هزيت راسي بخوش ومشيت اخذت لبست حذائي وكفت گدام المراية عدلت شالي ودعت خالة وطلعت مباوعه على التكسي، عمو واكف يم باي الصدر وخالة ورا نزلت من الرصيف ماشيى العمو سلمت عليه وخرت منه فاتحه الباب الورا وهوَ صعد وانا كذلك

صعدت ساده الباب.. سديته ودرت نظري مباوعه على خالة خجلت ما اسلم مديت ايدي سلمت عليها بينما مديت ايدي هيَّ اخذتني بحضنها شابكتني وتبوس وتحچي أما انا ارد عليها بهدوء
وخرتني عنها بعد دقايق.. باوعت الوجهي وهتفت

عيدة: شبيچ شنو الي يوجعچ..؟

نزلت نظري معدله گعدتي وبطني متكوره بشكل بارز
هاي صاير عندي كرش وما حاسه على روحي
رديت عليها واعدل الجبه على رجلي

قربة: اجتني الشهريه وهاي صارلي ثلاث ايام بطني توجعني وانزف نزيف مو هواي بس اليوم صارلي عشر ايام، عود گلت هاي لان متأخرّة عليَّ
وهيچ خربطت بس بطني توجعني وخالة ام سندس گالت اخذچ الدكتورة

هزت راسها بها ساكته.. ظليت طول الطريق ساكته لا هيَّ تحچي ولا انا.. وعمو ظل يحچي ويا ابو التكسي منا ما وصلنا، نزلنا دخلنا وحدة من المجمعات وعمو ظل واكف برا دخلنا.. ورحنا السكرتيره
حچت وياها خالة ونطتها رقم وهمزين ثالث رقم لان ماكو هواي مراجعين.. اشرتلي اگعد على الكراسي

عيدة: ظلي گاعد هنا بس احچي ويا عمچ واجي

هزيت راسي بخوش، وطلعت
ظليت اباوع على الي كم وحدة موجوده منتظره خالة ما طولت واجتني، اجت گعدت يمي.. ظلت ساكته دقايق وهتفت بهدوء

عيدة: اهلچ يسألون عنچ

باوعت بوجها راده بهدوء بينما هيَّ هتفت هيچ مباوعتلي

قربة: منو الي يسأل.؟! هه عجيب هسه يله حسو على غياب بتهم.

عيدة: ملتهين بالفاتحه

بلعت ريگ فاتحه عيوني راده بخوف
قربة: يا فاتحه.؟

-واحد من عمامچ توفه ورا ما رحتي الصبح

-منو منهم.

-اتوقع اسمه كريم.. اي كريم

هزيت راسي هامسه بالله يرحمه.. بينما هتفت هيچ هتفت ورأساً قاطعتها اعرف شراح تحچي ماريد ينفتح هيچ موضوع

-قربة يمه

-خالة سدي الموضوع فدوة ماريد اسمع شي يخصه فدوة

-غير تعرفين السالفة يا بعد امچ

-وانا ماريد اعرف شي.. فدوة سدي الموضوع بس اتذكر اتعب من اعرف شلون استغلني وستغل حبي اله

-راح اسكت يمه بس يجي يوم وتعذري على السوا انا متاكده

ما رديت عليها بينما هيَّ هتفت مغيره كلامها
عيدة: شلونچ مرتاحه هنا.؟

-اي خالة ام سندس حبابه وما مقصره حتى نسيت الصار وياي

باوعتلي بنظرات متروسه قهر تنهّدت راده بهدوء
عيدة: شريد اهم شي اشوفچ مرتاحه

رديت عليها بهدوء وسكتت ظليت طول الوقت منا ما اجه سراي احچي وياها بس على كد سؤال آخر شي هيَّ سكتت من شافت ردي بارد

اجه سراي كمت وكامت وياي
دخلنا الدكتورة سولفت الها وضعي بالتفصيل وگالت اروح اخذ تحليل...طلعنا اخذنا تحليل وكلنا
وگعدنا منتظرين..ظلينا بالنص ساعة يله طلع التحليل انطونيا بدون ما يگولون شبيه

اخذته ورجعنا للدكتورة..دخلنا عليها يمها مراجعات ظلينا واكفين شويه على ما يطلعن.
كملت منهن وتقربنا منها انطيتها الورقة
ظلت تقرا بيها وعيني عليها وعلى الورقة گلبي يدك بقوة خايفه يطلع بيه مرض مو زين

على خوفي وقلقي رفعت راسها مبتسمه.
اطمانيت من ابتسامتها لكن هتفت بالكلام انصعقت اريد اوخر نظري عنها ماگدر.

-الف مبروك حبيبتي أنتِ حامل

ماعرف أو ما حسيت بعد بنفسي
ظليت مصطكه اباوع عليها...انا حامل.؟
ماعرف شفكر... ماعرف شريد احچي
حامل المن حامل، نزلت دموعي بعد صفنه طويله اريد استوعب الي حچته

المن حامل..من ردت انفصل عنه وكل واحد يولي بدرب، انزرع بطني طفل المن.
قبضة كف ايدي بحكام، مباوعه على خالة الي
وجها تارسته الفرحه والضحكه مرسومه على شفتها
لكن باوعت عليها باوعتلي ورجعت نظرها الدكتورة

عيدة:دكتورة هيَّ تنزف صارلها عشر ايام عبالها شهريه

-روحي اصعد على السديه ماما خلي اخذلچ سونار اجيك الطفل

مارديت عليها.. اسمع كلامهن بس ماگدر احرك روحي اتبنجت كلام السمعته بنجني، على هذا وضعي خالة وهتفت خالة

عيدة: قربة يمه تسمعين الدكتورة شدگول

باوعت عليها وعلى الدكتورة
اشرتلي بيدها على مكان السديه، بللت شفتي كايمه كوه مشيت وخالة ظلت گاعده
صعدت نايمه على ظهري مباوعه على السكف
رافعه ايدي ثنينهن حاطتهن على بطني وتلمس بيها من فوك الجبه ببهامي

ليش ربي تزرع ثمره بداخلي بوقت الغلط ليش.
شنو ذنبه هسه راح يعيش بين ام واب مبتعدين عن بعض، دخيلك ربي ماعراض حكمتك بس ليش
بلعت ريك مايله راسي مباوعه على الدكتورة الدخلت تلبس بالكفوف باوعت عليَّ وهتفت بهدوء

-هذا اول حمل الچ.؟

هزيت راسي باي
دكتورة: صار شگد آخر مرة اغتسلتي عن الشهريه.؟

-ماتذكر بالضبط بصارلي هواي

-شهرين أو أكثر

-لا أكثر

-هاي المده كلها وما حاسه، وهم هسه شلون اعرف أنتِ بيا شهر

صفنت عليها متذكره الشيله مالتنا هيَّ من نهدها
قربة: واحد وعشرين بالشهر

-اها وحنا اليوم اربعه بالشهر.. بس بيا شهر.؟

-بالثاني

-اووو وهاي المده كلها ما حاسه على نفسچ حامل.

-لا ما حاسه بس ليش صارلي شگد

-امي اذا على حسابچ ومن هنا وبعدما طاحت عليچ يعني أكلتي الثالث ودخلتي بالرابع الچ بي 14 يوم. بس هسه اشوف بالسونار وتأكد

تحچي وانا صافنه.. هاي المده كلها حامل ومادري بروحي عجيب والله.. بس ما بين عندي اي نوع النساوه حتى اعرف نفسي حامل.
شو بس خمول وراسي يوجعني هذا الي تعرضت الى ذيچ الفتره.. بين كلام البداخلي هتفت وهي ترفع مثل البطل مدري شنو

-رفعي ملابسچ

سويت نفس ما كالت وحطت على بطني مثل السائل
ومسحته بالجهاز وظلت تمسح بي وتفتر داير مداير بطني وتباوع على شاشه صغيرة.
باوعت وياها ماعرف شنو بالشاشه رجعت نظري عليها عاقجه وجها.. باوعت عليها بتوتر وهمست بهدوء

-اكو شي بيه.؟

-اتوقع حامل بتوم.. اي اي حامل بتوم هاي اكو طفلين هنا

باوعت على الشاشه فاتحه عيوني داك گلبي بقوة
شعور غريب اشتاحني.. حامل بتوم
بعدني بصدمتي أو فرحتي وعدم استيعابي انصدمت بكلامها الخلاني اتبسمر

-النزيف هذا اجهاض واحد من الطفل نازل

ماعرف شحچي ظليت متبسمره ظلت تحچي وياي وانا ماعرف شرد، هيَّ شافتني هيچ وخرت الجهاز مني وصاحت الخالة شوي واجت النا سولفت الها وهيَّ ما دائمت فرحتها.. مدري شظلت تحچي وياها وخالة هزت راسها باي

قربة: شراح تسوين.

-ما اسوي شي بس اتاكد من سلامه الطفل

سكتت عنها ظلت مدري شتسوي منا ما ابتسمت برتياح وهتفت، وانا اباوع على وجها وعلى خالة

-الحمدلله التوأم كل واحد منهم بمشيمه وحدها ولتوام الثاني المتوفي المشيمه مالته بدت تمتص مادام احنا عبرنا الشهر الاولى ماكو أي ضرر على التوأم الثاني لانه كل واحد منهم بمشيمه فـ ماكو ضرر

عيدة: تگدرين تعرفين ليش ميت.؟

-حچيه اكو متلازمه التوأم المتلاشي يموت الطفل بدون اي اعراض الجهاض..وهسه لا تخافون لا على الطفل ولا على الام.. وان شاءلله تستمر وياي كل شهر تجي اجيكها اشوف وضع الجنين وضعها خاف يصير شي

قربة: اطفل الثاني وين

-ماما مثل ماگلت الجنين الثاني متوفي والمشيمه مالته ممتصها الجنين الثاني لانها كل واحد منهم بمشيمه وحد

هزيت راسي بها ساكته.. ظلت تحچي ويا خالة وتفهمها وانا صافنه على الشاشه.. بعدني بصدمتي لا حسيت بفرح ولا بحزن.. وطلع واحد منهم مختفي
لو ما نزفانه چان حتى الثاني يطيح وانا مادري بي

قطع صفنتي صوت دكتورة مادتلي الكلننس امسح السأل، اخذته منهنه مسحته وذبيتهه وعدلت ملابسي ونزلت من السديه، بينما انا امسح بالسائل الدكتورة گالت وهيَّ تطلع وخالة وراها.. بس كملت طلعت وراهن

الدكتورة: كل الي نريده منچ ياحبيبي الراحه وتنامين على ظهرچ وماكو تعب.. وانا راح اسجل الچ مقويات وفيتاينات تلتزمين بيهن وكل ما يخلصن تجدديهن منا لحد ما تجيبين

تحچي وتكتب، ردت عليها خالة وانا ملتزمه السوكت ماعرف شحچي

عيدة: وهذا النزيف ولويه العدها يأثر على الطفل

-لا راح اكتب الها مهدئات ما بيها ضرر ؏ الحمل
وهم لا تگومين هواي، ولا تتحركين هواي الى الضروره وذا شفتي النزيف كثر تعالي الي احولچ المستشفى وانا الشرف عليچ
وهذا العلاج كتبتلچ طريقه الاستخدام وشوگت تاخذي

هزيت راسي بخوش ونطت الراجيته الخالة
خالة الي تحچي وترد عليها
كملنا كلشي وطلعنا من المجمع

باوعنا على المكان اندور على عمو ماكو.. ظلينا اندور بعيونه عليه منا ما لمحته طالع من الاسواق بيده بطل ماي تقربنه منه وهوَ شافنه اجه علينا گال وجهه مبتسم

صاحب: الف مبروك بويه ان شاءلله يجي يوم الاشوفه بيدچ

قربة: شكراً

كلت هيچ وخالة هتفت وهيَّ تمد اله الراجيته

عيدة: خلصنا نجيب العلاج ونرجع للبيت

اخذ من خالة الراچيته
صاحب: تعالن وياي لا تظل هنا

مشينى ورا انا احوس يا بيت ارجع لو اموت
مارجع نوب هلو طلعت حامل خوش راح يلزموني من ايد التوجعني.. بس والله، والله لو اموت ما رجع اله

دخل هوَ وخالة وانا ظليت واكفه بالباب الصيدلية
عين عليهم وعين على العالم التروج.
الوقت حلوة والعالم كلها طالعه هذا الجاي هوَ ومرته لو هذي هيَّ وياها مرّة
ظليت اباوع على العالم منا ما حسيت عليهم طلعو باوعت عليهم ودرت وجهي منهم.. گال عمو وهوَ ينطي العلاگه الحالة

صاحب: اوكفو هنا هسه بس اجر سيارة وجي

قربة: عمو رجعني البيت شيخ.

عيدة: يمه

صاحب: ان شاءلله بويه هوَ ارجعچ هناك غير

عيدة: شترجع صاحب غير حالتها مو مستقرة ويراد الها مداره شلون تظل هناك

قربة: موجوده ام سندس وشرار يعتنن بيه.
ماريد ارجع عفيه عمو اخذني البيت الشيخ انا هناك راحتي.. وخالة لا تخافين ما اسوي شي بأبنكم هذا هم ابني وما افكر أذيها،وهيَّ نعمة الله زرعها بطني

عيدة: مو هيچ يمه.. المن ظاله عند العالم غير ترجعين البيتچ

ردت احچي وعمو قطع كلامنا احنا الاثنين
صاحب: مو وقت حچي بنص الشارع.عوفو هذا الموضوع على غير يوم

گال هيچ وعافنا وراح الشارع.. بينما گال هيچ انا سكتت، ماحچيت شي بس خالة گالت بسياسه وهدوء عبالها من تحچي وياي راح اقتنع

عيدة: يمه قربان گعدتچ عند العالم غلط هسه لو عد اهلچ بيها باب وجواب.. وهم أنتِ منا مسقطه طفل وجاي تنزفين شلون اذا لا سامح الله صار بيچ شي منو الچ هناك

باوعت عليها وهتفت برود
قربة:سؤال من منو الطفل مات..؟
اذا حضرت جنابه يشرب بيه مدري شني منا طاح طفل وبقى واحد، شمدريچ ما يطلع مشوهه لو مريض من ورا.. ورا السم الي ينطينيا.
لذلك خالة فدوة سدي الموضوع ماريد ارجع وحتى لو ارجع... ارجع الاهلي مادخل الذاك البيت بعد

هزت راسها رايده تحچي واجه عمو.
باوع علينا واشر النا براسه.. مشت هيَّ گدامي وانا وراها وصلنا السيارة صعدنا وحرك السيارة الولد

ظل يمشي بينا منا نص الطريق عمو وكف الولد نازل
باوعت عليه من الشباك نزل يم بسطيه مال مخضر وعلى السايد الثاني محلات مال حلويات

اتسوك فواكه واجه فتح باب اليمي منطيني علاليگ حطيتهن بيني وبين خالة..بينما هوَ وسد الباب وهتف وهوَ يمد راسه من الجامه يحچي ويا الولد

-يابه دقايق شوي وجي

هز راسه الولد راد عليه براحتك.. وعمو خله وراح عبر
السايد رايح على المحلات اباوع عليه عمو طوله حلو وجسمه لا هوَ ضعيف ولا سمين بس صاحب كرش مدعبل هو الي مخربه أنما معاني وجها هادئة
وخشمه چنه خشم ذو الفقار
وعيونه صغار وناعسات ومنا الشيب منطي جماليه أكثر

همه صلوات على محمد حلوين من عمو الحد مطلب
أما هاجر طالعه على خالة عيدة تشبها معاني وجها هادئة وطفوليه

وخرت عيني من شفته اجه بتجاه السيارة وبيده علاگتين وسط بيض.. فتح الباب وصعد سده ومد ايده انطا العلايگ

صاحب: ام ذو الفقار اخذي وحدة وحدة حطيها ويا المخضر

اخذتهن خالة وسوت نفس ما گال
غضيت النظر عنه مباوعه على الشارع
راسي متجيته على باب السيارة وباوع على المحلات والبنايات. وقرا كل لافته معلكه وبالي مو يم القرأ
بالي كله ويا الي بطني الطلعلي صفح

لا اكدر اتبطر على نعمة الله ولا جاي استوعب انا ابطني طفل.. هسه كون ميت ويا اخو مدري اخته ولا يتعلعل وياي، هوَ انا متعلعله مو نوب طفل وياي
غمضت عيوني بينما غمضت رديت على نفسي مثل الخبلة

لا تحجين هيچ.. هوَ شني ذنبه
ذنبه راح ينولد بوسط عائلة متفتتة
هذا الذنب الوحيد.

تمنيت اسمع هل خبر قبل لا اعرف
بسوايه ذو الفقار اتمنيت اعرف بنفسي حامل وانا مو بهل وضع.. لو عرف بنفسي حامل قبل لا اعرف بذو الفقار هوَ هيچ... يمكن بذيج الحظة ما اشيل هم بكد هسه

بلعت ريگ دايره وجهي مباوعه على خالة الي تباوع على الشباك رفعت ايدي ندغتها بكتفها بينما سويت هيچ هيَّ التفت كامزه باوعت عليه

عيدة: ها يمه شبيچ يوجعچ شي.؟

هزيت راسي بلأ هامسه وعين على ابو السيارة
قربة: خالة اذا عندچ خاطر الي يمچ
لا تحچين الذو الفقار انا حامل لا أنتِ ولا عمو فدوة لا تحچون

عيدة: شلون يمه حرام عليچ أنتِ صايمه مصليه شلون تسوين هيچ... هوَ هم ابوه.. ولا سامح الله اذا صار بيچ شي ويدري غير يلعب فلك

قربة: خالة بس هل مرة سوي شي الخاطري فدوة
ولا تخافين ما يصير شي لا عليَّ ولا على الطفل لو يصير شي چان ماتو ثنينهم بس الله كاتب اله يعيش

عيدة: بس الى متى تضمين عليه
لابد يجي يوم ويعرف قابل هوَ سلعه وتضميها عنه هذا طفل وأنتِ قابل ظلين عمرچ كله عد العالم

بللت شفتي راده وعيني عليها وعين على عمو والسايق الي يحچي وياه

قربة: خليني ارتاح خالة... خليني استوعب
لا تضغطون عليَّ... انا من احس نفسي زينه راح ارجع لاهلي والله كريم.. بس ما اوصيچ لا تحچين اله وحتى لو تحچين اله انا هنا راح اعاند أكثر وما ارجع لو على كص ركبتي

هزت راسها بئس راده بنفاذ صبر
عيدة: هاي هيَّ يمه هاي هيَّ، ولو انا كلامچ وگعدتچ عد العالم ما داخله عقلي.. بله يا التحاچينه ويقتنع بالسالفة مالتچ، هسه لو يم اهلچ هاي معروفا بس مو رايحه العالم غربة

قربة: مو غربة خالة شرار اختي والمرّة ام سندس ماكو مثلها، حاسبتنا مثل بناتها.
انا مرتاحه عدهم، خلوني ارتاح شويه ابتعد عن العالم ايام بس ايام ماريد شي منكم

باوعت عليَّ بنظرات غير مقبولة وهتفت من لا جاره
عيدة: هاي هيَّ هوَ احنا شنريد.. ارتاحي شنريد

مارديت، درت وجهي منها ادري
هسه كل همها الطفل البطني بس شنو ذنبي انا اتحمل شي، انا مو مجبوره اتحمله.
خليني يم شرار منا ما تقرب ولادتها وروح يم اهلي وحتى هسه من ارجع احچي وياها خاف كلام
خالة ام سندس اثر بيها وفكرت تريد ترجع وما تگدر مني احچي وياها تحچي حتى اروح لاهلي

ظليت اجيبها منا واخذها منا.. منا ما وصلنا المنطقة الي گاعدين بيها... تقرب للبيت صف السيارة گدام الباب وعمو وهتف

صاحب: بويه تاخذنه كروة ثانية المنطقة ****

هز راسه راد عليه بخوش وعمو فتح الباب
صاحب: نزلي العلاليگ وياچن

اخذت نص العلاليگ وخلتلي بس ثلث علاليگ
شلتهن ونزلت وهيَّ كذلك، بينما نزلت باوعت على عمو واكف گدام الباب يدك بي
مشيت انا وخالة.

شوي وجه صوت خالة ام سندس، رد عليها عمو وعرفت صوته.. فتحت الباب وصارت ورا الباب وبس راسها مطلعته، سلمت على خالة
بينما كملو سلام عمو گال وانا بعدني واكفه گدام الباب مدري شمتانيه

صاحب: ادخلي بابا وأنتِ ام ذو الفقار دخلي طببي الغراض

دخلت وخالة وراي بينما دخلنا خالة ام سندس
هتفت بلوم وعتب..
ام سندس: صدگ چذب المن هل غراض خويه
والله ابو ستار البارحة تسوك مسواك كامل

صاحب: شجايب خويه

ام سندس: ميخالف خويه والله اگول بعد الشيخ ويزعل عليك

صاحب: لا عمي بعد ماجيب بس هل مرة على هل فرحه الحلوة

-دوم الفرح يرافكم.. شصاير فرحنه وياك

عيدة: قربة حامل

باوعت عليها رفعت حواجبها والضحكه ترست وجها
ام سندس: والله اول ما شفتها گلت الاخيتها هل بت حامل بس ما صدگن بيه.. على العموم الف مبروك يتربه بعزكم ودلالك يوم التشوفو وتلزمو بيدكم

صاحب: رحم الله والديچ اخيتي

عيدة: وين انلزمه خيه اذا هيَّ راكبه راسها ما تقبل ترجع. احچي وياها خلي تعقل وتفكر بالطفل البطنها

صاحب: عيدة

باوع عليها وعلى عمو وجهي اقتحن
عمو بس سمعها هيچ راساً صاح بسمها بحده
بينما هيَّ التزمت السكوت.. اما خالة ام سندس رادت تحچي بس عمو گال بهدوء وهوَ ياشر الخالة تعوف الخراض

صاحب: يله حطي المسواك خلي نتوكل هم يله نوصل

حطت الاغراض هوَ والعلاج وسلمت على خالة ام سندس وطلعت ما مسلمة عليه
أما عمو شافها هيچ وخر عينها منها وباوعلي وهتف بحنان

صاحب: انتبهي على نفسچ بابا... وأي شي تحسي خابري عليَّ اجي عليچ..أو كلشي تشتهي بس اتصلي عليَّ لا تخجلين

قربة: لا طبعاً اخبصك خبص كلشي اريده اخابرك

ضحك ورفع ايده ملوح النا ودار وجها ومشى صاعد بالسيارة... تحركت السيارة بس تحرك خالة سدت الباب دارت وجها عليها

ام سندس: المرّة لا تزعلين منها حقها تحچي وياچ هيچ ولى اگلچ زين منها وما سحلتچ من عطوبچ ورجعتچ البيتچ

-خالةةة

ام سندس: وخلخاله مچذبه المرّة خايفه عليچ وعلى الي بطنچ، والله زين ورجعوچ هنا

-ليش

ام سندس: شني الي ليش چنتهم حامل وعايفيها وحدها لا يم اهلها لا شي

ردت احچي وجاني صوت شرار من وراي
شرار: ها شگالت الچ.؟

ام سندس: طلعت حامل شگتلچ مو حامل

قربة: حامل بتوم

ثنينهن: اللهم صلِّ على محمد وآل محمد

قربة: واحد مات واحد عدل

ثنينهن: يااااا والله

قربة: والله

شرار: ليش وشوگت ميت..؟

قربة: ماعرف الدكتوره دگول كل واحد بمشيمه والطفل الثاني المشيمه مالته ممتصها الجنين الثاني
فـ ما معروف شوگت متوفي.. بس اظن النزيف
العليَّ عشر ايام هوَ من وقتها اتوفه

شرار: اي وأنتِ النادرة شهريه شهريه

ام سندس: الحمدلله على سلامتها وسلامت الطفل وان شاءلله تجيبي وتلزمي بيدچ بحق حبيب قلب الرسول

قربة: شكراً خالة

شلت العلاليگ وانا ارد عليها وهيَّ شالت وياي وشرار دخلت قبلنا بينما نحچي واحنا نروح للمطبخ

شرار: هاي عد عيالچ وراثه مال توم

قربة: اي هيَّ امة الذو الفقار توأم هيَّ واخوها الچبير الي متوفي، وذو الفقار ومطلب وهسه انا

شرار: الله كون يطلع بيچ بنيه حتى اخذها الابني
بس صدگ بيا شهر

ام سندس: هسه تخلي يجي يله تحجزيله مرّة

قربة: هههه قبطت شهر الثالث وبي الي 14 يوم

ام سندس: وهاي كلها وأنتِ ما حاسه على روحچ.؟

قربة: ما طلعت عندي اعراض الحمل بس دوخه وربع وعشرين ساعة نايمه فـ عبالي فقر دم

ام سندس: اي طبيعي اكو نسوان ما عدهن لا لعبان نفس ولا سوالف نساوه.. وهاي الحالة حلوة مثل أنتِ وشرار حبالتچن زينه الحمدلله

شرار: انا هم ما بدت عندي لعبان نفس بس دوخه
وخالة دانه خطيه ظلت وياي وياي.
صدگ على طاري خالة دانه والله طاك گلبي عليها
بس اعرف اذا اتواصل وياها راح تحچي للاستاذ

نحچي ونعزل بالمخضر بالسلال ونغسل بي
باوعت على خالة ام سندس من هتفت هيچ شرار باوعت الها صفح هازه راسها بستهزاء
ابتسمت بخفوت حاطه سله العنب على الكاونتر ومشيت للعلاگه البيضه فتحتها بيها علبه بقلاوه

هلو كنافه ام الجبن.. الف رحمه على والديك عمي
سحبت خاشوكه وأكلت وخذت مرة ثانية دايره وجهي عليهن وهتفت وانا ابلع الكمة

قربة: تعالن أكلن شلون بقلاوه

اجت شرار وكفت يمي اخذت قطعه بقلاوه بينما خالة ام سندس هتفت وهيَّ تاخذ السلال وتخليهن بالثلاجة

ام سندس: بالعافيه يمه ماگدر أكل لا يصعد عندي السكر

قربة: شوي بس حلي حلكچ

-بالعافيه حبيبتي

اكتفيت الابتسامة ودرت وجهي اخذت بعد شوي وشبعت، وشرار هم اخذت بس كنافه شوي وسدت العلبه

قربة: ضميها بالثلاجة لا الدود يلتم عليها

ضمتها بينما باوعت على خالة ام سندس شلون صافنه على ثلاجه:-شيوي للعشى.؟

قربة: طماطه لاجعه خالة مثل ذاك اليوم السويتيها حبابه.. لو اگلچ انا اسويها أتِ ما بيچ حيل

-شعندي يمه روح انطرحي خاف تعبانه

قربة: هوَ الدكتورة گالت لا تتحركين نامي على ظهرچ منا ما ينكطع النزيف

شرار: جا المن واكفه ست قربانو

قربة: چا اظل مطموره

-اي انطمري

ضحكت وطلعت عايفتهن.. مشيت اخذت ملابس ورحت بدلت وتوضيت وظليت اقرأ قرأن شويه على ما يأذن

مرت ثمن ايام على جيتي من الدكتورة والنزيف بده يخف يوم عن يوم منا ما انكطع للالام والنزيف وبدت شوي صحتي احسن من قبل والدم رجع الوجهي وخطيه خالة ام سندس
ما قصرت ويانا لا انا ولا شرار بكد شعرايه.
رغم هيَّ هم مرّة چبيرة بكد خالة عيدة أو أكبر

وهيَّ الي تهتم بالطبخ والزايده وناقصة والتنظيف ما تخلينه نظف هواي لان البيت يظل نظيف لا عدنا جهال ويتوصخ حتى نظف يومية.
لذلك انظف كل يومين أو بين يوم ويوم

طول هاي الثمن ايام خالة عيدة تخابر عليَّ من عمو صاحب، أما انا اضوج خاف يسمعها لو يشك بيها واستحي اگول الها لا تتصلين عليَّ
ومرات ما ارد لو ارد عليها وشوي وسده
بس هم انقهر عليها شلون تحچي وياي متلهفه عكس بيوم الاجينا من الدكتوره.. بس الحيرني عمو ابد ما اجه خلال هاي الايام

خلال هاي الايام اجانه الشيخ هاشم مرتين وعرف بيه حامل، باركلي وجاب النا عشى على خبر حملي
فرحانين وانا من اشوف فرحم افرح وياهم وانسى
وتقبل فكره هاي هيَّ ماكو مفر هذا رزق من الله وما بيدي شي اسوي.. كل الي اسوي احمد الله على نعمته وسكت

والشيخ آخر جيته يوم الثلاثاء اتفق ويا خالة ام سندس على روحه السوگ تسوك الرمضان.
وگال يظل يمنى ويروح ويا خالة ام سندس ابنها وصدگ اليوم راحت الصبح وهوَ اجه يمنى وهيَّ خطيه راحت من التسعة الصبح ما رجعت الى الـ12

ما مخليه شي ما جايبه من لحوم وخضروات وهاي السوالف مال رمضان.. لان برمضان ماتگدر تطلع خطيه تريد تصوم وماتگدر تطلع.
وانا وشرار نريد نصوم بس خالة ام سندس وخالة عيدة ما قبلن انا اصوم على ابو حامل وبشهر الاولى مو زين على طفل أما شرار گالت اصوم يوم واحد اذا گدرت اكمل وذا لا اعوف

ومرت هاي الايام واجه يوم الثلاثاء والي هوَ بليل العالم تسحر حتى تصوم على باجر.. وقبل شويه ورا العشى اجه شيخ جايب النا سحور
انا چنت بالغرفة گاعده اقرأ زيارة عاشورا
وانا جاي اقرأ دخلت شرار هتفت وهيَّ توكف باب الفرفة بس هتفت قطعت القراءة رافعه نظري الها

شرار: اگلچ شدگولين لو اگول العمي ياخذنه نتسحر بالحديقة الجو حلو وهم مختنگه صارلي قرن لا طالعه لا ماشيى

-ونطلع شافونا رجولتنا.

شرار: لا ما تشوفنا رجولتنا نلبس بواشي

-منين تجيبين بواشي

شرار: يوووو شبيج قربة هسه هم يفترون بالشارع شمدريهم احنا گاعدين بالحديقة ناكل

-ماتوقع يقبل عمچ وحتى لو يقبل خالة ام سندس ماتقبل

شرار: لا انا احچي وياها، وهم مادام اليوم اول يوم وحلو الجو والعالم طالعه

-مادري بكيفچ انا شعندي

شرار: چا تعالي وياي هوَ يخجل منچ

-استحي ماحچي انا

شرار: لا تحچين بس اوكفي وراي وگولي حلوة الفكره

-خلي اكمل الزيارة

هزت راسها واكفه بالباب ورجعت اقرأ
كملت الزيارة وخلصت وكمت عدلت حرام الصلاة
هاي من يجي الشيخ البس حرام صلاة لان بطني بارزه وخجل خاف يبرز جسمي من ملابسي گدامه حرام عليَّ

طببت الخصلات الشعر الطالعه
كملت مباوعه على شرار، تباوع عليَّ بصفنه بس باوعت عليها هتفت بضحكه ونظراتها الحلوة

شرار: عود أنتِ ليش حلوة

-هههههه شمدريني

شرار: والله تخبلين عود ليش شنو السر

-ترا أنتِ تخبلين هوَ بس سمارچ يجنن لو دمچ العسل
أنتِ كلچ عسل ياعسل.

شرار:يا يا خجلت

-هههههه كافي غزل خلي نروح نحچي لا يروح وتخرب فكرتچ

-اي اي يله تعالي

طلعت گدامي وانا وراها مشينا للاصالة الگاعد بيها عمو، دخلت شرار وانا وكفت بالباب باوعت
على شرار مشت گعدت يمهم
دخلت اتقربت گعدت يم شرار.. تحمحمت شرار مباوعه على عمو الي يباوع على التلفزيون الي بدو يعلنون المسلسلات شوگت تبدي

شرار: يابه

دار وجهه عليها هاز راسه
هاشم: ها بويه

-شوف راح احچي بس لا تردني حباب والله مختنگه وصارلي قرن ما طالعه

هاشم: اي

شرار: اي اريد طلعنا نتسحر بالحديقة.. هيچ نتسحر ونرجع قبل لاذان.. حباب لا تردني

قربة: خوش فكره حلوة

باوعتلي صفح دايره وجها الشيخ الي يباوع علينا هوَ وخالة ام سندس الي تباوع مزغره عيونها وتشرب بالچاي

شرار: ها يابه شگلت.؟

هاشم: انا شدخلني استشارن ام سندس

باوعنا على ام سندس منتظرينها تحچي بينما هيَّ نزلت الستكان مباوعه علينا وعلى عمو راده برود

ام سندس: المن رايحات، هنا ناكل ونام

شرار: خالةةة

-ها

-حبابه خلي نطلع.. وانا احضر السحور بس طلعونا

هاشم: وشلون طلعن ورجولتچن ما يدرون مو حرام وانتن مصليات صايمات.. وما سامعات الي تطلع بدون علم رجلها الملاكه تنعلها من تطلع لحد ما ترجع

ام سندس: ههههه ملو الملاكه من النعل بيهن

شرار: خالة، انا والملاكه نتحاسب طلعونا رحمة الموتاكم مو بعلي ختنگت اريد اشوف العالم

هاشم: هذول العالم بالتلفزيون شوفيهم

شرار: يابه هسه ما تاخذنا.؟

هاشم: ههههه شلون ماخذچن.. گومن حضرن غراضچن، نمشي بالـ12 حتى نرجع من وقت

هزت راسها شرار كايمه
-خلي اهدر الچاي

مشت وانا مشيت وراها.. ظلينا نحضر بالسحور
وكملنا والچاي حطينا على نار ناصيه حتى يظل حار ماعدنا ترمس نحطه بي.
كملنا بالـ11 ونص رأساً بس كملنا رحنا حضرنا نفسنا بينما خالة ام سندس كامت هم بدلت

كملنا كلشي الأكل والگلاصات والمواعين الي نحط بيها الاجبان.. خليناهن بعلاگه وطلعناهن بالساحة وشرار رجعت جابت ثلث ابطاله ثنين حار واحد جامد ثلج، بينما انا عفت موبايلي گلت المن ماخذته خلي شسوي بي، كملنا كلشي وسدينه البيبان وخالة ام سندس طلعت گدامنا بينما شرار تلبس عبايتها

طلعت ورا خالة واكفه يمها والشيخ ينقل بالغراض السيارة.. بينما الشيخ اخذ القوري الماي طلعت شرار وخالة قفلت الباب الممر وطلعنا من البيت

صعدت انا وخالة ورا وشرار گدام لان خالة تستحرم وانا كذلك وهم شرار اقرب منه تصير مرت ابن اخو
حرك السيارة متوجهين الحديقة الي مدري وين

ظلينا نمشي مسافه حوالي بالربع ساعة وصلنا يم حديقة على طول الشارعين العام هيچ تصير بوسط الشارع وكلش حلوة ومتروسه خضار والعالم بيها تروج، صف السيارة الشيخ ونزلنا باوعت على شرار متقربة منها

قربة: اگلچ نغطي وجوهنا خاف رجولتنا تشوفنا..؟

شرار: محد يشوف شوفي الخضار وحنا ننطي ظهرنا الشارع وهم قابل عيونهم قناص حتى يشوفونا

باوعت عليها بدون ماحچي
مدري ليش گلبي كارصني، تنهّدت عابرين الرصيف الي يدخلنا الحديقة وكفنا وعمو فتح الصندوگ وظل ينطينه بالغراض واحنا اخذناها ودخلنا
باوعنا على الحديقة اندور على مكان.. بينما احنا جاي اندور عمو صار ورانا گايل

هاشم: تعالو هنا على هاي الصفحة

مشينى ورا گعدنا بصف الشجرة وظهرنا يصير على الشارع وجهنا على العالم الموجده.
گعدنا وحطينه الغراض گدامنا وخالة ام سندس ظلت طلع بلاكل وتسفط بي ونسولف

تقربت مني شرار وظلينا نسولف ونضحك ونباوع على العالم، والجهال التروج يمنه.. شوي على گعدتنا وجت عائلة ثنين بنات ومرّة چبيرة ورجال وشاب

هيچ تقريباً يجي اكبر من عليا الولد حلو مرتب وانيق وجماله طبيعي حلوة بس ذو الفقار احلى منه.
هسه انا ليش اقارن بينه وين ذو الفقار، امداني شلون ويا سوالف التافهة

اجو گعدو بصفنه والمرّة الچبيرة صارت بصف خالة ام سندس وبدن يحچن ويسولفن والرجال كذلك
ويا والشيخ والبنات بس يباوعن علينا بدون
ما يشاركن

آخر شي عرفنا هذن بناتها.
امهن گالت الهن يجن يمنه، اجن يمنه ظلن ساكتات شوي وحچيت موجها كلامي الوحدة منهن هاتفه بهدوء

قربة: ادرسن لو متخرجات.؟

-انا آخر سنه الي جامعة وريم اول سنه جامعه

قربة: فدوة بالتوفيق.. شنو اختصاصچن.

-اني هندسه نفط وريم تربيه قسم انكليزي، وانتن.؟

قربة: انا خريجه سادس وهاي السنه يراد اداوم جامعة بس صارت الي ضروف وماگدرت أما شرار مـ..

شرار: خامس اعدادي جاي ادرس

ريم: أنتِ حامل..؟

باوعت على شرار فاتحه عيوني هاي يا خامس منين اجاها الخامس.. بينما سألتها البنيه هيَّ ردت عليها بهدوء وغرور هاي شمالها البت

شرار: اي حامل.

ريم: بس مو صغيره على الزواج وشلون درسين وأنتِ حامل

شرار:شوفي حبي انا اتزوجت على حب
زوجي حارب الدنيا يله ابوي قبل
وانا لان شفت حبه الي صادق قبلت وعلى الحبالة سوالي انحساب

ريم: قصدچ انتساب.؟

شرار: ههههههمم، اي چفصت.. سوالي انتساب لان حامل وماگدر اداوم فـ گال ادرسي بالبيت وقت الامتحان روحي امتحني

ريم: اها الله يديمكم البعض

طول ما تحچي شرار انا كاتمه شفتي مانعه ضحكتي
شمالها هاي حمت مدري شبيها.
ليش هيچ تحچي بطرف خشمها..دارت وجها عليَّ مباوعتلي وهتفت بتنغوص

شرار: چؤ اليوم خطيه بالواجب وخابرته گُتله مختنگه اريد اطلع گلي شبيدي عليچ عمري
انعل ابو الواجب الحارمني منچ خلي بس انزل افرفرچ الـ**** شبر شبر.
واني ظليت ابچي مختنگه گالي خلي هسه ابوي يطلعچ وعود اني من انزل هم اطلعچ

ريم: ليش هوَ شيشتغل.؟

شرار: ضابط

ابتسمت بهدوء مباوعه عليهن الجو صار حار
حمت البت.. بينما ردت هيچ البنيه الأسمها ريم هتفت

ريم: اخوي حسن ضابط نقيب، رجلچ شنو رتبته.؟

الاصت وعلي خلي تبعرها الاستاذه
رأساً رديت انا عنها خاف تچفص نفس الانتساب

قربة: لا هوَ ملازم اول اتوقع

ريم: حسن اعلى منه برتبه

باوعت على الولد الي موجود ويا ما باوعت اجت عيني بعينه يباوع عليَّ.. باوعت بطرف عيني كاشه وجهي سرعان ما عدلت وجهي مباوع الها

قربة؛ الگاعد ويا ابوچ.؟

ريم: اي هذا اخونا الوحيد

قربة: الله يخلي الكم

ريم: حبيبي

گلت هيچ بدون نفس شو ضجت منه مبين عوينچي ظلينا هيچ نحچي باوضيع عادي منا ما صاحت علينا خالة نجي ناكل ويا حظي الزفت خالة اقترحت عليهم يجون يشاركونا ونشاركم بالاكل

هسه شسوي بيچ خالةةةةة المن مدگليلي المن
تأفأفت متقربة منهن مساعدتهن وتحرك بصعوبه منا الامايه تباوعلي ومنا اتخايل هذا يباوعلي ابو عيون
ساعدت بأشياء بسيطة وما تحركت ظلت المرّة وخالة يرتبن وهمه جايبين وياهم ترمز مال چاي احنا چاينا صار ثلج

ظلينا ناكل احنا النسوان بصفحة وهم بصفحة الورانا يعني مو بنفس السفرة.. ظلت خالة والمرّة يسولفن والمرّة تحچي ويا خالة ويباوعن عليَّ
منا ما خالة ابتسمت وضحكت مدري شردت على المرّة والمرّة باوعت عليَّ وعلى ابنها

شكيت اكو شي، لا... لا أصلاً ايقنت اكو شي ليش تباوع عليَّ هيچ وبوزت شفتها
شكو يا خالة ما اتحمل انتظر الحد ما نرجع.
لكن للاسف هيَّ بعيده عليَّ وهذول منا ماگدر اسالها

ظلينا ناكل منا ما خلصنا وانا نسيت الموضوع وندمجت وياهم وأكل وضحك ويا ريم وريام
ريام الچبيرة وريم الزغيرة.
هنه بالبداية ما يحچين بس هسه شوي لا تقالمن وسلوبهن حلو ويضحكن

كملنا أكل وعزلنا النعمة مرجعينها للعلاليگ
وعمو الشيخ باوع النا وهتف

هاشم: ها يابه هم يله نرجع

ردت عليه ام سندس:- ما عدنا شي

-يله چا احنا نترخص

گال هيچ وباوع على رجال والولد بينما همه هم گالو نمشي ريام ابتسمت بوجهي وهتفت

ريام: عندچ موبايل نتواصل وياچ

-اي بس ما جايبته وياي

ريام: انا جايبه تلفوني اوكفي اكتب رقمي بيدچ

هزيت راسي بخوش مديت ايدي الها وهيَّ طلعت
من جنطتها قلم وظلت تكتب على ايدي
بس كملت عمو گال يله نتوكل.
سلمنا عليهن وحدة وحدة.. وخرت من ريم ورفعت نظري لا اراديًا اجت عيني على اخوهن

يربي هذا شماله الولد يباوع.. ما يخجل من نفسه لو يگول رجال وياها زحمه... بس الزحمه والحمه ماتن
كلبت وجهي عنه كاشه خشمي.. سلمنا عليهم آخر سلام ومشينى وهم ورانا الزلمة يحچي ويا عمو

طلعنا من الحديقة نازلين على الشارع عمو فتح السيارة وانا حطيت الغراض بالصندوگ ومشيت صعدت اول وحدة وعفت خالة وشرار يحچن ويا البنات الي ظلن واكفات يحچن هنه وامهن ويا خالة

ماگدرت اظل واكفه.. اباوع عليهم يسولفون هسه شوگت نتوكل قبل لا يمسك.. اباوعلهم من واحد الواحد ومن تجي عيني على اخوهن يباوع على السيارة وعلى عمو هاشم، استغفرالله واتوب اليه شلون طلابه وياه

غضيت النظر عنه متانيتهم يصعدون شوي واجت شرار صعدت هيَّ وخالة وعمي هاشم ودعم ابوهم والدلد واجه صعد.. حرك السيارة ماشي قبلهم

عبرنا من السايد الثاني راجعين البيتنا
ظلينا نمشي شوي وكف لان زدحام.. ظليت اباوع على السيارتات والعالم البيها.. صفنت عليهم هم من يباوعن علينا مثل ما احنا نباوع عليهم

لا لا يعني مثل ما انه اصفن عليهم وفكر اگول شگاعد يدور براسهم هسه.. والله العظيم هيچ من اباوع عليهم ويمكن هسه همه نفسي

وخرت عيني من السيارة الگدامي بعدما تحركت وتقدمت سيارة تشبه سيارة مطلب مدري اتخايل بس ما نتبهت على لون السيارة لان وخرت عيني مباوعه على الامام حاطه ايدي على خدي شوي وتحركت سيارتنا بسرعة.. ظلينا طول الطريق نسولف بالعائله الي گعدت يمنه.. منا ما خالة گالت بضحكه

-ابو ستار لو تعرف شصار

هاشم: شصار

-خطبو قربة من يمي.. انا گلت الها خيه ام حسن البت حامل.. هيَّ عبالها مانريد نطي دگلي والله ابني خوش ولد وهم ضابط وطاك وهم حلو هههههه

هيَّ تحچي وصافنه عليها بس كملت هتفت
قربة: عرفتها والعباس المرّة تباوعلي وانا اگول النفسي تتخايلين

ام سندس: دگلي والله دخلت گلبي وابني يدور هلى هيچ بنيه محتشمه وحلوة. هيَّ ما شاءلله حليوة وناعمه

شرار: وين ذو الفقار خلي يشوف مرته خطبها ضابُــــــــــــــط

ضحكت هازه راسي وهيَّ كملت
شرار: ها ضحكتي كيفتي تردين ضابط ولچ

قربة: انچبي حماوه حميتي على البنات انا متت حر

شرار: خليني احمه ولا اتماعو شلون يتعيقلن ايعععع مو بنات شايفات نفسهن

ظلينا نضحك ونسولف منا ما عمو هاشم ذبنا ونزل الغراض وشافنا دخلنا يله حرك السيارة رايح.

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

ذو الفقــــار: بللت شفتي مباوع على باب المطبخ منتظر مطلب على حر الجمر.. بينما اباوع وصافن وتذكر الايام المرت من يوم الزمت طالب الحد اليوم يله تحولت اوراقه القاضي، وهسه کلبي لازمه بيدي خاف ينحكم كم سنه ويطلع

وانا ما خايف منه لا ابد والله بس خايف على عائلتي
مالي طاقة اخسر واحد منهم بعد.
انا راحن اليه ثنين ما بقى بعقلي بس خيط واحد وهل خيط الواحد لو صار شي الواحد من اهلي ينكطع وتخبل من صدگ

ما مستعد اخسر ولا واحد منهم بعد
البيه كافي.. مالي حيل اتحمل موت وفراك عزاز
هوَ انا موت امي واختي ومدري شلون الحد الان انا واكف على حيلي

مو نوب يطلع من السجن ويجي يسوي شي بواحد منهم، خاف چان قبل يكرهه امي وكتلها على ابو يكرها، الى هسه يجي ينتقم شلون سجنا

سحبت نفس زافره منزل گوب الچاي
بعدما شربت ثالث گوب على ريگي بدون ولا احط لكمه بطني، متوتر هاي اول مرة اقلق بهل شكل
ولو انا متأكد على الدلائل النطيتها للمحامي راح تودي ورا الشمس بس خايف عنده واسطه ويطمطم القضيه

فركت وجهي كايم متجهه الباب المطبخ
حطيت الگوب على السنك ونتچيت على الدنكه الباب
ومصوب نظري على الباب الشارع
الساعة بـ12 الى ربع وهوَ ماكو طلع من الثمانية لان الجلسة بالتسعة، ولحد هسه ماكو وادك عليه وماكو ما يشيله
ظليت على هل حال دقايق وسمعت صوتها وراي
درت بس وجهي مباوع الها اجت بتجاهي وهيَّ بچادر الصلاة باوعت على الباب الشارع مرجع نظرها الي مكمله كلامها

يتبع

#بارت_38_.....#القسم٢




عيدة: بعدك واكف... شني ما اجه.؟

درت وجهي عنها مباوع على الباب راد بتنهّيده بينما رديت عليها هيَّ اجت وكف بصفي متچيه نفسها على الباب

ذو الفقار: ماكو الهسه ودك عليه ماكو ما يشيله

عيدة: خاف جلسته مدري شيسموها اطول

ذو الفقار: ما اتوقع.. أصلاً كل الدلائل النطيتها المحامي صورة وصوت وكلهن واضحات.
وعود هاي ما غير المستندات وغيرها وغيرها

-خاف ازدحام وتاخر بالطريق

رفعت ايدي ماشر الها بما اعرف.. وظليت ساكت ما راد بينما هيَّ هم ظلت ساكته
ثواني واجه على بالب ابوي.. درت وجهي عليها واحچي

-شلون صار ابوي.؟

سبحت بالسبحه راده وهيَّ تباوع على باب الصالة وتحچي اول كلماتها والباقي وهيَّ ترجع نظرها اليه وتحچي بحسره وقهر

عيدة: الضغط معلك عنده من ذاك اليوم الهذا اليوم واكله مو شي، ياكله لكمه لكمتين ويكوم.
وحچي وياه ولا يرد عليَّ، لحد اول البارحة طكت روحي حچيت وياه منا ما عاط بوجهي ويحچي مفرفح

يگلي تعرفين هاي السنين كلها وما تحچين نوب لا سنه ولا سنتين... صارلها سنين وما تجيني وتحچيلي
عايفيني مثل الطرن بالبيت لا ينش ولا يربط

وعود هاي ظل يحچي هواي انا خفت عليه
گلت هسه على هل فرفحه ينجلط.
وصدگ اتخربط عليَّ وحتاريت بي لا يخليني الزمه اشوف شبي احتاريت من صدگ
منا ما انا احچي وياه دخل مطلب وهم بشلعان گلب يله خلا يشوف ضغطه

تحچي وباوع عليها بدون ما اقاطعها
كملت كلامها وسحبت نفس داير وجهي عنها مباوع على الباب راد بهدوء

ذو الفقار: حتى لو عرف بالموضوع شراح يسوي.؟
هه هوَ مايعرف اخوه زين
اخوه عربيد يلدغ ويضم راسه، ليش انا متوازي
اخلي يعرف ويروح يتعارك وياه وطالب
يسوي شي الابوي

لان بكل بساطة اتوقع كلشي من طالب
ابو الي موت جدي من ورا مصايبه وحرك امي
صعبه عليه ما يسوي شي الابوي، هه وما شاءلله هوَ شلون يحب ابوي، يموت عليه سوده عليَّ يعشك تراب ابوي

وداعته وداعتچ، يشوف دم سنونه وما يشوف ابوي اتذكرى مرة من چنت ابو عمر سبع سنين، اذا جدي قارنه ويا ابوي شلون يشعوط ويظل يغلط

عيدة: شنسوي هذا الحاقد والحاسد ما يحب الخير الاحد، ويحقد حتى الى امة وابوه.
بس شنسوي ندعي الله يخلصنا من شره بحق ضلع الزجيه.. وهاي هسه من اجيتك نخيت ام البنين بضلع مولاتها تخلصنا منه وسويلها سفرة من طول لطول

هزيت راسي بان شاءلله.
وحكيت راسي متأفأف، بينما سويت هل حركه هتفت بهدوء وهيَّ تنصت الصوت المؤذن الي بده يمجد

عيدة: كوم توضى وتوجه الربك فوض امرك اله وهوَ خير المدبرين.. لا تباوعلي هيچ يمه كوم توضى وصلي لا تقلق الكاتبة ربك يصير لو يوكف جيش بوجهك

هزيت راسي بخوش عايفها وماشي الصحيات
كملت وتوضيت وكملت ويا ما جاي اتثبت سمعت صوت سيارة.. كملت تثبيتي داير وجهي مباوع على الباب مشيت فتحته وكفت بالباب مباوع على الشارع وبالتحديد سيارة مطلب

بلعت ريگ مباوع عليه اريد اتفحص تعابير وجها
بينما اباوع عليه سد الجامه وماكدر اشوف
عيونه لان لابس نظارات.
نازل سد الباب وقفل السيارة ودار وجها صاعد الرصيف وهو رافع ايدة اليمنى نازع النظارة
هزيت راسي بتوتر وهتفت والقلق تارس وجهي قبل الساني

ذو الفقار: ها.؟

عبس وجها زافر نفس بقهر راد عليَّ.
انا قبل لا يرد عليَّ وشفت عبوس وجها خرطت العافية... يعني هذا التعب كله والسنين كلها ماگدرت اخذ حق امي واختي والعالم البريئة
بلعت ريگي مركز بكلامه والخنگه ترست صدري

مطلب: شحچي ياخويه شحچي.. خليني ادخل وحچي الضيم وضلايم

گال هيچ وهوَ يفتح الباب يدخل
ظليت واكف بمكاني وجهي دايره اباوع عليه بينما اباوع عليه وهتف مرة ثانية وهوَ يكمل طريقة يدخل جوه

مطلب: سد الباب المن واكف بالحر

بلعت الغصة ساد الباب وماشي ورا بلايه روح
باوعت على امي الواكفه بالباب تباوع علينا ومدري شگالت ما سمعت شگالت كل بالي وتركيزي ويا السمعته

نزع حذائه داخل من يم امي وانا ورا
دخلنا احنا الثلاثه اباوع عليه راح الثلاجو طلع بطل ماي صكه نصه واحنا انراقب بي نريد نعرف شصار

عيدة: احچي ولك شصار.؟

نزل البطل ساده وراد وهوَ يرجعه المكانه
مطلب: خلوني اجر نفس

ذو الفقار: احچي مطلب لا تفت گلبي البيه كافيني
احچي شصار.؟

بوز شفته راد وهوَ يمشي بتجاه باب الصالة بينما يمشي وهوَ يضرب بفخذه رجله

مطلب: عمي العربيد انحكم بالاعدام هلهلو هلهوله

صفنت ورا ثواني اريد استوعب السمعته..ثواني انا متصنم اريد اصدگ الخبر الي منتظره كل عمري
درت وجهي مباوع على امي الي حالها حالي.. بس باوعت الها نزلت دموعي بسرعة البرق

اي هاي الدموع الي حقها تنزل
هاي الدموع الحقهر والحرمان الحياة العشتها كلها
هاي الدموع الي تمنيت كل ليلة ويوم ابچيها من اخذ حق امي واختي

هيَّ شافت دموعي بجت وياي مهلهله بصوت ناصي
هتزت كتافي والشهكه بصوتي.
ماگدرت اظل واكف، گعدت بالگاع رافع رجلي وحاط عكوس ايدي على ركبي وكفوف ايدي امسح بدموعي وتنزل

بينما انا هيچ امي اجت گعدت بصفي تمسح على ظهري مادري يا الي يمي ويا المو يمي كل الي احس بي دموع الفرح وشهكات الي نايمه بصدري سنين من يوم الشفت بي امي واختي يلوجن والنار تاكلهن نامت الحسرة بصدري

وهسه طلعت بعد سنين طويلة
طلعت بعد تعب وحرمان.. هواي حرمت نفسي من اشياء، مستقبلي وكلشي حرمت نفسي منه في سبيل احقق هدفي وهوَ اخذ حق امي من الضالم والحمدالله ربي جازه صبري وتعبي وحرماني بعد نص عمري الراح

على هذا الوضع امسح بدموعي وتنزل الثانية
وامي تمسح على راسي وظهري وتردد

عيدة: الحمد الك ربي الحمد الك ربي.. ما رجعت هل يتيم، شكرك يارب، اخذت حقنا كلنا شكراً ربي ليل ومسه

وخرت ايدي مباوع على السكف ساحب نفس اردد بگلبي "ربي ساعة الاستجابة ماعرف شلون احمدك خجلان منك ربي خجلان منك.. احمدك ربي احمدك ربي

گلت هيچ وعدلت نفسي ساجد على الارض وردد
شكراً ربي شكراً ربي، كملت ورفعت راسي مباوع على باب الصالة مطلب واكف وحالة حالي دموعه وخشمه صاير شكبره

ابتسمت بوجهه والدموع تنزل تخطلت ويا شعر لحيتي، ابتسامتي ونظراتي تشرح البداخلي.
تسولف التعب التعبنا انا وياه.. تعبنا الحد قبل لا اسمع هل خبر، بس امنت بعد كل صبر مفتاح الفرج
وجاني الفرج وماكو احلى منه.

بلعت ريگي رافع تك ايد ماشرله يجي
بس شافتي هيچ اجاني ويمسح بدموعه
گعد بصفي ولفيت ذراعي على كتفه ساحبه الصدري
وراسه صار جوه حنچي.. قربت شفتي من راسه بايسه بشمه،وهتفت وانا اوخر منه مباوع على امي وهم رفعت ايدي حضنتها الصدري مكمل كلامي

ذو الفقار: اخذنا حقها وخيراً.. اخذنا حقها يمه
هسه اگدر اغمض عيوني وانا مرتاح... هسه اگدر ارتاح من عذاب الضمير

مطلب: وعلي لو ما القاضي موجود چان هلهلت هلهوله تهز القاعة هز، بس گلت اسكت لا اعم على روحي

عيدة: يا يمه عمره المظلوم ما يروح حقى
اذا ما انوخذ حقى بالدنيا اكو بالاخره ميزان العداله
ما بي لا نحراف ولا عوواج، ولا ناقصة ياخذ حقنى الله لو يبقى آخر نفس بينه والحمد الله الاخر يوم بعمري احمده ليل ومسه

مطلب: صدگ وين ابوي.؟

گال هيچ وهوَ يوخر من يمي يباوع عليَّ
درت نظري على باب الغرفة مالته بس باوعت
شفت هاجر واكفه يم ابوي وتبجي وابوي واكف باب الغرفة، ويباوع علينا ونظراته ماعرف شلون افسرها

حقى ما الومه طول عمره چان مضحوك عليه من اخو
نوب بليلة ويوم يعرف حقيقة اخوه.
صعبه هذا اخو مو ابن اعمه ابن خالة ويگول عادي وفوك كل هذا هوَ الكاتل مرته وبنته

بلعت ريگي مبللت شفتي موخر امي عني كايم وامسح بدموعي متوجهه اله.
ماعرف شحچي ويا رغم چان ابوي صويحبي مو ابوي رغم عمري الصغير بس يحسبني صديقة قبل ابنه ومن ذاك اليوم الهذا اليوم ابتعدت عنه وكلامي قليل وياه، حتى ماعرف شني ابدي بكلام

بلعت ريگ المرة المليون.. وتقربت يمّه
وكفت گدامه باوعت على هاجر وهتفت مرجع نظري اله،

ذو الفقار: هجرة حبيبتي عوفينا شوي "بينما هتفت عافني ومشى داخل للغرفة يمشي على كيف من شفته دخل دخلت ورا وهو ولا حرف حچه
عصرت ايدي مباوع عليه مشى گعد على الجرباية لازم جبينه ويفرك بي.
سحبت نفس زافره متقرب من يمّه
وكفت گدامه مباوعه عليه وعلى شكله ثانية لا أكثر وگنبصت گدامه رافع ايدي ثنينهن وحده لزمت ايده البيها كانونه ولايد الثانية لازم رگبه.
عصرت اصابع ايده بخفه هامس بهدوء والغصة تارسه حروف الكلمة

ذو الفقار: يابه

رفع راسه وهوَ على وضعه لازم جبينه بايده
باوعت عليه رافع كتافي وحواجبي، حاچي بخفوت وحچي ودموعي تجري بينما هوَ يباوعلي بنظرات غريبهة بدون تفسير مدري الها تفسير بس ماگدرت افسرها

ذو الفقار: مـ مـ ماعرف شحچي وياك بس بس
كل الي اگدر احچي هوَ اگلك اخذت حق امي واختي و و وهم ماعرف أنتَ مقهور چيف ما گتلك بالسالفة
أو ضايج لان طلع اخوك اله ايد بحرك امي ماعرف بالضبط، بس يابه أنتَ مـ مـ ماشفت بعيونك ا ا ا انـ انا شفت بعيوني طالب طلع من بيتنا والنار مشتعله بي

وروح امي شفته بعيني هاي يابه شفته بهاي عيني شلون طلع من البيت وهوَ يتلثم.
وتـ تـ تذكر امي تذكر من رادتني انا... من دخلت عليها حچتلي كلشي... حچتلي شلون گال الها الي يندك بطالب ما يلوم روحه

وفوك كل هذا يا بويه هوَ مجرم تاجر وعنده انواع وشكال... يابه ماتعرف اخوك بكدي، انا طول هاي السنين انا اعرف سوالف طالب ودرسهن اله درس درس

وحتى لو هوَ اخوك وتنقهر عليه شلون راح يموت
بس هاي امي غاليه عليَّ.
يابه لو اعرف اخوي من لحمي ودمي مسوي هيچ اذبحه بيدي هاي والله اذبحه.
بس انا ماردت الوث ايدي بدمه القذر.

ردت الدوله تاخذ حق العالم وحق امي
والحمدالله الله ما خيب املي بي
اخذ حق امي واختي وكل العالم البريئة، الي ماتت على ايده، وحشى من اسمه العظيم يرد من توسل بي
ما خيب املي ورجائي طول هاي السنين

احچي وهوَ يباوعلي ما وخر عينه وعاض شفته وعيونه تصب دموع وياي.. كملت كلامي رافع ايده البيها كانونه بايسها ثواني وكملت الحچي

ذو الفقار: تصدگ يابه طول ذيچ القتره انا حاط گلبي بيدي عليكم، اخاف عليكم من يمّه.
خاف يغدر بيكم ويكتلكم، وانا ما عندي غيركم
كافي الخسرته نوب اخسركم

انا امي عيدة من وده عليها المخانيث تخبلت
يريد بكل وسيله يدمر شملنا
وانا ما عايز يا بويه اخسر واحد منكم
الراحو مني جمرة فراكم الهسه تجوي دلالي

گلتها وبچيت مهتز جسمي.. هوَ بس كملت وخر ايده من قبضة ايدي رافعه لازم راسي منوم راسي على رگبه، سوى هيچ وكمل بايس راسي ويحچي بقهر وصوته متروس حسرة وتعب

صاحب: ليش يابويه ليش ما حچيت
ليش خليتني طول عمري مغشوش والماي جواي وما حاس عليه..والحقير كضه عمره هوَ وعيالة يعيرون بيه وخلو اسمها علچ بحلوك العالم
امك انتحرت وانا لاثول ماعرفت اعرف ناسي
ولو يابويه اعرفه هوَ شني بس ما ظنيت بي ولا بيوم هو هيچ، ولا حسيت عليه كل هاي سوالف من ورا

وخرت منه مباوع عليه راد وامسح دموعي
ذو الفقار: اتوقع كلشي يابه.
خوفك من القريب ياخذك بقناع القرابه وهوَ ثعلب ماكر يرسملك المصيده ويصيدك بيها

اتذكر جدي الله يرحمه گلي يم العقرب لا تقرب يم الحيّه افرش ونام وقتها سألته شني المعنى
الهسه اتذكر گال العقرب قريب من تتقرب منه يكرص
والحيه اكو بيها سامة وكو لا تلدغك ما تحس وهاي همه العالم الغربه

رفع ايده البيها كانونه ماسحه وجها
صاحب: على هل صدمه النصدمت بيها كمت بنفسي ماثق

تنهّدت كايم من گدامه وهتفت مباوع على باب الغرفة الباب مفتوح وگدر اشوف امي تفتر بالمطبخ هيَّ وهاجر، شفتهن ورجعت نظري اله مكمل كلامي اريد اكسر حاجز بيني وبينه

ذو الفقار: لا تثق بعد.. على عموم ابونا هسه كوم أكلك لكمه، وكوم النا على حيلك ترا البيت يلعب النفس چيف ما بي حسك، وعلي لو ما اسمع صوتك ولا ارتاح

باوعلي مبتسم بهدوء.. بينما شفته هيچ مديت ايدي اله وهوَ حط ايده وقبضتها بقوة مكومه من مكانه
كومته ومشينى طالعين من الغرفة والضحكه تارسه وجهي، الفرحه التارسه روحي لو اوصفها طول عمري ما اتعب

ويا ما طلعنا امي دخلت الصالة بيدها جدر وهاجر وراها شايله مواعين.. باوعت الهن وعلى الصالة مفروشه السفرة وبيها الزلاطه والخبز.
مشيت انا وياه للسفرة عفت ايده وگعد بصفه بينما امي حطت الجدر وگالت موجهه كلامها الهاجر

عيدة: صيحي الاخوچ وجيبي صينيّة نسيتها

هزت راسها رايحه جايبه الصينيّة ومشت وكفت يم المحجر صاحت على مطلب واجت انطت الامي الصينيّة وخرت القبق وحطت الصينيّة رادت تكلب الجدر وجاها صوت مطلب

مطلب: عوفي عيوده انا اكلبها

عافتها واجه گنبص بصفها لازم الجدر زين وكلبها
بينما يسوي هيچ انا أكل بالخيار وباوع الهم من واحد الواحد.. من ابوي الامي والمطلب والهاجر.
السفرة ناقصة نفر واحد.. وان شاءلله الدور جاي حتى اسعى انا الين گلبها عليّ

سحبت نفس برتياح وبدينه ناكل ونضحك
وانا أكل وباوع على ابوي ماريده يتقهر على واحد مثل طالب.. ما يستحق واحد ينقهر عليه
ظلينا ناكل ونسولف منا ما امي سألت مطلب على الجلسه هوَ ياكل بالدولمة بدون خبز ويحچي

مطلب: محد اجه غير ابنه عباس والمحامي وعمي طارق، ولو تشوفون عمي طارق هوَ وعباس كوه واكفين بالجلسه يردون بس تخلص.
وانا عبالي هسه عباس يشك زيجه ويعيط على ابو راح يموت شو هذا باوع على ابو وگال

-هذا نهاية الظالم

انا وعمي طارق انباوع على طالب شلون يعيط ويصرخ على القاضي ولا واحد مهتم اله الشرطة تسحل بي سحل

ذو الفقار: وقاهر شسويتو عليه.؟

مطلب: مثل ما عرفت انحكم اربع سنوات

ذو الفقار: حرامات كون أكثر

مطلب: المهم نخلص منه كم سنه عود منا الذاك الوقت الله كريم، عود من يطلع نخطط اله مخطط ثاني ههههههه

صاحب: قاهر هذا منو.؟

مطلب: هذا ذراعه اليمين الطويلب

هزت راسها بها ساكت.. محد حچه التهو بالأكل
بينما انا صبيت لبن ونطيت الابوي وصبيت ثاني انطيت الامي.. وآخر شي صبيت الروحي
شربت وكملت وكمت من السفرة طالعه اغسل وتوضى وبدي من اليوم صلاة الشكر.
غسلت وتوضيت ويا ما كملت دخل مطلب مباوعلي

مطلب: انروح اليوم النجف

ذو الفقار: اصلي وكمل ونطلع

هز راسه بخوش وهتف وهوَ يتقرب يغسل
مطلب: خوش بينما اسبح وحضر نفسي.. وها مو تنسى الصندوگ جيبه مو گلت تاخذه ويانه

ذو الفقار: طبعاً شلون

عفتها طالع من المطبخ صاعد فوك
دخلت الغرفتي اتجهت الميز التواليت اخذت تربه من الجرار وتوجهت الصلاة.

كملت صلاة الواجب وصلاة الشكر وگعدت على السجادة اسبح وصافن بالفراغ.. كملت وكمت حطيت التربه بمكانها ورحت متجهه الكنتوري.
فتحته وباوعت على الصندوگ راح ينفتح بعد 19 سنه مزدود

سحبت نفس ساحبه مطلعه حاطه على الميز التواليت
ورجعت احضر مالابسي.كملت تحضير كلشي وحطيت الصندوگ بعلاگه چبيرة، وطلعت من الغرفة سادها سديتها ومشيت الغرفة مطلب، دكيت الباب ويا
ما دكيت الباب انفتح. باوعت عليه مبدل

مطلب: ها نتوكل

ذو الفقار: انطيت خبر الابوي.؟

-اي من صعدت گتله.. يله خلي نمشي هم يله نوصل
قبل المغرب

هزيت راسي بدون مارد، نزلت وهوَ وراي.
ودعناهم وطلعنا صعدت بالصدر وهوَ الي يسوق
طلعنا من المنطقة ونسولف منا ما طلعنا من المحافظة وصلنا حوالي بالاربعه، بوجهنا رحنا المقبرة انزور امي على الضوء اذا زرنا الامام شيطلعنا منه على هل ازدحام احنا وقريب للاذان اذا طلعنا

رحنا المقبرة البيها موتانا، صفينه السيارة نزلت الصندوگ.. وقفلناها ومشينى
لان المكان البي امي ما يدخل بيها سيارة
اشترينا ماي ورد دبتين وشالهن مطلب
اباوع على القبور، ومتلهف الشوفتهن الي يگول وكفات الي منظراتني

كل خطوة اتقرب المكانهن گلبي يدك بكل قوته
ماعرف شلون راح احچي وياهن
اتمنى ينفتح الگبر ويطلعن يگعدن گدامي وحچي وياهن واگلهن اخذت حقچن
هاي انا جاي من هناك الهنا وانا ماخذ حقچن منه
ما نسيتى ثارچن طول هاي السنين

سحبت نفس مباوع على الگبور
ادور بينهن منا ما تقربنا لان هن بالمقدمة مو جوه لمحت القبرين وانا جسمي كله كام يرعش
اجن گدام عيني وهنا يفترن گدامي والنار تاكل بيهن

العلاگه كامت ترجف بيدي
عضيت شفتي ومسرع بخطواتي عايف مطلب يمشي وراي وصلت يم گبرهن گعدت گدام گبورهن
حاط العلاگه گدامي رافع ايدي ماسح بكف ايدي على اسم امي ودموعي تنزل عشرة عشرة
امسح بالاسم مالها وحچي بخنگه كوه تطلع الكلمة من حلكي

ذو الفقار: يمه... يوم... عزيزتي... حبيبتي
هاي احنا ولدچ يوم... گومي گعديلنا أنتِ وطيبتچ
گومي يوم... گومي اسولفلچ شلون اخذت حقچن
گومي ينظر عيني گومي... شوفي ولدچ اخذو حقچ من الظالم

غمضت عيوني بقوة مكمل بشهكه
ذو الفقار: يمه عزيزتي..حبيبتي شني ما مشتاقى النا.؟
يمه گلبي مطگك عليچن وحق علي الكرار
گومي يا يمه،ليش ما تكومن اشوفن طولچن الحلو
گومن يبعد طولي گومن

ذو الفقار: يمه... يوم... عزيزتي... حبيبتي
هاي احنا ولدچ يوم... گومي گعديلنا أنتِ وطيبتچ
گومي يوم... گومي اسولفلچ شلون اخذت حقچن
گومي ينظر عيني گومي... شوفي ولدچ اخذو حقچ من الظالم

غمضت عيوني بقوة مكمل بشهكه
ذو الفقار: يمه عزيزتي..حبيبتي شني ما مشتاقى النا.؟
يمه گلبي مطگك عليچن وحق علي الكرار
گومي يا يمه،ليش ما تكومن اشوفن طولچن الحلو
گومن يبعد طولي گومن شوفنچن
هاي... هاي جيتنا واحنا ماخذين حقچن منه

يا يمه اخذنا حقچن... اخذنا حقچن من يمّه
وها اتذكرت، قبل لا اخذ حقچ منه حركت ايد الذبت عليچ النفط وشعلت النار الحركتچ.
حركته خليته يضوك الوجع الشفتنا، يا يمه
بس ما فاخ گلبي، اريد اخلي يفتر؟ دامي شلون ما خلاچن تفترن تردن تتخلصن من الألم

احچي والكلمة كوه تطلع من الغضة
بينما احچي صوت بواجي مطلب ترست إذني
زاد بواجيي مكمل وامسح على گبر طيبة واحچي واتذكر آخر شوفه الها شولن مورمه والوجهه ضايع

ذو الفقار: ها عزيزتي ها ماي عيني
عذريني خويه عذريني أنتِ وامي ماگدرت انقذچن
ماگدرت اطفي نارچن... بس... بس گدرت اخذ حقچن منه اي... اي اخذت حقچن منه
وراح يلحكجگن وشكن يم ربچن عليه شلون حركچن اي اشكن الربچن شلون حركچن بدون رحمة
اشكن الربچن شلون خلاچن تفرفحن تردن تخلصن من الوجع

هتفت آخر كلمة وانا اجر العلاگه وطلعت الصندوگ بعدها مديت ايدي دور بالجيوب اطلع المفتاح طلعته بايد ترعش.. فتحت الصندوگ
باوعت على محتوياه رافع ايدي مغطّي فمي وبچي وجسمي يهتز.. وحچي وباوع على الصور والحاجات الباقية منهن اليه

ذو الفقار: هذن البقلي منچن، هذن الشبع روحي بيهن
اخ اخ يايمه اخخخ.. اخ يا وجع فراكچن اخ يايمه شسوي ويبرد افادي... گليلي يبعد حيلي شسوي ويبرد افادي

هاك مطلب شوف هاي الوجوه الحلوة تحترك ها.؟
هاي الوجهو الترد الروح تحترك،ليش ها ليش.؟
ليش ها ليش بأي ذنب تحترك.
شني الذنب السونا ويحركهن، ليش شسوله ويحركهن ربي شسون من ذنب ويحركهن ها شسون

مطلب: ذو الفقار كافي فدوة اروحلك كافي لا تسوي هيچ مردت روحي يا خويه مردت روحي

ذو الفقار: ولك والله اصبر بروحي گدامكم وعلي ابو الايتام اصبر بروحي گدامكم.
انا ميــــت وعلي ميت، انا مت وياهن وعلي ظال بس جسد ماعندي روح والعباس بس جسد

احجي ودك على صدري مفرفح
الجمتهن الهسه بروحي.. ماگدر انسى منظرهن
ما يروح من راسي، ماگدر اتخطى موتهن
وياريت موتهن مثل العالم.. شلون ماتن ربي شلون ماتن

كملت كلامي وانا اشيل الصورة مالتها الماخذينها احنا الخمسه انا ومطلب وطيبة بالارض وامي وابوي واكفين وبوي لازمها من كاتفها وضاحكين
ضحكتها الحلوة الترد الروح حرمني منها

ذو الفقار: هاك هاي الضحكه الحلوة تنام جوه التراب
ليش ربي ليش فدوو اروح الاسمك.
ليش هيچ تروح وحدة مثل امي، وعلي ماكو مثلها
ام ماكو مثل امي ام ماكو.

مطلب: كافي ذو الفقار كافي بعد اخوك مو زين حرام كوم لم الغراض خلينا نغسل الگبرين

باوعت عليه ورديت وانا اذب روحي على گبورهن
وحچي ومسحه على كل وحدة بيهن

ذو الفقار: شكوم ما شبعان منهن شكوم
اريدهن اشوفهن اريد اشبع منهن، محد منهن كامن النا وتلكتنا، ليش يمه ليش ما دگومين تشوفين ولدچ گومي يمه گومي شوفي ولدچ

جرني من الگبر جر موخرني عنهن وانا الي
يگول هسه سمعت خبر موتهن.. الي يگول هسه طلعوني من غرفت امي وانا مصدوم بخبر موتها

فقدت على روحي ومطلب خطيه حتار ماعرف شلون يبعدني عنهن كوه، جرني مبعدني عن الگبرين گاعد بنص الطريق، ظليت گاعد بمكاني وباوع على گبرهن وبچي بسكته مالي بعد طاقة اعيط.
هوَ شافني هيچ راح لم الغراض البصندوگ وجابه حطا يمي ورجع يغسل بالگبرين وباوع عليه ورجلي ممدوده على طولها وباوعلها بدون روح

ظليت على هل حال منا ما كمل وكف رافع ايده يقرأ الفاتحه كمل ودنك شال الدبات واجه بتاجهي باوعت على الگبور ما باوعله بينما هوَ وكف فوك راسي

مطلب: يله خويه كوم هم يله نزور ونرجع

مارديت عليه جسمي باد ومالي طاقة احچي حرف
من ما شاف من استجابة اخذ الصندوگ وحطا بالعلاگه ولزمها هيَّ والدبات بايد وحدة والايد الثانية مدها لازم ايدي جارني ما نجريت باوعت عليه وغمضت عيوني وهتف بتوسل

مطلب: كوم بداعة الغالية كوم

فتحت عيوني طايحه دمعتي باوعت على گبرهه
ورفعت رجلي ومتجي ايدي بالارض كايم
نكتت ايدي ماشي اسحل بروحي الگبرهن
وكفت گدام الگبر بايس گبر امي بشهكه وكبر طيبة كذلك، وخرت راسي وبديت اقرأ الفاتحه كملت.
ودعتهن ودرت وجهي بس روحي وعقلي وياهن

مشيت ومطلب مشى بمستواي.
ابتعدنا عن گبرهن طالع من المگبرة البيهن هنه
انطه مطلب الدبات للولد الي شترينه منه انطا وانا كملت طريق للسيارة، وصلت ومطلب وراي
وكفت يم باب الصدر مباوع على السيارات تروج منهن الجنازه ومنهن سيارات كوستر

شوي وجه مطلب باوعتله بيده بطلين ماي فتح واحد ويحچي

مطلب: دنك خلي اغسل وجهك

سويت مثل ما گال وظل يغسل وجهي
كمل ونوب اخذ بيد وظل ينكت بالتراب العلى ملابسي.. كملت وصعدنا بالسيارة متجهين الامام وهاي حوالي بالسته الى ربع مدري شگد

وصلنا الامام صفينه السيارة ومشينى للامام
دخلنا من باب الجنايز.. اول ما دخلنا وشفت القبه
حچيت بداخلي وانا امشي ومطلب يمشي بصفي

*يا ابو الايتام علي، انا واحد من ايتاكم وطلب بجاهك عند الله تلهمني الصبر.
ماعندي غير الصبر، اريد من الله ومنكم تنطوني الصبر يا سادتي وأمتي الطاهرين، بس الصبر منكم ماريد شي بس الصبر.

احچي امشي. منا ما دخلنا التفتيش فتشونا ودخلنا
رحنا رأساً للحمامات غسلنا وتوضينى وطلعنا
گتله زور أنتَ وانا اظل هنا شوي ارتاح وسوى مثل ما گلت

بقيت گاعد گدام الحضره بين العالم والعوائل
اباوع عليهم عالم تارسه الحضره
وجهال تلعب وتركض هيچ وهيچ...اباوع على الرايح والجاي ومرت من گدامي طفلة هيچ تجي بعمر السنتين أو اقل جمالها يخبل وسمينه ولابسه بدله صلوخ تجن

هيَّ باوعتلي وابتسمت بوجهي
ضحكت بهدوء واشرت الها تجي رأساً اجت
بيدها جكليت ثنين.. اجت گعدت گدامي ومدت ايدها انطني جكليته.. اخذت منها وحدة والايد الثانية كرصتها من خدودها سألها بهدوء

-شسمچ.؟

-لوح

-شسمچ

-لوح

عقجت وجهي ما مفتهم كلامه ردت اسألها وجاني صوت من وراي باوعت مرّة چبيرة ولابسه شيله بيضه وجها بي قبول مو طبيعي ابتسمت بوجهي واشرت الطفله دكوم

-اسمه روح يمه

-حلو وغريب

-اي ابوها يگول اول ما شفتها شفت روحها حلوة وسماها روح

ابتسمت مباوعه على الطفلة وهيَّ رجعت هتفت وبعدها واكفه ولازم الطفلة

-مزوج يمه.؟

-اي حجيه

-عندك اطفال.

باوعت عليها بالع ريگ هاز راسي بالنفي ابتسمت
-يصير عندك يمه، تصير عندك بنيه حليوه مثلك
وان شاءلله عن قريب تسمع بهل خبر يمه

-منين يصير عندي

حچيت بدون وعي هيَّ باوعتلي
-اوكف اودي هل بت ورجعلك

هزيت راسي الها بخوش وراحت شوي ورجعت اجت گعدت بعيد عني ومدت ايدها بي حلويات وحب باوعت على الجيس وعليها

-اخذه يمه سلي روحك بي

اخذته منها وكملت
-اي يمه احچي اسمعك شبيك ليش ما يصير عندك شني المرّة بيها شي.؟

هزيت راسي بلا
ذو الفقار: لا ثنينه ما بينه شي بس المرّة زعلانه عليَّ

-يمه منكم الزلم شوف شمسوي الها وزعلانه منك

ضحكت بدون صات منزل راسي وكملت كلامها
-شوف يمه انا مادري شو شفتك ودخلت گلبي
وجهك من شفته شفت بي تعب وحزن فضيع وشايل هم على چتافك، بس وداعت ابو الحسنين علي
الك ايام ربك يعوضك على ايام التعبت بيهن
ويجي يوم وتجي الهنا، وتذكر هذا اليوم شلون شايل هموم الدنيا على ظهرك وتشوف روحك ماتگدر بس كله راح يروح وتتعوض من ربك

ذو الفقار: ادعيلي خالة ادعي يتسهل طريقي هلبت أنتِ قريبة الربي

-طريقك مفتوح يمه، بس أنتَ اتعب على نفسك يم ربك، اتعب الربك وربك ينطيك على كد تعبك
وان شاءلله الاخبار الحلوة تجيك مثل المطر بإذن الله وهسه اترخص منك الاهل يصيحون عليَّ

تحچي وما قاطعتها منا ما كملت وترخصت مني
كلامها رتاحيت من حچت وياي رغم ما حچت هواي بس رتاحيت، باوعت على الجيس لازمه بدون ما اكله

ظليت على هل وضع دقايق وشفت مطلب جاي بتجاهي كمت ونطيته الجيس مخلي يمّه.
رحت زرت منا ما مليت وشبعت زيارة وطلعت كل هموم العليه بضريح ابو الايتام.زرته وصليت صلاة الزيارة وكملت وطلعت

ظلينا گاعدين بالضريح ومطلب نايم على فخذ رجلي ومغمض وانا امسح على شعره والعالم التروح وتجي تباوع علينا شلون نتشابه بس الفرق الخشم
ظليت هيچ منا ما أذن صلينا صلاة وكملنا وطلعنا من الامام

اخذنا حلويات للاهل وطلعنا من الامام
تعشينى بالمطاعم البعيده عن الامام.. تعشينى وكملنا وبالرجعه سقت السيارة بداله

رجعنا للمحافظة مالتنا بالعشرة ونص
ما رحنا للبيت كلنا نتسحر ويا الولد بالمطاعم وصدگ التمينه كلنا وسوالف بخصوص طالب منا ما تسحرنا وكملنا وكل واحد رجع البيته

بالطريق الرجعه للبيت هم اخذت السواقه عن مطلب تعب خطيه.. وكفنا بالسايد الشارع ازدحام العالم طالعه تسحر بالحدايق والمطاعم

قربت السيارة بعدما مشت السيارة القبلنا
مسحت عيوني مباوع على الجانب السيارت البصف سيارتنا مدري شلون ولمحت وحدة تشبه قربة مدري هيَّ قربة مادري اتخايل.. لكن ماگدرت اشوف زين لان السيارة تحركت ماشيى على السريع

طردت عن بالي هاي عيوني ظلت تغوزل من البچي
ظليت طول الطريق بالي يفكر بيها.. خلي بس ابوي يصير زين افتح الموضوع وياه، الى متى اتظل بعيده عني

رجعنا للبيت قبل لا يمسك.. سلمنا عليهم ونطيتهم الحلويات وصعدنا.. غسلت وحطيت ماي يمي ونتظرت يأذن حتى انام، بس أذن صليت وكملت ونمت

يتبع...

#بارت_39_



( وَنَحْنُ أَقْرَبُ إِلَيْهِ مِنْ حَبْلِ الْوَرِيدِ )

◍•ᴗ•◍◍•ᴗ•◍◍•ᴗ•◍ ◍•ᴗ•◍◍•ᴗ•◍◍•ᴗ•◍

.
.
.
.

اخذت نفس زافرته بتنهّيده وعيني على باب الشارع
شلون اگدر اطلع وروح اهد عليهم واحد واحد
وحظي الملطم لا اگدر احچي لامي ولا الابوي
وعليا حچيتله السالفة ورا ما رجعت منهم بيومين اتذكر من مطلب گالي صبري الجمعة
وانا ما شفت شي صار خليت وحچيت ويا عليا

والاخ طلع يعرف من زمان هوَ صاحي وما بي شي
وانا هل اکول ليش من اکله اخذني اشوفها يتحجج طلع منطينه علم وساكت
هسه عوفنا الاهم مادام واحد من اهلي
يعرف هاي هيَّ بس غير نعرف وين هيَّ وبيا گاع موجوده، قابل نظل مغلسين وما ندور لو نسال هيَّ وين

احچي ورد على نفسي واخطي خطواتي متقدمة الحديقة، الي طولها وعرضها متر بمتر
هي مزروع بيها بس ياس وجهنمة والتراب مالها مسوين عليه طابوكات حتى لا يطيح علي زباله

مشيت وخرت المده من الكرسي وجريته حاطته
يم شجرة الياس وگعدت
رفعت ايدي كطعت غصن، وظليت امرر بي بالغصن امسح بي حاجبي، وعيني على باب الشارع منتظرة عليا يجي لان ما بقى على الفطور غير نص ساعة

وحنا النا اليوم برمضان ثلث ايام.. هذا اول رمضان قربة مو ويانا.. واول رمضان ما اسمع حسها بالبيت
نوب المشاكله امي تسأل وكلها زينه ذاك اليوم رحت الها زينه.. وبس احچي وياها هيچ اروح اهد على عليا وعيط عليه وهوَ ولا كأنه

الى متى انچذب عليها.. ان ذاك اليوم بيوم المسواك مال رمضان ولو ما سويت روحي متخربطه چان راحت الهم، ولو تعرف هيَّ ماكو وهيچ صاير غير يعلك الضغط عدها اربع ميه.

ولو سالفة ذو الفقار شوي بيها مجال بس من تعرف بيها ماكو، ومحد يعرف هيَّ وين غير تسودن نوب ياهيَّ هاي حبيبتها مختفيه ومالها اثر
وعلي توكع علينا فرد وكعه

توقفت موخره الغصن من حاجبي مباوعه على باب المطبخ، اجتني فكره بيها حظ بس خاف يشوفني خفه وبس اريد احچي وياه
چؤ لا قابل جاي تتغوزلين وياه، هوَ كلها تسألي كم سؤال ويولي

لا ليش اكول عنه يولي.؟
اي خلي يولي چذبو علينا، لو بيهم خير ما چان چذبو هل چذبه، خلونا اشهر احنا مصدگين ابنهم مخبل على گولت قربة، نوب بليلة وضحاها طلع صاحي وصح من عقلي

بس محيرني شغلة شنو الي خلا يسوي هيچ.؟
شنو الشي القوي الي خلا يگول على نفس مريض مو صاحي، ماكو واحد يدعي على نفسه بالمرض.
نوب مو أي مرض مسوي روحه مريض نفسي وبالك عني

بس لازم اعرف... بس خلي ترجع قربة استجوبها الف سؤال بسؤال.. ولو لا خلي عليا يمي لازم استجوبه هوَ طبعاً هسه حاچين اله السبب ليش مسوي روحه مريض

احچي ويا روحي ورد على نفسي... وصافنه على باب المطبخ.. ذبيت العود وكمت من مكاني متجهه للمطبخ حاچيه ويا روحي مثل المسودنه.. انتقلت العدوى اليه من النسيب

غيم: گومي غيمو گومي جيبي التلفون واحچي وياه بالاخي واخي، حتى لا يگول هاي تريد تحچي وياي كوه صيري ثگيله ولا تتزوملين بالحچي وياه صيري رزنه حتى من ما يرد عليچ خلي وطلعي من المحادثه بكرامتچ

دخلت المطبخ مباوعه على الجدورة وطكتني الريحه
يابويه شيجيب المغرب وياذن
لعنت الشيطان متقربه الثلاجة مديت ايدي اخذت الموبايل وطلعت راجعه المكاني

گعدت على الكرسي وفتحته لان بدون رمز امي ما حاطه رمز.. ولو هوَ تلفونها بس بلاسم انا الازمته اربع وعشرين ساعة خطيه هيَّ تلزمه بس من تخابر عليها خالة

سحبت نفس مشجعه نفسي.
دخلت على الفايبر دورت بالسجلات رقمه
لكيته آخر واحد كاتبة عليه امي مطلب حمه قربة اي اعرف يمه اسم لو جريدة اكتبي مطلب وفضت ولت هوَ احنا عدنا واحد اسمه مطلب غيره

باوعت على صورة الشخصية مالته الحاطها
ماخذ صورة اتوقع بعرس ذو الفقار لان نفس الملابس الابسهن بالعرس.. دققت بالصورة مبلله شفتي وبنفس الوقت بطني ظلت تبزبز والابتسامة شكت حلكي

باوع على دورت وجها وعيونه وتفاصيل الباقية
نسخه من ذو الفقار بس مطلب خشمه مفروش ومرفوع أما ذوالفقار يختلف ويا بالخشم
بس حلو حتى خشمه حلو هوَ العراقي اذا خشمه مو چبير ما بي معنى..حلاته بخشمه حتى يحشره بكلشي هههههه

سحبت نفس مجمعه كلام براسي شلون ادز رساله دخلت على رقمة مباوعه حالة النشط ماله متصل همزين حتى يرد بسرعة
كتبت"سلام عليكم شلونك موجود"
دزيتها ورجعت قريت الكلام، هسه انا المن كتبت موجود چا هوَ مو هل متصل

تأفأفت منتظرته يرد، ثواني وصارت الرساله زرگه
يعني شافها.. هوَ انا شفتها صارت زرگه ظل گلبي يخفك خاف احچي وياه وچفص.
غيم شبيچ رجعي غيم النجره والسانها بطولها لا تتوترين صيري نجره

احچي ويا روحي وهز بنفسي، لحظة لا أكثر ودز رسالة من التوتر والطفكه العندي قريت الرسالة بالمگلوب... عدتها مرة ثانية يله، وأقرأ وصافنه على كلمة هذا شبي.

مطلب: وعليكم السلام.. لا ما موجود بس انا بديله المستخدم موجود

أقرأ برسالة ودز مرة ثانية صوتيه.
صخام شلون اسمعها، دكيت على وجهي بخفه مباوعه على المطبخ ومرجعه نظري على الموبايل
نصيته على آخر حبايه وفتحت البصمه رافعه الموبايل الإذني سامعه كلامه الي بده بحترام بعدها بصوت بي ضحكه خفيفه

مطلب: اهلاً بخالتي شني شلونچ اخبارچ
يا خالة مأثر عليچ الصيام شني

خلصت البصمه، وخرت الموبايل من إذني حاطته گدام وجهي... باوعت على البصمه ساحبه
نفس طويل زفرته وكتبت
"هاي انا مو خالة" دزيتها وشافها شوي ورد

مطلب: ياهيَّ أنتِ.؟

ستغفرت ربي وبديت اكتب
واكتب ودز رسالة ورا رسالة وهوَ يرد عليَّ
ويا كل رساله

غيم: اخي الكريم
- انا اخت قربة
- اريد اعرف اختي الى متى مانعرف هيَّ بيا گاع
- اخوك طلع اصحى مني ومنك
- بعد شوگت اختي ترجع

مطلب: انا اسمي مطلب مو كريم غلطانه
-يا هلا باخت مرت اخي
-موجود گاعد بالعراق العظيم
-اي والله طلع اصحى مني ومنچ، شفتي شلون

أقرأ بكلامه وصافنه هذا من كل عقله.؟
غمضت عيوني بعدها كتبت ولازمه نفسي كوه
منا صايمه وريگي يابس وميته عطش وجوع وهوَ يتمضحك عليَّ

غيم: جاي احچي وياك
-ما جاي اتشاقى
-اريد اعرف اختي وين.؟
-احچو هيَّ وين. ليش ما تگولون هيَّ وينها

دزيت الكلام وحدة ورا الثاني وهوَ ظل يدز رسالة على رسأل الي دزيتهن

مطلب: اسمعچ
-اعرف
-ليش جاي تتعاركين

بلعت ريگي مباوعه على داير مدايري خاف امي تجي على غفله لو ابوي لو عليا يجون ويشوفوني
رجعت نظري للموبايل كاتبة برسالة واحدة

غيم: ما جاي اتعارك شفتني عيطت شو هن رسأل
على العموم سألتك ورد عليَّ.
اختي وينها وين راحت.؟ گلي وين صايره بتنا ما نعرف عنها شي... هاي لو غيرنا چان كلبو الامة بس هاي لان امي وابوي فقرة وما وراهم احد هيچ تسون وانا جاي احچي وياك آخر مرة
اذا ما دگول وينها اروح احچي الابوي كلشي وهوَ يجي يتصرف وياكم خوش.

دزيتها وشافها ظل يكتب منتظرته منا ما دز رسالتين

مطلب: بيج خير وروحي احچي
- منتظرينا احنا

رفعت حواجبي فاتحه عيوني، يستهزاء..؟
حلو حلو انتظر الورا الفطور وشوف شراح اسوي هزيت راسي بوعيد كاتبة
غيم: خوش انتظر الورا الفطور وشوف بعينك

دزيتها وطلعت من المحادثه بسع.. ستوني طلعت واجه اشعار منه داز كلام ورا سمايل يضحك ومدمع

مطلب: تردين تشبعين بطنچ يله
خوش...خوش عود تعالي وياهم هدي علينا

ما رديت عليه.. رجعت دخلت على الفايبر حذفت المحادثه مالته وطلعت من البرنامج گايمه
مشيت متجهه المطبخ.. ويا ما دخلت دخلت امي من الصالة، باوعت عليَّ منزله نظرها الايدي
عگدت حوجبها گايله بقلق

فاطمه: دكت عليچ قربة.؟
شو حتى ما اجت صارلها شگد.. ذاك اليوم من رحتي ما گالت الچ شبيها. هيَّ من اجتنا رادت تروح الدكتورة وما رحنا، وخاف رايحه وطالع بيها شي وتخاف تحچيلي

بينما تحچي وهيَّ تدخل واكفه بنص المطبخ وانا اتقدمت احطيت الموبايل على الشحن فوك الثلاجة وبس هتفت آخر كلمة تردت وجهي عليها گايله بهدوء

غيم: لا اسم الله عليها ما بيها شي.. وانا اروح اقرأ قرءان عود من يأذن صيحي عليَّ

گلت هيچ على السريع ماريد تفتح الموضوع وتعالي شردن عليها... خليها على الاقل ورا الفطور تاكل الها لكمة وترتاح، مشيت اتوضيت وگعدت أقرأ قرءان منا ما أذن وصاحت عليَّ امي اجي افطر.

سديت القرءان مصدقه.. حطيته على السجادة طالعه من غرفة عليا.. ويا ما طلعت صارو بوجهي ابوي وعليا واكفين گدام الكاونتر.. مشيت يمهم بالچادر الصلاة سلمت عليهم وكفت بينهم بينما امي گاعد تصب شوربه وتنطي الابوي.
هوَ ابوي من دون صيام يموت على الشوربه يشرب بيها شراب

اخذ كاشيه وصبت ثانية.. وانه اباوع عليها وصبيت لبن قريت دعاء الافطار وشربت.. نزلت البطل مباوعه على عليا وعليها من گالت

فاطمة: يمه ما تاخذ الخيتك دولمة تحب الدولمة ما دامك بعدك بملابس الشغل

باوعلي صفح بعيونه وباوع على امي بينما انا قابلت نظراته برفعه حاجب.. باوعت على امي واكل بالتمر ومركزه بالكلام الراح يگوله

عليا: همه مسوين قبل لا اجي چنت احچي ويا مطلب بعدهو وياها وسألتها شمسوين گالت مسوين دولمة

بلعت التمرايه مباوعه عليه بعيون مفتوحه على وسعها وحواجب مرفوعه.
لا لا يعني مستمرين يچذبون.!؟
غمضت عيوني طالعه من يمهم.. خلي اروح اكمل واجبي الربي وبعدها اجي اگببها وخلي ابوي يشوف حل. ولو هوَ صاحب عنده لا يصعد ولا ينزل

كملت صلاتي وطلعت اساعد امي بتحضير العشى
نقلنا الاسفره ولاكل.. كملنا نقل وصحنا عليهم
گعدت امي يمي.. شوي واجو ثنينهم گعدين گدامنا

ظلينا ناكل وبابا وعليا يحچون على الشغل ولاوضاع
وعليا كمل شغلة وشترا كلشي وبتعاون مطلب طبعاً
البضاعه والشغلات هوَ گال اتسوكلك ورا العيد ملابس اطفال من تركية على ما عليا يسوي جواز وهوَ يظل يروح يتسوك

وعلى سالفة زواجه تأجل كلشي على واحد واحد.
لان ابوي ما قبل گال اخوي ستوى ميت وعيب من العالم وهم نرجس مرت عمها ام رجل شرار بت اخوها ميته وعيب منها، لذلك تاجل العرس
وهم شني انسوي عرس واخت الاعريس ماكو غير العب فلك

وانا على تواصل دائماً ويا نرجس حتى علاقتنا قوت
وكلامي كثر وياها من اجت العطلة مو ماعندي شي اظل اسولف وياها هيَّ على وردة
وهم على طاري وردة مثل ما گالت اليه هاي الها بالجلسات اسبعوين أو اقل

بس ما تحچيلي علاقتها هيَّ والعاشق
وانا اخلي وغلط عليها وسد الخط بوجها
وهاي هيچ كل ما اخابرها..ولو موجوده قربانو چان كضيتها يمها يومية اروح ورجع عليها

أكل وتذكر.. كملت الأكل على هل حال
ظليت گاعده اباوع الهم منتظره يكملون.
لو اخلي يشربون چاي وفتح السالفة... اي... اي حتى يهضمون الأكل خطيه، كملو أكل وامي عزلت المواعين اخذتهن اغسلهن وهيَّ سوت چاي وحضرتهن ورجعت يمهم

كملت المواعين على السريع.. وصبيت الهم الچاي ومشيت الهم لان المواعين مو هواي امي طبيعتها تغسل الشغلة التسويها حتى لا يتكومن.

وزعت الهم الچاي وخذت گوبي وحطيت الصينيّة
يم امي ومشيت گعدت على الدرج.
باوعت عليهم واحد واحد من ابوي العليا.. خطت الگوب ورتشفت منه منزلته.. سحبت نفس مشجعه نفسي احچي ولو بطني خبطتني
شجعت نفسي وهتت متنقل بنظري من واحد الواحد

غيم:صدگ يابه تدري بذو الفقار رجل قربة طلع صاحي مو مخبل

ذكرت اسم ذو الفقار وعليا دار وجها مباوعلي بخزره وبيده استكان الچاي.. كملت كلامي متجاهله انظاره مباوعه على امي وابوي الي عيونهم تبصبص عليها ما مستوعبين الحچيته

غيم: مثل ما سمعتو لا تباوعن هيچ
طلع صاحي وما بي شي.. وقربة من عرفت بي مختفيه ومحد يعرف هيَّ وين وانا ساكته لان هم گالو بس ايام ونرجعها بس الحد هسه ماكو

شاكر: شجاي تحﺟين بابا

غيم: يابه ذو الفقار طلع ما بي شي ويمثل علينا
وليش والمن سوى هيچ ماعرف
الجواب عدهم مو عندي
لان بيوم الرحنا انا وياك گلولي بس هل كم كلمة وخلوني مثل الاطرش بالزفه وكل ما ا/ول العليا يغلس عني، واحنا قابل نسكت من نسمع بتنا مالها اثر ورجلها يقنع بابو يدلي وين مكانها مو يقبل
روح يابه روح احچي أنتَ وياهم وفتهم منهم شني السالفة

احچي وهمه الثلاثه يباوعن عليَّ
امي وابوي دخلو بحالة صدمة، أما عليا يعض بشفته ويخوزر بيه باوعت عليه وهتفت حاطه گوب الچاي على الدرج

غيم: لا تخوزر علولي أنتَ اول واحد بينه تعرف وما تحچي، اگلك اسالهم وينها
خلي بس يدلونا وين هيَّ وأنتَ تضرب كلامي بعرض الحايط، گلي احنا شمدرينا هيَّ شبيها ما بيها
شمدرينا ما هيَّ هسه شوف شبيها

شاكر: صدگ هل حچي.؟

گال هيچ مباوعين انا وعليا عليه.
رد عليا وهوَ يكوم من مكانه عايف الاستكان بالارض

عليا: اي

رد وهوَ يكوم من مكانه واكف وتعابير وجها تشرح
شاكر: وأنتَ ماتعرف تحچي.!؟

عليا: يابه انتم ما مفتهمين السالفة
افهمو السالفة يله تحچون، هاي الثوله تخوط بصف الستكان.. مفتهمه راس الخيط وجاي ترعد فوك روسكم

فاطمه: احچي اختك وينها.. انا اعرف گلبي لاچمني صارله شكثر، وگلكم دگلولي ما بيها شي

عليا: ماعرف مكانها والله، وما يقبل ابو ذو الفقار يحچي، وذو الفقار جاي يقنع بي حتى يدلي عليها بس ما يقبل

شاكر: شني الما يقبل البت وين موديها

فاطمه: خاف عد اهل ام هاجر.؟

عليا: لا دورو ماكو فص ملح وذاب

يحچون واباوع الهم وبعدني على گعدتي..بينما اباوع الهم ومركزه بالكلامهم..منا ما كمل عليا ابوي گال بس گال هيچ رأساً كمت ناطه

شاكر: انا... انا احچي وياه انا اروح الهم.
شني طلع ما بي شي، وشني ما يقبل يگول وين بتي

غيم: امشي وياك يابه

فاطمه: ظلي هنا انا اروح ويا

شاكر: ولا وحدة منچن، ظلن هنا

غيم: يابه انا امشي وياك وحچي ويا خالة عيدة هيَّ ذاك اليوم خلت مطلب يحچي.. وهسه يمكن تعرف واحچي وياها انزل گدامها دمعه دمعتين هلبت تحچي

احچي زاركه للغرفة مال امي ما سمعت شرد رأساً فتحت الباب جريت العباية وجريت الشال من الباب ولبسته عدل وحطيت العباية على راسي وانا اطلع من الغرفة

باوعت على الصالة ادور ابوي شفته طالع
رأساً ركضت عايفه امي تحچي وراي ما سمعتها شگالت رأساً لبست نعالي وصحت ورا ابوي الي فتح باب الشارع رايد يطلع ورا عليا.. باوعولي وابوي هتف

شاكر: ارجعي المن جايه

مشيت ركض واكفه گدامه هتفت وانا افتح الباب أكثر وهوَ بعدها ايده على الباب وعينه عليَّ وعين على الباب

غيم: امشي يابه امشي انا اعرف اخلي خالة عيدة تحچي بس امشي

كملت كلامي وهوَ رخ ايده موخرها من الباب
وعليا يباوع عليَّ بتنهّيده گايل وهوَ يباوع على ابوي

عليا: انا اظل يم امي

ما رد ابوي خله وطلع وطلعت ورا
سد الباب عليا ورانا
مشينى متجهين البيتهم اندرعم
ابوي بالدشداشة الكريميه ومنا ضعيف وطويل
وانا عباية وشطولني ونعال الوردي وشيله سوده ودشداشة صفره لا بعلي، الوان قاتليه والشكل لا ما ينحچي عليه يخزيييي بس مواقف طارئة مو وقت كشخه ولطخه

سوينا الدرب دقيقتين، دخلنا الفرعهم مباوعين على بيتهم محد طالع، تقربنا من واكفين گدام الباب دكه ابوي وانا ورا، اباوع على الشارع بي كم واحد

رجع ابوي دك الباب مرة ثانية من ماكو اي ستجابه
باوعت على الباب.. بس لا هذا اخذ اهله وراح
لا شبيچ مو هاي سيارته شلون يروح.
باوعت على السيارة وعلى ابوي.. بعدها رجعت نظري على السيارة، كون اركع الجامة بربعيه تكسر الجام تكسر.

طردت الكلام من راسي من اجانه صوت مدري ياهوَ
باوعت على الباب.. شوي ونفتح طالع بوجهنا مطلب مدري النسيب.. لا هذا مطلب مبين من خشمه

ياوع النا مبتسم هتف وهوَ يفتح الباب على حيله وياشر النا ندخل.. بينما ياشر النا عين على ابوي وعين عليَّ ونظراته غريبه.. تجاهلت نظراته داخله ورا ابوي..دخل ابوي گدامي گايل

شاكر: ابوك هنا.؟

مطلب: اي هذا بالصالة

شاكر: ما تصيحه الي اريد احچي وياه

مطلب: اي تعال ادخل انتم مو غربة اهلنا

شاكر: مشكور صيحه الي اريد احچي كم سالفة وروح

مطلب: زحمة عمي تعال على الاقل ادخل الاستقبال

كمل كلامه راد ابوي يرد عليه ولمحت عمو صاحب جاي من المطبخ.. هوَ شافنا واجه طالعه النا
هتف يرحب ويهلي

صاحب: اهلا وسهلا يا منور الدار ادخلو المن واكفين

شاكر: مشكور يصويحبي عود هاي انا الاثق بيك أكثر من روحي... وکول صاحب هوَ اخوي الوحيد.

صاحب: خير خويه شصاير شني هل حچي.؟

شاكر: الفروض انا اگول شصاير يبو ذو الفقار
انا انطيتك بتي طلب منك مو وبكلام السانك.
ردت بتي الابنك چيف حالته خاصه...لا تقاطعني ابو ذو الفقار انا من انطيتك بتي چيف اعرف بتي اصيله وراح تصون ابنكم ونطيتها الابنك مجبروه

اي وداعت كل وحدة بيهن انا اگول گدامكم جبرتها تقبل ببنكم حتى ما اخسر صحبتك
وهم وكفاتك الي لا تعد ولا تحصه اخوتي من امي وابوي ما وكفولي مثلك
بس كل هل حچي الحجيته اليه طلع وهم وكله تأليف

مسح وجها عمو صاحب راد بهدوء وهوَ يأشر النا ندخل، بينما انا باوعت على باب الصالة وعليه

صاحب: تعال نحچي جوه، وانا احچيلك كلشي
تعال جوه منا العالم ماگدر نحچي هنا

باوعلي ابوي واشرلي بعيونه امشي
مشيت ويا بنفس المستوى.
دخلنا المطبخ وبوجهنا للصالة باوعنا على الصالة فارغه مشينى گعدنا،گعدت بصف ابوي وعمو گعد گدامنا وهتف ماشر المطلب

صاحب: گول لامك خلي تسوي چاي

شاكر: مشكور ستونا شربنا

صاحب: ميخالف.

-عوف الچاي ابو ذو الفقار عوف الچاي وحچيلي بتي وين

باوعت على عمو وعلى مطلب الي يباوع على ابوي وعليَّ وعيونه تضحك.
كلبت عيني عنه معدله العباية على راسي
مركزه على كلام عمو.. تحمحم بادي يحچي بهدوء

صاحب: اذا على بتك بخير الحمدلله.
وذا على شلون هذا الحچي،يشهد الله مثلك انا
ماعرفت غير قبل ايام وداعت اصيامي
وانا قبل شوي فاطر.. ماعرف بالسالفة غير قبل ايام وعرفت من بتك عرفت بالموضوع
واجت استنجدت بيه، وطلبت اخذها المكان محد يعرف بي.. وما قبلت اجيبها يمكم وذا ما تصدگ هسه اخابرها الك وسمع بإذنك

غيم: العفو عمو بس، شني الخلاه يسوي هيچ
ترا ما متوازي يسوي روحه مريض

كملت كلامي واجاني صوت وخطوات على الدرج.. رأساً رفعت راسي مباوعه عليه نازل بطوله الفارع الي اطول من مطلب بشوي
وبجسمه المرتب ورتابته رغم ملابسه عادية لابس ملابس بيت

ذو الفقار: لا متوازي اسوي

باوع عليه ابوي وانا ما وخرت نظري منه ومن مطلب
بينما هوَ كمل آخر كلمة نازل آخر باية الدرج مكمل كلامه

ذو الفقار: ما مجبور ابرر. ليش سويت هيچ بس انتم اهلنا، ورغم الحچي الراح نحچي مو أي حچي ينحچي بس مثل ما معتبرينا احنا اهلكم انتم #كثر من هل منزله

ابوي يباوع عليه بتفحص ومركز بكلامه الي يگول شايف شي جديد ولو انا هم صافنه على كلامه لان ما اتذكر سامعه صوته لو كلامه.
بينما احنا صافنين نستمع الكلامه اجه متقربه گاعد على رگبه بصف ابوه وكمل كلامه

ذو الفقار: تدري بامي الله يرحمه متوفيه وخالتي هيَّ الربتنا، بس محد يعرف شلون ماتت امي.
لان احنا انتقلنا من ديرتنا الهنا والعالم ماتعرف شي المهم امي توفت محتركه هيَّ واختي

والحرك مو قدر.. لا بل فعلت فاعل والفاعل منه وبينه والي هوَ عمي ولو ما يستحق كلمة العمي
بس تعرفه أنتَ.. طالب هوَ الى احركهن والسبب كرهه الامي، على سبب حاچيه الجدي الله يرحمه وهوَ من عارف متوعد الها

ومن توفا جدي العالم كلها ملتهيه
وهوَ استغلها فرصه وحركهن هيَّ واختي والحظ خلاني انا اشوف.. ومن ذاك اليوم الحد هذا اليوم انا احسب ومخطط اوكعه بعمايله القذرة حتى اخذ حق امي واختي.. وهسه تسأل دگول اكو الف طريقه ليش هيچ.

انا اگلك ليش اتجهت الهاي الخطوة
يعرف بيه انا امي واختي روحي من الدنيا وموتهن راح يخبلني.. وانا هاي الخطوة خطيتها حتى اگدر اشتغل شغلي بدون ما اخاف على نفسي ويجي يأذيني

طول ما يحچي احنا ساكتين رغم الكلام يخلي بعقل الواحد الف علامة استفهام.. ليش حركهن شنو السبب الي خلاه يحرك روحين مو روح وحدة.؟
بحيرتي وصفنتي، ابوي سأله والدهشه على وجها