Qishloq xo‘jaligi sohasida global sheriklik yangi bosqichga chiqmoqda

Toshkentda o‘tayotgan IV Toshkent xalqaro investitsiya forumi doirasida yurtimiz taraqqiyotiga hissa qoʻshadigan, ayniqsa, qishloq xo‘jaligi sohasidagi xalqaro hamkorlikni mustahkamlashga xizmat qiladigan muhim uchrashuvlar bo‘lib o‘tmoqda.

Forum doirasida O‘zbekiston Respublikasi qishloq xo‘jaligi vaziri Ibrohim Abdurahmonov bir qator xorijiy davlatlar hamda nufuzli xalqaro tashkilotlar vakillari bilan samarali muloqotlar olib bormoqda.

Shular jumlasidan, dunyoga mashhur “John Deere” kompaniyasi vakillari bilan bo‘lib o‘tgan uchrashuv alohida e’tiborga loyiq. Mazkur kompaniya butun dunyo bo‘ylab zamonaviy qishloq xo‘jaligi texnikasi va yechimlarini taqdim etib kelayotgan yetakchi brend sifatida tanilgan.

Uchrashuv davomida O‘zbekiston va “John Deere” o‘rtasidagi ikki tomonlama hamkorlikni yanada mustahkamlash, mavjud loyihalarni kengaytirish, xususan, innovatsion texnologiyalar asosida mexanizatsiyani rivojlantirish masalalari muhokama qilindi.

Aytish kerak, bugun O‘zbekiston qishloq xo‘jaligida yuqori unumli, raqamlashtirilgan va ekologik jihatdan barqaror yechimlarga ehtiyoj sezilmoqda. “John Deere” kompaniyasi esa ana shunday yechimlarni taklif qiluvchi ishonchli hamkor sifatida bu jarayonda o‘z o‘rnini mustahkamlab bormoqda.

Shuningdek, forum doirasida vazir Ibrohim Abdurahmonov BAAning “Condor Group” kompaniyasi rahbari janob Sivaprasad bilan uchrashuv o‘tkazdi. Bu muloqot ham dolzarb va strategik ahamiyatga ega bo‘ldi. Unda O‘zbekistonda xalqaro standartlarga javob beruvchi, akkreditatsiyadan o‘tgan zamonaviy oziq-ovqat xavfsizligi laboratoriyalarini tashkil etish masalasi muhokama qilindi.

Tomonlar ayniqsa, bu boradagi texnik, tashkiliy va institutsional islohotlar yuzasidan aniq kelishuvlarga erishdi.

Shuningdek, laboratoriya axborotini boshqarish tizimlari — LIMS (Laboratory Information Management System) ni joriy etish, eksport mahsulotlarini xalqaro standartlar asosida sinovdan o‘tkazish va tan olingan sertifikatlar berish tizimini yo‘lga qo‘yish bo‘yicha Qo‘shma ishchi guruh tuzishga kelishib olindi.

Xitoy tajribasi asosida sabzavotchilikni rivojlantiramiz

Bugun Xitoy Xalq Respublikasining “WANLIN Group” kompaniyasi direktori Li Yan Tao bilan video-konferens-aloqa shaklida agrar sohada o‘zaro manfaatli hamkorlikni rivojlantirish istiqbollarini atroflicha muhokama qildik.

Xususan, “Xitoy tajribasi asosida O‘zbekistonda piyoz, sabzi, sarimsoq piyoz kabi sabzavot mahsulotlarini yetishtirish” loyihasini amalga oshirish masalasi ko‘rib chiqildi. Men ushbu tashabbusni O‘zbekiston qishloq xo‘jaligi sohasini texnologik jihatdan yangi bosqichga olib chiqishda muhim qadam deb hisoblayman.

Uchrashuv davomida ikki davlat o‘rtasidagi agrar aloqalar izchil mustahkamlanib borayotganini alohida ta’kidladik. Bu hamkorlik bizga nafaqat yangi agrotexnologiyalarni joriy etish, balki urug‘chilikni rivojlantirish, ilmiy izlanishlarni chuqurlashtirish va amaliy tajriba almashuvini kengaytirish imkonini bermoqda.

Uchrashuv yakunida, “WANLIN Group” kompaniyasi bilan birgalikda sabzavot mahsulotlarini yetishtirish bo‘yicha Anglashuv Memorandumini imzoladik.

Ushbu hujjat sabzavotchilikda zamonaviy texnologiyalarni keng joriy etish orqali hosildorlikni oshirish va mahsulotlarni qayta ishlashda sifatni yangi bosqichga olib chiqishga xizmat qiladi.