نبيل وجهه يتسائل و عيونه مثبتها على بركة الماء و
الدم الي صارت جوايه
باوعت للاسفل و بعدها محسيت الا بظلام ...
و اصوات ما اعرفـها ..
و ريحة مستشفى ..

فتحت عيوني و صحت بلسان ثگيل :- انييي وييين ؟!
ممرضات ثنين بوجوه مستبشرة و معالم غير واضحـة

-صحيتي ؟!
الثانيـة دكول :- شدعوة هيج مستعجلة يوليييي

الدنيا تفتر بيـه بعدني مواعيـة واحس جسمي مرفوع
و يمشي بالهوا ..

همست :- ادم ...
حيسوي مصيبة !

-منووو ادم

الخ تجاوبها :- تتحلم عوفيها

وصلني لمكان ابيض ..

صاحت وحدة منهن بلا امر عليك عاوني ..
باوعت هذا نبيل .. و امي و الحجية بصفهم ..

شالوني حطوني عالسرير ..

بدأت استوعب المكان و اتذكر اخر لحظة

صرخت بحنجرة متجرحـة :- ابنييي

صاحت فطيم :- خير .. خير يمه ابنج بخير
تقدمت طبعت بوسه على جبيني
و امي تتباركلي و تبوس بوجهي
و اني مو فاهمـة ..

دين :- ابنييي وينه !

نبيل :- بالمبارك مرت اخويـه ، ابنج بنص الخير
بالخدج و الحلوات يفترن داير مدايره

فطيم :- نزوول عليك ، حاسد الوليد على ضيمـه !

دين // اعتراني ألم فضيع و بدأت استرد وعيي

بجيت :- خالة ابني زين ، شلون جبت و اني بالثامن

علياء:- يمه لا تعبين روحج ، صارت عندج ولادة مبكرة
و الحمدلله انتِ بنهاية الثامن
الوليد بالخدج بس صحته زينـة !

باوعتلها :- متوجعة يوووم !

اجت الممرضـة مدري شحطت بالمغذي
سكن ألألم و بدأ يداهمني النعاس

همست :- ادم !
وينـه باوعت لنبيل :- الحكله اخوك راح يسووي مصيبة !
عقد حواجبـه و همس بأستغراب :- مصيبة ؟!

شبيج خوية مكوبسه ؟

فطيم :- اظن هيج من فاقت و لهسه تهذي هشكل !

اقتربت الحجية لزمت ايدي و ضلّت تقرأ ايات ..
همست :- ادم بخير يمه !
جاي بالطريق ..

بعدها محسيت الا و اني غصت بنوم عميق ..
فتحت عيوني بعدها و شفت احلى شوفـه

هو .. گدامي
يعاين الي بقلق .. ايدي و ايده متحاضنات

همست :- هاي انتَ لو حلم !

ابتسم و بينّت غمازتـه :- اذا گتلج اني تنطيني بوسـة ؟!

عرفتـه هو و اني مجاي احلم
عرفته ماراح يتركني و راح يرجعلي ..
دخلت بنوبـة بجي ...
نصى و باس راسي و همس :- لاتبچين ، سامحيني حبيبتي
الصار بسببي و اني اتحمل مسؤوليته !

لزمته من ياختـه وهمست :- لاتروووح ابقى يمي ..
باس طرف انفي و همس :- ماروح و الله ما روح باقي هنا

اسمع صوت نبيل :- احمم احم نحن هنا

باوعلـه و صاح بي :- جا ما تحس و تطلع برا

نبيل :- مو صوجك والله ، صوجي اني الي احتاريت بيها
من شفتها وكعت طارت وصلة من گلبي و حضرتك طالع

باوعتله و همست :- آسفة تعبتك

نبيل :- اي بعلي خلستيني و انه رجال صحتي على كدي

باوعت لادم :- اخذني اشوف ابني فدووة !

ادم :- اخذج والله بس قبلها لازم تجي الممرضة تغيرلج
و تتمشين شويـه ..

دين :- هو زين خوما بي شي .. اقصد يعني سووله فحص
خاف..

ادم :- ششش خير من الله طبيب الاطفال فحصه و فحص
اعضائه
نعمة فضيله ، بس لازم يبقى كم يوم بالخدج ..

دمعت عيوني .. همست :- صوجي ما سيطرت على اعصابي

لزم ايدي و همس :- صوجي اني ، ما قدرت وضعج
و سببتلج خوف و رهبة
بس ... سويت مثل ما گلتيلي ..

ابتسمت و دموعي يهلّن :- سلمته للشرطة !

ادم :- سلمته للشرطة و رافد رجع لامـه لان ماله دخل بلي صار
و منتظر هالمرة القانون ينصفني

لزمت ايده عصرتها :- والله ينصفك !
خلي ثقتك كبيرة برب العالمين
خلينا نطوي هاي الصفحة ، اريد اعيش وياك بهدوء
وسكينة .. گلبي تعلعل من الهبطات ..

ابتسم و همس :- صار كونتيسة مثل ما تحبين
شدي حيلج يالله حتى نسويله اخت !

صحت :- لو امووووت !!

غمزلي و كال :- نشوف !

ثاني يوم الصبح اخذني و رحنا صعدنا للخدج و شفنا يحيى
الي خطف كل مشاعرنا و محبتنا بهاي اللحظة !

حاطينه بكبسولة و بطرك الحفوظة و صياحـه هارج الدنيا
اباوعله من الجامـة وگلبي ينبض بسرعة يريد يسبقني و يلمه

اعاين لـ ادم عيونه تلمع و فرحته ما ينطيها لاحد ..
ايده محاوطتني و الثانية على الجامه و كأنه يستشعر ابنه
خلف هذا الجدار الزجاجي ..

ادم :- هسه يط

لع ملسون ، شوفي لسانه هرج الدنيا
ذكرني بفد وحدة اعرفها !

قلّصت عيوني عليه و الغيرة اشتعلت :- منوو هاااي ؟!

باوعلي بتعجب مقوس حواجبه ثنينهن :- شنوو معقولة ما
تعرفيها

-لا والله ما اعرفها ، حبايبك هواي

-وحده لسانها متبري منها ، اااخ شسوت بيه اول ما شفتها

فهمت قصده و ابتسمت ..

اخذ بأيدي مشاني و يسولف وياي ..
-ها عرفتيها مو ... اخ يا عيونها دولبتني ..

باوعتله بتكبر :- جنت غثيث الصراحـة !

ادم :- مو غثيث بس وكعت و ما اريد ابين اني واكع
هههه
وكفت امامـه مكتفـه اديناتي :- بالله عليك شوكت وكعت ؟!

ضحك و خدوده حمرّن ...
دنك يفرك بمقدمه انفه و همس :- من اول يوم وكعت عيني
عليج
جنت اريد اجذب انتباهج و انتِ بزبانه ممشتريتني
تخابرين و تسولفين و لا يمج!

سويتلي طلابه وياج و ...

بعبوس گتله :- و خليت شاهين الدثو يبطلني !

ادم :- مو لسانج جان طويل و اني خلگي هلگده !

شابكت ايديـه من الخلف و اخط برجلي بالارض مثل طفلة
مدللة

دين :- هممم و سالفة الشغل يمك انتَ رتبتها موو؟!

ادم :- الصراحة مو اني ، بعدما سولفت لجديتي عن موقفي
وياج رزلتني و كالت شوفلك طريقه تشغلها يمك بلا ما تنزل
مي وجهها

دين :- اروحلها فدوا شكد حنينة !

ادم :- و آني هم حنين وعيونج .. أخرخر حنية

دين :- نزووول ، امشي وديني للبيت تعبت

ابتسم و اخذ بأيدي و مشينا لسيارته ..

همس :- فعلاً الحجية جانت حنينة و عقلية مدبرة ، جان عدها
بعد نظر و عرفت ابنها طاح و محد سمى عليه

دين :- ههههه

::

مشت الايـام و ابني استرد عافيته طلع من الخُدج و نور بيتنا
و اكتملت عائلتنا الصغيرة ..
حاوطنا بعضنا البعض بكل حب و أُلفـة ..
و أَقسمنا على طوي صفحة الماضي بكل محتوياتها و الامها ..

احسّ كل حاجـة نحطت بمكانها الصحيح ..

شاكر :- انحبس بتهمتي القتل المتعمد و الشروع بالقتل
و اعمال مشبوهـة اخرى و هالمرة القانون نصف ادم

رافد رجع لامـه و التزمته ايفان حتى يكمل مسيرة ابوه وياها
وعدل عن فكرة بيع اسهمة و انشطار اسم العائلة ..

زيـاد اختفى و ماشفناله أثر او سمعنا اله خبر و احياناً
احس ادم يعرف هو وين بس اني ميهمني اعرف ..

دنيا صابـه جمّ اهتمامها على دراستها و ممفكرة بأي ارتباط
قبل لا تكمل دراستها

عليـاء بقت على حالها الفرق صارت تسير عليه بين الحين و
الاخر
و تصافن هي و بشرى لاسيما و هن يشتركن بعدة صفات
اهمها حبهن للمظاهر هههه

نور تمت خطبتها على خير من نهاوند و باقيلها ايام و تنزف
لبيت رجلها

نبيل بدأت صحته تتحسن و كذلك عاطفتـه ، اكثر من مرة
يلكفه ادم
يحجي ويا بنية و احنا من عرفنا عبالك عيد نريده بس يستقر
ويه بنت الحلال
الي تناسبة و تسعده ..

و الحجية فطيم هذهِ تميمة الحظ لعائلتنا ، نبراس ينير عتمتنا
و طوق نجاة يحمينا من الغرق عايشين تحت صايتها و بركتها
روحها من الدنيا صار يحيى و شكد ساندتني بفترة نفاسي
ولا زلت ارتوي من بحر خبراتها ..

هذهِ انا ، زهرة القداح ربيبة الحاجة فوزية ..
الطفلـة التي لم تعش يوماً طفولتها
ها انا اخط اخر سطور روايتي ..
بعدما انزلني القطـار بآخر محطـة و استقريت بيها للابد
مع حمد ... محبوبي و عاشقي الوحيد ..

و بدل ما اكول ياريل صيح بقهر .. صيحة عشگ ياريل

راح اگول :- ياريل غَني بفرح .. غنوة عشگ ياريل
هودر هواهم ولك ..
حدر السنابل گطى ...

سَديت الدفتر و دَسيته جوه ملابسي ..
سديت الكنتور و صار بوجهي ..
واكف و مستند على كوعـه !

نشغت و ايدي على صدري :- يماا شوكت اجيت !

ادم :- عوفج مني شوكت اجيت .. مشتاگلج

-نعسانه والله .. ما صدگت ابنك نام !

-اي و ابوه ما نعسان ..

ضيقت عيوني عليه و اعرف الي يدور بباله و اعرف لو شما
اسوي
ما راح افلت منـه ..
طوقت رقبته بين ايديـه ..

-تحبني ..

ادم :- احبج بس ؟! لا اني مُتيم بيج .. باس عيوني منا و منا

دين :- لا تبوس عيوني ...مايصلح

ادم :- احبهن مو بأيدي ..

مظفر يگول :-

جفنگ جنح فراشـه غض
و حجاره جفني و ما غمض
يل تمشي بيه ويا النبض
روحي على روحك تنسحن
حن ...... و انـه احن

دين :- هممم شلووون احن يعني !

طوق خصري و شالني بين ايديـه
ادم :- هسه اكلج شلوووون ....

دين :- نزلنييييييي !

::

بعد اشهر قليلة ..

لازمـه الاختبار بأيدي و ارجف ..
و اجيت اوكع مغشي عليه من شفت خطين !!

تعصبت و فتحت باب الحمام لگيته واكف ايده بجيبوبـه و
كاتم ضحكته!

خنزرت عليه و بودي اشبعه ضرب هسه

ادم :- شبيج مدلغمة ، بشري حمامـه غراب!!؟

مشيت مسرعة اخذت ايده و خليت الاختبار بيها !

دين :- تفضل !؟ ارتاحيت هسه ؟

اطلق ضحكة شكبرها و صاح :- مبررروك
راح تجينا دين صغيرة !

تخصرت و عوجت حلكي اقلد عليه ..

اجه حاوطني و باس راسي و بعده يضحك استفزني ..

هسه ليش ضايجـه رزق و اجانه قابل نگول لا

دين :- يحيى مصاير خمس اشهر !

مد ايده بعثر شعري و صاح :- يكبرون سوه كونتيسه!

خل انزل ابشر جديتي راح تجيها حفيده

صحت بخبث وراه :- واذا طلع حفيد ؟!

باوعلي و غمز

:- نضل نكرر المحاولات!!

صرخت بعصبية :- اددم !

-احبج و شمرلي بوسه بالجو ، نزل و لا يمـه

ابتسمت ..
مجنون ... و احبـه بكل جنونـه !

و اني خليتهم و اجيت ❤️

تمت بحمد الله

انتهت رحلتنا مع ابطالنا بتاريخ 26/3/2025
متمنين لهم حياة سعيدة ..
تعلمنا هواي شغلات بهذهِ الرحلة اولها كل قصة تبدأ عند
الاهل
سواء قصة حزينـة او سعيدة ..
دين الي مزقت طفولتها التجارب بسبب غياب الاهل و عدم
حرصهم..
و ادم الي احتوى دين بكل جروحها بسبب التربية الحسنة و
معاملة النساء بالحسنى لانه نشأ ببيئة صالحة تحت رعاية
الحجية افاطم ..

الظلم موجود بكثرة لكنـه قصير الاجل
كل ساق سيسقى بما سقى
و كل انسان يحصد الي زرعـه

عليـاء اختارت اكثر الطرق وعرة و اشترت تعاستها مقابل ثمن
زهيد في حين انها تگدر تختار السعادة المجانية المتوفرة
گدامها

دنيا صححت مسارها اخيراً و اتبعت نهج اختها ..

زيـاد حتى لو اختفى اجزم بأنه راح يعيش تعيس دام انه يفضل
الماديات على المبادئ ..

#النهاية💔