የአሜሪካ የውጭ ጉዳይ ሚኒስቴር የሃርቫርድ ተማሪዎችን የቪዛ ሂደት አስቀጠለ


የአሜሪካው ፕሬዚደንት ዶናልድ ትራምፕ የጣሉት የሀርቫርድ ዩኒቨርሲቲ የተማሪዎች ቪዛ እገዳ በጊዜያዊነት ተግባራዊ እንዳይሆን የሀገሪቱ ፌደራል ፍርድ ቤት ባለፈው ሳምንት ትዕዛዝ ማስተላለፉ ይታወሳል፡፡

ትዕዛዙ በቀጣይ የፍርድ ቤት ውሎ ጉዳዩ እስከሚታይ ድረስ ጸንቶ የሚቆይ ነው፡፡

በፌደራል ፍርድ ቤቱ ዳኛ አሊሰን ቡሮውዝ የተላለፈው ትዕዛዝ፣ የውጭ ዜጋ ተማሪዎች ወደ ዩኒቨርስቲው ገብተው ለመማር ብሎም የምርምር ጥናታቸውን ለማካሄድ ለሚጠይቁት ቪዛ ፍቃድ እንዲያገኙ የሚያስችል ነው፡፡

የፍርድ ቤቱን ትዕዛዝ ተከትሎ ኤምባሲዎች አቋርጠውት የነበረውን የቪዛ ሂደት መቀጠል እንደሚችሉ የአሜሪካ የውጭ ጉዳይ ሚኒስትር ማርኮ ሩቢዮ ለኤምባሲዎች ማስታወቃቸውን ሮይተርስ ዘግቧል፡፡

በትምህርት ጥራቱ እውቅ የሆነውና ብዙ ተማሪዎች ሊቀላቀሉት የሚፈልጉት የሀርቫርድ ዩኒቨርስቲ በዓመት በአማካኝ 7 ሺህ ያህል ዓለም አቀፍ ተማሪዎችን ይቀበላል፡፡

ለጥቆማ 👉 @atc_newsbot
➡️ https://www.tg-me.com/atc_news

ለከፍተኛ ትምህርት የመውጫ ፈተና የፈተና ፕሮቶኮል አዘጋጅቶ ዩኒቨርስቲዎችና ተፈታኞች እንዲያውቁት ማድረጉን የትምህርት ሚኒስቴር አስታወቀ።

የተከለከሉ ነገሮችን ይዘው ወደ ፈተና ማዕከላት የመጡ ተፈታኖች ከፈተና እንዲሰናበቱ መድረጉም ተመላክቷል።

የከፍተኛ ትምህርት ዘርፍ የአካዳሚክ ጉዳዮች መሪ ስራ አስፈጻሚ ኤባ ሚጀና (ዶ/ር) እንደገለጹት ከሰኔ 2/ 2017 ዓ.ም. ጀምሮ በሁሉም ዩኒቨርስቲዎች እየተሰጠ ላለው የመውጫ ፈተና የሚያገለግል የፈተና ፕሮቶኮል ተዘጋጅቶ ተፈታኞችና ፈታኞች እንዲያውቁት ተደርጓል።

በፈተና ፕሮቶኮል ሰነዱ በመውጫ ፈተና የተከለከሉ ነገሮችን በሰነድ በማዘጋጀት እያንዳንዱ ተፈታኝ ምን ዲሲፕሊን መጠበቅ እንዳለበት ፣ በምን አግባብ መስራት እንዳለበትና ጥፋት ከተገኘበት በምን አግባብ እንደሚጠየቅ በዝርዝር የተመላከተበት መሆኑም ዶክተር ኤባ ገልጸዋል።

የፈተናውን ጥራትና ደህንነት ማስጠበቅ አስፈላጊ በመሆኑም በየተቋማቱ ከፍተኛ ጥንቃቄዎች መደረጋቸውን ፈተናውንም ከሌሎች ከፍተኛ ትምህርት ተቋማት ተመድበው የመጡ ፈታኞች ተማሪዎችን እንዲፈትኑ መደረጉንም የአካዳሚክ መሪ ስራ አስፈጻሚው ጠቁመዋል፡፡

የፈተና ክፍሎችን ደህንነት ለማረጋገጥም ተፈታኞች ወደ መፈተኛ ማዕከላት ከመግባታቸው አስቀድሞ የፈተና ክፍሎች ደህንነት ተጣርቶ እና ተረጋግጦ እየተፈጸመ እንደሚገኝና በዩኒቨርስቲ ፕሬዚዳንቶች የሚመራ ግብረ ሀይል ተቋቁሞ በቅርብ ክትትል እንደሚያደርግ ተናግረዋል።

በሌላ በኩል ከግንቦት 25 እስከ ግንቦት 30/2017 በተሰጠው ሬሚዲያል ፈተና የተከለከሉ ነገሮችን ይዘው የመጡ የተወሱ ተፈታኖች የፈተናውን ድህንነት ለማስጠበቅ ሲባል ከፈተና እንዲሰናበቱ መደረጉን ዶክተር ኤባ ገልጸዋል፡፡

በሬሚዲያል 76,790 ተማሪዎች ለፈተና መቀመጣቸውን፣ ከሰኔ 2 ቀን 2017 ጀምሮ እየተሰጠ ባለው የዩኒቨርስቲ መውጫ ፈተና ደግሞ 190,787 ተማሪዎች ፈተና በመውሰድ ላይ እንደሚገኙ ኃላፊው ጨምረው አመላክተዋል።


ለጥቆማ 👉 @atc_newsbot
➡️ https://www.tg-me.com/atc_news

አስር የመንግሥት ዩኒቨርሲቲዎች ምክትል ፕሬዝዳንቶች እና የምርምር ዳይሬክተሮች በዩናይትድ ስቴትስ ጉብኝት በማድረግ ላይ ይገኛሉ።

የትምህርት ሚኒስቴር ከፍተኛ አመራሮች እና የአስር ዩኒቨርሲቲዎች ኃላፊዎች በዩናይትድ ስቴትስ የውጭ ጉዳይ መስሪያ ቤት በተዘጋጀ የዩኒቨርሲቲ ምርምር አስተዳደር ዓለም አቀፍ የጎብኚዎች የአመራር ፕሮግራም ላይ እየተሳተፉ መሆናቸው ታውቋል።

የአዲስ አበባ ዩኒቨርሲቲ፣ አዲስ አበባ ሳይንስና ቴክኖሎጂ ዩኒቨርሲቲ፣ አዳማ ሳይንስና ቴክኖሎጂ ዩኒቨርሲቲ፣ አርባ ምንጭ ዩኒቨርሲቲ፣ ባህር ዳር ዩኒቨርሲቲ፣ ሀዋሳ ዩኒቨርሲቲ፣ ጅማ ዩኒቨርሲቲ፣ ሐረማያ ዩኒቨርሲቲ፣ መቐለ ዩኒቨርሲቲ እና ጎንደር ዩኒቨርሲቲ ተወካዮች እየተሳተፉ ነው።

ለሁለት ሳምንት በሚቆየው ጉብኝት፤ ተሳታፊዎች የዩናይትድ ስቴትስ ዩኒቨርሲቲ ምርምር አስተዳደር ጽ/ቤቶችን የተለያዩ ዘመናዊ አሰራሮች እየተመለከቱ መሆናቸው ተገልጿል።

ለጥቆማ 👉 @atc_newsbot
➡️ https://www.tg-me.com/atc_news

የ53 ዓመቱ የአራት ልጆች አባት የ8ኛ ክፍል ፈተናን እየወሰዱ መሆኑ ተነገረ

የአራት ልጆች አባት የሆኑት የ53 ዓመቱ ተማሪ ማሪዬ እንዳወቅ የ8ኛ ክፍል ፈተናን በመውሰድ ላይ እንደሚገኙ የቤኒሻንጉል ጉሙዝ ክልል ትምህርት ቢሮ አስታውቋል።

የ2017 ዓ.ም ትምህርት ዘመን የ8ኛ ክፍል ክልላዊ እና ከተማ አቀፍ ፈተና በትላንትናው ዕለት መሰጠት የጀመረ ሲሆን፤ ፈተናው ለሁለት ቀናት በተለያዩ የሀገሪቱ ክፍሎች ይሰጣል።
‎
ከእነዚህም ፈተናውን እየሰጡ ከሚገኙ ክልሎች መካከል የቤኒሻንጉል ጉሙዝ ክልል አንዱ ሲሆን፤ በክልሉ የ8ኛ ክፍል ፈተና በ308 የመፈተኛ ጣቢያዎች ለ22 ሺሕ 32 ተማሪዎች በመሰጠት ላይ ይገኛል፡፡

ይህንንም ተከትሎ የ53 ዓመቱ ተማሪ ማሪዬ እንዳወቅ ፈተናውን እየወሰዱ ‎እንደሚገኙ የክልሉ ትምህርት ቢሮ የኮሙኒኬሽን ዳይሬክተር አ/ቶ ምትኩ ዘነበ ለአሐዱ የገለጹ ሲሆን፤ ፈተናውን በአሶሳ ከተማ አስተዳደር በሠላም በር አንደኛና መካከለኛ ደረጃ ትምህርት ቤት በመውሰደድ ላይ እንደሚገኙም ተናግረዋል።

ትምህርቱን በማታ መርሃግብር ሲከታተሉ መቆየታቸውን የሚያነሱት ዳይሬክተሩ፤ እየወሰዱ ያለው ፈተና ትምህርትን ዕድሜን እንደማይገድበው ማሳያ መሆኑን አንስተዋል።
‎
ተማሪ ‎ማሪዬ እንዳወቅ ፈተናውንም እንደሚያልፉ መናገራቸውን የተናገሩት ዳይሬክተሩ፤ "2ኛ ደረጃ ትምህርታቸውንም የመቀጠል ፍላጎት አላቸው" ብለዋል።
‎
‎የአራት ልጆች አባት የሆኑት ማሪዬ የሁለተኛ ደረጃ ትምህርታቸው በማጠናቀቅ በሂሳብ አስተዳደር አሊያም የሕክምና ሙያን መማር እቅዳቸው መሆኑን ገልጸዋል።


ለጥቆማ 👉 @atc_newsbot
➡️ https://www.tg-me.com/atc_news