የብፁዕ አቡነ ጎርጎርዮስ ፴፭ኛ ዓመት መታሰቢያ መርሐ ግብር ተካሄደ

ሐምሌ፳፫/፳፻፲፯ ዓ.ም

የብፁዕ አቡነ ጎርጎርዮስ ፴፭ኛ ዓመት መታሰቢያ መርሐ ግብር በትናንትናው ዕለት ሐምሌ 22 ቀን 2017 ዓ.ም ከምሽቱ 11:00 ሰዓት በማኅበረ ቅዱሳን 3ኛ ወለል ንቡረ እድ ዲሜጥሮስ አዳራሽ የማኅበሩ ነባር እና አዳዲስ አባላት በተገኙበት ተካሄዷል።

የማኅበረ ቅዱሳን ዋና ሥራ አስፈጻሚ የሆኑት መምህር ዋሲሁን በላይ በመርሐ ግብሩ ላይ  መልእክት ያስተላለፉ ሲሆን በማኅበረ ቅዱሳን ታሪክ ባለፉት 35 ዓመታት ብፁዕነታቸውን ጨምሮ ሌሎች አባቶችም ሲዘከሩ መቆየታቸውን ገልጸዋል።

በየአምስት ዓመቱ የአቡነ ጎርጎርዮስን መታሰቢያ እንደሚደረግ የገለጹት   ዋና ሥራ አስፈጻሚው ለማኅበሩ መመሥረትና እዚህ ደረጃ እንዲደርስ ትልቁን ድርሻ ከተወጡ አባቶች  መካከል ቀዳሚው አባታችን ብፁዕ አቡነ ጎርጎርዮስ ናቸው በማለት ተናግረዋል።

ዋና ሥራ አስፈጻሚው አክለውም ብፁዕነታቸው ከነበራቸው ርእይ መካከል በከፍተኛ ትምህርት ተቋማት የሚማረውን ትውልድ ለቤተ ክርስቲያን አገልግሎት ማሰለፍ በከፊል በማኅበረ ቅዱሳን መሳካቱን ገልጸው በ467 ግቢ ጉባኤያት ውስጥላ ከ210 ሺህ  ተማሪዎች በላይ ስለ መንፈሳዊ ሕይወት እና ስለ ቤተክርስቲያን አገልግሎት እየተማሩ ይገኛሉ ብለዋል።

በተጨማሪም ማኅበሩ በ24 ከተሞች ላይ በብፁዕነታችው ስም ባቋቋማቸው ትምህርት ቤቶች ውስጥ ከ35ሺህ በላይ ተማሪዎች በሥነ ምግባር ታንጸው ቤተ ክርስቲያን እና አገር ተረካቢ እንዲሆኑ ለማድረግ እየተሠራ እንደሆነ ገልጸዋል።

በሁለንተናዊ አቅሙ የዳበረ ኦርቶዶክሳዊ ማኅበረሰብ መፍጠር እንደሚገባ  ተገለጸ

ሐምሌ ፳፫/፳፻፲፯ ዓ.ም

የማኅበረ ቅዱሳን ሙያ፣ ማኅበራዊና ኢኮኖሚያዊ አገልግሎት በሥልታዊ ዕቅዱ ትኩረት አድርጎ ከሚሠራባቸው አገልግሎቶች መካከል መንፈሳዊ የምክክር አገልግሎት በመስጠት ኦርቶዶክሳዊ ቤተሰብን የሚያጠናክሩ  ካህናትና ባለሙያዎችን አሠልጥኖ ማሰማራት አንዱ ሲሆን በዚህ  ከጌዲዮ፣ ኮሬና ቡርጂ ሀገረ ስብከት ለተውጣጡ በቁጥር 24 ለሚሆኑ ካህናት፣መምህራንና የዘርፉ ባለሙያዎች በዲላ  ዋለሜ ደብረ ሰላም ቅዱስ ዑራኤል ቤተ ክርስቲያን ሥልጠና መሰጠቱ ተገልጿል፡፡

በሥልጠናው   ለምክክር አገልግሎት የሚረዱ ክብረ ክህነትና አበ ነፍስ፣ መንፈሳዊ የምክክር አገልግሎት አሰጣጥ፣ ኦርቶዶክሳዊ ጋብቻና የልጆች አስተዳደግ፣ ሱስና መሰል ተግዳሮቶች እንዲሁም ምጣኔ  ሐብትና  ማኅበራዊ  ዕድገት ጉዳዮች ተዳሰውበታል፡፡

በመርሐ ግብሩ  የተገኙት የጌዲዮ፣ኮሬና ቡርጂ ሀገረ ስብከት ሊቀ ጳጳስ ብፁዕ አቡነ ገሪማ ባስተላለፉት መልእክት ካህናትና ሌሎች የቤተ ክርስቲያን አገልጋዮች ኦርቶዶክሳዊ የመሪነት ጥበብን ከራሳቸው ቤተሰብ በመጀመር ለምእመናን አርአያ መሆን ይገባቸዋል ያሉ ሲሆን አክለውም አሳሳቢ እየሆነ የመጣውን የሉላዊነት አሉታዊ ተፅዕኖ ለመቋቋም ከዘመኑ ጋር በመራመድ በሁለንተናዊ አቅሙ የዳበረ ኦርቶዶክሳዊ ቤተሰብ መገንባት ላይ ማተኮር እንደሚገባም አመላክተዋል፡፡

በሥልጠናው ጥሩ ግንዛቤና ልምድ እንዳገኙበት የገለጹት ተሳታፊዎቹ  ወደ መጡበት አካባቢ ሲመለሱ ምእመናን ያለባቸውን ዘርፈ ብዙ ማኅበራዊ ቀውስ  እንዲቋቋሙ  ለማድረግ የበኩላቸውን ድርሻ ለመወጣት እንደሚያስችላቸው ተናግረዋል፡፡

57 የደረጃ ሁለት የአፋን ኦሮሞ ተተኪ መምህራን መመረቃቸው ተገለጸ

ሐምሌ ፳፭/፳፻፲፯ ዓ.ም

ማኅበረ ቅዱሳን ከሚያስተምራቸው ከአገር ውስጥ ግቢ ጉባኤያት የተውጣጡ በመሐል ማእከላት አስተባባሪነት በአዳማ አቡነ ጎርጎርዮስ ትምህርት ቤት ሲሠለጥኑ የቆዩ 57 የደረጃ ሁለት የአፋን ኦሮሞ ተተኪ መምህራን በአዳማ (ናዝሬት) ደብረ አሚን አቡነ ተክለሃይማኖት ቤተ ክርስቲያን አስመርቋል።

የምሥራቅ ሸዋ ሀገረ ስብከት ምክትል ሥራ አስኪያጅ መጋቤ ጥበባት ጌቱ በንግግራቸው ማኅበረ ቅዱሳን ቅድስት ቤተ ክርስቲያን ባልደረሰችባቸው የተለያዩ ቦታዎች እና በግቢ ጉባኤያት እየሠጠ ባለው አገልግሎት አመስግነዋል፡፡

ምክትል ሥራ አስኪያጁ በገለጻቸው የሠለጠኑት አዳዲስ መምህራን ባለው የአገልግሎት ክፍተት በተለይ በቋንቋ ለትውልዱ በማዳረስ ረገድ ቅድሚያ ሰጥተው በመሥራት የሚጠበቅባቸውን ድርሻ  እንዲወጡ መልእክታቸውን አስተላልፈዋል፡፡

በምርቃት መርሐ ግብሩ ላይ መጋቤ ጥበባት ጌቱን ጨምሮ የምሥራቅ ሸዋ ሀገረ ስብከት ተወካዮች፣የዋና ማእከል ተወካዮች፣የአዳማ ማእከል ሥራ አስፈጻሚና አባላት፣የቤተ ክርስቲያኑ አገልጋዮች እና ምእመናን ተገኝተዋል።