የ 17 አመቱ ላሚን ያማል 30 አመት ከሆናት የበረራ አስተናጋጅ ከሆነች እንስት ጋር ግንኙነት መጀመሩ ተጠርጥሯል። ላሚን እና የተጠቀሰችዉ ሴት በጣሊያን በተመሳሳይ ቦታ ሆነዉ በኢንስታግራም ገጻቸዉ ላይ ፎቶ ከለቀቁ በኋላ በተከታዮቻቸዉ ግንኙነታቸው ተጠርጥሯል።

ሆኖም ላሚን ያማል ስለ ሁለቱ ሰዎች ግንኙነት ጥየቄ ቀርቦለት የሀሰት ነዉ ሲል አጣጥሎታል።

#ዳጉ_ጆርናል_ስፖርት
@Dagujournalsport

የሩስያ የጸጥታ ሃላፊ ከ2 ሳምንት ባነሰ ጊዜ ውስጥ ለሁለተኛ ጊዜ ወደ ሰሜን ኮሪያ አቀኑ

የሩሲያ ከፍተኛ የደህንነት ባለስልጣን ሰርጌ ሾይጉ የሰሜን ኮሪያውን መሪ ኪም ጆንግ ኡን ለማግኘት ፒዮንግያንግ እንደደረሱ የሩሲያ መንግስታዊ መገናኛ ብዙሃን ማክሰኞ እለት ዘግበዋል። በዚህ ወር ባለፈው አመት በሁለቱ ወገኖች የተፈረመው አጠቃላይ የስትራቴጂክ አጋርነት ስምምነት የመጀመሪያ አመት በመሆኑ የሾይጉ ከሁለት ሳምንት ባነሰ ጊዜ ውስጥ ወደ ፒዮንግያንግ ያደረጉት ጉዞ ለሁለተኛ ጊዜ ሲሆን ለመጨረሻ ጊዜ በጁን 4 የሰሜን ኮርያም መዲና ጎብኝተዋል።

ጉብኝቱ በድጋሚ "በሩሲያው ፕሬዚዳንት ቭላድሚር ፑቲን መመሪያ" የተደረገ ስለመሆኑ የሩሲያው ታስ የዜና ወኪል ዘግቧል። የሩስያ የፀጥታው ምክር ቤት መሪ የሆኑት ሾይጉ በቅርብ ወራት ውስጥ ወደ ሰሜን ኮሪያ በርካታ ጉዞዎችን አድርገዋል። የሩሲያው ፕሬዝዳንት ቭላድሚር ፑቲን እና የሰሜን ኮሪያው መሪ ኪም በፒዮንግያንግ የተፈራረሙትን የትብብር ስምምነት ተከትሎ ሰሜን ኮሪያ በዩክሬን ላይ በተከፈተው ጦርነት ሩሲያን ለመርዳት በሺዎች የሚቆጠሩ ወታደሮችን አሰማርታለች።

ስምምነቱ ከሁለቱ ሀገራት በአንዱ ላይ በሶስተኛ ወገን ከተጠቃ ወታደራዊ ድጋፍን መስጠትን የሚያስችል ነው።

በስምኦን ደረጄ
#ዳጉ_ጆርናል

በሆለታ ከተማ አንዲት  አህያ ፈረስ መውለዷ ተሰማ

በሆለታ ከተማ አስተዳደር ገልገለ ኩዩ ቀበሌ ውስጥ አንዲት አህያ ፈረስ መገላገሏን የከተማው አስተዳደር ኮሙኒኬሽን ጽ/ቤት ገልጿል ።

በሆለታ ከተማ ገልገለ ኩዩ የተባለ ቀበሌ ነዋሪ የሆኑት የአቶ ብርሀኑ ጐዳ ንብረት የሆነች የጭነት አህያ ፈረስ መውለዷ ተገልጿል ።

የአህያዋ ባለቤት የሆኑት አቶ ብርሀኑ ጐዳ  እንደገለጹት ከአስር ዓመት በፊት የጭነት አህያዋን ከኤጀሬ ከተማ መግዛታቸውን ገልጸዋል።  ከዚህ ቀደም ባልታሰበ መንገድ በስድስተኛዋ እርግዝና ሆዷ ተልቆ የታየ እና  ከዚህ ቀደም ግን አምስት አህዮችን ስትወልድ የተለየ የሰውነት አቋም እና ባህሪ እንዳልነበራት ተጠቁሟል።

የጭነት አህያዋ በስድስተኛ ወሊድዋ ሰኔ 5 ቀን 2017 ዓ.ም ከጠዋት ሶስት ሰዓት ላይ ግን መጠኑ ከአህያ ውርንጭላ በአቋሙ የተለየና ሙሉ በሙሉ የፈረስ ዝርያ ያለው ውርጭላ መውለድዋን ተናግረው አጋጣሚው ግርምት እንደ ጫረባቸው አውስተዋል።

የሆለታ ግብርና ምርምር ኢንስቲትዩት ማዕከል  አጠቃላይ የእንስሳት ጤና አጠባበቅ ዘርፍ አስተባባሪ ዶክተር ቤክሲሳ ኡርጌ እንደገለጹት በዘረ መል ምርመራ ሂደት የፈረስ እና የአህያ ክሮሞዞም  ተመሳሳይነት ያለውና  የአንደኛው የዘር ፈሳሽ የሚፈጠር ፅንስ ሲሆን በተለምዶ አህያ ከፈረስ ጋር የማዳቀል ሂደት በቅሎ የሚወለድ ይሆናል ማለታቸውን ብስራት ሬዲዮ ሰምቷል።

አህያ ፈረስ የመውለዱ ሂደት የተለመደ ባይሆንም  በሳይንስ የተረጋገጠ ቁጥር ባይኖርም አህያ ፈረስ መውለድ እንደሚችልና የተወለደውም በሽታን የመቋቋም አቅሙ ከፍተኛ መሆኑን ገልፀዋል።

በአሁኑ ጊዜ  የተወለደው ፈረስ ጤንነቱ ሙሉ ለሙሉ የተረጋገጠ እንደሆነና እናቱም በፍቅር ጡቷን እያጠባችው እንዳለ ተረጋግጧል።

በኤደን ሽመልስ
#ዳጉ_ጆርናል

በባቢሌ ዝሆኖች መጠለያ ባለፋት አስር ዓመታት በሰዉና ዝሆን ግጭት 66 ሰዎች የሞት እና የአካል ጉዳት አደጋ አጋጥሟቸዋል ተባለ

በባቢሌ ዝሆኖች መጠለያ በሰዎችና በዝሆኖች መካከል በተፈጠሩ ግጭቶች ባለፋት አስር ዓመታት 66 ሰዎች ለህልፈትና የመቁሰል አደጋ አጋጥሟቸዋል ሲል የኢትዮጵያ የዱር እንስሳት ጥበቃ ባለስልጣን አስታውቋል።

በባለስልጣኑ የጥበቃ ቦታዎች ልማት ዴስክ ኃላፊ አቶ ካሳዬ ዋሚ ለብስራት ሬድዮ እንደተናገሩት እኤአ ከ2016እስከ 2025 ድረስ በመጠለያው 86 የዝሆን ዝርያዎች እንደሞቱ ጥናቶች ያሳያሉ።ሰዎች ለእርሻና ለሌሎች ተግባራት በሚል በሚፈጥሩት ህገወጥ እንቅስቃሴ ምክንያት የህገወጥ ሰፈራ መበራከት ለችግሩ መፈጠር ከሚጠቀሱት ምክንያቶች መካከል ተጠቃሽ መሆኑ ተገልጿል።

በዚሁ መጠለያ ያሉት ዝሆኖች ከሰዎች ጋር በሚፈጥሩት ግጭት ሳቢያ ሰዎች ህይወታቸውን ሊያጡና የአካል ጉዳት ሊደርስባቸው እንደሚችል የገለፁት አቶ ካሳዬ  በባቢሌ ዝሆኖች መጠለያ ቁልፍ ችግሮች እና መፍትሄዎቻቸው ዙሪያ ባለስልጣኑ ከሚመለከታቸው አካላት ጋር ውይይት ማካሄዱን ተናግረዋል።

ከኦሮሚያ እና ሱማሌ ክልል ከፍተኛ አመራሮች የመጠለያው አዋሳኝ ከሆኑ ዞኖች፣  ወረዳዎች እና ቀበሌዎች እንዲሁም ከሀሮማያ እና ጂግጂጋ ዩኒቨርሲቲዎች የተውጣጡ  ባለድርሻ አካላት በተገኙበት ውይይቱ መካሄዱ ታውቋል።

በቅድስት ደጀኔ
#ዳጉ_ጆርናል

አርኤስኤፍ በሊቢያ ድንበር አቅራቢያ ቁልፍ ቦታ መያዙን ገለጸ

የሱዳን ፈጣን ድጋፍ ሰጭ ኃይሎች ሰኞ እለት በሰሜን ሱዳን ግዛት ከሊቢያ እና ግብፅ ድንበሮች አቅራቢያ የሚገኘውን ኦሳይስ የተሰኘውን ስተራቴጂክ ቦታ መያዙን ገልጿል፣ ይህ እርምጃ የፓራሚሊታሪ ቡድኑ የአቅርቦት መስመሮቹን ለማጠናከር ይረዳል ተብሎለታል። አርኤስኤፍ ሀገሪቱን ለመቆጣጠር ከሁለት አመት በላይ በዘለቀው ጦርነት ከሱዳን ጦር ጋር እየተዋጋ ነው።

የአርኤስኤፍ አማካሪ መሀመድ ሙክታር ለሱዳን ትሪቡን እንደተናገሩት ኃይላቸው በጀበል አርኬኑ ተራራ ክልል አቅራቢያ የሚገኘውን “ካርብ አል ቱም” የተሰኘውን የባህር ዳርቻ ተቆጣጥረዋል። የተያዙት አከባቢዎች በሱዳን፣ ሊቢያ እና ግብፅ መካከል መገናኛ መስመር በሆነው ስልታዊ "ትሪያንግል" አካባቢ መያዙን ተከትሎ ነው።

በአካባቢው የተሰማራው የመከላከያ ሰራዊት ጥምረት ቃል አቀባይ ስለጉዳዩ ምላሽ ማግኘት አልተቻለም ተብሏል። ይህ የጦር ግስጋሴ የመጣእ የRSF መሪ ጄኔራል ሞሃመድ ሃምዳን ዳግሎ ጁን 2 በቪዲዮ ወደ ሰሜናዊ ግዛት ኃይላችን እየገባ እንደሆነ ከተናገሩ በኋላ ሲሆን ሰላማዊ ዜጎች በቤታቸው እንዲቆዩ አስጠንቅቀዋል።

በቀረጻው ላይ፣ ዳግሎ፣ RSF በአካባቢው “የISIS ታጣቂዎች” በማለት የገለጻቸውን የሱዳን ታጣቂዎች መረጃ እንዳላቸውና “ህጋዊ ኢላማ” እንደሆኑም ገልፆል።  ዘመቻው በሰላማዊ ሰዎች ላይ ጉዳት እንደማያደርስም ተናግረዋል።

ተንታኞች እንደሚሉት አርኤስኤፍ በኮርዶፋን እና በዳርፉር አካባቢዎች የሚያደርገውን እንቅስቃሴ ለማጠናከር ከሊቢያ የሚወስደውን የአቅርቦት መስመር ለማስጠበቅ እየሞከረ ነውም ተብሏል። በዳርፉር ክልል የሰራዊቱ የመጨረሻ ምሽግ በሆነው በኤል ፋሸር ላይ የ RSF ጥቃት ከተጠናከረበት ጋርም ይገጣጠማል።

በመሬት ላይ ያሉ ምንጮች እሁድ እለት በከተማይቱ ላይ የ RSF ጥቃት እጅግ በጣም ኃይለኛ ሆኖ እንደቀጠለ ገልፀዋል ይህም ከበባውን ለማጠናከር የተደረገው ጥረት አካል ነው ብለዋል።

በሚሊዮን ሙሴ
#ዳጉ_ጆርናል

የኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ ጠቅላይ ቤተ ክህነት ጽ/ቤት የሕግ አገልግሎት መምሪያ በአቶ ትዝታው ሳሙኤል ላይ ክስ መሰረተ።

የቤተክርስቲያናችን ሕግ አገልግሎት መምሪያ ለኢትዮጵያ ፌዴራል ፖሊስ ባቀረበው ክስ የወንጀል ምርመራ ተደርጎ የምርመራ መዝገቡ መብቱ ለሚፈቅድለት የዐ/ሕግ ዘርፍ እንዲተላለፍለፍ ጠይቋል።

በወንጀል ተጠርጣሪ /ተከሳሽ - አቶ ትዝታው ሳሙኤል
ተጠርጣሪ /ተከሳሹ ነዋሪነቱን በውጪ ሃገር በማድረግ የቤተክርስቲያኒቱ የበላይ ውሳኔ ሰጪ አካልን ለማዋረድ፣
ለመስደብ እና የምዕመኑን ስሜት ለመንካት ብሎም በሀገሪቱ ውስጥ ሁከትና ብጥብጥ እንዲነሳ በማሰብ በተለያዩ የመረጃ ማሰራጫ መንገዶች እና ከ5000 በላይ ተከታዮች ባሉት የራሱ የዪቲዩብ ቻናል በመጠቀም ከፍተኛ ቅስቀሳ ሲያደርግ መቆየቱን ገልጿል።

በማያያዝም ግለሰቡ የኢትዮጵያ ኦርቶዶክስ ተዋሕዶ ቤተክርስቲያን ብፁዓን አባቶችን፣ በየገዳማቱ ውስጥ የሚገኙ ገዳማውያን መነኮሳትና አገልጋዮችን <<ግብረ ሰዶማውያን ናቸው>> በማለት፣እንዲሁም የኢትዮጵያ ኦርቶዶክስ ተዋሕዶ ቤተክርስቲያንን <<የመተት እና ጠንቋይ ቤት ናት >>በማለት፣ሲቀሰቅስ የቆየ መሆኑን የገለጸው መምሪያው ግለሰቡ በተጨማሪም የኢትዮጵያ ኦርቶዶክስ ተዋሕዶ ቤተክርስቲያን የምትገለገልባቸውን ሃይማኖታዊ የፀሎት፣የታሪክ ፣የገድላትና ድርሳናት መጻሕፍትን <<ድውያን መጽሐፍት ናቸው መጥፋት አለባቸው>>ማለቱን ገልጿል።

የኢትዮጵያ ኦርቶዶክስ ተዋሕዶ ቤተክርስቲያን በቅድስናየምታ
ከብራቸውንና የምትዘክራቸውን ቅዱሳን አባቶች እና እናቶችን << ጣኦታትና ጣኦት አምላኪ>> ናቸው በማለት ግለሰቡ የፈጸመውን የወንጀል አድራጎት በመጥቀስም ክስ መስርቶበታል።

መምሪያው በአጠቃላይ ሰባት ነጥቦችን ያካተቱ የወንጀል ዝርዘርሮችን በመግለጽም ጉዳዩ ለሚመለከተው አካል ቀርቦ ግለሰቡ በሕግ ተጠያቂ እንዲደረግ ባቀረበው አቤቱታ ገልጿል።

#ዳጉ_ጆርናል

በአጣየ ከተማ ትምህርት ላልጨረሱ የ8 እና የ12 ክፍል ተፈታኞች በሁለተኛ ዙር ከነሃሴ በኋላ ፈተናው እንሚደሚሰጣቸው ተነገረ

በአጣየ ከተማ በተለያዩ ጊዜያት  ተቋርጦ በነበረ የትምህርት አገልግሎት ምክንያት ትምህርት ላልጨረሱየስድስተኛ እና የስምንተኛ ክፍል ተማሪዎች በሁለተኛ ዙር ፈተናው እንደሚሰጣቸው የአጣየ የመጀመሪያ እና ሁለተኛ ደረጃ ትምህርት ቤት ሱፐርቫይዘር የሆኑት አቶ  ማሙሽ ሲከፋኝ  ለብስራት ሬዲዮ ተናግረዋል።

የመጀመሪያ ዙር ተፈታኞች ባለፈው ሳምንት ፈተናቸውን ያጠናቀቁ መሆኑን በመግለጽ የሁለተኛ ዙር ተፈታኝ ተማሪዎች እስከ ነሃሴ 2 ድረስ ትምህርት እንዲጨርሱ ከተደረገ በኋላ ክልሉ በሚያስቀምጠው ቀን ፈተናውን እንደሚወሰዱ ተገልጿል ።በሌላ በሉል በአካባቢው ካሉ አራት   ሁለተኛ ደረጃ ትምህርት ቤቶች ሁለቱ በመጀመሪያ ዙር ሰኔ 23 ፈተናውን እንደሚወስዱ ተጠቁሟል።

ይሁን እንጂ ዘግይቶ ትምህርት መስጠት የጀመረው ጋሊለበር ትምህርት ቤት ከነሀሴ በኋላ በተመሳሳይ ትምህርት ሚኒስቴር  በወሰነው ቀን ፈተናውን እንደሚሰጣቸው ይጠበቃል። ቀሪው የሁለተኛ ደረጃ ትምህርት ቤት በአካባቢው በነበረ ግጭት ምክንያት  በዘንድሮ የትምህርት ዓመት ምንም አይነት ተማሪ አለመቀበሉን እና አገልግሎት አለመስጠቱ ብስራት ሬዲዮ መዘገቡ ይታወሳል ።

በመሆኑም በመጀመሪያ ዙር ፈተናውን ለሚወሰዱ ተማሪዎች በጥሩ ሁኔታ ዝግጅቱ መጠናቀቁ እና ከዚህ ቀደም እንደነበረው ያቋረጠ  ተፈታኝ አለመኖሩንም አቶ ማሙሽ  ሲከፋኝ ብስራት ሬዲዮ ተናግረዋል።

በኤደን ሽመልስ
#ዳጉ_ጆርናል

በቴህራን የደረሱ ፍንዳታዎች በነዋሪዎች ላይ ፍርሃት እና ቁጣ ቀስቅሰዋል

በከተማው ውስጥ ከሚኖሩ ከ10 ሚሊዮን በላይ ሰዎች እና ከ14 ሚሊዮን በላይ የሚሆኑ ሌሎች በርካታ ከተሞችን ባካተተው ሰፊው የቴህራን ግዛት ውስጥ ያሉ ነዋሪዎች ከፍተኛ ድንጋጤ ዉስጥ ይገኛሉ፡፡በነዋሪዎች ዘንድ ከፍተኛ ጭንቀት እና ፍርሃት አለ። ነገር ግን የሚገርመው፣ በዋና ከተማው ውስጥ በአብሮነት የመቆየት ስሜትም አለ።

በአንጻሩ እስራኤል ለደረሰባት ፍንዳታ እና ተደጋጋሚ የማስጠንቀቂያ መልእክቶች ምላሽ ለመስጠት ቁጥራቸው ቀላል የማይባል የህዝቡ ክፍል ቴህራንን ለቆ መውጣትን መርጧል።በተለይ ኢላማ በተደረገባቸው ሰፈሮች ውስጥ የሚኖሩ፣ ጥልቅ የሆነ የንዴት ስሜት ነበር።ነዋሪዎቹ ከኒውክሌር መርሃ ግብሩም ሆነ ከወታደራዊ ተቋማት ጋር ምንም አይነት ግንኙነት እንደሌላቸው እና አሁን በነዚህ ክስተቶች ህይወታቸው በቀጥታ እየተጎዳባቸው ያሉ ተራ ዜጎች መሆናቸውን ተናግረዋል።

መቀመጫውን በቴህራን ያደረገው የኢራን ጉዳይ ተንታኝ አባስ አስላኒ እስራኤል በኢራን ውስጥ "የሥነ ልቦና ጦርነት" በግድያ እና ከጊዜ ወደ ጊዜ እየጨመረ በሚሄድ ዛቻዎች እያካሄደች ነው ብለዋል።በመካከለኛው ምስራቅ ስትራቴጂክ ጥናት ማዕከል ከፍተኛ ተመራማሪ የሆኑት አስላኒ ኢራን ለእስራኤል ጥቃቶች ምላሽ እንዳትሰጥ ለማስቆም እስራኤል "ህዝቡን ለማስፈራራት እና የዛቻ ደረጃን ለመጨመር እየሞከረች ነው" ብለዋል ። እውነታው ግን ኢራን እስካሁን ድረስ በሙሉ ኃይል አልመጣችም ምክንያቱም ዩናይትድ ስቴትስ በዚህ ግጭት ውስጥ ልትሳተፍ የምትችልበትን እድል ክፍት ነዉ ብለዋል።

የእስራኤል ጥቃቶች እና ዛቻዎች ፍርሃትን ወይም ትርምስን ከማስነሳት ይልቅ በኢራን ውስጥ ጠንካራ የብሄራዊ አንድነት ስሜት ፈጥረዋል ብለዋል ።የእስራኤል ጥቃት ኢራንን ምላሽ ከመስጠት አያግድም ሲሉ አክለዋል።

በስምኦን ደረጄ
#ዳጉ_ጆርናል

በ2018 በጀት ዓመት የመድኃኒት የግዥ የቆይታ ጊዜን በመቀነስ አቅርቦቱን ለማሻሻል መታቀዱ ተገለፀ

የአገልግሎቱ የግዥ አስተዳደር ዳይሬክቶሬት ዳይሬክተር አቶ አወል ጀማል በ2018 በጀት ዓመት የተሻለ የመድኃኒት አቅርቦት ለማከናወን የአሠራር ፍጥነትን በመጨመር የመድኃኒት ግዥ ቆይታ ግዜን ወደ 120 ቀናት ለማውረድ መታቀዱንና እያንዳንዱ ሠራተኛ ተጠያቂ የሚሆንበት ስርዓት መዘርጋቱን ለብስራት ሬዲዮ ተናግረዋል፡፡

በኢትዮጽያ መድኃኒት አቅራቢ አገልግሎት የግዥ አስተዳደር ዳይሬክቶሬት የፋርማሲዩቲካል የግዥ አስተዳደር ቡድን መሪ የሆኑት አቶ ተከተል አሃዱ በሰርቶ ማሳያው ሁሉም ሠራተኛ ወጥ በሆነ መልኩ በተመሣሣይ ገፅ በጋራ እቅዶቹን ማዘጋጀቱ በአቅርቦቱ ላይ እንዲሁም ከተጠያቂነት አንፃር ኃላፊነት እንድንወስድ ከፍተኛ ሚና ይኖረዋል ብለዋል፡፡

በእለቱ የግዥ ስርዓት መከታተያዎች የተዘጋጁ ሲሆን በ2018 በጀት ዓመት ለሚፈፀሙ ግዥዎች ሊገጥሙ የሚችሉትን ተግዳሮቶች አስቀድመን በመለየትና በማቀድ የመድኃኒት አቅርቦቱን በማፋጠን ፈጣንና ምላሽ ሠጪ ተቋም ልንገነባ እንደሚገባ በአፅንኦት ተገልጿል፡፡

የኢትየጵያ መድኃኒት አቅራቢ አገልግሎት መድኃኒቶችንና የህክምና ግብዓቶችን ግዥ ለማከናወን ከማንዋል የግዥ አሠራር በመውጣት ወደ ኤሌክትሮኒክ ወይንም EGP የግዥ ስርዓት መድኃኒቶችን በማቅረብ ላይ የሚገኝ ሲሆን፤ ግንቦት 18 ቀን 2017 ዓ.ም. የፀደቀው አዲሱ 1066/2017 የመድኃኒትና የህክምና መገልገያዎች የግዥ መመሪያም ለአቅርቦቱ ከፍተኛ ሚና እንደሚኖረው ተገልፆል።

በሰመኃር አለባቸው
#ዳጉ_ጆርናል