ويلي ع الزهره المظلومه
عاشت وماتت محرومه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ويلي عالعاشت حزينة
والقلب تسمع ونينة
فاطمه الطيبه الحنينة
تبجي وي ليل المدينة

للنبي تحن ومهمومه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ويلي عالكسرو ضلعها
ويلي عالنزلوا دمعها
من أجه الظالم صفعها
وبحقد لمن دفعها

والضلع ينزف بدمومة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ويلي عالماتت خفية
أزغيرة واخذتها المنية
فاطمه الطهره الزجية
بكل وكت ننصب عزية

ونذكر الماتت المهضومة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

بكل عزه لو نطفي جمره
بالدمع يتجاره عبره
ونبجي لحسين ونذكره
هذا مجلسنا تحضره

تحضر المجلس وأعلومه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ويلي عالجتلوا ضناها
ويلي دخان العماها
ويلي عالموت الخذاها
شمعه وتلاشى ضواها

ياضوه الزهره وحد يومه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ويلي عالضلوا بعدها
حيدر ويتمت ولدها
فاطمه اليوم بلحدها
ثغره بالبيت شيسدها

والگمر غايب وانجومه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

زين العابدين الشمري

كلشي انتهه والدنيا خلصانه
بس گلبي باقي بشوگه واحزانه
بعدج علي متغيره الوانه

*

آنه اول بشر دافن گلبه بيده
امن اذكر اسمج تبجي حروف القصيده
شوفة طيوفج بعد صارت بعيده
نبض گلبي لگلبي ياناس شيعيده

ارجف بقيت أو صفره الواني
قبر الحبيبه مهدم اركاني
حكم القدر بالموت كسرانه
بعدج علي متغيره الوانه

*

من يموت أقرب شخص تضلم حياتك
ورجفت ايدك تشرح شكد نايباتك
البيت اسمعه يگلي تجرح ذكرياتك
هذا موت الزهره حيدر لو مماتك

باب الصبر يالزهره عاندني
والعين تبجي وماغمض جفني
حته الصبر ماواگف ويانه
بعدج علي متغيره الوانه

*

الزهره راحت والصميده نفذ صبره
بكل كتر بالبيت ادور إلج ذكره
هسه حتى الهوه الصدري گوه اجره
فاطمه عيني بغيابج غدة حمره

دخان بابج يخنگ بصدري
للباري بعدج فوضت امري
الفاگد حبيبه عيونه ذبلانه
بعدج علي متغيره الوانه

*

الدنيا تخلص واني ماتخلص دمعتي
ويه نعشج شيعت عمري وضحكتي
انه كل ليله اعله قبرج تبدي قصتي
فاطمه اني علي بانت كسرتي


من مشيته اتعرفه الفكد غالي
ايدي اعله ضهري ودمعتي اتلالي
ويمسح دمعته صار بردانه
بعدج علي متغيره الوانه

*

ياحبيبة عمري يازهرة حياتي
يا أميره اعله النسه موتج مماتي
ام ابيها الغاليه وانتي غلاتي
روحتج خليتني اعثر ابعباتي

كلبي اويه كلبج يدگ يالزهره
اني الحفر من غيبتج قبره
والموت تارس فكره وذهانه
بعدج علي متغيره الوانه

*

صار ينثرني الوگت وتبده حيلي
گلبي يترك صدره ويخاوي عويلي
ويعتني لقبرج بعد ماضن يجيلي
يلي جانت شوفتج اتضوي ليلي

يابدر ليلي وياشمس صبحي
ماضن يطيب ولايجف جرحي
بس الحزن امشرعه بيبانه
بعدج علي متغيره الوانه

*

زينب اتهد حيلي من تسألني عنج
والحسن وحسين رادو دوفو حضنج
عاليتامه يالحبيبه شلون اخبرج
امنه وين واعتني ابجي اعله قبرج

قبرج افيضه بدمعتي السالت
وشلون اشوف رسومج الغابت
ريت القبر تنفتح احضانه
بعدج علي متغيره الوانه
*
علي محسن الفرطوسي

شلي بروحي اذا عافوني الحباب

هسه اتمنه اسمع دكت الباب






شلي بروحي من بعدك يغالي

حالي شكد تعب موذاكه حالي

عكبك مانمت ذيج اليالي

اليمسح دمعتي شو هلمشه وغاب

هسه اتمنه اسمع دكة الباب
١

انا فاطمه يابويه وينك

كلي يابشر يشبه حنينك

هذه الماحسبته اسمع ونينك

بلكي يجيب عطرك هل هوه الهاب

هسه اتمنه اسمع دكت الباب

٢
جنت من الشمس فيك عليه

فدوه مروتك بنتك خطيه

جنت امدلله هسه شبديه

والله عليك كلبي جن جمر ذاب

هسه اتمنه اسمع دكت الباب

٣
ادري انه بعتابي يزيد همك

ارجع مره وحده بداعت امك

ماريدن حياتي بس اشمك

بيه زاد الوجع دلالي ماطاب

هسه اتمنه اسمع دكت الباب

٤
راح ابجيلك اسنين العشتهه

صعبه فركتك هسه اعرفتهه

مثل امصيبتك لاماشفتهه

فوك الراس اذب ابروحته تراب

هسه اتمنه اسمع دكة الباب

٥
اريد وياكم امشي خادمه الكم

روحي ترد اذا شافت ضعنكم

ادعي الله يضل سالم علمكم

شلي بعيشتي لوشفت الأغراب

ثهسه اتمنه اسمع دكت الباب
٦


الشاعر هاني العقيلي
**

لحد يكلي شلوني
دافن بديه عيوني
ماضل خبر زين
بعد ام الحسين
....................

جلمت شلونك ياخلك تنكال موش الحالي
مايمر ليل بلا دمع والغربه ترست بالي
راحت امن ايدي فاطمه شلونه اليودع غالي
جانت الي حزام وسند ام بيتي وم اعيالي

ماتت العشره وياهه
راحت ووين الكاهه
دمعاتي بالعين
بعد ام الحسين
...................

طاحت الزهره امن الالم وذبلت اكبالي الورده
واني طحت كلي جرح بس الجرح شيضمده
للبير اسولف لجمتي والصده اعليه ايرده
ياعلي اليفكد فاطمه بالدنيا بعد شعنده

بير الحزن يفهمني
ويعرف شنو اليلجمني
مو وحده وثنين
بعد ام الحسين
...................

ضهري انحنه وفوك الظهر خليت ادي من همي
فاكد عشيره مو مره بكل شده جانت يمي
اني ابو الحيل القوي ونهدم حيلي وعزمي
مو علي ذاك الاولي امن الهظم ذابل جسمي

شحجي وشسولف عني
فاطمه وراحت مني
نطر گلبي نصين
بعد ام الحسين
...................

للثار كلبي بكل وكت مشتعله ناره وضامي
محتار لو طال العمر وشلون اخلص ايامي
صعبه عليي ماتنحمل مجبور اضل بالامي
والحرك باب ام الحسن ايشم الهوه كدامي

هيج الوكت خلاني
عايش وسط عدواني
تمنيت انه البين
بعد ام الحسين
...................

اليوم اليمرني أكبر عمر وبراسي عاش مصابي
شلون انسه واني بذن ادي دافن اعز احبابي
بابي ستر بنت النبي وعصرو الزهره ابابي
بسماري مو من باب اجه بسماري من اصحابي

الماكدرو ايلاكوني
بم الحسن غدروني
كسرولي ضلعين
بعد ام الحسين
....................

عال الوكت بيه وكصه ولجماته ترسن گلبي
خلاني من كد الحزن درب المكابر دربي
ادعي بصلاتي بكل فرض انطيني الصبر ياربي
راحت امن ايدي فاطمه والزمن جايب تعبي

ضل الحزن يبرالي
يكتل وداع الغالي
بخدي النياشين
بعد ام الحسين


محمد هادي العقابي

يافاطمه عذريني // خافن سنه آمن اسنيني
ماحاظر بمجلس الج // وماباجي دمعت عيني
___

مجلسج عالم حقيقي ساطع النور
فاطمه وذني الليالي عندي عاشور
امنيتي كون إبدال ظلعج ظلعي مكسور
شكبره حظي انتي لو كلتيلي مأجور

المجلس دمع صليته// شكد تختلف روحيته
اكثر من امي حسيت// انتي تره تذكريني
___

انتي شخصيتج عظيمه تنحجي ابدقه
بالشعر اسمج اكتبه وقاصر ابحقه
خاف اكتب باب يركض يحرك الورقه
رزقي عبدج بالبواجي وباركي ابرزقه

شفت الكرامه العندج// الخدام جنهم ولدج
ولو انه خادم محسوب// بس بالشعر رزقيني
___

الدنيه هايه بدونج انتي كلشي ماتعني
ليش كلما اذكر اسمج كلبي يوجعني
فاطمه البسمار والله قهر شابعني
الج أقرب نقطه داله وكلهه تسمعني
اباب المجالس تكعد// وعل مااجه تظل تنشد
تفكدينه واحد واحد // ادري انتي ماتنسيني
___

كالو المجنون صعبه ينسه سالفته
وهالمثل كلش عليه ينطبق شفته
وين مااكعد يسولف لساني حلفته
وصاحبي اليخدم حظرتج هذا ماعفته

بطارييج ايهل دمعي// من اكعد انه وربعي
كسرج دعيناله يطيب// بجرح العشك لجميني
___

كصت بيه وتعبتي الدنيه فد مره
وانه اكلهه شما كصيتي توكف الزهره
الكاع من تعطش محنه تنروي ابمطره
ومالهه غير الله وانتي الوادم الفقره

اطلب جذب من غيرج// مغركتني انتي بخيرج
للدنيه ماطخن راس // وما كلهه عود انطيني
___

ظاله بكلبي الصراحه وتنحجي لازم
مجلسج مولاتي بس اليجمع الوادم
فرحتج لو شفتي خادم شابك الخادم
عمري بالخدمه اخلصه وانه مو نادم
تعذرين اعرف طيبج// مايزعل ادري اكليبج
عني اريدج ترظين // وبكل سنه توفقيني
__
تمت _ علاء الزيدي

قصيدة جديدة بحق الزهراء عليها السلام

انحلفچ بچف الكفيل وعــينة
يم حسن من الخدم سجلينة
===================
نحزن اباول رواية وننتحب
لم گبر عن الخلايق منحجب
الخادم بسجلچ يزهرة ينكتب
مسجل وبيدچ صبح تدوينة
====================
بكل سنة مصابچ علينا من يمر
الدمع بالعين يــــبقى ينهـــــمر
للرواية الثانية ايظل مـــستمر
والنعش نطلع سوة مشيعينة
===================
بالرواية الثالثة الكل تنفجع
بالتشابيه بحزن من ننجمع
نصيح واويلاه ياكسر الظلع
ونرفع أصوات العزة لمهدينة
==================
نجدد وياچ العهد يا فاطمة
وتطلع تعازي المواكب لاطمة
بكلمن يخدمچ يزهرة عالمة
اليخلص بعهدة أو وفي تعرفينة
==================
ناس مشاية اطلعت يم الحسن
والگلب مكسور يا زهرة وحزن
اعليچ بالمجلس مدامعنا جرن
مصيبتچ طول السنة اتبچينة
===================
ناس تخدم ناس زوار اعتنت
يالزچية يم گبر حيدر اجت
بالنجف رايات خظرة رفرفت
نواسي بمصابچ علي والينة
==================
بكل سنة تشييع رمزي انشيعة
نعشچ وعين اليحبچ دامعة
انتي بس ترضين المر نجرعة
لجلچ وخدام الچ حسبينة
===================

أسالكم الدعاء رائد الاسدي

يا ليــــــــل المنيه
ما ضل نفس بيه     راحت من أديــــــــه
ونامت جوه التراب
.................................................
تمنيت العمر ينبـــــــاع وأشريه
وماي أعيوني فوك الزهرة أبديه
بــلا ضحكتها عمري طعم مابيه
أخذ كولشي التريده وحلمي خليه
حلم عمري انتضرته     ميـــــــًت بيدي شلته
يا ويلـــــي عليه      راحت من اديه
ونامت جوه التراب
...................................................
أنفاسي حجر عثــرة أبمشيتي
بكــل خطوة أشم ريحة منيتي
من الزهرة شالت وحشة بيتي
دليل المكبــرة صارت هويتي
اليسأل عني أكله     يموت المات خله
كل صبح ومسية      راحت من أديــــه
ونامت جوه التراب
...........................................
آنه أول بـــــــــــشر ينباك صبحه
ويوكف مستعد يمشي أعله جرحه
اليعيش ومنـــكسر من ربعه جنحه
كــــــــــلام الشامت بضهره يذبحه
التتــــــــسمه صحابة      وسف طلعوا عصابة
ما بيهم حميه     راحت من اديه
ونامت جوه التراب
...........................................
من هجموا على الباب ومضيفيه
نواياهم مثلهم مـــــــــــــونضيفه
عصرها الجان يتسمــــــى خليفه
عليها أتأمروا ولـــــــــــد السقيفه
فــــــــــاطم أم أبيها     زلم صاروا عليها
عالزهرة الزجيه      راحت من أديــــــه
ونامت جوه التراب
...................................................
طاحت فاطمة طيــــحة دمعها
من عصـروها والشامت دفعها
خلف الباب من كسروا ضلعها
صاحت يا علي ورد وصفعها
وانه لو ما الوصيه    لاخـــــــذ ثاري ميه
من أهل الرديه     راحت من أديه
ونامت جوه التراب
............................................
غير الزهره أنـــــه شنهو عندي
أعيش أشلون والمن وانه وحدي
أخيــــــــر أنفاسها واتكلي ولدي
أمانة يا علــــــــي يا علي بعدي
زينب من تجيها    خل عينك عليها
وجيب حسين اليه     راحت من أديــــــه
ونامت جوه التراب
.....................................................
خادم خدمة الحسين
الشاعر
محمد الموالي

بحق قاضية الحاجات ام البنين //ع



.       بيت الاحزان صـار دليلي
       بفگدالاحباب يوم رحيلي    
       ميتــه مـــن ذاك الـعـذاب  
       بــس جسد فـوگ التـراب

         *---------------------*--------------------*
 
كلشي مدفون بحياتي ومظلم بعيني الوجود
ادعـي يـومـيه بصـلاتي روحي تطلع ما تعود
ودعـت عـمـري وبنيـني والصبر جـاز الحدود
بـاچـر يردون اكـولـن عايشه بهاي الـــوعــود

           بذاك الفـراگ چـان مماتي
           خلصت هناك ذيچ حياتي
           مــو عــمــر هـــذا ســراب

         *---------------------*--------------------*

انحسب عدله عليمن المثلي متوسده القبور
اقـره قرءان بثوابي بالغـــرب واشعل بخور
الميت تـــزوره الحبايب انتظر واحـد يـزور
انـي منسيه بجروحي وعيني للراحوا تدور

           اليرتحل عاد ناس تشيله
           تهمل دمـوع عـيـن خليله
           وانـي وحـدي بهـالمصاب

         *---------------------*--------------------*

الحافره بخده المدامع ودافن امال الحياة
الوادم يحسبونه عايش وهويشعربالممات
اليحسب أيام وليالي وبالحزن غافي يبات
يندفن يوميــه دفنــه مـن يعيد الذكريـات

           انتظر طيف بي يجوني
           سلوة الروح نور عيوني
           الحـلـم هـم عـنـي غـاب

         *---------------------*--------------------*
 
والده وغابوا بنـيـنــي وانتظر يمتــه يـجـون
بس يدفنوني ردتهم ونعشي ولدي أيشيعـون
وزينب التلطم عليه بصرخه وبصوت الحنون
للگبر انـزل بـديهــم وهمـــه الـي يـترحمــون

          نعشي ينشال ريت بديهم
          هـا يـرجـواي عـود عليهم 
          التـدعـي ام اربــع شـبـاب

         *---------------------*--------------------*

سـاهـره بسلوه المدامع يخلص الليل بحنين
ثكـلـه ضليت بغربتي وضيعت اربــع بنيـــن
مـأتمي دايـم نصبته وكلبي مجروح وحزين
ذكرى تاخذني لبنيني وذكرى ترجع للحسين

          اذكـر حسين حـيـل احـيـرن
          جـوه التـراب كـون اصـيـرن
          الموتي گمت احسب حسّاب

         *---------------------*--------------------*

المثلي شيّـبهــه زمـنـهــه باللحد افضل تصـيـر
راحـوا اولادي الغوالي وادري مجهول المـصيـر
عيني مجروحةبدموعي وروحي چواهه لْسعير
صـبـري مـحـدود الأملكه والجرح كلش چـبـيـر

          احسب ايام طال بُعدهم
          ربـي دعـواي هاي تردهم
          عـنـدي ضـل اخـر جـواب

         *---------------------*--------------------*

✍ خـــادم الـحـسـيـن ع
     الشاعر رعد الچريخي

ما اجي بدفنتج         يمه غاب النظر 
بيش اشيل النعش   جفوفي يم النهر
......................

والله موهينه علّي وانه ابو الغيره
وانتي حددتي لبو فاضل مصيره 
افضالج مغركتني يايمه  وجبيره
شلون ما احضر وفاتج والله حير

يمه انه بموتتج        بحزني شابع قهر
بيش اشيل النعش   جفوفي يم النهر
........................

يمه جف الدمع لجلج فوك رمشي
الماتت امه من حياته ايموت كلشي
مره اذكر كلتي وانه وياج نمشي 
يحظر العباس بيده ايشيل نعشي

وحدج بغربتج         وانه ظهري انكسر
بيش اشيل النعش   جفوفي يم النهر
........................

ادري عينج عالدرب منتظره جيه
لاتكولين ابني شو مامر عليه
اعتذر من تعتني اعليج  المنيه
مااجي ماريدج تشوفين اديه 

شكد احب شوفتج    انتي ام الكمر
بيش اشيل النعش    جفوفي يم النهر
.......................

بطيبج تسولف الوادم يالاصيله
يالوفائج كنز مايحصل  مثيله
انطيتي من جفج عطايه المو قليله
جنازت ام الخير مهيوبه وثكيله

شالو اجنازتج          وانه كلبي انفطر
بيش اشيل النعش   جفوفي يم النهر
......................

يمه لتعتبين عني ما احظرج
لون بيدي يمه اذب عمري اعله عمرج
بيش اجازي ارباج يالمكسور ظهرج
انه ميت يمه بس بهاي اذكرج

اشعر بحسرتج         كبرج انتي انحفر
بيش اشيل النعش   جفوفي يم النهر 
..........................

يمه محروسه بوليدج ابو فاظل
يلي علمتيني ما اعرف اجامل
ياللسانج ماجرح يوم المقابل
الليله من الديره كل الوفه راحل

اضلمت ديرتج          من جفاها السهر
بيش اشيل النعش  جفوفي يم النهر


#محمد #هادي #العقابي

كل فرض ادعي بصلاتي يردلي عباس
چنت اتمنه بوفاتي يردلي عباس
لو اجه يداويني
وبيدة يغمض عيني
يردلي عباس
-----------------1----------------
گرب مني الموت وانفاسي ثگيلة
وحدي وعيوني تدور ودمعي اسيلة
صحت وينك يالكفلت اشرف عقيلة
أمك اني شلون تتركني عليلة

يالرحت عني يكافل يمة وينك
راح اموتن يابو فاضل يمة وينك
بس نفس يلكيني وبيدة يغمض عيني
-----------------------2-------------
بلحظتي اتمناك تگعد يمي يبني
وتنحني اعلية يبو فاضل تحبني
عيني يم الباب واتصور تطبني
عگب عينك يابو فاضل وكتي ذبني

هسه مشتهية تگلي يمه يمه
فوگ جرحي ايدك تخلي يمه يمه
من العطش يرويني وبيدة يغمض عيني
----------------------3------------------------
يوسف اليعگوب رد وانت ما جيت
فگد بس يوسف وانا امك اربعة انطيت
كل بچي يعگوب بدموعي تعديت
ما يعادل ونه للعطشان ونيت

حسين جيبة من تجيني والله احيا
راح بس اتشوفه عيني والله احيا
حسين من يلگيني وبيدة يغمض عيني
--------------------4-----------------
للنعش اربع جوانب منهه ينشال
واني عندي اربع زلم يلوون الاجبال
هيبة تصبح للنعش لو شالته ابطال
ياحسافة بكربلة تتبدة الامال

اتمنة لو جدام نعشي يمشي الحسين
گلت ماضن عني يمشي يمشي الحسين
بلحدي ويواريني وبيدة يغمض عيني
----------------------5-------------------
سهم عينك يالگمر گلبي يصيبة
راح اموتن يالرحت عني غريبة
واليموت وماهوا عد راسه حبيبة
بگلبة راح اتزيد نيران المصيبة

اشتهيت اميه يمه وأنت سگاي
اشرب وچفك اشمه وانت سگاي
لاأبن يلفيني
وبيدة يغمض عيني
---------------------6-------------------
گالوا الغايب نعذرة وانت غايب
الوالده تحتاز ابنهه وحگهه واجب
احلفك بزينب اريد أم المصايب
يمه بس هالحظة ردلي الدمعي جاوب

ها ييمة من اگلك يبني يبني
عن أخيك راح اسئلك يبني يبني
يمة ويناديني
وبيدة يغمض عيني
------------------الحمدلله-------------------

حيدر موسى الرميثي