تها بس ...
ام بهاء//اكلج ام صلاح شنو هالحجي هذا تره اكو بخت ستار
وبخت شهار
صبيحه //شقصدج عيني ام بهاء
ام بهاء /قصدي ياما بنات سوون مصايب والله سترهن بيت
ورجل وجهال واكو بنات كل شي
ما مسويات والله شهرهن
صبيحه تغير لونها بس حاولت تبين هي ما مهتمه //شنو ام
بهاء انتي تغشميين روحج وتدافعين
انا ردت اقطع النقاش كلت //اروح ارتاح شويه راسي يوجعني
زينب /:شنو هالحجي هذا عمه مو تشوفن سلام تعبان
وبعدين احنا شلنه شغل بالي تريد تموت تريد تنتحر
بعد هي تلبست براس اخونا
خالتي ربيعه /:تره ام صلاح عيب هذا الكلام الما الا داعي
وانتي زينب شنو هالحجي
صبيحه //ياا ربيعه وانا شكلت
عليه بنفاذ صبر //اكلج صبيحه تره الببت هذا بيت اخوي صبار
وسلام ابن اخوي الي حق بي انا عمته
اهنا كوثر حجت وهي متخوصره//لا عيني سلوومي الي انا
وبس هو خط احمر اؤ اي احد ما اله بي
عليه //اخذي عمه بالعافيه عليج بس يمكن لو ما جايه اشوفه
جا عتبتن
كوثر باستهزاء //ما نعتب انتي اصلا ملتهيه بزوجج وجهالج فما
نعتب عليج لا تجين عمه
يجوز رجلج ما يقبل وحقه كافي عليج يوميه راكضه
للمستشفى
غدير /؛عمي زين منه الرجال ومتحمل يوميه الو بتج منتحره
اركضي للمستشفى
عليه //نعم الله عليجن يابنات اخووي وانتي ياكوثر يا متعلمه
يامثقفه انا بالاساس اريد
ارووح وبعد هذا البيت ما اطبه -اهنا عمتي اتكسرت العبره
بصدرها؛-
ام بهاء //استهدي بالرحمن ام رقيه شنو هالحجي مو بيت احد
بيت اخوج وقبلها هو بيت ابوج
عليه //لا ام بهاء كلمن يعرف حدوده وانا عرفت حدودي
صبيحه //عود عليه صدك عليمن تبچين ماكو داعي للبجي
كوثر وغدير ما حجن شي
عليه //هذا الحجي كله وماحجن مشكورات بنات اخوي
كوثر //شنو عمه شحجيت كلت رجلي الي انا وبس وما اريد
اي احد يشاركني بي
لا اخ ولا عمه ولا خاله
ام بهاء //وج صدك ما تستحيين انوب لا عمه ولا خاله اخذي
حبيبه بالعافيه عليج يالله
ام رقيه امشينا وبعد هذا البيت ما ندخله لان الظاهر بيد كوثر
وغدير
انا فتحت باب الغرفه وحجيت ::كوثر روحي ويه امج البيت
اهلج لا اقترف جريمه وانتي ولج زينب
خابري رجلج يجي ياخذج انتي واختج
اهنا كوثر وكفت وحجت //سلام شنو تقترف جريمه شمسويه

::كلت ما اريد اشوفج وباجر خط طلاكج يوصلج
💛يتبع

٩___١٠


#البارت_التاسع
////////////////////////////////
شگول عليك اگول انساك روحي وياك
شگول عليك اظل زعلان مر فرگاك
ومثل فزت طفل روحي تفز لو سمعت بطرواك
ومثل ورده وشحيحة ماي مزنة مطر تتنخاك
واگلك هاك ......شوف جفاك
شوف شسوى بيه جفاك
////////////////////
سلام
انا من سمعت صبيحه تحجي وخالتي تردها كلت خلي اكسر
النقاش كتلهن تعبان اريد ارتاح
لكن كلام كوثر نرفزني خصوصا من سمعت عمتي عليه شلون
اتكسرت العبره بصدرها وخالتي
ام بهاء هم قررت تروح وبعد ما يدخلن البيت بسبب كوثر
واخواتي ما اتحملت فتحت
الباب وكلت الزينب خابري رجلج خلي يجي ياخذج انتي وغدير
وباوعت الكوثر وگلت تطلع تروح ويه امها
هي راددتني وگلت اطلعي وخط طلاكج يوصلح
واتقربت من غدير وزينب :: ترحن البيتچن والي توصل لهنا
اكسر رجلها
صارت صبيحه تصيح وتغلظ على عمتي عليه وتدعي عل
رضوى بس عمتي اجتني وكالت
- - لا يمه سلام مرتك ما غلطت انا الغلطت
::عمه الخاطر ربج كافي ما تبقى يعني ما تبقى انا الغلطان من
البدايه تزوجتها شنو ما اعرفها
صبيحه عتت كوثر وكلتلها //امشي ولج مو مال شريفه وتلمه
مال وحده ساقطه ضحكت علي
وهسه صار يحن الها
عضيت على شفتي وصلت يمها ::احترمي نفسج واخذي بتج
لا والله انتي وياها ...
خالتي قاطعتني //سلام استهدى بالرحمن وانتي صبيحه
روحي منا هسه
صبيحه /:اي راح اروح واعرف شلون اخذ حق بتي امشي ولج
امشي
وراحت صبيحه اخذت كوثر وزينب وغدير دخلن الغرفة امي
وهنه يبجن ويحجن
- - شنو شدعوه علي سلام شنو شكناله وكل ما نجي يطردنا
خالتي ربيعه راحت الهن كالت //بسجن كافي جايات تشوفن
اخوجن لو تلطن ع الاكبر منجن ما تستحن
زينب/:شنو شكلنه سبينا العنب
ام بهاء/؛مع الاسف هاي تربية وسيله شمسويتلجن رضوى
وتسون بيها هيج من هي زغيره وهي وعطاء
ويه المرحومه ايدهن بايدها وانتن كاعدات وانوب تزوجتن
ليش هلكد تكرهنها
غدير /:اي نكرهه من هي زغيره وامي وابوي بس رضوى حبابه
ورضوى شاطره وام بيت وتاليتها رضوى
طلعت تلعب ع الحبلين كسرت كلب سلام
ام بهاء /:لا والله مو لان هيج بس هذا تدريس صبيحه
زينب/:خاله تدافعين عنها مو ضحكت عل سلام واخذت فواز
ليش بعد هالدفاع لو انتم الشريفه والتحجي
الحق ما تردونها
غدير /:كافي زينب لا تحجين انا خابرت رجلي كال شويه وجاي
شنسوي نجي لا سلام ولا فواز يردونه
حاطين عليه على كلبهم
ام بهاء /:ايا طايحات الحظ عليه منو مو عمتجن بس صدك ما
تستحن وزين يسوون وياجن
انا كعدت ع القنفه الي بصف الغرفه ومختنك وانا اسمع
الحجي وعمتي عليه بس دموع بسكته حسيت دخت
حتى الهوى انقطع عني صرت الهث اريد اسيطر على روحي ما
كدرت
شافتني عمتي صاحت /:يمه سلام اسم الله شبيك وج ربيعه
تعاي الحكي
اجت خالتي وياها زينب وغدير رادن يسندني انا نتلت ايدي
منهن وخليت
خالتي وعمتي عليه سندني وصلني للجربايه وانا الهث راحت
عمتي
جابت ماي وشربتني وغسلت وجهي وظلت تفرك بايدي
هدات شويه
تستمر القصة أدناه

عمتي كالت /:سوده عليه عمه سلام كله من وراي
انا كوه احجي /:لاعمه انا الغلطان من البدايه اكو واحد يتورط
ويه صبيحه
وظليت الهث عبالك جاي اركض عشر دقايق اكثر شويه
ارتاحيت خالتي كالت
- - لا تسكت على روحك شوفلك طبيب
::لا خاله بس تعب وما جاي هلكد انام
عمتي /:يمه على كيفك ويه روحك مو كله شغل
سمعت حركه طلعت خالتي لكت عمي طاهر وصبيحه وكوثر
واولادهم وعمي يصيح
- - وينه سلام الي يريد يكتل بتي ومرتي وينه
طلعت خالتي ام بهاء وهي تحجي
- - شنو هاي منك ابو صلاح تره سلام تعبان ما له خلك
طاهر /:لا اريده يطلع يفهمني شلون يكول اموت كوثر وامها
بعد انا ما تحملت طلعت وكفت بالباب كتله وانا الهث وكوه
احجي
::عمي واصله عدي فوك من راسي كافي اخذ بتك وعلمها
الادب
طاهر /:بتي متادبه غصبن ما عليك
::زين عمي اخذ بتك المتادبه لا تخليها يمي لان انا تربية
شوارع اخذها ما اريد اشوفها
طاهر/:ولك سلام شلون هيج تحجي
طلعت من الغرفه ::عمي احجي ويالله اخذها واخذ ولدك الي
جايبهم تهددني بيهم
اطاهر /:هاولك اسليم هيج صار الحجي الا اعلمك
استغربت من كلامه جاوبته باستهزاء ::اه انوب ولك واسليم
وتعلمني والله الك حق بس بالبدايه اخذ مرتك وبتك
علمهن الادب وانوب جيب ولدك وتعال هدد متانيك انا كاعد
وين اروح
طلعت عمتي عليه وحجت //طاهر شبيك خويه تره بتك
ومرتك اتجاوزن علي
طاهر بعصبيه ويأشر بايده //انتي بالذات ما اريد اسمع صوتج
من يوم الي تزوجتي جاسم واحنا محتارين
بيج وبمشاكلج
عليه // طاهر خويه هيچ صار الحجي شني شمسويلي
طاهر صار يزمخ على عمتي //بس لا تفكين حلكج خليها
مساتر وديري بالج تقارنين بناتج باظفر بتي تره
الگاع بعدهي طين ما يبست
عليه/:خلف الله عليك بس تره مرتك تكول هي ربت بناتي
يعني اذا بيهن شي من وره مرتك
صبيحه اتقربت من عمتي ولزمت چتفها //خايبه اسكتي شني
والحجي انتي لو بيج خير وابناتج خير
مو بتج يوميه منتحره غير بيها شي

عليه //سمعت طاهر مرتك شتحجي وانت كلتها هاي هي بعد
ما النه دخله عليك بهلبيت
واهنا اجه فواز ويا رضوى وهو يكول //ياهي بعد ما تدخل
للبيت انتي عمه !
الكل سكت فواز سال //شو ساكتين منو الي يطردج من
البيت گولي
عليه جرت نفس //لاعمه محد طردني بس صحيح انا السبب
كله من ابوك الله يرحمه كلي تزوجي بعدج
زغيره وبناتج امانتي وراح
فواز //وهسه عمه شلي صار
عمتي صارت تحچي بعصبيه وهي تبچي /:الصار يابني انو
هاي بتي (واشرت على رضوى )هاي بتي
المتعلمه المثقفه صار الي يروح ويرد يعيرني بيها والي يكلي
ما ربيت والي يكلي ما توصل لاظفر بتي صرت
عار من وراها ياريت بيوم الشمرت روحها من الدرج ماتت
وفكتني من عارها لو صاحب راميها بالمسدس
وميته جا بجيتلي يومين وسكتت
صبيحه تهز بيدها //وهي لو ما بيها شي تشمر روحها
عليه عضت على شفتها بحرگه //صح كلامج ام صلاح هي لو
ما بيها شي ما شمرت روحها

اهنا رضوى رغم مبين عليها التعب وايدها شادتها وكفت
بنص الصاله وحجت كالت
رضوى =شنو ماما اجرمت ابن خالي وحبيته وتزوجني على
سنة الله ورسوله (وصارت تباوع الصبيحه وكوثر )
انا ما سحلت نفسي على فواز ولا على اي احد وانتي ما دللتي
بيه ولا خليتيني حجه
وهديتيني بس كون ياخذني فواز ولاجبرو عليه ابن خالي والله
حلله والعده حجايه يضمها
لا يطلعها لان ما الها داعي
طاهر //والله طولان السانج انتي المثلج ما تراووين وجهج
فواز بنتر //عمي شنو هالحجي شو انا زوجها واكف وتغلط
ومن ساع مرتك شنو مو جنكم ماخذين
راحتكم بالبيت تره ما يصير
(رضوى دخلت الغرفتها )
صبيحه //البيت مو بس الك فواز سلام هم اله حصه بي وهو
ما خذ بتنا ونسال عليها ونجي نشوفها
فواز //عز الله تسالين عليها ام صلاح انتي مقيمه اهنا كاعده
عبالك بيتج كاعده وماخذه راحتج
طاهر //شنو انت جاي تطردنا انا ما كاعد ابيتك كاعد بحصة
صاحب اخوي
فواز //لا عمي انت ع العين والراس بس المفروض من تجي
انت او ولدك المفروض تكعدون بالهول
وبتك امها واختها يجن يشوفنها ولوهنه ليل ونهار كاعدات
يمها بالمطبخ او هي تروح تكعد يمكم
لا تنسوون احنه عدنا نسوان وما يصير يارايحين يارادين وهاي
الصاله داخليه
يعني اكعد بيها انا ومرتيى سلام ومرته تجي خالتي بالاسبوع
مره عمتي بالشهر مره مو مزار
كل ساع واحد يطلب منها مرااد
صبيحه /:شدعواكم على مود اليستفقرن حتى اخواتكم ما
تردوهن
فواز دار شاف زينب وغدير/:ها عمه ومنو خلاج محامي على
اخواتنا يجن باحترامهن هلا بيهن
لا والله حجي زايد ناقص اوديهن البيت ارجالهن بس كبلها
اجنزهن
زينب /:عليمن تجنزونا احنا رايحات ومن نريد نجي نروح البيت
عمي طاهر
صبيحه //والله بيت صبار صار فاال ال....استغفر الله ربي
خاف هسه الواحد يحجي يصير مو خوش
فواز رد عليها بصوت عالي //لا والله ام صلاح اذا تعرفين شي
احجي لا تضمينه احجي علوااه بلكي
انكتل وامووت علوااه بكد ما كاره الحياة ما اريدها
بس لاتصيرين مثل الحيه المزوهره تريد تذب سمها وما تكدر
صبيحه بنرفزه //انا حيه مزوهره اي حقك شتكول انغسل
بختك
طاهر //انت باي حق هيج تحجي ويا مرتي
فواز بعصبيه /:بحق انو هذا بيتي وبيت مرتي وهي جاي
تتجاوز الي يجي ويدخل للبيت يحترم اهله
طاهر //امشي صبيحه امشي خوش ابن اخوي تالي وكت
يطردني بدون خجل ولا مستحه
جيبي بتج وتعاي
صبيحه بصياح//عليمن اجيب بتي بتي عد رجلها شنو الزلم
تحجي وتدافع عن الفاسدات عاد
بتي ما لكو يمها واحد مصلخ وبحجره ابحدهم نص الليل
فواز //استغفر الله عمه كافينه شرج
عليه من سمعت هيج راحت للغرفه ولحكتها ام بهاء لزمت
رضوى من ايدها الي مخيطيها وهي تكلها
- - ياريت ميته ولا التسوى والما تسوى تحجي وتطول السانها
ياجلبه ياخاينه
اهنا رضوى جانت واكفه بصف ميز تواليت وامها لزمتها من
ايدها صاحت
=ااااااخ كافي مو مليت اكتلوني وخلصوني من هاي الدنيا
شكم مره اكول انا ما مسويه شي
انا مو خاينه سمعتو مو خاينه ما سويت شي
وصارت تضرب بوجها بمرايه الميز وتكول =انا مو خاينه ما
سويت شي

صبيحه /:يممه يمه شوف العياره ما مسويه شي لكو امي ويه
فواز بالغرفه الفوك
فواز سمعها اجه يركض شاف الدم مالي وجها والكزاز الزغير
نابت بكصتها ومراية الميز مصدوعه وامها
وام بهاء يبجن عليها وايدها تنزف اتدنى يمها شافته
اتهسترت صارت تصيح

=كله منك انت السبب الله لا يوفقك الله ياخذك الله لا
يهنيك حطمتني
اتقرب منها وحضنها وهي بعدهي تبجي وكلها //اشششش
كافي لا تبجيين انتي مو خاينه انتي تاج على كل راس
موجود بهذا البيت يكفي لاتاذين روحج
هي تشاهك وتكله //ششو شو ف حت حتى امي تكلي انتي
خاين خاينه ما ماريد اعيش موتني فواز خليني ار ارتاح
فواز دمعت عيونه //كل شي تردي يجرالج وهسه
ام بهاء /:فواز يمه داوي مرتك اخذها للطبيب كزاز هذا مو زين
وفتح الجراره طلع منها ملقط وراح الصيدلية الصاله طلع معقم
وكطن ورجع ما سد الباب وصار يطلع بالكزاز
وام بهاءءلازمه ايد بكصتها وايد بحنجها وعليه كاعده بالكاع
وبس تبجي
بهاي ال

اثناء طلع سلام
راح للمطبخ ومن رجع انتبه وشاف شلون هي كاعده وهو
واكف يطلع بالكزاز وام بهاء لازمتها اتمنى يجي يضرب
فواز ويكله --هاي ملكي ابعد عنها --بس ما كدر
وره عشر دقايق فواز عقم الجرح الي بوجهه والي بايدها طلع
راح يرجع المعقم وسد الباب
وراح يغسل ايده بالمغسله الي بالكلدور
شويه واندك الباب رضوى كانت متمدده ع الجربايه كامت ام
بهاء فتحت باب الغرفه لكتها كوثر
ها يمه تفضلي
لا خاله بس رايده عمه ام رقيه عمه شويه بلا زحمه --واجه
صوت فواز --
تفضلي كوثر تره احنه ما ناكل بشر
كوثر مدنكه /:لا شكرا رايده عمتي
كامت عليه وهي مقهوره والدمعه بعينها راحت للصاله
ها يمه كوثر ناسيه شي ما كلتي اليه على مود تحجينه اسمعج
شيجي على بالج احجي
كوثر/: عمه بس حبيت اكلج انا اسفه مو قصدي سامحيني انا
ما اعرف شبيه عفيه لا تزعلين مني
عمه/:روحي يمه الله يهديج --اهنا عليه صاحت --ام بهاء ترحين
لو بعدج لان انا اريد امشي
ام بهاء //اي خيه جايه
جانت زينب وغدير واكفات اباب غرفة امهن من طلعت ام
بهاء وطلع وراهن فواز على مود
يوصلهن وهو يكل العمته
فواز /:عمه ابقي باتي يم رضوى
اهنا عليه ما اتحملت كبت بوجهه
عليه/:اسكت فواز شسوي ابقى على مود كل الي يمر
يسمعني حجايه كافي الله يساعدها
رضوى الهسه ما ماتت ومتحمله الهسه ما حركت روحها
فواز //عمه على كيفج والله رضوى كل الي تريده يجرالها بس
محتاج وكت
عليه //وكتيش كلي ليش انت شضام كوول
فواز //كل شي بوكته حلو وبعد لو سمعتي احد واصل يمها
بالعظيم اجيب بانزين واحرك البيت
بالي بي واخذها اكعدها بقصر واخليها اميره
ام بهاء //كافي فواز كافي يمه امشي ودينا
فواز بنص الصاله وبصوت عالي
//خاله بعد اليوصل الرضوى لو عمتي عليه لو رقيه منو ما
يكون اكسر ظهره الكل يسمعني ما
اعرف لا عم ولا خال
واتدنه يم اخواته وكال /:الي تجي تشوفنا تجي باحترامها مو
فلانه وعلتانه يقرن باذنهن وهنه يصفكن والما
يعجبها تبقى ابيت رجلها
زينب // جايات البيت ابونا فواز
فواز // لا مشتبهات البيت بيتي انتن كل وحده قبضت
حصتها زايده مو ناقصه مني فالبيت بيتي وبيت مرتي
والي اله حصه وياي اذا يبقى يسوي مشاكل نتبايع وكل واحد
ياخذ حقه
هو يحجي بالصاله واكيد سلام وكوثر يسمعوون راح فواز وهو
نار وانا بدلت وجاي امشط اريد فواز بس يطلع
كوثر كلتلي وهي تعوج بحلكها //لازم .من رحت للمطبخ شفت
ست الحسن وهي مدمايه وهل وديتني
ردت تتاكد شبيها مو
بقيت ساكت ما جاوبتها وانا اربد اعرف رضوى شبيها بس
الصراحه انا من دزيت كوثر دزيتها على
مود تسامح من عمتي لان انا سمعتها من اتجسرت عليها
ولووما امها خلتها وما ردت الموضوع
يتطور انا ما خليتها لحظه
بقت كوثر تحجي وياي //اشو سكتت صفنت وين انت مو
على بعضك هاي من اخذتها للمستشفى وانت بس
ساكت لاتسكت حاجيني مو لابسني انت وديتني على مود
تطمن عليها مو
انا من سمعت هيج تحجي جاوبتها ::اي وشعدج بعد
كوثر //ايا حقيير وتكولها بوجهي

من سمعت كوثر غلطت لزمتها شمرتها بالكاع وقفلت الغرفه
بالمفتاح وصرت اضرب ببها اضرب بدون وعي
وانا اكلها
::انا حقيير اي انا اكبر حقيير لان اخذتج وانا اكرهج لان عفت
حب حياتي هسه اراويج الحقير شيسوي
هي بقت تصرخ وانا اضرب بيها وكفتها اريد اضربها بالحايط
غافلتني وفتحت الغرفه وطلعت صارت طلعتها
على غرفة فواز فتحتها ودخلت انا رحت وراها شفت الباب
مفتوح قليل دكيته طلعت رضوى انا ما باوعت
بوجهه كلت
::كوثر تعاي اطلعي لا هسه ادخل اقترف جريمه
رضوى خاله شال وكصتها عليها لاصق طبي تحجي والتعب
مبين عليها
=سلام كوثر يمي انت هسه روح
تدرون اول مره من يوم الحادث توجه كلامها الي مباشرةانا
سويت روحي ما اسمعها وما رديت عليها
::اطلعي كوثر لا هسه ادخل اكسرج
رضوى =خليها هسه وانت روح اطلع لو اكعد بالغرفه تهدا
وتجي
انا بعصبيه ::كوثر جاي اكلج اطلعي ادب سزز
اهنا سمعت صوت فواز //سلام منو هاي الادب سزز
انا درت شفت فواز ما جاوبته ::كوثر رايح للغرفه تلحكيني ع
السريع
ورحت وانا اغلي من الكل مو بس من كوثر الحقيره جان ابدي
ابجي واطلع ضعفي وكسرتي ودي اصرخ
واكول ::ياناس ياعالم اخوي وحبيبتي خانوني وذبحوني ع النص
لا قضوا علي ولا عالجوني
بس ما كدرت كابرت اجت كوثر دخلت انا بس شفتها طلعت
اخذت السويج ورحت الفارس يمكن هو متنفسي
الوحيد لان يخليني احجي واصيح وهو بس يسمعني
بالطريق شفت وحده واكفه تريد سياره هي بس شافتني
اشرت للسياره انا وكفت
اجت يمي //مرحبا اذا ممكن جنت اتسوك ونسيت جنطتي
بيها الفلوس والموبايل او ،،،
انا ما خليتها تكمل طلعت خمس تالاف وانطيتهن هي
اخذتهن وانا اريد احرك ضربت ع الباب
فتحت الجامه
- - شنو انت عبالك انا جاي اجدي منك شكد ما تفتهم جاي
اكلك الموبايل بالجنطه وبيها فلوسي
ومفاتبحي يعني اريدك توصلني لان بصراحه ما عندي فلوس
اخذ تكسي ومن الكاهن راح
انطيك توصيلتك
انا باوعت الها وكتلها //العفو اتفضلي وانا اسف
صعدت كعدت بصفي انتبهت الها بيضه كل

ش وانيقه لابسه
تنوره وقميص ولافه شال على راسها
ولابسه ساعه ومحابس اثنين ايدها بيضه بيضه بشكل بقينا
ساكتين كسرت الصمت بسؤالها
::تندلين وين اخر مره اشتريتي
- - اي محلات ال--
::تماام
وصلنا نزلت كالت- - شكرا تحب تنتظرني على مود تاخذ
اجرتك
ابتسمت :: انا راح انتظرج مو على مود الاجره لان انا مو
تكسي بس انتظرج اخاف ما تلكين الجنطه
شلوون ترجعين
هي بعجله //ماشي شويه وارجع
نزلت بقت تقريبا عشر دقايق ورجعت بس مبين ما لكتهن
سالتها
::ها بشري
جاوبت بحسره //ما لكيتهن دورت ماكو
::انتي حافظه رقمج
- اي حافظته
طلعت نقالي وكتلها //اخذي اتصلي علي
واخذت النقال واتصلت رن التلفون جاوب رجال انطتني
التلفون واشرت الي يعني احجي
::الو السلام عليكم
:: بلا زحمه نسينه يمك جنطه وبيها هذا الجهاز
هزيت راسي :... اي هي ناسيه الجنطه يمك وبن انت
:: تماام هسه شوويه ونجي

رجعت مره ثانيه النفس المكان بس مو نفس المحل نزلت انا
وهي بس دخلت اتصلت شافني ابو المحل
الرجال كان كلش امين على ما اتاكد من لون الجنطه وشكد
فلوس بيها وانطاها النه واتشكرنا
طلعنا وصلنه للسياره وكفت وطلعت فلوس وكلتلي
//اتفضل استاذ هاي اجرتك وانا اشكرك
انا باوعت الها وحجيت ::منو كلج انا اشتغل تكسي ع كل
مشكورة
هي بتاسف //عفيه لاتزعل علي بس هذا حقك
::حقي لازم اوصلج للبيت
- - شكرا اخاف عندك التزام واعطلك
جاوبتها وانا اجر النفس ::لا اصلا ما عندي شي
باوعتلي وكالت // اشبي وجهك
حمحمت :: حادث بسيط
الحمد لله ع السلامه
جانت انيقه بشكل ورشيقه وبيضه ومحجبه وتحجي بهدوء
رجعنا بالطريق شفت محل يببع
ماي وعصير نزلت اخذت من عنده رجعت انطيتها ماي وبطل
عصير هي اخذتهن وكالت شكرا
وتمينا ساكتين من وصلنا للمكان الي صعدت منه نزلت
وكالت
- - شكرا استاذ وفرصه سعيده
::العفو انسه بالخدمه
- - ها يعني من احتاج توصيله تجي توصلني
::ويه اول رنه بس كولي انا اا،،
- - ساره اسمي ساره
::تشرفنا انا اسمي سلام
- - النا الشرف شكرا مره ثانيه
:: ومن تحتاجيين توصيله شلون
مو انت اتصلت على رقمي من جهازك
:: هاا تدرين نسيت
ابتسمت // ياالله مع السلامه
مع السلامه
نزلت ودارت علي وسوتلي بايدها -باي-ورحت الشقة فارس
بعد ان خابرته وكلي موجود
وصلت وكعدنا فارس انا ما اضم علي شي لان هو صديقي
شافني كلي
- - سلام شبيك ياخي حاول تنسى انت مو اول واحد ولا اخر
واحد ما ياخذ حبيبته
جاوبته ::حبيبته منو حبيبته الي خانته ويه اقرب الناس اله
فارس //سلوم اتاكد يالله تحكم تره احيانا الي تشوفه شي
والحقيقه شي ثاني
:: والله تضحك انت فارس اكلك اخوي الي يعرف اريد بت
عمتي اخذها مني وهيه هسه زوجته
فارس // بس هذا الشي ما يمنع تفكر ليش هيچ سوا ما يمنع
اتسمعه
ضحكت وضربت على رجلي // انت جاي تحجي بالمثاليات
لان ما جربت الحب ولا جربت الخيانه
شفت فارس جر حسره جاوبته :: راح اطلع تروح وياي
هز راسه وطلعنا بسيارتي ورحنا للكوفي شربنا نركيله واتعشينا
افترينا ورجعنا للشقه كوثر كل ساع اتصال ومسج وانا ما
فكرت ارد عليهة برساله
ولا با تصال لان جنت كلش مخنوك وما يعجبني اسمع صوتها
چانت الساعه قريب ال 11 ونص ومنتظرين تبدي مباراة بين
برشلونه وريال فارس يحجي يكلي
- - ليش ما خليتنا نشوفها يم الشباب
::يمعود صياح وعياط ما نفتهم شي نشوفها اهنا احسن
جنا اذا اكو مباراة انا اشجع البرشه وفواز يشجع الريال طبعا
رضوى وياي وعطاء ويه فواز رغم ندري بيهن
ما يحبن الطوبه لكن على مودنا يشجعن ويصفكن انا افتقد
ذيج الايام لمن ما فريق الثاني يخسر ونبدي نطلع اعذار
ونتصايح وتجي امي تعيط علينه وابوي يجي يحجي ويرزل
واحنا ساكتين وهنا واكفات محتارات شيسوون جنت
اباوع وبالي مو يم اللعبه لمن ما وصلني مسج ع الواتساب
ردت ارزلها الكوثر لان هي تدري ما احب احد يضوجني
او يحجي وياي وانا اباوع اللعبه لكن تفاجات شفته رقم ساره
البنيه الي طلبت مني اوصلها انى فتحته قريت

الو مرحبا
رديت عليها ::اهلا منو
- - اهاا يعني ما حاجز رقمي يمك
ردت اخبث :: لا العفو منو معاي
- - اسفه الظاهر غلطانه بالرقم اسفه
وسدته للواتساب انا بدوري ::ساره لا تزعلين حبيت اتشاقى
وياج وانرفزج اسف
شفت الرساله وصلت لكن ما قرتها رجعت كتبت الها - - ساره
افتحي واتساب كلت انا اسف
هم ما ردت انا بعد ما راسلت وره تقريبا اكثر من ساعه ونص
اجتني رساله فتحتها رغم كل شويه
توصلني رساله من كوثر بس ما فكرت افتحها
ساره //اسفه استاذ سلام اتطفلت عليك وزاحمتك اكرر
اسفي
::لا تتاسفي ساره بالعكس بس انا حبيت اخبث وياج
ساره/:ليش شنو سويت لك
::لا ما سويتي شي بس انا خبيث
ساره/:لا لا انت مو خبيث بالعكس
::ها يعني انتي شتشوفيني
حاولت تغير الموضوع كتبت لي //انا راسلتك علمود اشكرك
لان وصلتني وبقيت وياي على ما لكيت
الجنطه تعبت وياي وردت اعبر لك عن شكري
::العفو ست ساره
ساره/:رجاءا ساره بس بلا هالالقاب الي ما الها داعي
::تمام ساره
ساره/:يال

له باي تصبح على خير
::اوكفي شويه يعني انتي كتبتيلي بس على مود تكليلي شكرا
لان وصلتني
ساره /:اي
::اااه اي شنو ساره انتي من نزلتي كلتيلي شكرا
ساره/:وهسه هماتين اكلك شكرا
::العفو بالخدمه انا حاضر سايق مجاني طيلة 24 ساعه ما
عليج الا مسج زغير
ساره/:ههههه انوب مجاني اعمل حسابك يوميه توصلني
::بالخدمه شكم ساره عدنا
ساره/:هي بس انا جان اكو وحده مثلي باليابان تشبهني بس
من عرفت انا شبيهتها انتحرت
وماتت وبقيت بس انا
::هههههههه
ساره/:دوم الضحكه استاذ سلام
::هاا مو توج كلتي ما احب الالقاب
ساره/:اي مو ردت احجيك
::ساره ممكن اتكلم معاج دائما لو اسبب الج احراج
- - لا بالعكس كل احراج ماكو
::تسلمين خو ما تعاقبتي لان نسيتي الجنطه
- - لا ههههه منو يعاقبني
::اهاا مبينه مسيطره
- - يعني بس مو كلش هسه تسمحلي
::لا ابقي اقصد اي براحتج
- بااي
::بااي
من طلعت من المحادثه بقيت گاعد اجاني اتصال من عمي
طاهر انا ما جاوبته مالي خلكه بعدين
اتصل عمي صاحب انا رديت
::هلا عمي
صاحب /:اكلك سلام انت وين
::خيير عمي شكو
صاحب/: اكلك انت وين تكلي خيير شكو
::ما متت عمي بعدني دايح بالشوارع احد اله عندي شي
مطلوب بطلابه
صاحب/:شنو هالحجي هذا بابا موعيب كل ما بالامر بالنا يمك
وهاي زوجتك المسكينه
بس تبجي اقلها رد عليها وعمك ابوصلاح اتصل ليش ما
رديت
:: العفو جنت بالحمام
صاحب/:بابا سلام تعال بات اهنا ابيتك
::عمي خليني براحتي اترجاك
صاحب/:براحتك بس خابر مرتك وطمنها
جاوبته بعصبيه :: اكلك عمي انت ليش تريدني حتى انت ما
ارد عليك
صاحب /:شبيك سلام ليش هيج تحاجيني
::شنو عمي انا كفرت من اخذت غلطة عمري بت طاهر اكلك
ابو انمار مالي خلك انت مو اتطمنت
انا ما بيه شي انت بدورك طمنها وطمن الجيش الي يسال
عليه بقياده صبيحه
صاحب/:ولك سلام شبيك شلي جرالك
::عمي والله مالي خلك يالله تصبح على خير

حسيت بنفسي مختنك ما اعرف شسوي اخذت الموبايل
ودخلت عل رقم ساره كتبت الها
::ساره مي خالف تتحمليني وتبقين تحجين وياي اذا ما نايمه
شويه واجاني ردها
ساره/:سلام شكو ياستار شنو صاير
::مختنك ساره وضايج
ساره/:على كيفك سلام لا تجهد نفسك اخذ شهيق وزفير على
كيفك انا وياك الحد ما انت تطردني
::مستحيل اطردج ما اعرف ليش ارتاح من احجي وياج
ساره/:اهاا هاي وانت قبل ساعتين تعرفت علي
::منو يكول ساعتين قصدج سنتين مو
ساره/:هههه مدام كمت تحشش هاي هي صرت زين اروح
انام
::منو صار زين اصلا كل احوالي مكلوبه
ساره/:كل شي ولا احوالك تنكلب انوب ننزل بنص الشارع
ونحتار شلون نقنعك ترجع للبيت
......زين يعني مو بس انا احشش انتي هم
وتمينا نسولف للساعه اربعه الفجر عرفت عنها انها منفصله
وعدها ولد وعايشه هي وامها وابنها
وعدها اخت وحده متزوجه وزوجها عنده محل اكسسوارات
موبايلات شريك ويه واحد وهي تشتغل
بدائره حكوميه وابنها عدها لان زوجها عافها واتزوح وحده
جانت اله علاقه بيها
هنه بس اثنيين بنات ما عدهن اخ بقيت اسالها وهي تجاوب
بس هي ابد ما سالتني
::انتي اسالي وانا اجاوب
هي كالت //لا خليها للوقت انت تسولف براحتك لان احس
بيك تعبان ما اريد تسولف وياي مجبور
وبعدين تتندم
::اتندم منو اليتندم هذا غبي اليتندم من يسولف وياچ
ساره/:هههه الله يخليك
::زين مثل ما انتي كلتي خليها للظروف وتحجيلي عن نفسك
انا هم اكلج خليها للظروف اعزمج
على فنجان كهوه بس اريد وعد من اطلبه منج توافقين
ساره/:تماام بس خليها للظروف
::ان شالله حاعتبرها موافقه مبدئيه
- تمام
بعدها ما حسينا نمنا انا كعدت تقرببا الساعه بالتسعه فتحت
النقال لكيت ساره دازه
صباح الخير اليوم انا متاخره عن الدوام لان اكو واحد عطلني
هاي دازتها قربب الساعه 8
انا كتبت الها //صباح العسل حقج وانا مستعد الاي شي
تطلبينه
هي ما جاوبتني انا طلعت للشغل بقيت بالمحل والظهردزيت
على غدا جابولنا انا والعمال اتغدينا تقريبا
الساعه اربعه رجعت للبيت دخلت لكيت صبيحه وسهير وكوثر
وعطاء بالمطبخ دخلت كلت
السلام عليكم
وفتت للغرفه ما انتظرت اسمع ردهن دخلت واجت وراي كوثر
على اساس هي زعلانه انا ولا عبالك اشوفها
فتحت الكنتور وطلعت ملابس وفتت للحمام سبحت وبدلت
واخذت السويج وطلعت بدون ما احچي ولا كلمه وهنه
بس ايباوعن
رحت يم فارس وانا كل شويه اباوع للنقال واشوف ساره ما
الها ظهور بعدها طلعنا وسهرنا ورجعنا
فارس باوعلي //شنو سلام ليشءماتروح البيتكم يم زوجتك
شعلت جگاره :: انا اجي اهنا للشقه ارتاح وابقى ابحدي انت
اذا متضايق انا اروح اكعد بفندق لو اروح
للمحل اكعد تره عادي ما يهمني
فارس //تعرف سلام هاي الشقه مالتك قبل ان تكون الي ما
انسى انت اشتريتها الي بعد
ان طلعت من بيت عمي انا كل همي تعيش حياتك ويه
زوجتك

هزيت ايدي. :: زوجتي فكنا الله يخليك زوجتي الي تكلها
روحي يمين تمشي يسار الي تكلها هذا الكلاام
لا يطلع الكا ع الفضائيات يا زوجه هاي هاي غلطة عمري
قارس //سلام زوجتك واقع حال

ولازم ترضى بي
هزيت راسي :: ادري واقع حال بس انا عاقبت نفسي ما
عاقبت احد ثاني ياريتني يافارس مثلك طلعت
واستقليت ولا كل شويه اشوف ذباحي بعيني
فارس //سلوم خويه هسه انت نام وارتاح والصبح روح
الشغلك ومناك روح راضي زوجتك
ما جاوبته رحت للغرفه واتمددت ع الجربايه وفتحت النقال
هالمره كوثر دازه رساله وحده
انام لو انتظرك
ما جاوبتها دخلت على ساره ما متصله دزيت كلمه--مرحبا--
هي عبالك جانت منتظره راسا ردت علي
هلاو
وبقينا نسولف هالمره امور عامه شنو الهوايات والاكلات
والالوان ع الساعه تلاثه الفجر نمنا كعدت
الصبح لكيتها دازه تحيه صباحيه وكاتبتلي
- - اتريك يالله تنزل صحتك تهمني
وفعلا تريكت ونزلت رحت للشغل طبعا عمي طاهر ما بطل
اتصال وانا بدوري خليت العامل يجاوبه ويكله
راح بشغل ونسى نقاله
الساعه بالوحده راسلت ساره كتلها بيش الساعه تطلعين من
الدوام
هي كالت الساعه بالثنتين ركبت سيارتي وكبل يم الدائره
الساعه بالثنتين وعشره طلعت تتمشى
ويه صديقاتها هي شافتني اجت يمي وهي متفاجئه وبوجهه
ابتسامه
ساره/ هلاو شجابك
انا فتحت الباب وكتلها ::كنت قريب ع الدائره ومريت اخذج
ساره/:اي بس خاف تتاخر
::اصعدي ما عندي شي
وصعدنا تمينا ساكتين بعدين كتلها ::اليوم انا عازمج ع الغدا
ساره/:لا ياغدا ما اريد اتاخر
::خابريهم وطلعي اي عذر
ساره/:مو جنك تامرني
وكفت السياره ودرت عليها وكتلها ::انا اسف بس اتمنى
نتغدا اليوم سووا
هي ما جاوبتني طلعت التلفون من جنطتها وخابرت
- - الو جنان شلونج
اكلج جنه امي تغدت
تماام وعلاوي
زين فدوه جنان ام ارشد تعبت شويه واخذتها البيتهم ويمكن
العصر اروح وياها للطبيب لا يظل بالكم
الله يسلمج بس اي احد يسال علي كولي عد خالتي احسن
وسدت النقال وباوعتلي انا ابتسمت ورحنا للمطعم كعدنا
وبعدين طلبنا اكل واتغدينا واحنا نشرب جاي
ساره باوعتلي وحجت //سلام شبيك ليش حزين
انا دخنت جكاره وسالتها ::ها يعني انتي السعيده رغم
تبتسمين بس الحزن مالي وجهج
ساره/:اي ما كو احد مرتاح وهسه كلي سلام شلي قاهرك
::شلون تعرفين بيه مقهور
ساره/:احساسي يكلي
::وممكن تكلين الاحساسج يخلينه شويه ناخذ راحتنا
ساره/:شلون يعني
::ساره انا شويه من اشوفج انسى همومي وارتاح وانا بحاجة
الراحه رجاءا ساعديني
ساره وهي تبتسم وتهز براسها // لا سلام اذا من تشوفني بس
شويه تنسى همومك ما اقبل اريد من تشوفني تنسى
كل همومك تمام
ابتسمت :: ماشي
ساره/:يالله لازم اروح
:: وين
ساره // وصلني للبيت
:: هاي شنو سمعتج تكلين الاختج راح ترحين تاخذين ام
ارشد للطبيب والمره خطيه تعبانه لازم تبقين يمها
هي ضحكت هزت راسها بالموافقه ورحنا للسياره صعدنا
ظلينه نمشي ونزلنا يم كوفي هي كالت
ساره/:هاي شنو سلام مو تونا جنا بالمطعم
::يعني وين نروح نكعد بالكوفي والعصر نفتر بالسياره
ساره/:ليش هسه مو عصر
لا عزيزتي هسه بعد الظهر
وكعدنا هالمره طلبنا كهوه ونركيله الي جابولي انا سحبت هي
باوعتلي كتلها تجربين هزت راسها وانطيتها
سحبت نفس جانت سحبتها كلها اغراء بصراحه هي مغريه
باوعتلي وكلتلي
ساره/:سلام انت شتريد مني بالظبط
انا تفاجئت من كلامها جريت نفس وجاوبتها
::انا ما اريد منج شي مجرد صداقه واحد يفضفض للثاني اذا
جان هذا الشي يضايقج انا اسف وهسه اوصلج البيتكم
ساره/:سلام مو هذا قصدي بس انت تعرف وضعي انا
منفصله وعندي ولد
::اي اعرف او بالاحرى انت كتيلي
هي بابتسامه/:او كي ياصديقي ما عندي مشكله
بقينا بالكوفي والعصر طلعنا رحنا للكورنيش اتمشينا عرضت
عليها نبقى نتعشى بس هي كالت لا ترجع للبيت
وصلتها قريب فرع بيتهم نزلت وراحت وانا رحت للبيت دخلت
لكيت رضوى كاعده بالصاله تباوع ع التلفزيون
وايدها مشدوده رحت بالغرفه انا دخلت اتمددت ع الجربايه
بدون ما اسلم اجت كوثر كعدت يمي 👹


#البارت_العاشر
/////////💔💔💔//////////
سلام
بعد ما اجيت العصر للبيت دخلت للصاله شفت رضوى
كاعده ع التلفزيون حسيت بيها تباوعلي بس تمثل
عدم الانتباه انا من شفتها تنرفزت على الرغم انا جنت شويه
احس براحه لان ساره من النوع الي كلامها
وتصرفاتها تريح المقابل لكن من شفت رضوى استذكرت
كل الي صار دخلت للغرفه شفت كوثر كاعده
ع القنفه وبيدها النقال انا راسا اتمددت بملابسي ودرت
وجهي حسيت بكوثر اجت تمددت يمي وخلت ايدها
عل خصري وكالت
- - ليش داير وجهك وحتى ما سلمت انت زعلان والمفروض
انا ازعل عليك
انا ما جاوبتها هي هم حجت وكالت
- - ليش سلام اني مو زوجتك حتى ما كلفت نفسك ترد عليه
لو بمسج
انا كنت مقرراعاقبها بس من سمعت كلامها شويه رخيت
اجيت احجي وياها هي حچت بس هالمره كأنما
تزمخ بكلامها
- - انا سلام تره مليت متت من تصرفاتك شنو شبيك
تخربطت امورك بس شفت ست الحسن
كاعده بالصاله اريد اعرف انا الى متى ابقى هيج ملي

ت تعرف
شنو مليت وحضرت جنابها
الساقطه تكعد وكت جيتك وانت بس اشوفها تنسى كل شي
ولا عبالك متزوج
انا من سمعت كلمة ساقطه انقهرت اي هي ساقطه ومنحطه
بس هاي الكلمه انا الي اگولها جريت نفس
كوثر // ها اشو رجفت تريدها مو كلي اي هي تره عادي عدها
مو چانت وياك ولگيتها ويه اخوك
روح الها سلام رووح لان الظاهر انت مو مال حلال بس تدورون
حرام انت واخوك
درت عليها وگعدت وانا عيوني تطلع نار كمشتها من شعرها
وججيت وياها وانا اصك باسناني
::ولج انتي مو مال احترام انتي حيوانه ومربوطه بس انا الج
كوثر تعت بايدي /؛اووي هدني انت بس هاي الكادر بيها عليه
:&كافي مااسمع لج نفس ادب سزز ردت اعبرها الج مالت
حقير بس انتي ما تستاهلين
كوثر/:طبعا ما استاهل لان انا مو حضرة جناب رضوى
كمت عليها خليت اصابعي بركبتها
::شوفي ولج انا اذا تذكرين من اول يوم كتلج لا تجيبين طاريها
بس انتي اكبر حقيره
وشمرتها بالكاع واخذت النقال والسويج وطلعت وانا اسمعها
تحجي
كوثر/:اي اطلع انت مو مال مره محترمه مال وحده ساقطه
تلعب عليك وعلى غيرك
صعدت بالسياره وانا مقهور ابدي ارجع اموت كوثر وبنفس
الوقت جنت مقهور من رضوى وصرت
احجي ويه نفسي
::ليش ولج نزلتي نفسج للحضيض خليتي اليسوى والما
يسوى يغلط عليج ليش يارضوى ليش كسرتيني
وصلت للشقه وفتحت الباب ودخلت وصارت عيني بعين
ابنيه شايله صينيه بيها استكانات جاي جانت حامل
فهي من شافتني تفاجات وانا هم اتسمرت بمكاني هي راحت
للصاله اجه فارس وكال بصوت عالي
- - هلا بيك سلوم اتفضل ما كو احد غريب
واخذني من ايدي ودخلت لكيت عم فارس رعد وهاي جانت
زوجته اخلاص انا اعرفه الرعد هو تقريبا اكبر
من عدنا بس مو بهواي متزوج هاي البنيه صار اكثر من سنه
ونص وهسه زوجته حامل زوجته بنيه خريحة
كليه خطبها وتزوجها بعد ان شافها شكم مره يمكن علاقه هو
من شافني انا سلمت عليهم وكلت الفارس

::انتم اخذو راحتكم انا اروح وبعدين ار...
فارس قاطعني واشوفه متوتر //شنووسلام انت مو غريب ما
تعرف عمي رعد
رعد //اكعد سلام يمعود بلكي تقنع صاحبك
كعدنا انا وفارس مقابلين رعد وزوجته شفت فارس عينه
بالكاع
رعد //فارس كافي لازم ترجع صار اكثر من سنه لازم تفهمني
شلي صار سامع حجايه مني من مرتي انا لا
تعتبرني عمك اعتبرني مثل سلام
فارس //لا عمي كل شي ما صاير
رعد //ما طول بيها عمي معناتها انت زعلان او سامع شي ما
تريدني اعرفه
فارس //انت عمي وعلى عيني وعلى راسي بعد احترامك
واجب
رعد //اذا صحيح تحترمني ارجع وياي انت تعرف انا شكد
اعزك لان معتبرك اخوي الزغير وانا مسؤول عنك
فارس //ادري بس انا اريدك تاخذ راحتك وانا الحمد لله هم
هاي الشقه مالتي ومرتاح بيها
اخلاص //هذا مو عذر فارس شنو شقه وبيتك موجود
وعمامك اكلو وجه رعد عبالهم طاردك
فارس بدون ما يباوع كلها //لا انا خابروني عمامي وفهمتهم انو
هذا الشي يريحني -بعدين باوع الرعد--
عمي رعد انت مو بس عمي انت اخوي وصديقي وما انكر
اهواي سويت على مودي لا تاخذ ابالك ما اكدر
اكلك بيع البيت وانطيني حصتي ابقى انت كاعد بي على ما
تكمل حصتي واخذه الك
رعد //بس تدري يافارس اطول يالله اكملك
فارس //وانا ما مستعجل براحتك
رعد //فارس ليش كل هذا تعال وخلي نرجع مثل قبل
فارس //والله ما صاير شي بس انا اريحلي اهنا وانت هم لازم
تاخذ راحتك
رعد باوعلي وكلي //سلام يخي احچي ويه صاحبك قنعه خلي
يجي وياي
::والله شكول فارس تره يريد راحتك انت متزوج ومن حقكم
ترتاحون ابيتكم وتعرف فارس يستحي وبعدين
هو مرتاح اهنا انت لا تشغل بالك
رعد //بس انا هاي اخلاص اسالوها من خطبتها كتلها انا
عندي فارس ادارينه نفس اخوج
فارس عينه بالگاع // وانتم ما قصرتو رعد لاتهم بيه والله
عايش ومرتاح وما ناقصني شي
انا لزمت فارس من چتفه :: اي فارس بس انت هم لازم
تستقر تشوفلك بت حلال وتتزوج
رعد //علواه فارس وكل مصاريف عرسك عليه
فارس //بعد وكت ما مستعجل
رعد // يابعد وكت يالله بالله شد حيلك واذا ما ابالك بنيه
اخلي اخلاص تشوفلك مو اخلاص شتكولين
اخلاص // هو بكيفه احنا شنريد غير راحته
فارس بقى ساكت كعدنا شويه سولفنا وهمه استاذنوا حتى
يرحون ورعد كل الزوجته اغسلي الاستكانات ورتبي المطبخ
لكن فارس ما قبل كله // لا لا شلقصه هنه كلهن استكانيين
من طلعو رعد وزوجته باوعت الفارس چان متوتر سالته وانا
ادخن
:: فارس ليش ما رجعت ويه عمك مو تكول الطابق الثاني
بيت ابحده وحتى الدرج مستقل وهذا حقك من ورث جدك
فارس //كلامك صحيح بس ما احب احد يشاركني ابيتي
اقصد عمي تزوج وراح ايكون عائله ما اريد اتعايش وياهم
:: ليش
— خلص عمي تزوج ياخذ راحته ابيته وما طول انا موجود
تصير احراجات
::امرك عجيب ذاك بيتك مثل ما هو بيت عمك
فارس /:اي صحيح هم بيتي بس ابعد افضل
::زين ليش ما تبيعونه وكل واحد ياخذحصته
فارس/:تدري سلام من اتوفت امي بقيت عد جدي وبيبيتي ام
ابوي ابوي بس خلصت اربعينية امي تزوج بحجة
تدير بالها عليه جان عمري تلث سنين بس اويلي شسوت

بيه
مرت الاب اجه جدي بسكته وشافها رجع اخذني
وربانا انا ورعد اكثر من الاخوان جدي كتب البيت باسم رعد
واسمي ومن سالو ابوي وعمامي الباقيين
جدي جاوبهم // اريد اضمن مستقبل فارس كتبت البيت
باسمه واسم رعد حتى واحد يدير باله ع الثاني
وانتم بايد نسوانكم باجر ابو فارس اي شي ما ينطي الهذا
اليتيم
البيت مثل ما تعرف سلام بمنطقه تجاريه يجيب مليارات
وعمي ما يمتلك ينطيني نص المبلغ وانا ما اريد الح علي
لان انا اعتبره اخوي الجبير مثل ما انت تشوف فواز انا اشوف
رعد
انا من جاب اسم فواز راسا غيرت الموضوع كتله
::يالله خلي نطلع
فارس كلي //سلام الى متى تبقى تتهرب واجه نفسك يااخي
ما يصير هيج
انا ما جاوبته اجاني مسج ع الواتساب فتحته شفته ساره دازه
خاطره حلوة
جاوبتها ::انتي هسه وين
- - بالبيت
::اريد اشوفج
- - وانا هم اقصد خيير خو ما كو شي
::لا بس ضايج
- - تماام بعد ساعه براس الفرع الي قبل بيتنا
::مو ساعه ساره نص ساعه
- - مااشي
اخذت السويج والموبايل وطلعت فارس سالني // وين سلام
:: عندي شغل يجوز ارجع انام اهنا
— يحتاج اجي وياك
ابتست وهزيت راسي :: لا انت ارتاح
طلعت يم راس الفرع وكفت وانا افكر واحجي بيني وبين
نفسي
::شنو ساره تعنيلي وليش انا اتمنى كل شويه احجي وياها
واشوفها معقوله يعني اهتمامي بيها حب وشنو هذا
الحب الي بليله ويوم
انفتح باب السياره واجت ساره جانت لابسه تنوره ضيقه
سودا وقميص لون نيلي طويل وبابتسامتها سلمت وكالت
- - هلاو سلام خيير حتى ما خليتني اعرف البس
بدون ما اباوع سقت السياره وكتلها ::شتلبسين حلو عليج
ومرتب
ساره /:شكرا خير شصاير
:: ضايج ما صاير شي بس حبيت اشوفج
ساره /:اوكي وهاي شفتني
حسيت بكلامها نرفزه وعتب ركنت السياره دخنت چگاره
وباوعت الها وانا اجر نفس
:: ساره اعذريني ارجوج يمكن ما اعرف اعبربس فعلا
محتاجج
هي دنكت وجرت حسره بعدبن باوعتلي //تدري سلام من
عرفتك عيني بس ع الموبايل انتظر منك تلفون
او رساله
:: اي وليش كل هذا الشي
ساره/:ما اعرف نفس السبب احس انو انا بحاجتك
سكتت وانا بيني وبين نفسي متعحب من جراتها سالتها ::
وين تحبين نروح
ساره/:وين ما تحب بس خلي نروح ناكل واله اكلك خلي ناخذ
لفات
:: ليش ما ننزل للمطعم
– لا سلام يعجبني بس انا وياك ناكل
ابتسمت :: صار
وكفنا يم مطعم هي كالت // كل واحد لفه كافي وبيبسي
جابولنا الطلب ورحنا ع شط العرب وكعدنا ع المصاطب واكلنا
بعدين رادت حب رحت جبتلها
باوعت الها هي ابتسمت وانطتني حب //وهسه سلام
سولف
انا جريت حسره ::متضايق ساره حتى من نفسي
ساره/:شنو السبب ليش سلام
:: لان ما مرتاح
ساره/:على كيفك ويه روحك كل مشكله والها حل
:: الا مشكلتي ساره ما الها حل
ساره/:كلنه هيج نكول بس من تسمع مشكلة غيرك وتشوف
حاله راح تهون عليك مشكلتك
:: ممكن اطلب منج طلب
ساره/:اتفضل
::: ممكن ما تساليني عن مشكلتي
ساره باوعتلي /:مثل ما تحب اسفه
تمينا ساكتين باوعتلي وكالت /:يالله نروح
ركبنا بالسياره جانت الساعه تقريبا بالتسعه او اكثر مشينا
كتلها اوصلج للبيت هي هزت راسها بدون ما تجاوب
انا باوعت الها وسالتها
::منو عدكم بالبيت
ساره/:اليوم ابحدي امي راحت الخالتي واختي راحت البيت
اهل زوجها لان عمها مريض
::وابنج وين
ساره/:اليوم دز علي ابو يشوفه هاي صار اكثر من ست اشهر
ما شايفه
::وانتي ابحدج بالبيت
ساره/:اي على اساس اروح البيت خالتي بس من خابرتني ما
رحت
::ليش ساره
ساره/:لان حسيت بيك انت ضايج ومقهور
وصلنا قريب الفرع يم بيتهم كالت //لا اليوم وصلني للبيت
عادي
انا وصلتها باوعتلي وكالت
ساره/:تحب الكهوه اسويها كلش طيبه
ما خلتني اجاوب كالت راح انزل وافتح الباب ودخل السياره
بالكراج ونزلت طلعت المفاتيح وفتحت الباب
ودخلت السياره وبقيت مانزلت اجت فتحت الباب وهي
تبتسم
::شبيك انزل ما اسويلك شي تندل وين اشتغل وبيتي
واسمي يعني انا راح اخطفك بس الليله
انا ضحكت ونزلت
دخلت للبيت شفت هول وديوانيه كعدتني بالهول وراحت
فتحت باب ودخلت وره شويه اجت جايبه كهوه
وخلتها گدامي وراحت ورجعت وهي لابسه برمودا لونها
ماروني ونص ردن جانت بيضه ومغريه بنفس
الوكت شربت الكهوه هي كاعده كبالي
انا باوعت الها وكتلها ::ساره ليش هيج تسوين وياي
جرت نفس /:انت كلتها وياي يعني مو ويه احد غيرك
:: اعرف ومتاكد من هذا الشي
ساره/:خلص لا تسال

كامت شعلت جكارة وسحبت نفس وخلتها بحلكي من
اتقربت شميت عطرها انا دخت ما سيطرت على نفسي
لزمتها من زندها وسحبتها وكعدتها بحضني وصرت اشم
بشعرها وركبتها واباوع الها مغمضه شبه ابتسامه
على وجهه ما اتحملت وهي بادلتني نفس الشعور لزمتني من
ايدي واخذتني الغرفة نوم مرتبه ومعطره
كعدت ع الجربايه وهي كعدت يمي وانا العب بشعرها بعدين
كامت شغلت اغنيه وصارت تتمايل جانت حلوة بكل
شي الصبح كعدت لكيت روحي بس بالشورت ونايم وبحضني
نايمه ساره وهي لابسه بدلة نوم

قصيره تذكرت
البارحه بس الشي الي عجبني رغم كل شي صار لكن ساره
منعت نفسها مني
تحركت هي حضنتني وكالت بصوت ناعس
- - ابقى يمي ما اريد منك اي شي احبك
انا بس سمعت حضنتها وكتلها
::ما اعوفج وراح ابقى يمج وشنو تردين اسويلج
هالايام اكثر وكتي بين الشغل وساره يوميه نلتقي او نتراسل
احيانا نبقى للصبح اروح للبيت وكل شي اسوي وياها
لكن ابد ما تقبل اتقرب الها وچنت متقبل هذا الشي ما اعرف
ليش رغم اريد اخذ كل شي بس مجرد ما ترفض
ما الح عليها وبنفس الوقت ما اتقرب الكوثر وهي تحاول
تتقربلي بس انا ولا يمها مو لان ساره شغلتني
او بعدني افكر برضوى بس كوثر غلطت بحقي من ما اخذت
كلامي ومن غلطت علي وكالت حقير ولان
بصراحه اكثر ما اكدر اتقبلها زوجه الي
انا جنت اقابل ساره بره يعني بمطعم بكافتريا ورحت اكثر من
مره وياها للبيت وصارت علاقه حميمه بيناتنا ما
اعرف بشنو اشبهها لان كل شي نتبادله انا وياها لكن شي
واحد رفضته ساره كالت اله بالحلال
وما حاولت تضغط عليه او تطلب مني اي مقابل بس ما تريد
اعوفها جنت لمن اكون وياها ارتاح هواي بنفس
الوقت احس بيها مقهوره اسالها تكلي

- - سلام انا احبك واتقبل كل شي منك بس انت ما تحبني
كلبك معلك ويه وحده مالكه كل شي بيك وما تكدر تنساها
هنيالها على حبك تدري اكرهها واحسدها عليك
انا بيني وبين نفسي احجي ::مو بس انتي تكرهينها انا وكوثر
وعطاء وحتى امها وامي وابوي بكبورهم هم يكرهونها
بس انا من اكرهها احبها اكثر وما اكدر انساها
انا بالمحل لمن ما اجه عمي رحمن العامل الي يشتغل عد
فواز وكلي
- - هاك عمي سلام هذني دزهن فواز يكول مالت حجي هادي
خلي يوديهن بيد السايق لان هو اشترالك بضاعه للمحل
عمي رحمن من واحنا زغار جان يشتغل ويه ابوي الله يرحمه
الي چان يحبه وموصينه ندير بالنه علي
ومن استلمنا الشغل انا وفواز هو يعلمنا واحنا نحترمه لان هو
طييب ومحبوب ويمكن ماكو عامل بمحل فواز يعوف
الشغل لان عمي رحمن محتويهم انسان خيير وطيب وامين
اشوف بعيون رحمن كلام سالته
:: عمي شكو
هو جر نفس // عمي سلام تره فواز تعبان ودايخ ما ادري شبي
ولو يمثل القوة بس الصدگ صفنه تاخذه
وصفنه تجيبه هو اخوك تعال شوفه اساله
ضميت شفتي وهزيت راسي :: ان شالله عمي
- - سلام عمي فواز خوش ولد وكريم تره وماكو احن منه بس
هالايام عصبي ويعيط الاتفه الاسباب شكم مره
بمره العمال رادو يبطلون وانا ارجعهم هو اخوك وعزوتك
شوفه شبي واگعد ويا وسولف

هزيت راسي وهو خلا وراح انا صحت على ابو غدير يشتغل
وياي وسالته
::يمته اجه فواز للمحل
ابو غدير // قبل اسبوع وسالني ليش المحل ما بي بضاعه
كتله سلام ما اتسوك وره يومين اجت البضاعه
::ها وليش ما كتلي
- - عمي من يمته نكلك انت واخوك تسوكون وتخلون
اتذكرت انو العمال ما عدهم علم بلي صار بيني انا وفواز اقصد
زعلانين ويه بعض سكتت واخذت الفلوس
حولتهن ومريت ع المخزن شفت البضاعه وفعلا انا اهملت
شغلي خصوصا بعد ان اتعرفت على ساره صرت دائما
اروح يمها واسهر اما كوثر ما اوصلها واذا وصلتها لازم تنهيها
بعركه وانا ما اقصر وياها
وبدا دوام الكليات عطاء وكوثر بخط ورادت رضوى هم تاجر
وياهن بس سهير اجت وكلتلها وهي متخوصره
وتحچي بصوت عالي /: انتي گايله الهاي صاحبتج تردين
ترحين وياهن بالخط
رضوى = ايي ليش
— كوثر وعطاء ما يردنج يكولن بس تصعد احنا راح ننزل
وننشر غسيلها الوصخ ع الحبل ونخلي الي ما
يشتري يتفرج
بوكتها جان ليل وسهير تعمدت تعلي صوتها على مود انا
اسمع جان جاي فواز من بره لمن شاف سهير تضحك
ورضوى واكفه اباب الغرفه والدمعه بعينها سهير بس شافت
فواز صعدت الغرفتها
فواز //شبيج رضوى ليش تبجين
=ما بيه شي
- - لا بيج شكلتلج سهير
رضوى بقلة صبر =ما كالت شي
- - هاا يعني مصره ما تحجين انا اعرف بطريقتي الخاصه
صاح فواز //سهير ام انمار
نزل عمي صاحب وكال /:شعدك تصيح بهالليل خيير خو ماكو
شي
فواز/:رايد ام انمار بلا زحمه
صاحب نزل من الدرج /:وشرايد منها
فواز/:اريد افصل على طولها رايدها خلي تنزل رحمه الاهلك
صاحب رفع راسه جهة الدرج وصاح //سهير انزلي خلي
نشوف شعده
نزلت سهير وعطاء جانت بالمطبخ وصاحب واكف فواز كلها
فواز/:ام انمار شحاجيتي رضوى وخليتي دمعتها على خدها
بهاي الاثناء اجت صبيجه وطاهر
طاهر //يا ستار شصاير بس تصيح
بدون ما يباوع الهم //ما صاير شي عمي اكو شغله واريد
افهمها
سهير //انا مالي شغل كوثر وعطاء وصني وانا رحت كت
الرضوى
فواز/:اي شكتيلها
سهير //اسالها انوب فوكها صرت انا المو زينه هاي هي
واسالها
فواز//وليش اسالها انا هسه اعرف
عطاء عطاء --وصل يم غرفة كوثر ودك الباب --طلعت انا
::هي هي ليش تدك هيج وشتريد
فواز//رايد مرتك
::هااا وشرايد منها
فواز//صيحها وانت تعرف
اجت كوثر وعطاء باوع فواز
فواز//اكلجن شكايلات السهير تحجي الرضوى
عطاء ما تباوع بوجه فواز بس كوثر //ما كلنه شي
فواز//لا كايلات وهسه اذا ما اعرف والله احرك الببت فوك
رووسكم
طاهر

//يواشك شنو انت محد بعينك وبس تهدد كلمه
والثانيه احرك البيت
فواز بعصبيه // لا ما اعتبر اكبر واحد اريد اعرف شنو
محاجيات رضوى
سهير /:هنه كالن ما نريدها تاجر ويانا خط بس تصعد ويانه
احنا ننزل
فواز/:اهاا بس هاي ورضوى تبجي ما معقوله هسه ام انمار
تكليلي شوصلتي الرضوى
طاهر // انت شنو جاي اتحقق
هو ما رد علي خزر سهير الي باوعتله بخوف // هنه كالن بس
تصعد ننشر غسيلها الوصخ فوك الحبل
فواز باوع الرضوى واشر عليها وحچى بصوت عالي //رضوى
عليمن تبجين ما عندج غسيل وصخ
اصلا انتي اشرف وانظف وحده ومو اله تصعدين خط
اصطبريلي بس هالشهر واعلمج سياقه واحلى
سياره لعيونج من باجر تجي عليج تكسي اخر موديل توصلج
للكليه وتجيبج بعدعليمن خط وفره واتعبين
انتي بس تامريني امر وتدللين رضوتي انتي مو اي وحده انتي
مرت فواز والكل خلي يعرف
صبيحه تعوج حلكها //بس عوود شوفلها سايق التكسي رجال
جبير الدنيا موور
فواز وهو يبتسم // فاهم قصدج ام صلاح واعرف شتردين
تحجين بس مو رضوى الي ينكاللها هذا الحجي
(بعدين دار ) اعيد واكرر الي يكعد بالبيت يحترم اهله لو ماكو
والله اشمر الكل واحد حصته وتطلعون

ودخل فواز وراحت ورا رضوى شفت بايده علاليك عرفت
هذن ملابس الرضوى للدوام انا ساكت ولان
اعرف كوثر تحجي هذا الكلام واكثر ما عقبت على كلام فواز
وعمي طاهر يباوع الصاحب ويگله
— اگلك صاحب شو هذا حچايه والثانيه الما يعجبه يطلع
والبيت بيتي وانت وسلام ساكتين
صاحب // انت ما تعرفه الابن اخووك جسر وانا نا الي خلگ
المشاكل وماعدي اشتري حصته
طاهر // وانت سلام
:: انا شنو
طاهر //. اگول لو تشتري حصته لو تبيع حصتك
:: عمي هذا بيت ابوي ما اطلع منه وما عندي سيوله
واشتري
دخلت وانا اشوف كوثر تريد تنفجر لان ما رديت على فواز
بايلتها لفيت راسي ونمت او بالاحرى سويت روحي نايم
وانا محترگ گلبي وانا اتخيلهم بالغرفه وفعلا ثاني يووم اجت
تكسي اخر موديل والسايق رجال عمره تقريبا اربعين سنه
وصارت رضوى تداوم وتروح بالتكسي واللبس كله نزاكه
وترتيب چانت تلبس
تنوره كلوش لو ام الكسرات والقميص ابيض والخصر عبالك
مليكان والشال بلون الجنطه والحذاء
اما الاكسسوار الي تلبسه شي يخبل هي من زمان لبسها حلو
وبسيط لكن الي جابه فواز شي يصفن وغالي
عطاء وكوثر يرحن ويه الخط وانا بين شغلي وساره ونادرا ما
اجي للبيت واذا اجيت تبدي كوثر بلومتها
وكلامها المقزز اما صبيحه فكل ما اجي الكاها بالمطبخ ما
اعرف هاي المره ما تطبخ ابيتها ما توكل رجلها
او ولدها جنت ما اناقش كوثر ولا اتقرب منها بصراحه لان
ساره عوضتني
كانت ساره منتهى الهدوء والجمال لكن كانت علاقتي بيها
علاقة حاجه وصرت افكر بيها وصارت عندي رغبه
حبيت تكونوعلاقتي وياها علاقة رجل متزوج بامراه
لكن هي من نوصل الهذا الشي كانت تمتنع
المشكله هي ما تطلب مني شي وكانت تحاول تريحني ع الاخر
بس من ابقى ابحدي اسال نفسي ليش هيج تسوي
وياي معقوله تحبني ساره ما جانت تطلب مني اي مقابل
مادي بقدر ما كانت تريد مني ان ابقى بجانبها لكن
انا جنت اخذ الها هدايا هي ما تقبل تاخذهن بس جنت اصر
عليها واكلها اشتهيتهن الج واحب اشوفج لابستهن
كنا تقريبا بداية شهر 12 الجو بارد اجه عليه رحمن وجاب
علاكة فلوس وكلي
- - يكول استادي هاي ايبقيها يمه يمته ما خابر عليها حجي
هادي ينطيها اله باليد
::ليش هو استادك وين
- - يريد يسافر ويكول انا اخابره وافهمه
اخذت علاكة الفلوس شويه وصلتني رساله جانت من فواز
- - سلام انا راح اسافر الاربيل شكم يووم دير بالك ع الشغل
ومن ادزلك مسج تحولي فلوس تكل الرضوى تنطييك المبلغ
الي اكلك علي وهذن الي دزيتهن بيد رحمن ضمهن من
يخابرك حجي هادي انطيهن اله اشتريتلك بضاعه جديده
وخليتها بالمخزن
انا ما رديت علي بس من كملت شغل اخذت الفلوس الي
اشوفهن هواي ومريت ع المخزن لكيت بضاعه ماليها الي
ليش هيج
يسوي فواز حتى ما يحاسبني على فلوس البضاعه القديمه
وصلت للبيت ضميت الفلوس بميزي الي اضم بي فلوسي
واوراقي من دخلت لاكاني عمي صاحب نازل هو وسهير سلم
عليه وكال

عنده حمل بالميناء وسهير راح تروح البيت اهلها وانت دير
بالك على عطاء
انا كتله ::عمي عادي اخلي كوثر تصعد تنام يمها او هي تنزل
وانا انام بالديوان
صاحب //اخوك سافر راح الاربيل
::اي عمي مو اول مره هو كل شهر يسافر بس هالمره اتاخر لان
شويه حركة الشغل خفت
صاحب //ياخفت اخوك ماكل السوك وشاربه
::الله يرزقه جاي يتعب

وراح عمي وسهير وبقيت انا بالبيت ضجت كلش معناتها ما
راح اشوف ساره بس رضوى بالغرفه الي يمي
ونفس السؤال يخطر ابالي ليش هيچ سويتي شنو السبب
ليش خنتيني بيش قصرت وياجر
فهمت كوثر تنزل عطاء يمها بالغرفه وانا انام بالديوانيه رغم
شفت كوثر ما قابله لكن مضطره توافق
الصبح يجيهن الخط ورضوى يجي عليها السايق وتصعد
عبالك برنسيسه انا كل ما اشوفها يزيد حقدي عليها
يومين واجت سهير من اهلها ما طايقه روحها وصعدت عطاء
الغرفتها وانا رج

عت اروح الساره لو ابيتها
لان كلتلي سوت ويه اختها مشكله على مود تروح البيت
عيالها حتى انا اجي يمها
وره اربع تيام من سفر فواز كتبلي مسج حول فلوس الاربيل
باسمي الفلوس بالقاصه خلي رضوى تنطيك
خابرت ابو المكتب كتله حوول وشويه يجنك الفلوس كلي
صار بس اريدهن لان ما جوه ايدي سيوله
انا كتله ::ان شالله كبل لا تعزل وهنه يمك بس لان فواز
محتاجهن
ابو المكتب صديقنا وكل حوالاتنا يمه كلي //اذا ما جبتهن انا
اجيك من اعزل وانطيني اياهن
بيومها جان عندي شغل اجه واحد اخذ بضاعه وجيكنا الحساب
القديم والجديد اتاخرت الوره الظهر يالله فرغت
كلت خلي اروح اجيب الفلوس وانطيهن لابو المكتب صعدت
بالسياره خابرني حجي هادي كلي عمي خابرت
فواز كال الفلوس يمك بلكي تجيبهن ساعه وانا واصل للمحل
كتله ::موجودات هسه اجيبهن
وصلت تلكتني كوثر //الله يساعدك احطلك غدا
جانت توها جايه من الكليه كتلها ::لا مستعجل بس دكي
الباب على رضوى
هي تفاجئت من طلبي وفكت اعيونها اثنينهن انا باوعت الها
وحجيت
::اكلج رجلها وصاني اخذ منها شغله
هي بقت صافنه انا ميلتها ورحت دكيت باب غرفة رضوى
هي جانت توها طالعه من الحمام لان فتحت الباب والمنشف
على راسها فهي من شافتني صارت ورا الباب وكالت
=ها سلام شكو
كتلها وانا داير وجهي ::شنو فواز ما كلج اريد فلوس
=لا ما خابرني او يجوز من جنت بالحمام بالله دقيقه خلي
اشوف التلفون
وطبكت الباب وره شويه فتحت الباب كالت
دقايق واطلع الفلوس
انا كعدت ع القنفه وكوثر واكفه ودها تلزم رضوى تاكل منها
لحم طلعت رضوى الفلوس بعلاكه وجابتهن
وهي تكلي =احسبهن اخاف زياده نقص
خليت الفلوس ع الطبله وبديت احسب بيهن وكوثر اجت
كعدت يمي ورضوى واكفه قريبه مني انا احسب واشم
عبيرها ما كدرت احسب كل شويه واغلط بالحساب وارجع
احسب مره ثانيه كملتهن وطلعت والصراحه ابدي
ما اطلع اريد ابقى يمها بس اشوفها اريد اسالها ليش خنتيني
دخلت للغرفه اريد
اخذ فلوس الحجي لحكتني كوثر بعدني ما فاتح الميز

كوثر //شدعوه عليك صرت ترجف من هي واكفه يمك حتى
الفلوس ما ادري شكم مره عدت
عليهن وايديك يرجفن
باوعت الها بتك عين /:وبعد شعدج
كوثر//ما عدي شي اريد اعرف انا شنو بهذا البيت شنو انا
بالنسبه الك
من سمعت كلامها قررت ابقى يمها واخذ من خاطرها بس
هي راسا كالت
- - لو ما نشبه الساقطات الي يلعبن ع الزلم
اجيت يمها ولزمتها من حنجها وكتلها
::شكم مره كتلج لا تغلطين انتي ما تفتهمين
//يااا وانت صرت عصبي واتنرفزت على شنو قابل سبينا
العنب اغلط واسب بكيفي شنو مجذبه انا
هي اكبر ساقطه
نفخت :: ولج مو صوجج صوجي انا المفروض ما اوصل
للبيت واشوف جهرتج
وخليت شمرتها ع الجربايه وطلعت صعدت السياره وانا
اضرب ع الستيرن واحجي بصوت عالي
::وج رضوى ليش زغرتيني وخليتيني ما اسوى فلس كدام كوثر
واهلها ليش خنتيني ويه اعز الناس الي
ليش من كون الله لا يوفقج
ظليت امشي واحجي ويه نفسي ::ما اكدر انساها اله لو اكتل
ةنفسي لو ابعد نهائي عنها لازم ابعد عنها
وارضخ للامر الواقع
سمعت النقال يرن شلته لكيت العامل يتصل علي
::ها عزوز
- - اكلك استادي حجي هادي اجه وهسه هو كاعد بالمكتب
كلت ابلغك
::هاا اي شويه واجيكم جيبوله چاي على ما اوصل
انتبهت شفت بس فلوس الحواله ضربت على گصتي :: اهووو
نسيت حتى افتح الميز من وره بت اصبيحه
درت السياره ورجعت للبيت دخلت ع السريع وانا اسمع صريخ
وعياط وغلط وصلت للصاله شفت كوثر
وصبيحه واديان دايرات ويضربن برضوى وسهير عوود تفك
بيهن وانا شفتها شلوون تضرب بيها وياهن
اما عطاء واكفه تباوع وهنه يكتلن بيها اجيت دفعت صبيحه
واديان وسهير ولزمت كوثر ضربتها راشدي
هي كالت //تضربني ع مود هاي ال،،ام الزلم
::وج حقيره شكم مره كتلج لاتغلطين
صبيحه //ياا تدافع الهاي الساقطه وتضرب بتي على مودها
انا باوعت الصبيحه وبعصبيه ::اضربها واكسر راسها ويالله
اخذي بتج واطلعي وباجر خط طلاكها يوصلها
رضوى بعدهي كوه كعدت من الضرب شعرها منفوش
ودشداشتها مشكوكه وجها مخرمش
هي تباوع وتبجي انا گلت ::بسرعه كوثر ما اريد اشوفج البيت
اهلج لا اقترف جريمه
صبيحه //تطلك بتي على مود الك،، ام الزلم
انا بعصبيه ::اي اطلكها ما اريد اشوفها بالبيت
صبيحه //لو انت ابن امك طلكها صوت واحد اصيحه والم
الناس واكول لكيته ويه مرت اخو وافضحك وافضحها
انا فكيت عيوني ورديت عليها ::تسوينها انتي وبتج بس انا الج
والبتج
رضوى كامت وكفت على حيلها وحجت =شوفي صبيحه انتي
وبتج وسهير وغيركم لو اريد فواز يطلكني جا من
ثاني يوم اطلك واخلي سلام ياخذني بس انا الي ما اريد سلام
لان باعني بتراب انا ما اعتب عل كوثر لان وهي
زغيره تغار مني ولااعتب عليج لان تكرهين امي ولا على سهير
اعتب على صديقة عمري الي واكفه تتفرج وتتشفى
بيه اعتب على عطاء
عطاء جاوبتها //وطبج طووب ما كفاج فواز جاي تاخذين سلام
شنو انتي ما تشبعين
رضوى تفاجات بكد ما انا تفاجات واشوف بعين صبيحه
وكوثر شماته رضوى

جاوبتها
=لا ما اريد سلام فواز مكفيني وبسءيجي اخلي يسويلي حل
بعد ما اكعد وياكم ابيت واحد لو انتو تطلعون
لو انا وفواز
صبيحه //اي جا لو تطلع كوثر وتخلي البيت لام الزلم علمود
كل ساع تدخلين بي واحد وفد نوب يصير بيت دعاره
انا صحت صوت ::اشششش ولا نفس كلمن بغرفتها لا هسه
احرك البيت
وطلعت تلفوني وخابرت بهاء وكتله يجيب خالتي ربيعه بسرعه
ويجي ودخلت للغرفه لكيت كوثر جاي تطلع ملابس
تريد تسبح انا حتى ما باوعت الوجهه دنكت فتحت الميز
واخذت فلوسءحجي راضي هي اتقربت علي لزمتني من
جتفي انا نترت ايدها رادت تحجي اشرت باصبعي وكتلها
=ولا كلمه حتى صوتج من اسمعه نفسي تلعب منه بعد لا
تفكرين بيوم من الايام تصيرين مرتي ولا راح تشوفيني
على ما يرجع فواز وبعدين اعلمج اندمج انتي وامج
💛يتبع

١١___١٢

#البارت11
//////////////////////////
هذا البارت صرااااحه صدمه
سلام
بعد ما دخلت الغرفتي اريد اجيب الفلوس وانا صاير نار احرك
كلمن كدامي شفت كوثر جاي تطلع
من شافتني خلت ايدها على جتفي انا نترت ايدها وخليت
اصبعي على حلكي
::اششش ما اسمع نفس بس يجي فواز انهي كل شي وهذا
البيت ما ادخله ما طول انتي بي
صدكي تلعب نفسي من صوتج انا الج انتي وامج
كوثر //اي عيني رووح خليني واكرهني ولا تتقربلي اتقرب
الرضوى احسن لان يكولون الحرام احلى
اجيت اضربها راشدي بس ما حبيت ايدي تمس خدها لان
صراحه تلعب نفسي منها سمعت خالتي ام
بهاءاجت طلعت سلمت عليها وحچيت وياها بصوت مسموع

::خاله مرت فواز بامانتج على ما يجي رجلها ديري بالج عليها
ابد لا تركينها
ام بهاء //يا ستار خاله شصاير
::خاله انا هسه طالع واي شي تحتاجنه بس خابريني اودي
العامل وهسه خاله ادخلي ,
كدامي واقفلي الباب
خالتي // سلام غير اتفهمني
:: ادخلي وهي تفهمج
وصدك خالتي دخلت وقفلت الباب وانا اخذت الفلوس
ورحت للمكتب وطول الطريق وانا ترن باذني كلام
رضوى لمن تكول
=جنت اكدر ثاني يوم اطلك واخذ سلام بس لان باعني بتراب
ما اريده شنو قصدها شنو ولج
رضوى ليش هيج تسوين بيه ليش
وصلت للمكتب ولكيت حجي هادي واعتذرت كتله السياره
عطلت وانطيته فلوسه وراح وراه بربع ساعه
اجه عمار ابو الصيرفه سلم عليه وانطيته فلوسه باوعلي وكلي
عمار //اشو ما كلي فواز حولي
::اي مو هو خابرني من اربيل
يمته سافر هو انا البارحه بالليل شفته
::لا متوهم عمار فواز صار اربع تيام من سافر
عمار //تحجي صدك اكله البارحه باليل واتسالمنا شبيك
انا عرفت فواز ما سافر كتله //اهوو نسيت انا جنت مو هنا
وعبالي مسافر
وانطيته الفلوس فواز من يسافر جنت انا اوصله للمطار اذا
بالطياره واذا لا ياخذسيارته هسه
من يسافر ياخذ السياره ويخلي واحد من عماله يوصله للمطار
ويخلي السياره بالمحل انا اخذني
الفضول خابرت رحمن
الو عمي رحمن سيارة فواز يمك
رحمن //اي عمي سلام گلي خليها بالمحل
::اگلك انا چان موصيني على شغل انت ويامن وصلته
رحمن/: ها عمي انا وحسام وصلنا البارحه للمطار ورجعتها
::زين ما اوصيك دير بالك عليها مو احد يشغلها وهو ما
موجود
رحمن/:لا صدك جذب تريد اجيبلك السويج
::لا عمي خلي يمك اخاف فواز يجي على غفله
رحمن/:تامر امر
::الله وياك دير بالك ع الشغل
رحمن /:ان شالله لا توصي حريص
بعد ما سديت الفون ويه رحمن عرفت كلام عمار صحيج يعني
هو ما سافر اله البارحه هاي صار شكم يووم هو اهنا
بالليل ردت اروح الساره بس مالي خلك رغم راسلتني بس انا
ابد كل خلك ما الي قررت اروح للشقه يم فارس
عزلت فايت وكت ومريت ع المطعم اخذت عشا وفواكه
ورحت للشقه فتحت الباب جان ممر يطل ع الصاله
دخلت للصاله بس شفت فارس بغرفة نومه وهو واكف ويه
وحده هي تحظنه وهو ينتر بايدها وصارت
عيني بعينه لمن ما دارت وشفتها جانت اخلاص مرت عمه
رعد

انا من شفت اخلاص جفلت وكع العشا من ايدي فارس اجه
عليه كلي وهو مرتبك
- - سلام خلي افهمك
انا ضربته راشدي وطلعت ركبت سيارتي وسقتها وانا ما
اعرف وين اروح ضجت من الدنيا وانا احچي
::ليش هاي الخيانه شنو صاير بالدنيا
::رضوى خانتني ويه اخوي ورعد خان عمه ويه مرته ليش شنو
يريد يصير بالدنيا
اجتني رساله من ساره تكلي //حبيبي منتظرتك
ركنت السياره وصرت اضحك على روحي اكول
::احاسب الناس عل خيانتها وانا هم خاين جاي اضرب
مثاليات كدام الناس وانا جاي اخون نفسي
درت السياره ومريت عل مطعم واخذت عشا وقررت اروح
الساره والتلفون ما بطل اتصال من فارس
وانا احجي ويه نفسي
::فارس صديقي الي جنت اشوف بي النقاء والاخلاق والطيبه
يسمح النفسه يخون عمه
اي يخونه ليش لا متعجب ولك سلام مو اخوك فواز ابن امك
وابوك خانك ويه حبيبتك لا خطيبتك
مو ايام وتصير مرتك خانك وياها وهو يدري بيك
اعتب على فارس شنو هو نبي معصوم وما يخون غرتك
صلاته واستغفاره شفته بعينك
تصدكون بجيت على نفسي وانا احچي ::ليش الكل
مستغفلتي اخوي ورضوى وصديقي ليش لان طيب
اي لان طيب

قبل ما اوصل خابرت خالتي وسالتها عزوز جاب العشا
والمسواك هي كالت اي لا تشغل نفسك
بعدين كلتلي //يمه سلام استهدى بالرحمن وارجع البيتك
ومرتك
::لا خاله انتي ما تعرفين كل شي بس يرجع فواز اصفي اموري
واطلك كوثر واهاجر
ام بهاء /:اسم الله يمه لا تفكر هيح
::هذا هو الحل الي يناسبني
ام بهاء/:كول يالله يمه على كيفك ويه روحك
ما جاوبتها سديت التلفون وجريت نفس قوي ورحت الساره
وصلت رمشت الها هي فتحت باب
الكراج ودخلت السياره وتلكتني اخذت الاغراض ولزمة ايدي
ودخلتني الغرفتها حسيت بيها
مو ابحدها سالتها :: منو موجود
كالت // امي وابني موجودين
عكفت حواجبي :: ما دام موجودين ليش گتيلي تعال
ساره وهي تلعب بشعري // اشتاقيتلك وما گدرت اله
اشوفك
:: وامچ ساره
انطيتها علاجها ونامت وعلاوي هماتين نام
نفخت وانا اباوع للغرفه لكيتها محضرتل

ي ناركيله كعدت وهي
راحت خلت العشا واجت جانت لابسه
برموده قصير كابوي وقميص فاتحته وشادته على خصرها
مبين نص صدرها
كعدت اكل وانا اباوع الها ومفتون بجمالها ما اشتهيت اكل
شويه وهي هم ما اكلت شالت الصينيه
انا بقيت اشرب ناركيله وهي رجعت واتمددت على الفراش
وتدخن جكاير الي يشوفها هسه ما يشوفها
بشغلها شلون ملتزمه وما تنطي مجال الاي احد باوعت الها
وسالتها
شعجب امج اهنا
ساره /:على اساس تروح البيت خالتي بس مرت حماها
الخالتي توفت باجر انا وامي نروح
لان طلبت اجازة
:: لا ساره روحي شويه ورجعي ابقي يمي
ساره/:صار وتدلل شكم سلام عندي
ساره اذا هسه اجت اختج هي وزوجها ويشوفون السياره
شراح تكليلهم
هي ضحكت /:اكلهم سيارة صديقتي اجوهم خطار وخلو
سيارتهم بالكراج وجابوها يمي
:: واذا شافوني الصبح طالع من البيت
ساره/:اممم عادي سيارتك وجاي تاخذها
:: بت الاوادم عندج الكل شي جواب
انا صعدت يمها واتقربت عليها /:زين واذا شافوني اهنا
شتكليلهم
ساره تبتسم وتهز براسها // ما اعرفه هذا منين اكيد حرامي
:: هههههههه سويتيني حرامي
وكضينا ليله ولا اروع صحيح ساره منعتني من هواي
اشياءءبس عوضتني حب وحنان ودلال
الصبح دخلت سبحت وريكت امها وابنها واجت يمي كلتلي
بس اطلع انا وامي وعلاوي انت اكعد اسبح وانا خالتلك ريوك
بالمطبخ وفد ساعه وارجع بس اراوي وجهي تمام
انى اشرت الها يعني اي
وبقيت نايم التلفون يتصل وانا ما اشيله ما اعرف شكد بقت
ساره ورجعت واجت حضنتني فتحت عيوني
النقال يتصل شفته عزوز رديت
::ها عزوز
عمي سلام انت وين هذا ابو علاء يكول متفق ويه سلام على
بضاعه
اهووو والله نسيت اكلك افتح جرارة الميز وطلع الدفتر الي
جلاده اسود بالاخير تلكه اسم ابوعلاء
شوف شنو مسجل وحملوله
عزوز/: صار عمي يمته تجي
::انت دير بالك ع الشغل العصر اذا كدرت اجي
ساره وراي حاضنتني وتشم بركبتي وشاورتني
امي تبات عد خالتي وابني دزيته وراها يلعب ويه الجهال
0يعني اليوم عندي مااخليك تطلع من الغرفه

درت عليها وحضنتها حيل وبقيت وياها واتغدينا والعصر كله
واحنه بالغرفه جان يوم حلو وارتاحيت بالليل
سوتلي ناركيله وفتحت اغنيه ولبست بدلة نوم تخبل وظلت
تركص وتجي يمي انا ما صبرت رحت حضنتها كتلها
::ليش هيج تسويلي
ساره وهي حاضنتني /:لان احبك
::تحبيني تحبيني لو
هي كعدت وكلتلي /ادري هذا الشي تفكر بي بس صدك يا
سلام من يوم الي انفصلت من
رجلي محد لمسني بس انت لان حبيتك واعرف لو اموت ما
راح تصدكني ولا راح تزوجني
وادري ما تشوفني الا وحده رخيصه بس انا مو هيج
انا جاوبتها ::ها يعني تدرين ما راح اتزوجج وقابله
ساره //اي ادري وقابله لان احبك مو بيدي
وصارت تبجي وتشهك وتقسملي ما لامسها بس زوجها
— سلام صدك لو اريد غير شي اكو هواي ناس اجمل منك
واثكل من ناحية الفلوس بس انا
طول مدة علاقتنا طلبت منك شي كتلك على شي سلام احبك
مو بيدي
انا جاوبتها ::ساره اذا تحبيني ليش تمنعيني
ساره وهي تبجي /:لان ما اريد اخرب صورة حبي الك بنزوه
تاخذها وتعوفني
بعدين باوعتلي وعيونها كلها دموع
- - نيالها الي مالكه عليك كلبك ولا تكلي مرتك لان لو هي
تحبها هذا الحب ما فكرت بلحظه تخونها بكلمه
جاوبتها وانا اتحسر ::ها يعني تعرفين هذا الي نسوي خيانه
وقابله
ساره /:اي سلام قابله مو بيدي احبك لو تقبل ابقى طول العمر
خدامه الك بس انت كلبك مو يمي
وصارت تبجي بصوت وانا وحاولت اهدئها حضنتها وانا
ساكت ما اعرف شنو احجي وياها
ونامت وهي دمعتها بعينها
انا انقهرت عليها وبقيت گاعد حاولت انام ما گدرت الفجر
سبحت وطلعت وخليتها بنومتها وكتبت الها
ساره سامحيني انتي كلتيها ما اكدر انسى الي احبها رغم
اكرهه وحاقد عليها
ارجوج لا تحقدين عليه ولا تكرهيني تره انا من عرفتج جنت
جسد بلا روح انتي ساعدتيني
بس ما نسيتيني ما راح انساج وشنو تحتاجين انا حاضر ديري
بالج على نفسج
وطلعت رحت للمحل وخابرت خالتي ربيعه وسالتها اخاف
تحتاج شي تخابرني وكتلها الظهر ادز غدا
هي كلتلتي //شنو خاله ساجنينه
::اي خاله احسن فكينا من صبيحه وبتها
ام بهاء //شتكول صدك هاي صبيحه الجلبه ضحكت على
طاهر واخذته وانوب انت اتورطت واخذت بتها
والله يا خاله هذا الي يصير بيك لان ما اخذت وصية امك لان
وسيله الله يرحمها ما قابله عليك
نفخت ورديت ::صحيح خاله بس وداعتج قررت وكل شي راح
يتصلح ويرجع المكانه
ام بهاء //شيتصلح وانت تكول اريد اهاحر
::خاله هسه مو وكته الحجي راح ادز بيد العامل غدا
وشتحتاجن خابريني
ام بهاء //اي يمه مي خالف سالم ان شالله الله وياك
💙❤💙❤💙❤💙❤❤💛💛💛💙❤💙❤💙
رضوى
فواز من راح كال اذا ادزلج مسج اكلج انطي الواحد يجي ايگلج
فواز ايريد هلكد مبلغ انتي حافظه الرقم السري
مال القاصه طلعيهن ولبسي حجابج وحسبيهن علي وبعدين
خابريني

هو سافر وره اربع تيام انا جنت توني راجعه من الكليه دخلت
الغرفتي لان انا اكل بالكليه
بالليل عندي فواكه وعصائر وتوست ونساتل بالثلاجه رحت
بوجهي للحمام وطلعت بع

دني ما موخره المنشفه
من شعري اندك الباب انا كلت لو سهير لو صبيحه فتحت
باب غرفتي صار وجهي بوجه سلام صرت وره الباب
جانت وراه كوثر ابدها تلزمني وتفترسني😠😠😠
انا سالت سلام =ها سلام خير
هو ما باوع لي كلي ::فواز كتبلي مسج اريد فلوس شنو ما كلج
=ما ادري انتظرني دقيقه اشوف الواتساب وارجع
وسديت الباب وانا ما اكدر اسيطر على نفسي سلام يحجي
وياي مثل الغريب وكوثر تباوع لي عبالك
حراميه بايكته منها لزمت النقال وانا ارجف وشفت فواز كاتب
انطي سلام هلكد مبلغ
انا طلعت الفلوس ولبست دشداشه فوك البرمودا ولفيت
شعري وخليت الفلوس بعلاكه وطلعت
لكيته كاعد ع القنفه وكوثر يمه خليت الفلوس ع الطبله وكتله
=هذني الفلوس ياريت تحسبهن اخاف زياده نقصان
هو صار يحسب وانا واكفه قريب منه اشوفه كل ساع وغلط
بالحساب ورجع يحسب من جديد
وكمل كال بدون ما يباوع ::هذا هو مضبوطات
انا دخلت للغرفه ونزعت الدشداسه بقيت بالبرمودا ومشطت
شعري وخليت عطر وفتحت التلفزيون
رغم الهسه بعدني ارجف لان سلام حاجاني بدون ما يباوعلي
اتمددت وصرت ابحث بالقنوات
اندك الباب دكه قويه بيني وبين نفسي كلت معقوله سلام
رجع يريد بعد فلوس بس انا
ما انطي لان هنه امانه وفواز كلي بس ذن انطيهن اله انا كمت
من فراشي ولبست الدشداشه يمي ع الجربايه
خالتها كلت منو ،اجاني الرد //انا كوثر افتحي
انا بيني وبين نفسي =شعدها كوثر وياي
فتحت الباب وراسا ما احس الا الزنكه وجرتني للصاله وياها
امها واختها اديان ووسهير عود
تهدي بيهن هنه دارن عليه وكوثر تكلي
- - ولج رضوى اليوم اموتج ما كفاج فواز انوب رجعتي على
سلام الا اموتج راح يكولون جان اكو
وحده بهذا البيت اسمها رضوى
طبعا حجي وغلط ومسبه صبيحه //ولج ك،،،شمسويه للرجال
حتى ما مخليته يباوع بوجه مرته
ولج فايتاتلج مثل امج عليه ام الزلم
ولزمني وبسطني مشعن شعري خرمشن وجهي وحده عضتني
نامن عليه اديان سمينه
لزمتني راشديات وكوثر دفر ويمكن صبيحه هي الي تعض بيه
حسيت خلص راح اموت
سمعت صوت سلام وهو يدفع بيهن ولزم كوثر .ضربها راشدي
وبعدين دار على صبيحه وكلها
::اخذي بتج وخط طلاكها يوصلج
بس صبيحه كلتله افتري عليك واكول لكيته ويه مرت اخو
بوضع مخل انا خفت لا يبتلي سلام وانوب يلكوها
حجه وخوالي يكتلوني راسا كمت على حيلي رغم ما بيه حيل
وكتلهن بما معنا
=لو يبقى سلام اخر واحد ما افكر بي
انا من حجيت هيج لان جنت مقهوره وخايفه ما اعرف على
نفسي لو على سلام من حجيت اتذكر
من رحت اتوسل بي يسمعني بس هو ما قبل لا يسمعني ولا
يساعدني

الشي الي اثر بيه عطاءوهي تشوفهن شلون يضربني وهي
ساكته ولمن عاتبت بكلامي اجاني ردها
طبچ طووب
بوكتها حسيت بالخذلان انادخلت للغرفه وانا ابجي
مقهوره لكن يمكن فرحانه لان سلام ما قبل بالي سوونه وياي
وسمعته وهو يخابر على خالته ام بهاء وطلب منها
تبات يمي على ما يجي فواز
الحلو بخاله ربيعه انها متفهمه وما تتململ من شي ولانها
ارمله وجبيره يعني تكدر تبقى انا فرحت من شفتها وجان
يوميه سلام يدز غدا وفواكه وعشا وهي كانت تطلع تخدر جاي
على اعنادهن رغم عندي غلايه تكول
خلي ابين الهن احنا ما خايفات
اليوم سمعتها من خابر سلام وهي تحجي على صبيحه اخذني
الفضول اسمع شنو كللها سلام وليش هيج حجت
على صبيحه كلتلي //سلام قرر يطلك كوثر ويهاجر
تدرون هذا الشي فرحني رغم من يهاجر اعرف راح تتبدل هواي
امور بس لان يطلك كوثر انا فرحت بعدين سالتها
=خاله سمعتج تكلين السلام على صبيحه وشلون ضحكت
على خالي واخذته
ام بهاء//هسه انتي شلج بهالسؤال اكلبي صفحه
=عفيه خاله سولفيلي
ام بهاء /:يمه شسولفلج كيد النسوان ليش قبلت ابقى يمج
اخاف عليج من صبيحه وسوالفها لان هيه لاذمه ولا ضمير
= خوفتيني خاله سولفيلي
ام بهاء/:اهوو شكد تلحين رضوى
=مي خالف خاله تحمليني
ام بهاء باوعتلي وسالتني /:شنو رضوى امج ما سولفتلج
= لا بس دوم جانت تكول ديرن بالجن من صبيحه
اهنا ام بهاء جرت حسره وكالت //يمه سالفه قديمه
=مي خالف خاله نكضى وكت
ونزلت يمها هي اتمددت بالكاع وانا هم تمددت يمها
ام بهاء ::جنا بنفس المنطقه لمن خالج صبار الله يرحمه خطب
وسيله خطبه عاديه شافتها
بيبيتج الله يرحمها ورادتها جنت انا بالمدرسه ويه امج وخالتج
بالثالث المتوسط وجنت حلوة
وناعمه بيضه وشعري طويل اشوف طاهر من نروح للمدرسه
يمشي ورانا اسمر وطويل وعنده عضلات
جان يمشي ويا ويله الي يتحرش بينا احسبي يوميه عركه
بسبب وبدون سبب
فد يوم جنت حاله من المدرسه واجت سياره نزل من عدها
ولد جان يحب ابنيه اسمها نضال وانا جنت اعرف
بعلاقتهم هو نزل من السياره وكلي
- - ربيعه بلا زحمه رايدج
انا وكفت كتله //اتفضل
كلي /:ربيعه نضال زعلانه عليه وانا راح التحق للجيش ارجوج
وصليلها هاي الرساله
انا اخذت الرساله ما احس الا طاهر لازم الولد وزانكه وهو يكله
- - ولك شلون تتجرا وتنطيها رساله
وكاملج ع الولد كتل انا لزمت طاهر من جتفه و كتله وانا ازمخ
// عوفه
ولو تشوفينه اتخ

بل بالزايد وبالشارع وگدام العالم
طاهر/:ها ضجتي تحبينه مو ما تستحين بت اصل وفصل
وهيج تسوين جا استحيتي من اخوانج
انا كتله //انجب ياحقير شلون تتهمني بشي ما مسويته
طاهر/:ولج كدامي انطاج الرساله ليش تنكرين
—وانا ما متوازيه ابررلك شنو اخوي ابوي عمي
طاهر /:ولج انا كل ذني واخيرهن حبيبج وزوجج يا ربيعه الا
اموت ذاك العار وادخل سجن
عود وانتي العبي بكيفج
انا رحت للولد كتله كدام طاهر /:
خويه اسفه هذا مسودن ما سامع ما على المجنون من حرج
هذا قبل شكم يوم طلعو اهله من الشماعيه

الولد رغم اتاذى وخشمه طك دم بس هو چان ايحبها
الصديقتي ولازم يلتحق بذاك الوكت ياويله الي يغيب
فما اهتم بالصار بي اهم شي يريد الرساله توصل گلب // انا
رايح واعتمد عليج
وخالج يريد يلحكه انا لزمته
ربيعه /:صدك انت مخبل وما تستحي شلون هيج تحجي وياي
مو عيب عليك
طاهر /:لا مو عيب العيب الي انتي سويتي وهسه تكولين
عليه مخبل اوكفيلي وشوفي المخبل شراح يسوي
ربيعه شفته يريد يلحك الولد لزمته من ايده
/:وك شسويت هذا الولد يحب نضال صديقتي وانا اعرف
بعلاقتهم شريفه وهي زعلانه
علي ويريد يلتحق وانطاني الها رساله امشي وراي انا اندل
بيتهم لان هي شافته بس
راحت وانت جاي تتعارك ياعنتر خلي اروحلها للبيت بحجة
انطيها الدفتر
وفعلا رحت للبيت وقبل ما اوصل طلعت الدفتر وخليت بيها
الرساله ودكيت الباب طلعت امها
وكتلها خاله صيحيلي نضال واجت وانا كتلها
انتي مو كتي ما لحكت احل تمارين الكيميا انطيني دفترج اشو
رحتي بدون ما تاخذينه
هاج اخذي بس باجر جيبي وفتحت الها الدفتر وغمزتلها هي
افتهمت وانا رجعت وهو يباوع
ربيعه /:ها عيني الشقاوه هسه اتاكدت
طاهر /:ياالله امشي كدامي
وصار يوميه ينتظرني ياخذني ويرجعني واحنا ساكتين هو مجرد
جان حارس شخصي اي واحد يباوع
لو يصجم يوكف ويكسره يوميه جان ينشكله قميص
حتى اخواته افتهمن الموضوع صارن يمشن ابحدهن وتمينا
هالشكل هو يمشي وراي ايوصلني للمدرسه يوميه
= يعني خالي طاهر چان ايحبج
هزت راسها // اي
سالتها = خاله ليش ما اتزوجتو
ام بهاء مغمضه تستذكر // سبحان الله نفس الي صار وياج
اهله وافقو ننخطب لان يحبون وسيله الله يرحمها وفجاة
طاهر ابتعد ومنع اخواته يمشن وياي وصرت ما اشوفه
يمشي وراي ولا يراقبني
= خاله ليش شنو السبب
— قبلها بفتره صبيحه صادقتني مع العلم جنت اشوف عليه
وقسيمه مبتعدات عنها
رغم القرابه الي بيناتهم
هي عرفت بعلاقتي ويه طاهر انا سولفت الها ما ادري بيها
تحفرلي من جوه ليجوه
فد يوم اجت وسيله اجت ضايجه والدمعه بطرف عينها لان
تدري بيه جنت احب طاهر اجت وهي تگلي
— باجر بيت عمي يخطبون صبيحه الطاهر
عرفت انو صبيحه من عرفت بعلاقتنا اتقربت مني وصادقتني
وبدت تحوك مؤامرتها
سالتها =بس شلون
اتحسرت ام بهاء // مو جانت تدزله رسايل باسمي وتجيب
رسايل باسمه رسايلي تكتب بيهن
طاهر شوف حياتك انا ما افيدك اهلي مستحييل ينطوني الك

ورسايله يكتبلي بيهن // ربيعه انا ما افيدج لازم نبتعد
وبعدها اجتني رساله //. انتي لان اخت مرت اخوي انا بعد ما
اكدر استمر سامحيني ضميري يانبني انا
چنت اگضي وياج وكت بس ما احبج
رغم كل شي انا ما صدكت لان اعرفه شگد يحبني كلت اكيد
اكو شي بس تجي وسيله واتاكد منها لمن ما فد يوم
طالعه من المدرسه واجه ولد يسالني عن طريق المستشفى
وانا دليته كال لان بي فقر دم وهو مو منا ولازم يديروله
بطل دم انا كتله اخذ سياره وروح منا
وصرت ااشر ع طريق المستشفى طاهر شافني عباله وكفتي
ويه الولد الي علاقه بي وانا جنت اضحك علي
هو انسحب وما نحس اله اخذ صبيحه هي خطبه هي مهر انا
بالبدايه انقهرت بس بعدين تجاوزت محنتي وكملت
اول سنه بالمعهد تزوجت والحمد لله
زين خاله شلون عرفتي هي صبيحه سوت هيج
لا خاله انا ما عرفت بس خالج صبار واختي الله يرحمهم عاتبو
طاهر ليش ما خطبني
خالج صبار سائله // طاهر اكو عاقل يعوف ربيعه وياخذ
صبيحه
طاهر /:اي انا لان مو كرن
صبار /:طاهر شنو هالحجي عيب شقصدك
هو ما جاوب بس طلع الرسايل جان محتفظ بيهن جابتهن
وسيله وراوتهن الي وبنفس الوكت رسايله انطيتهن
الوسيله هو من شافهن تخبل خصوصا وام فواز كلتله صبيحه
جابتهن الربيعه وشافو نفس الخط عرف بوكتها
صبيحه هي السوت كل هذا على مود تاخذه
بوكتها الحقيره جانت توها متزوجه وهم توها حامل كام عليها
وضربها كطعها وحتى طرحت الطفل وداها
الاهلها وقرريطلكها وانا فرحت وقررت بس يطلكها اتزوجه
لكن بين ليله وبوم رجعها شنو السبب ما ادري
يجوز خاله سوتله سحر
ام بهاء /:او يجوز هددته مثل ما هددت سلام بيج
اي بس خاله خالي طاهر يحب مرته وما يخلفلها راي
ربيعه/:طبعا كل سنه تجيب طفل ست ولد وتلث بنات
تجيب الطفل عمره شهرين تحبل بالثاني هسه انا
متعجبه ليش كوثر ما سوت مثلها
انا من سمعت سؤال ام بهاءوسمعت باسم كوثر ضجت كتلها
من هيج من تجين لا هي تجي ولا خالي طاهر واذا صادف
فخالي ما يرفع راسه ويباوعلج
ام بهاء/:اي بس صبيحه صلفه

وما تنكسر عينها
خاله ولو مو سؤال مؤدب //انتي تحبينه الخالي طاهر
ام بهاء صفنت/:صدكيني خاله جنت اموت علي لكن الزمن
نساني والله عوضني بابو بهاء الله يرحمه
انسان مؤدب وابن عائله ومثقف واهله اغنياء وجان يحببني
ومدللني
=الله يرحمه خاله من هيج انتي اجيتي وبقيتي يمي
ام بهاء/:اي خاله لان انا اعرف الناس بصبيحه وبتها
انا صرت ابجي واكلها =زين خاله انا ليش هيج يصير بيه والله
كل شي ما مسويه
- - ادري خاله بس ربج قادر يطلع الحق انتي بس اصبري
=وانا كل شي ما املك بس الصبر
جان السايق يجي علي الصبح ويرمشلي وخاله ربيعه تطلع
وياي للباب ومن ارجع اروح الغرفتي وجنت اشوف
كوثر ما داومت هاي اليومين وعطاء تداوم انا اطلع ساكته
وارجع ساكته
سلام يدز اكل وفواز ما يخابر لان يعرف ما ارد علي وخالي
صاحب وطاهر ما اشوفهم بس اسمع خالي صاحب
من يجي ومرتين شاف خاله ربيعه وسلم عليها وانا اخابر بامي
ورقيه بس ما كتلهن على اي شي لان امي اخر
مره شبعت قهر وراحت وبقيت خمس تيام على هذا حالي الى
ان اجه اليوم الي غير حياتي وقلبها راسا على عقب
💛💛💛💛💛❤❤❤❤💛💛💛💛💛




#البارت12
/////////💔😭💔///||
سلام
بعد ان رحت للشقه وشفت فارس بالغرفه ومرت عمه ويا
قررت اروح الساره وفعلا استقبلتني لكن شبح الخيانه
ظل ملازمني خيانة اخوي وحبيبتي وخيانة صاحبي وهسه
خيانة نفسي على الرغم انا اعرف ساره تحبني
ويمكن هذا النوع من العلاقه تسوي بس وياي لان يجوز
يحسسها بالانوثه وانها امراه مرغوبه لكن انا قررت
شي بيني وبين نفسي لان عرفت ساره تحبني بس انا كرجل
شرقي ارفض الارتباط بوحده دعتني البيتها
ودخلتني غرفة نومها يمكن تكولون اناني لان احنا الرجال نريد
الي ناخذها لازم تكون نقيه ويمكن ما نعرف
حقيقة امرها
--#ملاحظه --
مع احترامي للجميع تره مو كل واحد اتزوج وحده تكون نقيه
وما عليها شائبه
لكن احيانا الحظ يرافق بعض الفتيات ماكو احد كامل الكمال
لله واحنا بشر
لسنا بانبياء ولا معصومين ولا اولياء كلنا اخطاء ولكن تبقى
للرجل الشرقي
نظرته في اختيار من يراها مناسبه وهذه حريه شخصيه لا
يمكن التدخل فيها
###انيين_الليل ##هذا رأيي وكل واحد مسؤول عن وجهة
نظره
/////////:////////:///////:////////:////////://////
سلام
قررت ان تكون الليله الي اعترفتلي بيها ساره اني انا الوحيد
الي لامسها بعد زوجها وبعد ان
اطلقت منه انا وبس قررت تكون اخر ليله اشوفها بيها
حسيت الصدك بعيونها ونامت وهي تبجي ما حبيت اذلها
اكثر من اللازم انسحبت
بهدوء بعد ان كتبتلها مسج انو لازم ابتعد عنها وانا حاضر الاي
مساعده ردت اخلي جوه المخده
فلوس لكن خفت اتفسرها على انها انسانه رخيصه تصدكون
لحد هسه ساره انسانه عزيزه على
كلبي لذلك طلعت ورحت للمحل وبقيت هناك ادير شغلي
واروح للمزرعه مالتنا انا وفواز اروح يم
خاله ام عادل الي لازمين المزرعه خوش ناس ويعرفونه
ونعرفهم من جنا زغار اجو من الناصريه
يدورون شغل وجان ابوي توه ماخذ المزرعه جانت عباره عن
ارض جرداءءكعدو بيها وبدا ابوي
هو وابو عادل الله يرحمه يشتغلون ومن احنا زغار نروح ويه
ابوي بعدين فواز من كبر دفع الابوي فلوسها
وكله يابه هاي مزرعتي انا وسلام وعمر بيها زرع بيها نخل
وجنت انا من اشتغل وابوي
ينطيني فلوس ياخذهن فواز يكلي فلوس حصتك ماكو يومين
وارجع اخذهن منه اكله دين هو
ينطيني اياهن وهو يضحك وفواز ما ياخذهن مني
وجانت ام عادل من اروح دووم تسويلي خبز بالدهن يعني
العجينه تخبزها الي بدهن بطاوه
مو بالتنور جنت كلش احبها من اروح للمزرعه ما اكل بس هاي
الخبز الي تسوي خاله ام عادل
وتخدرلي جاي ع الحطب اما عادل ابنها جان مؤدب وامين هو
متزوج وانا ساعدته بزواجه
وفواز اشتراله الغرفه وزفه بسيارته
المزرعه فواز بنى بيها بيت النه كال من نروح نكعد بي واثثه
احنا ما جنا نرووح هواي بس فواز
دائما يروح يشوف الشغل
المزرعة الثانيه مزرعة فواز ابحده بيها حجي مهدي هو وعايلته
انا ما امر بيها رغم هي قريبه
على هاي المزرعه
من اكمل شغلي اروح اتعشى بالمطعم صرت ابات بالمحل
لان وصلت البضاعه بالليل فاتخذتها حجه وتلث ايام
اجرت غرفه بفندق ونمت اهناك
كان قريب المغرب لمن اتصل عليه رقم فواز انا ما جاوبت
كلت هسه يدز مسج لكن بقى يرن ويرن انا قطعته
وخابرت رحمن سالته كلي اجه اليوم الظهر ومن ساعه اجا
تلفون واخذالسياره وراح
انا كلت اكيد يتصل من البيت راح وحجتله رضوى وخالتي
ولازم هسه صبيحه وسهير وكوثر اصياحهن يجيب
التايه اكيد جاي يتصل على مود يستفسر جاوبت بدون نفس
//الو فواز
الو السلام عليكم
سمعت الصوت مو صوت فواز :: عليكم السلام منو
اخويه احنا بالمستشفى صاحب هذا الرقم سووا حادث وحالته
خطره وجاي نتصل بيك من يمته
انا صرخت وكتلهم :: يا مستشفى
— التعليمي ياريت تست...
سديته ورحت صعدت وانا ما اشوف كدامي غير فواز اخوي
الي

كله حنيه فواز اخوي وحزام ضهري الي
من جنه زغار وهو يشتغل علمود انا اكمل والي دللني وما خلى
بنفسي شي فواز الي نلعب سووا
طوبه والي نروح نشيل اثقال ولياقه سوه فواز الي اذا غلطت
بحق رضوى يزعل عليه ويكلي غلطت بحقي
والي اذا زعل على عطاء لازم يعاقبها فوك ما مزعلها فواز الي
ادخل علي للغرفه يسوي
روحه ميت واظل ابجي واكله اكعد لا تعوفني يكعد ويحضني
ويظل يبجي وياي فواز اخوي
الي خاني ويه اعز انسانه وخلاني ما اعرف اعيش حياتي سعيد
الي ظلمني وهاني من
اخذ حبيبتي والطريقه الي اخذها بيها

صرت اسوق واصرخ نسيت كل شي بس اريد اوصل
للمستشفى بس اويلي الطريق صار شطوله
وصلت للمستشفى اركض يم الاستعلامات كتلهم ولد مسوي
حادث
كالو //اي الويا لبنيه
حجيت وانا ارجف /:لا ابحده ما ادري يجووز
اشرلي واحد // ادخل
رحت اركض اتصلت على رقمه ردعلي الولد كتله :: وين انتم
انا بالمستشفى
اجاني الولد ويا ضايط شرطه وانا عيوني بكصتي الولد كلي
خويه احنا شلنا هو والبنيه جان كدامنا ويمشي بسرعه وطك
التاير ما سيطر انكلبت بيهم السياره
الضابط لزمني كلي// البنيه شتعودله
كتله ::ما اعرف اريد اخوي اريد اشوفه
كلي//اخووك هسه بالعمليات بس البنيه راسا توفت تعال
اتعرف عليها
انا رحت كل ظني اشوف رضوى لان عرفت من اجه من اربيل
راح للبيت وعرف الي صار واخذها وطلع
رحت رجليه عجزن عن المشي وانا احجي ويه روحي
::ولج متي كبل لا انتقم منج ولج رضوى دووم معذبتني اريد
انتقم منج لان خنتيني انوب متي
وفواز حالته خطره ولج رضوى شلون الج كلب تعوفيني ولج
مرت اخوي بس ما اكدر انساج
لا رضوى ابقي مي خالف احركي كلبي ذليني بس لا تموتين
كافي جاي تموتيني وانا متحمل واشوفج يم فواز وهو محتار
شيسويلج انوب افقد اعز اثنين بحياتي
انتي وفواز كافي قضيتو عليه ما شبعتو لا رضوى لا تكتليني
وصلت وانا كوه امشي كشف الضابط وجهه انا مغمض عيوني
الضابط كلي
- - شوفها اخ سلام وكلنه منو هاي
باوعت الها واتفاجات ما جانت رضوى اصلا ما اعرفها ولا
شايفها الضابط كلي تعرفها الهاي البنيه شتعودله
زوجته اخته انا هزيت راسي جاوبته باستغراب
:: لا زوجته ولا اخته ما اعرفها
الضابط باوعلي /:تدري يعني شنو ما تعرفها خابر اهلك
وعمامك خلي يجوون ما تعرف شراح يصير
طلعت وانا اجر بالنفس حسيت براحه لان ما جانت رضوى
بس طلعت لكيت الدكتور والولد
الي خابرني اشر عليه الطبيب كلي
- - سلام رووح الاخوك ما كدرنا نسوي شي وهو بس يحجي
سلام سلام روحه شوفه شيريددقبل لا
رحت ركض للغرفه دخلت لكيت فواز اخوي وهو النفس
بحنجرته يحاول يتنفس لكن ما يكدر وصلت
يمه من شفته صرخت كتله
::فواز خويه انا سلام كوم كل شي ما بيك
هو انتبه كلي بصوت كوه اسمعه واحرف متقطعات
س ل ام خو يه همزين اجيي ت قب قبل لا امووت
انا ابچي واگله ::ما بيك شي ابو الفوز هسه تكوم على حيلك
حاول يفتح عيونه ويباوعلي وهو دموعه على خده وصوته بي
وما يخف
فواز/:فات ال ا و ان سل و وم اسمعن ي لاز م تع رف ا لحقي
قه وت ع ر ف ا لسر وتح افظ عل ي او عد ني
::فواز لا تحجي كل شي ما بيك هسه تكوم وكل شي الصار
فدوه المهم انت لا تخليني وحيد
كوم ياخوي وابوي وصاحبي وكل شي الي بالدنيا
فواز/:لا لا اسم عني كبل لا يف وت الاوان ار يدك توعدني
صرت اصرخ :: اوعدك فواز والله اوعدك شتريد صار
لزمت ايده ضغط عليها حيل گلي //سلام احضني خل اشمك

انا حضنته وهو صار يجر نفس وكوه يحجي//سلام رض وى
رضوى اما نت ك والله هي شريف ه وبر يئه
سلام خليني اش وفك
خليته ع الجربايه وهو بقى لازم ايدي ويباوعلي گلي /ج
سلام (صار يحچي بعبره ) سلام جها جهالي امانه عندك جهالي
ورضوى اتز وج ه ا تح بك هي ال ك
سلا جها لي لا تعوف رض امانت تعال اريد ابو

وسكت فواز وايده عافت ايدي سكت اخوي سكتت روحي
وسكت كلبي ظليت لحظات وانا حاضنه صرت اصرخ اجه
الطبيب شافه وغطى وجهه انا افر ايدي
::لا دكتور انتم ما تفتهمون شي هو دووم يمثل عليه عود
ميت ما بي شي هسه يكعد يضحك
::لا لا تغطي وجهه دووم يتشاقى يسوي روحه ميت ويخوفني
ويكعد
الاطباءعافوني وانا بقيت حاضنه وابوس بي وابچي
::ليش عفتني بهذا الحمل وهاي الامانه اكعد منو كلك اكدر
للامانه اكعد انت الجبير
انا كل شي ما اعرف
بقيت ابوس بي واشم واكول ::انا مشتاقلك مشتاق الحظنك
مشتاق اسولف واتشاقى فواز
كسرت ظهري كافي منو بقالي ابو الفوز ارجع يمعود اضربني
اغلط عليه بس لا تعوفني
مو انا وصية امي وابوي مو انا الزغير المدلل الشبعتني قهر
وضيم انوب حملتني امانه
كل شي ما مفتهم منها اكعد فواز اكعد لا تخليني
شويه وما احس الا عمي صاحب وهو يصرخ وطاهر واولاده
يصرخون وهواي ناس بس الي
اذاني اكثر واحد فارس ورحمن شاكين ملابسهم ويصرخون
ودخلو حضنو ويبوسون بي المستشفى
انملت كرايبنا ونسابتنا واولاد عمومتنا وخوالي والعمال
واصدقائنا انا مو يمهم حاضن اخوي وكاعد بس الي
صار انو اهل البنيه حوطو المستشفى واجه جبير عشيرتهم
وكاوم شيخنا وكال
الجنازه ما تط

لع ولا يندفن الا نكتل اثنين منهم
اهنا عمي طاهر والشيخ حجو ويا شيخهم واخو البنيه طاهر
لازم نفسه ويحچي ويسمع كل الموجودين
شنو عمي متعجبين بنيه مخطوبه وباجر مهرها وراحو على مود
يشترون ملابس وصار
الحادث قضاءءوقدر هي توفت وهو توفى المفروض ندفنهم
سووا واحد بصف الثاني
اخذ عمي طاهر وشيخنا شيخهم على صفحه وكله// فهم
اخوانها لا يفضحوون نفسهم ماتو
والسر مات وياهم خلي يطلعون ابياض الوجه كدام الناس احنا
حاضرين الكل شي نبقى اهل واخوان
وما نريد فضيحه شكلك بتهم طالعه ويه صاحبها وتبقى لثگه
ما تروح طول العمر يتعيرون بيها اولاد اولادهم
فهم اخوانها وخلي الجنازه تنشال ولا يفضحون نفسهم والعار
يضل راكبهم طول العمر ياريت باقيه عدله جا كتلوها
بس الصار صار ما ندري شنو وبس الله يعلم بيهم
واحنه حاضرين الكل شي
طاهر // شيخ انت تعرف لو شيصير احنه محقوقين وهم راح
نحول ونفصل وهم راح نشيل ميتنا وندفنه
شتگول اندفنه بستر والبنيه هم تندفن ونجي نطيح عليكم
وحاضرين بالي تردونه لو تفضحون نفسكم
والناس اتعير بيكم لان احنه ولا واحد يدري بي وكلنه نعرف هو
مسافر الاربيل لمو السالفه وانت بكيفك
اهنا الشيخ شويه رخى وراح فهم اخوانها ورجع كال //الكم
عطوه الوره السابعه
وافق شيخنا واخذنا الجنازة للمغيسل وغسلنا انا ورحمن
وفارس كان الموقف صعب علي وانا
اغسل اخوي وحيدي حزام ظهري وعضيدي جنت ابجي واعاتبه
بكلبي
::وك خويه اكعد لا تعوفني هلكد انا عدك ما اسوى ورخيص
وتعوفني فواز والله محتاجك
اما فارس ورحمن ذوله مشكله يعني انا بكفه وهمه بكفه
حزنهم على فواز لان فارس
صديقنا من احنا زغار وامي دايره بالها علي لان يتيم وعمي
رحمن هو وابوي من
جانو شباب وفواز يمه من الزغر اتعلم على ايده

من كملنه كالو ناخذه ندفنه
كتلهم/: لازم يروح البيته ويودعونه اهله
اخذنا الجنازه لكينا البيت مليان نسوان تلكني خالاتي وعماتي
واخواتي فاقدات
وفواز شايلينه صحبانه وهمه يصرخون انا حچيت ويه عمامي :
: دخلو العريس الغرفته الي ما تهنه بيها
(لان جنت اشوفه دووم ينام بغرفة امي او بره )شلنا التابوت
خلينا فووك الجربايه اجن اخواتي
وعماتي خالتي كالت اطلعو خلو مرته تودعه الكل احترم رايها
بس اخواتي ظلن يصيحن
اسمعهن يكولن //شتودع منه هو ما شاف راحه وياها هسه
صار عزيز
غدير // ما نخليها تشوفه هسه تطلع تروح ويه امها
من سمعتهن دخلت كمشتهن وطلعتهن وبقت عمتي عليه
وخالتي ام بهاء
💘💘💘💘💘💘💘💘💘💘💘💔💔💔💔💔💘
💘💘💘💘💘💘💘💘💘
رضوى
جنا قريب المغرب نريد نتوضى لمن ما سمعنا عمي صاحب
يصرخ ويصيح يابويه اوورا سهير بس تصرخ
وتلطم طلعنا انا وخاله ربيعه واحنا نرجف شفنا طاهر اجه وهو
يصرخ وصبيحه نريد نفتهم ماكو عطاء بس دموع
راحت ام بهاءءالخالي صاحب ابو انمار شصاير هو ما جاوبها
اجت سهير وهي تلطم على وجهها وكالت وهي تصرخ
قرة عينج رضوى فواز مات
انا من سمعت الخبر واشوف شلون النسوان بيهن وما يجن
للبيت عيوني غوشن اوكعت مادريت
الا على امي ورقيه وهنه يرشن علي ماي انا حالي حال عطاء ما
كدرت اصرخ شصرخ وشكول
وعليمن عل الاخو والسند والقوه لو على الزوج الي ظلم نفسه
وظلمني صرت ساكته بس
دموع ما اعرف شكول اباوع بعيوني وابجي بدون صوت انوب
اجت وحده من كرايبنا تكول
فواز ويا وحده وهي هم اتوفت وما يعرفون مني هي لو شنو
وضعها ويا
انا ظليت صافنه واكول بكلبي
=ليش هيج سويت مو عطاء تحبك وتموت عليك انوب متت
بفضيحه فواز ما فكرت بيه ليش
اجت خالتي قسيمه وجابتلي دشداشه سوده ولبستني وكالت
- - اسمعي رضوى انت وامج لو شيسوون اخواته وصبيحه
وبتها وشيحجن انتن تسكتن لمن
ما تكضي الفاتحه على خير
امي وهي تلطم على وجهها //وينه او وين الحجي تعودنا نسمع
ونسكت بعد فواز ما يطلعنا ويوكف كل من عد حده
انا سكتت وردنا نروح للمستشفى لكن بهاء خابر امه كلها
الوضع ما يحتمل نسوان تجي
وصار ليل قريب الساعه عشره جابو فواز البيته ودخلو للغرفه
وخلو التابوت ع الجربايه
البنات اخواته ما قبلن اجي يمه سمعت سلام لزمهن وطلعهن
يدفع بيهن بقت بس امي وخالتي
وخاله ربيعه اجيت يمه فتحت التابوت وطلعت وجهه كت
الخالتي
خاله صيحي عطاء واخواته خلي يشوفنه ويودعنه
واجن انا ابتعدت هنه ظلن ييوسن بي بس عطاء جانت تعاتبه
بعيونها وسهير تبچي وتكله
فواز اكعد انمار وجود يردونك اكعد العب وياهم

ام بهاء طلعتهن وبقيت يمه تقربت علي وانا اشوفه عبالك
نايم دنيت حلكي على اذنه
وحجيت ويا على كييف

=فواز وين وعدك منتظرتك عدمن خليتني ليش خليت بيه مو
انت اخوي الي ما جابته
امي فواز اكعد تدري ذاك اليوم بعدك عدل وبقوتك وكله
بيدك تدري بيهن دارن عليه وكتلني
هسه شلون شسوي ما عدي قابليه مو كلت بس ارجع من
سفرتي انهي كل شي وكل شي
يرجع مثل ما جان مو خابرتني وكتلي حضري فلوس محتاجهن
وگتلي بس ارجع راح تفتهمون وبايدي ازفج
السلام ليش فواز اكعد اكعد ياخوي حضرت الفلوس كافي
تتشاقى دومك من احنا زغار تمثل عود متت وتخلينه
انا وعطاء نبجي