ام البنين انطت درس للقيم
ابعفتهة للعباس سوت علم
وشلون دكت ساس ..وشطلعت عباس
#################################
لبوة عرب وشخلفت ضرغام يتبع ضرغام
لحسين سوتهم حزم والله ونعم بت حزام
ضمتهم اليوم العسر وشلون ضمت مضمام
شي حرس ضلت للخيم شي ضلت اتصد اسهام
اربع ولد ماخلفت للكبر
خلفتهم ايطفون عين الشمر
لحسين شتلت ياس..وشطلعت عباس
#################################
تحجيلهم جانت قصص حيدر شلون ايحارب
بالمعركة يسلب ركب بس سيف ابد ماسالب
وتكلهم بعازة بطل هاية المسيرة ايواكب
يمة الزلم ماتنعرف اله برفيف الشارب
جانت تسولف حيدرة ومعركة
حتى الشعور الحيدري تحركة
ماتحجي مثل الناس..وشطلعت عباس
#################################
وعباس من بين اخوتة متفردة ابتربيتة
من زغرة حماي الخدر والكافل امسميتة
اتسولفلة عالطف اشكثر متحمس امخليتة
ومن يلعب اتحطلة العلم ويهوس بساريتة
وتكلة يمة ابصوت عالي ارتجز
والموتة خلهة من ارتجازك تفز
ولتخلي سالم راس..وشطلعت عباس
#################################
كلتلة كدام اخوتك لتكبر اسمك زغر
كللهة خادم مو اخو كلتلة عيد وكرر
كللهة وارض المعركة كلتلة لم وطشر
كللهة هم اوكف حرس كلتلة بس متوزر
كلتلة عالخيمة اريدك حرس
وبالحومة يمك مايضل اي نفس
واتكّطع الانفاس..وشطلعت عباس
#################################
كلتلة عاين للكمر ياابالفضل هذا انتة
بالمعركة دورك ضوة من يحل دور السكتة
ماراح تعب اطلوكتك للحومة جبت الفلتة
شلتك على اجتافي اشكر بس راسي انتة الشلتة
الوالد علي وشلون خلف ولد
ومايطلع امن الاسد الا الاسد
ماخب بيك احساس..وشطلعت عباس
#################################
ذوالفقار الزيدي

يم البنين..حاضر عزاج ابدمعتج سجليني
يم البنين..اعرف كريمة بحاجة مترديني
################################
خليني اذوب ابعالمج..حطيني خيط ابجرغدج..اه يالوفية
ابكد رحمتج بابج كبر..مديلي خيط من النضر..ويصد علية
يا اوسع ابواب النعم..خليني خادم للخدم..محيي العزية
خليني افتحلج عزة..اعلة النساء البارزة..بزينب سبية
يم البنين..قابل قسمتج وين متخليني
يم البنين..اعرف كريمة وانتي متريديني
#################################
خليني اطيبلج جرح..راس الحسين اعلة الرمح..ينضر خواتة
لمتون متورمة وزك..هذا اليسب ذاك اليطك..بمدللاتة
تحبين ليسولف هذن..يحجيلج اجروح الضعن..عن نايباتة
وعيونج اعليهن تهل..اتصيحين ياجرح الهزل..يالراكباتة
يم البنين..ودموعج التاخذني وتوديني
يم البنين ..اعرف كريمة وانتي مترديني
#################################
مديت جفي بطلبتي..ثكلان من هم حاجتي..مولاتي نضرة
اغصان حيلي مصوفرة..روحي اعلة همهة مخوصرة..سويهة خضرة
ياباب حاجات البشر..امنين ماصدلج نضر..يلكاج حضرة
يالمختزل عمرج هلة..والشهدت الذن كربلة..
اشمديتي سفرة
يام البنين..طايح دخيلج ونتي متفشليني
يام البنين اعرف كريمة وانتي مترديني
#################################
الزهرة كد ماحبتج..باب الحوائج خلتج..حلالة اثكال
شدادة للمالة ضهر..مديتي للجايع سفر..فيضتي لدلال
للخدمة توفيقج ردت..العاشور دمعاتج صرت..متشكل اشكال
للونة شديت العزم..شديلي حيلي اعلة اللطم..خل همي ينزال
يام البنين..بدموعي اشارك دمعتج وفقيني
يام البنين..اعرف كريمة ابحاجة مترديني
#################################
يالمابقالج كل ولد..وضحيتي لوعندج بعد..لعيون الحسين
يالهالة عيونج دمة..ابنية خجل من فاطمة..الطبت الدواوين
ضحيتي عين وية السهم..وياهة جود وكلهة دم..
ضحيتي جفين
كل هذا وكثر رايدة..هذا الجرة وذا السدة..وكثر تريدين
يام البنين..العالم احساسج رايد توصليني
يام البنين..اعرف كريمة ابحاجة مترديني
#################################
ذوالفقار الزيدي

يلمو ضرتي وصرتي انفاسي
اتقبلين افديلج عباسي
بين الناس ارد ارفع راسي
يافاطمة ..يافاطمة
#################################
فاطمة انتي..وفاطمة انة..والفرق يالزهرة عصمة
بت محمد..انتي كوثر..امنين ما الكاج نعمة
ياحمامت..سلم حيدر..حقي دورج من اعضمة
ما اصبح ..اله اذكرج..ينشهك اسمج واشمة
تسبيحة كلبي ابمصباحة
حتى اليوم اكضي مرتاحة
من اذكر اسمج بحساسي
يافاطمة..يافاطمة
#################################
هذا حبي ..بلا نهاية..وعمري لولادج نذرتة
حسين روحي..عمري زينب..الحسن ما وصف معزتة
كحلي عيني..اتقبليهة..ابو فاظل يكفل اختة
تريد عينة..تريد جفة..زينب اشرادت قبلتة
اعرف طيبة ومترديني
خل احسب وافيت ابديني
شاتلتة الخدمتكم ياسي
يافاطمة ..يافاطمة
#################################
علميتة..من الطفولة.. الخوية متمر ابلسانة
يحني راسة..يثني رجلة..خاطر اتضل المكانة
ياهي امة ..وياهي امهم..ياهي انتي وياهي انة
كتلة يمة..صير خادم..حتى احافظ عالامانة
خادم لولادج خليتة
وانة الخدمتهم ربيتة
وهاي الخدمة تضل نوماسي
يافاطمة ..يافاطمة
#################################
من تعلم..يحجي كتلة..كول فاطم كال عمري
كتلة زينب..كلي كافل..كتلة خدرك كال خدري
كتلة يبني..ارد انذرك ..حتى اوافي كال نذري
كتلة وجهي ..كال ابيضة..كتلة توعد كال ابشري
توة يسولف ذن افعالة
للخوة مفصل تفصالة
كتلة اخوانك رد ماناسي
يافاطمة ..يافاطمة
#################################
احزام اخيه..عفتة للطف..من يضل بغير ناصر
يكفل اختة ..ايصير حارس..للخيم من النواضر
وانة اعرفة ..بالمعارك..اختصاصة يحز مناحر
عاشر الطف..هذا وحدة..اوحدة العباس عاشر
ياخذ عاشر وحدة بزودة
ماخذ عالطف حيل زنودة
ابميدان الطف بيرغ راسي
يافاطمة يافاطمة
#################################
ذوالفقار الزيدي

طبت شمس مجلس ضلام
وكفت حلال اعلة الحرام

رغم الدواهي الجرت اعليهة
كلبت حدرهة براس عاليهة
والقت على الدنيا السلام
################################
اعله طول الدرب جانت تحبك الخطبة
ابن ميسونة خاطر يحترك كلبة
علية دخلت ابيه وتيهت دربه
وكد كيدك رساله وهدمت حربة

كلتلة كد كيدك يزيد
هية العبيد اتضل عبيد

هزت يزيد وشامة والبيهة
كلبت حدرهة براس عاليهة

والقت على الدنياالسلام
#################################

دك اطبوله بس دكت عليه ثايه
عصابتهة جانت بسملة او آيه
راية هيبة زينب ضيعت رايه
بديهية جواب احجاية بحجاية

والما رئيت الا جميل
عيشت امير الذل ذليل

قادت الثورة بكل معانيهة
كلبت حدرهة براس عاليهة

والقت على الدنيا السلام
#################################
مكسورة ضهر وامفاركة اليسوة
بس طبت شموخ امعاند التجوة
حجت علم الاصول وشرحت الفحوة
وسكت علم الرجال بمنطق النسوة

بان الاصل عن اللسيق
ياهو الثقة وياهو الطليق

بينت مواضيهم محاجيهة
كلبت حدرهة براس عاليهة

والقت على الدنيا السلام
#################################
لبن لواچة اجبود الشرف كالت
لتضن زينب ابثكل الحمل مالت
ترة قربان لله ادمانه من سالت
وانه استصغرك بس دنيتي الحالت

وتشهد اشياخك عليك
ما عاشت انشلت اديك

والفرحة صارت عار تاليهة
كلبت حدرهة براس عاليه

والقت على الدنيا السلام
#################################

اني استحقرك واستكثر بذمك
ومثل حركت اخيامي ارد احرك بدمك
تنكت بالثناية اتريد اذل يمك
مايجرالك وضل عايش بغمك

كل ضربة الك محسوبه ثار
وكلش قريب الانتصار

وانتصرت اعلة الكال يسبيهة
كلبت حدرهة براس عاليهة

والقت على الدنيا السلام
#################################
ذوالفقار الزيدي

مسيرة السباية
مأثر وحكاية
بدايه النهاية
مأسي ومواجع
#################################

مسيرت..مواجع ..ومواقف حزينة
حكايت..جوارح ..اميرت ضعينة


شيخت احجاب وصفت فوك الهزل
هيه حبل الله ويشد جفه الحبل
وعين حارت خاف لا واكع طفل .. معانات

وريثت ام ابيهة
سترهة جف اديهة
غربه التصد عليهة

مأسي ومواجع
#################################
حمية ..ورجولة .. وامامة وكفالة
بخواته..تحير.. وريث الرساله


بين جفة وعمتة جانت جامعة
وخايف ايميل وتطيح الواقعة
وحيلة رايح بين عمتة ومدمعة..جراحات

هد السمه بنحيبة
جي عمته غريبه
وجه الصبح مشيبة

مأسي ومواجع
#################################

العشاير .. نساهة ..اجوهة وخذوهة
واويلي ..علة زينب ..تتاني اليجوهة

ادير زينب ضلت ابعين الحزن
تدري ميفزعولهة وكامت تون
ومايجونج ردت اعليه اللسن..حرامات

ضلت تتاني اهلهة
ولا هاشمي الوصلهة
وهنا كثر حملهة

مأسي ومواجع
#################################

مناحر ..غوالي..تباري الحراير
نضرهن ..لهلهن ..يكّسر الخواطر


اه يالضيم السدة بهذا الضعن
بين سوك ومجلس وشامت مشن
ومن بلاد البلدة كامن ينهدن..الاميرات


اه ياجرح سبيهن
اه ياحرك عبيهن
اه ياحبل اديهن

مأسي ومواجع
#################################

نهايت ..طفوله ..رقيه وفكدهة
متدري ..اعله ابوهة ..النواضر تسدهة

ابدخلت الديوان قصتهة انتهت
وماتت اعلة احسين جن موتت بخت
اوية الطفولة اتحاللت وتواهبت.. الورد مات

اه ياعظم حزنهة
اه ياطبك جفنهة
وراس الابو بحضنهة

مأسي ومواجع

#################################
ذوالفقار الزيدي

حرك الخيام ضيع اسنيني
يمك اجيت شيبت عيني
#################################

حركت اخيامي النار..ونسوة فرت وزغار
دايسه الجمر الحار..من اجيت

كالن المكصد وين..كلت الوذن بحسين
ماخذك جف البين..مادريت

جيت افزعك للخيام
وشفته مذبوح الغرام
يعني ضيعنه السلام ..ياحسين

حال الممات بينك وبيني
يمك اجيت شيبت عيني
#################################

جيتك اكلك عالحال..وعن حمل كلبي المال
شحجي للغادي اوصال..عالتراب

شحجي وياك اجروح..وانته نحرك مذبوح
امسلبك الحافر روح.. ياعذاب

شرد اكول اتحيريت
ماحجيت وسولفيت
اتكربت ليك اوبجيت..ياحسين

صار الكلام نبرت اونيني
يمك اجيت شيبت عيني
#################################

بيا امر احجي وياك .. وانته مو حيلك ذاك
اهنا كسر طعنه اهناك..شرد اكول

الريح بنفاسك ضاك..صدرك وضهرة اطباك
مايصح بيك اشباك ..من الخيول

رت اشبكنك اريد
بس وكف عرضة الوريد
ياجرح متجمعة ايد..ياحسين

شبكك محال حاجي جفيني
يمك اجيت شيبت عيني
#################################

ارقيه سالتني اعليك..وانته سابل جفيك
صعبةاكلهة اموذريك .. صعبه حيل

اعليك سألتني اهواي..اتريدك امزعلة الماي
العمه مارد وياي.. بيهة ويل

طفلة ماتحمل وداع
جلمت الرايح ضياع
اويه العمر هذا انقطاع ..ياحسين

واشلون اكول رايح احسيني
يمك اجيت شيبت عيني
#################################

اعليك موبس عطشان..كلشي بالطف ذبلان
الرايح اترف انسان..اشها لضياع

حضرو لينه النوك..متاني دخلتنه السوك
حكة وانته المبيوك ..بالوداع

حضرو هزلت ضمير
ولليسر صار المسير
وماكو لعيالك مجير ..ياحسين

سمعني صوت لا تودعيني
يمك اجيت شيبت عيني
#################################
ذوالفقار الزيدي

سار الضعن ..ومن يم مصارعكم فتت
سارالضعن.. وتحاللت وتواهبت

اينزلني من ضهرالهزل
تمنيت منعدكم عدل..سار الضعن
#################################
يالشيبو اهروش الكلب..ياماي عيني الضل يصب
يالنايمين اعله الترب..نوم المشيب ابعيني

يخواني موقصت صبر..بس هيه سالوفت جمر
بيتامي من عدكم امر..قصد الشمر يجويني

اجيناكم لكينة انحور مو ملكه
ولا سالم صدر ننزله ونشبكه

بيا عين اصد..كلكم توجعون الكلب
بيا عين اصد..مشهد مناحركم صعب

عن زينب ايشيل الحمل
تمنيت منعدكم عدل..سار الضعن
#################################
يالما سلم بيكم نحر..يالبيكم من الخيل اثر
يالمتو حركة اعلة النهر ..جي ماقبل يوصلني

شدونه جن شبت حطب..ياخوتي وادم مو عرب
يالبلعمد راسةانضرب.. موش انته لتكفلني

يبو شوارب ترف من يجبل اعليه
حبلهم يانفل ماعده علويه

يابا الفضل ..عبرت سوالفنه العطش
يابا الفضل.. وجه السمه اعلينه انخمش

صار العطش كلش سهل
تمنيت منعدكم عدل ..سار الضعن
#################################
ادري العتب ماينسمح..ايحجيني وياكم جرح
يالروسكم فوك الرمح..شاهد درب تبرالي

ياعمة يا اكبر الم..فك عينك وشوف الحرم
ادري الرمح جبدك جسم.. بس عايش انته ابالي

يا اكبر جرح بحسين حط روحة
يسرو عمتك وغصبوهة عالروحة

يكبر جرح.. دار الوكت دور الرحة
يكبر جرح.. تدريني شيخت مستحة

بجفوفي من شدوحبل
تمنيت منعدكم عدل..سار الضعن
#################################

بيناتكم يافع عمر..مالحك ايشوف الكبر
غورب كبل وكت العصر..مالحك اتعرسولة

بي ريحة ادلال الحسن..بي كمرة ضوت للضعن
بعمتك وسف دار الزمن .. ياهلي الخبر وصلوله

يبن رملت بخت يالمنصعب تنداس
يزغير لجن بي شارة العباس

وصلو الخبر ..كلوله زينب عمتك
وصلو الخبر..دفنتهة جاسم حنتك

جاسم ملايكلك كتل
اتمنيت منعدكم عدل..سار الضعن
#################################

يحسين ياخوة صدك..شاء القدر ان نفترك
يالسدت اعيونه ابحرك.. بين الكلب واخيامي

عالتل صعدت وناشدت..كمت وطحت كمت وطحت
وادعتك انه امنيست.. مترد بعد يالضامي

دريت اشصار يالمارد للمخيم
اختك حشمت ماوحد اتحشم

نار الخيم..طلعتنة للهيمه ابرعب
نار الخيم.. خلتنه بحلوك الغرب

ترضاهة ويه الغربة اضل
تمنيت منعدكم عدل..سار الضعن
#################################
ذوالفقار الزيدي

ثورة شرف بعبايتج ..معكودة يازينب
راية الكافل رايتج ..منصورة يازينب
ماعطلاج حرك الخيم
للانتصار شلتي العلم
#################################

بت هاشم ..ياشيخة ..وجلماتج
جانت رسل حرب

واخيامج .. حركوهة..واعلامج
عيشهم برعب

مكسورة ..ومقهورة ..بس حزنج
مايعبر الكلب

ضميتي..دمعاتج ..كابرتي
رغم الضرف الصعب

من صارت اخيامج جمر..كابرتي يازينب
من صبرج انذل الشمر.. ياعفه يازينب

ماحشموج انتي الحشم
للانتصار شلتي العلم
#################################

بن جوشن..بعيونه..بالحيرة
لمكابرج يصد

كلالج..خوانج ..ذبحوهم
مابيهم اليرد

كلتيله ..قرباني..الوجه الله
حر جاوب ابرد

ضل صافن ..من ردج ..متفاجئ
مايعرف اشيرد

محروكة جاوبتي ابرد ..ياعجبة يازينب
كتيله عزبنه ابورد.. رد الله يازينب

ابهذا الجواب ذاك انصدم
للانتصار شلتي العلم
#################################
اتحزمتي .. وشديتي ..العصابه
ياشدت البخت

يا آيت ..حك الله.. وبثارج
ايد الله طالبت

علوية ..اطلبيهم ..دم غيرة
وثورتكم ابتدت

ياجمرت ..خوانج.. والسانج
بي منبرج ثبت

شديتي ثار بمعصبج ..ثار الله يازينب
ذلت اميه بمطلبج .. لبوة اسد زينب

ثار الاله بيج انفهم
للانتصار شلتي العلم
#################################
صار اسود ..مي عينج ..لحسينج
ماشمت العدة

ضل شيبة ..اعله اجفونج .. ماطايح
جيف انتي قائدة

ياالصرتي..العز هاشم ..سالوفت
ترنيمت الفدة

عالناكه ..بس هيبه.. بضعونج
جن حيدر الحدة

جن حيدر ايقود الضعن ..ياهيبة يازينب
عفة وحجاب اتجمعن ..صرتي انتي يازينب

انتي الوجود همة العدم
للانتصار شلتي العلم
#################################

جف ايدج .. من موسى ..متوارث
اضرب بها الحجر

ومن عيسى ..واعجازة ..بي خصلة
البي يرجع البصر

ومن صالح ..بالناكة.. تتوارد
ارجوزة القدر

ابراهيم ..وبيت الله ..بس وسفة
اسماعيلج انحر

اسماعيلج انحز منحرة ..ياوسفة يازينب
بس انتي عندج مقدرة ..اتثأريلة يازينب

عن الرماح وعن كل سهم
للانتصار شلتي العلم
#################################
ذوالفقار الزيدي

كافي عذاب من الحياة جم جرح كلبج حمل
كافي حنين وانتحاب غمضي عينج للاجل
شيبت عينج والدمع ماعود الراح
#################################
استحل عمرج ..يعمة الهم ..رفيق من الطفولة
القرة ايامج ..لكة المقتل ..حجي اجروحج يكولة
شلج ابدنية التسميج السبية
شلج ابناس اليحسبوج اجنبية
يالخذت عمرج واخوج الغاضرية
يالكلشي راح من اديج والبقة وياج الدمع
عشتي ابمحال ويه الجروح من الضلع حد الضلع
شيبت عينج والدمع ماعود الراح
#################################
جرح كلبي ..معانتج..الشفتهة بعيني هايه
العدة التمت..على اخيامج..واهل بيتج ضحاية
انتي ميتت طف لجن عشتي ابعجيبة
الخدر ابنج وانتي صرتي ام المصيبة
شمذكر الطف الكة بي زينب غريبة
الكه الخيام والكه نار والكه بذيالج حرك
والكه النساء والدخان والكه كلبج مختنك
شيبت عينج والدمع ماعود الراح
#################################
السواد اصبح..رمز كلشي..والابيض ضل مشيبح
الوكت يمشي ..لجن باقي ..ونينج وي نحيبج
البيج ماصار ابمرة من الهواشم
السبعة والخمسين مو مالت شتايم
يالتركتي ابكربلة اخوانج طلاسم
ياعمة اموت ..من اشوف ..حالج الفوك الهزل
شيخت عفاف..صعبة حيل ..جفج ايشدة الحبل
شيبت عينج والدمع ماعود الراح
#################################
جروح الطف ..اذا هانت ..اشيهونهة المسيرة
عيون الكل..شماتة اتصد..علة اشيوخ العشيرة
عمة والمثلج بعد شلة ابحياتة
صار جلمه اه بحلوك الشماتة
حسين مات اويسريناهن خواتة
عمة الكلام ..نيته سيف..ويذبح ابكلبج عمد
يتشمتون..راح اخوج..وذبحيناهة الولد
شيبت عينج والدمع ماعود الراح
#################################
على الكوفة..خلص عمرج..ودخلتي عليهة ميتة
الكلف طبعة..اذا يرحل..عليه اتموت اخيتة
اخوتج من راحو ورحتي اسيرة
متي بس الزمن ما ميت ضميرة
ماحسب يازينب احساب الامير
للكوفه اه ..دخلوج..وجان شامج ينتظر
ضيعتي حيل..وللمسير ..ماخلص حيل الشمر
شيبت عينج والدمع ماعود الراح
#################################
ذوالفقار الزيدي

زينب تعالي الحضن اخوج
وارتاحي من العذبوج
الترسو حياتج كلهة شيب
وامن المخيم طلعوج
#################################
تعالي
..والموت بس غمضت جفن..مو كافي اهات ودمع
جبيتهة الام وحزن ..من الضلع حد الضلع
تعالي
..ماشفتي راحة من الزغر ..دنياج مامرهة الضوة
تشمين دخان الكلب.. ماجن تشمين الهوة
تعالي ..اليالي ..خذت حيل الورد
حياتج ..مماتج..يميته امن البعد
انتظرج بكبرج تعاي
جايب اخوج وبيدة ماي
عوفيهم الماتو ضمير
وامن المخيم طلعوج
#################################
تعالي
يالسارجّه مهر الذبح..يااخر اموادع هلي
يالوكفتج عالتل جرح.. ميت كمت من صحتي الي
تعالي
ياليهةواكف منذبح ..وطحت او كفتلهة اوطحت
ومامتت من ذبح الشمر..من ضلتج عالتل متت
وكفتج..وغربتج..اشد من الذبح
اذبحتني..اكتلتني ..اعله تل واكف صرح
مرت عليه الفزعة صوت
وجابتلي ويه الطيحة موت
وخيولهم هجمت عليج
ومن المخيم طلعوج
#################################
تعالي
يالحركو اعليهة الخيم..والهسة ضل بيهة الحرك
يالدنيتج صارت جمر ..شي للجم شي للسحك
تعالي
يالضيعيتي اشجم حلم..واشجم طفل شارد رعب
يالما الج بالطف اخو ..ياحيرة ياموقف صعب
يحيرة ..وضميرة ..الوكت مات اوأفل
انحنيتي..وبقيتي..غريبة بلا اهل
يالداخله الطف ابباء
وضليتي بس كاع وسماء
وبس العدة المتحاوطيج
ومن المخيم طلعوج
#################################

تعالي
يالحته سلبو محملج..بدلوهن وجابو هزل
يالراكبة اعليهن الم..واعلة المتن راكب حمل
تعالي
يالشامتج حادي الضعن..يموسطت روس اخوتج
يالشيبو اسنينج ضرب..يل لا مثيل البلوتج
يجرحي..يذبحي..يناري الماطفت
يغصتي..يقصتي..الخزينة المنتهت
يالعترب عافتني اه
ياجرح محد ضمداه
ياخير الله المارعوه
ومن المخيم طلعوج
#################################
تعالي
يالماشيه ابدرب السبي.. مكسورة محنيه ضلع
يالحتة حزنج مختلف..لا شامت الون يستمع
تعالي
دربج خلص ديرة وجه..عالنوك لا واكع طفل
ماغمضت عينج جفن.. تحرس ضعن خاطر تضل
حراسه ..اعله ناسة ..جفن عينج سهر
الاميرة ..اسيرة..يسميهة القدر
يالحتم ازمانج عليج
اخوانج اتروح امنديج
وتمشين ويه الماهي ناس
ومن المخيم طلعوج
#################################
ذوالفقار الزيدي

بالسجون مكضي عمرك
وصفن الطامورة صبرك
يابو الرضا يابو الرضا
وصفن الطامورة صبرك
#################################
يمخلص اسنينك سجن..حكي اعلة جرحك من اون..يالقصتك جروح
جيف انتة امك فاطمة..صارت حياتك مؤلمة..وعمرك خلص نوح
ليش الدهر مامنصف ابحك الهواشم
ومكتوب كلمن هاشمي ايعيش بضلايم
ذنبك شنو يابو الرضا غير ابن فاطم
بياذنب مضلوم دهرك
وصفن الطامورة صبرك
يابو الرضا يابو الرضا
وصفن الطامورة صبرك
#################################
جفك تكيدة السلسلة..وزين العباد ابكربلة ..مثلك تكيد
وثنينكم نفس الجرح ..وبالدنية ماغزر ملح..مانصفت احد
نفس السلاسل سيدي ابهالزمن تنعاد
وهذا الجرح يشبه جرح جدك السجاد
يردون من ريحة علي ماتبقة اولاد
ينطفي يردون ذكرك
وصفن الطامورة صبرك
يابو الرضا يابو الرضا
وصفن الطامورة صبرك
#################################
نزلولك بسجنك مرة..بس طلعتهة مخدرة..ومستورة بحجاب
خوفهم اكثر هالامر..والسندي اخذ دور الشمر..من الرطب جاب
ولسندي اخذ دور الشمر وحسين دورك
ومابيهم المثلك ترف يفهم شعورك
فكرو نورك ينطفي وشيطفي نورك
شامخ وماوضح كسرك
وصفن الطامورة صبرك
يابو الرضا يابو الرضا
وصفن الطامورة صبرك
#################################
الكدتور يفرك راحتك..وفرزنهة ضاعت راحتك ..بين الطوامير
من كال للميت اهل..ماضل دمع كلة انهمل..والدمعة تفسير
يسئل منو اهلك ونتة ابو الهلدنية كلهة
مو شيخهة يابو الرضا انتة فحلهة
والتايه بحل مشكلة يلكاك حلهة
جابر المكسور جبرك
وصفن الطامورة صبرك
يابو الرضا يابو الرضا
وصفن الطامورة صبرك
#################################
الفكر يطمرك مالة اثر..وضليت شامخ عالدهر ..وتبين الحك
ضليت موسى المدرسة ..وببحرك العالم رسة.. وضل بحرك ازرك
يابحر جود وفايض اعلة ناس خيرك
وضليت صابر عالضلم تعرف مصيرك
يالكاظم الكلك نعم وشعدنة غيرك
واضح ومعرف كدرك
وصفن الطامورة صبرك
يابو الرضا يابو الرضا
وصفن الطامورة صبرك
#################################ذوالفقار الزيدي

موسى هايم بقصتة
طيبة مخضر بكصتة
واكف بالشدد شفتة
موسى موسى
#################################
من اذكر اسمك كل جرح مايبقة بية ويشفة
وبالشدة من اتوسلك الكاك صاحب وكفة
المانام من هم الدهر بس يذكر اسمك يغفة
يالجفك مخضر هلة ويالخير ينكط جفة
ياموسى والناداك
بالشدة حل ليلكاك
بابك لحضة متسدة
ومحد خايب تردة
العافك حتى ماعفتة
موسى موسى
#################################
محفوظ مي وجه الخدم يا بو الرضا من خيرك
والماد جفة بحضرتك ماعدة واحد غيرك
يا آية والحبك صدك يعرف فقط تفسيرك
يالبتكبر ماالك بس بلصلا تكبيرك
يانعمة الخدام
ابفيك نريد انام
يمك ماتضل صعبة
وسمك عدنة ابو طلبة
بخيرك كل جرح رفتة
موسى موسى
#################################
المشاي جاي الحضرتك كل خطوة يملك غاية
لن شافك ابيوم نكسر صاير اله تجاية
شمسوي موسى بهالخلك ومجنن المشاية
عباس ورثلك طبع ولهذا اجوك ابراية
بالراية من يمشون
طبع الكفل يدرون
تكضي الحاجة من طبعك
حاسب هالخدم ربعك
الزارك والله جننتة
موسى موسى
#################################
الخادم يحس بخدمتك ملموسة هاي النعمة
والهذا اخذ يمك عهد يبقة اعلة درب الخدمة
يتفاخر ابين البشر خادمكم اليتسمة
والمامشة بهذا الدرب ياسيدي هذا اعمة
لامسهة نعمتكم
العلخدمة عاهدكم
دربك ياهو ليملة
خيري ابخدمتك كلة
كدري الخدمة رافعتة
موسى موسى
#################################
عهدي الك خادم اضل حد ماتفيض انفاسي
يمعلي شاني ابهالخلك بيك ابقة رافع راسي
بس التحبك صحبتي وبس التخدمك ناسي
انة اعشك المثلك ترف ماريد واحد قاسي
الحبك يمحبوبي
اعتبرة من ثوبي
طبعي وثابت بطبعي
وبس التعشكك ربعي
المثلي روحي قابلتة
موسى موسى
#################################
ذوالفقار الزيدي

دمعي لبخديني..مسبلة اعلة احسيني
المانسيت مصابة..وهوة ماناسيني
#################################
شفتة ماخذ روحي وحدة وماشركتة بثاني
اتربع اعلة بتوت كلبي وساكن بوجداني
حسين تسبيحة صلاتي ومايتيهة الساني
واحمدت الله وشكرتة جي علية دلاني
ساكن بانفاسي..واخذ كل احساسي
الدربة ناذر روحي..وهوة ماناسيني
################################
كبّرت اسمة اعلة روحي وهوة كبر صيتي
ولويضيك اعلية صدري بذكرة احس عافيتي
رحت يمة وكتلة خادم بارك بتسميتي
ومن هذاك اليوم احسة اتكفل بتربيتي
والدي الروحاني..عالعدل دلاني
افخر بتربيتة..وهوة ماناسيني
#################################
دارس بمنهج وفائة وهاية افضل مدرسة
وقدمت بحث الخدامة والتفاني بمجلسة
عندة دكتوراه خدمة الوصل رتبت عابسة
ماخذ ابدرس التهدل مقتبس من واهسة
بالتهدل واهس..من مدارس عابس
مدرسة دمعاتي..وهوة ماناسيني
#################################
حسين حتى ابقى اعلة نهجة انطاني ذبحة منحرة
وحتى اعيش ابديني سالم طلعت اختة ميسرة
شافني ضليت دربي وعدلاني بخنصرة
وانة ماشي بهالخدامة حتى اطيب خاطرة
وكمت اعضم نوحة..حتى اطيب اجروحة
الغركاني بخيرة..وهوة ماناسيني
#################################
انة ادك صدري المصابة حتى اطلع حصرتة
وادري لو طاحن اضلوعي مايطفن جمرتة
كمت اهل ادموع عيني حتى ابرد حركتة
ولو دمعاتي قليلة اكبال جرح امصيبتة
دمعتي السجابة..شتطفي نار مصابة
وشيوفي اديونة..وهوة ماناسيني
#################################
ذوالفقار الزيدي

الف شكراً على الخدمة..يعشكي الاول الفطري
وفاء النعمتك هاية..نذرتة المجلسك صدري
وعلى المجلس جمر حزنك يحزمني
#################################

يانفس ماترك ريتي.. ياصفائي العكد نيتي
اسمي من نعمتك صاير..خادمك ياكبر صيتي

انة الكل عمري امحرم..انة الباجي الهذاك الدم
انة الحاركني لمخيم..وصدري الحركتة اتوسم

انة العايش الم جرحك..بجمرلايخمد ويبرد
ويرسمك حزنك ابالي ..هذاك حسين الموسد
وعلى المجلس جمر حزنك يحزمني
#################################
يالي معشوكي سميتة.. عمري من جرحك ابديتة
مولدي واحد امحرم..ابكلبي من جرحك الكيتة

الك والدني الم نوحي..سواد اهدومي لجروحي
حسيني انتة السكن روحي.. خيالك بس دمع يوحي

الك جرح ابوسط كلبي ..سواد ودمعة يوحيلي
ابصباحي اجريلك ادموعي..وصابحي ايسلم اليلي
وعلى المجلس جمر حزنك يحزمني
#################################
ياعطش ماخضع شفتة..والجرح واضح ابشفتة
مالكيت الذي يشبهك.. وانتة بس تقترن بنتة

يشبهك ماشفت ثاني..يبس ثغرة وبقة انساني
كلام الله انتة روحاني..وتضل بشفافي قرآني

ارتل اية اجروحك..اذا طاريك ايمرني
احسك واكف اكبالي..وحنان ابصدرك اتضمني
وعلى المجلس جمر حزنك يحزمني
#################################
الطم الحركت اجروحك..نوحي مستوحى من نوحك
يالعشت جمرة بحساسي.. روحي تبلة وتضل روحك

لطم لوخلصت ايامي..تضل اجروحي والامي
من اسد عيني الكة كدامي..الحسين الحاسر الضامي

اطّبر راسي من حركت..حوافر طحنت اضلوعك
واحس عينك علة اخيامك ..وتهل عالخدر ادموعك
وعلة المجلس جمر حزنك يحزمني
#################################
ابمجلسك ابقة اتذكر..شفة ذبلانة وي منحر
وزينب الضلت اوحيدة ..والسوالف الم خنجر

دمعتي الزينب اتلالي..عزيزة وفاركت غالي
وحيدة ابعازت الوالي..وذرة الخيمة الهوة العالي

اشاهد حركة اخيامك..ويطلوعهة ابحبل زينب
هذن ايمرن ابالي..واضل ابمجلسك انحب
وعلة المجلس جمر حزنك يحزمني
#################################
ذوالفقار الزيدي