‏مش شرط أكون زعلان بسبب حد !! ممكن أكون زعلان على نفسي ، على كل حاجه عاوزها ومبتحصلش ، على كل وقت بحس فيه اني لوحدي ومحدش حاسس بيا ، على مواقف كتير محطوط فيها ومش بمزاجي ، على الخذلان اللي بحسه من أقرب الناس ليا ، على حياتي اللي متلغبطه ، ممكن أكون زعلان على نفسي عادي !

‏الغالي مبيفضلش غالي ولا حاجه تصرفات اللي قدامنا قادره تغير مشاعرنا تجاهه في لحظه ويتحول من شخص مفيش اغلى منه لشخص عادي ملهوش اي مكان جوانا دا ممكن يتحول كل الحب اللي كنا شيلينه لي لكره برضو عادي كل واحد بيختار مكانته بٱيده يا جماعه والله

‏احسن حاجة ممكن تقدمها للي قدامك هي الوضوح، انك ماتخليهوش يحط احتمالات ويلف حوالين نفسه عشان يفهمك، الناس الواضحة مريحة وخفيفة ع القلب دايمًا حتى ولو كان وضوحهم بيأذي أحياناً.

‏مهما أقول كلام يزعّل وأنا زعلان أو متعصب وآخُد قرارات قاسية ، عمري م قدرت أنفذها وبهدى ، عمري م كنت شخص شديد وصعب ف التفاهم و زعلي كله بيكون نابع من الحُب والعشم اللي موديني ورا الشمس ..

‏فكرة إنك تحاول تتخطى حاجة جواك مسببالك حزن جامد أو تعباك نفسيا حاجة مش سهلة خالص الحقيقة إن الواحد بيعافر وقت طويل وممكن أوي يلاقي نفسه لسه واقف مكانه زي ماهو والمجهود والمعافرة دي كلها كانت على الفاضي فحقيقي ربنا يعين كل واحد بيحاول يتجاوز مرحلة معينه كانت سبب تدميره ...

‏مش قادر استوعب ازاى الواحد نضجه بيزيد بالسرعه دى وفجأه نظرته ممكن تتغير من ناحيه كل حاجه حرفيا ويكتشف ان معظم قراراته وتفكيره كانت كلها غلط وقلبه يتغير من ناحية ناس كتير ١٨٠ درجه ويبقى مش طايق سيرتهم حتى وحقيقى سبحان الى بينور بصيره الواحد وبيقلب القلوب والله.

‏بتحس بغلاوتك وهي بتقل في قلب غيرك حتى لو أفعاله معاك متغيرتش وبتحس لما حد يخبي عليك حاجة حتى لو بيحكيلك طول الوقت و باللي عاوز يكلمك حتى لو مفيش بينكم كلام بس في شئ جواك بينبهك لحقيقة الدنيا حواليك و بعدين بيختفي تاني وبتact normal وتحاول تتجاهل الاحساس دا بس فالاخر بيطلع صح.

‏بقيت آخر واحد يفكر يرضي حد، أو يبهر حد، أو يصحح فكرة حد واخدها عنه، أنا عايز أعيش الباقي من عمري رايق، تحبني أو تكرهني مبقاش فارقلي.

أنا عايزك تبطّل الاسطوانة بتاعت دا بيحبّني ومُستحيل يعمل فيا كدا، ودا بيخاف عليّا ومش هيأذيني، ودا سندي ودا ضهري ودا مش عارف إيه! فلو إنتَ جديد معانا ومش متابع فخليني أقول لك إن 100% من خوازيق الحياة ما بتجيش غير من أقرب الناس ليك .. وكُل اللي راهنت عليه وقولت إنّه مُستحيل يأذيك فهو دا بقى بالتحديد اللي هيأذيك، فاِصحى كدا وبطّل سذاجة.

اوحش حاجة لما تبقى رايح على حد بتحبه تشاركه حاجة بتحبها فـ تلاقيه مش مهتم ب نفس القدر الي كنت متوقعه ويكسر فرحتك بـ طريقة لا يمكن تتوقعها .

‏أظن مفيش ألطف من ان حد يختارك كل يوم، يبقى قدامه اكتر من مليون بني ادم يوميًا ومع ذلك يقع في حبك كل اول يوم ويختارك انت دونًا عن الناس يكلمك ويتطمن عليك وييشيل همك ودايمًا يدور عليك..حد يكون كامل بيك مش لانه ناقص بس لان وجودك بيخلي روحه تحس بأمان وسلام.

‏من وقت للتاني بنحتاج اننا نحس ان احنا بنتحب حتى واحنا مش قادرين نحب نفسنا ولا نحب حد، بنتحب من غير ما نعطي حاجة، بنتحب واحنا قاعدين منكوشين ونكديين ومكشرين ومملين.

‏هيفضل من أجمل علامات الحب علي الإطلاق بالنسبالي إن شخص يكون بيفكر فيك و هو مشغول جدا بيسحب نفسه ف وقت الزحمة علشان يكلمك بيخطف الفرصة ف عز السحلة و ممكن يكركب مواعيده عشان يشوفك بتوحشه و هو حواليه كل حبايبه يحس انه محتاجلك حتي لو هو بيعرف يعمل كل حاجه لنفسه افعال ليها معاني كبيرة

‏أناحاسس إني مش قادر أواجه أكتر من كده،تعبت م الجري م حاجات،والجري ورا حاجات،عايز أصرخ وأعيط شوية وبعدين أرجع تاني لمعركة اللي مابتنتهيش أنا حاسس إني متورط،حدحط فإيدي سيف وقالي حارب ونسي يسألني هوأنا بعرف أصلًا ولا لأ؟أنا خايف موصلش،وخايف أوصل أكتشف إن مش ده أصلًا اللي كنت عايزه

من يمر صدفه فليدعو لبابا بالرحمه و المغفره.

‏كل واحد فينا بلا اِستثناء عنده وجع مدفون جواه؛ اللي عاش فترة صعبة،واللي عنده ذكرى موقفة حياته، واللي صعبت عليه نفسه، واللي حب وما اتحبش، واللي اتمنى حلم ومطالوش، حاجات كتير ممكن نمر بيها توقف حياتنا، بس على أد ما هتتوجع على أد ما هتتعلم، وخدها قاعدة "مفيش شخص قوي بدون ماضي قاسي"

انا انسانه لما اتعصب بعيط، ولما اشوف حد بيعيط بعيط معاه، ولما اتعب بعيط، ولما حد يزعقلي بعيط، ولما حد يزعلني بعيط، ولما ازعل حد بعيط برضوا .

‏أنا بكبر بطريقة مخفية جداً ، بقلل عدد صحابي ، بواجه حزني بكل هدوء ، بتجاهل ولا كأني شايف حاجه ، بتماسك علي قد ما أقدر ، بشوف كل حاجة حواليا بوضوح وبفضل ساكت ، بطلت انبهر بأي شخص أو أي كلام حلو ، و مبقتش منتظر حاجة من أي حد ، اللي عايز يعمل حاجة يعملها مبقتش فارقة والله !

‏- أحسن حاجة ممكن تعملها أنك تحافظ على مسافة كافية بينك وبين الناس عشان تفضل تشوفهم حلوين، لأن الناس من بعيد دايما أحلى.