💔«Там дзе я, там мой дом» — Наталля Дуліна

Калі Наталля толькі апынулася ў Літве, то была ў вельмі вялікім адчаі.

«Але літаральна на другі дзень я пагутарыла з маці. Яна мне сказала, што і яна, і мой муж вельмі шчаслівыя, што я па-за Беларуссю. Таксама маці сказала, што нарэшце яе трывога скончылася. Пакуль я была ў Беларусі, у 2022 годзе мяне арыштоўвалі тры разы па 15 сутак. Тады мае блізкія пачалі заклікаць, каб я з’язджала з Беларусі іначай мяне пасадзяць. Я ведала, што так будзе. Я толькі вельмі хацела, каб мне далі дагуляць лета. Я выйшла з апошняга адміністарцыйнага арышту 18 чэрвеня і вельмі хацела надыхацца празапас свежага паветра. Мне сапраўды пашанцавала, бо мяне затрымалі 3 кастрычніка. То-бок, далі магчымасць мне пагуляць.

Я сабе сказала, што калі я апынулася тут, то павінна даць сабе ўстаноўку – там дзе я, там мой дом. Я павінна звіць гняздо тут і зрабіць усё, што ад мяне залежыць».

🔹«Мы абіраем паміж дэпартацыяй і турмой»: былая палітзняволеная Наталля Дуліна

«Недахоп сну біў па нервовым стане» — Сяргей Спарыш пра суткі на Акрэсціна

Са словаў Сяргея, супраць затрыманых паводле палітычных матываў у месцах зняволення выкарыстоўваюцца розныя спосабы ціску, але адным з самых жорсткіх са свайго досведу ён назваў пазбаўленне сну на Акрэсціна ў 2020 годзе:

«Цягам двух тыдняў, начамі, кожныя трыццаць хвілін супрацоўнікі грукалі ў дзверы камеры — нібыта правяралі, ці жывы. А я мусіў устаць і падняць рукі. Калі я не ўстаю, то яны заходзяць і самі мяне падымаюць. Як толькі засынаю — мяне адразу будзяць. Днём, вядома, нельга спаць. Вочы заплюшчу — грукаюць. Недахоп сну біў па нервовым стане. Гэта быў проста здзек.

А тыя жанчыны-супрацоўніцы, якія гэтым займаліся, хацелі з'ехаць у Еўропу. Не здзіўлюся, калі яны ўжо атрымалі палітычны прытулак. Я чуў іх дыялог. Адна кажа: "Хачу з'ехаць у Еўропу. Скажу, што я палітычная", а другая на гэта сказала: "Я б таксама з задавальненнем"».

🔹«Калі чалавек гатовы да гэтых выпрабаванняў, турма яго не зменіць», — Сяргей Спарыш

Маладога блогера і захавальніка архіва Клічаўскага краязнаўчага музея асудзілі за «садзейнічанне экстрэмісцкай дзейнасці»

Яўгену Старавойтаву 26 гадоў. Ён родам з Клічава. Пасля школы паступіў у Магілёўскі дзяржаўны ўніверсітэт імя Куляшова, дзе вучыўся на археолага. Яўген — патрыёт сваёй малой радзімы. Ён доўгі час працуе ў Клічаўскім краязнаўчым музеі, захоўвае хронікі музея і арганізоўвае там мерапрыемствы.

А тры гады таму Старавойтаў стварыў праект «Магілёўскія хронікі». Гэта відэаблог пра цікавосткі і займальныя факты з гісторыі Магілёўскага края. Ён мае больш за 4000 падпісчыкаў у ютубе і больш за 7000 — у інстаграме. Праект намініраваўся на конкурс «Падарожнічаем па сінявокай».

Хлопец знік з сацсетак у канцы траўня — яго змясцілі ў СІЗА. Выйшаў ён на пачатку верасня, ужо пасля прысуду па ч. 1 і ч. 2 арт. 361‑4 КК — «садзейнічанне экстрэмісцкай дзейнасці». Яўгену прысудзілі хатнюю хімію. Ён працягвае распавядаць пра свой родны край, піша «Наша Ніва».

🥀Сёння Вітольду Ашурку споўнілася б 55 гадоў

Вітольд — актывіст з Бярозаўкі, супраць якога ў жніўні 2020-га распачалі крымінальную справу за паслявыбарчыя падзеі. Суддзя Максім Філатаў прысудзіў Ашурку 5 гадоў калоніі. 21 траўня 2021 года Вітольд памёр у шклоўскай калоніі пры нявысветленых абставінах. Крымінальнай справы па факце ягонай смерці дагэтуль няма.

У гонар Вітольда «Вясна» абвясціла 21 траўня — Днём палітвязня ў Беларусі.

«Далі пяць гадоў, хай бы сядзеў. Ну яшчэ пяць дайце! Навошта было забіваць? Шкадую, што паміраў адзін у чужых людзях, у такім болі. Не было побач нікога з блізкіх людзей, хто б пашкадаваў, прытуліў яго перад смерцю. Але што цяпер паробіш? Думаю, такая была Божая воля. Ён сам абраў гэты шлях. Я да самай смерці буду плакаць», — казала маці Вітольда.

На фотаздымку Вітольд у верасні 2020-га года — гэта апошняе вядомае фота Ашурка з волі.

Дойліда з Брэстчыны, які будаваў цэрквы ў некалькіх краінах, адправілі калонію па чатырох палітычных артыкулах

Алегу Кіневу 56 гадоў. Ён жыве ў аграрадку Першамайская (Блудзень) у Бярозаўскім раёне. Ён прадпрымальнік, займаецца дахавымі працамі. Ягоная спецыялізацыя — выраб купалаў для праваслаўных цэркваў. Спачатку ён працаваў з брыгадай як наёмны працаўнік, а праз некалькі гадоў адкрыў сваю справу.

Кінеў рэканструяваў купал Патрыяршага прадстаўніцтва РПЦ, ствараў купал для царквы вайсковай часці ў Слоніме, рабіў дубовы мост, прыстань і альтанку на выспачцы побач з сядзібай графа Гутэн-Чапскага ў Станькаве і часоўню ў заапарку. Агулам жа ягоныя працы раскіданыя па розных гарадах і вёсках Беларусі, піша «Наша Ніва».

Нядаўна яго асудзілі па чатырох артыкулах — «распальванне варожасці» (ч. 1 арт. 130 КК), «абраза Лукашэнкі» (ч. 1 арт. 368 КК), «абраза прадстаўніка ўлады» (арт. 369 КК) і «стварэнне экстрэмісцкага фармавання або ўдзел у ім» (ч. 3 арт. 361‑1 КК).

Прысуд невядомы.

📙У гомельскім СІЗА-3 ужо некалькі месяцаў няма бібліятэкара

На дадзены момант падследным дазволілі, каб падпіску на перыядычныя выданні афармлялі іх сваякі ці знаёмыя з волі. Раней гэта маглі зрабіць толькі яны самі, выкарыстоўваючы грошы на сваім асабістым рахунку.

Аднак адсутнасць бібліятэкара азначае і адсутнасць нармальнага карыстання кнігамі з бібліятэкі СІЗА. Паводле інфармацыі @MAYDAYMog, бібліятэкара ў гомельскім СІЗА няма з лета.

🔗Хроніка палітычнага пераследу

Ігар Лосік распавёў пра сустрэчу з Эдуардам Пальчысам за кратамі

Пра гэта былы палітвязень напісаў на сваёй старонцы ў Facebook.

«3 жніўня ў “сталыпіне” ехаў з Пальчысам. Пашанцавала гадзіны 2-3 паразмаўляць. Трымаецца ён годна і па баявому. Адмаўляецца падпісваць памілухі і здымацца для інтэрвію, крэмень, адным словам.

Выканаў яго просьбу сустрэцца з яго жонкай і дачкой і падарыць кветкі ад яго)».

Нагадаем, у 2021-ым годзе палітзняволенаму Эдуарду Пальчысу прысудзілі 13 гадоў калоніі.

Палітзняволеную пенсіянерку з Гомеля пасадзілі ў калонію за «абразу Лукашэнкі», «дыскрэдытацыю Беларусі» і «экстрэмісцкае фармаванне»

Ірыне Кролікавай — 62 гады. На пенсіі Ірына заняла рукадзеллем. Яна вяжа — кручком і спіцамі. Таксама ўласнаручна ўпрыгожвае свой падворак, піша «Наша Ніва».

Апошні раз Ірына ўваходзіла ў «Аднакласнікі» ў студзені. А нядаўна яе асудзілі па трох палітычных артыкулах Крымінальнага кодэксу — «уваходжанне ў склад экстрэмісцкага фармавання» (ч. 3 арт. 361‑1 КК), «абраза Лукашэнкі» (ч. 1 арт. 368 КК) і «дыскрэдытацыя Беларусі» (арт. 369‑1 КК).

Падрабязнасці справы, як і дакладны прысуд невядомыя. Але Ірына застаецца за кратамі, значыць, прысуд звязаны з пазбаўленнем волі.

🔗Хроніка палітычнага пераследу

Працягваюцца затрыманні і суды па «справе Гаюна»

«Вясна» мае інфармацыю пра як мінімум 88 пацверджаных фігурантаў «справы Гаюна», якіх змясцілі пад варту. Агульная ж лічба затрыманых значна больш. Затрыманні адбываюцца да гэтага часу па ўсёй Беларусі, але большая частка — у Гомельскай вобласці.

З пачатку верасня ў «Спіс экстрэмістаў» дадалі 68 чалавек, асуджаных за «садзейнічанне экстрэмізму». Гэта больш чым траціна ад усіх людзей, якіх дадалі ў спіс за гэты час. Частка з гэтых людзей — фігуранты «справы Гаюна», пра якіх невядома праваабаронцам.

Таксама ў Беларусі амаль кожны дзень адбываюцца суды па гэтай справе. Фігурантам прызначаюць як «хімію з накіраваннем», так і калонію. Справы некаторых людзей перадаюць з Мінску ў рэгіянальныя суды.

🔗Хроніка палітычнага пераследу

🌿Калі вашых блізкіх затрымалі па гэтай справе, паведаміце, калі ласка, праваабаронцам праз тэлеграм @Viasnainfo

💔«Я перастаў любіць свой дом, бо яны зрабілі з яго турму»: як у Беларусі адбываюць «хатнюю хімію»

Аляксандр Іванавіч (імя героя змененае з меркаванняў бяспекі) амаль год правёў на «хатняй хіміі» ў Беларусі. Так называюць від пакарання — абмежаванне волі без накіравання ў калонію, калі чалавек абавязаны жыць па месцы жыхарства пад кантролем міліцыі.

Да гэтага наш герой некаторы час правёў у СІЗА, а пасля суда яго адпусцілі дадому — праўда, для яго гэта больш не было «каменнай сцяной» праз пастаянныя праверкі ды прэсінг. Расказваем яго гісторыю.

«Яны як быццам разумеюць, што робяць "дзіч" і ўвесь час нібыта паддобрываюцца з табой, фонам увесь час адчуваецца няёмкасць, яны нібыта хочуць сказаць: "Ну, вы ж усё разумееце". Робяць мярзоту, незаконна затрымліваюць, асуджаюць і катуюць, здзекуюцца — але ўсё адно паводзяць сябе так, быццам яны ні пры чым. Хоць, вядома, хапала і мярзотнікаў, якія ўсё выдатна разумелі»

Чытаць па спасылцы 👉 https://spring96.org/be/news/118870

🌿Чытаць з Беларусі праз сайт-люстэрка

Спецыяліста па бяспецы, які працаваў у МТБ і Белсвісбанку, асудзілі па палітычным артыкуле

Сяргею Пяткевічу 34 гады. Ён мінчук. Па прафесіі — спецыяліст па бяспецы. Сяргей працаваў у банку МТБ, а пасля перайшоў у БСБ-Банк.

У яго ёсць жонка і непаўналетні сын. Сям'я ў іх моцная, разам яны ездзяць на адпачынак і ўвогуле праводзяць шмат часу супольна. Разам з сынам Сяргей вёў тыкток-канал vlad_is_puzzle, дзе разам збіралі пазлы, рабілі арыгамі і розныя вырабы, піша «Наша Ніва».

Апошні раз Сяргей быў анлайн у красавіку 2025 года. Прыкладна ў гэты час ён быў арыштаваны. Пяткевіча асудзілі па ч. 3 арт. 361 КК — «заклікі да санкцыяў ці іншых мераў, накіраваных на прычыненне шкоды Беларусі». Прысуд невядомы.

Студэнта ЕГУ, які прыехаў на летнія канікулы ў Беларусь, выклікалі ў КДБ

Яму прапаноўвалі супрацоўніцтва. Задавалі пытанні ажно да размяшчэння кабінетаў. Хлопец ад супрацоўніцтва адмовіўся і змог з’ехаць з Беларусі. Ці быў гэта адзіны выпадак ці масавае з’ява, Hrodna.life даведацца не ўдалося.

«Еўрапейскі гуманітарны ўніверсітэт у цяперашні час аналізуе працэсы і прадпрымае дзеянні, якія патрабуюць асаблівай увагі для забеспячэння бяспекі нашай супольнасці. Улічваючы сітуацыю, якая склалася, мы часова не даем каментары СМІ», — адказалі ў прэс-службе ЕГУ.

Нагадаем, у верасні стала вядома, што генпракурор Швед накіраваў у Вярхоўны Суд заяву аб прызнанні Еўрапейскага гуманітарнага ўніверсітэта «экстрэмісцкай арганізацыяй».

🔗Хроніка палітычнага пераследу
🗣Паведаміць пра затрыманне
⚖️Атрымаць бясплатную юрыдычную кансультацыю
📝Абскардзіць дзеянні дзяржаўных органаў
✍️Звязацца з журналістамі «Вясны»

💔Памёр пісьменнік Алесь Палынскі — яго жонка за кратамі па палітычнай справе

«У суботу я граў канцэрт, спяваў песні на ягоныя вершы, расказваў прыкалюхі розныя пра яго. У суботу ён памёр. Ён у Полацку, яго жонка ў турме. Яго нават няма каму пахаваць», — напісаў у твітары ягоны сын Ігар Палынскі.

Алесю было 58 гадоў, піша «Наша Ніва».

Яго жонка Ціна Палынская і яе дачка Маргарыта Рабіновіч былі затрыманыя ў траўні і змешчаны пад варту па крымінальнай справе. Іх прызналі палітзняволенымі.

ЕС фінансава падтрымае беларусаў, што пацярпелі ад рэпрэсій

Праграма прызначана для былых палітзняволеных, а таксама беларусаў і беларусак, якія падвергліся адміністрацыйнаму або крымінальнаму палітычнаму пераследу.

💵Памер падтрымкі: да 10 000 еўра!

🔹На гэтую суму ў межах праграмы адна асоба можа атрымаць падтрымку на:

- навучанне і зборы (прафесійная адукацыя, курсы павышэння кваліфікацыі, моўныя курсы, курсы кіроўцы, сертыфікацыя, настрыфікацыя і экзамены);
- выдаткі на пераклад дакументаў;
- пражыванне ў інтэрнаце (для прафесійнай адукацыі да 12 месяцаў);
- грамадскі транспарт (для вочнага навучання працягласцю не менш за 1 месяц);
- падпіскі на праграмнае забеспячэнне і лічбавыя платформы, неабходныя для навучання і перападрыхтоўкі.

Спасылка на праграму і анкета для запаўнення 👉 https://eu4belarus.info/grants02-ex-politicalprisoners-by/

❗️«Значная частка насельніцтва працягвае жыць у атмасферы пастаяннага страху і ціску», — беларускія праваабаронцы ў АБСЕ

У Варшаве другі тыдзень праходзіць найбуйнейшая ў Еўропе канферэнцыя па правах чалавека і дэмакратыі — канферэнцыя АБСЕ па чалавечым вымярэнні. 13 кастрычніка адбыўся сайд-івэнт на тэму «Правы чалавека ў Беларусі». Мерапрыемства арганізаваў Беларускі ПЭН.

На панэлі выступілі прадстаўнікі чатырох праваабарончых арганізацый, якія абмеркавалі актуальныя тэндэнцыі і выклікі для грамадзянскай супольнасці.

«Вызваленне палітвязняў і паслабленне рэпрэсій — гэта два цалкам розныя кірункі. Нават калі заўтра вызваляць усіх палітвязняў і больш не будзе ніякіх зменаў, агульная сітуацыя ў грамадстве не палепшыцца».

Чытаць па спасылцы 👉 https://spring96.org/be/news/118873

🌿Чытаць з Беларусі праз сайт-люстэрка

Беларус у эміграцыі пазбегнуў выдачы па лініі Інтэрпола, але просіць падтрымаць яго праз праблемы з працай і здароўем

Мужчына ўдзельнічаў у пратэстах 2020 года, трапіў пад рэпрэсіі і гвалт сілавікоў, з’ехаў у Польшчу, дзе яму давялося даказваць Інтэрполу, што на радзіме яго шукаюць па палітычных матывах. Зараз ён мае вялікую патрэбу ў падтрымцы праз праблемы са здароўем і адсутнасць працы.

Нягледзячы на пазітыўны вынік сітуацыі з Інтэрполам, беларус адчувае фінансавыя цяжкасці праз праблемы з працай, здароўем, а таксама судовыя выдаткі. Мужчына мае патрэбу ў падтрымцы на першачарговыя патрэбы: аплаціць жыллё, звярнуцца да стаматолага, а таксама атрымаць мясцовыя вадзіцельскія правы, паколькі пацвердзіць беларускія праз амбасаду ён не можа.

Падтрымаць яго на BYSOL

💔4 гады і 3 месяцы таму затрымалі Алеся Бяляцкага, Валянціна Стэфановіча і Уладзіміра Лабковіча

14 ліпеня 2021 года да іх і іншых «вясноўцаў» прыйшлі з ператрусамі. Праваабаронцаў абвінавачвалі ў «кантрабандзе» і «фінансаванні групавых дзеяннях, якія груба парушаюць грамадскі парадак».

У пазамінулым сакавіку суддзя Марына Запаснік прысудзіла «вясноўцам» вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну.

Пазней праваабаронцаў унеслі ў «спіс экстрэмістаў».

💌Месца ўтрымання «вясноўцаў»:
- ПК № 9, 213410, Горкі, Дабралюбава, 16, Аляксандру Віктаравічу Бяляцкаму
- ПК № 15, 213105, Магілёў, п/а Вейна, Слаўгарадская шаша 183, Валянціну Канстанцінавічу Стэфановічу
- ПК № 17, 213004, Шклоў, 1-я Заводская, 8, Уладзіміру Мікалаевічу Лабковічу

💵Падтрымаць «Вясну» 👉 donate.spring96.org

Маладога ветэрынара з вёскі пад Слуцкам асудзілі за «садзейнічанне экстрэмізму»

Эдуарду Мігуну 23 гады. Ён родам з Салігорска. Пасля школы хлопец паступіў у Віцебскую дзяржаўную акадэмію ветэрынарнай медыцыны.

Пасля гэтага Эдуард размеркаваўся ветэрынарам у Слуцкі раён, у калгас побач з невялікай вёскай Крывая Града, і неўзабаве ажаніўся.

Разам з жонкай яны ў мінулым годзе атрымалі падзякі і льняныя коўдры ад старшыні Слуцкай раённай прафсаюзнай арганізацыі аграрыяў як маладыя спецыялісты. Як маладой сям'і ім у дадатак далі па наборы падушак.

Эдуарда асудзілі ў 2025 годзе па абвінавачанні ў «садзейнічанні экстрэмісцкай дзейнасці». Сутнасць абвінавачання невядомая. Меркавана, Эдуард атрымаў «хатнюю хімію», піша «Наша Ніва».

Выйшаў на волю палітзняволены экс-журналіст «Медыя-Палесся» Яўген Нікалаевіч

У 2020 годзе Яўген у якасці відэакарэспандэнта «Медыя-Палесся» асвятляў пратэсты ў Пінску. Журналіст не прымаў непасрэднага ўдзелу ў пратэстах: ён вёў фота– і відэаздымку па рэдакцыйным заданні. 10 жніўня 2020 года пры выкананні службовых абавязкаў Нікалаевіч быў затрыманы і збіты.

У 2020-ым годзе мужчына пакінуў Беларусь. Ён працаваў за мяжой у сферы, не звязанай з журналістыкай. У пачатку 2024 года ён вырашыў вярнуцца дадому і быў затрыманы. Яго асудзілі да 1,5 гадоў пазбаўлення волі ў калоніі ва ўмовах агульнага рэжыму.

Як паведамляе «Медыя-Палессе», Яўген цалкам адбыў тэрмін і выйшаў на волю.