الليلة الرابعة
( القصيدة بحق ام البنين ع )

مشتاكه اشوفك بيه يدري اليل
وانه اعله هجرك بيه ماضل حيل
يالذكرياتك شوفني الويل

*********

من سافرت حيلي انحنه وجفي كصر يلعالي
عمري انه ما فاركت هيج اليفارك الغالي
مو بيتك الخالي فقط كلبي من عندك خالي
من ودعت وجهك تره كل وجه ما يحلالي

يابوكلب ما صبحت مصباح
اله اعله وجهك والكلب يرتاح
عني رحت وكلشي بعدك راح

*****

امك انه وام الكمر يبني شكبر منزلتي
ام وامشو عنها الولد شتتصور بعاطفتي
جنت من اسولف بس الك تحله احس سالفتي
سأل انه روحي تره. بغيابه هم كابرتي

منهو اليكابر وانته ذاك احسين
فركاك علي امبين من العين
يابو رقيه الكه مثلك وين

*****

جلماتك الحلوه بعد بيهن اسمع اذني
كل ظني ليسافر يرد بس ما ترد شو ظني
يكسر الخاطر والكلب بجفاك صاير وني
اخر ولد من فاطمة واخذتك دنيه مني

يمه اسمعت ثاني الشمر فوكاك
جا ما خذتني حتى اموت وياك
بين الحوافر حتى تضيع هناك

*****

بيك اسمعت باخر نفس من عسى لا ظل عمري
جم حافر بصدرك رفس. ويشتم هوه شو صدري
بظهرك جوي من الرمل. واني علي في ظهري
بمنشاره من حز منحرك. الشمر ما حز نحري


كل هذه بيك ويمه ما عافوك
جا همه حتى من الهدم سلبوك
طبره اعله طبره علارض وذروك

*****

يابو رقيه وداعتك. من المرض مكضيه
طفلة حياتك والعمر. من الاذن مدميه
هاي العزيزه اعله الكلب. منها اسلبو ترجيه
روحي انسبت من اسمعت طفله مشيت مسبيه

لا ما تجي بيقضه ولا احلام
زينب مشيت ابلا اخو لشام
بسوك المزاد انباعو الايتام

*****

وصيته كتله انه الكمر بالك احسين اتعوفه
ما قصر وياك الكمر علنهر ذب اجفوفه
كلك اخي بهايه فقط من رحت انته تشوفه
جرح الكمر صاحب وفه من الصعب اخ ايروفه


مثل الكمر لا ما يجي بالكون
انطاك ادين وجبهته وعيون
فدوه الكمر لعيونك وممنون

علي حسين المياحي

يارد يوسف من مغيبه سالم علي للخيمه جيبه
لمن رحل دمعي همل والهم خذاني
بحزني همت واحسب كمت حته الثواني
****
ياربي اقبل دعوتي ورجعلي الاكبر
تدري عله افراك الولد كلبي تفطر
ضليت انطره بخيمتي وابني تأخر
ياربي ما اكدر بعد اتحمل اكثر

تدري الولد لو فارك امه عكبه تصير الدنيه ضلمه
طال الهجر وانه انتظر وشتد حناني
بحزني همت واحسب كمت حته الثواني
****
كل ساعه يتغير شفت ضل وجه الحسين
وانه عله اوليدي خفت ودموعي بالعين
بهمي رحت يم والده وكتله علي وين
كلي علي يرجع الج بس اله تدعين

وانه دعيت الله وطلبته ومن رد علي الاكبر شكرته
صوتي ارتفع ابني رجع وبشوكه اجاني
بحزني همت واحسب كمت حته الثواني
***





تشبه محمد هيبته اوراث خصاله
ياربي الاكبر بالبشر ماكو بجماله
اعله عيونه سبحانه صحت رب الجلاله
ومن راد يطلع للحرب كلبي دعاله

منه يشع نور الولايه للحومه طاله جنه ايه
جنه سوه وضاع الهوه من فاركاني
بحزني همت واحسب كمت حته الثواني
****
توه ابني ودعته ومشه وبعده صحت شاب
ومن غاب وجه امن الخيم حته الكمر غاب
واشلون يغمضلي جفن وراح اغله الاحباب
ما صدك ايروح الولد ويضمه التراب

بالطف جوتني نار الوداع ذاك الربه وذاك التعب ضاع
عالراح اون ما جنت اضن يغدر زماني
بحزني همت واحسب كمت حته الثواني
*









هوه مناي وسلوتي وبالدنيه رجواي
عطشان صايرله اشكثر ما شارب الماي
فوك الترب ما صدكت مذبوح الهواي
من ابجي شو يبجي يضل راس ابني وياي

بحد السيوف امكطعينه وعليه تون ليلى الحزينه
راح الولد شصبر بعد والمن اتاني
بحزني همت واحسب كمت حته الثواني
*
خلاني وحدي بحيرتي وهجره كتلني
والنوك من كد ما نحت حنت الوني
يوليدي ارحم غربتي ولا تمشي عني
سهرانه وتأمل تجي بس خاب ضني

من فركتك تدري حبيبي برمشي طلع يوليدي شيبي
اتأملك وبجي الك والون عماني
بحزني همت واحسب كمت حته الثواني
**
تمت
تحسين الخفاجي

يل خوتك خوه......يل كلك امروه
يابو فاضل
حاجيني حاجيني.....لجلك تهل عيني
يابو فاضل
=============
انه زينب يل ولي.......عكب عينك أنولي
يابو المحنه
حركو اخيامك تره......والنساء متحيره
ماتفزعلنه

افزع يخويه للحرم حارت
هل عمله منهه ابد ماصارت
خيل اوزلم صوب الخيم غارت

ياخويه عدوانك.......ضربوهه نسوانك
يابو فاضل
ماتسمع اونيني.......لجلك تهل عيني
يابو فاضل
=============
آه يشيال العلم.......انته عزبت السهم
بعيونك
تدري اليه انته ضوه....ضلمه صارت نينوى
من دونك

ياخويه خيتك عينك اعليه
سوط الشمر خلاني محنيه
عكب الدلال اصبحت مسبيه

كلي يمسبيه......اوجاب الحبل ليه
يابو فاضل
وبسوطه ياذيني......او لجلك تهل عيني
يابو فاضل
===========
يابو فاضل من طحت......اوكفت عل تل اوصحت خ خويه يعباس
لاكن ابعينك سهم......تيهت صوب الخيم
يل كلك احساس

نار الخيم جوتهه رجليه
شافوني اجانب وانه علويه
وتشمتو كلهم بني ميه

بل جثث اتعثر.......وأنه بنت حيدر
يابو فاضل
لا أخو اليحميني....اولجلك تهل عيني
يابو فاضل
===========
السكنه انه شعتذر......بعد ماتحمل صبر
اتكول وينه
اتراجعت عن الطلب.......الماي متريده العذب
خله يجينه

خله يجي حنيته ترويني
وبشوفته ينشف دمع عيني
لمدلله عمي يسميني

أطفال ماتكوه .......وينك يبو النخوه
يابو فاضل
شوفتك ترويني......اولجلك تهل عيني
يابو فاضل
============
يا ألم درب اليسر.......شفت أنه المايمر
يل كافل
الشمر يتمرجل علي.......أبحبل كيدهن ادي
ويحاول

كل هاذه بس رايد يبجيني
يضرب الراس او أنضر ابعيني
أوللسوك بل تالي يوديني

يابو الفضل صعبه......امشي ابوسط غربه
يابو فاضل
والشمر يحديني....اولجلك تهل عيني
يابو فاضل
============
خادم .. زينب. ع. عباس طالب الجنابي..

انطيني جفك خل احنيه وبالخيمه عرسك يمه اسويه
اعلك شمعتك وعجن حنتك
يبني يبني
****
حلمي اسويلك عرس وفرح يجسام
وعجنها بيدي حنتك يوم من الايام
كل عام اكولن هالسنه ويخلص العام
واليوم من گد فرحتي حنيت الخيام

حسبالي احنيهن جفوفك ومثل الولد عريس اشوفك
امشي بزفتك وعجن حنتك
**
كل ام يظل عدها حلم يرعاها ابنها
ايباريها وهموم الزمن يحملها عنها
يعوضها بسنين الربه وذاكه حزنها
وامك عفتها من وكت وخيبت ضنها

ما ادري يمه ترحل بساع والعشره راحت والحلم ضاع
حلوه عشرتك وعجن حنتك
****
برباك يوليدي اتعبت عوضني برباك
ورجعلي جلمة يمه الي ورجعني وياك
ارجعلي مو كافي هجر موتني فرگاك
كل يوم ينعد بسنه يمه بلياك

يوميه احن ويمه اشتاك ارجعلي ما ينراد الفراك
تكتل فرگتك وعجن حنتك
***
جسام يا بعد الگلب عدمن عفتني
اشتاگيتلك يمه شكثر مو شيبتني
ما شفت راحه بدنيتي من فارگتني
ضيعتك انه بكربله لوضيعتني

يمه الولد تعبني فرگاك كلما ادير عيوني الگاك
اشبگ صورتك وعجن حنتك
****
يمه وغلاتك شيبت ارجع يغالي
مابيه انتظرك بعد وسهر ليالي
مليت يبني فرگتك حن عله حالي
عن بالي لحظه ماغبت دوم عله بالي

ارجعلي يمه وكافي الغياب ملتني بعدك گعدت الباب
طالت غيبتك وعجن حنتك
***
جسام يبست حنتك وماظلت اشموع
تدري ييمه بفرگتك سلتني الدموع
مشلوع گلبي من الزغر وظل گلبي مشلوع
والشده راسك عالرمح اگبالي مرفوع

والشده جانت يمه جسام مسبيه زينب تمشي للشام
تعبت عمتك وعجن حنتك
*
تمت
#ميثم العمري

اوّل گـــمـــر مــذبــوح .. بالطف لـگــيـتــه
ينزف ضوه اعله الماي .. ومن دم بچيته
اظلم عمري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
اوّل مرّه اشوفن ضَي گمر ينزِف
وعمود اظلم اجه براس الضوه يخسِف
واوّل مره اشوفن رايتي مترِف
واوّل مره ابو فاضل يخَي يِهتِف

ادركني خويه ايصيح .. وبصوته حسـره
اعليه اركضت مكسور .. عثره اعله عثره
آ يا كسري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
الـ مِن ظَهر الفرَس جِدمه يخط بالگاع
حلْو الطول ذاك الذي اعيونه اوساع
باقي شويه منّه گمر هاشم ضاع
جسمه اتسلّب وظل يِنشَره وينباع


هنا چف وگَع وهناك .. چف ثاني مفگود
هنا جسمه راسه هناك .. وهنا لِوه وجُود
كاسر ظهري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
شتفيد المناحه او لوعتي ودمعي
رحل حامل لوائي وعسكري ودرعي
تركني منكسر وايدي على ضلعي
مَيسِر لا صديج ولا عدو وضعي

مدري امشي للخيمات .. مدري ابقه يمـه
بحال الرضـيع شـلـون .. العينه اعله عمه
بدمعه اليجري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
شِلِت عبد الله بيدي وصحت يالسگاي
الطفل يبست ارياگه وماكو گطرة ماي
أنَه بهالساعه ردتك يا عضيدي اوياي
بچيتك من دمه وشّل دمع عيناي

ذبحو رضيعي ومات .. ما بين اديه
وصاحن يكافل گوم .. سكنه ورقيه
بطفلك تدري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
كلنه بعازتك بس زينب اكثرنه
اجت گدامي تصرخ ها تطشرنه
بچت وتگول من هسه تيسرنه
اليگطع روسكم بيده يسيرنه

ضَجّه ونحيب وخوف .. عگبك يكافل
وتـنــدب ازغــار اكـبـار .. آ يابو فاضل
حارس خدري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----
آ يا ضيعتي ابدونك يبو النوماس
بوكت ذبحي وذكرتك باصعب الاحساس
عله ظهري الشمر ثنّه ركبته وداس
بده يگطع بنحري وصحت يا عباس

كل أخ باخير انفاس .. يحتاج اخيـه
شافوني صرت اوحيد .. ودارو عليه
گطعو نحري .. حرت بأمري
ومن دم بچيته
-----·-----·-----·-----·-----·-----·-----·-----·-----·-----


#ياسر حسن
محرم ¹⁴⁴³

العليله
___
اخذني وياك من تمشي
يالساكن وسط رمشي
چنت وياي كلشي أنت
رحت أنت وخذت كلشي
ـــــــــــــــــــــــــــــــ
خذت روحي ودليلي وماخذتني
بچلمة باچر ارجع صبرتني
اضل شلون عگبك يالعفتني
يهضمني البعد يالدللتني
نار الشوگ تچويني
امشي وياك خليني
العين بلا نظر شتتفيد
يالماخذ نظر عيني
ــــــــــــــــــــــــــــ
خذت كلشي ورحت يالانت كلشي
ما حسبت عني بيوم تمشي
يالمسافر بقت صوره عله رمشي
وداعك خنگ روحي وذبل هرشي
لوعني تريد تروح
اخذ وياك بويه الروح
يجرح گلبي شوگ البيه
شيصبر گلب مجروح
ــــــــــــــــــــــــــــ
تمنيتك اخذت عيوني وحلامي
يالعگبك ظلام يصيرن ايامي
كلما طلع صبحي يزيدن الامي
وي المصباح تطلع صوره گدامي
صورة حرگة خيامك
جمرهه اليلسع ايتامك
يومك حيل ياذي الروح
فدوه ايامي ليامك
___
ياسلوة ايامي وسلوة سنيني
شتسوه الدنيا من تمشي وتخليني
احس وكت الموادع حضنتك عيني
تگلك عني لا تمشي وتبچيني
كلام العين يجرحهه
الوصل مايوم فرحهه
عين الخاليه من حسين
كون الظلمه تذبحهه
___
بويه الروح من تمشي وتخليهه
تضل نار الموادع تستعر بيهه
حرت بيمن خلافك بويه اسليهه
يالرايح وماخذ كل اهاليهه
روحي البعد ياذيهه
من تمشي وتخليهه
تبقه بلا اهل والدار
ظلمه خلاف اهاليهه
_
الشاعر ابو اسحاق الفحام

شيبت كلبي برحيلك وين ادور حتى اجيلك
عايف ابديرت غرب
طفله مكسورت كلب
بويه مسلم بويه مسلم
؛:؛:؛:::؛::؛:؛؛::؛؛؛
طفله مكسورت كلب من ودعتها
روحي جن ورده بغيابك ذبلتها
ليش بويه عذبتها الدللتها
بنيتك بويه حميده موتتها

حيرت الفكدت ابوها حايره روحي لكوها
بين بوجهي التعب
طفله مكسورت كلب
بويه مسلم بويه مسلم
؛؛؛؛؛؛؛؛؛؛؛؛؛؛؛؛؛؛؛؛؛؛
سفرتك هايه بعد مابيها جيه
جني اعلم تاخذك مني المنيه
الطم الطم عالوجه بثنين اديه
افراك التحبه صعب اكبر اذيه

افراكك معذبني حيل بالهوه من امشي اميل
انت وين بيا درب
طفله مكسورت كلب
بويه مسلم بويه مسلم
؛:؛:؛:؛::؛:؛:::؛::؛
وجهك الفاركته مالحضه نسيته
غمضت عيني بحلم دامي لكيته
راح ابوي الغالي مني وعاف بيته
الك بيت من الحزن بيه بنيته

حيرت الفاكد جبيره عايف ابنيتك زغيره
تدري بفراگك صعب
طفله مكسورت كلب
بويه مسلم بويه مسلم
؛:؛:؛:؛:؛:؛؛:؛؛:؛؛؛:؛؛:::
اسمع ابطاري القصر منه شمرتك
تطفه كل اسنيني من تطفه شمعتك
روحي انذره نذر بويه برجعتك
عايف ابغربه تون وحدها بنتك

روحي مشتاكه لعيونك هم تغير بويه لونك
نار الموادع تشب
طفله مكسورت كلب
بويه مسلم بويه مسلم
؛:؛:؛:؛:؛؛::؛:؛؛:؛؛؛:؛؛
طارش المنك اجه عذب دليلي
ماطبگ جفني يبويه ونمته ليلي
حيلك مطرش تعال واخذه حيلي
لوني متغير تره رايح خليلي

من على قصر الامارة تقره لحسين الزيارة
جسمك بدمه انخضب
طفله مكسورت كلب
بويه مسلم بويه مسلم

هاشم الدراجي
اهدي هذه القصيده الى روح والدتي

قصيدة بحق العليلة جديد محرم ١٤٤٤ هـ


چان اعله بابي الطير يغرد صباح الخير
يا بوية من سافرتوا عني طير السما ون اعله وني
==========================
ايغرد الطير امن الصبح وي صوتة ابدي بيومي
نگعد ســـوة انة و هلي مرتاحة حلوة علومي
بمصباح يوم اضلم صدح للحزن فاطم گومي
بس انة وانتي والدمع صارت چبيرة همومي
رايح عزيز الروح خلة الگلب مجروح
صار البچي والنوح فني طير السما ون اعله وني
==========================
هُدهُد سُليمان النبي محتاجة الك تدريني
تطوي الارض وعلية رد كون بخبر تلفيني
مملكت بيت ال النبي وين اصبحوا دليني
ويا آصف بشوكَ لهلي بلمحت بصر وديني
أتمنى بس ما صار ضليت اون بالدار
لا خبر لا مرسال اجني طير السما ون اعله وني
==========================
تعبانة من كثر المرض والونة تجرح گلبي
اكتب رسايل للمشوا وعيوني الهم تربي
ياطير مد جنحك الي حمل اشواگي وكتبي
وصلهن لنبض الگلب ويشوف شوگي وعتبي
ارحل ياطير الشوكَ واحمل گلب محروكَ
شيبت وانة بزغر سني طير السما ون اعله وني
==========================
عني المحامل من مشت منكم ما واحد ردلي
منتظرة من عدكم خبر گلبي نسوچ ايگلي
شو طوليتوا وما رجع لا اخو ولا عم يهلي
ابعث مكاتيب اشكثر وجواب ما يوصلي
عني الخبر مگطوع ضليت اصب ادموع
من شمهن اهدومك عمني طير السما ون اعله وني
===========================
وي كلشي ابعثلك گمت عن كلشي بعدك جاري
مستغربة شلون وعجب رد ما يجي من اخباري
تاهت مراسيلي ابهوى لــــو ما يعــــرفن داري
بالدار انوحن وانتظر ليلي اتـــصل بنــــهاري
ينساني ابوي شلون لا اهلي ما ينسون
ابقى ابأمل ما خاب ضني طير السما ون اعله وني
===========================
أسألكم الدعاء رائد الاسدي

شهر الدمع
موسم حزن مذبوحي
والطف يعيش بروحي
شهرك جاي .. يا مولاي
...
يمالك روحنه من قبل خلق الروح
من عالم الذر اعليك عشنه اجروح
الك خالقنه رب الكون يا مذبوح
سفينة نوح انت واحنه اهل النوح

بيك الحزن هيمنه
وخيمة الخدمه تلمنه
انت فياي .. يا مولاي
...
يبو الاكبر يأكبر من دموع العين
جرحك ما عتگ مهما تمر اسنين
العجايب سبعه وانت الثامنه يحسين
مسوينه اوادم ما نوفي الدين

بيرغنه وتظل عالي
ونجمه بسمانه تلالي
تضوي اسماي .. يا مولاي
...
نعم تبقه نجم وتضوي كل نجمه
يشوف اعيونه العافك يظل اعمه
شنو معنه عمرنه بغير هالخدمه
سبع فدوات رحنالك يبو اليمه

بين النواظر طيفك
خدامك احنه بكيفك
راعي الراي .. يا مولاي
...
نحر مذبوح وسيوف العده اتهابك
اكبر راس يسجد هيبه يم بابك
هنيال العيون التبچي لمصابك
يبو جروح الچبيره الدوه بترابك

عايش محرم بينه
جمرة حزن تچوينه
جرحك ماي .. يا مولاي
...
كل ما شوف ماي اتهيج الآمي
اشفافك ذابله تنرسم گدامي
يوم العاشر مكدرلي ايامي
عمت عيني متت متسلب وضامي

لاوحگ نحرك ودماك
يا بو علي ما انساك
اتعيش وياي .. يا مولاي
...
خادم الحسين ( عليه السلام)
كرار حسين الكربلائي
( ابو كميل)

قصيدة بحق ابا الفضل العباس عن السيدة زينب عليهما السلام


العفت كلشي اعله موده دعيت الله يعودة
اوصيه اعله حالة الدمع فاض اعله جودة
----------------------------------------------------
اللاهي يا مجــيب المضطر وتعلم بـحالي
يموت من الحزن كَلب المشوا عنه الغـوالي
غالي ولــو رحت مايــــنكَطع عنك سؤالي
حد كَطع النفـس عايش تظل دوم بخـيالي
يربي انخاك احرسة وطن بالغربة احسة
وطن ماكو مثالة الدمع فاض اعله جودة
______
عزيزك يا كَلـــب من يعتني صوب المنية
تحظر يا كَلب لا ترتـــجي من عدة جــية
شبه ميتة صرت من ودعت راعي الحمية
اشم بيه واون وعليه درت باثنــين ادية
بدمع رشيتة مكَفاه واصيحن الله وياه
مشة وكَلبي برالة الدمع فاض اعله جودة
_______
عطـشانة الك كَاع لمــــــطر اروىٰ بحـــناك
يا كلـشي الي يا ابا الفـضل واحد زمانك
احذر وانــتبه مـن العطـش يابس لسانك
محـتاجة ترد خـوف الكَلب هـــذا اوانك
لو طحت اعله التراب اخاف ايطيح الحجاب
من اذكرة بالكفالة الدمع فاض اعله جودة
_______
ياساقي العطاشة امن العذب اروي دلــيلك
يم جــــرف النهـر من تمتنع موتك يجيلك
يا بحـر الــوفه بــــين البـشر ماكـو مثـيلك
ما بين العطش سـيف وحرب كَوة الله حيلك
اريدك ساعة الضيج يخوية بلل الريج
صفكَ يمنة بشمالة الدمع فاض اعله جودة
______
عيـني يالرحت تربي اللوة وصوبك اصدها
كَلبي منخمش مدري شحصل روحي شمردها
لصوب المشرعة حسين ايعثر راح وكَصدها
رد محني الضهر ولخــيمتك طـيح عمـدها
فكَد يسرة واليمين يكَلي وطافية العين
او ودالچ رسالة الدمع فاض اعله جودة
*******
أسالكم الدعاء رائد الاسدي