27ኛ ጠቅላላ ጉባኤውን በማከናወን ላይ እንደሚገኝ አሜሪካ ማእከል አስታወቀ

አሜሪካ ማእከል 27ኛ ጠቅላላ ጉባኤውን በፖርትላንድ ግ/ጣቢያ አስተባባሪነት ከትናንት ምሽት ሐምሌ 25 ቀን መክፈቻውን በፖርትላንድ ደብረ መንክራት ቅድስት ኪዳነ ምህረት ቤተክርስቲያን በጸሎተ ወንጌል ያደረገው የማእከሉ ጠቅላላ ጉባኤ በዛሬው እለት ሐምሌ 26 ቀን 2017 ዓ.ም. በፖርትላንድ ምስካዬ ኃዙናን መድኃኒ ዓለም ቤተ ክርስቲያን በኪዳን ጸሎት የተጀመረ ሲሆን በጉባኤው መክፈቻ የእንኳን ደኅና መጣችሁ መልእክት ያስተላለፉት የማእከሉ ሰብሳቢ ዶ/ር አይዳ ግርማ  ማእከሉ በዓመቱ ውስጥ በሀገር ቤት እና በአሜሪካ ያከናወናቸውን ዋና ዋና ተግባራት ሪፖርት አቅርበዋል፡፡

የጉባኤው መረ ቃል በሆነው “ከበጎ ሥራ ወገን ምን ላድርግ?” የሚለውን ቃለ እግዚአብሔር መነሻ በማድረግ ትምህርተ ወንጌል በአባ ፍቅረ ማርያም መኩሪያ ከኢትዮጵያ ተሠጥቷል፡፡በማስቀጠልም የማእከሉ የ2017 ዓ/ም አፈጻጸም ዘገባ፤ የሒሳብና የኦዲት ረፖርት እንዲሁም ዋና ማእከሉም በዓመቱ ውስጥ ያከናወናቸውን አጠቃላይ ሪፖርት በአቶ ታደሰ አሰፋ ቀርቧል፡፡ የቀረቡትንም ረፖርቶች ተከትሎ በጉባኤው የታደሙት የዋሽንግተን ኦሪገን አይዳሆና አካባቢው  ሀገረ ስብከት ሊቀ ጳጳስ ብፁዕ አቡነ ማርቆስ ባስተላለፉት መልእክት ቤተክርስቲያንን የሚያሻግር ተተኪ ትውልድ ለማፍራት ማኅበረ ቅዱሳን የሚያደርገው ጥረት እጅግ የሚደነቅ መሆኑን ገልጸው አባላቱ በብዙ ፈተናዎች ውስጥ እያለፋችሁ ለምታከናውኑት አገልግሎት ድጋፋችንን አጠንክረን እንቀጥላለን ብለዋል:: ብፁዕነታቸው ሥራህን ለእግዚአብሔር አደራ ስጥ ሀሳብህም ይጸናልሃል የሚለውን የመጽሐፍ ቅዱስ ጥቅስ በማንሳት ማኅበረ ቅዱሳን አገልግሎቱን ለእግዚአብሔር አደራ ሰጥቶ እንዲሰራም የማትሰሩ መስላችሁ ሥራችሁን ስሩ በማለት አባታዊ መመሪያ ሰጥተዋል ::

ጉባኤው በተቋማዊ ለውጥ አተገባብርና አባላት ተሳትፎ፤ ወቅታዊ የቤተ ክርስቲያን ጉዳዮችና የ2018 ዓ/ም እቅዱና ሌሎች አጀንዳዎች መክሮ ውሳኔ የሚያሳልፍ ይሆናል፡፡ ጠቅላላ ጉባኤው ከአባላት በተጨማሪ ለሕጻናትና አዳጊዎች የተለያዩ አስተማሪ ዝግጅቶች  በተጓደኝ እየተከናዎኑ ናቸው፡፡በማእከሉ ተግባራዊ የተደረገውን መዋቅራዊ ለውጥ ተከትሎ 3ቱ ማስተባበሪያዎች በአካል የመጀመሪያ ጠቅላላ ጉባኤያቸውን ባለፉት ሳምንታት ሲያካሂዱ ሰንብተዋል ::  የማእከሉ ጠቅላላ ጉባኤ ማስተባባሪያዎቹ በአካል ጠቅላላ ጉባኤ በሚያደርጉበት ዓመት የማእከሉ ጠቅላላ ጉባኤ በዙም እንዲካሄድ በተወሰነው ውሳኔ መሰረት ነው ዘንድሮ በዙም እየተካሄደ ይገኛል:: ዘገባው የአሜሪካ ማእከል ሚዲያ ክፍል ነው::