በኬንያ ሰለፈኞች ከፖሊስ ጋር በመጋጨታቸው ቢያንስ ስምንት ሰዎች ሲገደሉ በመቶዎች የሚቆጠሩ ቆሰሉ

በኬንያ የፕሬዚዳንት ዊሊያም ሩቶ መንግስትን በመቃወም በተቀሰቀሰ ህዝባዊ ተቃውሞ በሺዎች የሚቆጠሩ ሰዎች ወደ ጎዳና በመውጣት በተፈጠረው ቀውስ ቢያንስ ስምንት ሰዎች ሲገደሉ 400 ቆስለዋል። እ.ኤ.አ. በ 2024 በሀገሪቱ ከተቀሰቀሰው ፀረ-መንግስት የሰልፍ ማዕበል ከአንድ አመት በኋላ በዋና ከተማዋ ናይሮቢ እና በሌሎች ከተሞች ፖሊስ ከተቃዋሚዎች ጋር ተጋጭቷል። አብዛኞቹ ሰልፈኞቹ “ሩቶ ስልጣን መልቀቅ አለባቸው” በማለት አገዛዙን በሰላማዊ መንገድ እንደሚቃወሙ ምልክት አድርገው ቅርንጫፎቹን እያውለበለቡ ታይተዋል።

መንግስት የተቃውሞ ሰልፎቹን በቀጥታ የቴሌቪዥንና የሬድዮ ስርጭት እንዳይተላለፍ ቢከለክልም አዋጁ በዋና ከተማዋ ናይሮቢ በሚገኘው ከፍተኛ ፍርድ ቤት ተሽሯል። ሩቶ ተቃዋሚዎች ሰላምና መረጋጋት እንዳያደፈርሱ አሳስበዋል።"የተቃውሞ ሰልፎች የኬንያን ሰላም ማፍረስ መሆን የለባቸውም። ነገሮች ሲበላሹ የምንሄድበት ሌላ ሀገር የለንም፤ የሀገራችንን ሰላም መጠበቅ የኛ ኃላፊነት ነው" ብለዋል።

ፖሊሶች ዋና ዋና መንገዶችን በተለይም ወደ ፕሬዝዳንቱ ቤተ መንግስት እና ፓርላማ የሚወስዱትን መንገዶች ዘግተዋል። ባለሥልጣናቱ እሮብ እለት በተካሄደው የተቃውሞ ሰልፍ ላይ የሟቾችን አኃዝ እስካሁን አልገለፁም፤ ነገር ግን የኬንያ የሕክምና ማህበር፣ የኬንያ የህግ ሶሳይቲ እና የፖሊስ ማሻሻያ የስራ ቡድን በጋራ ባወጡት መግለጫ ቢያንስ ስምንት ተቃዋሚዎች መገደላቸውን አስታውቀዋል።

ከተጎዱት 400 ሰዎች መካከል 83ቱ "ልዩ ህክምና" የሚያስፈልጋቸው ሲሆን ስምንቱ ደግሞ በጥይት ቆስለዋል። ጉዳት ከደረሰባቸው ሰዎች መካከል ሶስት የፖሊስ አባላት እንዳሉም መግለጫው አክሎ ገልጿል። የሰብአዊ መብት ተሟጋች ድርጅት የሆነው አምነስቲ ኬንያ የሟቾችን ቁጥር 16 አድርሶታል።

በስምኦን ደረጄ
#ዳጉ_ጆርናል

ህንድ ከ41 ዓመታት በኋላ የመጀመሪያውን የጠፈር ተመራማሪ ወደ ህዋ ላከች

ህንዳውያን ጠፈርተኞችን ጨምሮ ከብዙ ሀገር ሰራተኞች ጋር የጀመረውን የአክሲዮም-4 (አክስ-4) ተልእኮ በተሳካ ሁኔታ የጀመረበትን በዓል ሲያከብሩ ቆይተዋል። ተልዕኮውን በመምራት ላይ ያለው የቡድን ካፒቴን ሹብሃንሹ ሹክላ ወደ ጠፈር የተጓዘ ሁለተኛው ህንዳዊ ሆኗል። ከ26 ሰአታት በላይ ባለው ጉዞ ውስጥ መንኮራኩሯ በአለም አቀፍ የጠፈር ጣቢያ (አይኤስኤስ) ስትደርስ የቡድን ካፒቴን ሹክላ የናሳን ምህዋር ላብራቶሪ ሲጎበኝ የመጀመሪያው ህንዳዊ ይሆናል።

ይህ የጠፈርተኛው ጉዞ የተደረገው ኮስሞናዊት ራኬሽ ሻርማ በ1984 በሩሲያ ሶዩዝ ተሳፍሮ ወደ ጠፈር በመብረር የመጀመሪያው ህንዳዊ ከሆነ ከ41 ዓመታት በኋላ ነው።በቀድሞው የናሳ የጠፈር ተመራማሪ ፔጊ ዊትሰን ጉዞ ተመርቷል። ፔጊ ዊትሰን የአይኤስኤስ ሁለት ጊዜ አዛዥ የነበረ ሲሆን የጠፈር አርበኛ በመሆን ከ675 ቀናት በላይ በህዋ ላይ አሳልፏል። 10 የጠፈር ጉዞዎችን አድርጓል።

አክስ-4 ከናሳ ኬኔዲ የጠፈር ማእከል በፍሎሪዳ እሮብ እለት ተነስቷል። በአክስ-4 ተሳፍሮ ወደ አይኤስኤስ የተደረገው ጉዞ በሂዩስተን በሚገኝ የግል ኩባንያ አክሲዮም ስፔስ የሚመራ የንግድ በረራ ነው። በናሳ የህንድ የጠፈር ኤጀንሲ ኢስሮ እና የአውሮፓ ጠፈር ኤጀንሲ (ኢሳ) መካከል ትብብር አለ። የጠፈር ተመራማሪዎቹ እሮብ እለት ጉዞ ከመጀመራቸው በፊት ሳምንታትን በለይቶ ማቆያ ክፍል ውስጥ አሳልፈዋል።

በስምኦን ደረጄ
#ዳጉ_ጆርናል

በሰሜን አሜሪካ በሙቀት ማዕበል የተነሳ በደርዘን የሚቆጠሩ ሰዎች ሆስፒታል ገቡ

የበጋው የመጀመሪያው ከፍተኛ የሙቀት ማዕበል በምስራቃዊ ሰሜን አሜሪካ መከሰቱን ተከትሎ በደርዘን የሚቆጠሩ ሰዎች ከሙቀት ጋር በተያያዙ በሽታዎች ሆስፒታል ገብተዋል። የአሜሪካ መገናኛ ብዙሃን እንደዘገቡት የከተማዋ ከንቲባ የአስቸኳይ ጊዜ አዋጅ ባወጁበት ወቅት ከ150 በላይ ሰዎች ሰኞ እለት በፓተርሰን ኒው ጀርሲ ከቤት ውጭ በነበረ የትምህርት ቤት የምረቃ ስነ ስርዓት ላይ ታመዋል።

በዋሽንግተን ዲሲ በደቡብ ኮሪያ ባንድ 'ስትሬይ ኪድስ' የሙዚቃ ዝግጅት ላይ ስድስት ሰዎች የሆስፒታል ህክምና ያስፈለጋቸው መሆኑን ሲቢኤስ ዘግቧል። የሙቀት ማስጠንቀቂያዎች ከዩናይትድ ስቴትስ ሚድዌስት እስከ ኢስት ኮስት እንዲሁም በካናዳ ኦንታሪዮ፣ ኩቤክ እና ኖቫ ስኮሺያ ክፍሎች የተሰጠ ሲሆን በሳምንቱ ውስጥ ከ160 ሚሊዮን በላይ ሰዎችን ይጎዳል ተብሎ ይጠበቃል።

በስተደቡብ በአሜሪካ ምስራቃዊ የባህር ጠረፍ፣ በሰሜን ካሮላይና ውስጥ በደርዘን የሚቆጠሩ ከሙቀት ጋር የተያያዙ ጉዳቶች ህክምና ፈልገው መጥተዋል። በማዕከላዊ ሰሜን ካሮላይና ውስጥ ህጻናትን ጨምሮ ቢያንስ 41 ሰዎች ሆስፒታል መግባታቸውን የሀገር ውስጥ የዜና አውታሮች ዘግበዋል። የፓተርሰን ከንቲባ አንድሬ ሳዬግ በሙቀት ላይ የአስቸኳይ ጊዜ አዋጅ በማወጅ በአካባቢው የሚደረጉ የመዝናኛ እንቅስቃሴዎችን በመሰረዝ የማቀዝቀዣ ማዕከላትን ከፍተዋል።

በስምኦን ደረጄ
#ዳጉ_ጆርናል

አውስትራሊያዊቷ ጋዜጠኛ በጋዛ ዙሪያ ባጋራችው ዘገባ ከስራ መሰናበቷ ፍትሃዊ አይደለም በሚል የመሰረተችውን ክስ አሸነፈች

አውስትራሊያዊቷ ጋዜጠኛ አንቶኔት ላቶፍ በኤቢሲ ቴሌቪዥን ላይ ያቀረበችውን በህገወጥ መንገድ ከስራ ተቀንሻለው የሚለውን ክስ በመርታቷ 45,511 የአሜሪካን ዶላር  ማሸነፏን የሀገር ውስጥ ሚዲያዎች ዘግበዋል። የፌዴራል ፍርድ ቤት እንዳስታወቀው ቴሌቪዥን ጣቢያው ፍትሃዊ የስራ ህግን ተቃውማለች በሚል ምክንያት “የእስራኤልን ወታደራዊ ዘመቻ በመቃወም የፖለቲካ አስተያየት ሰንዝራለች ” በሚል ስራዋን በማቋረጥ እንዳሰናበታት ኤቢሲ ኒውስ ዘግቧል።

የሊባኖስ-አውስትራሊያዊት ጥምር ዜግነት ያላት ጋዜጠኛ ላትቱፍ በኤቢሲ ተቀጥራ የምትሰራ ሲሆን  በሂዩማን ራይትስ ዎች የጋዛ ጦርነትን አስመልክቶ በኢንስታግራም የለጠፈውን ዘገባ በኢንስታግራም ገጿ ካጋራች በኋላ ከስራዋ ተባራለች። ይህም ድርጊቷ ኤቢሲ የአርትኦት ፖሊሲውን መጣስ ነው ብሏል። አለም አቀፉ የሰብአዊ መብት ተሟጋች ድርጅት በጋዛ የሚገኙ የእስራኤል ባለስልጣናት ረሃብን የጦር መሳሪያ አድርገው እንዴት እንደሚጠቀሙበት የሚገልጽ ጥናት አሳትሞ ነበር።

ላትቱፍ በፖለቲካ አመለካከቷ፣ በዘሯ እና በእስራኤል ደጋፊ ቡድኖች ሎቢ አድራጊነት ከስራ እንደተባረረች በመግለጽ በተሳሳተ መንገድ ከስራ እንደተባረረች ክስ አቅርባለች። እ.ኤ.አ ከጥቅምት 2023 ጀምሮ የእስራኤል ጦር በጋዛ ላይ በከፈተው ጥቃት ከ56 ሺ በላይ ፍልስጤማውያንን ሲገደሉ አብዛኛዎቹ ሴቶች እና ህጻናት ናቸው። ባለፈው ህዳር የአለም አቀፉ የወንጀለኞች ፍርድ ቤት የእስራኤሉ ጠቅላይ ሚኒስትር ቤንያሚን ኔታንያሁ እና የቀድሞ የመከላከያ ሚኒስትራቸው ዮአቭ ጋላንት በጋዛ በፈጸሙት የጦር ወንጀሎች እና በሰብአዊነት ላይ ወንጀሎች የእስር ማዘዣ አውጥቷል። እስራኤልም በአካባቢው ባደረገችው ጦርነት በአለም አቀፍ ፍርድ ቤት የዘር ማጥፋት ወንጀል ክስ ቀርቦባታል።

በስምኦን ደረጄ
#ዳጉ_ጆርናል

ሚኪያስ ጎማ ፣ ባትሪና ከመነዳሪ አከፋፋይ 

#ለቪትስ
#ለያሪስ
#ለዲዛየርና ስዊፍት
#ለኮሮላ
#3L & 5L እንዲሁም ለከባድ ተሽከርካሪዎች የሚሆኑ ጎማዎች እና ባትሪዎችን ይዘዙን ካሉበት እናደርሳለን

👉የሀገር ውስጥና የውጭ ሀገራት ጎማዎች (ትሪያንግል ፣ ስፖርትራክ ፣ ኮምፈርሰር ፣ አፖሎ ፣ ብሪጅስቶን እና ሌሎችም)

👉 የተገለገሉበት ጎማ ን ዋጋ ተምነን በአዲስ እንቀይርሎታለን

👉 በስልክ ቁጥር 📞...+251-913-701702 / +251-975293297 ይደውሉልን አልያም ተክለሀይማኖት ከሚገኘው ሱቃችን ይምጡ በደስታ እናስተናግድዎታለን

እስራኤል በፈፀመችው ጥቃት ከኢራናዊው የኒውክሌር ሳይንቲስት ጋር 11 የቤተሰብ አባላት ተገደሉ

የኢራን የእንግሊዘኛ ቋንቋ ስርጭር ጣቢያ ፕሬስ ቲቪ እንደዘገበው የኢራን-እስራኤል የተኩስ አቁም ስምምነት ሰኞ መገባደጃ ላይ ከመጀመሩ ጥቂት ቀደም ብሎ ኢራናዊው የኒውክሌር ሳይንቲስት ሴዲጊ ሳበር ከ11 የቤተሰቡ አባላት ጋር በእስራኤል የግድያ ጥቃት ተገድለዋል። እንደ ፕረስ ቲቪ ዘገባ ከሆነ ጥቃቱ የተፈፀመው በሰሜን ኢራን አስታነህ አሽራፊህ በካስፒያን ባህር አቅራቢያ በምትገኝ ከተማ ነው።

በፕሬስ ቲቪ ይፋ የተደረገው ዘገባ እንደሚያሳየው በሳይንቲስቱ የቤተሰብ ፎቶ ላይ የተገደሉት የቤተሰብ አባላት፣ አዛውንቶችን፣ በርካታ ህፃናትን እና ሴቶች እንደሚገኙበት ያሳያል። እንደ ዘገባው ከሆነ እስራኤል በሀገሪቱ ለ12 ቀናት ባደረገችው ጥቃት ቢያንስ 14 የኢራን የኒውክሌር ሳይንቲስቶችን ኢላማ አድርጋለች። በሌላ በኩል የኢራን የስለላ ሚኒስቴር የተኩስ አቁም ስምምነት ቢደረግም በሀገሪቱ ውስጥ የእስራኤል “ክፉ” እንቅስቃሴዎች ሊቀጥሉ እንደሚችል ማስጠንቀቁን የኢራን የዜና ወኪል ፋርስ ዘግቧል።

ፋርስ ሚኒስቴሩን ጠቅሶ እንደዘገበው የእስራኤል ኦፕሬተሮች “የቴሌፎን ስለላ እና ብሄራዊ መረጃ ለማግኘት” በሚል አላማ ለኢራናውያን “የጅምላ የስልክ ጥሪ” ዘመቻ ጀርባ እንደነበሩ ገልጿል። ሚኒስቴሩ በተጨማሪም ኢራናውያን "በብሄራዊ አንድነት አንድነት ላይ እርምጃ እንዲወስዱ ለማነሳሳት "የሐሰት ዜና" መስፋፋትን አስጠንቅቋል። ከእስራኤል ጋር የተኩስ አቁም ስምምነቱ በቀጠለበት ወቅት የኢራን ባለስልጣናት የጸጥታ ጥቃቶችን እያጠናከሩ እና ለእስራኤል ይሰልላሉ ነበሩ ያላቸውን በመቶዎች የሚቆጠሩ ሰዎችን በቁጥጥር ስር በማዋል በሰብአዊ መብት ተሟጋች ድርጅቶች ላይ ስጋት ፈጥሯል።

በስምኦን ደረጄ
#ዳጉ_ጆርናል

ከጁቡቲ እስከ ጋላፊ እና ደወሌ ተሽከርካሪዎች ጉዳት ደርሶባቸዉ ለማስነሳት ከ2.5 ሚሊዮን ብር በላይ እንጠየቃለን ሲሉ የፈሳሽ ጭነት ተሽከርካሪ ባለንብረቶች ተናገሩ

የጁቡቲ መንገድ ለተሽከርካሪዎችና አሽከርካሪዎች ምቹ አለመሆኑ የተገለፀ ሲሆን በመንገድ ትራንስፖርት ፣በጁቡቲ ባለስልጣናት ፣በኤምባሲ እና በሌሎችም አካላት አከባቢዉን ምቹ ለማድረግ ይሠራል ቢባልም ከ1991 ጀምሮ ምንም የተስተካከለ ነገር አለመኖሩ ተነግሯል ።

በጁቡቲ ማቆሚያ ተርሚናሎች አከባቢ ለአደጋ ለሚጋለጡ አሽከርካሪዎች የመጀመሪያ ደረጃ ህክምና መስጫ ተቋማት አለመኖራቸው ሌላኛው ችግር ነዉ ተብሏል ።ከብስራት ሬዲዮ ጋር ቆይታ ያደረጉ የፈሳሽ ጭነት ተሽከርካሪ ባለንብረቶች እንደተናገሩት ከሆነ አንድ መኪና ጁቡቲ ላይ ብልሽት ሲደርስበት ተሳቢዉንና መኪናዉን ለማስነሳት ወደ 1.2ሚሊዮን ብር የሚጠየቅ ሲሆን ከቦታው ቀና ለማድረግ 500ሺህ ብር ፣የማፃፊያ ፣የጀንደር በሪ ፣የጉምሩክ አበል እና የፖምፕ ኪራይ ተደማምሮ ከ2.5 ሚሊዮን ብር በላይ እንደሚጠየቁ ተናግረዋል ።

ይህም መኪናዉ ያለማቋረጥ በወር አራት ጊዜ ቢሰራ በሁለት ዓመት የማይሰራው ብር መሆኑን የገለፁት ባለንብረቶቹ የምንጠየቁ ገንዘብ መኪናዉን ከመጣል አይተናነስም ብለዋል ። ከዛ ባለፈም ተሽከርካሪዉ የሚነሳበት መንገድ የመኪናዉን ደህንነት በጠበቀ መልኩ ሳይሆን ሀይልና ጉልበትን በመጠቀም የተሽከርካሪውን አካላት  በማዉደምና በይበልጥ በማበላሸት መሆኑ ተጠቁሟል ።

አንድ ተሽከርካሪ በጁቡቲ ጋላፊ ኬላ ከመጣ 200 ኪሎ ሜትር ፣በደወሌ ከመጣ 130 ኪሎ ሜትር ሲሆን ጎትተዉ አምጥተው የሚጠይቁት ክፍያ ከ600 እስከ 700ሺህ ብር ነዉ ብለዋል ። እስከ አዲስ አበባ ለማምጣት ሌላ ተጨማሪ ወጪ እንደሚወጣ ተገልጿል ።

በተጨማሪም ከአዳማ እስከ መተሀራ ባለዉ ተሽርካሪ ላይ ጉዳት ደርሶ እዛዉ ሲቆም በአከባቢዉ ያሉ ሚሊሻ ታጣቂዎች በቀን እስከ 20ሺህ ብር የሚጠይቁ በመሆኑ ይህም ከአቅም በላይ ስለሆነብን የሚመለከተዉ የመንግስት አካል አስፈላጊውን ቁጥጥር እንዲያደርግ ጥሪ አቅርበዋል ። ከየትኛውም የመኪና ጥበቃ ክፍያ አከባቢዎች ከመተሀራ እስከ አዳማ ያለዉ ከባድ ክፍያ የሚጠየቅበት መሆኑን ከጣቢያችን ጋር ቆይታ ያደረጉት የፈሳሽ ጭነት ተሽከርካሪ ባለንብረቶች ተናግረዋል ።

በመባ ወርቅነህ
#ዳጉ_ጆርናል

አያቶላህ አሊ ካሜኔይ ኢራን በእስራኤል ላይ 'ድል' እንዳገኘች ተናገሩ

የኢራን ጠቅላይ መሪ አያቶላህ አሊ ካሜኒ አሜሪካ በኢራን እና በእስራኤል መካከል የተኩስ አቁም ስምምነት መደረሱን ካወጀች በኋላ የመጀመሪያ መልዕክታቸውን አስተላልፈዋል፡፡

ካሜኔይ ንግግር፣ በኤክስ ላይ በለጠፉት መልዕክት የኢራን ህዝብ በእስራኤል ላይ ላገኘዉ “ድል” እንኳን ደስ አለህ ለማለት እወዳለሁ በአስፈሪው የጽዮናዊ አገዛዝ ላይ ስላገኘነዉ ድል እንኳን ደስ አላችሁ ሲሉ ጽፈዋል።አያቶላህ ኸሚኒ ሌላ በቴሌግራም አካውንታቸው በፋርሲ ቋንቋ ባስተላለፉት መልዕክት በኢራን ብሄራዊ አንድነት አሞካሽተዉ በወደ 90 ሚሊዮን የሚጠጋ ህዝብ በአንድ ድምፅ፣ ትከሻ ለትከሻ፣ የታጠቁ ሀይሎችን በመደገፍ በአንድነት ቆሟል ሲሉ ተደምጠዋል።

የአሜሪካን የጦር ሰፈሮች መምታት በጣም ጥሩ ነገር ነው እናም ወደፊት ሊደገም ይችላል ሲሉ ካሜኒ አክለዋል፡፡የኢራን ህዝብ ልዩ ባህሪውን አሳይቷል እናም አስፈላጊ ሆኖ ሲገኝ አንድ ድምጽ ከዚህ ህዝብ እንደሚሰማ አሳይቷል ብለዋል፡፡ወደፊት በኢራን ላይ የሚደረግ ማንኛውም ጥቃት ትልቅ ዋጋ ያስከፍላል።ኢራን ዋና ዋና የአሜሪካን ጦር ሰፈሮችን ማግኘት እና መድረስ መቻሏ ትልቅ ነገር ነው ወደፊትም እንደገና ጥቃት ቢሰነዘርበት ሊደገም ይችላል ሲሉ ተደምጠዋል።የኢራን ጠላቶች እኛን ለማጥቃት እንደ ሚሳኤሎች ወይም የኒውክሌር መርሃ ግብሮች ሰበብ ይጠቀማሉ፣ ነገር ግን  እጅ እንድንሰጥ እየፈለጉ ነው ሲሉ ተደምጠዋል።

ሀገራቸው ከእስራኤል ጋር በነበረችበት ጦርነት በኢራን ውስጥ ወደ ሁለት ሳምንታት የሚጠጋ ሚስጥራዊ ስፍራ ከቆዩ በኋላ የ86 አመቱ የበላይ መሪ የሆኑት አያቶላ አሊ ካሜኒ በእስራኤል እንዳይገደሉ በመፍራት ወደ ጥብቅ ጉድጓድ ውስጥ እንደገቡ ይታመናል። ከመንግስት ከፍተኛ ባለስልጣናት ጋር ምንም አይነት ግንኙነት እንዳልነበራቸው ተመላክቷል፡፡በጦርነቱ ወቅት እስራኤል የኢራንን የአየር ክልል በፍጥነት የተቆጣጠረች ሲሆን ወታደራዊ መሠረተ ልማቷን አጥቅታለች። የአብዮታዊ ጥበቃ እና የሰራዊቱ ከፍተኛ አዛዦች በፍጥነት ተገድለዋል፡፡

በጦር ኃይሉ ላይ የደረሰው የጉዳት መጠን አሁንም ግልጽ ያልሆነ እና አከራካሪ ቢሆንም በሠራዊቱ እና በአብዮታዊ የጥበቃ ማዕከሎች እና ተቋማት ላይ የሚደርሰው ተደጋጋሚ የቦምብ ጥቃት የኢራንን ወታደራዊ ኃይል በከፍተኛ ደረጃ ማሽቆልቆሉን ያሳያል። ወታደራዊ ሃይል ከፍተኛ መጠን ያለው የሀገር ሀብት ፈሰስ ሲደረግበት ቆይቷል።በ1989 ለመጀመሪያ ጊዜ መሪ የሆኑት አያቶላህ ካሜኔይ ኢራንን ከእስራኤል እና ከአሜሪካ ጋር በፈጠረችዉ ዉዝግብ ተጠቃሽ ሰዉ ተደርገዉ ይወሰዳሉ፡፡

በስምኦን ደረጄ
#ዳጉ_ጆርናል

በደን ወረራ የተከሰሱ 12 ግለሰቦች በፅኑ እስራት እና በገንዘብ ተቀጡ

በኮሬ ዞን ከ100 ዓመታት በላይ ተጠብቆ በቆየዉ የተፈጥሮ ደን ላይ ወረራ ያደረጉ 12 ግለሰቦች መቀጣታቸውን የደቡብ ኢትዮጵያ ፖሊስ ኮሚሽን ህዝብ ግንኙነት እና ገጽታ ግንባታ ዳይሬክተር ምክትል ኮማንደር አሸናፊ ኃይሌ ለብስራት ሬዲዮ ተናግረዋል።ግለሰቦቹ  በህገ ወጥ መንገድ  የደን ጭፍጨፋ፣ የመሬት ወረራ፣ መሸጥ እና በሌላቸው ሥልጣን መሬትን ለሌሎች ህገ- ወጦች በመምራት የወንጀል ድርጊት ነው ሊቀጡ የቻሉት።

ተከሳሾቹ  የኢፈዲሪ መንግስት ስለ ደን እና አከባቢ ጥበቃ ያወጣውን አዋጅ ቁጥር 1065/2010 አንቀጽ 26(4) እና መሬት ስለመሸጥ እና መለወጥን ለመከልከል የወጣውን የዚሁ አዋጅ ድንጋጌ ተላልፈው ወንጀል የፈጸሙ መሆናቸውን የክስ መዝገባቸው  ያስረዳል።የምርመራ መዝገቡ የደረሰዉ የጎርካ ወረዳ ፍርድ ቤት የተከሳሾችን የእምነት ቃልና የምስክሮችን ቃል በመስማት ጥፋተኛ መሆናቸውን በማረጋገጥ ብይን ሰጥቷል።

በዚህም መሠረት በ1ኛና 2ኛ ተከሳሾች ላይ የ5 ዓመት እስራት እና 20 ሺህ ብር፣ በ3ኛ ተከሳሽ  አራት ዓመት ጽኑ እስራትና 20 ሺህ ብር፣ አራተኛ ተከሳሽ 3 ዓመት ጽኑ እስራት እና 20 ሺህ ብር የገንዘብ መቀጮ እንዲቀጡ ዉሳኔ ተላልፎባቸዋል።ሌሎች ተከሳሾችን በተመለከተ በእያንዳንዳቸው ላይ 2 ዓመት ከ6 ወር እና 15 ሺህ ብር የገንዘብ መቀጮ እንዲቀጡ በማለት ፍርድ ቤቱ ውሳኔ ማስተላለፉን ኮማንደር አሸናፊ ኃይሌ ለብስራት ሬዲዮ ተናግረዋል።

በሳምራዊት ስዩም
#ዳጉ_ጆርናል