لمولاتي ام البنين ع

ياحيل اشدة اعليكم .. وانه الاشم طاريكم
اتّانوني لو تانيكم .. بثنينهن ميتة
~~
بعيوني قارورة انچفت .. والوحشة وحشة وادي
واتبده بية اشجم وجع .. من دار ظهرة الحادي
راح اشد عصابة وعلگ .. بالضعن مثل امرادي
يحسين چلمة فدوة الك .. اشلعها من افادي

وضعونك الما تنجاس .. محروسة بيد العباس
ترجعلي سالم تنباس .. چف ايدي رافعته
~~~
يارب الحسين استجب .. من الگلب تعجيلي
بعيون الحسين انقرت .. يم البنين ادعيلي
واجب اذا اسمة انحچة .. لحد يجي يتچيلي
ما اگدر اوكف بس اله . اوكف بكامل حيلي

بعيونه اقره القران .. بشخصيته رب الايمان
يا قل اعوذُ امن انسان .. ما داري منزلته
~~~~
يا ضعن الحسين المشة .. راعيك روحي تحبة
راح البس اسود عالمشوا .. يغلب سواد الكعبة
كل خطوة يخطيها الضعن نص راسي شيبة امشيّبة
كل ما امرن يم نهر .. ادعي بدعاء الجربة

ماينچهب گام البيت .. عالماخذوني احتاميت
ردت جنايز رديت .. مخنوگة بالسكتة
~
ايكفون لك عدّه وعدد .. امربيتلك اربع انفاس
يحسين لو بيدي وعلي.. جيشين اجيبن مقياس
آنه المكبرتلك زلم .. بيهم اتزامط عالناس
مرسالي موش اعله النهر .. وديته الك عالعباس

ايرهمون حراس اخيام ..خذهم حزم خوش ازلام
واحدهم ايلاگي اسهام .. بعيونه علمتة
~~
ما بيها شگفة وتنشگف .. كربلة اتموت الرضعان
بالعندي اتبرع الك .. والعندي اربع شبان
رفعة الراس المنصدگ يحسين مو حچيي السان
تابعهم ابيوم الطبگ .. اربع رماح النيشان

ياشيلة اعگد عالموت .. ايرجع ضعنكم ياصوت
اسم الله بعد فات الفوت .. صوتي عبر وكتة
~~~
ابني الچبير اعله المتن .. جوده حرز ومخضّر
من زغره ايده اعله الگفة.. ايظمها وعليها ايدوّر
بگد فرض الغروب البزر .. إثلث زلم وتشوّر
مضحيتلك اربع مستحه .. ابگد ايدك ام الخنصر

يالماكو مثلك ينجاب .. يالتختلف عالغيّاب
من السهر نام الباب .. چي ليلي گاعدته
~~
علي هادي الخزعلي

الله أيعينها الفكدت ضواها
ملك الموت جم مره أجاها
عـــــدله مدري ميته     عمرها أنباك سكته   
الوفيه.       الوفيه
...........................................
يا ناس البشر كــــــل واحد وصبره
وهاي  أم البنين  الطاهرة  الحره
شجرة بيت لاكن ماتت  الشجره
لحد آخر نفس رادت رضه الزهره
ليل   أنهار ما ينشف  دمعها
وملك الموت محتار بوضعها
على أخدوده دمعته     عدلــــــه مدري ميته
الوفيه          الوفيه
.......................................................
هي  أم البنين شجــــم  جرح  بيها
شيــب  راسها  وشابت  معانيــــها
مثل أهلال تمشي الهضم حانيها
الضحت   أربعة  بيـــــمن   تجازيها
العاشت كل حزنها وشاركتها
شالت   والجنازة   شيعتـــــــــها
الهضم تكتل صفنته      عـــــدله مدري ميته
الوفيه         الوفيه
............................................
آخر خيمة طاحت وانكسر ضلها
وطاحت طيـــحت العباس كافلها
رادت  من  ولدها  جف  يغسلها
ويشيعها   الكبرها  وهم   ينزلها
صاحت ياخلك لو تسمعوني
ولدي  ألأربعة  خلهم  يجوني
نعشي انشال سكته     عدله مدري ميته
الوفيه         الوفيه
...............................................
مثلها  يا مره  الحملت  مثل  همها
عاشت كل عمرها الموت هاضمها
شنذكر    يا  جرح   والحيل    ألمها
صور من كربله بكل  يبني ترسمها
عاشت ويه زينب كل حزنها
وتسأل  خاف  ما وفه  ابنها
وصيته أعله أخيته    عدله مدري ميته
الوفيه      الوفيه
................................................
حارت   تتجه   لاويــــــــــــن   محتاره
ما ضل عدها والي التكصد الداره
بير   أحزانها  وما يكشف  أسراره
حتى  وهيه  ميته  الدمع  يتجاره
تدعي  أيعجل  الباري  أجلها
تموت وتلتقي بزينـب واهلها
  حلم واتاني جيته     عدله مدري ميته
الوفيه        الوفيه
.....................................
خادم خدمة الحسين
الشاعر
محمد الموالي

وفاة مولاتي ام البنين عليها السلام

موتي من طول غيابك
عمري منتظره عله بابك
شكثر شميت بترابك
ياحسين. ياحسين
==========
يمه يحسين اشفت بَعدك مصايب
عمري من اغيابك اصبح شمع ذايب
شكثر ناطرت ابدرب جَيْتْ الحبايب
يمه دلالي انفطر محبوبه غايب
موقدر سبب وفاتي
غيابك الخلّص حياتي
ادعي كل يوم بصلاتي
ياحسين. ياحسين
==========
ولاخبر منك رجع وابعيد عني
لكربله حسرة گلب مسموع وني
مدري ميته مدري عدله تدري يبني
بس جسد والروح عندك ميته چَنيّ
مثلك امك هم غريبه
دارك اخلافك كئيبه
سببت موت الحبيبه
ياحسين. ياحسين
==========
انتظرتك بلكي ترجع يمه يحسين
نذر روحي لو ترد وتكحل العين
رَدلّي راسك عالرمح موتني الإونين
اقره بجروح الذبح ايات ياسين
اقره ودموعي جريه
موتتني المغربيه
واسمعت قصة رقيه
ياحسين. ياحسين
==========
عشت ايامي بعد رجعت ضعنكم
والحزن ماخله بيه ماتت امكم
بصدري دخان الخنكني من خيمكم
لحظه لحظه هالگلب يسالني عنكم
يبني شتعذر شَكلّه
والحزن بجروحي صَلّه
بحر من دمعي اَهِلّهْ
ياحسين. ياحسين
==========
وانطوت رحلة حياتي بالمأسي
گلبي شيب ياحبيبي وشاب راسي
والله وياي الوكت يايمه قاسي
اخذ من عندي ييمه اعز ناسي
فاركوني وميته اني
احسب احساب الثواني
مااجيتوا وصرتْ اعاني
ياحسين. ياحسين
==========
تمت ولله الحمد/المقصر مع الحسين
✍ علي النائلي

عالما يردون    وشلت العيون
****
يا بشر برض المدينه تنعه شفتك
يمكن امن الطف خبر جايب عرفتك
يا بشر عن ولدي تدري ما سألتك
انه وين حسين ابني تكلي ردتك

بله اصبر اشلون   وشلت العيون
**
لا تكلي راحو ابنيني اربعتهم
انه لجل حسين كل ولدي انذرتهم
انه من در الوفه ولدي ارضعتهم
وما يعوفون الاخو بالطف ردتهم

ما ضل بعد لون   وشلت العيون
*
يا بشر ام البنين انه الوفيه
وتدري بحسين اشكثر غالي عليه
ما نشدتك عالولد وتعد اليه
فدوه كل ولدي صحت لبن الزجيه

واعرف يوافون   وشلت العيون
****




يا بشر ونيت والموت اشتهيته
كلي وين حسين كلبي كطعيته
الله ينساني اذا لحضه نسيته
شو تنوح وجنك المقتل قريته

خيبت الضنون   وشلت العيون
***
يا بشر خبرني عن الكافل بهاي
وفه شيال العلم لو ضيع ارباي
كبل اخو بالطف صحت بس لا شرب ماي
ما اظن يخلف وصيتي نور عيناي

جازه الربه كون   وشلت العيون
***
اشلون زينب كلي انشدنك عليها
انه وصيت الولد يا بشر بيها
لا تكلي انسبت واحبال بأديها
الناكه من تعرج تأذيها بمشيها

يا جرح اليهون   وشلت العيون
**
تمت
#تحسين #الخفاجي

من البجي يبني عميت  كتلي اجيج اومااجيت
جاي اتانيك  اعله عتبت دارك
حسين شنهي الكطع عني اخبارك
****
بلكت الله تدك بابي           اليوم بلكت باجر
عليك يمه انشغل بالي      كلبي شو ظل حاير
اعظام صدري يوجعني      كلي شنهي الصاير
يمه بس لاسامح الله        سحك صدرك حافر
دمعي بغيابك رخيص  دزلي بس عطر القميص
شراح اجاوب لو سأل خطارك
حسين شنهي الكطع عني اخبارك
****
من عفتني وهذا حالي         الحزن خاوه ايامي
بدمعتي حنيت بابك           وزاعلتهه  احلامي
شما شربت الماي تطلع         صورتك  كدامي
طارشك كلبي يكلي              انته ميت ضامي
شكد حقدت اعله الفرات   جي حبيبي بصفه مات
عالخيم صافن قريت افكارك
حسين شنهي الكطع عني اخبارك
****

انه مو ذيج العفتهه         الحزن مرمر حالي
كل شبر بي ذكرياتك        دوم  ساكن  بالي
نكطعت السبحه بااديه      ونلجم   دلاالي
كلت هذا الشمر يعني       كطع راس الغالي
الدنيه صارت كلهه شيب  زحمه اعيشن والله عيب
كبل  لاتحجي اعرف اعذارك
حسين شنهي الكطع عني اخبارك
****
ثوب الأسود مااذبه            اله ترجع سالم
هواي منتظره اعله جيتك    بشوكي ربي العالم
ردت بس واحد يشبهك      ماكو بين الوادم
والرمل لا مو مكانك          وانته فوكا نايم
انته طاووس الحنان  ماتنام بااي مكان
الله لا ينطي بهجرنه الشارك
حسين شنهي الكطع عني اخبارك
****





عودت روحي برحيلك         من أذكرك اصبر
فوك راسي الدنيه كامت     بس مصايب تمطر
بيش اعوظك وانته كلشي    والوكت مايعذر
رجفت ايدي ترجمتهه          يعني ظايع خنصر
خنصرك محد لكاه   محبسك ياهو الخداه
سابح ابدمك تدير انظارك
حسين شنهي الكطع عني اخبارك
****
كل كسر نكدر نطيبه        اله كسر الخاطر
انه ميته وحك عينك        منهد يوم العاشر
عمت عيني من البواجي     جي ظواهه مسافر
بعتبت البيت اعله جيتك     جفني  ظل  مساهر
كمت اون وماكو صوت  احظرني يمه راح اموت
امنيتي كبري كون يصبح جارك
حسين شنهي الكطع عني اخبارك
****
#تمت ____ #علاء #الزيدي

قصيدة مايموت الضوه
بحق الامام علي الهادي// ع//



ما يموت  *  الضوه يموت الظــلام
ما يموت  *  سيدي المثلك امـــــام

        زيـّــدت بينه الجـــروح
        نبقى لمصابــك نــنـــوح

                      *--------------*--------------*

لجلك انرخص دمعنه بهالرزيــــــه
يــا علي الهادي افجعونه الناصبيه
نلطم الليلة والك ننصب عزيــــــه
نواسي امك فاطمة وسيد البريــه

بهالدموع  *  نختم وياك الحيـاة
بهالدموع  *  باجر الفــوز ونجاة

        صعبـــه يالوالي تـــروح

                      *--------------*--------------*

رادو يموت الضوه بموت الامامـــه
تبقى شامخ سيدي ليوم القيامـــــه
حضرتك بيهه الوحي يـردد سلامـه
حاربوك اهل الجهل واهل الظلامـه

بكل زمان  *  اسمك يرتلــه الخلـود
بكل زمان  *  تــارس عيون الوجود

        يـــا نفس بينه ويـــروح 

                      *--------------*--------------*

وارث الهادي نبينه بكل صفـاتـــــه
واليموت اعله الشرف تبدي حياته
ياهو مثلك خلصن اسنينه بصلاتـه
ويـاهو مثلك بالصبر عجز طغاتـــه

مدري ليش  *  سمتك أيـد الضــــلال
مدري ليش  *  تنبغض هـاي الخصال

       يالعطر گــبــرك يــفــوح

                       *--------------*--------------*

جسرو وضنهم ترى لعمرك نــهايــــه
ما درو مصحف وجودك واسمك ايه
راحو وضلت حضرتك كعبه هايـــــه
الهادي وبموتك تضل مصدر هــدايـه

   بس يزور  *  الـزاير يحس بأمان
   بس يزور  *  يشتم الريح الجنان

         الـدمـعـه لاحزانك تبوح

                      *--------------*--------------*

الله عوضلك مناره الكل يجيهــــه
تنزل امـــلاك السمه وتصلي بيهــه
بحضرتك جن وانــس ترفع اديهـه
العنده حاجه ومعضله يتعنه ليهـه

الله راد *  حضرتك حضرت مـراد
الله راد  *  سيدي وهــذا اعتقـــاد

       يـــاهـــو المجدك يلــوح

                        *--------------*--------------*
✍بقلم خادم الحسين ع
     الشاعر رعد الجريخي

ملك الموت اجاني وسلم اعليه
انتظر گتله ترا العباس بيه جيه

الاخذ گلبي يجيني
يغمض بيده عيني

يبو فاضل...... يبو فاضل

مكسورت گلب وامتون يبو فاضل اريدنك
على امتوني شكثر شلتك اجه دوري على متنك
صحتلك من وجع گلبي ما متعوده اندبنك
جنت وياي مثل الدم ما يحتاج افزعنك

جنت وياي رمش وعين يالغالي
وهسا اصيحك وما تحضر اگبالي

گلت يرجع حنيني
يغمض بيده عيني
.
.
.
.
اجاني الليله ملك الموت  مثگله مشيِّته ادموعه
وكتله اعليك ما تبطي  كال اجفوفه  مگطوعه
يگلي أيسي يازينب اخوج مهشمه اضلوعه 
اما عن جناب احسين أصابع عنده مشلوعه

شجيب الكوه ملموم بحصيرتكم
يعينه الله الفگد بالطف عشيرتكم

وَهُو يفسر انيني
يغمض بيده عيني

.
.
.
.
كال الملَك يازينب كل اهلج  يتانونج
ضماد امحضِره الزهراء تريد اتضمد امتونج
ورقيه استاحشت حضنج هذيج الذَبِلَت لونج
ولتكولين كبرانه من دمعج يعرفونج

بنوولج دار مو خيمه يعلويه
وبذن ارقيه مصحف موش ترجبه

وَنَه غاية سنيني
يغمض بيده عيني

.
.
.
.
يگلي لَمَن اتموتين يتلگاج ابو فاضل
بمكان اجفوفه اله جنحين الج بيهن نهر شايل
بعيونه سهم ماكو  وضَهر حسين ما مايل
مو دم جبهت الأكبر من عدها نده سايل

اخوج وارجع شاب وطابت آلامه
ومن عرش الله متفصله اله اعمامه

وبِدَه يِخْضر جبيني
يغمض بيده عيني
.
.
.
.
شتكولين انه بأمرج ولكن عندي اطروحه
تعالي هناك خل نبچي عله ابو السجاد واجروحه
ونذكر خيل اميه شلون سَوَت صدره مرجوحه
وشنهو الصار حين ابنه اعله صدره وطلعوا روحه

وعلى اسكينه شجرى بالشام والامه
من گالوا تضل بالقصر خدامه

وحلفته ابنيني
يغمض بيده عيني



.
.
.
.
اموت احسلي يا عباس العيشه بشامهم گشره
ذِبَلت وطبع بهل الشام تِذَبل السنبله الخضره
سنة ونص خلصت اب آهات حسره ادرفع بحسره
اضل ابچي لحد ما اشوف عالخد دمعتي حمره

لهسا لازمه اصفاحي يعباسي
شيِّب حتى لوني مو فقط راسي

كلت لانصار ديني
يغمض بيده عيني


عبدالله الشويلي

تانيتكم يهل المحنة شكــــــــثر تانيتكم
تانيتكم لاخر نفس جنت أنتضر تانيتكم
زينب أنه اليحجون عني
ما واحد المنكم حضرني
تانيتــــــــــــــكم
.....................................................
يهلــــــــي يخوتي يامن تسمعوني
ذبحني الشوك جا يمته تحضروني
من كثــــر الدمع ما شوف بعيوني
صوفر شيب راسي وأختلف لونـي
ناديتكم بدمعي وصحت وكت الفجر ناديتكم
تانيتكم لاخــــــــر نفس جنت أنتضر تانيتكم
بجى الحجر يا ويلي وني
زينب أنه اليحجون عنــي
تانيتــــــــــــــــكم
............................................
زينب آنه زينب حيرتـي حيرة
أي لا أم لا أبـــو لامن عشيرة
أخوتي مذبحه بديره وانه بديرة
غريبة أبين وادم باعت الغيـرة
فركاكم بضهري بقى تارك أثر فركاكم
تانيتكم لاخـر نفس جنت أنتضر تانيتكم
ما أدري عدله ميته جني
زينب أنه اليحجون عني
تانيتـــــــــــــكم
...................................................
وي كـــــــل مغربية أشتعل شمعه
وتجي أم عباس يمي وننحب وننعه
أكلـــــها أعله النهر جفينه متكطعه
وتكلي حسين بيده العشرة شو تسعه
طاريكم رد بيه لسياط الشمر طاريكم
تانيتكم لاخر نفس جنت أنتضر تانيتكم
شما ألتفت يوجعني متني
زينب أنه اليحجون عني
تانيتـــــــــــكم
.................................................
عشت عمري جرح ما ينجبر كسرة
شما أخطـــي يرد بيه الوكت عشرة
آه أعله السحك خيــــل العده صدره
وآه أعله الوكــــــع لا يمنه لا يسرة
ياذيكم وضعي وتعب درب اليسر ياذيكم
تانيتكم لاخـــر نفس جنت أنتضر تانيتكم
شيريد دهري وحزني مني
زينب أنه اليحجون عنيي
تانيتــــــــــــكم
......................................................
بعدكم يا هلـــــي ما ينفع أعتابي
ملك الموت جـــم مره يدك بابي
شما عاين عليه وعاين أمصابي
يشم ريحة حرك خيمة على أثيابي
ياريتكم تحاجونه ماريد العمر ياريتكم
تانيتكم لاخر نفس جنت أنتضر تانيتكم
كلولي شيب راس حزني
زينب أنه اليحجون عني
تانيتـــــــــــــــــكم
....................................
خادم خدمة الحسين
الشاعر
محمد الموالي

يا اللهي الليله هاي الليله
يا اللهي ارزقني بس ابچيله
هيچ واحضر مجلسه
انه والله اتنفسه
يا الهي يا الهي

---------------------

ربي ما اريد بحياتي لا غنى ولا منزله
كون اصير تراب يسحگني اليزور ابكربله
هيچ وانذر عيني تجري وكل دموعي مسبله
رتبة الخادم عظيمه وياهو يگدر يوصله

راسي مرفوع بخدمته وشاني عالي
هوه غير الله بعظمته يگله غالي

ربي وفق دمعتي
علحسين وحسرتي
چفوفي من تلطم حزن تحچيله
يا اللهي ارزقني بس ابچيله

-----------------------

وين ماكو ادموع امشي وعالمجالس من اطب
عطر من الجنه اشمه ونار چنهه من الحرب
اسمع اصوات اليتامى وزينب بوليت غرب
ومنظر شگد ردت اوصفه وما گدرت شگد صعب

علنحر طفله وتصيح شبيك بابا
أگعد البحماك راحت للخرابه

رجلي مچويه بچمر
وعمتي واليهه الشمر
العين حمره ولا علي وتشكيله
يا اللهي ارزقني بس ابچيله

-------------------------

مجلس حسين اليحضره بكل نفس ياخذ أجر
دمعة عيون الموالي اتطفي نيران وجمر
هناك لا تحزن يشيعي ولا تخاف من الگبر
عيونك مغمضهه لكن من تشم ذاك العطر

گول اجاك حسين لو اهلك تعوفك
جاب دمعة عينك ولطمة چفوفك

خلهن بگبرك حرز
بالقيامه ومن تفز
صيح خادم للحسين دخيله
يا اللهي ارزقني بس ابچيله

-----------------------------

بروحي جمره اعلى العقيله وعليتامى وما طفت
لهسه ممصدگ سبوهه وعلهزل زينب مشت
يعني يا عالم رقيه اعلى النحر ماتت ؟ غفت ؟
يا رباب شلون حالچ ويا عبد الله انتهت !

شلون عريس انذبح بالغاضريه
الله لا ينطيهه جسام المنيه

علي الاكبر من وگع
بصدره چم حافر ركع

يا دموع اتطيح وتكفيله
يا اللهي ارزقني بس ابچيله

---------------------------

هوه مو مجلس أشوفه وتنجمع وادم سوى
لا اشوف الزهره هايه وتنطي حاجات ودوى
لهسه عباس وچفوفه وگلبه ضامي وما روى
الا من نبچي اعلى زينب يرجع يشم الهوى

هذا مجلس وابو صالح والله بيه
عجل الله الدمع منه وعليه

يا امامي المنتظر
والله مخنوگه البشر
الحيل انته وياهو يترك حيله
يا اللهي ارزقني بس ابچيله

---------------------------

ربي لا تحرمني منه وكون اظل بخدمته
بالمجالس والمواكب گلبي تنزل دمعته
كل محرم من يجيني انا اعلگ رايته
وانا وصيت بمماتي وهو كلمن ساعته

راية حسين الچفن لازم تصير
حتى ما يوصلني منكر لا نكير

درعي ما توصلني نار
گبري بس جنه وخضار
الدمعه لحسين العذاب تشيله
يا اللهي ارزقني بس ابچيله

كلمات الخادم / رعد الفريجي

بالغرب جــاها الأجل
لا اخــو يمها وأهـــل
زينب بـــذاك المحـل
يا حسافه. يا حسافه

*

عن مصاب الحره لـو نحچي الرزيه
أمنيــه رادتهـا بـــت أمهـا الــزچيـه
أتمنــت إخوتها تجــي قبـل الــمنيه
لكــن شخلــت عليهــا الغاضـــريـــه

الموت بالغربه صعب
وجفن اليتاني يصب
اخوتها ظلوا عالترب
يا حسافه يا حسافه

*

من وداع الطــف جمر يسعـر لهيبـه
مــا بطل يـوم وسكن دمـع المصيبه
تذكــر حسين البقـت جثتــه سليبـه
والگمر عالشاطي والهامـه خضيبه

تذكــرت ذيـــچ الشباب
من الدمه صارو خضاب
والگمر عالشاطي غاب
يا حسافه يا حسافه

*

أتذكــرت گبل المنيــه أوداع أهلها
بالطفــوف وذكـرت أوداع الكفلها
اتمنتــه يگصدها والدمعــه يهلها
ذكرت الطف عالنهــر واگع أملها

عالنهر طـــاح الكفل
أهناك مر بيها الأجل
من مخيمــه اشتعـل
يا حسافه. يا حسافه

*

يهلي نادت چنهـا والمدمـع تجاره
ويـن يليوث الوغــه الكلكم غياره
گلبي سـاعات المنيه تسري نـاره
تطفه لــو مريتو يا أهلي بزيــاره

يهل يصوبني الجـره
بالسيــوف امــوذره
والجثث فــوگ الثره
يا حسافه يا حسافه

*


يهلي معروفــه اليموت أهلــه تشيعه
وتنحب أعليـه بالمنيه وتجـري دمعه
وسفه يهلي اتــوزعيتو قطعـه قطعه
للمنيه أعليكم انـــه بحرگـــه انعــــه

نــاري چـــن نــار الخيّم
مـــن هـــوه ذاك العــلم
ابگلبي غافي اشجم سهم
يا حسافه يا حسافه

*

مــاتت أبغربــه العقيلــه الهـاشميــه
مـن ظلم أهـل الظلاله وغــدر أميه
بالغــرب محــد نصب الها العـــزيـه
وهسه ألها تنوح كل هـــاي البريه

ماتت أبحسره وقهــر
أخــت عبــاس الگمـر
استشهدت وي النحر
يا حسافه يا حسافه

***

الشاعر
موسى البديري