-"هالبنت ولدت مع عين سخيّة"

هالجملة نحكتلي ع مدار سنين حياتي بشكل متكرر ..

بعيداً عن شخصيتي بالحياة العملية و العلمية بس أبسط موقف بحرّك مشاعري تلقائياً دموعي بتنساب بغزارة كرماله..

مثلاً اذا شفت طفل شقيان أو قطة متأذية بالشارع أو حدا عاجز أو أي موقف مؤلم أو مُفرح بالنسبة إلي..

هالقصة بشخصيتي و بكيميا تكويني كانت عاملتلي مُعضلة و مهما حاولت اتحكم فيها ما كنت انجح..
كنت حسها نقص أو ضعف أو نقطة سلبية فيني..

للوقت إلي قرأت فيه حديث سيدنا محمدﷺ لمّا سُئل عن فيضان الدموع قال:
"هذه رحمةٌ جعلها اللّه في قلوب عباده وإنّما يرحمُ اللّه من عباده الرُحماء"

من بعدها تيقنّت ردّة هالفعل عندي من أطيب النِعم إلي ربنا وهبني ياها

فالحمدللّه حبّاً و شكراً عَ كلشي🤍🦋

هِيام الضاهر.

-إنَّ الكِرامَ وإنْ ضاقتْ معيشتُهم
دامتْ فضيلتُهم والأصلُ غلّابُ🤍🦋.

#صباح_الدوم

-في ناس بتبدأ متأخرة و بتسبق كل الي بدأ بكير..
توفيق ربنا بغيّر كل القواعد حتى لو كانت مستحيلة
فكن مع اللّه ثم اجتهد..

ربنا يرزقنا التوفيق لما يحبه ويرضاه🤍🦋.

هِيام

-إنّك تكون شخص إيجابي مو معناها إنك تكون مغّيب عن حقيقة الوضع و تقلبات الحياة..

الإيجابية عندك بتبان لما تتعرض بحياتك لمصيبة أو ضيقة..

بوقتها لازم تكون متيّقن و فهمان أنك مو بأفضل موقف و لا بأفضل تجربة..
بس بنفس الوقت لازم تكون عارف أنك لازم تشتغل عَ نفسك و حياتك أكتر و انّك ممكن تطلب مساعدة و نصيحة ..

أهم اشي تكون مقتنع أنك رح تعدي هالمحنة و توصّل ذاتك لمكان احسن مع الوقت..

الإيجابية لازم يكون معها مجهود كبير و صبر و تعب مو بس وجه مبتسم و كلام مزخرف لحتى ما نبيّن للناس أنو فشلنا او تعبنا أو عاكستنا الظروف..

لهيك خليّك إيجابي بس بطريقة صح🤍🦋.

هِيام الضاهر

-بدي أحكي وجهة نظري بشغلة:

دائماً بشوف من الأدب والرحمة و البر لمّا حدا يجي يحكيلك عن أي موقف أو شغلة مزعلته أو مضايقته ما بينفع بوقتها أبداً تحكيله:
( دخيلك كلنا تعبانين اكتر منك)

حتى لو هموم الدنيا كلها فوق راسك
ما بينفع تحسس أي بني آدم أنو موقفه عادي و حزنه تافه..

لمّا هالشخص اختارك لحتى يشاركك حزنه و الأشياء الي بباله
معناها ربنا أصطفاك ليجعلك شِفاء لأحد هالناس من كيد الشيطان و وساوسه..

فواسيه ، طبطب عليه ، هوّن عنه اذا بتقدر..

لما تحس أنو تحسّن و شد.. تمام بوقتها إذا حابب ابدأ أشرح مشاكلك و همومك أنت كمان..

بس جملة:
( ياخي كلنا تعبانين و مكتئبين و عنا هموم أكتر منك)
جملة كفيلة لتزيد هم ع الشخص الي قبالك..

حاولوا تتعاملوا بلين مهما قدرتوا لتكونوا الطرف الحلو من هالحياة 🤍🦋.

هِيام الضاهر

-نعوذ بك أن تفتر عزائمنا في أوجِ السّعي ، أن تتلاشى أقدامنا عند عتبة الوصول ، أن يداهمنا اليأس في ذروة الأمل ، أن نضيّع الوجهة وقت اشتداد اليقين ،وأن نخلط الكسل بالعجز ، والتّوكل بالتّواكل🤍🦋.

سبحان اللّه ..
أحياناً بجملة عابرة بتدخل مسامعك من عابر سبيل بتغيّر نظرتك بموضوع فبتحلّ مشكلة صرلك شهور واقع فيها ..
أحياناً مشهد عابر لمحته بجدد طاقتك و بيعطيك همّة أكتر من بودكاست صرلك أسابيع عم تحضره..

بالمظهر العام هالأشياء كلها صدفة بصدفة
قرأت بالصدفة شفت بالصدفة سمعت بالصدفة لتقيت بحدا بالصدفة..

بس خليني آخدك ع المنطق الأعظم
الي رح يخلينا متفقين أنو ما في صدفة بهالحياة!

كل أشي عند ربنا مخلوق بمقادير وموازين دقيقة جداً و بتواقيت محددة لتحصل ..

لهيك مافي صدفة بالحياة
في قدر مكتوب لكلشي بحياتك .. مرسوم بأدق التفاصيل..
ف انتبهوا لإشارات ربنا بالأشياء الي بتجي فجأة ..
شوفوا شو عم يبعتلكم و كيف عم يعلّمكم..
أحياناً كلمة وحدة بموقف مناسب بتغير دوافعكم و أفكاركم تغيير ما قدرت عليه عشرات الكتب والمحاضرات..

خليّكم واعيين و كونوا بخير🤍🦋

هِيام الضاهر

-‏أتمُّ الناسِ عقلاً مـن تراهُ عن الأقوامِ مشغولاً بنفسه🤍🦋.

-مبارح أخدت محاضرة بتحكي عن الأمراض النفسية و كان أغلب الحكي عن الاكتئاب و أسبابه و كيف منتعامل مع المريض و كيف منعالجه ..

الدكتور ذكر كتير أسباب و توّسع بالشرح بشكل رهيب ..
لحتى وصل ع ذكر أحد المركبات ، فعلّقت ببالي جملة حكاها بوقتها ..قال:
"نقص هالمركب بيعمل نقص بهالهرمون و بالتالي الإصابة بالاكتئاب"

صفنت شوي!
و خطرتلي كتير أسئلة ..منها:
معقول نقص هالمركب البسيط يعمل بالإنسان كل هاد؟؟

بعدين تذكرت أنو نحن من صناعة اللّه

سبحان اللّه كيف مُمكن عوز بمركّب بسيط ضمن جسدنا ..
مركب واحد من بين بلايين بلااايين المركبات والإنزيمات والمواد، قادر يقلب نشاط الإنسان وهمته و مزاجه وحتى حياته كلها!
سبحان اللّه على حجم التعقيد والتناسق بالإنسان.

وفي كلِّ شيءٍ له آية ، تدلُّ على أنّه الواحد🤍🦋.

هِيام الضاهر

-اليوم أخي كان عم بلاعب بنته
(عمرها سنة)
حطها ع رف شوي عالي عنه و مد أيديه و حكالها تعي ..تلقائياً رمت حالها عليه بدون تردد و خوف من أنها تقع

الطفل عنده ميزة رائعة جداً هي أنو ما بخاف..
بتحكيله حط إيدك ع مكان ساخن بحطها ، ارمي حالك بهاد المكان بيرمي ، بيلعب بمقص ما بهمه ، بيلعب بالكهربا ما بهمه..
هالشغلات خطر ع الأكيد كلنا منعرف،
أنا و أنت منعرف بس هو ما بيعرف و هاد تفسير ليش الطفل ما بيهتم و لا بخاف..

ذاكرة الطفل ببدايتها بتكون لوحة بيضا،
مابيملك ذكريات عن عواقب الاشياء الخطرة الي بين إيديه و لا بيلمك ذكريات مؤلمة عنها..

أما نحن عكس هالطفل اللطيف ..
بنخاف من المعاناة، بنخاف من الألم و الفشل ، بنخاف نفوت بشغلة وما نطلع قدها ..

الخوف مو أمر سيء لا أبداً
في نقاط لازم نخاف فيها و بيتطبق عليها
(لولا الخوف لأهلك الناسُ أنفسهم)

وبمواضيع تانية الخوف فيها بقيدك و بخليّك أسير ف بيتطبق عليها
(بالخوف يهلك الإنسان نفسه، ويصده عن كثيرٍ من مواضع الخير )


ف أنت حكيم نفسك وين و إيمت لازم تخاف..
لا تحسبها كتير لدرجة يغلب الخوف عالإقدام ..
خليك شجاع متل الطفل الصغير و واعي متل ما أنت ..🤍🦋


هِيام الضاهر

-ولقَد رجَوتُكَ يا إلهِي طامِعًا
ألاَّ يَخيبَ مدَى الحياةِ رَجائي🤍🦋.

اللّه معنا🤍🦋.

-اليوم نزل تاريخ بدء أمتحاناتي بكلية الصيدلة
تذكرت كميّة المواد المتراكمة و كميّة الضغوطات الموجودة عندي ..
تلقائياً العقل الباطن استغل الفرصة و دخلني بمتاهة كبيرة
-أنتِ ضيّعتِ وقت مع كل هالضغط!
-مستحيل تقدري تعوّضي الي راح!
-لازم مشتغلة أكتر ، ما ضل وقت!
-و طبعاً ما رح تلحقي مع كل الضغوطات و المسؤوليات الموجودة بحياتك!

قررت أهرب من هالأفكار و فتحت تيلغرام و دخلت ع اول قناة بوجهي كرمال ما اترك حالي لنفسي ..

لقيت أول بوست بهالقناة بيحكي:

((المُسلم في أيّ وقتٍ إذا استدرك فهو يستدرك عِند كريمٍ ، واللّه عزّ وجل هو الكريم ، فإن رأى مِنك خيرًا أعانك ، و إن أريته مِن قلبك صدق النيّة يسّر لك الأسباب ويسّرها عليك))🤍

بأي وقت منستدرك التقصير و منقرر نبلش بجديّة ربنا رح يمهّدلنا الطريق بشرط وجود النيّة الصادقة

بوست صغير كان كفيل لينتشلني من دوامة كبيرة و متاهات و اسئلة..

ف شكراً يارب عَ الإشارات الي بتذكرنا ع وجود الأمل بعز الكرب
و أنو حسن الظن باللّه هو مفتاح المستحيلات مهما كانت المعطيات بتوحي العكس🤍🦋

إلي و إلكم (دائماً في أمل)

هِيام الضاهر

-حط حالك بوسط فيه ناس مجتهدة و شاطرة..

بناءاً ع تجربتي هالموضوع صعب أبداً مو سهل..

رح تتعب بالبحث ، رح تتعب لبينما تتأقلم ، غالباً تضطر تعترف إنّك ضعيف ومبتدئ و غالباً ممكن تعترف إنك كسول و ما قدرت تلتزم لظروف حوّلتك للي أنت واقع فيه حالياً..

المُجديّن ما بحبوا أغلب الأشياء الي أنت بتضيّع وقت عليها و بيسكروا بابها بسهولة لو كانوا مكانك..

رح تلاقي عندهم صبر
ف عدوى الصبر رح تنتقل لعندك تلقائياً لمّا تندمج معهم ..

(إنك تحط نفسك بوسط ناس مجتهدة)

تقريباً هاد أحد الطرق المضمونة لبداية النجاح بعد توفيق ربنا🤍🦋.

هِيام الضاهر