روحي ماتحمل هجر/// شلون اودعج للكبر
ونتي بضلوعج كسر/// منج ارجو المعذره

بضلمه رادت تندفن وصتني ابهاي
ماريد بس حيدر علي اليمشي وياي
بلمغيسل علهونك من تصب ماي
تدري ضلعي المنكسر اذاني اهواي
من تنزلني اللحد/// يمي ابقه ولا ترد
تدري يوحشني البعد///كلبي الله يصبره
منج ارجو المعذره
##############
طبع المسافر تضل عينه عللحباب
وديلي من عندج عطر وي الهوا الهاب
خيرة النسوان وسفه جوه التراب
مدري اعاتب بلدهر لو عاتب الباب
كافي يادنيه الم///حته محسن ماسلم
كلشي يتراوالي دم///من ضربته الكافره
منج ارجو المعذره
##############
يالرابيه بعيني ضوه لالا تروحين
شرد اجاوب لوسألني عنج حسين
والحسن يسأل اخيته امنه جاوين
فدوه حاجيني يزينب لاتونين
امنه ماهيه شعجب///تأخرت شنهو السبب
ويالگبر عندي عتب///خله عيني مساهره
منج ارجو المعذره
##############
ثمنطعش شمعه العمر طفو شمعهه
شراح اگل المصطفى بهذا وظعهه
الحرگ باب الدار گدامي صفعهه
بياوكت ام الحسن ينزل دمعهه
باب وعليهه اندفع ///ترجته بس ماسمع
بظلعي حسيت الوجع///والظلوع مكسره
منج ارجو المعذر
##############
راح اودعج واليودع عينه تدمع
من اذكرج كل مسيه روحي تطلع
صوتج يراودني وأسأل أنه شسمع
سهله اروحآ للگبر بس صعبه ارجع
وحشه بيامي بقت///شمعتي اليله انطفت
عيوني بفراگج عمت///وداعج ابقه اتذكره
منج ارجو المعذره
##############
ها يروحي للكبر جنج مشيتي
وعلسفر يافطمه شكلج نويتي
نعصر كلبي بدفنتج يلمادريتي
وانه بيت الحزن عگبج صار بيتي
ماحزن مثلي بشر///وخاطري هم انكسر
أبالي حافظلج صور///فاطمه يالطاهره
منج ارجو المعذره



أزهر الزيدي

وين اروح.. بدنيه مابيهه حبيب
وين اروح.. وهذا جرحج مايطيب
وين اروح.. اني من بعدج غريب
يافاطمه
......................

اشتم هوه بس مختنك  وروحي النِفس ياذيهه
شتفيد نسمات الهوه  المايهب عطرج بيهه
تفز مني روحي امن الحزن وبالمكبره الكيهه
يم كبرج اتصب الدمع جن روحج تحاجيهه

مايفيد.. من طرف واحد كلام
مايفيد.. عالكبر احجي وانام
مايفيد.. كعدي رديلي السلام
يافاطمه
......................

جيتج علي بس ياعلي  نسمة الريح تهزني
خلصته عثرات الدرب ماكسر گلبج وني
احلف بعشرتنه الصدك من ثوبي هادل متني
قالع الباب وداعتج احجارت درب طيحتني

حيلي راح.. احجي خل يرد الي
حيلي راح.. فاطمه اني علي
حيلي راح.. وهمي ماضن ينجلي
يافاطمه
......................

ممرود جبدي امن الهضم ودموعي تنزل سكته
يافاطمه عالمغتسل ضلعج انه تلمسته
يومج ابد مامر عليي بيام عمري العشته
اول جرح واخر جرح بعيوني كسرج شفته

صعبه حيل.. وروحي ماكلهه العذاب
صعبه حيل.. نومتج جوه التراب
صعبه حيل.. مووكت هذا الغياب
يافاطمه
......................

باليل اعاين للسمه بكد النجوم ادموعي
من كثر ماصب الدمع توجعني حيل اضلوعي
يم بيتي رحتي من وكت والهجر طفه شموعي
بگلبي بعد ماضل فرح بس الحزن موضوعي

رحتي وين.. العشره ماخلصت سوه
رحتي وين.. وخذتي من ريتي الهوه
رحتي وين.. طافي بعيوني الضوه
يافاطمه
........................

متعوب لاكن ياتعب تعب الفگد عافيته
شحاله اليضل بين الغرب ودافن ابأيده ام بيته
بليل من شلت النعش گلبي شكثر حاجيته
اوكف بعد المن تدك وفاطمه گبالك ميته

كون اموت.. يلعليي ضايع دواج
كون اموت.. يم حسن اني وراج
كون اموت.. ولايشح عني ضواج
يافاطمه



#محمد #هادي #العقابي

يومين إله ومگطوعه اخباره
يمكن علي شي صاير بداره
المايگطع اويانه
شأخره وماجانه......ومگطوعه اخباره
..............................................
هاي النه يومين..... ما جانه ابو حسين..... بس لا علي طايح بحيره وشده
العايش بالگلوب..... خافنه متعوب..... لو خاف واحد أخره من ولده

شما نحسبلها نحس علي يتلوه
خاف الحسن من شعل ناره اتجوه
وضل حيدر ايدور دوه لوليده
وهل بطه اعلينه وما اجه وما ضوه

عالجويه سهله ونگعد نتاني
بس خاف يطلع شي اكو ثاني
ياهو اليطمنه
شصار اويه حيدرنه... ومگطوعه اخباره
............................................
لجفوف ابو تراب.... مشتاگه كل باب.... وماردنه ذاك الخبز ردنه اعيونه
شو يبس كل ريج.... يمكن علي بضيج... بس وين الله وما تغير لونه

سولف علي مره اعله يوم العاشر
وشگد بجه من جاب طاري الحافر
روحه من هاي الدنيه الحسين ابنه
ويا سامح الله اويه الحسين شصاير؟

بس ما نسينه وحيل نذّكر
جان الحجي اعله حسينه من يكبر
مو ابنه المأخره
شنهو الكسر ظهره.... ومگطوعه اخباره
.............................................
توجعنه الاصفاح... وين الهوى راح... عايفنه ليش وجنه اغله احلامه
يخنكنه الغروب.... وكل احنه يعگوب... ليدز قميصه اعلينه كافي الثامه

يامحلى ذيج اسوالفه وضحكاته
ما جنه أمير ودوم ينكر ذاته
ضنينه يبجن زينب وأم كلثوم
وضل علي ابيته ايسكت ابنياته

السبب هذا يأخره بس ليله
ومن خوفنه حرنه شنصليله
مو طبعه يتأخر
وخفنه عليه أكثر... ومگطوعه اخباره
..............................................
هم هيجي وتصير... ويطلع علي بخير... واعياله ملتمين كلهم يمه
عدنه احنه جن عيد.... لحيدر اجه اوليد.... وضل ملتهي ايداري بلمحسن وامه

هيجي وعلي فرحان هوه واهله
ويدز علينه لبيته ونباركله
وننطي هديه بأسم كل الفقره
كاروك للمحسن خشب ناخذله

بس من حسبنه لجية اوليده
واحدنه ضل بس يفرك بأيده
ما كمّل اشهوره
واتضحت الصوره.... ومگطوعه اخباره
..............................................
ما ضل بعد راي.... وكل خوفنه بهاي..... ليگولها الله وفاطمه شي بيها
شدينه العلوگ... وجم گلب محروگ... باب الجذع مطبوگ خاف اعليها

يومين ماكلنه أمن أدين الزهره
ماكو الا غير اضلوعها متكسره
وميت علي لو عدل الله اليدري
بحيدرنه شمسويه هذيج العصره

نحس ببو المحسن ثگلت أنفاسه
وگاعد ابابه ايدگ على راسه
اسم الله اعله عافيته
خاف احترگ بيته.... ومگطوعه اخباره
.............................................
رحنه ولگيناه.... بدموعه والآه....وذاك الحطب جان اعله بابه اشكثره
شمينه عطاب.... من بيت ابو تراب... وماندري شنهو المحترگ بالزهره


من أمس يبجي وعالضلع ثاري يون
وبعيون حيدر شفنه كلشي امبين
يومين والدم أخضر وما يابس
بس الله يدري شكثر نازف محسن

شندعي اعله ذاك البجه حيدرنه
كون بمجان الزهره عاصرنه
بلگوه حاجانه
معذور ما جانه.... ومگطوعه اخباره

#أحمد #ماجد #الكلابي

راحت يالحسن امنه الحنينه
ماترجع  بعد واتفار گينه
الماينمل حجيها  خل نشبك عليها
____

طاح النده..  اوحزني ابتده  ..  شيردها ذيچ ايامي
يم الحسن ..  ادلالي انجفن ...  ودعت كل احلامي

يمه شلون لتروحين والله عازتج عازه
يظل مكسور حد الموت كلمن فارك اعزازه
ورده اتگول امي شلون صارت هسه الجنازه
الشالت ضيم تسع اشهور هاي اشلون تجازه

ياموت الخذاها....  ياخذني وراها
سهمك يادهر مايخطي بينه
راحت يالحسن امنه الحنينه
___
اول صبح..   يذبح ذبح  ...    جي امنه مو ويانه 
ياهظمتي ...ياحسرتي...      ظلمه اصبحت دنيانه

من فزيت من النوم  شفتچ بس تراوالي
يمه البيت مايراد يالفركاج چتالي
امي اتروح عن عيناي ماچانت ترى ابالي 
صعبه يعيش كلمن راح عنه وسافر الغالي 

وبفگدج اعاني  ...     مايرجع زماني
كلنه على البواچي اتگابلينه
راحت  يالحسن امنه الحنينه
___
بعيني شفت...  امي اوصحت ... مكسوره ليش اظلوعچ
طال النظر  ...  كلبي انفطر....      نشفيها يمه  ادموعچ

بصدرچ نابت البسمار شفته وارتفع وني
شفت آثار من الباب ذني الحيل اذني
سواها الزمن وياي يتمني ابزغر سني
امي العافيه البلدار راحت ونعمن ذني

ياظالم عصرها  ...وظلوعچ كسرها
بجفوفچ اثر چويه لكينه
راحت يالحسن امنه الحنينه
_
بكلبي حچي..   بس بي بچي..    امنيتي احچي وياها
من الله وترد ...      من البُعد ... حاچوني وين الكاها

وين الگاچ يمه اشلون حسره ابكلبي شيهوده
يم البيت وحشه البيت فگدچ ياهو اليسده
الامه اتروح من الدار المن طابه اشعنده
كل انسان من اتموت امه ايموت هم وده

اتغربنه ابصبانه...   فراگچ يتمانه
طاحت ولحزن خيم علينه
راحت يالحسن امنه الحنينه
_
فراكج صعب.... ذاب الگلب....      يايمه فكي عيونج
جنه سوه..... انشم الهوه....      شنهي الحياة ابدونج

چنت اتاخر على الدار شيله ابابي يلگوها
ياهو الينتضر جيتي وامي ابنعش شالوها
مو مالت گبر ياناس امي لاتنزلوها
ماعيشن ترى ابلياچ امي اوياي ادفنوها

المنجازي رباها ....   تراب اصبح غطاها
ماتت امنه ياخويه شبدينه
راحت والحزن خيم عليه
___


#حسين #الزيدي

يايمه حيل اتغيرت   /    من غبتي عن عيوني
يا ليل انامه بغيبتچ    / ما ترضه تغفه اجفوني
يايمه ماترهم هاي    /تعوفيني وحدي ابدنياي
    
__
الله اليعينه  اعله الزمن اليفگد حبيبه ابزغره
وآنه ابصباي اوفرفحت روحي اعله فگد الزهره
هوه التموت امه بعد گلي اشيضل ابعمره
مهموم ظل طول العمر محني وجفوفه ابظهره

من اكعد ولا كيج الصبح  /   من كل مرض اتعافه
ميت ترى الفاركله ام   /    وتموت كل اطرافه
للدوم ردتچ وياي     /      اتعوفيني وحدي ابدنياي
__
هاي امي مو مثل الخلگ تختلف بالحنيه
من ماتت او سمعتني اون حنت وانت ليه
حظنتني وتهل الدمع وشبگت اديها اديه
حتى ملائكة  السمه گامت تون اعليه

ونت ملائكت السمه /   ولطمت صدره ابحرگه
يايمه مو وكت السفر /     محتاج ذبح الشبگه
انتي الهوه وانتي الماي  / تعوفيني وحدي ابدنياي
____
يامحله لمتنه گبل من امي تكعد يمي
اوتنشدني عن حالي اشجره واتزيح ضيمي اوهمي
هدّمت حيلي او من مشت وياها ظايع حلمي
عالدنيا ياناس العفى من مشت عن عيني امي

اثمنطعش لاماكملت /   الربتنه على الحنيه
ماتت يعالم من وكت/  امنه بعدهي ابنيه
ليش الدهر قاسي هواي / تعوفيني وحدي ابدنياي
_
امي آنه مخلوقه وعلي بالجنه من تفاحه
ترفه مثل وجه الصبح لوطر فجر مصباحه
غار الحقد من الورد جار وصبّح ذباحه
مظلومه حتى ابموتتچ يايمه مامرتاحه

هذا الحرگ بابچ تره  /   نفسه اليروع اطفالي
واحجايتچ ماتنسي     /   يايمه هاي ابالي
شهري اومحرم هل جاي/   اتعوفيني وحدي ابدنياي
_
حاچيني يايمه صحت ابنچ ييمه انه حسين
باجر منو اليبچي علي لو طحت بالطف تدرين
مو وكت الموادع بعد عن عيني لا لتروحين
محتاجچ آنه ابكربلا جا امي اجيبنهه امنين

ياهو المثل كلبج ترف  /   ويهل عليه ادموعه
ادريج من كثر العتب/    يايمه هم موجوعه
ونيت ونك ياناي  /   تعوفيني وحدي ابدنياي





#حسين #الزيدي

___

الامام علي ع اثناء تشيع مولاتي فاطمة ع



شالوا نعشها وطاح گلبي
واسم الله محد گايل
انه الثگيل بروحتج
رديت منج مايل 

هاي يالحنينة هاي يالحنينة
--------------------------------------------------------
من شالوا گبالي النعش وانشال شي من عندي
ومحتار وين انطي الوجه  للزهرة مدري الولدي
ماينضم بروحي الحزن دمعة تنشاف بخدي
وياج اروحن للگبر  جا ليش اردن وحدي

لو ميت ولا شوفج بهل الحالة
ياهو الگبل شيبة طلع بخيالة

رديت كبران هواي
المفروض ارجعج وياي

هاي يالحنينة هاي يالحنينة
--------------------------------------------------------
هذا الفراگ المن وكت يكسر الخاطر سكتة
رديت واسحل بالجدم وهاظمني حيل الشفتة
ماادري گلبي البدرب من يمي طاح وعفتة
سالتني زينب والحسن معقولة حيدر انتة

ودعتج ورديت حيرة بقصتي
حيدر الميت لو الميت انتي

ودعتج انه وحنيت
وكبران راجع للبيت

هاي يالحنينة هاي يالحنينة
------------------------------------------------------

يلزهرة لو يمج اضل لو انتي تمشين وياي
من البيت حد المگبرة رديت كبران هواي
رديت اسحل بالجدم واتعثر انه بممشاي
عطشان رديت لهلي بس العطش مو للماي

عطشان اشوفن وجهج وحنيتة
فشلة امن اطب وبيتي موش ابيتة

يهضمني اليسولف جاي
ويگلي هاك اشرب ماي

هاي يالحنينة  هاي يالحنينة
---------------------------------------------------
انه ابو تراب وانهظم فوگاج احطن لتراب
وانه القلع باب شعجب هسه اليبجيني الباب
انه الثگيل بروحتج يهزني الهوة المنج هاب
رديت شايب يم حسن وانه الجنت يمج شاب

اسال الوادم حتئ اندل بيتي
ومعذور اكلهم مني راحت ريتي

گوة الهوة يطب للروح
لو ادري گبلج مذبوح

هاي يالحنينة هاي يالحنينة
----------------------------------------------------------
گوة اعله روحي من رحت ماريد اعوفج زحمة
هو انتي نعمة يم حسن ياهو اليعوف النعمة
زحمة الزلم تبجي وعلي بس البچالج زلمة
لو بيها ماشوفج بعد خل عيني باجر تعمة

لو بيها ماشوفج شسوي بعيني
ماباجي بس فراگج مبجيني

تبجين المضحگج ليش
خلافج ولاتسوة نعيش

هاي يالحنينة هاي يالحنينة
---------------------------------------------------
#علي #حالوب

عباس اجاني الليل واشتاكيتلك
وتذكرت كعداتنه وحنيتلك
يالامس يمي شلون اعيشن باجر
ليل اهدعش ظلمة وضواك مسافر
وي الهوا اعتاب شكثر وديتلك
,,,,,,,,,,,,,,,,,,,,,,,,,,,,
عبـــاس جــن ليل اهدعش واليوجعني التمن
وبينــاتنــه ليـــل ودرب والليـــل مــايتــأمـن
مجبورة احجي لوحدي محتاره اسولف المــن
عباس بس انت الجنت تعرف عيونس شيحجن
وشكثــر جانــت حلــوه ياكعـــداتنه
مدري شجرى وطب الجفا ابيناتنه
مجبورة افك عيني اعلى كسرة خاطر
ليل اهدعش ظلمة وضواك مســافـــر
وي الهوا عتاب شكثر وديتلك
...................................
ربيتك بحيــل ودمــع واترجــه انـام بكتـرك
شلتك لمن طـاح المتن ماشلت عـون بكثـرك
اكظي بدللولك وكت واهس جنت من زغرك
من كثر ما لوليت الك حتى اثر جفي بظهرك

يالحظني مهدك طاك كلبي لشوفتك
شوجنهـا يــم النهر طــابت نــومتك
ماصدك تغمض وجفنـي مساهــر
ليل اهدعش ظلمة وضواك مســافـــر
وي الهوا عتاب شكثر وديتلك
ــــــــــــــــــــــــــــــــــــــ
ياخويه اذكر من جنت كل يوم يمــي مسيــر
ملهــوفه اجيك بلافكــر جنك عمــر متأخــر
وجه اختك الجانت كبل عن شوفتك ماتصبر
مــاتدري هســا بفركتك ذاك الــوجه متغيــر

ذبلت يعبـــاس وتغيــر لونهــــا
صارت عبايتها ويلون متونهــا
ولون العيون بلون نحرك صاير
ليل اهدعش ظلمه وضواك مسافر
وي الهوا عتاب شكثر وديتلك
.................................
معذورة فاركت الضوه ودمع المفارك يجوي
ماجنت محتاجه الكمر من جان وجهك يضوي
بس ارجع يهون العطش بالماي شنهي نسوي
هيه التفارك الجربتك حتى بنهر ماتروي

متانيتك وغير الدمع ماعندي
ليمت ترد مو جفي ماكل خدي
غركانه روحي ولهواك تناطر
ليل اهدعش ظلمه وضواك مسافر
وي الهوا عتاب شكثر وديتلك
..................................
احا يبو فاضل صحت مجبورة من ضربوني
يابعد لوني الـ من رحت محد يكلي شلوني
هسا اعرفت ليش انلجم لوكتلي بعد عيوني
همه الرمو عينك سهم انه انذبح رادوني

يـــدرون بيــك بعينـك مخلينــي
صابوك حتى يفرهدون سنينــي
عميه بغيـابك يالخذيت النـــاظر
ليل اهدعش ظلمة وضواك مســافـــر
وي الهوا عتاب شكثر وديتلك
ــــــــــــــــــــــــــــــــــــــ
ياحيلــي يــانبض الكلب يــادم البشريــاني
وياجلمة الخوه البعد مالاحت اعلى لسانــي
يالحاطني بعينك ضوه وين الكه مثلك ثاني
عباس وانته اعلى الرمح مرفوع ماتنساني
حتى اعلى رمحك عينك اعلى ظعوني

وصيــح راسك اخ لــــو ضربــــوني
تنزف دمــه وتتمنه كــونك حاضر
ليل اهدعش ظلمه وضـواك مسافر
ليل اهدعش ظلمة وضواك مســافـــر
وي الهوا عتاب شكثر وديتلك
....................................
كالولي منــج مستحـي خويه وكلت عاذرتــه
هو اليصير تلث وصل شتريد من عنده اخته
راح اوصــل لام الوفــه واتمنــى لـو شايفتـه
واحجيلها شسوه الكمر وانشدها شمرضعتــه

لمــن نخيته النهـــر جابــه بجــوده
وجي ماوصل ذب جفـه من زنوده
واحجيلها شلون انسحك بالحــافـــر
ليل اهدعش ظلمه وضواك مسافر
ويا لهوا اعتاب شكثر وديتلك

رائد الناشي

امي الحنينه الــماكو منها
مشتاگه اريد اغفه ابحضنها
مستعجله اعليها الـــــــمنيه
راحت غفل من بين اديه
................................

انه زينب والمحاجر دامــــعه
فارگتني رحمة الله الواسعه

امي حين الودعتها حسره ظلت بالصدر
ما گدرت احضنها خوفي ينلچم بيها الكسر

ودعتها وگلبي ماشابع حنان
ودعتها مدري ودعت الامان

ليل اليمرني اشلون انامه
وابــروحي آهات اليتامه
أذكر واحن كل مغربيّه
راحت غفل من بين اديه
.................................

اشما يدگ الباب اذكر من مشت
وبيه لاذت والضلوع اتهشمــت

عيني اذا تغفه يمرها حلم بي كلمة وأن
واصحه مرعوبه ودمعتي سايله وترس الجفن

يا حسرتي الچانت اغله امن العمر
يا حسرتي غفت بحضان الگبر


لا ما رضت لـ اخر عُمُرها
لا عن الاول لا عُمَرهــا
وناتج فعال الــــــناصبيّه
راحت غفل من بين اديه
.................................

حمره چانت عينــها اذكر داميــــه
من سطـرها ابچفه حيل الطاغيه

طاحت امن السطره امي ودمها سال امن الجفن
والرجس بالصوط اجاها وگام يضرب بالمتن


ألموهـا وهيه ما تحمل ألم
ألموهـا وردو لدين الصنم

ماتت وبالموت استراحت
بس الضلع مهشوم راحت
لحگت رسول الله ونبيّه
راحت غفل من بين اديه
................................

عمر محسن چـان عصره وبيها مات
ومثل امي اضلوعه هم امكسـرات

الف هنيالك يَـ محسن ما نظرت الناصبي
وهو يعصر بـ امي مره ، مره يشتم بالنبي

كل هذني شاهدتهن من زغر
كل هذني نار وسياط وكسر

واعظمهن الأكثر اليــــــمه
يامحسن احساس اليتيمه
من امي محرومه اشبديه
راحت غفل من بين اديه
................................

چانت امي ورده بيضه امفتحه
هــــيَّ أول زهره بالدم سابحه

امي لهل الأرض رحمه من ألآه العالمين
رحمه بس ابلايه رحمه صگطو منها الجنين

رافضيه للظلم ما تنطي أيد
رافصيه وقدمت اول شهيد

راحت غفل من بين اديه
................................

امي من الله هديه للنبي ولـحيدره
امي تفاحة الجنه طاهره وامطهره

يايمه شذكر من صفاتچ
وانتي الخدر خيط ابعباتچ
ياعفة الله اعله الــــــوطيه
راحت غفل من بين اديه
................................
سيد علي عبدالزهره الناجي

اتلث روايات/ قليلات / عزاء ام الحسن
اثمنطعش كون/ والعيون/ وجوبـاً ينعمن
والعمر يخلص عزيه
بـــــــلّيالي الفاطميه
........................

للزچيه الحارت ابسرها الــــمجرات
شو احس كلش قليله اتلث روايات
اثمنطعش كون ابعمر ذيچ المعاناة
والأرض تتوشح اسود والـسماوات

ربي بالمات/ معاناة / رحل يشكي الضمه
خلنه للدوم / يقيوم / ننوح لـــــــــفاطمه
ريت مجلس كل مسيه
بــــــــــــليالي الفاطميه
.............................

نعمه مجلس فاطمه لـكلمن يحضره
وفاطمه ابعين اللطف لا شك تنظره
الشيخ والرادود والـدگ اعله صدره
علـــــــ امام المنتظر كل واحد اجره

الخدر الچاي/ تره هواي/ يحصل هم أجر
والجره ادموع/ أله اشموع / يضون بالگبر
يفلح الواسه ابنبيه
بــــــليالي الفاطميه
.......................


يلصفحتك من ذنوب الدنيه تارس
لا تأيس الله ميحب عبده يــائس
الله باب التوبه ما خلاله حــــارس
ربك اقرب لليقيمون المجـــــــالس

مثل الجبال / متنشال / لون فوگ المتن
ابدمعة العين / عله احسين/ جبالك تنطحن
رحمه بس للرافضيه
بــــــــليالي الفاطميه
........................


بت نبي وسماهه ربك ( اُم اباها )
واقتبس من عرشه نور وُ حجباهــــــا
يرضه شي كلش طبيعي اعله الرضاها
وانت قيس اشگد نذل ذاك الــــــولاها

طه بس غاب/ والاصحاب/ وصيته اتجاهلت
هجمو ابساع/ والـ ضباع/ مثلهم ما جنت
همه اسباب الأذيه
بــــليالي الفاطميه
.....................


اشما نگول ام الحسن أعظم قدرهـا
والخدر كل الخدر ذره ابــــــخدرها
بس نگول العن يرب چف الصطرهـا
والعن الــــــ بلباب من لاذت عصرها

ربي بلنار / هلشرار / تجازيهم عسن
اتعجل انريد/ للبعيد / علينه ابن الحسن
عجل الطلعه البهيه
بــــــليالي الفاطميه
........................
سيد علي عبدالزهره الناجي

يا أمنه الزهراء يا أمنه الزهراء

""""""""""

امي راحت وهلت اعيون المدينه
واستراحت من الالم أمي الحنينه

من يبدي ليل النايبه ابدي أعتاب

يكبر وجع كلبي من أصد ذاك الباب



صعبه صعبه وليضم طول العوافي ترب

غربه غربه ابيتنه ونشعر مضيعه الدرب




"""""""""""""

وحشه داري وكبرت الغربه أحسها
ونهياري يبدي من گطعت نفسها

كل ما اريد انسه الجرح والالام

وتخيل اكبر والضحك طش بالشام


ذكرى ذكرى تنولد بين المصايب جرح

خطره خطره وميت بغبش الرسايل صبح



"""""""""""

بكل مسافه تزرع الطيب عله كدها
يا حسافه ماتت وضمها لحدها

لمن اگول ام الضلع حيلي يبيد

وشلون اعيش بلايه أم ومر العيد


كطره كطره موتي يصبح بالمأسي نزف

حضره حضره امي بس بعالميتي عرف



""""""""""""""

يا غربتي من بعد عين الحنينه

وبدمعتي فاضت اطراف المدينه

غروب المدينه لما رحم گلبي شلون
ليش انعزهم من وكت ويغربون

فرگه فرگه كبرت بگلبي طوايف حزن
ملگه ملگه. شما اشم ثوب العوافي احن


"""""""""""""

لكل بدايه تلجم الفاگد ليالي
والنهايه ميته ذيج أم الغوالي

ريت المگابر تستمع صوت اااه

كون انذكر طاري الضلع فشله انساه


شده شده بعمري ويفارگله غالي زمن

وده وده يندفن بين المواجع وطن



"""""""""""


كلمات
علي خزعل الصالحي